ভারতকী প্রধানমন্ত্রী

ভারত ইমানা য়াইফরে।

ভারত ইমানা য়াইফরে।

ভারত ইমানা য়াইফরে।

অন্ধ্র প্রদেশকী গভর্নর অব্দুল নাজিরজী; গোৱাগী গভর্নর অমসুং লমদম অসিগী মচানুপা অশোক গজাপতী রাজুজী; মুখ্য মন্ত্রী অমসুং ঐহাক্কী মরুপ চন্দ্রবাবু নাইদুজী; উপ মুখ্য মন্ত্রী অমসুং ঐহাক্কী ইনাও পৱন কল্যানজী; কেন্দ্রগী মন্ত্রীমন্দলদা লৈরিবা ঐহাক্কী মরুপশিং – নহা ওইবগী ইনর্জীনা থল্লবা – রামমোহন নাইদুজী, চন্দ্রশেখর পেম্মাসানিজী অমসুং ভূপতি রাজু শ্রীনিভাস ভর্মাজী; রাজ্য সরকারগী মন্ত্রী নারা লোকেশজী; মফম অসিদা লৈরিবা অতোপ্পা মীয়ামগী মীহুৎশিং; নুপী অমসুং নুপাশিং।

অন্দরিকী নমস্কারম!

মরুপশিং,

ঙসি অসি অন্ধ্র প্রদেশকী চাউখৎ-থৌরাং অমসুং ‘স্বর্ন অন্ধ্র’ (গোল্দন অন্ধ্র) গী মঙলানগীদমক য়াম্না মরু ওইবা নুমিৎ অমনি। অসিগুম্বা অফবা থৌরম অমদা অমসুং অফবা থা অমদা অৱাং থংবা অন্ধ্রগী অশেংবা লমদম অসিদা লাকপগী খুদোংচাবা ফংজরে। অহানবদা অমসুং খ্বাইদগী মরুওইবদা, ঐহাক্না ভগবান শ্রী বরাহা লক্ষ্মী নরসিমহা স্বামিগী মফমদা ইকায় খুম্নবা উৎচরি। ঐহাক্না শ্রী কুরমানাথ স্বামি অমসুং দেবী পৈদিতালি অম্মাভরুবুসু ইকায় খুম্নবা উৎচরি।

মরুপশিং,

ঙসি চাউরাক্না লুপা করোর ১৮,০০০গী দিবেলপমেন্ত প্রোজেক্তশিং হৌদোকখ্রে, শঙ্গাখ্রে অমসুং উরেপ-উয়ুং তমখ্রে। এয়রপোর্তকা লোয়ননা, প্রোজেক্তশিং অসি অন্ধ্রদা লৈরিবা লম্বীগী কনেক্তিবিতীগা মরী লৈনৈ। মখোয়শিং অসিদা ইনর্জী সিক্যুরিতীগা মরী লৈনবা প্রোজেক্তশিংসু য়াওরি। চাউখৎ-থৌরাংগী খোঙথাংশিং অসিনা অন্ধ্রগী চাউখৎপগী খোঙজেল য়াঙখৎলক্লিবা অসিগী খুদম অমনি। প্রোজেক্তশিং অসিগা মরী লৈননা ঐহাক্না ময়াম পুম্নমকপু য়াইফ-পাউজেল পীজরি।

মরুপশিং,

ঙসিগী থৌরম অসি অনৌবা পুৱারী শেম্বা অমসুং অনৌবা রেকোর্দশিং থম্বগী মতাংদা ওইরি। চাউখৎ-থৌরাংগী অনৌবা থাকশিং শেমগৎলকপগা লোয়ননা, ধিমসা জগোয়গী কলচরেল রেকোর্দসু শেমখ্রে। মসি চন্দ্রবাবুগী হোলমার্ক অমনি মদুদি মহাক্না হোরাইজন অনিমক শোকখ্রে। ঐহাক্না চন্দ্রবাবুগী মীৎয়েংবু অখন্ননা থাগৎপা ফোংদোকচরি – অতিয়া শোক্লিবা এয়রপোর্ত ফেসিলিতী অমা শাবদগী হৌরগা লমদম অসিগী ত্রাইবেলগী ইচিল-ইনাওশিংনা ধিমসা জগোয় শাদুনা মালেমগী রেকোর্দ অমা থমখি।

ত্রাইবেলগী ইচিল-ইনাও অমসুং মচানুপী লিশিং তরাদগী হেনবনা মখোয়গী থৌনা, মখোয়গী দিসিপ্লিন, অমসুং ত্রাইবেলগী চৎনবীগী চাউথোকচবা উৎখিবা থৌরম অসি তশেংনা য়াম্না ফজবা শক্তম অমা ওইখি। মসিনা লৈবাক অসিগী দাইভর্সিতীগা লোয়ননা ত্রাইবেল হেরিতেজ অসি চারোন-শুরোন কয়াদগী ঙাক-শেন্দুনা লাকপগী মশক অমা উৎলি। ময়াম পুম্নমকপু, অমসুং মরুওইনা ঐহাক্কী ত্রাইবেলগী ইচিল-ইনাওশিং অমসুং ইচানুপীশিংদা, মসিগী পর্ফোমেন্স অসিগীদমক্তা ঐহাক্না থম্মোয় শেংনা নুংঙাইবা ফোংদোকচরি।

মরুপশিং,

মসি অলুরী সিতারামা রাজুগী লমনি। ঙসি, অল্লুরী সিতারামা রাজুনা ত্রাইবেলশিংগী য়াইফনবগীদমক মহাক্কী পুন্সি কত্থোকখিবা মফম অসিদা, অন্ধ্র প্রদেশকী অনৌবা এয়রপোর্ত অমা শঙ্গাখ্রে। হায়রিবা এয়রপোর্ত অসি অন্ধ্র অমসুং অৱাংথংবা অন্ধ্রগী চাউখৎ-থৌরাংগীদমক রনৱে অমা ওইনা মথৌ তৌরি। মসিনা অন্ধ্রগী নহারোলশিংগী অফবা তুংলমচৎকীদমক লোঞ্চপেদ অমা ওইরি। ঐহাক্না অন্ধ্র প্রদেশকী মীয়াম অমসুং লৈবাক পুম্বদা থম্মোয় শেংনা নুংঙাইবা ফোংদোকচরি।

মরুপশিং,

মমাংদা, এয়রপোর্তশিং শাবদা, মখোয়শিং অসি ইমুং অমগী মমিং লৌদুনা থোনরম্মি; ঐখোয়না চৎনবী অসি হোংদোক্লে। ঐখোয়না অয়োধ্যাদা লৈবা এয়রপোর্তকী মমিং অসি ভাল্মিকীগী মমিং লৌদুনা থোনখি অমসুং পঞ্জাবতা লৈবা এয়রপোর্তকী মমিং অসি সন্ত রবিদাস জীগী মমিং লৌদুনা থোনখি।

অমসুং মরুপশিং,

কেন্দ্রগী এন.দি.এ. সরকারনা অনৌবা এয়রপোর্ত অসিগী মমিং অসি শ্রী অলুরী সিতারামা রাজুগী মমিং লৌদুনা থোননবা ৱারেপ লৌখ্রে। অন্ধ্র প্রদেশকী নাগরিক অমা হেক্তনা নৎত্রগা লৈবাক অসিগী মনুংদা নৎত্রগা মালেমগী মফম কয়াদগী লাকপা নাগরিক অমা হেক্তনা হায়রিবা এয়রপোর্ত অসিগী থোংদা চৎপা মতমদা মীয়ামগী অমসুং লৈবাক অসিগী সেবা তৌবগী ইথিল অসি অল্লুরী সিতারামা রাজুগী মমিংদগী লৌগনি।

মরুপশিং,

লৈবাক অসিগী এভিএসন সেক্তরনা হৌখিবা চহি ১২ অসিদা চাউনা খুমাং চাউশিল্লে। ২০১৪ ফাওবদা লৈবাক অসিদা এয়রপোর্ত ৭৪ খক্তমক মথৌ তৌরম্মি; ঙসিদি হায়রিবা মশিং অসি ১৬৬ ওইরে। মতম অমদা এয়র ত্রাভেল অসি অচৌবা শহরশিংদা খক্তমক ওইরম্মি, অদুবু এন.দি.এ. সরকারগী মখাদা, অপীকপা শহরশিংদগী লাকপা মীশিং ফাওবা হৌজিক পাইবা ফংলে। হৌখিবা চহি ১২ অসিদা হেনগৎলকখিবা অসি এয়রপোর্ত মশিং খক্তমক নত্তে, ঐখোয়গী ‘উরান’ স্কিম্না মরম ওইদুনা হৌজিক্তি লায়রবা ইমুংগী মীওইশিং ফাওবা ফ্লাইৎ তোংদুনা চৎপগী খুদোংচাবা ফংলে। স্কিম অসিনা লায়রবশিংগী মরক্তগী খ্বাইদগী লায়রবশিংবু মখোয়গী মঙলানশিং মংফাওহনবদা মতেং পাংলি। হৌখিবা মতমদা, সরকারনা লুপা করোর ২৯,০০০গী শেনফমগা লোয়ননা উরান স্কিমগী অনিশুবা তাঙ্কক হৌদোকখি।

মরুপশিং,

লৈবাক অসিনা এভিএসন সেক্তরদা অতোপ্পা মরু ওইবা মাইলস্তোন অমা ফংলে। নুমিৎ খরনিগী মমাংদা কাশীদা হৌদোকখিবা ‘স্পোক’ এয়রপোর্ত মোদেল অসি হৌজিক পঞ্জাবকী অমৃতসরদা য়ৌরে। মসিনা অমৃতসরবু ইন্তর্নেস্নেল দেস্তিনেসন ২৫ হেনবদা শম্নহল্লগনি। অন্ধ্রগী লৈমায় অসিদগী ঐহাক্না পঞ্জাবকী মীয়াম্বু মসিগী মাইপাকপগীদমক থাগৎপা ফোংদোকচরি।

মরুপশিং,

অন্ধ্র প্রদেশনা মতম পুম্নমক্তা চাউখৎলবা ভারতকী গ্রোথ ইঞ্জিন অমা ওইনবগী পোতেন্সিএল লৈদুনা লাক্লি। রাজ্য অসিগী চাউখৎ-থৌরাংগীদমক ঐখোয়না হোৎনরিবশিং অসি ‘দবল ইঞ্জিন’গী খোঙজেল য়াংনা মাংলোমদা চংশিন্নবা, ঐহাক্না ‘দবল ইঞ্জিন সরকার’ অমগীদমক মীয়ামগী মেন্দেত লৌখি। ঙসিদি, চন্দ্রবাবু নাইদু অমসুং পৱন কল্যানগী লুচিং মখাদা, এন.দি.এ.গী অপুনবা তীমনা অন্ধ্র প্রদেশকীদমক দবল স্পীদতা থবক তৌরি।

মরুপশিং,

ঙসিদি, লৈবাক অসিনা ব্লু ইকোনোমী অসিবু লেপ্তনা মপাঙ্গল কনখৎহল্লি। ঐখোয়গী মীৎয়েংদি লমদম অসি মপুং ফানা কোস্তেল ইকোনোমিক কোরিদোর অমা ওইহন্নবা হোৎনবনি। মসিগী পান্দম অসিগা লোয়ননা, ঐখোয়গী হৌজিক লৈরিবা বিশাখাপত্নমদগী কৃষ্ণাপত্নম ফাওবগী পোর্তশিং অসি মোদর্নাইজ তৌরি। মসিগী মথক্তা, ঐখোয়না মুলাপেতা অমসুং রামায়াপত্তনমদা অনৌবা পোর্তশিং শাগৎলি।

মরুপশিং,

পোর্ত দিবেলপমেন্তকা লোয়ননা, অন্ধ্র প্রদেশ শিনবা থুংনা হাইৱেজ অমসুং এক্সপ্রেসৱেজকী নেৎৱার্ক অমা শেমগৎলি। বিশাখাপত্নম-রাইপুর এক্সপ্রেসৱেগুম্বা প্রোজেক্তশিং অসিনা লমদম অসিগী চাউখৎ খোঙজেল য়াংখৎহল্লি।

মরুপশিং,

লমদম অসি লৈবাক অসিগী মরুওইবা ইন্দস্ত্রীএল হবশিংগা শম্নহন্নবা, হৌজিক অন্ধ্র প্রদেশতা চাউরাক্না লুপা করোর লাখ ১গী রেলৱে প্রোজেক্তশিং পায়খৎলি। রাজ্য অসিগী রেলৱেজ নেৎৱার্ক পুম্নমক ইলেক্ত্রিফাই তৌখ্রে, অমসুং মফম অসিদা রেলৱেজ স্তেসন তরাদগী হেন্না মোদর্নাইজ তৌরি।

মরুপশিং,

ঙসিদি পি.এম. গতি শক্তি নেস্নেল মাস্তর প্লানসু লমদম অসিগী চাউখৎ থৌরাংদা অচৌবা থৌদাং অমা লৌরি। পি.এম. গতী শক্তিগী খুত্থাংদা, লমদম অসিগী মফম পুম্নমক্তা রেল, পোর্ত অমসুং এয়রপোর্তকী ইনফ্রাস্ত্রকচর পুন্সিল্লি। মতমগা চুনবা লোজিস্তিক্স নেৎৱার্ক অসি শেমগৎলকপা মতমদা, ইন্দস্ত্রীশিংনা হেন্না ফবা কনেক্তিবিতীদগী কান্নবা ফংগনি, লৌমীশিংনা কান্নবা ফংগনি, অমসুং ‘ইজ ওফ দুইং বিজিনেস’সু হেনগৎলগনি।

মরুপশিং,

।অন্ধ্র প্রদেশ অসি মতম পুম্নমক্তা মাংলোমদা চংশিল্লিবা রাজ্য অমনি। অন্ধ্রগী নহারোলশিংনা সোফৱেয়র, আই.তি. অমসুং তেক্নোলোজী সেক্তরশিংদা মালেমগী থাক্তা ময়েক শেংলে। মরম অসিনা রাজ্য অসিগী চাউখৎ-থৌরাংগীদমক লৈঙাক অসিনা লোকেল তেলেন্ত অসিবু শীজিন্ননবা পান্দম থম্লি। ঐখোয়গী হৈ-শিংলবা নহারোলশিংগী তৌবা ঙম্বশিংদগী অন্ধ্র প্রদেশ অমসুং লৈবাক অনিমক্না খ্বাইদগী হেন্না কান্নবা ফংহনবা অসি য়াম্না মরু ওই। মসিগীদমক, ঐখোয়না হৌজিক সেমিকন্দক্তরশিংগুম্বা ফ্যুচরস্তিক তেক্নোলোজী ইন্দস্ত্রীশিংদা মীৎয়েং থম্লি। বিশাখাপত্নমদা অনৌবা সেমিকন্দক্তর প্লান্ত অমগী উরেপ উয়ুং তম্বগী থৌরম অসি মসিগী মাইকৈ অসিদা মরু ওইবা খোঙথাং অমনি। চন্দ্রবাবুগী লুচিং মখাদা, অন্ধ্র অসি সোফৱেয়রগা লোয়ননা মেন্যুফেকচরিংগী হব অমা ওইনবা শেম শাখ্রে। মসিনা রাজ্য অসিদা ফ্যুচরিস্তিক ওইবা থবকশিং শেমগৎকনি অমসুং তেক্নোলোজী ইন্দস্ত্রীগী অনৌবা ইকোসিস্তেম অমা শেমগৎকনি।

মরুপশিং,

মালেমগী শেন্মিৎলোনগী মফম অমা হেক্তদা, গ্রোথ সেন্তর অমা অসি ফেক্তরী অমা খক্তনা শেম্বা ঙম্লোই; মসিদা ইকোসিস্তেম অমা মপুং ফানা মথৌ তাই। ঙসিদি, ঐখোয়না অন্ধ্র প্রদেশতা চাউখৎপগী ইকোসিস্তেম অসি শেমগৎলি। চন্দ্রবাবু নাইদুজীনা মহাক্কী মশাগী থাক্তা অয়ুক-নুমিদাং চুপ্পা থবক তৌরি। মসিনা মরম ওইদুনা, মালেমগী মরুওইবা কম্পনী কয়ানা মফম অসিদা ইনবেস্ত তৌনবা লাক্নবা কন্না হোৎনরি।

মরুপশিং,

সেমিকন্দক্তরশিংগা লোয়ননা এ.আই. ইনফ্রাস্ত্রকচর অমসুং দেতা সেন্তরশিংদা থবক পায়খৎলি। গুগলনা মফম অসিদা এ.আই. অমসুং ক্লাউদ ইনফ্রাস্ত্রকচর কেম্পস অমগীদমক দোল্লর বিল্লিয়ন ১৫গী শেনফম থাদগনি হায়নসু লাউথোকখ্রে। অতোপ্পা মালেমগী কম্পনী কয়ানসু মফম অসিদা অনৌবা খুদোংচাবশিং উরি। মসিনা অন্ধ্র প্রদেশকী নহারোলশিং অমসুং লৈবাক পুম্বগীদমক চাউনা কান্নবা পীরি।

মরুপশিং,

অন্ধ্রগী ইন্দস্ত্রীএল গ্রোথকী ৱারী অসি দিজিতেল তেক্নোলোজী খক্তদা অকক্নবা ওইদে। কেন্দ্র সরকারনা নকপাল্লীদা অচৌবা ফার্মা পার্ক অমা শেমগৎপদা মতেং পাংলি। মসিনা অন্ধ্র প্রদেশপু লৈবাক অসিগী মরুওইবা ফার্মা হব অমা ওইনা শেমগৎপদা মতেং পাংগনি। গ্রীন ইনর্জী সেক্তরদা রায়লাসীমা লমদম খক্তদা লুপা করোর লাখ মঙা হেন্না ইনভেস্তমেন্ত তৌখ্রে। ঙসি, ঐহাক্না অন্ধ্র প্রদেশকী মীয়াম পুম্নমকপু থাজবা পীজরি মদুদি ঐখোয়গী সরকার – ‘দবল ইঞ্জিন’ সরকার অসিনা অসিগুম্বা ওইথোকপা য়াবা খুদিংমক ফংহন্নবা অয়ুক-নুমিদাং চুপ্পা থবক তৌগনি।

মরুপশিং,

ঐহাক্কী শুপ্নগী হৌখিবা খোঙচৎ অহুমদা মফম অসিদা লুপা করোর লাখ অনিগী প্রোজেক্তশিং শঙ্গাখিবা অদুদগী অদোম্না অন্ধ্র প্রদেশকী সেক্তর খুদিংমক্তা থবক কয়া য়াম্না খুমাং চাউশিল্লক্লিবা অদু খঙবা ঙমগনি। রাজ্য অসিগী চাউখৎ-থৌরাংগী খোঙচৎ অসিগী শরুক অমা ওইনা অৱাংথংবা অন্ধ্রসু শক্তি লৈরক্লিবা অসিদা ঐহাক নুংঙাইবা ফাওই। ঐখোয়না বিশাখাপত্নম ইকোনোমিক রিজন (ভি.ই.আর.) অসি লৈবাক অসিগী মরুওইবা ইন্দস্ত্রীএল হব অমা ওইনা শেমগৎলি। ঐখোয়গী পান্দমদি ভি.ই.আর অসি এসিয়াগী মকোক থোংবা ইকোনোমিক হব অমা ওইবনি। এয়রপোর্ত্তগী সেমিকন্দক্তর য়ুনিৎ ফাওবা পুম্নমক অসি মিসন অসিগী শরুক অমনি।

মরুপশিং,

ঐখোয়গী সরকারগী মন্ত্রদি “ইনভেস্তমেন্তনা থবক ফংহল্লি” হায়বা অসিনি মরম অদুনা সরকারনা মশাগী ইনভেস্তমেন্ত হেনগৎহনখ্রে, অমসুং ঐখোয়না প্রাইবেৎ সেক্তরবুসু ইনভেস্তমেন্ত তৌনবা পুক্নিং থৌগৎলি। অদোম্না খংলি, ইনভেস্তমেন্ত হেনগৎলকপা মতমদা, মেন্যুফেকচরিং হেনগৎলকই। মেন্যুফেকচরিং হেনগৎলকপা মতমদা, এক্সপোর্ত হেনগৎলকই। এক্সপোর্ত হেনগৎলকপা মতমদা, অনৌবা থবক ফংবগী খুদোংচাবশিং লৈরকই। অমসুং থবক ফংবগী চাং হেনগৎলকপা মতমদা, মীশিংগী ইনকম হেনগৎলকই অমসুং ইমুংশিংগী পুন্সি ফগৎলকই- অমসুং মসিমক ঐখোয়না অন্ধ্র প্রদেশতা উবা ফংলি।

মরুপশিং,

ঙসি হৌদোকখিবা অমসুং উরেপ-উয়ুং তমখিবা প্রোজেক্ত পুম্নমক অসিনা ‘স্বর্ন অন্ধ্র’ (গোল্দন অন্ধ্র) অমসুং ‘ভিক্সিত ভারত’ (দিবেলপ ইন্দিয়া) গী মঙলান অসি মপুং ফাহন্নবদা চাউনা মতেং পাংগনি হায়না ঐহাক্না থাজবা থম্লি। চন্দ্রবাবুজীগী লুচিং মখাদা, অন্ধ্র প্রদেশ অসি চাউখৎলবা ভারত অমগী মঙলান অদু মংফাওনহন্নবগী মরুওইবা ইনর্জীগী হৌরকফম অমা ওইনা থোরক্লি। মসিগী প্রোজেক্তশিং অসিগীদমক ঐনা অমুক্কা হন্না অন্ধ্র প্রদেশকী মীয়াম্বু থম্মোয় শেংনা নুংঙাইবা ফোংদোকচরি।

হন্না-হন্না থাগৎচরি!

ভারত ইমানা য়াইফরে।

ভারত ইমানা য়াইফরে।

ভারত ইমানা য়াইফরে।

হন্না-হন্না থাগৎচরি!

*****