PMINDIA

News Updates

The content is auto sourced from PIB

কর্নতকাগী উজিরেদা ২০১৭কী ওক্তোবর ২৯দা পাংথোকখিবা মীয়ামগী মীফমদা পিখিবা প্রধানমন্ত্রীগী ৱারোল

মশিং য়াম্না লেংবিরক্লিবা নুংশিজরবা ইচিল ইনাও ইচল ইচেশিং ।

ঙসি ভগবান মঞ্জুনাথকী খুয়াখাদা চংজদুনা ময়াম পুম্নমক্কা উন্নজবগী খুদোংচাবা ফংজবা অসি ঐহাক্কী লাইবক ফবনি । হৌখিবা চয়োলদা ঐহাক কেদর্নাথজীগী মফমদা চৎচরুই । আদি শঙ্করাচার্য়না চহি লিশিং কয়াগী মমাংদা মফম অদুদা রাষ্ট্রিয় এক্তাগীদমক্তা কয়া য়াম্না চাওনা হোৎনরমগনি । ঙসি ঐহাক অমুক হন্না খারোমদা মঞ্জুনাথেশ্বরগী খুয়াখাদা চংজনবগী তঞ্জা ফংজরে ।

ঐহাক্না হায়জবা ঙমজদে মদুদি নরেন্দ্র মোদী হায়বা কনাগুম্বা মীওই অমবু দাক্তর বীরেন্দ্র হেগরেজীবু ইকায় খুম্নজবগী হক অদু লৈব্রা নত্রগা লৈতব্রা? মহাক্না কৎথোকখিবা, মহাক্কী তপস্যা, মহাক্কী পুন্সি; চহি ২০গী নহা ওইরিঙৈ মতমদা ৱান লাইফ, ৱান মিসন, মসিদা মশানা মশাবু কৎথোকখি- অমসুং ঙসিদি কুইরবগী তুংদা তাবা ফংলি, অসুক কুইরবসি নেচরেল ওইরদ্রা? অসিগুম্বা মুৎনাইদ্রবা পুন্সি অমা- মফমদা ইকায় খুম্নবা উৎচবদা মীওই অমা ওইনা ঐহাক য়াম্না অতোন্বা ওইরি । অদুবু মীশিং কোতি চামগা কুনমঙাগী মীহুৎ অমা ওইনা ময়াম্না পিবিরিবা ফমথোল অসিগী মখাদা থবক অসি পাংথোকচবদা ইশা ইথন্তা লাইবক ফবা অমা ওইনা খনজরি ।

অমসুং ঐহাক্না ইকায় খুম্নজবগী তঞ্জা ফংজবা অসিদা, ঐহাক্না হেগরেজীগা লোয়ননা থেংনখিবা খুদিংমক্তা মহাক্কী মায়থোংদগী মোমোন মীনোক অদু কৈদৌনুংদা মাংখিদে । করিগুম্বা পোৎলুম অমত্তগী মমী তাখিদে । মায়থোং মকা লাম্না মোং হাদনা:; গীতাদা নিষ্কাম কর্ময়োগ হায়রিবা অদুগুম্না । মদুদগী হেন্না ইকায় খুম্নবিরম্মী, মহাক্না মোং হাদনা ইফমদা হায়বিরম্মী- মোদীজী চহি ৫০ মপুং ফারে, মসিগী ইকায় খুম্নবা অদু নত্তে; অদোমদি ঐঙোন্দগী হেন্না চহি ৫০ অমগা মতৌ অশুম্না থবক তৌরক্নবা মগুগী গরেন্তি অদু নিরি । অদুক য়াম্না ইকায় খুম্নবিবা, থাজবা ফংলবা, ইশ্বরনা চানবিরবদি, চহি ৮০০গী চাওরবা তপস্যা ইপা ইপুগী মরল ওইনা ফংজরবা, মদু ফাওবদশু পুন্সিগী মীকুপ খুদিংগী থৌদাংদা মাংলোমদা চংশিনবা, মসি পুম্নমক অসি হেগরেজীদগী তমজগদবনি হায়বা ঐহাক খংই । হিরম খুদিংদা, মহৈমশিংগী ওইগেরা, হকশেলগী ওইগেরা, খুঙ্গং চাওখৎনবা ওইগেরা, লাইরবশিংগী য়াইফনবা ওইগেরা, শোথরবা কাংলুপকী য়াইফনবা প্রোজেক্তশিং ওইগেরা; দাক্তর বীরেন্দ্র হেগরেজীনা মশাগী ৱাখল্লোনগী মতুং ইন্না, মশাগী হৈশিংবগী মতুং ইন্না; মহাক্না পোৎলমশিং অসি মফম অসিগী লৈপাক লৈহাও, মতাং মতমগী মতুং ইন্না শেম শাদুনা মাংলোমদা চংশিল্লমী । অমসুং ঐহাক্না ৱাফম অসি ফোংদোকপদা চিংনবা লৈতে, রাজ্য কয়াদা অমসুং লৈবাক অসিদশু স্কিল দিবলপমেন্তকীদমক পায়খৎলিবা খবক পুম্নমক অসিগী, থবক তৌবগী মওং মতৌ, মতৌ করম্না তৌগনি, মদুগী মখল য়াম্লবা মোদেলশিং, দাক্তর বীরেন্দ্র হেগরেজীনা মফম অসিদা শিজিন্নখিবা অদুগা মান্নৈ ।

ঙসি ২১শুবা চহিচা অসিদা মালেমগী ইনাক খুল্লবা লৈবাক ফাওবা স্কিল দিবলপমেন্তকী ৱাফম ফোংদোক্লি । স্কিল দিবলপমেন্ত অসি প্রাইম সেক্তরগী মওংদা লৌনৈ । ভারতকুম্বা লৈবাক অমা মসিদা মীওই মিলিয়ন ৮০০, চাদা ৬৫দি চহি ৩৫ মখাগী নহাশিং লৈরিবা, দেমোগ্রাফিক দিবাইদেন্তকী ঐখোয়না চাওথোকচরিবা, লৈবাক অদুদা স্কিল দিবলপমেন্ত, মদুশু শুপ্নগী পুক থন্না চানবা খক্তা নত্তবা, ভারতকী তুংগী মংলান অদু মংফাওনহন্নবা হৈশিংবা হেঙ্গৎহনবা, মালেম পুম্বদা লাক্কদৌরিবা য়ুগশিংদা হ্যুমেন রিসোর্সকী মথৌতারিবা অদু মপুং ফাহন্নবা হৈশিংবা অদু ফংনবগী থবক অসি দাক্তর বীরেন্দ্র হেগরেজীনা চহি কয়াগী মমাংদা উরম্মী অমসুং থবক অদু মাংলোমদা পুখৎলম্মী ।

অমসুং ঐহাক্না থবক অসি, মসিগী মরুওইরবা থবক অসিবু খোংজেল থুজিনহন্নবা, ঐখোয়গী অসিৱাইদা তীর্থগী লমদা করম্বা মওংদা ওইবনা ফগনি? সম্প্রদায়, আস্থা, পরম্পরাশিং, মখোয়গী পান্দম অদু করি ওইবনা ফগনি? হিরম অদুদা খন্নফম থোকপা চাং অদু লাইবক থিবনা মদু য়ৌনা খন্নখিদ্রে । ঙসি মালেম অসিদা থাক ৱাংলবা ৱিজিনেস মেনেজমেন্ত স্কুল করম্না চৎথরি, মদুগী মতাংদদি খন্ন নৈনরি । মদুগী রেঙ্কিংশু লৈরি । লৈবাক অসিগী চাওর চাওরবা মেগজিনশু মখোয়গী রেঙ্কিং তৌরি । অদুবু ঙসি ঐহাক্না ধর্মস্থলগুম্বা শেংলবা মফম অসিদা লাকপা অসিদা শ্রী বীরেন্দ্র হেগরেজীগী খুয়াখাদা লাকচবা মতম অসিদা ঐহাক্না মালেমগী চাওর চাওরবা য়ুনিবর্সিতিশিংদা বার্তন তৌজরি, হিন্দুস্থানগী চাওর চাওরবা য়ুনিবর্সিতিশিংদা বার্তন তৌজরি মদুদি ঐখোয়না হোস্পিতালশিংগী সর্বে তৌরে, মখোয়গী থবক তৌবগী মওং মতৌ থিজিল্লে । ঐখোয়না ইঞ্জীনিয়রিং কোলেজশিংগী রেঙ্কিং তৌরে । মতম অমসুং কালগী মতুং ইন্না, মতমগী মথৌ তারকপগী মতুং ইন্না মখোয়না সংস্থানশিং অসিগী থৌনা অদু করম্না হিংহন্দুনা থম্লি, হিন্দুস্থানদা অসিগুম্বা সংস্থান অমা অনি খক্তা নত্তে লিশিং কয়া লৈরি হায়বা ঐহাক্না থাজবা থম্লি, মখোয়না হৌজিকশু মীওই কোতি কোতি কয়াগী পুন্সিবু থৌনা হাপ্লি । অমসুং মদুদা ধর্মস্থল অসিনা চহি ৮০০গী হাক্তগী মসিনা মশা মথন্তা খুদম অমা ওইরি ।

মালেমগী য়ুনিবর্সিতিশিংনা ভারতকী অসিগুম্বা আন্দলোনশিংগী মরমদা থিজিল্লগদি অফবা ওইগনি । য়েংবিয়ু, ঐখোয়গী মফম অসিদা করম্বা চৎন লোনচৎ লৈরম্বগে হায়বদু মালেমগী লৈবাকশিংনা অঙকপা ফাওগনি । করম্বা মখলগী চৎন পথাপনো? সমাজকী মনুংদা চৎন লোনচৎ অসি মতৌ পাংথোক্লি? চহি কয়াগী মমাংদগী ঐখোয়গী মনুংদা লৈরিবা অফবশিং অসিদা অদুগুম্বা অফবশিংগী অদুগীদমক চাওথোকচদুনা চাং মান্নবা অমসুং অফবা ওইহন্নবা য়াম্না চাওবা খুদোংচাবা অমা ঐখোয়গী মাংদা লৈরি । অমসুং ঐহাক্না থাজবা থম্লি মদুদি শুপ্নগী অস্থা ফাওবদং অরেপ্পা থমদনা মদুগী বিগ্যানিক ওইবা মওং মতৌগী মায়কৈদশু লৈবাক অসিগী নহা ওইরিবা কাংলুপ্পু পুক্নিং চিংশিনবা মথৌ তাই । 

ঙসি মফম অসিদা ৱুমেন সেল্ফ হেল্প গ্রুপ কাংবুদা রুপে কার্দ য়েন্থোকপগী খুদোংচাবা অমা ফংজরে । মীওই খরনা সংসদতা নবেম্বর, দিসেম্বর, জনুৱারি, ফেব্রুৱারিগী মতাংদা ৱা ঙাংবা কয়া ময়াম্না তারমলগনি, তাখিবা লৈত্রগদি রেকোর্দতা ময়াম্না পাবিয়ু । ঐখোয়গী অচৌ অশাংশিং মশানা মশাবু য়াম্না খং হৈবা শাবশিং অদুনা শভাদা অসিগুম্বা ৱাফম থম্লি মদুদি হিন্দুস্থান অসিদা লাইরিক হৈতবা লৈরি, লাইরবা লৈরি, মসিগী দিজিতেল ত্রানজেক্সন অসি মতৌ করম্না ওইথোক্কনি? প্রজা মীয়াম মতৌ করম্না কেসলেস ওইহনগনি? মসি ওইথোকপা য়ারোই । মীয়ামগী মফমদা মোবাইল ফোন লৈত্রি । কনানা খংবা কয়া য়াম্না ওইদবা ঙাংগদৌরিবা, ৱাফম অমা ফাওবা থাদোক্তে । অদুবু ঙসিদি দাক্তর বীরেন্দ্র হেগরেনা সভাদা পুখৎলক্লিবা ৱাফমশিং অদুগী পাওখুম পিররে ।

খুঙ্গংদা লৈরিবা ঐহাক্কী ইমাশিং ইচল ইচেশিং মহৈ মশিংগী মঙাল ফলব্রা নত্রগা ফংদ্রিবরা, ইবা পাবা ঙমলব্রা ঙমদ্রিবরা; ঙসিদি মখোয়না ৱারেপ লৌরে অমসুং মীওই লাখ ১২না, খজিক খরাক নত্তে । মীওই লাখ ১২না ৱারেপ লৌরে মদুদি মখোয়না মখোয়গী সেল্ফ হেল্ফ গ্রুপকী করোবার পুম্নমক কেসলেস ওইহল্লগনি । শেলয়েক য়াওদনা পাংথোক্কনি, দিজিতেল ত্রাঞ্জেক্সন তৌগনি, রুপে কার্দনা তৌগনি, ভিমএপ্লিকেসন্না পাংথোক্কনি । করিগুম্বা অফবা থবক অমা পাংথোকপগী অপাম্বা লৈবা মতমদা অপনবা অয়েৎপা কয়াশু করিগুম্বা মতমদা খোংজেল থুজিন্নবা খুদোংচাবা অমা ফংহল্লি অমসুং ঙসিদি মদু দাক্তর বীরেন্দ্র হেগরেজীনা উৎলরে ।

ঐহাক্না ময়াম পুম্নমকপু থমোয় শেংনা থাগৎপা ফোংদোকচরি মদুদি ময়াম্না তুংগী ভারতকী মরু হুন্নবা দিজিতেল ইন্দিয়া, লেস কেস সোসাইতীকী মায়কৈদা অফবা খোংথাং অমা থাংজিন্দুনা, মায়কৈ অদোমদা লৈবাক অসিবু পুনবা, অমসুং লমদম অদোমগী মীওইশিংবু মীকপ থোকহল্লে; মফম অদু য়ৌনবা সরকার অমসুং বেঙ্কিং সিস্তেমনা চংশিনবদা মতম কয়া য়াম্না চংগদবনো হায়বা ঙমদে ।

অদুবু অদোম্না মখাদগী শেমগৎ শাগৎপা হৌদুনা ঙসিদি মদু তৌদুনা উৎলরে । ঐহাক্না অদুগুম্বা সেল্ফ হেল্ফ গ্রুপশিংগী ইচল ইচেশিংবু নুঙাইবা ফোংদোকচরি, দাক্তর হেগরেজীবু নুঙাইবা ফোংদোকচরি মদুদি ঙসি মহাক্না লৈবাক অসিগীদমক্তা কান্ননবা অচৌবা খোংথাং অমা লৌখৎলে । হৌজিক্তি মতম অসি অহোংবা লাক্লে অমসুং মসিগী করেন্সি অসি, য়ুগ খুদিংদা হোংদুনতা লাক্লি । করিগুম্বা মতম অমদা নুংগী শেলয়েক চৎনরম্মী, করিগুম্বা মতম অমদা শউনগী শেলয়েক চৎনরম্মী, করিগুম্বা মতম অমদা শনা- লুপাগী চৎনরম্মী, করিগুম্বা মতম অমদা মণি মুক্তাগী চৎনরম্মী, করিগুম্বা মতমদা চেগী চৎনরম্মী, করিগুম্বদনা প্লাস্তিক্কী লাকই । হোংবা নাইদুনা লাকখি, মতমগী মতুং ইন্না অহোবা লাকখি । হৌজিক, হৌজিক্তি দিজিতেল করেন্সিগী য়ুগ অদু হৌরে, ভারত্না থেংথবা অফবা ওইরোই ।

অমসুং ঐহাক্না উবা ফংলে মদুদি শেলয়েক্না সমাজকী ওইবা ফৎতবাশিং পুদুনা লাকই । ইমুং অমদশু ইচানুপানা চাওরক্লবা মতমদা, ইচানুপীনা চাওরক্লবা মতমদা; মমা মপাশিং নুঙাইবা ফাওনবা, পৈশাগী অৱাৎপা লৈতনবা অকক্নবা চাংদা মখোদা পৈশা পিরি । পৈশা চাদিং তৌথোকখিগনি হায়দুনা কিবনা মরম ওইদুনা নত্তে অদুবু মখোয়না পাম্লিবদি মখোয়গী ফুরিৎখাওদা পৈশা য়াম্না য়াওরগদি অঙাংশিং অদুগী লমচৎ শাজৎতা ফৎতবা ওইরক্কনি খনবদগীনি । মরম অদুনা খজিক খজিক্তমক পিবনি অমসুং করি করিদা শিজিন্নখিবগে হায়না তোয়না হংঙি, চাদিং নিয়ম চুম্না পাংথোকখিব্রা পাংথোকতব্রা? ইশানা ইশাগা লোয়ননা একাউন্তেবিলিতী লৈবা অসি য়াম্না চাওবা ৱাফম অমনি ।

ঙসিদি মালেম পুম্বনা হায়রি মদুদি ইশিংগী অৱাবা অসি মীওইবা জাতিগী য়াম্না চাওবা মায়োক্নবা অমা ওইগদৌরি । অমসুং ঐখোয়না কাওরোইদবদি ঙসি ঐখোয়না ইশিং গ্লাস অমা থক্লিবা ইশিং বালতিন অমনা ইরু লুজরিবা অসি ঐখোয়গী হোৎনজমনগী মহৈ নত্তে, অমসুং মদু ঐখোয়গী হক্তা লৈতে । ঐখোয়গী ইপা ইপুশিংনা ৱানা হোৎনরম্বা অদুনা ঐখোয়গীদমক করিগুম্বা খরা থম্বিরম্বনি । মদুনা মরম ওইরগা ঐখোয়না ফংবনি, অমসুং মসি ঐখোয়গী তুংদা লাক্কদৌরিবা চারোল শুরোলগী হক্কীদমক্নি । ঙসি ঐহাক্না তুংগী চারোল শুরোলগীদমক্তা চারিবনি । লাইওইখ্রবা ইপা ইপুশিংনা তৌবিরম্বা অদুম্না লাক্কদৌরিবা তুংগী চারোল শুরোলগীদমক করিগুম্বা খরা তৌরম্বা অসি ঐখোয়গী তৌফম থোকপনি । মসিগী ৱাখল্লোন অসি মীকপ থোকহন্নবা হোৎনবা ওইনা, মহৌশাগী ফিভমবু ঙাক্তুনা থম্নবা য়াম্না চাওবা আন্দলোন অমা ধর্মস্থল অসিদগী হৌদোক্লি । মসি য়ুনিবর্স অপুন্বগী মতেং ওইনবা থবক অমনি হায়না ঐহাক্না খঞ্জৈ ।  

ঐখোয়না করম্বা মখলগী প্রকৃতিগা লোইনগনি । ২০২২, ভারতনা নিং তম্বা ফংখিবগী চহি ৭৫ মপুং ফারক্লনি । ধর্মস্থল অসিদগী অসুক য়াম্না চাওবা খোংজং অমা হৌরি । অমসুং অমুক হন্না ধর্মস্থলদগী খোংজং চংশিল্লবা, দাক্তর হেগরেজীগী থৌজাল ফংলগদি শোয়দনা মায় পাক্কনি হায়বা ঐহাক্কীদি থজবা থম্লি ।

ঙসি ঐখোয়না ঐখোয়গী পুক্নিং লৌশিং, পাঙ্গল, করাম চাওবনা মরম ওইদুনা মালেম ইমাবু লেপ্পা লৈতনা চিংথোক্লি । ঐখোয়না কৈদৌনুংদা ইমা অসি হন্না য়েংখিদ্রি মদুদি ইমা অসি অনা অয়েক য়াওব্রা হায়না । হান্নদি লৌরোক অমতমক লোকলম্মী, অনিরক লোকপা হৌরে অহুমলক লোকপা হৌরে, তাঙ্কক নাইনা লোকপা হৌরে । পোত্থোক য়াম্না থোক্নবা হিদাক লাংথক হাপতুনা লাক্লি, কেমিকেলশিং হাপতুনা লাক্লি, হার হাপতুনা লাক্লি । মহাক্না ওইনিংবা ওইজসনু, ঐহাক্কীদি য়াম্না থুনা কান্নবা ফংলগা লোইরে, ৱাখল্লোন অসিদা ঐখোয় চৎথরি । করিগুম্বা মতৌ অশুম্না চৎথরগদি কদা ফাওবা চৎলগা লেপকদবনো খংদ্রে ।  

ধর্মস্থলদগী দাক্তর হেগরেজীগী লমজিং মখাদা ঙসি ঐখোয়না ৱারেপ অমা লৌবা ঙমলগদ্রা? ঐখোয়গী মফম পুম্বদা লৌমী পুম্নমক্না ৱারেপ অসি লৌবা ঙমলগদ্রা? মদুদি ২০২২, ভারতনা নিং তম্বা ফংখিবগী চহি ৭৫ মপুং ফারকপদা, ঐখোয়না শিজিন্নরিবা য়ুরিয়াগী চাং অদু চাদা ৫০দা হন্থহল্লগনি । ঙসি পাংথোক্লিবা অসি তঙখাইদা হন্থহল্লগনি । ময়াম্না য়েংবিয়ু মালেম ইমাবু ঙাক্তুনা থম্নবা কয়া য়াম্না চাওবা থৌদাং ওইগনি । লৌমীশিংগী পৈসাশু লেমলগনি, মখোয়গী চাদিং হন্থরগনি, পোৎথোক্তশু তাথবা লৈরোই । অমসুং মদুগী মথক্তা মহাক্কী লৌবুক লমহাংদা, মালেম ইমানা থৌজানবিরনি, মদুনা শেন্দোং লৈহন্নবা মরমশু ওইরগনি ।

মতৌ অদুম্না ইশিংশু, ঐখোয়না খংলে মদুদি কর্নতকা মনুংদা ইকংনা মরম ওইদুনা করম্বা ফিভম ওইবগে হায়বা অদু । ইশিং য়াওদনা কয়া য়াম্না অৱাবা মায়োক্নবগে হায়বা অদু । অমসুং ঐহাক্নদি উবা ফংলে মদুদি ঐখোয়গী য়েদুরপ্পাজী, সুপারীগী দাম কায়বা মতমদা লাক্তুনা ঐহাক্কী ঙকশম পায়রম্মী গুজরাতকী মুখ্যমন্ত্রী ওইবা মতমদশু । মহাক্না হায়রম্মী মোদীজী অদোম্না লৈবিরো অদুবু ঐখোয়গী মেগলোর মফমবু কল্লো, চেন্দুনা লাকলম্মী ।

ইশিং, ঐখোয়গী লৌমীনা মাইক্রো ইরিগেসনগী মায়কৈদা ২০২২ ফাওবদা, তপক সিনচাই, পর দ্রোপ- মোর ক্রোপ ৱারেপ অসি লৌদুনা মাংলোমদা চংশিনবা ঙমলগদ্রা? ইশিং ইরিক ইরিক, মোতী অমগুম্না মতৌ করম্না মদু শিজিন্নগনি, মোতীগী মমল অদু ইরিক অমমমগী মমল খংনা ঐখোয়না করম্না থবক তৌগনি, করিগুম্বা পোৎশকশিং অসি লোয়নদুনা ঐখোয়না চৎলগদি অচৌবা অহোংবা অমা পুরকপা ঙমগনি হায়বা ঐহাক্না থাজবা থম্লি ।

অমসুং কর্নতকা সরকারদশু ঐহাক্না খংহনজরি । ভারতকী রাজ্য ১৫না ভারত সরকারগা লোয়ননা জিইএমগী এমওয়ু তৌনরে । কর্নতকা সরকারশু থিন্থরগনু, মাংলোমদা চংশিনবিরো । মসিনা কর্নতকা মনুংদা মীচম প্রজানা পুথোক্লিবা পোৎথোক অদু চাওনা লৈবিনবা লৈরগনি । মদুগী কান্নবা অদু মফম অসি লাইরবদগী লাইরবা মীওইশু মখোয়না পুথোক্লিবা পোৎথোক অদুগী শোয়দবা কৈথোল অমা ফংলগনি অমসুং মহাক্না গরেন্তি শেনফমশু ফংলগনি । কর্নতকা সরকারনা মসিগী বার্তন অসি লৌবিবা অদু ঐহাক্না পাম্লি অমসুং কর্নতকাগী মীচম প্রজাদা ফংলিবা কান্নবা ফংলিবা পোৎ অদুগী কান্নবশু মখোয়না ফংগনি ।

ঐখোয়না আধারবু, ঙসিদি অদোম্না উবিরম্মগনি- রুপে কার্দপু আধারগা শম্নহল্লে, মোবাইল ফোনগা শম্নহল্লে, বেঙ্ককী সেবাশিং ফংহল্লে । ঐখোয়গী লৈবাক্তা লাইরবশিংশু কান্নবা ফংহন্নবা, মশিং য়াম্লবা প্রোজেক্তশিং পায়খৎলে । অদুবু খংলুবা ঙমদে মদুদি মখোয়গীদমক পায়খৎলিবা প্রোজেক্তশিং অসি মখোয়দা ফংলিব্রা নত্রগা অতোপ্পা মফম অমদা চৎখিব্রা হায়বা অদু খংবা ঙমদে । মরক্তা মফম খরদা চিৎথ নান্থখিবা য়াওবা জাৎলা?  

ঐখোয়গী লৈবাক্কী প্রধানমন্ত্রীনশু হায়বিখ্রে মদুদি দিল্লিদগী লুপা অমা থাদোকখিবা মতমদা খুঙ্গং য়ৌবদা পৈশা ১৫ খক্তা ঙায়খি । শেন অসিবু তক্লিবশি কনানো? মসি কনাগী খুৎনো মদুনা লুপা অমবু পৈশা ১৫ ওইহল্লিবা? ঐখোয়না ৱারেপ লৌরে মদুদি দিল্লিদগী লুপা অমা থাদোকখ্রবদি লাইরবশিংগী খুৎতা পৈশা ১০০দা ১০০ ফংগদবনি, ৯৯ নত্তে । অমসুং মদুগী হক লৈরিবা অদুগুম্বা লাইরবা অদুদা ফংগদবনি । ঐখোয়না দাইরেক্ত বেনিফিত ত্রান্সফরগী খুদোংচাবা ফংহল্লে, রেজিস্ত্রেসন তৌরে অমসুং ঐহাক্না অসিগুম্বা শেংলবা মফম অসিদা ফমলি, দাক্তর বীরেন্দ্রজীগী নাকলদা ফমলি, শেংলবা মফম অসিগী মগুন ঐহাক খংজৈ, পুকচেল শেংবা অদু ঐহাক খংজৈ, অমসুং অসিগুম্লবা শেংলবা মফম অসিদগী ঐহাক্না হায়জরি; ঐখোয়না হোৎনখিবা অসিনা মরম ওইদুনা হৌজিক ফাওবদা, হৌজিক্তি রাজ্য পুম্নমক্না ঐখোয়গা শম্নদ্রি, রাজ্য খরনা ইমিতেতিব লৌরে, ভারত সরকারনা মশিং য়াম্লবা ইনিসিয়েতিবশিং লৌরে; হৌজিক ফাওবদা লুপা কোতি লিশিং য়াঙ্খৈতরেৎ- লুপা কোতি লিশিং ৫৭; কনাগুম্বা আইন্না য়াদবা মীশিংগী নাক্তা চৎখিগদবা অদু, হুরানখিগদবা অদু; মদু পুম্নমক থিংজিল্লে অমসুং অচুম্বা মীওইশিংগী খুৎতা অচুম্বা পৈশা অদু য়ৌহল্লে ।

হৌজিক ইফমদা হায়বিয়ু কনাগুম্বা অমগী ফুরিৎখাওদা চহি খুদিংগী কোতি লিশিং ৫০-৬০ চংলম্বা অদু মখোয়গী ফুরিৎখাওদা চংবা তোকখ্রে- মখোয়না মোদীবু পামখিগদ্রা? মোদীবু শম ফোয়গদ্রা নত্রগা ফোয়রোইদ্রা?

মরূপশিংনা ইন্থোকলি, অদুবু ঐহাক্না অসিগুম্বা শেংলবা মফম অসিদা লেপতুনা হায়রি ঐহাক লৈগেরা লৈরোইগেরা, লৈবাক অসিবু লৈখা তানা মাংহল্লোয় । ঐহাক্না ইশা ইথন্তগী হিংবা তমলক্তে, ঐহাক অঙাং ওইরিঙৈদগী অতোপ্পশিংগীদমক হিংদুনা লাক্লি ।

মরম অসিনা ইচিল ইনাও ইচল ইচেশিং, ঐহাক্কীদমক্তদি লাইবক ফবনি- ঐহাক্কী পুক্নিংদা ৱাখল্লোন অমা লাক্লি- মদুশু ঐহাক্না দাক্তর বীরেন্দ্রজীগী মাংদা থম্বা পাম্লি । ঐহাক্না মহাক্কী বিগ্যানগী ওইবা পোৎলমশিংগী মরমদা য়াম্না মমুৎ তানা খংলুদে, লে মেন অমা ওইনা হায়জরি । অমসুং ঐহাক্না থাজবা থম্লি অদোম্না তৌদুনা উৎকনি । ঐখোয়গী সমুদ্র মপাল অসি- মেংগলোরগী মাংদা লৈরিবা সমুদ্র মপাল অসিদা ঐখোয়গী ঙামী ইচিল ইনাও ইচে ইচলশিংনা থবক তৌরিবা অসি- চহি অমদা থা খরা খক্তমক মখোয়দা থবক ফংলি, তুংদা নোং লাক্তুনা থবক লেপ্লি । অতোপ্পা থবক অমশু ঐখোয়না সমুদ্র মপাল অসিদা তৌবা য়াই, য়াম্না নিংথিজনা তৌবা য়াই, মদুদি সি ৱীদকী লৌউ পথাপনি । উগী করাপা অমা শেম্বা মথৌ তাই- মদুদা ৱীদ খরা হাপতুনা সমুদ্র মপালদা ইশিংদা থাদোক্তুনা থমগদবনি । মদুনা তাওদুনা লৈগনি অমসুং নুমীৎ ৪৫ শুবদা পোৎথোক অদু লোকপা য়ারে । য়েংবদা য়াম্না ফজৈ অমসুং ইশিং মরাং কায়না য়াওই ।

ঙসি ফার্মাক্যুতিকেল ৱার্ল্দগীদমক য়াম্না মপাঙ্গল লৈবা পাম্বী ওইনা লৌনৈ । অদুবু ঐহাক্না অতোপ্পা থবক অমগীশু পনজরমগে । ঐখোয়গী অসিৱাইগী সমুদ্র তোর্বানদা ৱুমেন সেল্ফ হেল্ফ গ্রুপকী খুথাংদা মখল অসিগী সি ৱীদকী লৌউ পথাপ অসি হৌদোকলশি । নিমীৎ ৪৫দা লৌরোক লাকপা হৌরগনি, থা ১২ লৌরোক ফংদুনা লৈগনি অমসুং পাম্বী অদু লৌমীশিংনা লৌ খোয়বা মতমদা মদুগা লোননা লৈবাক্তা তোৎশিনবিয়ু । মদুগী মনুংদা ইশিং মরাং কায়না য়াওই অমসুং মদুদা ন্যুত্রিসন ভেলু য়াম্না য়াওই । ধর্মস্থল অসিগী মনাক অনকপদা অমুক্তং চাংয়েং তৌদুনা য়েংবিয়ু । ঐহাক্না থাজবা থম্লি মদুদি মফম অসিগী লৈপাক লৈহাওবু ফগৎহনবদা মসিগী সী ৱীদকী পাম্বী অসি য়াম্না কান্নবা ওইগনি, লেম্না থৌরাং কয়া তৌরগনি । মদুনা ঐখোয়গী ঙামী ইচিল ইনাওশিংদশু শেন্থোক লৈহল্লগনি অমসুং মদুদা য়াওরিবা ইশিংগী শরুক অদুনা লৈপাক্তশু ইনিল লৈহল্লগনি । ধর্মস্থল অসিদগী হৌবা অদু ঐহাক্না পামজৈ । করিগুম্বা মফম অসিদা পাংথোক্লগদি অদোমগী সাইন্তিসশিং লৈরে, অদোমগী ইদুকেসনগী মীওইশিং লৈরে, মদুগী থিজিনবা অদুগী রিপোর্ত অদু ইফমদা য়ৌহনবিরকউ । সরকারদা ঐহাক্না থবক অসি কদৌনুংদা হায়খিদ্রি, মফম অসিদা ঐহাক্না অহানবা ওইনা হায়রি । অদোম্না পুক্নিং মকা লাম্না তৌবা য়াগনি ।

ঐহাক অমুক হন্না মফম অসিদা লাকচরে, দাক্তর বীরেন্দ্রজীগী থৌজাল ঐহাক্না ফংজরে । মঞ্জুনাথেশ্বরগী থৌজাল ফংজরে, অনৌবা থৌনা অমা ফংজরে । করিগুম্বা মফম অসিগী চমজরবা ইবা পাবা হৈরবা ইমাশিং- ইচল ইচেশিং, ইচল ইচে লাখ ১২, করিগুম্বা কেসলেসকীদমক মাংলোমদা লাক্লগদি মসিগী জিলা পুম্বদা নিংশিংজরি, ঐখোয়না অসিগুম্লবা ইচল ইচেশিং অসিদগী তাথনা লৈরগুমশি, অদুগুম্লবা সেল্ফ হেল্ফ গ্রুপশিং অদুদগী । ঐখোয়শু ভীমএপ্লিকেসন শিজিন্নবা তম্লশি । ঐখোয়শু কেসলেস ত্রাঞ্জেক্সন তম্লশি । অদোম্না য়েংবিয়ু লৈবাক অসিদা পুকচেল শেংবগী য়ুগ অদু হৌরবনি । পুকচেল শেংবদা ঐখোয়না পুক্নিং থৌগৎলিবা মখৈ, পুকচেল শেংদবা অদু মশিং হন্থরকপা মশানা তাবনি । পুকচেল শেংদবশিংদা পুক্নিং থৌগৎপা মতম অমা লৈরম্মী, হৌজিক্তি পুকচেল শেংবদা পুক্নিং থৌগৎপা মতম অদু লাক্লে । অমসুং মসিগী থৌনা অসিনা করিগুম্বা মৈরা চুখৎলগদি অমম্বা অদু চৎখিবা মশানা তাবনি । করিগুম্বা ঐখোয়না পুকচেল শেংবদা থৌনা পিরগদি পোকচেল শেংদবা অদু চৎথোকখিবা মশানা তাবনি । মদুগী ৱারেপ অদুগা লোয়ননা মাংলোমদা চংশিল্লশি । ময়াম পুম্নমকপু ঐহাক্না নুঙাইবা ফোংদোকচরি । দাক্তর বীরেন্দ্র হেগরেজীবু ঐহাক্না নুঙাইবা ফোংদোকচরি অমসুং মফমদা ইকোক নোনজরি । চহি ৫০গী সুদীর্ধকাল অমসুং লাক্কদৌরিবা চহি ৫০ ফাওবা অমগশু লৈবাক অসিবু, মফম অসিবু মতৌ অদুম্না সেবা তৌবা ওইরসনু ।

হন্না হন্না থাগৎচরি ।