ভারতকী প্রধানমন্ত্রী

মীপুম খুদিংগী দিজিতেল ইনক্লুজন অমসুং কন্নেক্তিবিতী হায়বসি সরকারগী ‘অন্ত্যোদয়া’গী মিৎয়েংগী তৎন-থানবা য়াদ্রবা শরুক অমনি। সরকারনা মমাংগী চহিদা রাজ্য ৫গী ৪জি. মোবাইল সর্ভিস য়ৌদবা খুঙ্গং ৭,২৮৭ অমসুং এস্পিরেস্নেল দিস্ত্রিক্ত ৪৪দা ৪জি. মোবাইল সর্ভিস য়ৌহনবগী প্রোজেক্তকী অয়াবা পীখি।

প্রধান মন্ত্রী, শ্রী নরেন্দ্র মোদীনা মহাক্কী ইং ২০২১গী নীংতম্বা ফংবা নুমিৎকী ৱারোলদা সরকারগী স্কিমশিংবু মপুং ফানা মায় পাক্না লোইশিনবগী ৱাফম থমখি। ঙসি, কেন্দ্রগী কেবিনেতনা ৪জি. সর্ভিস য়ৌদবা খুঙ্গংশিংদা ৪জি. মোবাইল সর্ভিস মপুং ফানা য়ৌহন্নবা অপুনবা লুপা করোর ২৬,৩১৬ চঙগদবা প্রোজেক্তকী অয়াবা পীখ্রে।

প্রোজেক্ত অসিনা মনুং হঞ্জিনবা অমসুং য়ৌশিনবদা লুবা মফমশিংগী ৪জি. সর্ভিস য়ৌদবা খুঙ্গং ২৪,৬৮০দা ৪জি. মোবাইল সর্ভিস পীগনি। প্রোজেক্ত অসিনা হৌজিক লৈরিবা ওপরেতরশিংনা রিহেবিলিতেসন তৌবা, ন্যু সেত্তলমেন্ত তৌবা, সর্ভিস হন্দোকখিবগুম্বা থৌওং কয়া খন্নরবা তুংদা অহেনবা খুঙ্গং ২০% মনুং চলহনবগী ৱারোলসু থম্লি। মসিগা লোয়ননা, ২জি./৩জি. কন্নেক্তিবিতী খক লৈবা খুঙ্গং ৬,২৭৯বু ৪জি.দা অপগ্রেদ তৌগনি।

আত্মানির্ভর ভারতকী ৪জি. তেক্নোলোজী স্তেক শিজিন্নদুনা বি.এস.এন.এল.না প্রোজেক্ত অসি পায়খৎকনি অমসুং য়ুনিভর্সেল সর্ভিস ওব্লিগেসন ফন্দগী খুত্থাংদা মরী লৈনবা শেন্থং পীথগনি। লুপা করোর ২৬,৩১৬কী প্রোজেক্তকী শেনফম অসিদা কেপেক্স অমসুং চহি ৫গী ওপেক্স মনুং চল্লি।

বি.এস.এন.এল.না হৌজিক-হৌজিক আত্মানির্ভর ৪জি. তেক্নোলোজী স্তেক্কী কান্নবা লৌনবা কন্না হোৎনরি অমসুং হায়রিবা তেক্নোলোজী অসি হন্দক্কী প্রোজেক্ত অসিদা শিজিন্নগনি।

খুঙ্গংগী মফমশিংদা মোবাইল কন্নেক্তিবিতী য়ৌহনবগী সরকারগী পান্দম অসিগী মাইকৈদা প্রোজেক্ত অসিনা মশক থোকপা খোঙ্কাপ অমা কানশিল্লি। প্রোজেক্ত অসিনা মোবাইল ব্রোদবেন্দগী খুত্থাংদা খুঙ্গংগী মফমশিংদা তোঙান-তোঙানবা ই-গবর্নেন্স সর্ভিস, বেঙ্কিং সর্ভিস, তেলি-মেদিসিন, তেলি-এজুকেসন্নচিংবা খুদোংচাবা কয়া ফংহনবদা খুমাং চাউশিলহনবগা লোয়ননা থবকসু পীগনি।

*****