ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি কেবিনেৎ কমিতি ওন সেক্যুরিতি (সি.এস.এস.)গী মীফম অমা পাঙথোক্তুনা ৱেস্ত এসিয়াদা হৌজিক চত্থরিবা লানফমশিং অমসুং তোঙান তোঙানবা মন্ত্রালয়শিং অমসুং দিপার্তমেন্তশিংনা লৌখৎলিবা খোঙথাংশিং অসি য়েংশিন্নবা মীফম অমা পাংথোকখ্রে। মসি হীরম অসিগী মতাংদা ৪শুবা অখন্নবা সি.সি.এস. মীফম্নি।

কেবিনেৎ সেক্রতরিনা সি.সি.এস.তা হৌজিক ওইরিবা জিও-পোলিতিকেল ফিভমগী মতাংদা পাওদমখি। মহাকনা এল.এন.জি./এল.পি.জি., ফর্তিলাইজরশিং য়াওনা পেত্রোলিয়মগী পোত্থোকশিং মতিক চানা ফংহন্নবা পায়খৎলিবা থবকশিংগী মতাংদা ৱা ঙাংখি। মহাক্না হায়খি মদুদি এল.পি.জি.গী প্রোক্যুর্মেন্তকি সোর্সশিং হান্নদগী খেন্নবা থমখ্রে অমসুং অচৌবা পেত্রোলিয়ম প্রদক্তশিংগী অপুনবা স্তোক অমসুং সপ্লাইগী পোজিসন অসি মতিক চানা লৈরি। মতিক চাবা ক্রুদ ওইল ফংবনা সেন্ত্রেল পব্লিক সেক্তর ইন্তরপ্রাইজ (সি.পি.এস.ই.) রিফাইনরিশিং অসি য়ুতিলাইজেসনগী থাক ১০০%দগী হেন্না থবক তৌবা ঙমহল্লে, মসিনা পেত্রোল, দিজল অমসুং অতোপ্পা পেত্রোলিয়মগী পোত্থোকশিং মখা তানা পুথোকপা ঙমহল্লে। পাইপ নেচরেল গ্যাস (পি.এন.জি.) কনেক্সনশিং পাকথোক চাওথোকহন্নবা থৌরাংশিংসু লৌখৎখ্রে মদুনা মরম ওইরগা পি.এন.জি. কনেক্সনশিং তুং-কোইনা হেনগৎহল্লে। সরকারনা নেস্নেল গ্যাস গ্রীদ পাকথোক-চাওথোকহনবা, এল.এন.জি. ইম্পোর্ত অমসুং রিগ্যাসিফিকেসন ইনফ্রাস্ত্রকচর হেনগৎহন্নবা , সিতী গ্যাস দিস্ত্রিব্যুসন নেতৱর্কশিং পাকথোক-শন্দোক্নবা অমসুং পাইপলাইন ইনফ্রাস্ত্রকচর ওর্দর 2026 কী মখাদা পাইপলাইন অমসুং লাস্ত-মাইল কনেক্তিবিতীগীদমক্তা অপীবা মতমদা লোইশিন্নবগী অয়াবা পীদুনা এল.পি.জি.গী মহুত্তা মফমদা অতোপ্পা গ্যাস শিজিন্ননবগী খুদোংচাবা পীখ্রে।

মীফম অদুদা লাক্কদৌরিবা নাকেন্থাগীদমক্তা ফর্তিলাইজরশিংগী মথৌ তাবশিং অদু এসেস তৌখি অমসুং ফর্তিলাইজরগী অতোপ্পা সোর্সশিংসু খন্নখি। প্রধান মন্ত্রীনা হায়খি মদুদি ফর্তিলাইজরগী অপনবা লৈতনা সপ্লাই শোয়দনা ফংহন্নবগীদমক্তা খোঙথাং পুম্নমক লৌখৎকদবনি।

কনফ্লিক জোনশিংদা দোমেস্তিক নত্তনা মপান লৈবাক্কি ফিরাল পায়হনবা ভেসেলশিংদা শেবা তৌরিবা শমুদ্র ঙাক-শেল্লিবা থৌমীশিংগী ফিভমসু খন্নখি। প্রধান মন্ত্রীনা শমুদ্র ঙাক-শেল্লিবা থৌমীশিং অমসুং মখোয়গী ইমুং মনুংশিংদা মতম চানা ইনফোর্মেসন, ইমর্জেন্সী এসিস্তেন্স অমসুং কাওন্সেলিং ফংহন্নবা মেকানিজম অমা শেম্নবা য়াথং পিখি।

প্রধান মন্ত্রীনা হায়খি মদুদি লানফম অসিগী শাফু অসিদগী নাগরিকশিংগা লোয়ননা ভারতকি দাইসপোরাবুসু ঙাকথোকচনবা হোৎনবা য়াবা খুদিংমক হোত্‍‌নগদবনি।

প্রধান মন্ত্রীনা হায়খি মদুদি ইনরজি মনীংতম্বা শোয়দনা ফংহন্নবগীদমক্তা শোলার ইনর্জি অমসুং অতোপ্পা নন-ফোশিল ফ্যুএলদা য়ুম্ফম ওইবা সোর্সশিং য়াওনা রিন্যুএবল ইনর্জিগী সোর্সশিংদা অকনবা মিত্‍‌য়েং চংগদবনি।

প্রধান মন্ত্রীনা ক্রাইসিস অসিনা মরম ওইদুনা থোক্লিবা খুদোংচাদবশিং থেংননবা সরকারগী অপুনবা এপ্রোচ অমা মখা তানা লৌখৎকদবনি হায়না ফোংদোকখি । মহাক্না নাগরিকশিংগী ইইন্তরেস্তশিং ঙাক-শেন্নবা মতিক চাবা থৌরাংশিং অথুবা মতমদা পায়খত্‍‌পা ঙম্নবা দিবেলপমেন্ত পুম্নমক চাং নায়না য়েংশিন্নবা য়ুনিফাইদ কোওর্দিনেতেদ মেকানিজম অমা থমগদবনি হায়খি।

***