ভারতকী প্রধানমন্ত্রী

অমুক হন্না, কোতা অমসুং অপুনবা হাদোতি লমদমগী ঐগী মরুপশিংদা য়াইফ পাউজেল পীজরি।

হৌখিবা চয়োলদা, ঐ রাজস্থান্দা চৎপগী খুদোংচাবা ফঙখি। অজমরগী শেংলবা লমদমদগী, রাজস্থানগী চাউখৎ-থৌরাংগা মরী লৈনবা লুপা করোর লিশিং কয়াগী প্রোজেকশিং ঐনা উরেপ-উয়ুং তমখ্রে অমসুং শঙ্গাখ্রে। মতম অদুদা, রাজস্থানগী নহারোল ২১,০০০ হেনবদা এপোইন্তমেন্ত লেত্তরশিংসু য়েন্থোকখি। হৌজিকল ঐগী অজমর খোঙচৎগী নুমিৎ খরনিগী মতুংদা, কোতাদা মসিগী মরুওইবা এয়রপোর্ত প্রোজেক অসি উরেপ-উয়ুং তম্নবগী খুদোংচাবা ঐখোয়না ফঙলে। রাজস্থান্দা চয়োল অমদা শঙ্গাখিবা অচৌবা চাউখৎ-থৌরাংগী প্রোজেক অনি শঙ্গাখিবা অসিনা অকনবা পাউজেল অমা পীরে। করম্বা খোঙজেলদা রাজস্থান চাউখৎলিবগে হায়বা মখোয়না তাক্লে। মসি ইনফ্রাষ্ট্রকচর, নহারোল থবক ফংনবা খুদোংচাবশিং, নত্ত্রগা লৌমীশিং অমসুং ইমাশিং অমসুং ইচলশিংগী স্কিমশিং ওইবা য়াই, রাজস্থান্দা হিরম খুদিংমক্ত থবক য়াংনা পায়খৎলি।

মরুপশিং,

কোতা, বুন্দি, বারান অমসুং ঝালাৱার য়াওনা অপুনবা হাদোতি লমদমদা ঙসি অসি অনৌবা থাজবা অমসুং অনৌবা মাইপাকপগী নুমিৎ অমনি। চাউরাক্না লুপা করোর ১৫০০ রোম চঙনা শাগদৌরিবা অনৌবা এয়রপোর্ত অসিনা তুংদা অপুনবা লমদম অসি শীনবা থুংনা চাউখৎপগী অনৌবা ইনোৎ পীরগনি। এয়রপোর্ত উরেপ-উয়ুং তম্বগী মরুওইবা থৌরম অসিদা কোতা অমসুং হাদোতি লমদমগী মীয়ামদা ঐনা ঐগী য়াইফ পাউজেল পীজরি।

মরুপশিং,

নবেম্বর ২০২৩ দা ঐ কোতাদা লাকখিবা অদু ঐ নিংশিংলি, ঐনা কোতাগী মীয়ামদা ৱাশক অমা শকখি। ঐনা হায়খি মদুদি কোতাগী এয়রপোর্ত ইচম চম্বা মঙ অমা ওইহল্লোই, মসি থবক ওইনা পাংথোক্কনি। ঙসি, লমদম অসিদা কোতা এয়রপোর্ত শানবা তাঞ্জা লাকপদা ঐ অপেনবা ফাওই। হৌজিক ফাওবা, কোতাগী মীয়াম ফ্লাইতশিং তোংনাবা জয়পুর নত্ত্রগা জোধপুর ফাওবা চৎলি। মসি মতম য়াম্না চঙই অমসুং খুদোংচাদে। হৌজিক, ফিবম অসি হোংলগনি। এয়রপোর্ত অসি থবক হৌরকপা মতমদা, কোতা অমসুং মসিগী কোয়বদা লাকপদা লাইরগনি অমসুং ললোন-ইতিকসু চাউখৎলগনি।

মরুপশিং,

কোতা লাইরিক-লাইশুগী মফম অমা ওইবতা নত্তনা ইনর্জিগী অচৌবা মফম অমসুনি। মফম অসিদগী ন্যুক্লিয়ার, কয়লা, গ্যাস অমসুং ঈশিংদগী মৈ পুথোকপা অঙকপা মফম অমনি। মসিগী হেরিতেচগীদমক হাদোতি লমদম মমিং চৎলি। কোতা কচোরিগী মহাও, কোতা দোরিয়া শারিগী ফজবা অমসুং কোতাগী নুঙ অমসুং সেন্দষ্টোনগী ফজবা মালেম শীনবা থুংনা মমিং চৎলি। মফম অসিগী ফদিগোম, বুন্দিগী বাসমতি চেঙ, মখোয়গী নুংশিবা মনম মালেমগী কৈথেলশিং য়ৌরে। থবক শুবা কনবা, পোৎথোক পুথোকপা অমসুং খুদোংচাবা কয়া লৈবগীদমক লমদম অসি মমিং চৎলি। হৌজিক, কোতাদা অনৌবা এয়রপোর্ত লৈগদৌরিবা অসিনা খুদোংচাবশিং শরুক কয়া হেনগৎহল্লগনি।

মরুপশিং,

কোতা অমসুং হাদোতি লমদম অসি ললোন-ইতিক অমসুং লাইনিংগী অচৌবা মফম অমসুনি। চহি চা কয়া, লৈবাক শীনবা থুংবা অমসুং মালেমগী ভক্ত কয়া শেংলবা মথুরাধেস জি পীথ, কেযব রাই পাতান খুরুম্বা, খাদে গনেস জি মহারাজ অমসুং গোদাবরি বালাজি ধামদা চৎনবা মফম অসিদা লাক্নখি। গারাদিয়াদগী মহাদেবদগী উবা চম্বালনা মীওই খুদিংমক ঙাওহল্লে। মুকুন্দ্রা হিলস অমসুং রামগর বিসধারিগুম্বা ৱাইল্দলাইফ সেঙ্কচুরিশিংনা লমদম অসি ৱাইল্দলাইফ তুরিজমগী অচৌবা মফম অমা ওইহল্লে। মথক্ত চৎথোক-চৎশিন হেনগৎলকপদগী, লৈবাক শীনবা অমসুং মালেম শীনবা থুংবগী লমকোয়বা মীওইশিং মফম অসিদা লাক্কনি, নহারোলশিং, ললোনবশিং অমসুং লমদম অসিগী শেন্মিৎলোন হকথেংননা কান্নগনি।

মরুপশিং,

কোতা হান্নদগী লম্বী-থোং য়াংনা চাউখৎলক্লি। অমৃত ভারত ষ্টেসন স্কিমগী মখাদা, কোতাগী অচৌবা রেলৱে ষ্টেসন অনিমক অনৌবা মতমগী খুদোংচাবশিং লৈরে। কোতা অমসুং বুন্দি ফাওদুনা চৎলিবা দিল্লি-মুম্বাই এক্সপ্রেৱেনা হৌজিক অপুনবা লমদম অসিগী চাউখৎপগী অনৌবা থোঙশিং হাংদোক্লে। হৌজিক, দিল্লি, বদোদারা অমসুং মুম্বাইগুম্বা অচৌবা সহরশিং পুং খর খক্ত থাপ্লে। হেন্না ফবা লম্বী অমসুং রেলৱে লৈরকপদগী, মফম অসিদা অনৌবা উদ্যোগশিং লিংখৎলে। রেল অমসুং লম্বীগী মথংদা, মসিগী অনৌবা এয়রপোর্ত অসিনা মখা তানা কোতাগী চাউখৎপা য়াংখৎহনগনি। হাদোতি লমদম অমসুং মনাক নকপা জিলাশিং চাউখৎনবা অনৌবা খুদোংচাবশিং কোতা এয়রপোর্তনা পীগনি।

মরুপশিং,

প্রোজেক অসি পায়খৎনবা কোতাগী এম.পি শ্রী ওম বিরলা জিগী থবকশিংসু ঐনা থাগৎপা ফোঙদোকচরি। মহাক্না লেপ্তনা হোৎনবদগী কোতাগী মীয়ামগী পুন্সিগী হিংবগী থাক ৱাংখৎলগনি অমসুং মখোয়দা অনৌবা খুদোংচাবশিং পীগনি। মসি এয়রপোর্ত,  আই.আই.আই.তিগী অনৌবা কেম্পসশিং নত্ত্রগা লম্বীশিং পাকথোকপা ওইবা য়াই, কোতাগী চাউখৎ-থৌরাংগীদমক মহাক চোকথবা লৈতনা হোৎনরি। মহাক্কী থবকশিংনা মরম ওইদুনা কোতা অমসুং অপুনবা লমদম শীনবা থুংনা চাউখৎপগী অনৌবা খোঙজেল উবা ফংবনি।

মরুপশিং,

ওম বিরলা জি অফবা এম.পি অমা ওইবতা নত্তনা লোক সভাগী মশক থোকপা স্পিকর অমসুনি। মহাক সংবিধানদা মপুংফানা কৎথোক্লি অমসুং সংসদকী চৎনবীশিংদা মপুংফানা থাজবা থম্লি। ঙসি, মহাক দল অমসুং ওপোজিসনগী খেন্নবা থিদনা, কনা অমতগী মীচং চঙদনা লৈরি। ঐনা হাওসতা মহাক উবা মতমদা, স্পিকর অমা ওইনা মহাক্কী থৌদাং লাইরিক-লাইশুগী সহর অমদগী লাকপদগী ইথিল পী হায়না ঐনা মতম পুম্নমক্ত খল্লি অমসুং ইমুং অমগী মকোক অমগুম্না মহাক্না লুচিংখি, মীওই খুদিংমক্কা চৎমিন্নখি। মহাক্না এম.পি খুদিংমক্কী ৱাখল্লোনশিং ইকায়খুম্নখি অমসুং ইকায়খুম্নবা উৎখি। মহাক এম.পিশিং খ্বাইদগী য়াম্না ইকায়খুম্নবা স্পিকর অমনি। কনাগুম্বা খরনা অপনবা পীরকপা মতমদা ফাওবা, মহাক্না চীঙলেম্না খুদিংমক য়েংশিনখি, কৈদৌঙৈদা কনাগুম্বা অমতা ইকায়বা পীদে, অথিবা ৱাহৈশিং তুমিন্না তাখি অমসুং মতম পুম্নমক্ত মোমোন নোকখি। করিগীদমক হাওসতা মেম্বরশিংনা মহাক য়ারিবনো হায়বা মসিনা ওইগনি।

মরুপশিং,

লম্বী-থোং ফগৎলকপা মতমদা, চাউখৎপগী খোঙজেলসু য়াংখৎলকই। হৌখিবা চহি ১১ দা, লৈবাক শীনবা থুংনা শাখিবা অনৌবা এয়রপোর্তশিংনা চাউখৎপগী অনৌবা ইনোৎ হাপ্লে। ২০১৪ গী মমাঙদা, লৈবাক অসিদা চাউরাক্না এয়রপোর্ত ৭০ রোম লৈরমখি। ঙসিদি এয়রপোর্ত মশিং ১৬০ হেল্লে। হায়রিবা অনৌবা এয়রপোর্তশিংনা মথক্ত চৎথোক-চৎশিন লাইহল্লে, তুরিজম চাউখৎহল্লে, নহারোলশিং অনৌবা থবকশিং ফংহল্লে অমসুং লমদমশিংগী চাউখৎপা য়াংখৎহল্লে। দিল্লিগী অকোয়বা মফমশিং- হিসার, হিন্দোন, জেৱার ফাওবদা অনৌবা এয়রপোর্ত কয়া শেমগৎলে। অনৌবা এয়রপোর্তশিং অমসুং তর্মিনেলশিং শাগৎলকপা মতমদা, অপীকপা সহরশিংদসু অনৌবা ললোন-ইতিকশিং অমসুং কম্পেনিশিং য়ৌরকই। লাক্লিবা চহিশিংদা লমদম অসি চাউখৎপদা কোতাগী অনৌবা এয়রপোর্তনা অনৌবা ইনোৎ অমা পীগনি।

মরুপশিং,

রাজ্য অমসুং কেন্দ্র সরকার পুন্না থবক তৌমিন্নবা মতমদা, ৱাখল্লোনশিং নাখৈ শেংই অমসুং ফিরেপ মপাঙ্গল কল্লি, চাউখৎপগী খোঙজেল য়াংখৎলি। মসিমক ঙসি রাজস্থান্দা থোক্লিবনি। বিকসিত রাজস্থান অমগী অকনবা য়ুম্ফমনা বিকসিত ভারত অমদা অকনবা মপাঙ্গল হাপ্লে। নুংঙাই য়াইফবা, মপাঙ্গল কনবা অমসুং খুদোংচাবা কয়া লৈবা রাজস্থান অমা শেমগৎপদা ঐখোয়গী অপুনবনা মাইপাক্কনি হায়না ঐনা থাজৈ। মসিগী থাজবা অসিগা লোয়ননা, উরেপ-উয়ুং তম্বগী থৌরম অসিদা মীয়াম পুম্নমক ঐনা থাগৎপা ফোঙদোকচরি। অদোম থাগৎপা ফোঙদোকচরি। বন্দে মাতরম।

***