ভারতকী প্রধানমন্ত্রী

কাংলুপ খুদিংমক কোনশিনবা অমসুং তুংকোইনা চৎনবা য়ারবা শেন-থুমগী চাউখৎপনা কনাগুম্বা অমতা হুন্দোক্লম্লোইদবনি: ঐখোয়গী শেন্মিৎলোনশিং শেমগৎপা; ললোন-ইতিক্কী থৌদাং; চাউখৎ-থৌরাংগী অমসুং শেন তোনবগী পোৎলুমগী শেন্থং পীবা

ইকায়খুম্নরবশিং,

খুরুমজরি!

জি-২০ মীফম মপুংফানা অমসুং মাইপাক্না শীনবগীদমক অহানবদা ঐনা রাষ্ট্রপতি রামাফোসা থাগৎপা ফোঙদোকচরি।

খা অফ্রিকানা চিয়ার্মেন ওইবগী মখাদা, স্কিল মাইগ্রেসন, তুরিজম, ফুদ সেকুরিতি, এ.আই, দিজিতেল ইকোনোমি, ইন্নোবেসন অমসুং নুপীশিংদা শক্তি পীবগুম্বা ৱাফমশিংদা শিংথানিঙাই ওইবা থবকশিং পায়খৎলে। ন্যু দিল্লি জি-২০ মীফমদা পায়খৎখিবা পুৱারি ওইরবা থবকশিং মফম অসিদা মখা তানা ফগৎহল্লে।

মরুপশিং,

হৌখিবা চহি কয়াদা, জি-২০ না মালেমগী শেন-থুম অমসুং মালেমগী শেন-থুম চাউখৎপগী ফিবম শেম্লে। অদুবু থবক ওইনা পায়খৎলবা চাউখৎপগী পেরামিতরশিংনা মশিং য়াম্লবা মীওই কয়া খুদোংচাবশিং ফংদ্রি। মখা তানা, মখোয়না মহৌশাগী অকোয়বগী ফিবম কা হেন্না শীজিন্নরে। মসিগী খুদোংচাদবা চাউনা মায়োক্নবা মহাদেস অমা অফ্রিকানা ওইরে। ঙসি, অহানবা ওইনা অফ্রিকানা জি-২০ মীফম য়ুম্বু ওইরে, চাউখৎপগী পেরামতরশিংগী মতাংদা ঐখোয় অমুক হন্না ৱাখল খনগদবনি।

মসিগী লম্বী অমা ভারতকী সভেত্যগী গুনশিংদা লৈরি। লম্বী অদুদি মীওইবগী থবকশিং অমতা ওইনা পুনশিনবনি। মসিনা হায়রিবদি ঐখোয়না মীওইবশিং, খুন্নাই অমসুং মহৌশাগী অকোয়বগী শক্তম অপুনবা অমা ওইনা উগদবনি। মতম অদু খক্তদা চাউখৎপা অমসুং মহৌশাগী অকোয়বগী ফিবমগী মরক্ত পুন্না লৈমিন্নবা ঙমগনি।

মরুপশিং,

মখোয়গী চৎনবী অমসুং মহৌশাগী অকোয়বগী খল কাইহন্দবা পুন্সি মহিং লৈবা ফুরুপ কয়া মালেম শীনবা থুংনা লৈরি। হায়রিবা চৎনবীশিং অসিদা তুংকোইনা চৎনবা য়াবগী মমি তাবা খক নত্তনা, নাৎকী  লৌশিং, খুন্নাইগী অপুনবা অমসুং মহৌশাগী অকোয়বগী শক্তম ইকায়খুম্নবগী মমি তারি।

জি-২০ গী মখাদা গ্লোবেল ত্রেদিসনেল নোলেজ রিপোসিতোরি অমা লিংখৎনবা ৱাফম ভারতনা পুখৎলে। ভারতকী মমাংঙৈগী লৌশিংগী থবকশিংনা মসিনা য়ুম্ফম ওইবা য়াগনি। মসিগী মালেমগী পুনফম অসিনা মীওইবা খুন্নাইগী অপুনবা লৌশিং তুংগী মীরোলশিংদা শীন্নরম্বদা মতেং পাংগনি।

মরুপশিং,

অফ্রিকাগী চাউখৎপা অমসুং অফ্রিকাগী নহারোলশিংগী ফিবম ফগৎহনবা অসি মালেমগী অপাম্বনি। মরম অদুনা, জি২০-অফ্রিকা স্কিলস মল্তিপ্লাইয়র ইনিসিয়েতিপ হৌদোক্নবা ভারতনা পুখৎলে। মসিগী তোঙান তোঙানবা হিরমশিংদা “ত্রেন-দি-ত্রেন্নরস” নমুনাগী মখাদা থবক তৌগনি। মসিদা জি-২০ লৈবাকশিংনা শেন থাদগনি অমসুং শৌগৎকনি।

ঐখোয়গী অপুনবা পান্দমদি মথং চহি ১০ দা অফ্রিকাদা সর্তিফাইত ত্রেন্নর মিল্লিন অমা শেমগৎপনি। হায়রিবা ত্রেন্নরশিং অসিনা হৈথোই-শিংথোইরবা নহারোল লাখ কয়া পুথোক্কনি। থবক অসিনা কান্নবা কয়া পীগনি। মসিনা লমদম অমগী থবক ঙম্বা হেনগৎহনগনি অমসুং মতম শাংনা অফ্রিকা চাউখৎপদা মতেং পাংগনি।

মরুপশিং,

হকশেলগী খুদোংচাদবশিং অমসুং মহৌশাগী ওইবা অমাং-অতাশিং থেংনবা অসি ঐখোয় পুম্নমক্কী অপুনবা থৌদাংনি। মরম অদুনা, জি-২০ লৈবাকশিংদগী মেদিকেলগী অখঙ-অহৈশিং য়াওরবা জি-২০ গ্লোবেল হেল্থকিয়ার রেসপোন্স তিম অমা শেম্নবা ভারতনা পুখৎলে। মালেমগী হকশেলগী অৱাবা অমা নত্ত্রগা মহৌশাগী ওইবা খুদোংথিবা অমা লাকপা মতমদা কাংবু অসি খোঙলৈ থুনা থানবা শেম-শাগদবনি।

মরুপশিং,

অতোপ্পা মরুওইবা ৱাফম অমনা দ্রগ পুথোক-পুশিন তৌবা অসিনি। ফেন্তানিলগুম্বা শাথিরবা দ্রগশিং য়াংনা শন্দোরক্লি। মসিনা মীয়ামগী হকশেল, খুন্নাইগী তুংদু-লৈতাবা অমসুং মালেমগী সেকুরিতিদা অচৌবা শিংনবা অমা ওইরক্লে। মসি তেরোরিজমদা শেন থাদনবা অচৌবা পাম্বৈ অমসু ওইরে।

মসিগী মালেমগী শিংনবা অসি মপুংফানা থেংননবা, দ্রগ-তেরর পুন্না চৎমিন্নবা থেংননবা জি-২০গী থবক পায়খৎনবা ভারতনা পুখৎলে। থৌরাং অসিগী মখাদা, শেন থাদবা, লৈবাক ঙাকপা অমসুং সেকুরিতিগা মরী লৈনবা তোঙান তোঙানবা থবকশিং ঐখোয়না পুনশিনবা ঙমগনি। মতম অদু খক্তদা দ্রগ-তেরর ইকোনোমি মপাঙ্গল শোন্থহনগনি।

মরুপশিং,

ভারত-অফ্রিকাগী অমতা ওইবা মতম পুম্নমক্ত মপাঙ্গল কল্লি। ন্যু দিল্লি মীফম মনুংদা অফ্রিকান য়ুনিন লেংদবা মেম্বর অমা ওইখিবা অসি অচৌবা থবক অমনি। মসিগী ৱাখল্লোন অসি জি-২০ গী ৱাংমদা শন্দোকপা অসি হৌজিক তঙাইফদ্রে। গ্লোবেল সাউথকী খোঞ্জেল অসি মালেমগী লুপশিংদা হেন্না কন্না য়ৌহন্নবা ঐখোয় পুন্না থবক তৌমিন্নগদবনি।

অদোম থাগৎচরি।

***