ভারতকী প্রধানমন্ত্রী

প্রধানমন্ত্রীবু খংজিনবিয়ু

know_the_pm

নরেন্দ্র মোদী মে ২৬, ২০১৪দা ভারতকী প্রধানমন্ত্রী ওইনা ৱাশক লৌখি অমসুং মহাক নীং খা তম্লবা মতুংদা পোকপা অহানবা প্রধানমন্ত্রীনি। থৌনা ফবা, কৎথোক্লবা অমসুং পুকচেল চেৎপা নরেন্দ্র মোদী কোতি চাম্মা হেনবা ভারত মচশিংগী ইহুল অমসুং অশানি।

মে ২০১৪দা মহাক্না ফম হেক পাইরকপদগী প্রধানমন্ত্রী মোদীনা ভারত মচা খুদিংমক্কী অপাম্বা অমসুং ইহুলশিং অদুবু মপুং ফাবা ঙমগদৌরিবা মাইকৈ খুদিংমক্কী অমসুং অপুনবা চাওখৎ-থৌরাংগী খোংচৎ অমদা খোং থাংবা হৌরকখি। মহাক ‘অনত্যোদয়’, হায়বদি অরোইবা মীশক অদু ফাওবা সেবা ফংহনবা হায়বা ফিদম অদু চেৎনা থাজবা মীশক্নি।

অনৌবা ৱাখল্লোন অমসুং খোংথাংশিংগী পাম্বৈনা সরকারনা, চাওখৎপগী খোংজেল কনখৎহনবা অমসুং মীয়ামদা চাওখৎ-থৌরাংগী কান্নবা ফংহনবা অসি লেপথোকখি। হৌজিক লৈঙাক অসি ইতিং তিংবা, অরাইবা অমদি নুং-পান উবা ঙম্বা ওইরে।

অহানবা ওইনা প্রধানমন্ত্রী জন-ধন য়োজনাগী পাম্বৈনা অমুক্তা ওইখিদ্রিবা মওংদা অহোংবা পুরক্লে মসিগী মখাদা লৈবাক অসিগী মীয়াম পুম্নমক্না লৈবাক্কী শেনমিৎলোন্দা শরুক য়াহনবা অসি ঙমহল্লে। ললোন-ইতিক তৌবদা লাইথোকহনবা হায়বা পান্দম অদুদা মিয়েং থম্লদুনা ‘মেক ইন ইন্দিয়া’গী মহাক্কী খোল্লাওনা ইনবেস্তরশিং অমসুং ইন্ত্রপ্রিনরশিংদা অমুক্তা ওইখিদ্রিবা মওংদা থৌনা অমসুং ইথিল পোকহল্লে। ‘শ্রমেব জয়তে’গী খোংথাং মখাদা লেবর রিফোর্ম তৌবা অমসুং লেবরশিংগী পুকচেল চাওথোকপনা অপিকপা অমসুং ময়াই ওইবা ইন্দস্ত্রীশিংগী শিন্মীশিংগী মপাঙ্গল কনখৎহল্লে অমসুং লৈবাক অসিগী খুৎ-শা হৈবা নরোরোলশিংদসু ইনোৎ হাপ্লে।
অহানবা ওইনা ভারত সরকারনা ভারকী মীয়ামগীদমক খুন্নাইগী ঙাকশেলগী স্কিম অহুম হৌদোক্লে অমসুং মসিগা লোইননা অহল ওইরবশিংদা পেন্সন অমসুং লাইরবশিংগী ইন্সুরেন্স পীবদসু মীয়েং থম্লে। জুলাই ২০১৫দা প্রধানমন্ত্রীনা দিজিতেল ইন্দিয়া শেম্নবগী পান্দমদা, তেক্নোলোজীগী মতেংনা মীয়ামগী পুন্সিদা হেন্না ফবা অহোংবা পুরকপা ঙম্ননবা দিজিতেল ইন্দিয়া মিসন হৌদোকখি।

ওক্তোবর ২, ২০১দা মহাত্মা গান্ধীগী মপোক কুমওনদা প্রধানমন্ত্রীনা ‘স্বচ্ছ ভারত মিশন-লৈবাক শিনবা থুংবদা লু-লানবগী মায়ামগী খোংজং অমা’ হৌদোকখি। খোংজং অসিগী পাক-চাওবা অমসুং মসিগী শাফু অসি পুৱারি ওইরে।

l2014100257537

নরেন্দ্র মোদীগী ফোরেন পোলিসীগা মরি লৈনবা তোঙান তোঙানবা খোংথাংশিংদা মালেমগী খ্বাইদগী গনতন্ত্র চৎপা লৈবাক ভারতকী মালেমগী ফম্বাক্তা অশেংবা থৌনা অমসুং থৌদাংগী মমি তারি। মহাক্না সার্ক লৈবাক পুম্নমক্কী লুচিংবশিংগী মমাংদা ওফিস পাইবা হৌখি। য়ুনাইতেদ স্তেৎসকী জেনরেল এসেমব্লীদা পীখিবা মহাক্কী ৱারোল মালেম পুম্নমক্না থাগৎনখি। নরেন্দ্র মোদী, চহি ১৭ শাংলবা মতমগী মতুংদা নেপালদা, চহি ২৮গী মতুংদা ওস্ত্রেলিয়া, চি ৩১গী মতুংদা ফিজী অমসুং চহি ৩৪গী মতুংদা সেশেল্সতা চৎখিবা ভারতকী অহানবা প্রধানমন্ত্রীনি। ফম পাইরবা মতুংদা নরেন্দ্র মোদীনা য়ুনাইতেদ নেসন্স, ব্রিক্স, সার্ক অমসুং জী-২০ সম্মিৎশিংদা শরুক য়াখি, মদুদা মখল কয়াগী মালেমগী, শেনমিৎলোনগী অমসুং রাজনীতিগী ওইবা ৱাফমশিংদা ভারতকী থবক-থৌরম অমসুং ৱাখল্লোনশিংবু অঙকপা ফংনা থাগৎনখি। জাপানগী মহাক্কী খোংচৎতা ভারত-জাপানগী মরিদা অনৌবা য়ুগকী চেপ্তর অমা হাংথোকখি। মহাক মোঙ্গোলিয়াদা চৎপা অহানবা ভারতকী প্রধানমন্ত্রীনি অমসুং চীনা অমসুং খা কোরিয়াগী মহাক্কী খোংচৎশিং ভারত্তা ইনবেস্ত তৌহন্নবগী মিয়েং অদু মাই পাকখি। ফ্রান্স অমসুং জর্মনীগী মহাক্কী খোংচৎকী মনুংদা য়ুরোপকা লোইননা তৎতনা পাউ ফাওনখি।

শ্রী নরেন্দ্র মোদীনা অরব লৈবাকশিংগা অচেৎপা মরি থম্নবদা হেন্না লুম্না লৌখি। ওগস্ত ২০১৫দা মহাক্কী য়ুনাইতেদ অরব ইমিরেৎকী খোংচৎ চহি ৩৪গী মতুংদা ভারতকী প্রধানমন্ত্রী অমনা চৎখিবা অহানবা খোংচৎনি মদুদা মহাক্না গল্ফ লৈবাকশিংগা লোইননা ভারতকী ইকোনোমিক পার্তনরশিপ হেনগৎহন্নবগীদমক পাক চাওনা হোৎনখি। জুলাই ২০১৫দা শ্রী মোদীনা ময়াই থংবা এশিয়াগী লৈবাক মঙাদা চৎখি। খোংচৎ অসি অখন্নবা অমদি য়াম্না মরু ওইবা ওইখি। ভারত অমসুং লৈবাকশিং অদুগী মরক্তা ইনর্জী, ললোন-ইতিক, সংস্কৃতি অমসুং শেনমিৎলোন্নচিংবা লমশিংগী য়ানৱারোলদা খুয়েক পীনখি। ওক্তোবর ২০১৫দা নই দিল্লীদা পুৱারী ওইরবা ভারত-অফ্রিকা সম্মিৎ পাংথোকখি মসিদা অফ্রিকাগী লৈবাক ৫না শরুক য়াখি। অফ্রিকা লৈবাক্কী লুচীংবা ৪১না সম্মিৎ অসিদা শরুক য়াখি মদুদা ভারত-অফ্রিকাগী মরি অসি চেৎশিলহন্নবগীদমক পাক-চাওনা খন্ন-নৈনখি। প্রধানমন্ত্রী মশামক্না সম্মিৎ য়াওবা লাকখিবা অফ্রিকাগী লুচীংবশিংগা নাকল অনিগী ওইবা মীফম ফম্মিন্নখি।

নবেম্বর ২০১৫দা প্রধানমন্ত্রীনা সিওপি-২১ সম্মিৎতা শরুক য়াখি মদুদা মহাক্না মালেমগী অতৈ লুচীংবশিংগা লোইননা ক্লাইমেৎ চেঞ্জগী মতাংদা খন্ন-নৈনখি। শ্রী মোদী অমসুং ফ্রান্সকী রাষ্ট্রপতি ওলান্দনা ইনর্জীগা মরি লৈনবা মথৌ তাবশিং মপুং ফাহন্নবা সোলর ইনর্জী নীংথিজনা শিজিন্ননবগীদমক ইন্তর্নেস্নেল সোলর এলাইন্স শঙ্গাখি।
এপ্রিল ২০১৬তা প্রধানমন্ত্রীনা ন্যুক্লিয়র সেক্যুরিতী সম্মিৎতা শরুক য়াখি মদুদা মখোয়না মালেমগী ফম্বাক্তা ন্যুক্লিয়র সেক্যুরিতীগী মরু ওইবশিংগী মতাংদা অচেৎপা পাউজেল পীখি। মহাক্না সাউদী অরবতা চৎখি মফম অদুদা মহাকপু সাউদী অরবকী খ্বাইদগী ৱাংবা মীচমদা পীবা ইকাই খুম্নবা (সিবিল ওনর), কিং অব্দুলঅজীজ সেশ পীদুনা ইকাই খুম্নখি।
ওস্ত্রেলিয়াগী প্রধানমন্ত্রী তোনী অবোৎ, চীনাগী রাষ্ট্রপতি শী জিনপিং, শ্রীলঙ্কাগী রাষ্ট্রপতি মৈত্রীপাল সিরিসেনা, রুসিয়াগী রাষ্ট্রপতি ব্লাদিমীর পুতিন অমসুং জর্মনীগী চাঞ্ছেল্লর এঞ্জেলা মর্কেল য়াওনা মালেমগী অতৈ লুচীংবা কয়ানা ভারত্তা লাকখি অমসুং খোংচৎশিং অদুনা ভারত অমসুং লৈবাকশিং অদুগী মরক্তা তেংবাং পীনবা হেনগৎহনবদা মাই পাকপা ফংখি। ২০১৫গী গনতন্ত্র নুমিত্তা রাষ্ট্রপতি বরাক ওবামানা অথোইবা লেংবীরকপা ওইনা ভারতকী খোংচৎতা লাকখি মদু ভারত-অমেরিকাগী মরিগী পুৱারিদী অহানবনি। ওগস্ত ২০১৫দা ভারতনা এফআইপিআইসি সম্মিৎকী য়ুম্বু ওইখি মদুদা পেসিফিক আইলেন্দগী লুচীংবশিংনা শরুক য়াখি। মদুদা পেসিফিক আইলেন্দগা লোইননা ভারতকা লৈনরিবা মরিগী মরু ওইবা খোংথাংশিংগী মরমদা খন্ন-নৈনখি।

নুমিৎ অমবু ‘মালেমগী য়োগ নুমিৎ’ ওইনা পাংথোপ্নবা নরেন্দ্র মোদীগী খোল্লাও অদু য়ুনাইতেদ নেসন্সতা অঙকপা ফংনা মতেং ফংখি। অহনবা ওইনা মালেম পুম্বগী লৈবাক ১৭৭না অপুনবা ওইনা জুন ২১দা ‘মালেমগী য়োগ নুমিৎ’ পাংথোক্নবা ৱারেপ য়ু এন্না পাস তৌখি।
সেপ্তেম্বর ১৭, ১৯৫০দা গুজরাৎকী অপিকপা শহর অমদা পোকখি, মহাক লাইরবা অদুবু নুংশি চান্ননা পানবা ইমুং অমদা চাওরকখি। অহানবা হৌরকপা পুন্সিগী অৱাবশিংনা মহাকপু হোৎনবা কনবগী মগুন তম্বীবতা নত্তনা মীচম মীয়াম্না মখোয়গী নুংতিগী পুন্সিদা থেংনরিবা হুন্দোক্নীংলবা অৱাবশিং অদুবুসু খঙহল্লম্মি। মসিদগী মহাক্না চহি নৌরিঙৈগী মতমদগী হৌনা মশাবু মীচম-মীয়াম অমসুং জাতিগী সেবা তৌনবগীদমক ইথিল পোক্লকখি। হৌরকপগী চহিশিংদা লৈবাক শেমগৎনবগীদমক কৎথোক্লবা জাতিগী লুপ রাষ্ট্রীয় স্বয়ংসেবক সংঘ (আরএসএস)কা লোইননা থবক তৌখি অমসুং মতুংদা মহাক্না রাজ্যগী থাক্তা অমসুং জাতিগী থাক্তা ভারতীয় জনতা পার্তীগা লোইননা থবক তৌদুনা রাজনীতিদা য়াওখি। শ্রী মোদীনা গুজরাৎ য়ুনিবর্সিতীদগী পোলিতিকেল সাইন্সতা এমএ লোইশিল্লম্মি।

২০০১দা মহাক, মহাক্কী ময়ুম রাজ্য গুজরাৎকী মুখ্যমন্ত্রী ওইখি। মহাক্না তার্ম মরি মুখ্যমন্ত্রী ওইবগী রেকোর্দ থমখি। মহাক্না তমথিরবা য়ুহা হাবনা মাং তাকহল্লবা গুজরাৎপু চাওখৎ-থৌরাংগী ইঞ্জিন অমা ওইনা শেমগৎখি মদু ঙসি ভারতকী চাওখৎ-থৌরাংদা মরু ওইবা থৌদাং লৌরি।
নরেন্দ্র মোদী, মীয়ামগী সমস্যাশিং কোকহন্নবা লোইননা মখোয়গী হিংবগী থাক ফগৎহন্নবা হোৎনরিবা মীয়ামগী লুচীংবা অমনি। মহাক্না মীয়ামগী মরক্তা চৎতুনা, মখোয়গী নুংঙাইবদা শরুক য়ামিন্নবা লোইননা মখোয়গী অৱাবা কোকহনবা য়াম্না পামজৈ। মখোংদগী হৌদুনা মীয়ামগা লনাই ওইনা লোইনবগা লোইননা মহাক ওনলাইন্দসু ফংই। তেক্নিকপু নুংশিজবা অমসুং মসিবু খঙবা লুচীংবশিংগী মনুংদা মহাক ভারতকী খ্বাইদগী চাওবা লুচীংবনি। ৱেবসাইৎকী খুৎথাংদা মীয়ামগা লোইনবা অমসুং মখোয়গী পুন্সিদা অহোংবা পুরক্নবগীদমক মতম পুম্বদা থবক তৌরি। মহাক সোশিয়্ল মেদীয়া – ফেসবুক, ত্বিতর, গুগল্স প্লস, ইন্সতগ্রাম, সাউন্দ ক্লাউদ, লিঙ্কদিন, ৱৈবো অমসুং অতৈ ফোরমশিংদা নীংথিজনা শরুক য়ারি।
রাজনীতিদা নত্তনা নরেন্দ্র মোদী ইবগীসু হৈনবী লৈ। মহাক্না লাইরিক কয়া ই, মদুগী মনুংদা শৈরেংশিংসু য়াওই। য়োগনা মহাক্কী নুমিৎ হৌদোকই। য়োগনা মহাক্কী হকচাং অমসুং পুক্নীং অনিগী খল মান্নহল্লি অমসুং নুংতিগী চেন-চোংবগী থবক্তা মসিনা ইংথবা পীরি।

মহাক থৌনা ফবা, মীনুংশি লৈবা অমসুং থাজবতনা থনবা, ভারতপু শেমদোক্কনি অমসুং মসিবু মালেমগী লুচীংবা ওইহনগনি হায়না থাজবগা লোইননা লৈবাক্না য়াথং পীরবা মীশক অমনি।

http://www.narendramodi.in/categories/timeline
http://www.narendramodi.in/humble-beginnings-the-early-years
http://www.narendramodi.in/the-activist
http://www.narendramodi.in/organiser-par-excellence-man-with-the-midas-touch