PMINDIA

News Updates

The content is auto sourced from PIB

২৯.১০.২০১৭তা ওল ইন্দিয়া রেদিওদা ঙাংখিবা প্রধানমন্ত্রীগী ‘মন কী বাত’কী ইংলিশকী ৱাহন্থোক

নুংশিরবা ঐগী ইরৈবক মচাশিং , খুরুমজরি। দীৱালীগী নুমিৎ ৬নিগী মতুংদা পাংথোকপা অচৌবা কুম্মৈ ছথ অসি ঐখোয়গী লৈবাকসিগী মনুংদা নীতি নিয়ম অমসুং থাজবা অমগা লোইননা পাংথোকপা কুম্মৈশিংগী মনুংদা অমনি। মসিদা চাকচা-ইথক্তগী হৌরগা ফিজোল ফাওবা হিরম খুদিংমক্তা মমাংঙৈগী চৎন-লোনচৎপু ঙাক্তুনা পাংথোক্নৈ। ছথ পুজাগী থোইদোকপা কুম্মৈ অসি মহৌশাবু খুরুমজবগা মপুং ফানা মরি লৈনৈ। নুমিৎ অমসুং ঈশিং অসি পুজা অসিগী মরু ওইবা শরুক্নি। অমসুং ৱা অমদি লৈবাক্না শাবা কোল্লিক অমদি লৈনুংদগী চিঞ্জাক পুজা অসিগা থানবা য়াদ্রবা পোৎচংশিংনি। অচেৎপা থাজবা অমগা লোইননা পাংথোক্লিবা অসিগুম্বা পুজা অসিদা ঙানথোরক্লিবা অমসুং মমি শামথরক্লবা নুমিৎপু খুরুমজবগী ৱাখল্লোন অসি অনি শুদবা চৎন-লোনচৎ অমনা মপুং ওইবনি।

মীপুম খুদিংনা থোরক্লিবা নুমিৎপুদি খুরুম্নৈ। অদুবু ছথ পুজাদদি শোইদনা তাখ্রগদবা নুমিৎপুসু খুরুমজবগী চৎনবী অদু পীরি। ঐখোয়গী পুন্সিদা লু নানবগী তঙাইফদবা অদু কুম্মৈ অসিনসু তাক্লি। পুজা অসিগী মাংওইননা ইমুং-মনুং লু নালহনবা অমদি পুখ্রি তুরেলনচিংবা অমসুং পুজা তৌফমশিং লু নালহনবগী থবক ময়াম পুন্না থৱাই য়াওনা পাংথোক্নৈ। নুমিৎপু খুরুমজবা নত্রগা ছথ পুজা অসি অকোইববু ঙাকশেনবা অমদি লাইনা-তিন্নাদগী ঙাকথোকচনবা অমসুং হৌন-লোনচৎ ঙাক্না থম্নবগী কুম্মৈনি। মহৌশানা অতোপ্পদগী নীবা হায়বা অসি অতোনবা থবক্নি হায়না খন্নৈ। অদুবু ছথ পুজাদদি অয়ুক্কী পুজাগী মতুংদা প্রসাদ নীরগা চাবগী অখন্নবা চৎনবী অমা লৈ। প্রসাদ নীরগা চাবগী চৎনবীগী নুংগী ওইবা ৱাখল্লোন্দি মীওইবগী চাওখৎপগী লম্বীদা অপনবা অমা ওইরিবা অচাউরম্বু মাংহনবনি। ভারতকী অসিগুম্বা অথোইবা চৎনবী অসিগীদমক মীপুম খুদিংমক্না চাওথোকচবা অসি হৌনশানি।

ঐগী নুংশিরবা ইরৈবাক মচাশিং, ‘মন কী বাত’পু থাগৎপীবসু য়াওই অদুগা হুনবসু য়াওই। অদুবু ঐনা মন কী বাতনা তাহল্লিবা মমিশিং উবা মতমদা লৈবাক মীয়ামগী পুক্নীংগা মন কী বাতকা চাম্মদা চাম্মা অচেৎপা মরি থমখ্রে হায়না থাজজৈ। খাদি অমসুং হেন্দলুম্বু খুদম ওইনা য়েংবা য়াই। গান্ধী জয়েন্তী নুমিত্তা ঐনা খাদী অমসুং হেন্দলুমগীদমক ৱাকৎতুনা লাকপা অদুগী মহৈ খঙলবদি অদোমসু শোইদনা হরাওগনি। ঐনা ফংজবা পাউগী মতুং ইন্না ওক্তোবর ১৭কী ধনতেরসকী নুমিত্তা দিল্লীগী খাদী গ্রাম উদ্যোগ ভবন স্তোরদা চাওরাক্না লুপা কোতি অমগা লাখ কুন য়োনখিবগী রেকোর্দ লৈ। খাদি অমসুং হেন্দলুম স্তোর অমা খক্তনা অসুক্কী মতিক য়োনখিবা হায়বা অসি তাবদা অদোমসু শোইদনা অপেনবা পোক্লমগনি। দীৱালী মনুংদা খাদীগী গিফ্ত কোপন য়োনবদা চাওরাক্না ৬৮০গী চাং য়ৌবগী রেকোর্দ লৈ। খাদী অমসুং হেন্দিক্রাফ্তকী ফোৎলম য়োনবদসু মমাংগী চহিদগী চহি অসিদনা চাওরাক্না চাদা ৭০ হেন্না য়োনবা উই। ঙসিগী নহারোল, অহল-লমন, নুপী, চহি তাংকক খুদিংমক্কী মীওইশিংনা খাদী অমসুং হেন্দলুমবু পাম্নরে। মসিনা লাইরবা ফি শাবা ইমুং কয়া মরুম্বুসু ইয়োংগী ফি শাবা ইমুংশিংবু কয়াদা কান্নবা পীহল্লবা। মমাংঙৈদা ‘খাদী ফোর নেসন’ হায়রম্মি অদুবু ঐখোয়না ‘খাদী ফোর ফেশন’গী ৱাফম হায়রি। অদুবু মতম খরগী মমাংদগী ঐঙোন্দা ফাওরকপদদি খাদি ফোর নেসন অমসুং খাদী ফোর ফেশনগী মতুংদা হৌজিক ‘খাদী ফোর ত্রান্সফোর্মেসন’না মহুৎ শিল্লক্লি। খাদী অমসুং হেন্দলুম্না লাইরবদগী লাইররবা মীশক অমগী পুন্সিদা অওনবা পুরক্তুনা মখোয়বু মতিং থোকপা অমা ওইহন্দুনা পুখৎলক্লি। খুঙ্গংবু চাওখৎহনবদা মসিনা অচৌবা থৌদাং অমা লৌরি।

শ্রীমান রাজন ভত্তনা নরেন্দ্রমোদী এপতা ঙাকশেল লান্মীশিংনা দীৱালী করম্না পাংথোকই অমসুং মখোয়গী লোইননা দীৱালী পাংথোকপগী ঐগী ওইবা এক্সপেরিয়েন্স খঙনীংই হায়না ইরকই। শ্রীমান তেজস গায়কৱারনসু নরেন্দ্রমোদী এপতা ইবীরকই – ঐখোয়গী য়ুমগী অথুম অহাওশিং অসি ঙাকশেল লান্মীশিংদা য়ৌহনবা য়াবগী খুদোংচাবা লৈবরা? ঐখোয়সু ঐখোয়গী ঙাকশেল লান্মীশিংবু নীংশিংজৈ। ঐখোয়গী য়ুমগী অথুম অহাও লৈবাকসিগী লান্মীশিংদা য়ৌহনফম থোকই হায়না খনজৈ। অদোম অদোম্না য়াম্না হরাও-তয়াম্না দীৱালী পাংথোক্লম্লগনি। ঐগীদমক্তদি দীৱালীসি হন্দকমুকসু থোইদোকপা এক্সপেরিয়েন্স অমা পুরগা লাক্লে। অমুক হন্না ঐখোয়গী ঙমখৈ ঙাক্লিবা থৌনা ফরবা ঙাকশেল লান্মীশিংগা লোইননা দীৱালী পাংথোকমিন্নবগী লাইবক ফবা অদু ঐনা ফংজরে। হন্দক জম্মু-কশ্মীরগী গুরেজ সেক্তরদা লৈবা ঙাকশেল লান্মীশিংগা লোইননা দীৱালী পাথোকচবা ফংজবা কাওঙমদনা লৈহৌরগনি। ঙমখৈদা খুদোং থিনীংঙাই ওইরবা ফিভমশিংগা মায়োক্নদুনা ঐখোয়গী ঙাকশেল লান্মীনা লৈবাক অসিবু ঙাকশেল্লি। মখোয়গী থৌনা অমসুম কৎথোকপা অদুগীদমক ঐনা ঐগী ইরৈবাকচাশিংগী মহুৎ শিন্দুনা ঐখোয়গী ঙাকশেল লান্মীশিংগা মফমদা ইকাই খুম্নবা উৎচরি। ঐখোয়না তাঞ্জা হেক ফংবদা ঐখোয়গী লান্মীশিং অসিগী পুন্সি অমদি মখোয়গী চাওথোকচনীংঙাই ওইরবা ৱারি তাগদবনি। ঐখোয়গী ইরক্তা ঐখোয়গী ঙাকশেল লান্মীশিং অসি শুপ্নতগী ঙমখৈ ঙাকপদা নত্তনা মালেমদা মরা তপ্পা পুন্সি পুরক্নবা হোৎনবদা অচৌবা থৌদাং লৌরি হায়বসি খঙদবা মীওইসু য়াওরমগনি। য়ুএন পিসকীপর ওইনা মখোয়না মালেমদা হিন্দুস্তানগী মিংচৎ পুরক্লি। হন্দক্তা ওক্তোবর ২৪দা মালেম পুম্বগী ওইনা য়ুএন দে য়ুনাইতেদ নেসন দে পাংথোকখি। মালেমদা ইংথবা নুমিৎ পুরক্না হোৎনখিবা থৌদাং পুম্নমক্না নীংশিংলি। অদুগা ঐখোয়দি ‘বসু ধৈব কুতুম্বকম’ হায়বদি মালেম অসি ইমুং অমত্তনি হায়বা অসিদা থাজজবা কাংবুনি। থাজবা অসিনা মরম ওইদুনা ভারতনা হৌরকপদগী হৌনা য়ুএন্না পাংথোকপা মরুওইবা থবক কয়াদা মাইপুননা শরুক য়াদুনা লাক্লি। অদোমসু খঙলমগনি মদুদি সংবিধানগী ৱাহৌদোক অমসুং য়ুএন চেরিতীগী ৱাহৌদোক অনিমক্তা ‘ৱি দ পিপল’ হায়না হৌই।

ভারতনা মতম লৈবা খিবিক্তা নুপীগী মান্নবা থাক্কী মরমদা হায়দুনতা লাক্লি। অমসুং য়ুএন দিক্ল্যারেসন ওফ হ্যুমেন রাইৎসনা মসিগী অহিংবা খুদম্নি। মসিগী ইনিসিএল ফ্রেজদা হান্ননা প্রপোজ তৌবা ৱাহৈদি ‘ওল মেন আর বোর্ন ফ্রি এন্দ ইক্যুএল’ হায়বা অসিনি। অদুবু ভারতকী মীহুৎ হংস মেহতানা হোৎনবদগী ওন্থোক্তুনা অসুম্না য়ানখি ‘ওল হ্যুমেন বিইংস আর বোর্ন ফ্রি এন্দ ইক্যুএল’। তৌবগীদি অওনবা অসি য়াম্না পীকপা ওইনা উই। অদুবু মসিদা হেন্না মশা-মউ ফবা মিৎয়েং অমা উবা ফংই। য়ুএন অম্ব্রেলাগী মখাদা ভারতনা পাংথোক্লিবা খ্বাইদগী চাওবা থৌদাংদি য়ুএন পিস কীপিং ওপরেসন্দা শরুক য়াবা অসিনি। য়ুএনগী পিস কীপিং মিশনশিংদা ভারতনা মতম লৈবা খিবিক্তা মাইপুননা থৌদাং য়াদুনা লাক্লি। মীয়াম মরক্তগী অয়াম্বনা ৱাফম অসি ইহান হানবা ওইনা খঙবা ওইরম্বসু য়াই। লিসিং ১৮ হেনবা ভারতকী ঙাকশেল লান্মীশিংনা য়ুএন পিস কীপিং ওফরেসন্দা থৌদাং য়াই। হৌজিকসু ভারতকী লান্মী লিশিং ৭ লোম য়ুএন পিস কীপিং ওপরেসন্দা শরুক য়ারি অমসুং মখোয় অসি মালেম পুম্বগী ওইনা খ্বাইদগী ৱাংবা অহুমশুবা মফমদা লৈ। লিশিং ২০১৭ ওগস্ত ফাওবদা পাংথোকখিবা য়ুএন পিস কীপিং ওপরেসন ৭১গী মনুংদা চাওরাক্না ওপরেসন ৫০ রোমদা ভারতকী লান্মীশিংনা শরুক য়াখি। ওপরেসনশিং অদু কোরিয়া, কম্বোদিয়া , লাওস, ভিয়েৎনাম, কোঙ্গো, সাইপ্রস, লিবেরিয়া, লেবনন, সুদান অমসুং মালেমগী কংফানগী লমশিংদা পাংথোকপনি।

কোঙ্গো অমসুং খা সুদান্দা ভারত লান্মীশিংনা হোস্পিতালদা অনাবা লিশিং ২০ হেন্না লায়েংখি। অমসুং মশিং থিঙমদ্রবা মীওই কয়া অমসু কনবীখি। ভারতকী ঙাকশেল লান্মীনা তোঙান তোঙানবা লৈবাক্কী মীয়াম্বু ঙাক শেনবতা নত্তনা পিপল ফ্রেন্দলী ওপরেসনগী মতেংনা মফম অদুগী মীয়ামগী থমোইবুসু খুদুম চনখি। ভারতকী নুপীশিংনা শান্তি পুরক্নবগী থবকশিংদা মাংজিল থানবগী থৌদাং লৌরি। অয়াম্বনা খঙনরমদবসু য়াই মদুদি লিবেরিয়াদা য়ুএনগী পিস কীপিং মিসন্দা ৱুমেল য়ুনিৎ পুলিস থাবা ভারতনা অহানবা লৈবাক্নি। অদুগা ভারতকী খোংথাং অসি মালেমগী অতৈ লৈবাকশিংদা ইথিল পীনবগী মশক ওইখ্রবনি। মসিগী মতুংদা, অতোপ্পা লৈবাকশিংনসু মশা মশাগী ৱুমেন পুলিস য়ুনিৎশিং থাবা হৌখ্রে। অদোম্না তারগা চাওথোকচগনি মদুদি ভারতকী থৌদাং অসি শুপ্নগী পিস কীপিং ওপরেসন খক্তমক নত্তে। হায়বদি ভারত অসি চাওরাক্না লৈবাক ৮৫ রোমগী পিস কীপরশিংবু ত্রেনীং পীবগী থবকসু তৌরি। মহাত্মা গান্ধী অমসুং গৌতম বুদ্ধগী লমদম অসিগী ঐখোয়গী থৌনা ফরবা শান্তি ঙাক্লিবশিংনা মালেমদা শান্তি অমসুং অফবা ৱাখল্লোনগী পাউজেল য়ৌহল্লি। পিস কীপিং ওপরেসন হায়বা অসি অরাইবা থবক নত্তে। ঐখোয়গী ঙাকশেল লান্মীশিং অসি খুদোং থিনীংঙাই ওইরবা মফমশিংদা চৎতুনা মথৌ পাংথোকপা তাই তোঙান তোঙানবা মীওইশিংগী মরক্তা লৈবা তাই। তোঙান তোঙানবা ফিভম অমসুং চৎন-লোনচৎসু খঙবা তাই। মখোয়না মশাবু মফম অদুগী ওইবা তঙাই ফদবশিং অমদি ফিভমগী মতুং ইন্না শেমজবা তাই। ঐখোয়না ঙসি ঐখোয়গী থৌনা ফরবা য়ুএন পিস কীপরশিংবু নীংশিংবা মতমদা অফ্রিকাগী কোঙ্গোদা শান্তিগীদমক লান্থেংনবা মতমদা মশাগী ওইবা পুম্নমক কৎথোকখিবা অদুগুম্বা কেপ্তেন গুরবচন সিংহ সলারিয়াবু কনাননা কাউবা ঙমগনি। মহাকপু নীংশিংবা মতমদা লৈবাক অসিগী মীপুম খুদিংমক্কী থমোই অসুক্কী মতিক চাওথোকচৈ। মহাক অসি পরম্বীর চক্র পীদুনা ইকাই খুম্নখিবা অমত্তা ঙাইরবা য়ুএন পিস কীপরনি। সাইপ্রস্তা ইন্দিয়াগী পিস কীপরশিংগী মনুংদগী থোইদোকপা মশক তাকখিবশিংগী মনুংদা লেফতনেন্ত জেনরেল প্রেমচন্দসু অমনি। ১৯৮৯দা নমিবিয়াগী ওপরেসন্দা চহি ৭২ শুরবা মহাকপু ফোস কমান্দর ওইনা হাপখি। মহাক্না লৈবাক অদুগী নীংতম্বা ঙাক্ননবগীদমক থৌদাং য়াখি। ভারতকী লান্মী মকোকসু ওইখিবা জেনরেল থিমৈয়ানা সাইপ্রস্তা য়ুএন পিস কীপিং ফোর্সপু লুচীংখি। অমসুং শান্তি পুরক্নবা হোৎনবদা মসাগী পুম্নমক কৎথোকখি । ভারতনা মতম পুম্নমক্তা শন্তিগী দুৎ ওইনা মালেমদা শান্তি অমদি অমত্তা ওইবগী পাউজেল পীদুনা লাক্লি। ঐখোয়না থাজৈ মদুদি মীপুম খুদিংমক্না শান্তি অমদি অফবা ৱাখল্লোনগা লোইননা হিংবা অমসুং হেন্না ফবা ইং তপ্পা পুন্সি অমা শেম্বগী মাইকৈদা চংসিনগনি।

ঐগী নুংশিজরবা ইরৈবাকচাশিং, ঐখোয়গী পুন্যগী মশক ওইরবা লমদম অসি অদুগুম্বা মশাগী ওইজবা থাদোক্তুনা মীওইবগী শেবা তৌখিবা অথোইবা মীশক কয়ানা ঙান্থোইরি। ভাগিনী নিবেদিতা হায়রগসু খঙনবী সিস্তর নিবেদিতাসু অদুগুম্বা থোইদোকপা মীওইশিং অদুগী মরক্তা অমনি। মহাক আয়র্লেন্দা মার্গেত ইলিজাবেথ নোবেল ওইনা পোকখি অমসুং স্বামী বিবেকানন্দনা মহাকপু নিবেদিতা হায়বা মিং অসি পীখি। নিবেদিতা হায়বদি পুম্নমক কৎথোক্লবী হায়বনি। তুংদা মহাক্না মশাবু মহাক্কী মিংগা চান্নবা মীশক ওইনা শক তাকখি। ঙরাং সিস্তর নিবেদিতাগী ১৫০ শুবা মপোক নুমিৎনি। মঙোন্দা স্বামী বিবেকানন্দগী মমি অসুক্কি মতিক তাখি মদুদি মহাক্না নুংঙাই-য়াইফরবা পুন্সি থাদোক্লগা মসাগী পুন্সিবু লাইরবশিংগী সেবাদা কৎথোকখি। সিস্তর নিবেদিতা অসি ব্রিতিশকী লৈঙাক্কী মীওৎ-মীনৈ অদুনা অসুক্কী মতিক থমোই শোকহনখি। অংগ্রেজশিংনা ঐখোয়গী লৈবাক অসিবু মীনাই ওইহনবতা নত্তনা ঐখোয়গী ৱাখল্লোনবুসু মীনাই ওইনবা হোৎনখি। ঐখোয়গী চৎন-লোনচৎপু হন্থবা মিৎয়েংদা য়েংদুনা ঐখোয়দা অতোপ্পা ৱাখল্লোন ফাওহন্নবগী থবক চৎথদুনা লাকখি। ভাগিনী নিবেদিতাজীনা ভারতকী চৎন-লোনচৎকী ইকাই খুম্নবা অমুক হন্না পুরকখি। জাতিগী ওইবা ৱাখল্লোন পুরক্তুনা মীয়াম্বু অমত্তা ওইনা পুন্সিন্নবগী থবক তৌখি। মহাক্না মালেমগী তোঙান তোঙানবা লৈবাকশিংদা চৎতুনা সনাতন ধর্ম অমসুং দশনগী মায়োক্তা তৌরিবা ফৎত্রবা প্রচারশিংগী মায়োক্তা ইহৌ হৌখি। মমিং লৈরবা রাষ্ট্রৱাদী অমদি তমিল কবি সুব্রহমনিয়ম ভারতীগী শৈরেং ‘পুদুমই পেন্ন’ , অনৌবা নুপী অমসুং নুপীগী পাঙ্গল হেনগৎহন্নবগীদমক্তা মমিং চৎলি। অসুম্না হায়নৈ মদুদি মসিগী ইথিলদি ভাগীনি নিবেদিতানি। ভাগীনি নিবেদিতাজীনা অথোইবা বিগ্যানিক জগদীশচন্দ্র বসুগী মতেং পাংখি। মহাক্না মহাক্কী অইবশিং অমসুং মীফমশিংগী পাম্বৈনা বসুগী রিসর্সশিংবু ফোংদোকপা অমসুং শন্দোকপদা মতেং পাংই। ভারতকী থোইদোকপা মগুন অমদি ঐখোয়গী সংস্কৃতি অমসুং বিগ্যান অসি পুন্না চৎমিন্নৈ। সিস্তর নিবেদিতা অমসুং বিগ্যানিক জগদীশচন্দ্র বসুনা মসিগী ময়েক লারবা খুদম অমনি। ১৮৯৯দা কোল্কতাদা তমথিরবা প্লেগকী লাইনা শন্দোকখি। মদুদা মীওই কয়াগী থৱাই মাংখি। সিস্তের নিবেদিতানা মশাগী হকশেলগীদমক করিসু খন্দনা ইরম নালা লম্বীনচিংবা কয়া শেংদোকপা হৌখি। য়াম্না হেন্না নুংঙাইবা পুন্সি অমদা লেনবা য়ারম্বা অদু থাদোক্তুনা লাইরবশিংগী সেবা তৌরগা মপুন্সি লেনখি। মহাক্কী থোইদোকপা অসি উরগা মীওই কয়া অমসু মীয়ামগী সেবা তৌবা হৌরকখি। মহাক্না মহাক্কী থবক্না মীয়ামদা লু-নানবগী অথোইবা পারা অদু তম্বীখি। মহাক্কী মংফমদা অসুম্না ইরি ‘হিয়র রিপোসেস সিস্তর নিবেদিতা হু গেব হার ওল তু ইন্দিয়া’ – মফম অসিদা মহাক্কী লৈজবা পুম্বা ভারত্তা পীথোকখিবী সিস্তর নিবেদিতা পোত্থারি। তশেংনমক মহাক্না অসুম্না তৌখি। অদুগুম্বা অথোইবী অদুদা ঐখোয়না পীবা য়াবা শ্রদ্ধাঞ্জলি হায়ববু ভারত মচা পুম্নমক্না মহাক্কী পুন্সিদগী পারা অমা তমজরগা মহাক্না চৎলম্বা কৎথোকপগী লম্বীদা চৎননবা হোৎনবনি।

“ইকাই খুমনজরিবা প্রধানমন্ত্রীজী, ঐগী মিং দাক্তর পার্থ শাহ কৌজৈ … ঐখোয়না নবেম্বর ১৪ অসি অঙাংগী নুমিৎ ওইনা পালন তোরি মরমদি নুমিৎ অসি ঐখোয়গী অহানবা প্রধানমন্ত্রীজী জৱহরলালজীগী মপোক নুমিৎনি…নুমিৎ অসিমক মালেমগী দাইবেতিজ নুমিৎ ওইনসু লৌনৈ…দাইবেতিজ অসি অহল খক্তগী লাইনা নত্রে, মসি অঙাং কয়া অমদসু নাবা থেংনরি…অদুনা শিংনবা অসিগীদমক ঐখোয়না করি তৌবা ঙমগনি?”

অদোমগী ফোনকোল অসিগীদমক থাগৎচরি। অহনবা মক্তদা ঐখোয়গী অহানবা প্রধানমন্ত্রী জৱহরলাল নেহরুজীগী মপোক নুমিত্তা পাংথোক্কদৌরিবা চিলদ্রেন্স দে, অঙাংগী নুমিৎকীদমক অঙাং খুদিংমক্তা য়াইপ-পাউজেল পীজরি। অনৌবা ভারত অমা শেম্ননবা হোৎনবদা অঙাংশিং অসিনা খ্বাইদগী মরু ওইবা হিরোনি। অদোম্না নুংনাংবীরিবা অদু ওন্থোক্না চুমখ্রে। মমাংদদি লাইনা অসি চহি য়াম্লক্লগা নারম্মি। অদুবু হৌজিক্তি অঙাংশিংদা নাবা উরে। অঙাংশিংসু দাইবেতিজনা নাবা য়াওরে হায়বা তাবদা য়াম্না ঙকপা ফাওই। হান্নদি অসিগুম্বা লাইনা অসি রাজরোগ হায়না খঙনরম্মি। য়ারিমখৈ অঙাংশিংবু অহাংবা লম্পাক্তা চেন চোংদুনা শান্নহনবীয়ু। ঙমলগদি অহলশিংসু অঙাং মরক্তা য়াওশিনবীয়ু। অঙাংশিংবু লিফ্তা কাহনবগী মহুত্তা সিরি থাক্তা কাহনবীয়ু।

মরূপশিং থা অসিদা ফিফা অন্দর ১৭ ৱার্ল্দ কপ পাংথোক্লি। মালেম পুম্বগী তীমশিং ভারত্তা লাকই। অমসুং পুম্নমক্না মখোয়গী হৈশিংবা উৎখি। ঐহাকসু মেচ অমা য়েংবগী তাঞ্জা ফংখি। ঐখোয়গী নহা শান্নরোইশিংগী থৌনা অদু উবদা য়াম্না হেন্না ঙকখি। শান্নরোইশিংগা লোইননা য়েংলিবা মীয়াম পুম্নমকসু চপ মান্নবা থৌনা অমদি লাংতক্নবা ফাওখি। ৱার্ল্দ কপ অদু ঐখোয়না থোইবমক ঙমজদ্রবসু শান্নরোইশিং অদুনা মীয়ামগী থমোই খুদুম চনবা ঙমখি। ভারতকা লোইননা মালেম পুম্বনা ৱার্ল্দ কপ অসিগী নুংঙাইবা লৌখি। লোইননা তুর্নামেন্ত অসিনা ফুৎবোলবু পামজবশিংবু থোইদোক্না পেলহনখি। ঐখোয়গী তুংগী ফুৎবোলগী তাইবং অসি থোইদোক্না মকা লাম্মি হায়বগী খুদম উবা ফংই। ঐহাক্না অমুক্কসু হন্না শান্নরোইশিং, মখোয়গা লোইনবশিং অমসুং শান্নববু পামজবশিংগী মফমদা নুংঙাইবা ফোংদোকচরি।

নুংশিজরবা ঐগী ইরৈবাকচাশিং, স্বচ্ছ বারতকী মরমদা ঐঙোন্দা ইরকপশিং অসিবু ঐনা লোইনা লৌখৎলবদি নুমিৎ খুদিংগী মন কী বাতকী থৌরম পাংথোকপা তাই। অদুগা মদুগী হিরম্না লু-হেনবা ওইদবা য়াররোই। কনা অমনা পীক্লিবা অঙাংশিংনা লু-নানবগী থবক তৌবগী ফোতো থাবীরকই। অদুগা নহশিংগী কাংলুপ্না থবক অসি পাংথোকপগী ফোতো থাবীরকই। লু-নান্না থম্নবগী অনৌবা পাম্বৈ পুথোকপা অমসুং অহোংবা কয়াগী পাউ তাবা ফংলি। ঐঙোন্দা বিফোর অমসুং আফতর হায়না ফোতো থারকখি। ফোতোশিং অদু উবদা ঐ য়াম্না ঙকখি। কনাগুম্বশিংনা মখোয়গী অকোইবদা লৈবা অমোৎ-অকাইশিং অদু উরগা নীংবা কাইবা ফাওরবদি ইকোলোজিকেল প্রোতেক্সন ওর্গনাইজেসনগী নহারোলশিংগী থৌনা, ৱাশক অদুবু নীংশিংসি। অদোমগী অকোইবা অদু অমুক হন্না তরু-তনাল্লা লৈহনবা ঙম্লরোই হায়না নুংসা থিবীরুনু। মখোয়গী থবক অদুনা খুদম ওইরগা ঐখোয়সু শোইদনা ঙমগনি হায়না থাজবীয়ু। লানবন্দি ঐখোয়গী লন্নি। অরিবগা শাগোন্নরিবা খুদিংমকপু তেক্তা কাইদনা লু-নান্না থম্বা অসি ইরৈবাকচা ঐখোয় খুদিংমক্কী থৌদাংনি। ঐহাক্না ইকোলোজিকেল প্রোতেক্সন ওর্গনাইজেসনগী থৌমীশিং অমদি চন্দ্রপুরগী মীয়াম পুম্নমকপু হন্না হন্না থাগৎচরি।

নুংশিজরবা ঐগী ইরৈবাকচাশিং, লাক্কদৌরিবা নবেম্বর ৪দা ঐখোয়না গুরু নানক জয়েন্তী পাংথোক্কদৌরি। গুরু নানক দেবজী অসি শিখশিংগীদমক্তা নত্তনা মালেম পুম্বগী গুরুনি। মহাক্না মালেম পুম্বগী য়াইফনবা খনখি অমসুং কাংলুপ খুদিংমকপু অমত্তা ওইনা লৌখি। নুপীশিংদা অহেনবা থৌনা পীবা অমসুং নুপীশিংবু ইকাই খুম্নবা হায়বা ৱাখল্লোন মীয়ামদা শন্দোক্নবা হোৎনখি। মহাক্না কিলোমিতর লিসিং ২৮ খোংনা চৎতুনা মহাক্কী পাউজেলশিং শন্দোকখি। মহাক্না মীয়ামগা ৱারি শারগা অচুম্বা, কৎথোকপা অমদি মথৌদা পুক্নীং চংবগী লম্বী তাকপীখি। মহাক্না মীয়ামদা অমত্তা ওইবগী ৱাখল্লোন শন্দোকখি। লোইননা মহাক্কী পাউজেল অদুবু থবক ওইনা পাংথোক্তুনা উৎখি। সেবা তৌবগী ৱাখল্লোন মীয়ামদা পীনবা লঙ্গর হৌদোকখি। পুন্না ফম্মিন্নরগা লঙ্গরদা চামিন থকমিন্নবনা মীয়ামদা অপুনবা অমদি মান্নবগী ৱাখল্লোন লাকই। গুরু নানক দেবজীনা পাউজেল অহুমখক পীবীরম্মি-শেম্বীবা মপুগী মিংখোই শোল্লু, হোৎনবা লেপকনু, থবক শু অমসুং মথৌ তাবশিংগী মতেং পাংঙু। গুরু নানক দেবজীনা মহাক্কী ৱাখল্লোনশিং ফোংদোক্নবা ‘গুরুবানী’ ইবীখি। লাক্কদৌরিবা চহি ২০১৯দা ঐখোয়না গুরু নানক দেবজীগী ৫৫০শুবা মহাল ফংখিবগী নুমিৎ পাংথোক্কদৌরি। ঐখোয় ময়াম পুন্না মহাক্না তাকপীরম্বা লম্বীদা চৎনবা হোৎনরসি।

নুংশিজরবা ইরৈবাকচাশিং, নুমিৎ নিনিগী মতুংদা ওক্তোবর ৩১দা ঐখোয়না সরদার বল্লভ ভাই পতেলগী মপোক কুমওন পাংথোক্কদৌরি। ঐখোয় পুম্নমক্না খঙই মদুদি অনৌবা ভারত অমগী মরু মহাক্না হুনখি। অদুগুম্বা ভারত ইমাগী মপারী অদুগী পুন্সিদগী ঐখোয়না ঙসি তমজবা য়াবা অদুক্কি মতিক য়াম্না লৈখ্রে। ওক্তোবর ৩১ অসিদা শ্রীমতী ইন্দিরা গান্ধীসু তাইবংপান থাদোকপীখি। সরদার বল্লভ ভাই পতেলগী থোইদোকপা মগুন্দি অহোংবা পুরক্নবা ৱাখল্লোন পুথোকপগা লোইননা মদুবু থবক ওইনা পাংথোক্লগা উৎননবা হোৎনবা অদুনি। সরদার বল্লভ ভাই পতেলনা ভারত অসি পুন্সিন্ননবা হোৎনখি। ভারত মচা কোতি কয়া অসি জাতি অমা সংবিধান অমা হায়না পুন্না লৈহন্নবা মানা হোৎনখি। সরদার বল্লভ ভাই পতেলগী ৱাফম অসিনা ঐখোয়দা থৌনা হাপ্পীরি। মহাক্না হায়বীরম্মি ‘খুন্নাই অমসুং কাংলুপকী খেন্নবনা ঐখোয়বু থিংবা ঙম্লোই, পুম্নমক ভারত মচা হাক্তনি, ঐখোয়না ঐখোয়গী লৈবাকপু নুংসিগদবনি অমসুং অমগা অমগা নুংশিনবা অমসুং ইকাই খুম্নবনা ঐখোয়গী লমচৎ ওইহনগদবনি।’

সরদার সাহেবকী ৱাফম অসি ন্যু ইন্দিয়াগী বিজন অসিগীদমক ইথিল পোক্নীংঙাইনি। অমসুং মরম অসিনা মহাক্কী মপোক নুমিৎ অসি ‘রাষ্ট্রীয় এক্তা দিবস’ হায়না পাংথোক্লিবনি। লৈবাক অসিবু অপুনবা খুন্নাই অমা ওইহন্নবা হোৎনবদা মহাক্কী থৌদাং মপান নাইদে। সরদার সাহেবকী মপোক নুমিৎ ওক্তোবর ৩১ অসিদা লৈবাক পুম্বদা ‘রন ফোর য়ুনিতী’গী থৌরম পাংথোক্কনি। লৈবাক অসিগী নুপী-অঙাংশিং য়াওনা মীওই কাংলুপ খুদিংমক্না শরুক য়াগদৌরি। মীয়াম পুম্নমক্না ‘রন ফোর য়ুনিতী’দা শরুক য়াবীদুনা ঐখোয় মশেল নুংশিনবা উৎপগী থৌরম অসিদা শরুক য়াবীয়ু।

নুংশিজরবা ইরৈবাকচাশিং, দীৱালীগী শুতিগী মতুংদা অনৌবা ৱাশক অমগা লোইননা, অনৌবা ৱারেপ অমগা লোইননা অদোম পুম্নমক্না নুংতিগী পুন্সিরোলদা অমুক হন্না মাই ওনশিনবীরম্লগনি। ঐগী মাইকৈদগী লৈবাক মচাশিংদা মখোয়গী মংলান পুম্নমক মংফাওননবা য়াইফ-পাউজেল অসি পীজরি। হন্না হন্না থাগৎচরি।