ভারতকী প্রধানমন্ত্রী

৭৯শুবা নিংতম্বা নুমিত্ত, প্রধান মন্ত্রী মোদীনা লাল কিলাদগী মহাক্কী খ্বাইদগী শাংবা অমসুং য়াম্না কুপ্পা মিনিত ১০৩ শাংবা ৱারোল পীখ্রে, ২০৪৭ ফাওবগী মনুংদা বিকসিত ভারত অমগী নাখৈ শেংলবা লম্বী অমা শেম্লে। অত্মনির্ভর, ইন্নোবেসন অমসুং মীয়ামগী য়াইফনবা থবকশিংদা অকনবা মীৎয়েং অমা থম্বগা লোয়ননা, অতোপ্পা লৈবাকশিংগী মখা পোল্লম্বা লৈবাক অমা ওইরম্বদগী মালেম্না থাজবা লৈবাক অমা ওইরকপা, তেক্নোলোজিদা চাউখৎলকপা অমসুং শেন-থুমগী অৱাবা কয়া মায়োক্নবা ঙম্বা লৈবাক অমা ওইরকপগী ভারতকী খোঙচৎ প্রধান মন্ত্রীনা পাউদমখি।

লাউথোকখিবা মরুওইবা ৱাফমশিং:

1.        ব্লেকমেল তৌদবা, য়াশিন্নবা তৌদবা: পেহালগাম এত্তেক মতুংদা পাংথোকখিবা ওপরেসন সিন্দুর প্রধান মন্ত্রীনা থাগৎখি, ভারতকী ষ্ট্রাতেজিম ওতোনোমি উৎপনি হায়না ফোঙদোকখি। মেদ-ইন-ইন্দিয়া খুৎলায়শিং শীজিন্নদুনা, ওপরেসন অসিনা তেরর নেতৱার্কশিং অমসুং পাকিস্তানদা লৈবা ইনফ্রাষ্ট্রকচর থুগাইরে, ন্যুক্লিয়ার ব্লেকমেল নত্ত্রগা কিহল্লকপশিং ভারতনা মখা তানা য়াবা ঙম্লোই হায়বগী অনৌবা যুগ অমা ইঞ্জিৎ পীরে।

o        ইন্দস ৱাতরস ত্রিতিগী মতাংদা, মহাক্না নাখৈ শেংনা হায়খি: “ঈ অমসুং ঈশিং পুন্না চেনমিন্নবা য়ারোই হায়না হৌজিক ভারতনা ৱারেপ লৌরে। ইন্দস ৱাতরস ত্রিতি অরানবনি হায়বা মীয়াম খঙলে। ঐখোয়গী লৌমীশিং ৱারিঙৈদা ইন্দস তুরেলগী ঈশিংনা য়েক্নবগী লমদা ঈশিং ফংহল্লে”।

o        লৈবাক অসিগী য়াইফনবা থবকশিংদা ভারতনা কৈদৌঙৈদা শন্তাইনবা তৌরোই হায়বা ৱারোল অসিনা অমুক হন্না অচেৎপা ফিরেপ লৌরে অমসুং লৈবাক অসিনা য়াংনা থবক পায়খৎপা ঙম্বা অমসুং লৈবাক অসিদা শাজবা তেক্নোলোজি অমসুং ঙাক-শেনগী প্লেতফোর্মশিং শীজিন্নবা অদু ওপেসন অসিদা উবা ফংলে।

2.        অত্মনির্ভর ভারত, তেক্নোলোজি, উদ্যোগ চাউখৎহনবা: প্রধান মন্ত্রী মোদীনা হায়খি, “অতোপ্পশিংগী মখা পোনবা অসিদগী লৈবাক অমগী নিংতম্বগী মতাংদা ৱাহংশিং লাক্লে। মখা পোনবা অসি হৈনবী অমা ওইরকপসি লাইবক থিবনি অমসুং খুদোংথিবা অমনি। মরম অদুনা ঐখোয় ৱাখল তাগদবনি অমসুং অত্মনির্ভর ওইগদবনি। অত্মনির্ভর অসি মপান্দা থাদোকপা, মপান্দগী পুশিল্লকপা, রুপি নত্ত্রগা দোল্লার খক্তগী নত্তে। মসি ঐখোয়গী তৌবা ঙম্বশিং, ঐখোয় মশা মরোমদোম লেপচবা ঙম্বগী থৌনা ওইগদবনি”।

o        মরম অদুনা ২০২৫ দা অহানবা মেদ ইন ইন্দিয়া সেমিকন্দক্তর চিপ পুথোক্নবা মহাক্না লাউথোক্লে অমসুং ন্যুক্লিয়ার সেক্তরদা লনাই কাংবু শরুক য়াহন্দুনা ইনর্জি অমসুং তেক্নোলোজিদা খুদোংচাবা কয়া পীরে।

o        অনৌবা থবকশিং, জেত ইঞ্জিনশিং, সোসিএল মেদিয়া প্লেতফোর্মশিং, হারশিং অমসুং অতোপ্পা মরুওইবা তেক্নোলোজিশিং লৈবাক অসিদা পুথোক্তুনা নহারোলশিংনা লৈবাক শেমগৎপদা শরুক য়াগদবনি। মশা মরোমদোম লেপচবা ঙম্বা, শক্তি লৈবা অমসুং মালেম্না ইকায়খুম্নবা ভারতগী তুংলমচৎ অমা শেমগদবনি।

o        প্রধান মন্ত্রীনা হায়খি মদুদি ভারতনা পায়খৎলিবা থবকশিং অসিনা লৈবাক অসিগী তুংগী মরুওইবা মচাকশিং ফংহনবা ঙমগনি। নেসনেল ক্রিতিকেল মিসনগী খুৎথাংদা, ইনর্জি, উদ্যোগ অমসুং ঙাক-শেনগী তঙাইফদবা মিনরেলশিং ফংনবা লৈবাক অসিনা মফম ১,২০০ খঙদোক্লে।

o        মহাক্না হায়খি মিনরেলশিং অসি লৌথোকপনা ভারতকী ষ্ট্রাতেজিক ওতোনোমি মপাঙ্গল কনখৎহনগনি। নেসনেল দিপৱাতর এক্সপ্লোরেসন মিসন্না ভারতকী সমুদ্র মপানগী ইনর্জি রিছোর্সশিং শীজিন্নগনি, মশাগী ওক্নবা ইনর্জি পুথোকপা হেনগৎহনগনি অমসুং মপান লৈবাকশিংদগী থাউ পুশিল্লকপগী মখা পোনবা হন্থহনগনি।

3.        প্রধান মন্ত্রী মোদীনা হায়খি হিদাক-লাংথকশিং অমসুং ইন্নোবেসন্দা অত্মনির্ভর ওইনবা লৈবাক অসিনা হোৎনগদবনি। ভারত অসি মালেমগী ফার্মাসি” হায়না খঙনরি। করিগীদমক ঐখোয় মীওইবা খুন্নাইগী য়াইফনবা খ্বাইদগী ফবা অমসুং মমল য়াম্না হোংবা হিদাকশিং পীবা লৈবাকশিংগী মনুংদা অমা ওইরোইদৌরিবনো?

•        প্রধান মন্ত্রীনা হায়খি লৈবাক অসিগী ওইবা ফার্মাসিউতিকেল ইন্নোবেসন্দা ভারতকী ফিবম ফগৎলে, ভারত মনুংদা অনৌবা হিদাকশিং, ভেক্সিনশিং অমসুং থৱায় কন্নবা লায়েংশিং পুথোকপা দরকার ওইরে। লৈবাক অসিদা পুথোকপা ভেক্সিনশিং অমসুং কোৱিনগুম্বা প্লেতফোর্মশিংনা মালেমগী মীওই মিল্লিয়ন কয়াগী পুন্সি কনখিবা, ভারতনা কোবিদ-১৯ গী পায়খৎখিবা থবকশিং নিংশিংলদুনা, প্রধান মন্ত্রীনা হায়খি মসিগী লৈবাক অসিনা অনৌবা থবক অসি হেন্না পায়খৎকদবনি।

•        অনৌবা হিদাকশিং অমসুং মেদিকেল তেক্নোলোজিশিংগী পেতেন্তশিং ফংনবা থিজিল্লোয়শিং অমসুং ওন্ত্রেপ্রেন্যুরশিংনা হোৎনগদবনি, ভারতনা মশাগী অনা-লায়য়েংগী দরকার ওইবশিং ফংবা খক নত্তনা মালেমগী য়াইফনবসু মতেং পাংগদবনি, লৈবাক অসি মেদিকেল অমসুং ইন্নোবেসনগী হিরমদা অত্মনির্ভরগী মফম অমা ওইনা শেমগৎকদবনি।

4.        মিসন সুদর্শন চক্র, ঙাক-শেনগী থবক ফগৎহনবা: ভারতনা লাল তৌবা ঙম্বগী থৌনা অমসুং ঙাকথোকপা ঙম্বগী থৌনাশিং হেনগৎহন্নবা, ভারতকী চৎনবী অমসুং হেরিতেচদগী ইথিল লৌরদুনা, “মিসন সুদর্সন চক্র” হৌদোক্লে হায়না প্রধান মন্ত্রী মোদীনা লাউথোকখ্র, মসিনা য়েক্নবগী ঙাক-শেনগী থবকশিং থুগাইনবা অমসুং ভারতকী লালগী মপাঙ্গল হেনগৎহন্নবা পান্দম থম্লি।

•        লালগী থবকশিংদা মনিংতম্নবা, য়াংনা থবক পায়খৎনবা, খুৎ চুম্নবা অমসুং শিংনরকপা খুদিংমক শক্তি লৈনা পাউখুম পীনবা মিসন অসি দিজাইন তৌবনি। প্রধান মন্ত্রীনা হায়খি, ২০৩৫ ফাওবগী মনুংদা মীয়ামগী মফম খুদিংমক লৈবাক শীনবা থুংবা সেকুরিতি সিল্দনা কুপশিনগনি। ঙাক-শেনগী থবকশিংদা অত্মনির্ভর ওইবা ভারতকী থবক অদু উৎকনি।

5.        অনৌবা অওনবশিং: শেন-থুমগী অনৌবা অওনবশিং পুরক্নবা তাক্স ফোর্স অমা শেম্নবা লাউথোক্লে অমসুং মসিনা শেন-থুমগী থবকশিংগী আইনশিং, নিয়মশিং অমসুং থবকশিং শেমদোক্নবা পান্দম থম্লি।

•        মহাক্না হায়খি সরকারনা দরকার ওইদ্রবা কমপ্লাইয়েন্স ৪০,০০০ হেন্না অমসুং চৎনদ্রবা আইন ১,৫০০ রোম মুৎথৎখ্রে অমসুং ইকোন কোনবা সংসদকী সেসন্দা প্রোবিজন ২৮০ হেন্না লৌথোক্লে। জি.এস.তিগী অওনবশিং পুরক্তুনা দিৱালিদা তঙাইফদবা পোৎলমশিংদা তেক্স হন্থরগনি, এম.এস.এম.ইশিং, ভেন্দরশিং অমসুং কঞ্জুমরশিং কান্নবা ফংলগনি লোয়ননা শেন-থুম চাউখৎপা হেনগৎলক্লগনি অমসুং অফবা অমসুং মীয়ামগী খনবা ইকোনোমি অমা শেম্লগনি।

6.        পি.এম বিকসিত ভারত রোজগার য়োজনা, নহারোলশিংগী ফিবম ফগৎহনবা: লৈবাক অসি চাউখৎহনবদা নহারোলশিংনা মরুওইবা থৌদাং অমা লৌনবা, পি.এম বিকসিত ভারত রোজগার য়োজনা কৌবা লুপা করোর লাখ ১ গী স্কিম অমা প্রধান মন্ত্রীনা হৌদোক্লে অমসুং মসিনা নৌনা থবক ফংলবা নহারোল অমদা লুপা ১৫,০০০ পীগনি অমসুং ভারতকী নহারোল করোর ৩ দা কান্নবা পীনবা পান্দম থম্লি।

•        মহাক্না হায়খি মদুদি থবক অসিনা ভারতকী মীওইশিংগী তৌবা ঙম্বগী অওনবা অমা পুরক্তুনা শেন-থুম অমসুং খুন্নাইগী চাউখৎপা পুরক্কনি, শ্বাতন্ত্র ভারত্তগী সমরিদ্ধি ভারত ফাওবগী থোং মপাঙ্গল কনখৎহনগনি অমসুং লৈবাক শেমগৎপদা নহারোলশিং থৱায় য়াওনা শরুক য়াহনগনি।

7.        ইনর্জি অমসুং ন্যুক্লিয়ারগী অত্মনির্ভর: প্রধান মন্ত্রীনা হায়খি লৈবাক অসিগী তুংগী মরুওইবা রিছোর্সশিং ফংনবা ভারতনা মরুওইবা থবকশিং পায়খৎলে। নেসনেল ক্রিতিকেল মিসনগী খুৎথাংদা, ইনর্জি, উদ্যোগ অমসুং ঙাক-শেনগী তঙাইফদবা মিনরেলশিং ফংনবা লৈবাক অসিনা মফম ১,২০০ খঙদোক্লে।

6.        মহাক্না হায়খি হায়রিবা মিনরেলশিং অসি লৌথোকপনা ভারতকী ষ্ট্রাতেজিক ওতোনোমি মপাঙ্গল কনখৎহল্লে, লৈবাক অসিগী উদ্যোগ অমসুং দিফেন্স সেক্তরশিং অত্মনির্ভর ওইহল্লে। নেসনেল দিপৱাতর এক্সপ্লোরেসন মিসন্না ভারতনা মসিগী দিপৱাতর ইনর্জি লৌথোক্লগনি, ইনর্জিদা অত্মানির্ভর ওইবা হেনগৎলে অমসুং মপান লৈবাকশিংদগী থাউ পুশিল্লকপগী মখা পোনবা হন্থরে। মনিংতম্বা অমসুং শক্তি লৈবা ভারত অমগী মাইকৈদা অতোপ্পা খোঙথাং অমা থাংজিল্লে।

•        প্রধান মন্ত্রীনা হায়খি ভারতনা ২০২৫ দা ক্লিন ইনর্জিগী পান্দম অদু চাদা ৫০ ফংবা ঙম্লে, থানখিবা মতমদগী চহি ৫ ঙনখৎনা পান্দম ফংলে।

•        ২০৪৭ ফাওবদা ভারতকী ন্যুক্লিয়ার ইনর্জি পুথোকপা শরুক ১০ হেনগৎহন্নবা পান্দম থম্লি, অনৌবা ন্যুক্লিয়ার রিয়েক্তর ১০ থবক পায়খৎলি অমসুং করিগুম্বা ভারতনা মপান্দগী পুশিল্লকপা ইনর্জিগী মখা পোন্দ্রবদি, লৌমীশিংগী য়াইফনবা শেন কনবা ঙমগনি অমসুং মসিনা লৈবাক অসি মখা তানা নুংঙাই য়াইফবা হেনগৎহনগনি।

8.        স্পেস সেক্তরগী মনিংতম্বা, ইন্নোবেসন্দা মাঙজিল থাবা: প্রধান মন্ত্রীনা হায়খি মদুদি স্পেস সাইন্সতা ভারতগী শক্তি হেনগৎলক্লে। গগনয়ান মিসন মাইপাকপদা য়ুম্ফম ওইরগা ভারত মশাগী স্পেস ষ্টেসনশিং লিংখৎনবা থবক পায়খৎলি।  ষ্টার্দঅপ ৩০০ হেনবনা সেতেল্লাইত তেক্নোলোজি, স্পেস এক্সপ্লোরেসন অমসুং অনৌবা রিছার্সকী থবক পায়খৎলি অমসুং মালেমগী স্পেসকী থবকশিংদা ভারতনা শরুক য়াবা খক নত্তনা লৈবাক অসিগী মশাগী ওইবা পাম্বৈশিংদা মাংজিল থারি।

9.        লৌমীশিং, ভারতকী নুংঙাই য়াইফবগী য়াংলেন শরু: প্রধান মন্ত্রীনা হায়খি লৌমীশিংগী য়াইফনবা থবকশিংদা ভারতনা শন্তাইনরোই। মহাক্না লৌমীশিংগী অমসুং শা-ষন লোইবশিংগীদমক ফক্লাংগুম্না লেপ্লি অমসুং মখোয়গী হকশিং অমসুং হিংনবগী লম্বীশিং ঙাক্লি।

•        মহাক্না হায়খি ভারত চাউখৎপদা লৌউ-শিংউনা মরুওইবা মফম অমা কল্লি। শঙ্গোম, হৱায়শিং অমসুং লিমোন পুথোকপদা ভারতনা মকোক্ত লৈরি অমসুং চেঙ, গেহু, লশিং, উহৈশিং অমসুং মনা-মশিং পুথোকপদা অনিশুবদা লৈরি। লৌউ-শিংগী পোৎথোকশিং মপান্দা থাদোকপা লুপা করোর লাখ ৪ হেল্লে।

•        মখা তানা লৌমীশিংগী ফিবম ফগৎনবা, লৌউ-শিংউগী লমদা শোৎথরবা জিলা ১০০গীদমক মহাক্না প্রধান মন্ত্রী ধন্য ধন্য কৃষি য়োজনা হৌদোক্লে, মসিনা পি.এম কিষান, ইরিগেসন স্কিমশিং অমসুং শা-ষনশিং ঙাক-শেন্নবগী থৌরমশিংগী খুৎথাংদা লৌমীশিংগী মতেং পাংলি অমসুং নুংঙাই য়াইফবগী ভারতকী য়াংলেন শরু মপাঙ্গল কন্না লৈরি।

10.      শক্তি লৈরবা দেমোগ্রাফি মিসন, লৈবাক্কী অপুনবা শক্তম ঙাক-শেনবা: ভারতকী দেমোগ্রাফিক ইন্তেগ্রেতি ঙাকপগী মরুওইবা প্রধান মন্ত্রীনা পনখি। মহাক্না হায়খি লোন্না চঙলকপা মীওইশিংনা খুদোংচাদবা কয়া থোকহল্লি অমসুং ঙমখৈগী শরুকশিং অমসুং মীয়ামগী হিংনবগী লম্বীশিং ঙাক-শেন্নবা হোৎনবা তঙাইফদে। খুদোংচাদবশিং অসি কোকহন্নবা, ভারতকী অপুনবা, ঙমখৈগী অপুনবা অমসুং সেকুরিতি লৈহন্নবা শক্তি লৈরবা দেমোগ্রাফি মিসন অমা মহাক্না লাউথোকখ্রে।

বিকসিত ভারত ২০৪৭ গী মহাক্কী পান্দম প্রধান মন্ত্রী মোদীনা লাউথোকখি অমসুং অত্মনির্ভর, ইন্নোবেসন অমসুং মীয়ামগী ফিবম ফগৎহন্দুনা ভারতকী চাউখৎপা পুরক্নবা তকশিনখি।

মহাক্না হায়খি ভারতকী মপাঙ্গল লৈবাক অসিগী মীয়াম, ইন্নোবেসন অমসুং অত্মনির্ভরগী খুত্ত লৈরে, ভারত্ত শাবা পোৎথোকশিং লৈদুনা ভারতমচা খুদিংমক লৈবাক শেমগৎপদা শরুক য়াগদবনি, নুংঙাই য়াইফবা, শক্তি লৈবা অমসুং বিকসিত ভারত অমা শেমগৎনবা সাইন্তিফিক, তেক্নোলোজি অমসুং ওন্ত্রেপ্রেন্যুরশিপকী থবক খুদিংমক্ত শরুক য়াগদবনি।

***