PMINDIA

News Updates

The content is auto sourced from PIB

সেপ্তেম্বর ২৪, ২০১৭তা রেদিওদা পীখিবা প্রধানমন্ত্রীগী ৩৬শুবা মন কী বাতকী তাঙ্কক

 

 

ঐগী নুংশিজরবা লৈবাক মচাশিং, অদোম্বু খুরুমজরি। অকাশবাণীগী থোংদা মন কী বাতহায়না হায়না চহি অহুম হৌখ্রে। ঙসি মসিগী ৩৬শুবা ইপিসোদনি। মন কী বাতঅসি অমরোমদা ভারত অসিগী কাচিনকোয়া খুদিংমক্তা লৈরিবা ৱাখল্লোনশিং, অপাম্বশিং, আশাশিং অমসুং করি করিগুম্বদা ৱাখলশিংগী অচুম্বা পাঙ্গল অদুনি, করিগুম্বদা ৱাকৎ অদুসুনি, মীয়ামগী পুক্নীংদা ইহৌরক্লিবশিং অদু মন কী বাতনা ঐগা লোইনদনা লৈহন্নবা অমত্তা ঙাইরবা তাঞ্জা অমা পীবীরি অদুগা ঐনা মসি কৈদৌঙৈদসু হায়খিদে মদু ঐগী পুক্নীংগী ৱানি হায়না। মন কী বাতঅসি ইরৈবাকচাশিংগী পু্ক্নীংগা মখোয়গী ৱাখল্লোনগা মখোয়গী অপাম্বা আশাশিংগা মরি লৈনৈ । অদুগা ঐনা মন কী বাততা পাউদম্লিবশিং অসি লৈবাক অসিগী কাচিনকোয়াদগী লাকপা ৱাখল্লোনশিং অদুনি, ঐনা অদোমদা পাউদমজবদি খজিক খক্তনি ঐঙোন্দদি অচৌবা লনগৈ অমা ফংলিবনি। ইমেলগী খুৎথাংদবু ওইরবসু, তেলিফোন্দবু ওইরবসু, Mygovতবু ওইরবসু, নরেন্দ্র মোদী এপতবু ওইরবসু, ঐঙোন্দা মীয়ামগী ৱাখল্লোন অদুক্কী মতিক ফংই। অয়াম্বনা ঐঙোন্দা ইথিল পীবা ঙাক্তনি। সরকারগী থৌরমশিং চুমথোক্নবগী ৱাফম কয়ামরুম্নি। অদুগা করিগুম্বদনা লনাইগী ওইবা ৱাকৎসু য়াওই অদুগা করিগুম্বদনা মীয়ামগী ওইবা সমস্যাশিংদা পুক্নীং চিংশিল্লি। অদুগা ঐদি থা অমদা অদোমগী পুংখাই অমগী মতম লৌজৈ, অদুবু মীয়ামদি নুমিৎ ৩০নি অসি মন কী বাতকা মরি লৈননা মশাগী ৱাফম য়ৌহল্লক্লি। অদুগা মসিনা মরম ওইদুনা খুন্নাইদগী লাপ্না করি করম্বা পাঙ্গলশিং লৈরি হায়বদু সরকরদা ফাওহল্লি অমদি মাইকৈ অদোমদা পুক্নীং চিংশিলহল্লি। মরম অদুনা মন কী বাতকী চহি অহুমগী খোংচৎ অসি ইরৈবাকচাশিংগী ৱাখল্লোনশিংগী হকথেংনবগী খোংচৎ অমনি। লোইননা তেল্লবা মতম অসিদা লৈবাক অসিগী মীচমশিংগী ৱাখল্লোনবু খঙননবগী তাঞ্জা অমা ফংলিবা অসিগীদমক ঐহাক ইরৈবাকচাশিংগী লমন য়াম্না তোল্লবনি। মন কী বাততা মতম লৈবা খিবিক্তা আচার্য বিনোবা ভাবেগী ৱাফম অমা নীংশিংই। অচার্য বিনোবা ভাবেনা মতম লৈবা খিবিক্তা হায়, ‘সরকারগী নত্তবা অসিনা হেন্না মতিক লৈঐহাক্নসু ‘মন কী বাত’তা লৈবাক অসিগী মীয়াম্বু ময়াইদা থম্ননবা হোৎনজৈ। রাজনীতিগী মচুদগী লাপ্না থম্মি। খুদক্কী ওইবা, মৈশা অমদি অশাওবা মরক্তসু মদুদা চেন্থহনখিবগী মহুত্তা অচেৎপা পুক্নীংগা লোইননা অদোমগা লেংদনা লৈননবা হোৎনৈ। ঐনা থাজৈ মদুদি হৌজিক চহি অহুমগী মতুং অসিদদি সোসিএল সাইন্তিস্তশিং, য়ুনিবর্সিতীশিং, রিসর্স স্কোলর্শিং, মেদিয়া এক্সপর্তশিংনা মসিদা শোইদনা নৈনবীরক্কনি। অফফত্তা পোৎ খুদিংমক পুথোরক্কনি। অদুগা ঐনা থাজৈ অসিগুম্লবা খন্ননৈনবা অসিনা তুংদা লাক্কদবা মন কী বাততসু হেন্না কান্নহনগনি। মসিদা অনৌবা ৱাখল্লোন অমদি অনৌবা ইথিল ফংগনি। অদুগা ঐনা মন কী বাততা হায়খি মদুদি ঐখোয়না চাবা মতমদা ঐখোয়গী ওক্কদবদুতং য়েংলগা লৌগদবনি অরেম্বদা মাংহল্লোইদবনি। অদুবু মসিগী মতুংদা ঐনা থেংনজৈ লৈবাক অসিগী কাচিন কোয়াশিংদগী চিথি কয়ামরুম ফংজৈ, খুন্নাইগী থাক্তা শেম্বা লুপ কয়া, নহা ওইরিবা কয়া অমনা হান্ননা থবক অসি পাংথোক্তুনা লাক্লি। পুখমদা হুন্দোক্লম্বা অরেম্বা চাকশিং অদু খোমজিল্লগা মদুবু অতোপ্পা মওংদা করম্না শিজিন্নগনি হায়বা অসিদা থবক তৌবা মীওই কয়া ঐনা থেংনরে। ঐহাক অসুক্কী মতিক পঞ্জৈ অমসুং নুংঙাইজৈ।

 

নোংমা ঐনা মন কী বাততা মহারাষ্ট্রগী থবক্তগী পোত্থারবা ওজা শ্রীমান চন্দ্রকান্ত কুলকর্ণীগী ৱাফম পনখি, মহাক্কী পেন্সন লুপা লিশিং তরা তরুক ফংলম্মি, মদুদগী মহাক্না লুপা লিশিং ৫ পোস্তদেতেদ চেক ৫১ পীদুনা লুবা নানবগীদমক্তা মহাক্না দান তৌরম্মি। অমসুং মসিগী মতুংদা মীওই কয়ামরুম্না লু নানবগী খোংজংশিংগীদমক অসিগুম্বা থবক তৌননবা মাংদা চংশিল্লক্লি।

 

নোংমা ঐনা, হরিয়াণাগী সর্পঞ্চগী সেল্ফী ৱিদ দোতরউখি মদু ঐনা মন কী বাততা পুম্নমক্কী মফমদা থমখি। উনা উনা ভারত খক্তদা নত্তনা মলেম পুম্বদা সেল্ফী ৱিদ দোতরঅচৌবা খোংজং অমগী মশক ওইখি। মসি শুপ্নতগী সোসিএল মেদীয়াগী ৱাফম খক নত্তে। ইচা নুপী খুদিংমক্না ইশানা ইশাবু থাজজবা, অনৌবা চাওথোকচবগী ৱাখল ফাওহনবা থৌদোক অমা ওইরে। মমা মপা খুদিংমক্তা ফাওহল্লে মদুদি ঐসু ইচা নুপীগা সেল্ফী লৌগে। মচা নুপী খুদিংমক্নসু খল্লে ঐগীসু থোইদোকপা মফম অমা লৈ।

 

মতম খরগী মমাংদা ঐহাক ভারত সরকারগী তুরিজম দিপার্তমেন্তকা লোইননা ফম্লম্মি। ঐনা লম কোইবা চৎলিবা মীপুম খুদিংমক্তা হায়রম্মি মদুদি অদোম্না চৎলুবা লমদম খুদিংমক্কী ফোতো ইনক্রিদিবল ইন্দিয়াদা থাবীরকউ, ভারতকী কাচীনকোয়াদগী থারকপা ফোতো কয়ামরুম অদু তুরিজমগী লমদা থবক তৌরিবশিংগীদমক্তদি অচৌবা লনগৈ ওইরে। অপীকপা থৌদোক অমনা অচৌবা খোংজং অমা ওইল্লি হায়বা অসি ঐনা মন কী বাততগী খঙবা ঙম্লে। ঙসিদি নীংশিংলুবদা হৌখ্রবা চহি অহুম অসিদা থৌকখ্রিবা থৌদোক কয়ানা ঐগী থমোই লায়ুমদা থন্দুনা লৈখ্রে। লৈবাক অসি মিকুপ খুদিং অচুম্বা মাইকৈদা খোং থাংজিন্নবগীদমক খৌরাংনা লৈরি। লৈবাক অসিগী মীপুম খুদিং অতোপ্পগী য়াইফনবগীদমক, খুন্নাইগী কান্ননবগীদমক, লৈবাক্কী চাওখৎনবগীদমক করিগুম্বা খরা তৌবা পাম্মি। ৱাফম অসি ঐনা ঐগী চহি অহুমগী মন কী বাতকী খোংচৎ অসিদা ঐগী ইরৈবাকচাশিংদগী খঙবা ঙমজবনি, তমজবনি। কনাগুম্বা লৈবাক অমগীদমক্তদি মসি খ্বাইদগী চাওবা লনগৈনি, খ্বাইদগী চাওবা পাঙ্গলনি। ঐনা থমোইদা ইরৈবাকচাশিংবু খুরুমজরি।

 

ঐনা নোংমা মন কী বাততা খাদীগী মরমদা ৱাফম অমা হৌদোকখি। লোইননা খাদী হায়বসি ফি অমা নত্তে, ৱাখল্লোন অমনি। ঐনা উরে নুমিৎ খরনি অসিদা খাদিগী মাইকৈদা মীয়াম্না পাম্বা হেনগৎলক্লি লোইননা হায়খি ঐদি খাদী শিজিন্নবা অমা ওইননবা হায়বা নত্তে অদুবু তোঙান তোঙানবা লং মখল লৈরিবশিং অসিগী মনুংদা খাদী অমা য়াওহনবদা করি কাইবগে? য়ুম্দা শিজিন্ননবা ইন্নফিবু ওইরবসু, রুমালবু ওইরবসু, পর্দাবু ওইরবসু। ঐনা থেংনজবদা ইনখৎলক্লিবা নহারোলশিংনা খাদী পাম্বা হেনগৎলক্লি। খাদি য়োনবা হেনগৎলক্লি অমসুং মদুনা মরম ওইদুনা লাইরবা ইমুংগী শেন্থোক লম্বীগা হকথেংননা শম্নহল্লি । ওক্তোবর অনিদগী খাদীদা দিস্কাউন্ত পীরি। ঐনা অমুক্কা হন্না হায়জরি মদুদি খাদীগী খোংজং অসি ঐখোয়না মাংদা চংশিন্নবা হোৎনসি। ঐখোয়গী লৈবাক্কী লৈতলাইরশিংবু থবক অসিদগী পাঙ্গলথৌনা ফংগনি। অসুম্না খাদীদা অপাম্বা হেনগৎলকপনা মরম ওইদুনা খাদীগী লমদা থবক তৌরিবশিং, ভারত সরকারগী খাদীগা মরি লৈনবশিংদা অনৌবা মওংদা ৱখল খন্নবগী থৌনা হেনগৎহল্লে। অনৌবা তেক্নোলোজী করম্না পুরক্কনি, পোৎথোক্কী মগুন করম্না হেনগৎহনগনি, সোলরগী ইয়োং করম্না পুরক্কনি? অরিবা মমাংঙৈগী চহি ২০২০, ২৫২৫, ৩০৩০দগী শিজিন্নরক্ত্রবশিংবু করম্না অমুক হিংগৎহনগনি।

 

উত্তর প্রদেশকী বারাণসী সেবাপুরদা লৈবা সেবাপুরীগী খাদী আশ্রম চহি ২৬রোম থিংজিন্দুনা লৈরুরে অদুবু ঙসিদি অমুক নৌনা হিংগৎহল্লে। মখল কয়াগী হিরম কয়া অমসু হাপচিল্লে। মীওই কয়া অমবুসু থবক পীনবগী অচৌবা তাঞ্জা অমা পীরে। কাশ্মীরগী পম্পোরদা লৈবা খাদী অমসুং গ্রাম উদ্যোগনা থিংজিন্দুনা লৈরুরবা মশাগী ত্রেনীং সেন্তরবু অমুক নৌনা হৌদোক্লে। অদুগা কাশ্মীরগীদমক্তদি লম অসিদা পীননবা মচাক অসুক্কী মতিক লৈ। হৌজিক্তি ত্রেনীং সেন্তর অসি অমুক নৌনা হৌবনা মরম ওইদুনা অনৌবা মীরোলনা মতমগা চুনবা অনৌবা পোৎথোক পুথোকপদা মতেং ওইরগনি। অদুগা ঐনা নুংঙাইজবদি অচৌ অচৌবা কোর্পোরেৎ হাউসনসু দিৱালীগী মতমদা খাদীগী পোৎনা খুদোল ওইনা পীবা হৌনরে। মীয়ামসু খুদোল পোৎ পীবা মতমদা খাদীগী পোৎ ওইনা পীনরে। য়াম্না লাইনা করম্না মাংদা চংশিল্লিবা হায়বদু ঐখোয় পুম্নমক্না খঙলে।

ঐগী নুশিরবা ইরৈবাকচাশিং, মমাং থাগী ‘মন কী বাততা ঐখোয় পুম্নমমক্না ৱাশকখি মদুদি গান্ধী জয়ন্তীগী মাংওইননা লৈবাক পুম্বদা লুবা নানবগী থৌরম নুমিৎ ১৫নি পাংথোক্কনি। লু নানবগা মীয়ামগী পুক্নীংগা পুন্সিন্নগনি। ঐখোয়গী ইকাই খুম্নজরিবা রাষ্ট্রপতিনা থবক অসি হৌদোকপীরে অমসুং লৈবাক পুম্বনা শরুক য়াখ্রে। অঙাংঅহল, নুপানুপী, শহর অমসুং খুঙ্গং খুদিংমক ঙসিদি লুনানবগী খোংজংদা শরুক য়ারে। অসিগুমবা লুনানবগী খোংজং অসিনা করম্না ৱাশক অমসুং পান্দমগী মাইকৈদা চংশিল্লিবা হায়বদু ঐখোয়না মিৎমাংদা উরে। মীপুম খদিংমক্না মসিবু য়ারে, মতেং পাংলি অমসুং থবক ওইনা পাংথোক্নবগী মতেং অমা নত্রগা অমা পীরি। ইকাই খুম্নজরিবা রাষ্ট্রপতিজীগী তৌবীমল খঙবা উৎচরি লোইননা থবক অসিদা শরুক য়ারিবা লৈবাক অসিগী কাংলুপ খুদিংমক্কী মীওই পুম্নমক্কী মফমদা তৌবীমল খঙবা উৎচরি। শান্নখোৎনবগী লমদা ওইরবসু, মমিগী তাইবঙগী লমদা ওইরবসু, একাদমীস্যানশিং ওইরবসু, স্কুল, কোলেজ, য়ুনিবর্সিতী, লৌমীশিন্মী, ওফিসর, পুলিস, লান্মী পুম্নমক মাইকৈ অসোমদা পুক্নীং থিংজিল্লবনি। হৌজিক্তি মীয়ামগী ওইবা মফমশিং মোৎশিনবদসু অথিংবা পীরবনি। ঐনা মসি অফবনি হায়না খঞ্জৈ। নুংঙাইরিবা ৱাফমদি লুনানবনা সেবানিহায়বা খোংজং অসিগী শুপ্নগী নুমিৎ মরিনি খক অসিগী মনুংদা চাওরাক্না লাখ ৭৫দগী হেনবা মীয়াম্না ইনিসিএতিব লিশিং ৪০ রোম লৌবীদুনা খোংজং অসিদা য়াওশিনবীররে। হন্দক ঐহাক্না উজবা ৱাফম অমনা করিনো হায়বদা মাইকৈ অমরোমদা ঐখোয় অসি তরুতনালনা লৈসি হায়বনি। অতোপ্পা অমনা ঐখোয় খঙনা খঙনা মোৎসিল্লোইসি। অদুগা লু নানববু হৈনবী অমা ওইহনগে হায়রবদি ৱাখল্লোনগী ওইবা ইহৌ অমা তঙাইফদে। স্বচ্ছতা হি সেবাহায়বা অসিদা চাংদম্নবা কয়া অমসু পাংথোকচরে। কোতি অনিমখাইদগী হেনবা অঙাংশিংনা লুনানবা অসিদা ৱারেং চাংদম্নবদা শরুক য়াখি। অঙাং লিশিং কয়ানা লাই য়েকখি। মশা মশাগী ওইবা ৱাখল্লোন্দা লু নানবগা মরি লৈনবা লাইশিং য়েকখি। কয়ামরুম অমনা শৈরেং ইখি। সোসিয়েল মেদীয়াদা ঐখোয়গী পীক্লিবা মরূপশিংনা থাগৎলকখিবা অয়েকপা লাইশিং অদু ঐনা মেদীয়াদা অমুক থাখি, লোইননা চাওথোকপসু পোকচৈ। লু নানবগী ৱাফম অসি হোক লাকপদা মেদীয়াগী মীওইশিংগী মফমদা তৌবীমল খঙবা উচ্চবা কৈদৌঙৈদসু কাওজরোই। খোংজং অসি মখোয়না য়াম্না শেংনা মাংদা চংশিলহল্লিবনি। মশা মশাগী ওইবা মওংদা মথখোয়না শরুক য়ারি অমসুং মশক নাইবা ফিভম অমা শাগৎপদা অচৌবা থৌদাং লৌরি। ঐখোয়গী লৈবাক অসিগী ইলেক্ত্রোনিক মেদিয়া অমদি প্রিন্ত মেদীয়ানা লৈবাক অসিগী সেবা কয়াগী মতিক তৌবগে হায়বদু স্বচ্ছতা হি সেবাহায়বা খোংজং অসিদা উবা ফংলে। হন্দক্তা নুমিৎ খরনিগী মমাংদা শ্রীনগরগী চহি ১৮ লোমগী নহা বিলাল দারগী মরমদা পুক্নীং চিংশিংহনখি।
অদোম্না তাবা মতমদা হরাওগনি হায়বদি শ্রীনগরগী ম্যুনিসিপালীতিনা বিলাল দারবু লু নানবগীদমক্তা মখোয়গী ব্রান্দ এম্বেসেদর খনখ্রে। অদুগা ব্রান্দ এম্বেসেদরগা ৱাফম লাকপসিদা অদোম্না খল্লমগনি মহাক মমিগী তাইবংগী মীওই নত্রগনা শান্ন-খোৎনবগী হেরো অমা ওইরমগনি, অদুবু নত্তে। বিলাল দার অসি মশাগী চহি ১২-১৩ শুরকপদগী চহি ৫-৬ অসি লু-নানবগী লমদা থবক তৌদুনা লাক্লি। এশিয়াগী খ্বাইদগী চাওবা পাৎ শ্রীনগরদা লৈরিবা অসিগী মনাক্তা মফম অদুদা প্লাস্তিক্কীবু ওইরো, পোলিথিনবু ওইরো, শিজিন্নরবা বোত্তল, ফত্ত-হাওদি পুম্নমক অসি মহাক্না তত্তনা শেংদোকই। মদুদগী শেল খরসু অদুম তাঞ্জৈ। মরমদি মহাক্না পীশক পীক্লিঙৈদা মহাক্কী মপা অদু কেন্সরনা নাদুনা লৈখিদ, অদুবু মহাক্না মহাক্কী হিংননবগীদমক চারা তানবসিগা তরু-তনানবা হায়বা অসিগা শম্নহনখি। পাসিল্লুবদা বিলালনা শেংদোক্লিবা অমোৎ-অকাই অসি চহি অমদা চাওরাক্না কিলো লিশিং তরানিথোইদগী হেল্লি। শ্রীনগরগী ম্যুনিসিপালীতিবুসু ঐহাক্না নুংঙাইবা ফোংদোকচরি। লু নানবগী মরমদা মখোয়না অসুম্না হৌদোকপীরকপা অমদি এম্বেসেদরগীদমক মখোয়না অসুম্না খনবীরকপগীদমক। মরমদি শ্রীনগর অসি লমকোইবশিংগী পন্থুং অমনি। হিন্দুস্তান্দা লৈবীরিবা মীপুম খুদিংমক্না শ্রীনগরদা চৎনীংঙি অমসুং মফম অদুদা লু নাননবগী অসুক চাওনা পুক্নীং থৌগৎপীবা হায়বসিমক অচৌবা ৱাফম অমনি। ঐহাক্না নুংঙাইজরিবদি মখোয়না বিলালবু ব্রান্দ এম্বেসেদর ওইহনবা অসিখক্কী নত্তে, অমোৎ-অকাই শেংবীরিবা বিলিলদা হায়রিবা ম্যুনিসিপালীতিনা গাড়ী পীবীরি, য়ুনিফোর্ম পীবীরি লোইননা মহাক্না অতৈ মফমশিংদা চৎতুনা মফম অদুগী মীওইশিংদা লু-নান্ননবগীদমক মিৎ-না শিংহনবীরি, থৌইনশিন পীবীরি লোইননা মদুগী মহৈ ফংবদু ফাওবা য়ৌনা চংশিনবীরি। বিলাল দার হায়রিবা মীশক অসি চহিদি নৌরি অদুবু লু-নানবদা থৱাই য়াওজবা কনাগীদমক্তদি ইথিল পীবীবা মীশক অমা ওইরি। ঐহাক্না বিলাল দারগী মফমদা হন্না হন্না থাগৎপা ফোংদোকচরি।

 

ঐগী নুংশিজরবা ইরৈবাকচাশিং, ঐখোয়না য়াজগদবা ৱাফম অমদি লাক্কদৌরিবা পুৱারি অসি, পুৱারিগী শিয়োমনুংদা মীতমগদৌরিবনি লোইননা পুৱারিগী ৱাফম পল্লকপদা অথোইবা মীওইশিংবু নীংশিংবা হায়বসি হৌনশানি। ওক্তোবর হায়রিবা থা অসিদি অথোইবা মীওইশিংবু নীংশিংবা থানি। মহাত্মা গান্ধীদগীনা সরদার পতেল ফাওবসি ওক্তোবর থা অসিদনি তাইবং খোংদাবীরকখিবা। ওক্তোবর থা অসিদা অথোইবা মীওই কয়া ঐখোয়না থেংনরি মখোইনা ২০ অমদি ২১শুবা চহি চা অসিদা ঐখোয়বু লমজিং লমতাকপীরি। অৱাবা কয়াসু খাংবীখ্রে। ওক্তোবর ২দা মহাত্মা গান্ধী অমদি লাল বহাদুর শাষ্ট্রিজীগী মপোক কুমওন তারি। ওক্তোবর ১১দনা জয়প্রকাশ নরায়ণ অমসুং নানা দোশমুখকী মপোক কুমওন্নি লোইননা সেপ্ততেম্বর ২৫দনা পন্দিৎ দীনদয়াল উপধ্যায়গী মপোক কুমওন্নি। নানাজী অমদি দীনদয়ালজীগীদি চহি ১০০শুবা মপোক কুমওনসু তারি। অমসুং অথোইবা মীওইশিং অসিগী মরু ওইবা ৱাফমদি করিনো? মান্নবা ৱাফম অমখক হায়বা তারগদি মখোয় লৈবাক্কীদমক হিংজবা, লৈবাক্কীদমক করিগুম্বা খরা পাংথোকপা অসিনি। হায়রিবসি শুপ্নগী পাউতাক খক্তমক পীবা নত্তে মখোয়গী পুন্সি অদুনা উৎথোকপা পামজখিবনি। গান্ধীজী, জয়প্রকাশজী, দীনদয়ালজী হায়রিবা অথোইবা মীওইশিং অসি শক্তি পায়বগী লমদগী য়াম্না লাপ্না লৈখ্রবা মীওই ঙাক্তনি, অদুবু মখোয়না মীচমগী পুন্সিগা তোৎন-তিন্নদুনা হিংখি, থেংনখি লোইননা ‘সর্বজন হিতায়-সর্বজন সুখায়’, হায়বা অসিদা করিনোমা পাংথোক্তুনা লেনখি। নানাজী দেশমুখনা রাজনীতিগী ওইবা পুন্সিবু থাদোক্তুনা খুঙ্গং চাওখৎনবা হোৎনবরোমদা মাই ওনশিনখি। ঙসি মাগী ১০০শুবা মপোক কুমওন পাংথোক্লকপা মতম অসিদদি মহাক্কী খুঙ্গংবু চাওখৎনবা হোৎনরম্বা থবক অদুবু ইকাই খুম্নবা উৎপা হায়বসি মশানা তারবা ৱাফম্নি।

মথংগী ‘মন কী বাত’তা ঐহাক্না সরদার বল্লভভাই পতেলগী মরমদা ঙাংজগনি, অদুবু ওক্তোবর ৩১ অসিদি লৈবাক শিনব-থুংনা রন ফোর য়ুনিতী ‘এক ভারত-শ্রেষ্ঠ ভারত’ হায়বসি পাংথোকমিন্নসি। লৈবাক অসিগী শহর পুম্বদা রন ফোর য়ুনিতীগী থৌরম অসি চাওনা পাংথোকসি। মতম অসিসু লমজেল চেনবদা য়াম্না নুংঙাইবা মতম্নি, সরদার সাহেবকুম্না য়োৎকী পাঙ্গলদু ফংনবা। মসিসু অদুম্মক তঙাইফদবা ওইরিবনি। সরদার সাহেবনা লৈবাক অসিবু অমত্তা ওইনা পুন্সিনবীরম্মি। ঐখোয়সু অপুনবগী লিচীং অসিগীদমক লমজেল চেন্দুনা অপুনবগী মন্ত্র অসিবু মখা তানা পুথদুনা চেনগদবনি।

 

তুরিজমদা ভেল্যু এদিসন ওইবা হায়বা অসি শুপ্নগী ঐখোয় মশেল উনবা খক্তুদা নত্তনা মহৈরোই অমগী মতৌগুম মদুবু ফংজবা, খঙননবা হোৎনরবতদা ওইগদৌরিবনি। ঐহাক ইশামক্না হকথেংনজবদা চাওরাক্না জিলা ৫০০ মুক হেল্লমগদরা খল্লি হিন্দুস্তানগী ওইনা চৎচরুবদু। অহিং লেনবগী খুদোং চাবা ফংজখিবনা চাওরাক্না জিলা ৪৫০ রোম হেল্লমগনি খল্লি লোইননা ঙসি ভারতকী অসিগুম্বা থৌদাং অসি য়াজবা মতমদা অদুম্না চৎচরুবা অদুনা ঐঙোন্দা ওন্থোক্না কান্নহনখ্রে। করিগুম্বা অমবু খঙননবা হোৎনবদা ঐঙোন্দা খুদোংচাবা ময়াম অমা ফংহল্লি। ময়ামদা ঐহাক্না হায়জনীংবদি অসিগুম্লবা পাক চাওরবা ভারত অসি তোঙান তোঙানবনা অমত্তা ওইবা হায়বা অসি খোল্লাও খক ওইহনবীদবা হায়বা অসিনি। মসিদি মপাল নাইদ্রবা পাঙ্গলগী পুক্কৈনি। মসিবু হকথেংননা খঙবীয়ু। ‘এক ভারত-শ্রেষ্ঠ ভারত’ হায়বা মঙলান অসি মসিদা য়াওরিবনি। চান-থক্নবগী মখল কয়ানো লৈরিবা! পুন্সি চুপ্পা অনৌ-অনৌবা মথেল নুংতিগী হোং-হোংদুনা চারবা ফাওবদা অনিরকশুনা হঞ্জিনগদবা লৈতে। হৌজিক্তি মসি ঐখোয়গী তুরিজমগী অচৌবা পাঙ্গল অমা ওইরবনি। ঐহাক্না হায়জনীংলিবদি অসিগুম্বা শুতিগী মতম অসিদা চুম্নগী ইচম-চম্না কোইবীরুবা নত্তনা, অহোংবা অমা পুরক্কদৌরিবনি হায়বরোমদতা নত্তনা, করিগুম্বা খরা খঙননবা, ফংননবা ৱাখল্লোনগা লোইননা চৎপীয়ু হায়জনীংই। ভারত হায়বা অসিবু ঐ ঐগী নুংদা চুপশিনবীয়ু। মখল মথেলগী মীওই কোতি কোতি অসিবু নুংদা চুপশিনবীয়ু। অসুম্না হকথেংননা খঙলুবা অসিনা ইশাগী পুন্সিগী মচাক মরল অদু মরাং কাইগদৌরিবনি। ৱাখলগী পনখৈ পাকথোক চাওথোক্লক্কনি অদুগা হকথেংননা খঙবা হায়বা অসিদগী হেনবা করম্বা লমজীংবা অমা লৈবগে! অয়াম্বা মতমদা ওক্তোবরদগীনা মার্চ ফাওবসি লম কোইবগী মতম ওইনা তৌই। ময়াম কোইবা অদুম চৎনবা ঙাক্তনি। ঐহাক্না থাজজবদা, ঐহাক্না হৌদোকখিবা অপুনবগী থবক অদু হন্দক্কী খোংচৎ অসিদসু মখা তানা পুথবীরক্কনি খল্লি। অদোম্না চৎপীরুবা মফমশিং অদুদা হকথেংননা খঙবীরকপশিং অদু শিয়ার তৌবীরকউ, ফোতোশিং শিয়র তৌবীরকউ। #IncredibleIndia (হৈশ তেগ ইনক্রিদিবলইন্দিয়া) হায়বা অসিদা ফোতো শোইদনা থাবীরকউ। লমদমদুগী মীওইশিংগা উনবীরবদি মখোয়গী ফোতোসু থাবীরকউ। ফজরবা য়ুম, মহৌশাগী নীংথিবদু খক নত্তনা মফমদুগী ওইবা পুন্সি ৱারিসু ইবীরকউ। অদোমগী খোংচৎতুগী ফজরবা ৱারেং অমা ইবীরকউ। Mygovতা থাবীরকউ, NarendraModiAppতা থাবীরকউ। ঐগী পুক্নীংদা ফাওজরকপা অমনা ঐখোয়না ভারতকী তুরিজমসি চাওখৎহন্নবগীদমক ঐখোয় ঐখোয়গী রাজ্যদা লৈবা অখন্নবা মফম ৭খক্কী মরমদা খঙদোকপীগদবনি। য়ারবদি মফম অদুদা চৎপীয়ু। মদুগী মরমদা অখঙবমখৈ NarendraModiAppতা #IncredibleIndiaদা থাবীরকউ। রাজ্য অমগী মীওই পুম্নমক্না অদুম্না তৌবীরক্লগদি ঐহাক্না সরকারদা মদুবু কুপ্না য়েংশিনবীনবা হায়জগনি। অদুগা রাজ্য পুম্নমক্তা মান্ননা য়াওবা ৱাফম ৭খক লৌখৎচরগা মদুবু পাক চাওনা পুথোকপা য়ানবা অইবা মওংদা পুথোক্নবা শিঞ্জগনি। হায়বদি মীয়ামগী অপাম্বা য়েংদুনা তুরিস্ত দেস্তিনেসনসি করম্না চাওখৎহন্সিগে হায়বা অসিনি ঐহাক্না ময়ামদা থমজরিবা অসি। হায়রিবা মরু ওইবা দেস্তিনেসন্নি হায়না খনবীরকপশিংদুগী ভিদিও, ৱারেংনচীংবা শেম্বীরকপশিং অদু সরকারনসু শোইদনা য়াবীগনি। মাংদা চংসিনবীরকউ ঐখোয় ময়াম পুন্না হোৎনমিন্নসি। হন্দক্কী ওক্তোবর থা অসিদগী মার্চ থা ফাওবগী মতম অসি তুরিজম্বু চাওখৎহন্নবা অচৌবা কেতালিস্ত এজেন্ত অমা অদোমসু ওইবীবা য়াই। ঐহাক্না অদোম্দা পাউজেল পীজরি।

 

ঐগী নুশিজরবা ইরৈবাকচাশিং, মীওইবা অমা ওইনা ঐসু মীওইবা অমদা ফাওভম থোকপশিংদু ফাওরিবনি। ঐগী থমোইদা মথুম-মরাংসু হৌই। ঐগী পুক্নীংদা অহকপা ইথিলসু তারিবনি। ঐসু অদোমগুম্বা মীশক অমনি। হৌখিবা মতম খরদা থৌদোক অমা থোকখি মদু অদোম্নসু হেন্না খঙবীরম্লগনি-নুপীগী পাঙ্গল অমসুং লৈবাক নীংবগী অমত্তা ঙাইরবা খুদম ঐখোয় ইরৈবাকচাশিংনা উখ্রে। ইন্দিয়ন আর্মীনা থৌনা ফবী অনিখক লেফতিনেন্ত স্বাতি অমসুং নিধিগী শক্তম ওইনা ফংজরে। মখোয় অসি তোপ তোপ্পা থৌনা ফবীশিংনি । মখোয় অসি তোপ তোপ্পনি হায়জবগী মরমদি স্বাতি অমসুং নিধিগী মপুরোইবশিং অদু ইমা ভারতকী সেবাদা থৱাই কৎখ্রবশিংনি। ৱাখন্না লামদুনা অমুক্তং য়েংবীয়ু অসুক নৌরিবা চহি মতাং অসিদা মখোয়গী তাইবংনা থক-খা ওল্লবদা ওইরমগদবা মখোয়গী পুক্নীংগী ফিভম অদো? অদুবু অথৌবা কর্নেল সন্তোষ মহাদিক্কী লোইনবী স্বাতি মহাদিক্না অসিগুম্বা অৱাবা ফিভম অসিবু মায়োং য়াদুনা পুক্নীংদা লেপখি। ভারত লান্মীদা মিং চনখি। থা ১১ চুপ্না কন্না হোৎনদুনা ত্রেনীং লৌখি লোইননা মহাক্কী মপুরোইবগী মঙলানবু মপুং ফাহন্নবগীদমক মহাক্কী পুন্সিসু কৎথোক্লি। মতৌ অসুম্না নিধি দুবেগী মপুরোইবা মুকেশ দুবেসু লান্মীদা নায়ক্কী থৌ পুবীরম্মি অমসুং ইমা লৈবাক্কীদমক থৱাই কৎখি। মহাক্কী লোইনবী নিধিসু পুক্নীংদা চপ চানা লেপতুনা লান্মীদা মিং চল্লকখি। ইরৈবাকচা পুম্নমক্না ঐখোয়গী অসিগুম্লবা মাতৃ শক্তি অসিদা, ঐখোয়গী থৌনা ফবীশিং অসিদা ইকাই খুম্নবা উৎপীবা হায়বসি হৌনশানি। ঐহাক্না অসিগুম্বা ইচল অনি অসিবু থমোই শেংনা য়াইফ-পাউজেল পীজরি. মখোয়না লৈবাক অসিগী মাওই কোতি কয়াদা অনৌবা ইথিল অমা পীবীরি, অনৌবা মিকপ অমা থোকহনবীরি। মখোয় অনিবু হন্না হন্না থগৎচরি।

 

ঐগী নুংশিজরবা ইরৈবাকচাশিং, নবরাত্ররিগী কুম্মৈ অমদি দিৱালীগী মরক অসি ঐখোয়গী নহা ওইরিবা মীরোলশিং অসিগীদমক্তদি অচৌবা খুদোংচাবা মতাং অমসু ওইরিবনি। ফিফা অন্দর-১৭গী ৱার্ল্দ কপ অসি ঐখোয়গী অসিদা পাংথোক্কদৌরি। ঐহাক্না থাজজবদা মাইকৈ মরিমকসি ফুৎবোলগী মখোলনা নিল্লগনি হায়বা অসিনি। মীরোল খুদিংমক্না ফুৎবোলদা থৱাই য়াওবা হেনগৎলক্কনি। হিন্দুস্তানগী লৈরিবা স্কুল, কোলেজ পুম্নমক অসিগী লম্পাকশিংদা নহারোলশিংনা শান্নদনা তোকপা হায়বদু ওইহনবীগনু। লাকপীরো, মালেম পুম্নমক্না ভারতকী লৈমাইদা শান্ননবা লাক্কদৌরি, ঐখোয়সু শান্নবা অসি পুন্সিগী শরুক অমা ওইহল্লসি।

ঐগী নুংশিরবা ইরৈবাকচাশিং, নবরাত্রিগী কুম্মৈ অসি হৌজিক চৎথরি। ইমা দুর্গাগী পুজাগী মতমনি। অকোইবা অসি নুংশিরবা শেংলবা হৈনম-লৈনম্না শিল্লি। মাইকৈ মরি অসি লাইনীং-লাইশেোনগী, কুম্মৈগী, ঈশ্বরবু নীংজবগী মওং অমনা কোইশিল্লি অমসুং অসিগুম্বা পুম্নমক অসি শক্তিবু খুরুমজবগী কুম্মৈ ওইনা লৌনৈ। মসিবু শারদীয়-নবরাত্রি হায়নসু খঙনৈ। অমসুং মসিদগী শরদ ঋতুসু হৌই। নবরাত্রিগী অসিগুম্বা শেংলবা কুম্মৈ অসিদা ঐহাক্না ইরৈবাকচাশিংদা হন্না হন্না য়াইফা পাউজেল পীজরি অমসুং শক্তিগী লাইরেম্বী ইমাগী মফমদা খুরুমদুনা হায়জরি লৈবাক অসিগী মীচমশিংগী পুন্সিনা তাঞ্জরিবা থাজবা অমদি নীংজবশিং অসি মপুং ফাহন্নবগীদমক ঐখোয়গী লৈবাক অসিনা হেন্না ৱাংবা অনৌবা থাক অমা ফংহনবীবা পীনবীসনু। লম খুদিংমক্তা মায়োং য়াবা ঙমজনবগী থৌনাসু লৈবাক অসিদা পীনবীবা ওইসনু। খোংজেল য়াংনা মাং লোমদা চংসিনবা ঙম্বা ওইসনু। ২০২২দা ভারতনা নীং খা তম্লকপগী চহি ৭৫ শুরকপদা নীং খা তম্নবগীদমক থৱাই কৎপীখিবশিংগী মঙলান অদুবু মপুং ফাহন্নবা হোৎনজবা মীওই কোতি ১২৫ অসিগী অচেৎপা ৱাশক, মপান নাইদ্রবা নুপা থোকপা মতৌ অমদি অনীংবশিং অসিবু মঙফাওনহন্নবগীদমক্তা চহি ৫গী রোদ মেপ অমা শেমদুনা ঐখোয়না চৎলি। মসিবু শক্তিগী লাইরেম্বী ইমানা থৌজানবীসনু। মীয়াম পুম্নমক্কী মফমদা হন্না হন্না য়াইফ-পাউজেল পীজরি। কুম্মৈসু পাংথোকপীয়ু, পুক্নীংসু থৌগৎপীয়ু।

 

হন্না হন্না থাগৎচরি।