ভারতকী প্রধানমন্ত্রী

মরুপশিং,

ঙসি অসি লৈবাক পুম্বগী নহা লিশিং কয়াগী নুংঙাইরবা নুমিৎ অমনি। ঙসিদি নহা লিশিং ৫১ হেনবনা সরকারগী থবক খনবগী চিথী ফংখ্রে। ঙসিদি, লৈবাক্কী চাউখৎপগী খোঙজেলদা অদোমশু মরু ওইবা থৌদাং য়াবা হৌরবনি। রেলৱে, বেঙ্কিং, হকশেল, এজুকেসন অমসুং অতোপ্পা লমশিংদা ইশাগী থৌদাং পাংথোকপা হৌরগনি। লাক্কদৌরিবা মতমশিংদা চৎকদৌরিবা চাউখৎ থৌরাংগী খোঙচত্তা অদোমশু থৌদাং য়ারগনি।

মরুপশিং,

মফম অসি য়ৌনবগীদমক অদোম পুম্নমক্না শাংলবা শেম-শাবা অমসুং কন্না হোৎনরমগনি। মসিগী মাইপাকপগীদমক ঐহাক্না অদোমবু অমসুং অদোমগী ইমুং-মনুংবু থাগৎচরি। অদোমবু মফমসি য়ৌহনবদা অদোমগী মমা-মপা অমসুং ইমুং-মনুংগী থৌদাং অসি হন্থদে। অদুবু মসিমত্তি নত্তে, ইমুং মনুংগী কন্ত্রিব্যুসন লৈবগুম্না, খুন্নাইগীসু য়াম্না চাউবা কন্ত্রিব্যুসন লৈরি, ঐখোয়বু মফম অসিদা য়ৌহন্নবগীদমক। ঐখোয়গী ইমুং-মনুংগী মরমদা ঐখোয়না খক য়ৌনদে। অচৌবা লৈবাক অসিগী নাগরিক কোতি ১৪০গী থৌদাং অসিসু য়াম্না মরু ওই। অমসুং মরম অদুনা ঐখোয়গী দায়ত্ব অসি মশাগী, মশাগী ইমুং-মনুংগী, অমরোমদা সমাজ পুম্বগীদমক্তসু লৈ। অমসুং ঐহাক্না থাজবা থম্লি মদুদি মসিগী থবকশিং অসিগীদমক অদোম্না অদোমবু হেন্না মতিক চাবা ওইহনগনি। ঐহাক্না অদোমদা য়াইফ-পাউজেল কয়া পীজরি।

মরুপশিং,

অদোম পুম্নমক্না খঙনরবনি মদুদি নুমিৎ অনিগী মমাংদা ঐহাক লৈবাক মঙাদা চৎতুনা হল্লকখি। মসি লৈবাক মঙা খক্তগী খোঙচৎনি, অদুবু মসিগী মনুংদা ঐহাক্না লৈবাক কয়াগী অচৌবা কম্পেনীশিংগী লুচিংবশিংগা ৱারী শানখি, কুপ্না খন্ন-নৈনখি, উনখি, অমসুং মফম খুদিংমক্তা ঐহাক্না মান্নবা ৱাফম অমা ফাওখি। ভারতকী নহারোলশিং অমসুং ভারতকী তেক্নোলোজিগী খুমাং চাউশিল্লকপগী মতাংদা মালেমনা য়াম্না পুক্নিং থৌগৎলি। ঙসি মালেম অসিনা ভারতকী চাউখৎ-থৌরাংগী খোঙচৎ অসিদা শরুক য়াবা পাম্লি। ভারতসু মালেমগী তোঙান তোঙানবা লৈবাকশিংগা পার্তনরশিপ তৌরি। মসিগী পান্দমদি ভারতকী নহারোলশিংদা খুদোংচাবা ফংহনবা, থবক ফংহনবা, মখোয়গী শক্তি হেনগৎহনবা অদুনি। ঐহাক্না লৈবাক অসিগী নহাশিংবু মালেমগী থাক্তা শন্দোকপা পাম্মি । খোঙচৎ অসিগী মনুংদা, নেদরলেন্দগী মতাংদা, নেদরলেন্দকা সেমি কন্দক্তর, ঈশিং, এগ্রিকলচর অমসুং এদভান্স মেনুফেকচরিংগী মতাংদা খন্ন-নৈনখি। আর্টিফিসিএল (এ.আই.) অমসুং দিজিতেল ইন্নোবেসনগী মতাংদা সুইদেনগা পুন্না থবক তৌমিন্নবগী মতাংদা খন্ন-নৈনখি। গ্রীন তেক্নোলোজী অমসুং মেরিটাইম কোওপরেসনগী মতাংদা নোরৱেগা লোয়ননা ৱারী শানখি।

মরুপশিং,

হায়রিবা এগ্রীমেন্তশিং অসিনা ভারতকী নহারোলশিংদা হকথেংননা কান্নবা ফংহল্লগনি। অমসুং অদোম্না উরম্বা য়াই, হায়রিবা হীরমশিং অসি উজ্জ্বল ভারতকী তুংলমচৎকী গরেন্তী অমা ওইনা লাক্লি। মরমদি অনৌবা ইনভেস্তমেন্ত খুদিংমক, তেক্নোলোজী পার্তনরশিপ খুদিংমক, ইন্দস্ত্রীএল কোলাবোরেসন খুদিংমক অসিনা ভারতকী নহারোলশিংগীদমক অনৌবা খুদোংচাবশিং পুরকই, অদুবু মশিং য়াম্লবা অনৌবা খুদোংচাবশিংসু পীরি।

মাই নহা ওইরিবা মরুপশিং,

ঐখোয়না নীংশিংগদবনি, হায়রিবা সেক্তরশিং অসিদা লাক্কদৌরিবা ইনভেস্তমেন্ত অমসুং পার্তনরশিপশিং অসিনা লাক্কদৌরিবা চহী ৩-৪গী গ্লোবেল গ্রোথকী মওং মতৌ শেমগদবা ইন্দস্ত্রীশিং শেমগনি। অমসুং ভারতকী নহারোলশিংনা মসিদা অচৌবা থৌদাং অমা লৌগনি।

মরুপশিং,

ভারতনা করম্না মালেমগী থাজবা য়াবা সপ্লাই চেন পার্তনর অমা ওইরক্লিবনো, মসিগী খুদম অমা ঐহাক্না অদোমদা পীজরি। নেদরলেন্দসকী সেমি কন্দক্তর কম্পেনীগুম্বা, অদোমগী মরক্তগী মীওই কয়ানা মসিগী মমিং অসিগা মরী লৈনরমগনি এ.এস.এম.এল. অসি ভারতকী টাটা কম্পেনীগা লোয়ননা এগ্রীমেন্ত অমা লৈ। ভারত অসি মালেমগী লৈবাক খরগী মরক্তগী অমনি, মসিদা কম্পেনী অসিনা খুৎশম্নদুনা থবক তৌরি। এ.এস.এম.এল. অমসুং টাটা ইলেক্ত্রোনিক্সকী মরক্তা য়ানা ৱারোল অসিনা ভারত্তা থবক ফংহন্নবা অনৌবা খুদোংচাবা কয়া অমা পীগনি অমসুং ভারতপু নেক্স জেনরেসন তেক্নোলোজীগী থোংদা পুখৎকনি। অসিগুম্বা স্বীদেনগা তেক্নোলোজী অমসুং এ.আই. পার্তনরশিপশিং, য়ু.এ.ই.গা লোয়ননা সুপরকম্প্যুতিং কোওপরেসন, অসিনা ভারতকী তেক্নোলোজীগী মপাঙ্গল অদু য়াম্না মপাঙ্গল কনখৎহল্লগনি। হায়রিবা এগ্রীমেন্তশিং অসিনা নহারোলশিংগীদমক অনৌবা খুদোংচাবা কয়া ফংহনগনি।

মরুপশিং,

ঙসি ক্লিন এনর্জী, ক্রিতিকেল মিনরেল্স, গ্রীন হাইদ্রোজেন অমসুং সস্তেনেবল মেনুফেকচরিংগা মরী লৈনবা সেক্তরশিং অসিসু য়াম্না থুনা চাউখৎলক্লি। মসিগা মরী লৈনবা পার্তনরশিপ্না অনৌবা ইকোনোমীগী, অনৌবা খুদোংচাবশিংগী থোঙ হাংদোক্লি। গ্রীন ত্রাঞ্জিসন অমসুং সস্তেনেবল তেক্নোলোজীদা মতেং পীনবা অসিসু স্বীদেন, নোরৱে অমসুং ইতালিগুম্বা লৈবাকশিংগা লোয়ননা হেনগৎলক্লি। মসিনা ভারতপু ক্লিন মেনুফেকচরিংগা মরী লৈনবা ফ্যুচর ইন্দস্ত্রীজদা মপাঙ্গল কনখৎহল্লগনি। মসিগী মথক্তা ভারতনা পোর্তস, শিপ্পিং অমসুং মেরিতাইম ইনফ্রাস্ত্রকচরগা মরী লৈনবা এগ্রীমেন্তশিংদা খোঙজেল য়াংনা থবক তৌরি। য়ু.এ.ই. অমসুং নোরৱেগা লোইননা পার্তনরশিপ তৌবনা ভারতকী শিপ বিল্দিং ইকোসিস্তেম মপাঙ্গল কনখৎহল্লগনি। অমসুং অদোম্না খঙলে মদুদি শিপ বিল্দিং হায়বসিদা হৈ-শিংলবা মীওইবগী শক্তি য়াম্না মথৌ তাই। হায়বদি, ভারতকী ইঞ্জিনীয়রশিং, তেক্নিসিয়নশিং অমসুং হৈ-শিংলবা শিন্মীশিংগীদমক্তা দিমান্দ অসি য়াম্না হেনগৎলগনি।

মরুপশিং,

অনৌবা পার্তনরশিপ খুদিংগী খুত্থাংদা ঐখোয়না ভারতকী স্তার্তঅপশিং, রিসর্চরশিং অমসুং নহা ওইরিবা প্রোফেস্নেলশিংগীদমক মালেমগা শম্ননবগী অনৌবা লম্বীশিং শেমগৎলি। মসিনা ভারতকী নহারোলশিংদা এদভান্স এক্সপর্তীজ, গ্লোবেল মার্কেৎশিং অমসুং গ্রোথকী অনৌবা খুদোংচাবশিং ফংহল্লগনি। ঙসিদি মালেম অসিনা ইনোভেৎ তৌবা, শেমগৎপা অমসুং অচৌবা থাক্তা পোৎলমশিং য়ৌহনবা লৈবাকশিংবু ইকাই খুম্নরি। ঙসিদি ভারত অসি হায়রিবা মাইকৈ অহুম অসিদা খোঙজেল য়াংনা খুমাং চাউশিল্লি, অমসুং মসিগী অহোংবা অসিগী খ্বাইদগী চাউবা শক্তি অসি নহা ওইরিবা ঐহাক্কী মরূপশিংনি, ভারতকী নহারোলনি, অমসুং মালেমগী মফম খুদিংমক্তা ঐহাক্না চৎপা মতমদা, মতম কুইনা ভারতকী নহারোলশিংগী শক্তিগী মরমদা ঙাঙনৈ।

মরুপশিং,

ঙসি ভারত মচা খুদিংমক অচৌবা ৱারেপ অমগা লোয়ননা মাংলোমদা চংশিল্লি। ২০৪৭ ফাওবদা চাউখৎলবা ভারত অমা শেমগৎনবা ৱারেপ অসি ঐহাক্না লৌজরি। মসিগী পান্দম অসি ফংনবগীদমক ঙসিদি লৈবাক অসিনা তোঙান তোঙানবা সেক্তরশিংদা শেল থাদরি। অমসুং মসিগী ইনবেস্তমেন্ত অসিনা লৈবাক অসিগী নহারোলশিংগীদমক থবক ফংহন্নবা অনৌবা খুদোংচাবা লাখ কয়া অমা ফংহল্লি। খুদম ওইনা, ঙসি ভারত্তা সেমিকন্দক্তর মেনুফেকচরিংগী মপুং ফাবা সপ্লাই চেন শেমগৎলি। লাক্কদৌরিবা মতমশিংদা ভারতকী অচৌবা সেমি কন্দক্তর য়ুনিৎ ১০না মালেমদা মিং চল্লগনি। মসিগী মনুংদা মশিং য়াম্লবা ভারতকী নহারোলশিংগী শক্তি লৈগনি, ভারতকী নহারোলশিংগী ইকাই খুম্নবা লৈগনি, ভারতকী নহারোলশিংগী কম্মিৎমেন্ত লৈগনি অমসুং মহৌশানা থবক ফংলগনি। ঙসি ভারতনা শিপ বিল্দিংদগী হৌরগা শিপ রিপেয়রিং অমসুং ওভরহোল্লিং ফাওবগী ইকোসিস্তেম অমা শেমগৎলি। মসিগীদমক চাউরাক্না লুপা কোতি লিশিং ৭৫, লিশিং ৭৫গী শেনফম থাদরগনি। অসিগুম্বা মওংদা ভারত্তা ঐখোয়না মপুং ফাবা এম.আর.ও. ইকোসিস্তেম, হায়বদি মেন্তেনান্স, ওভরহোল অমসুং রিপেয়র ফেসিলিতীজ শেমগৎলি। মসিনা লৈবাক অসিগী এভিএসন সেক্তরদা য়াম্না মতেং পাংগনি অমসুং ভারতকী নহারোলশিংগীদমক্তা থবক ফংহন্নবা অনৌবা সেক্তর অমা হাংদোক্লগনি।

মরুপশিং,

ঙসি ভারত অসি ইলেক্ত্রোনিক্স পুথোকপা অচৌবা লৈবাক অমা ওইরে। অমসুং ঐখোয়না ইলেক্ত্রোনিক্সকা মরী লৈনবা মপুং ফাবা ভেল্যু চেন, ভারত্তা শেমগৎলি। মসিগীদমক্তা পি.এল.আই. স্কিম চৎথরি, মসিনা লৈবাক অসিদা রেকোর্দ ওইবা ইলেক্ত্রোনিক্স পুথোকপা ওইহল্লি অমসুং নহারোল লাখ কয়াদা থবক পীরি।

মরুপশিং,

ভারতকী পব্লিক অমসুং প্রাইভেৎ সেক্তরনা অসিগুম্বা থৌওং কয়াদা পুন্না চাউনা শেল থাদরি। ইনবেস্তমেন্ত অসিনা লৈবাক অসিগী নহারোলশিংদা থবক পীরি, মখোয়গী মঙলানশিং মপুং ফাহলি। সরকারগী এমপ্লোয়ি অমা ওইবনা, ঙসি এপোইন্তমেন্ত পত্র থারবা মতুংদা, অদোম সরকারগী এমপ্লোয়ি অমা ওইরে হায়বসি অদোমগী মশক ওইগনি। মরম অদুনা, ইজ ওফ দুইং ব্যুজিনেস অসি লৈবাক অসিগী মরুওইবা অমনি হায়বসি অদোম্না মতম পুম্নমক্তা নিংশিংগদবনি।

মরুপশিং,

ভারতকী গ্রোথ স্তোরি অমসুং ইমপ্লোইমেন্ত জেনরেসন, মসিদা ৱাফম অসি য়াওরি, অদোমসু খঙই। ইনফ্রাস্ত্রকচরদা মসিগী অচৌবা থৌদাং অমা লৈ। খুঙ্গংশিং, অপীকপা শহরশিং অমসুং অরাপ্পা মফমশিং অসি চাউখৎপগা মরী লৈনরকপা মতমদা, লৈবাক অসিগী চাউখৎপগী কান্নবা অসি মীওই কয়াদা ফংহল্লি। হৌখিবা চহি ১২ অসিদা রেলৱে, হাইৱে, এয়রপোর্ত, লোজিতিক্স, পোর্তস, দিজিতেল ইনফ্রাস্ত্রকচরদা কল্পনাগী মতুং ইন্না খোঙজেল য়াংনা চাউখৎলক্লি, চাউখৎলক্লি অমসুং থাক খুদিংমক্তা থবক পায়খৎলি। ঙসিদি, অদোম্না অদোমগী মফমদা, কনাগুম্বা অমগী মাইকৈদা কিলোমিতর ১০০ চৎলবদি, ভারত সরকারনা পায়খৎলিবা থবকশিং অদোম্না উবা ফংলগনি। ঙসিদি খুঙ্গংশিংদসু অহোংবা য়াম্না থুনা উবা ফংলি। কনেক্তিবিতী হেনগৎলকপনা লৌমীশিং, অপীকপা ললোন-ইতিক তৌবা মীওইশিং, মহৈরোইশিংগীদমক অনৌবা লম্বীশিং হাংদোক্লে। ঙসিদি, ইমুং কোতি কয়াদা পক্কাগী য়ুম ফংলে। হায়বদি, মালেমগী লৈবাক কয়ানা য়ুম মশিং য়াম্না লৈরবসু মখোয়না অনৌবা য়ুম কয়া শেম্মী। মসিগী মথক্তা, ঐহাক্কী স্বচ্ছতাগী খোঙথাং অসি ঐহাক্না কৈদৌঙৈদসু মীশিংদা খঙহনখিদে। মসিদা শৌচাগা মরুওইবা থৌদাং লৌরি। ঙসি লৈবাক অসিগী য়ুম কোতি কয়াদা মৈ ফংহনখ্রে। রুফতোপ সোলর এনর্জী, কয়াম কুইনা অনৌবা ভেন্দরশিং লমদম অসিদা লাক্লি। হৌজিক য়েংবীয়ু, জল জীবন মিসনদগী, নলদগী ঈশিং য়ৌহনবা, ঐহাক্না হৌজিক য়েংলি, ঐহাক্না শহরশিংদা পি.এন.জি.গী কনেক্সন হেঙ্গৎহনবা পাম্মি, মরম অদুনা ঐহাক্না প্লাম্বরশিং ফংখিদে, অৱাবা ওইখি, মরমদি জল জীবনগী মিসন অসিদা প্লাম্বর মশিং য়াম্না লৈরম্মি। হৌজিক্তি মফম অসিদা ঐহাক্না ইনর্জীগীদমক্তা অচৌবা শহরশিংদা পি.এন.জি.গী কনেক্সনশিং য়াম্না থুনা হেনগৎহনগদবনি।

মরুপশিং,

অহোংবশিং অসিগী শাফু অসি মীপুম খুদিংমক্কী খুদোংচাবশিং অদুখক্তদা অকক্নবা ওইদে। খুঙ্গং অদুদা লম্বী য়ৌরক্লবদি কৈথেল অদুদা চঙ-চঙবদা লায়রগনি। ইলেক্ত্রিসিতীগী খুদোংচাবশিং ফগৎলকপা মতমদা, অপীকপা ইন্দস্ত্রী-ধন্দনা চাউখৎপা হৌরকখি। খুঙ্গংদা এগ্রিকলচরদা ভেল্যু এদিসনসু লৈরকখি। হান্নদি মখোয়না লাল মির্চি য়োল্লি, হৌজিক্তি মৈ ফংলে, লাল মির্চিগী পাউদর শেম্মী, পাউদর শেমদুনা পেকেত শেম্মী, পেকেত শেমদুনা য়োল্লি। মরম অসিনা খুঙ্গংদা লৈরিবা অপীকপা ইন্দস্ত্রীশিংসু হেনগৎলক্লি। দিজিতেল কনেক্তিবিতী হেঙ্গৎলকপগা লোয়ননা, খুঙ্গংগী মীওইশিংসু মালেম পুম্বগা শম্নরি, মোদর্নিতীগা শম্নরি। সহর অমসুং খুঙ্গংগী খেন্নবসি মুত্থৎলক্লি। অমসুং মসিনা শেন্মিৎলোনগী খোঙজেল তপথহল্লে। অমসুং মসিগী পুম্নমক্কী পোজিতিব ইম্পেক্ত অসি লৈবাক অসিগী নহাশিংগী উজ্জ্বল ওইবা তুংলমচৎকী গেরেন্তী ওইরি। থবক ফংহল্লকপা মতমদা, লৈবাক অসি অনৌবা থৌনাগা লোয়ননা মাংলোমদা চংশিল্লি। মীওই লাখ কয়াদা অনৌবা খুদোংচাবা ফংহল্লি।

মরুপশিং,

ঙসি ভারতকী নহারোলশিংদা মখোয়গী মংলানশিং মপুং ফাহনবা, মাংলোমদা চংশিন্নবা খুদোংচাবা ফংলে। অসিগুম্বা খুদোংচাবা অসি মমাংদা অমত্তা ফংখিদ্রি। ঙসিদি মেন্যুফেকচরিং, তেক্নোলোজী, স্তার্ত-অপ, দিজিতেল সর্বিসেস, রেলৱে, দিফেন্স, স্পেস অসিমক্কী তোঙান তোঙানবা লমশিংদা মশিং থিঙমদ্রবা খুদোংচাবা কয়া ঐখোয়না ফংলি। ঐখোয়গী হোৎনরিবদি নহাশিংনা অনৌবা খুদোংচাবশিং অসি ফংহন্নবা অমসুং লৈবাক অসিগী নহাশিংনা মখোয়গী হৈশিংবা উৎনবা মপুং ফানা খুদোংচাবা ফংহন্নবা হোৎনবনি। মরম অসিনা, স্কিল দিবেলপমেন্ত, ইন্দস্ত্রীগা মরী লৈনবা এজুকেসন অমসুং ফ্যুচর তেক্নোলোজীদা কন্না মিৎয়েং থম্লি। আই.তি.আই.শিং অসি মোদর্নাইজ তৌরি। নেস্নেল স্কিল ত্রেনিং ইন্সতিত্যুৎশিং মপাঙ্গল কনখৎহল্লি। পি.এম. সেতুগুম্বা খোঙথাংশিং অসি মসিগী মাইকৈ অসিদা থবক তৌরি।

মরুপশিং,

হৌখিবা চহি খরদা লৈবাক অসিদা সেল্ফ-ইমপ্লোইমেন্ত অমসুং এন্ত্রিপ্রেন্যুওরশিপকী অনৌবা চৎনবী অমা শেমগৎলক্লি। ভারত অসি মালেমগী খ্বাইদগী চাউবা অহুমশুবা স্তার্ত-অপ ইকোসিস্তেমনি। লৈবাক অসিদা স্তার্ত-অপ লাখ ২.৩০ হেন্না লৈরি, হায়রিবা মশিং অসি নিংশিংবিয়ু, স্তার্ত-অপ লাখ ২.৩০ হেন্না লৈরি। অদুগা মদুদা নহা অনী মরি, অনী মরিসু য়াওরি। মরুওইবা ৱাফমদি, অহোংবা অসি অচৌবা সহরশিং খক্তদা অকক্নবা ওইদে অমসুং ঐহাক্না মসিদা য়াম্না নুংঙাইবা ফাওই। ঙসিদি, তায়র ২ অমসুং তায়র ৩ সিতিশিংগী নহারোলশিংসু, স্তার্ত-অপ অমসুং ইন্নোবেসনগী মালেমদা মখোয়গী শক্তি উৎলি। মসিগী অহোংবা অসি হৌজিক্তি লৈবাক অসিগী শেন্মিৎলোনগী মরু ওইবা শরুক অমা ওইরে। অহোংবা অসিদা ঐখোয়গী নারি শক্তিগী থৌদাংসু লেপ্তনা হেনগৎলক্লি। ঙসিদি নুপীশিংনা লুচিংবা স্তার্ত-অপ মশিং য়াম্না লৈরে। মসি খঙবদা ঐহাক্না মালেমগী মীয়ামদা হায়জরি মদুদি ঐখোয়গী স্তার্ত-অপশিংদা নুপীশিংগী থৌদাং য়াম্না চাউনা হেনগৎলক্লি। মুদ্রা যোজনাগী মখাদা নুপী কোতি কয়া ফাইনান্সিএল সপোর্ত ফংখ্রে। পি.এম. স্বনিধিগুম্বা স্কিমশিংনা নুপী লাখ কয়াদা আত্মনির্ভর ওইনবা খুদোংচাবা পীরি। ঙসিদি, খুঙ্গংশিংদা, অপীকপা শহরশিংদা, অহানবদা নুপী কয়ানা মশাগী ওইবা থবকশিং পায়খৎলি।

মরুপশিং,

পোলিসীশিং অমসুং ৱারেপশিং অসিগী মরক্তা, অদোম্না অতোপ্পা ৱাফম অমা নীংশিংগদবনি। সিস্তেম অমহেক্তগী অশেংবা পাঙ্গল অসি মসিগী মীয়াম্ননি। মীয়ামগী শক্তি লৈ, মীয়ামগী শক্তি লৈ অমসুং মীয়ামগী শক্তিনা লৈবাক অসিবু শক্তি পী। অদোম পুম্নমক্না শরুক য়াগদৌরিবা সিস্তেম অসি লৈবাক অসিগী মীওই করোর কয়াগী পুন্সিগা হকথেংননা মরী লৈনৈ, লৈবাক অসিগী মীওই করোর কয়াগী আশা অমসুং অপাম্বগা মরী লৈনৈ। সরকারগী থবক অসি মীয়ামগী পুন্সিদা লাইনা-লাইচৎ অসিদগী কোকহন্নবা পাম্বৈ অমনি। অদোম্না করম্বা দিপার্তমেন্ততা থবক তৌরবসু, অদোমগী লমচৎ, সেন্সিতিবিতী অমসুং থবক তৌবগী মওং অসি য়াম্না মরু ওইগনি। লৈবাক অসিনা অদোমদা থাজবা থম্লি। হৌজিক্তি, অদোমগী থবকশিং, অদোমগী লমচৎ, অদোমগী ৱাঙাং, অদোমগী লমচৎনা, অদোমগী থাজবা অসিবু হেন্না মপাঙ্গল কনখৎহনবসি অদোমগী থৌদাংনি। লৈবাক মীয়ামগী থম্মোয়দা অনৌবা থাজবা অমা থোরক্কনি, অনৌবা আশা অমগা লোয়ননা মাংলোমদা চংশিল্লক্কনি, মরম অদুনা নহা ওইরিবা কর্মযোগী খুদিংমক্না মখোয়গী থবকশিং অসি থৌদাং ওইনা লৌগনি। ঙসি ভারতকী মীয়ামগী আশাশিং য়াম্না হেনগৎলক্লি, অমসুং ঐহাক্না মসি চাউখৎপগী পোজিতিব সাইননি হায়না লৌই। ঐখোয়না ঐখোয়গী লৈবাক মীয়ামগী আশাশিংবু খঙগদবনি অমসুং মদুগী মতুং ইন্না য়াম্না থুনা থবক তৌগদবনি। অসুম্না, পব্লিক সর্বিসতা লাকপা নহাশিংগী থৌদাং অসি য়াম্না মরু ওইরক্লি। অদোম্না লেপ্পা লৈতনা তমজবা মথৌ তাই। অনৌবা তেক্নোলোজী, অনৌবা সিস্তেম অমসুং অনৌবা মথৌ তাবশিংগী মতুং ইন্না অদোম্না শেম-শাবা মথৌ তাই। মসিদা অদোম্না আই.জি.ও.তি. কর্মযোগী প্রারম্ভগুম্বা মোদ্যুলনা অদোমগী থৌদাংশিং খঙবদা য়াম্না মতেং পাংগনি। মসিগী কান্নবা অদু লৌনবা ঐহাক্না অদোমদা হায়জরি।

মরুপশিং,

ঙসি ভারতকী নহারোলশিংনা মালেমগী মফম খুদিংমক্তা মমীং অমা শেমগৎলি। অসিগুম্বা স্পিরিৎ, অসিগুম্বা ইনর্জী অসি পব্লিক সর্বিসতা উবা ফংই। চাউখৎলবা ভারত অসি অসিগুম্বা নহারোলশিংনা মখোয়গী থবকশিং অসি লৈবাক অসিবু সেবা তৌবগী পাম্বৈনি হায়না লৌবদগী ওইগনি। ঙসি এপোইন্তমেন্ত পত্র ফংলবা ঐখোয়গী নহা ওইরিবা মরুপশিংনা ভারতকী চাউখৎ-থৌরাংগী খোঙচৎ অসিদা অনৌবা থৌনা পীরগনি হায়না ঐহাক্না থাজবা থম্লি। অদোমগী থবকশিং, অদোমগী ৱারেপশিং অসিনা চাউখৎলবা ভারতকী ৱারেপশিং অসি মপুং ফাহল্লগনি অমসুং অদোম্না মসিগী মন্ত্র অসি কৈদৌঙৈদসু খল্লোইদবনি, ঐখোয়গী মন্ত্রদি নাগরিক দেবো ভব হায়বসিনি। নাগরিক দেবো ভব। নাগরিকশিংগী য়াইফনবা অসি ঐখোয়গী থৌদাংনি। ঐহাক্না ঙসি অমুক্কা হন্না নিয়োম পীনবগী পত্র ফংলবা নহাশিং পুম্নমকপু মখোয়গী তুংগী পুন্সিগীদমক্তা অমসুং লৈবাক অসিগীদমক থবক তৌবগী খুদোংচাবা ফংনবা য়াইফ-পাউজেল পীজরি। অদোম পুম্নমকপু য়াম্না-য়াম্না থাগৎচরি।

***