ପିଏମଇଣ୍ଡିଆ

ମହାମହିମ ରାଷ୍ଟ୍ରପତି ରୁବେନ ରିବଲିନ

ଗଣମାଧ୍ୟମର ବନ୍ଧୁମାନେ,

ରାଷ୍ଟ୍ରପତି ରୁବେନ ରିବଲିନ ଏବଂ ତାଙ୍କ ପ୍ରତିନିଧିଦଳର ବିଶିଷ୍ଟ ସଦସ୍ୟମାନଙ୍କୁ ଭାରତକୁ ସ୍ୱାଗତ କରି ମୁଁ ଗୌରାବାନ୍ୱିତ । ଭାରତକୁ ପ୍ରଥମ ଗସ୍ତରେ ଆସିଛନ୍ତି ରାଷ୍ଟ୍ରପତି ରିବଲିନ । ଏହି ସ୍ୱତନ୍ତ୍ର ଅବସରରେ ତାଙ୍କୁ ସ୍ୱାଗତ କରି ଆମେ ବେଶ ଆନନ୍ଦିତ । ମହାମହିମ, ଭାରତ-ଇସ୍ରାଏଲ ସହଭାଗୀତାର ନୂତନ ସ୍ତମ୍ଭକୁ ବଳିଷ୍ଠ କରି ଗଢ଼ିବାରେ ଆପଣଙ୍କର ଭାରତ ଗସ୍ତ ବେଶ ସହାୟକ ହେବ । ଏହାଛଡା ଗତ ବର୍ଷ ଭାରତର ରାଷ୍ଟ୍ରପତିଙ୍କ ଦ୍ୱାରା ପ୍ରଥମ ଇସ୍ରାଏଲ ଗସ୍ତ ଫଳରେ ଦ୍ୱିପାକ୍ଷିକ ସମ୍ପର୍କକୁ ଯେଉଁ ଗତି ମିଳିଛି ତାହା ମଧ୍ୟ ଆପଣଙ୍କ ଭାରତ ଗସ୍ତ ଯୋଗୁ ଆହୁରି ସୁଦୃଢ଼ ହେବ । ଆସନ୍ତା ବର୍ଷ ଦୁଇ ରାଷ୍ଟ୍ର ତାଙ୍କର ପୂର୍ଣ୍ଣାଙ୍ଗ କୂଟନୈତିକ ସମ୍ପର୍କ ସ୍ଥାପନର ୨୫ତମ ବର୍ଷ ପାଳନ କରିବେ । ଆମେ ଏହି ବୃହତ୍ ମାଇଲ ଖୁଣ୍ଟର ନିକଟତର ହେଉଥିବା ପରିପ୍ରେକ୍ଷୀରେ ବିଭିନ୍ନ କ୍ଷେତ୍ରରେ ଆମର ସହଭାଗୀତାକୁ ସୁଦୃଢ଼ ଓ ଆହୁରି ଆଗେଇନେବାକୁ ପ୍ରତିବଦ୍ଧ । ବୈଶ୍ୱିକ ଓ ଆଂଚଳିକ ସ୍ତରରେ ଆମର ସ୍ୱାର୍ଥ, ସଂବେଗ ଓ ସମସ୍ୟାଗୁଡିକର ସମାନତା ଓ ସଂଯୋଗକୁ ଆଧାର କରି ତା ଉପରେ ଦୁଇ ରାଷ୍ଟ୍ରର ମିତ୍ରତା ଗଢ଼ିବାକୁ ପଡିବ ।

ବନ୍ଧୁଗଣ,

ଆମର ସହଭାଗୀତା ବହୁମୁଖୀ ଓ ପରିବ୍ୟାପ୍ତ । ଆମେ ବିଭିନ୍ନ କ୍ଷେତ୍ରରେ ଭାଗିଦାର ହୋଇଛୁ: –

• କୃଷି ଉତ୍ପାଦକତା ଓ ଦକ୍ଷତା ବୃଦ୍ଧି

• ଗବେଷଣା ଓ ନବସୃଜନର ଯୋଗସୂତ୍ରକୁ ବଳ ପ୍ରଦାନ

• ସମାଜର ମଙ୍ଗଳ ପାଇଁ ବିଜ୍ଞାନ ଓ ପ୍ରଯୁକ୍ତି କୌଶଳର ପ୍ରୟୋଗାତ୍ମକ ନିୟୋଜନ

• ବାଣିଜ୍ୟ ଓ ପୁଂଜିନିବେଶଗତ ସମ୍ବନ୍ଧକୁ ଆହୁରି ମଜବୁତ କରି ଗଢ଼ିବା

• ଆମ ଲୋକମାନଙ୍କର ନିରାପତ୍ତାକୁ ସୁନିଶ୍ଚିତ କରିବା ପାଇଁ ସାମରିକ ସମ୍ବନ୍ଧକୁ ଆହୁରି ସୁଦୃଢ଼ କରିବା

• ପର୍ଯ୍ୟଟନ ଓ ସାଂସ୍କୃତିକ କ୍ଷେତ୍ରରେ ପରସ୍ପର ଲୋକଙ୍କ ମଧ୍ୟରେ ସମ୍ବନ୍ଧକୁ ପରିବ୍ୟାପ୍ତ କରିବା

• ଶିକ୍ଷାଗତ ଆଦାନପ୍ରଦାନର ବିକାଶ । ଦୁଇ ଦେଶର ଛାତ୍ରଛାତ୍ରୀମାନେ ଏବେ ଅଧିକରୁ ଅଧିକ ସଂଖ୍ୟାରେ ପରସ୍ପର ରାଷ୍ଟ୍ରକୁ ଯାଇ ଉଚ୍ଚତର ଅଧ୍ୟୟନ ଓ ଗବେଷଣା କରୁଥିବାରୁ ସେ ପ୍ରକାର ଦ୍ୱିପାକ୍ଷିକ ଆଦାନପ୍ରଦାନକୁ ଆହୁରି ବ୍ୟାପକ କରିବା ଦିଗରେ ଉଦ୍ୟମ ଜାରି ରଖିବା ।

ବନ୍ଧୁଗଣ,

କିଛି ସମୟ ପୂର୍ବରୁ, ଆଜି ଆମର ଦ୍ୱିପାକ୍ଷିକ ଆଲୋଚନା କାଳରେ ରାଷ୍ଟ୍ରପତି ରିବଲିନ ଏବଂ ମୁଁ ଆମ ଦୁଇ ରାଷ୍ଟ୍ର ମଧ୍ୟରେ ଅନେକ କ୍ଷେତ୍ରରେ ସହଯୋଗିତାର ବ୍ୟାପକ ସୁଯୋଗ ରହିଥିବା ସ୍ୱୀକାର କରୁଛୁ । ଆମେ କୃଷି କ୍ଷେତ୍ରରେ ଇସ୍ରାଏଲର ଆଧୁନିକ ଜ୍ଞାନକୌଶଳ ସହ ବେଶ ପରିଚିତ । ବିଶେଷକରି ଜଳସମ୍ପଦର ପରିଚାଳନା ଏବଂ ମରୁଡି ପ୍ରବଣ ଅଂଚଳରେ ସୂକ୍ଷ୍ମ ଜଳସେଚନ ପଦ୍ଧତିର ବିଶେଷ ଜ୍ଞାନ ଇସ୍ରାଏଲ ପାଖରେ ରହିଛି । ଆମ ପାଇଁ ଜଳସମ୍ପଦର ପରିଚାଳନା ଓ ସଂରକ୍ଷଣ ବିଶେଷ ମହତ୍ୱ ବହନ କରେ । ଏବଂ ଏହି ଦୁଇଟି କ୍ଷେତ୍ରକୁ ଅଗ୍ରାଧିକାର କ୍ଷେତ୍ର ଭାବେ ଆମେ ଚିହ୍ନଟ କରିଛୁ । ସେହିପରି ବୈଜ୍ଞାନିକ ଗବେଷଣା ଓ ବିକାଶ କ୍ଷେତ୍ରରେ ଦୁଇ ଦେଶ ମଧ୍ୟରେ ସହଭାଗୀତାକୁ ମଧ୍ୟ ଆମେ ଅଗ୍ରପ୍ରାଧାନ୍ୟ ଦେଉଛୁ । ଏବେ ଭାରତର ଅର୍ଥ ବ୍ୟବସ୍ଥା ବହୁଳ ଭାବେ ଉନ୍ମୁକ୍ତ ହେଉଛି । ଏ ପ୍ରକାର ମୁକ୍ତ ଅର୍ଥବ୍ୟବସ୍ଥା ଇସ୍ରାଏଲର ଶିଳ୍ପ ଉଦ୍ୟୋଗ ପାଇଁ ଅନେକ ସୁବର୍ଣ୍ଣ ସୁଯୋଗ ସୃଷ୍ଟି କରିଛି । ଆମର ଆର୍ଥିକ ଉଦାରୀକରଣ ପଦକ୍ଷେପ, ସଂସ୍କାର ଓ ତଦଜନିତ କାର୍ଯ୍ୟକ୍ରମ ସହିତ ନବସୃଜନ, ଗବେଷଣା ଓ ପ୍ରଯୁକ୍ତି କୌଶଳର ବିକାଶ ଉପରେ ଗୁରୁତ୍ୱ ଦିଆଯାଉଥିବାରୁ ଏହା ଇସ୍ରାଏଲର ସାମର୍ଥ୍ୟ ଓ ଶକ୍ତିକୁ ସୁହାଇବ । ଆମର ମେକ-ଇନ-ଇଣ୍ଡିଆ, ଡିଜିଟାଲ ଇଣ୍ଡିଆ, ସ୍କିଲ ଇଣ୍ଡିଆ ଏବଂ ସ୍ମାର୍ଟ ସିଟି ଭଳି ଧ୍ୱଜାବାହକ (ଫ୍ଲାଗସିପ୍) କାର୍ଯ୍ୟକ୍ରମରେ ଇସ୍ରାଏଲର କମ୍ପାନୀମାନେ ଭାରତୀୟ ଶିଳ୍ପ ଜଗତ ସହ ମିଶି ଅନେକ ପ୍ରକଳ୍ପ ହାତକୁ ନେଇପାରିବେ । ଏହି ଅବସରରେ ମୁଁ ଦୁଇ ଦେଶର ଘରୋଇ ଶିଳ୍ପସଂସ୍ଥାମାନଙ୍କୁ ଅଗ୍ରଣୀ ଭୂମିକା ନେଇ ବ୍ୟାପକ ସୁଯୋଗ ରହିଥିବା କ୍ଷେତ୍ରଗୁଡିକରେ ବ୍ୟବସାୟିକ ସମ୍ବନ୍ଧକୁ ବଢ଼ାଇବା ଏବଂ ବାଣିଜ୍ୟ ତଥା ପୁଞ୍ଜି ନିବେଶ କ୍ଷେତ୍ରରେ ଅଧିକରୁ ଅଧିକ ଭାଗିଦାର ହେବାପାଇଁ ଆହ୍ୱାନ କରୁଛି । ସେବା କ୍ଷେତ୍ର, ବିନିର୍ମାଣ କ୍ଷେତ୍ର ବିଶେଷ କରି ଅତ୍ୟାଧୁନିକ କାରିଗରୀ କୌଶଳଯୁକ୍ତ ବିନିର୍ମାଣ ଉଦ୍ୟୋଗରେ ଭାରତ ଓ ଇସ୍ରାଏଲର କମ୍ପାନୀମାନେ ମିଳିତ ଭାବେ କାର୍ଯ୍ୟ କରିପାରିବେ । ଆମର ଦ୍ୱିପାକ୍ଷିକ ଆଲୋଚନା କାଳରେ ରାଷ୍ଟ୍ରପତି ରିବଲିନ କହିଛନ୍ତି ଯେ, ମେକ-ଇନ-ଇଣ୍ଡିଆ ସହ ମେକ-ୱିଥ୍-ଇଣ୍ଡିଆ ଯୋଡାଗଲେ ଭାରତରେ ଅନେକ ନିଯୁକ୍ତି ସୁଯୋଗ ସୃଷ୍ଟି ହେବ ଏବଂ ଏହା ଦୁଇ ରାଷ୍ଟ୍ର ପାଇଁ ଉପକାରସିଦ୍ଧ ସାବ୍ୟସ୍ତ ହେବ । ସୂଚନା ପ୍ରଯୁକ୍ତି ସେବା ବା ଆଇଟି କ୍ଷେତ୍ରରେ ଭାରତର ବ୍ୟାପକ ସାମର୍ଥ୍ୟ ରହିଥିବାରୁ ସେ ଦିଗରେ ଦୁଇ ଦେଶର ସହଭାଗିତା ଆମର ଅର୍ଥ ବ୍ୟବସ୍ଥାକୁ ମଜବୁତ କରିବ ।

ବନ୍ଧୁଗଣ,

ରାଷ୍ଟ୍ରପତି ରିବଲିନ ଏବଂ ମୁଁ ଆମ ଦୁଇ ଦେଶ ମଧ୍ୟରେ ଦୃଢ଼ ଓ କ୍ରମବର୍ଦ୍ଧିଷ୍ଣୁ ସମ୍ବନ୍ଧ ତଥା ସହଭାଗିତାକୁ ଅତୀବ ମୂଲ୍ୟବାନ ମନେ କରୁଛୁ । ଆମର ଦୁଇଟି ଯାକ ସମାଜ ଉଗ୍ରବାଦ ଓ ସନ୍ତ୍ରାସବାଦର ବିପଦ ଘେରରେ ରହିଛନ୍ତି । ଆମେ ସ୍ୱୀକାର କରୁଛୁ ଯେ ସନ୍ତ୍ରାସବାଦ ହେଉଛି ଏକ ବୈଶ୍ୱିକ ଆହ୍ୱାନ । ଏହାର କୌଣସି ସୀମା-ସରହଦ ନାହିଁ । ବିଭିନ୍ନ ପ୍ରକାର ସଂଗଠିତ ଆନ୍ତର୍ଜାତିକ ଅପରାଧ ସହ ସନ୍ତ୍ରାସବାଦର ଭିତିରି ସମ୍ପର୍କ ରହିଛି । ଭାରତର ପଡିଶାରେ ଏଭଳି ଏକ ରାଷ୍ଟ୍ର ରହିଛି ଯାହାକି ଏବେ ଆତଙ୍କବାଦର ମୂଳଉତ୍ସ ରୂପେ ବିଦ୍ୟମାନ ଏବଂ ସେଠାରୁ ବିଶ୍ୱର ଅନେକ ଅଂଚଳକୁ ସନ୍ତ୍ରାସବାଦର କାୟା ବିସ୍ତାର ହେଉଛି । ଏହା ଅତ୍ୟନ୍ତ ପରିତାପର ବିଷୟ । ଆମେ ଦୁଇ ରାଷ୍ଟ୍ର ସମସ୍ୱରରେ ଦାବି କରୁଛୁ ଯେ ଆନ୍ତର୍ଜାତିକ ସମୁଦାୟ ଏଭଳି ସନ୍ତ୍ରାସବାଦ ବିରୋଧରେ ମିଳିତ ସଂଗ୍ରାମ ପାଇଁ ଏକଜୁଟ ଓ ପ୍ରତିବଦ୍ଧ ହେବାକୁ ପଡିବ । ଆତଙ୍କବାଦର ନେଟୱାର୍କ ବଢାଉଥିବା ଅଂଚଳଗୁଡିକୁ ଏକଘରିଆ କରି ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ହେବ । କିନ୍ତୁ ଏଭଳି ଆତଙ୍କ ବିରୋଧରେ ମୌନ ରହିବା ବା ଉଦାସୀନ ହେବା ଅଥବା କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବା ଦ୍ୱାରା ସେମାନଙ୍କୁ ଅଧିକ ପ୍ରୋତ୍ସାହନ ମିଳୁଛି । ଯାହାକି ବିଶ୍ୱ ପାଇଁ ବିପଦର ମାତ୍ରାକୁ ଦ୍ୱିଗୁଣିତ କରୁଛି । ଆମେ ଦୁଇ ରାଷ୍ଟ୍ର ସହମତ ହେଲୁ ଯେ ମୌଳବାଦ ଓ ଉଗ୍ରବାଦ ଭଳି ଶକ୍ତିର କଡା ମୁକାବିଲା କରିବା ଦିଗରେ ଆମର ମିଳିତ ସହଯୋଗକୁ ଆହୁରି ମଜବୁତ କରିବୁ । ଶାନ୍ତିପ୍ରିୟ ରାଷ୍ଟ୍ରମାନଙ୍କର ନିରାପତ୍ତା ବିପନ୍ନ ହେବାପାଇଁ ଦେବୁନାହିଁ । ବିଶେଷକରି ସାଇବର କ୍ଷେତ୍ରରେ ଦୁଇ ରାଷ୍ଟ୍ରର ବାସ୍ତବବାଦୀ ଓ ନିଧାର୍ଯ୍ୟ ସହଯୋଗିତାକୁ ଅଗ୍ରାଧିକାର ଦେଇ ପଦକ୍ଷେପ ନିଆଯିବ । ଆମେ ଆମର ସାମରିକ ଭାଗିଦାରିତାର କ୍ରମବଦ୍ଧିଷ୍ଣୁ ଦିଗ ପ୍ରତି ବେଶ ସଚେତନ । ଏହାକୁ ଆହୁରି ବ୍ୟାପକ କରିବା ସହିତ ସାମରିକ କ୍ଷେତ୍ରରେ ବିନିର୍ମାଣ ଓ ଉତ୍ପାଦନକୁ ଅଗ୍ରାଧିକାର ଦେବା ଲାଗି ରାଜି ହୋଇଛୁ । ଜାତିସଂଘର ନିରାପତ୍ତା ପରିଷଦରେ ସଂସ୍କାର ଅଣାଯାଇ ସେଥିରେ ଭାରତକୁ ସ୍ଥାୟୀ ସଦସ୍ୟ ରୂପେ ଗ୍ରହଣ କରିବା ଦାବିକୁ ଇସ୍ରାଏଲର ପୂର୍ଣ୍ଣ ସମର୍ଥନ କରିଥିବା ହେତୁ ଭାରତ ତା ନିକଟରେ କୃତଜ୍ଞ ।

ବନ୍ଧୁଗଣ,

ଗଣତାନ୍ତ୍ରିକ ମୂଲ୍ୟବୋଧର ଦୁଇ ପ୍ରମୁଖ ସଦସ୍ୟ ରାଷ୍ଟ୍ର ଭାବେ ଦୁଇ ଦେଶର ଲୋକଙ୍କ ମଧ୍ୟରେ ସମ୍ପର୍କ ଭାରତ-ଇସ୍ରାଏଲ ସମ୍ବନ୍ଧକୁ ନୂତନ ଶୀର୍ଷକୁ ପହଂଚାଇବ । ଭାରତରେ ଦୁଇ ହଜାର ବର୍ଷ ଧରି ରହିଆସିଥିବା ଜିଉ (Jew) ସମ୍ପ୍ରଦାୟ ଭାରତ-ଇସ୍ରାଏଲ ସମ୍ପର୍କକୁ କ୍ରମେ ସୁଦୃଢ଼ କରିବାରେ ସହାୟକ ହେଉଛନ୍ତି । ବିଭିନ୍ନତା ଭିତରେ ଏକତାର ସଂସ୍କୃତିରେ ଜିଉ ସମ୍ପ୍ରଦାୟର ବିକାଶ ଆମ ପରମ୍ପରାକୁ ଆହୁରି ସମୃଦ୍ଧ ଓ ରୁଦ୍ଧିମନ୍ତ କରୁଛି । ଭାରତରେ ଜିଉ ସମ୍ପ୍ରଦାୟର ବିକାଶରେ ଆମେ ଅତ୍ୟନ୍ତ ଗୌରାବାନ୍ୱିତ । ରାଷ୍ଟ୍ରପତି ଏବଂ ମୁଁ ଦୁଇ ରାଷ୍ଟ୍ରର ଲୋକ-ଲୋକଙ୍କ ମଧ୍ୟରେ ସମ୍ପର୍କ ତଥା ଯୋଗସୂତ୍ରକୁ ବଢ଼ାଇବା ଲାଗି ବଦ୍ଧପରିକର ଯାହାକି ଆମର ସମାନ ପ୍ରାଥମିକତା ।

ମହାମାନ୍ୟ

ଆମର ୨୫ବର୍ଷର ମୈତ୍ରୀ ଦୁଇ ରାଷ୍ଟ୍ର ପାଇଁ ଅନେକ ରୁଚିକର ଓ ସମୃଦ୍ଧ ସଫଳତା ଆଣିଛି । ଏହା ମଧ୍ୟ ବିଶ୍ୱରେ ଶାନ୍ତି, ସ୍ଥିରତା ଓ ଗଣତନ୍ତ୍ରର ବିକାଶରେ ଲାଗି ପଡିଥିବା ସ୍ୱରକୁ ମଜବୁତ କରିବାରେ ସହାୟକ ହୋଇଛି । ଆପଣଙ୍କର ଭାରତ ଗସ୍ତ ଦୁଇ ରାଷ୍ଟ୍ରର ପାରସ୍ପରିକ ସମ୍ବନ୍ଧରେ ଏକ ନୂଆ ଅଧ୍ୟାୟ ଯୋଡିବ ।
ଏହି ଶଦ୍ଦ ସହିତ ମୁଁ ପୁଣି ଥରେ ରାଷ୍ଟ୍ରପତି ରିବଲିନଙ୍କୁ ତାଙ୍କର ପ୍ରଥମ ଭାରତ ଗସ୍ତ ପାଇଁ ଭବ୍ୟ ସ୍ୱାଗତ କରୁଛି । ଏବଂ ଭାରତରେ ତାଙ୍କର ରହଣି ଫଳପ୍ରଦ ତଥା ସୁଖଦ ହେବ ବୋଲି ଆଶା ରଖିଛି ।

ଧନ୍ୟବାଦ ।