ପିଏମଇଣ୍ଡିଆ

ସଦ୍ୟତମ ଖବର

ପିଆଇବି ସୂତ୍ରରୁ ସ୍ବତଃ ଉପଲବ୍ଧ

ବେଙ୍ଗାଲୁରୁରେ ଦଶମ ସୌନ୍ଦର୍ଯ୍ୟ ଲହରୀ ପାରାୟଣୋତ୍ସବ ମହାସମର୍ପଣ କାର୍ଯ୍ୟକ୍ରମରେ ଯୋଗ ଦେଲେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ବେଙ୍ଗାଲୁରୁଠାରେ ଦଶମ ସୌନ୍ଦର୍ଯ୍ୟ ଲହରୀ ପାରାୟଣୋତ୍ସବ ମହାସମର୍ପଣ କାର୍ଯ୍ୟକ୍ରମରେ ଯୋଗ ଦେଇଥିଲେ ।

ଆଦି ଶଙ୍କରାଚାର୍ଯ୍ୟଙ୍କ ଦ୍ୱାରା ସୌନ୍ଦର୍ଯ୍ୟ ଲହରୀ ଶ୍ଳୋକାବଳି ରଚନା କରାଯାଇଥିଲା । ଏହି ସମାରୋହରେ ସୌନ୍ଦର୍ଯ୍ୟ ଲହରୀର ସମବେତ ଉଚ୍ଚାରଣ କରାଯାଇଥିଲା ।

ଏହି ଅବସରରେ ପ୍ରଧାନମନ୍ତ୍ରୀ କହିଥିଲେ ଯେ ସମବେତ ମନ୍ତ୍ରୋଚାରଣର ଏହି ପରିବେଶରୁ ସେ ବିଶେଷ ଶକ୍ତି ପ୍ରାପ୍ତ କରିଥିବା ଅନୁଭବ କରୁଛନ୍ତି ।

ପ୍ରଧାନମନ୍ତ୍ରୀ କହିଥିଲେ ଯେ କିଛିଦିନ ପୂର୍ବରୁ ସେ କେଦାରନାଥ ଗସ୍ତରେ ଯାଇଥିଲେ । ନିଜର କ୍ଷୁଦ୍ର ଜୀବନକାଳ ମଧ୍ୟରେ ଏପରି ଉପାନ୍ତ ଅଂଚଳ ଏବଂ ଦେଶର ଅନ୍ୟ ପ୍ରାନ୍ତରେ ଆଦି ଶଙ୍କରଙ୍କ ଦ୍ୱାରା କରାଯାଇଥିବା ମହାନ କାର୍ଯ୍ୟକୁ ଦେଖି ସେ ଆଶ୍ୱର୍ଯ୍ୟାନ୍ୱିତ ହୋଇଥିଲେ । ସେ କହିଥିଲେ ଯେ ବେଦ ଏବଂ ଉପନିଷଦ ଜରିଆରେ ଆଦି ଶଙ୍କର ଭାରତକୁ ଏକତ୍ର କରିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଆଦି ଶଙ୍କରଙ୍କ ଲିଖିତ ସୌନ୍ଦର୍ଯ୍ୟ ଲହରୀରୁ ଜଣେ ସାଧାରଣ ଲୋକ ଅନେକ କିଛି ଶିକ୍ଷା ଲାଭ କରିପାରିବ । ସେ କହିଥିଲେ ଯେ ଆଦି ଶଙ୍କରାଚାର୍ଯ୍ୟ ସମାଜରୁ କଳୁଷତା ଦୂର କରିଥିଲେ ଏବଂ ସେଥିରୁ ପରବର୍ତ୍ତୀ ପିଢ଼ିକୁ ସୁରକ୍ଷିତ ରଖିଥିଲେ । ସେ କହିଥିଲେ ଯେ ଭିନ୍ନ ବିଚାରଧାରା ଏବଂ ଆଦର୍ଶରେ ଥିବା ଶ୍ରେଷ୍ଠତ୍ୱକୁ ଆଦି ଶଙ୍କର ଆତ୍ମସାତ କରିଥିଲେ । ସେ କହିଥିଲେ ଯେ ଆଦି ଶଙ୍କରାଚାର୍ଯ୍ୟଙ୍କ ତପସ୍ୟା ବର୍ତ୍ତମାନ ସୁଦ୍ଧା ଭାରତୀୟ ସଂସ୍କୃତିରେ ଜୀବନ୍ତ ରହିଛି । ଏହି ସଂସ୍କୃତି ସମସ୍ତଙ୍କୁ ଗ୍ରହଣ କରିଥାଏ ଏବଂ ସମସ୍ତଙ୍କୁ ନେଇ ଆଗକୁ ବଢ଼ିଥାଏ । ଏହି ସଂସ୍କୃତି ଏକ ନୂତନ ଭାରତର ଭିତ୍ତିଭୂମି- ଏବଂ ସବକା ସାଥ, ସବକା ବିକାଶ ମନ୍ତ୍ରକୁ ଅନୁକରଣ କରିଥାଏ ବୋଲି ପ୍ରଧାନମନ୍ତ୍ରୀ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଭାରତୀୟ ସାଂସ୍କୃତିକ ଐତିହ୍ୟରେ ସମସ୍ତ ଜାଗତିକ ସମସ୍ୟାର ସମାଧାନ ରହିଛି । ସେ କହିଥିଲେ ଯେ ଭାରତରେ ସର୍ବଦା ପ୍ରକୃତିର ସଂରକ୍ଷଣ ପ୍ରତି ଗୁରୁତ୍ୱାରୋପ କରାଯାଇଛି ।

ପ୍ରଧାନମନ୍ତ୍ରୀ କହିଥିଲେ ଯେ ଯେଉଁ ଏଲଇଡି ବଲ୍ବ ପୂର୍ବରୁ 350ଟଙ୍କାରେ ମିଳୁଥିଲା ତାହା ଏବେ ଉଜାଲା ଯୋଜନାରେ 40ରୁ 50ଟଙ୍କାରେ ମିଳୁଛି । ସେ କହିଥିଲେ ଯେ ଏବେସୁଦ୍ଧା 27 କୋଟି ଏଲଇଡି ବଲ୍ବ ବଣ୍ଟାଯାଇସାରିଲାଣି । ଏହାର ଫଳସ୍ୱରୂପ ବିଦ୍ୟୁତ ବିଲରେ ସଂଚୟ ହୋଇପାରିଛି, ବୋଲି ସେ ଉଲ୍ଲେଖ କରିଥିଲେ ।

ପ୍ରଧାନମନ୍ତ୍ରୀ ସୂଚନା ଦେଇଥିଲେ ଯେ ଉଜ୍ଜ୍ୱଳା ଯୋଜନା ଅଧୀନରେ 3 କୋଟି ଏଲପିଜି ସଂଯୋଗ ଦିଆଯାଇସାରିଲାଣି । ଏହା ଗ୍ରାମାଂଚଳର ମହିଳାଙ୍କ ଜୀବନରେ ସକାରାତ୍ମକ ପରିବର୍ତ୍ତନ ଆଣିବା ସହିତ ସ୍ୱଚ୍ଛ ପରିବେଶ କ୍ଷେତ୍ରରେ ମଧ୍ୟ ଯୋଗଦାନ କରିଛି ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ବର୍ତ୍ତମାନ ସମୟର ଆହ୍ୱାନ ହେଉଛି ଭାରତକୁ ନିରକ୍ଷରତା, ଅଜ୍ଞାନତା, ଅପପୁଷ୍ଟି, କଳାଧନ ଏବଂ ଦୁର୍ନୀତି ଭଳି କଳୁଷତା ଠାରୁ ମୁକ୍ତ ରଖିବା ।

**********