ভারতকী প্রধানমন্ত্রী

খুরুমজরি!

ঙসি, ইরৈচা ঐখোয় পুম্নমক অচৌবা অমসুং মরুওইবা ৱারেপ অমগীদমক পুল্লে। ৱারেপ অসিগীদমক, থৌরম অসিদা শরুক য়ারিবা শেংলবা সাধুশিং, তোঙান তোঙানবা রাজ্যশিংগী রাজ্যপালশিং, চীফ মিনিষ্টরশিং, অতোপ্পা মীয়ামগী মীহুৎশিং, মফম লিশিং ২৮ হেনবদগী শরুক য়ারিবা নহা ওইরিবা মরুপ করোর অমা হেনবা, শেংলবা ৱারেপ অসিগীদমক শেংলবা থৌরম অসিদা ঐনা নহারোল করোর কয়া থাগৎপা ফোঙদোকচরি। ঙসি ঐখোয়না উরিবা খোঙজং অসি লনাই মীওইগীদমক, ইমুংগীদমক, খুন্নাইগীদমক অমসুং খ্বাইদগী মরুওইনা, লৈবাক অসিগীদমক্নি।

মরুপশিং,

খোঙজং অসিগী মমিং, ‘দ্রগ শীজিন্নদবা নহারোল’ , চাউখৎলবা ভারতকী ৱারেপ লৌনবা খোঙজং, মসিগী ৱারেপ অসি নাখৈ শেংলে। মরমদি ঙসি, লৈবাক অসিনা বিকসিত ভারত অমগী পান্দম থম্লে, লৈবাক অসিগী নহারোলশিং হকচাং ফবা, পুক্নিং=ৱাখলগী হকচাং ফবা, মপুংফানা মশানা মশাবু থাজবা অমসুং ময়াই কাবা চীঞ্জাকশিংদগী মতম পুম্নমক্ত লাপ্না লৈবা অসি লৈবাক অসিগী নহারোলশিংগীদমক তঙাইফদে। মরম অদুনা, ঐখোয়গী নহারোলশিং লাইচুবা অমসুং দ্রগশিংগী খুদোংথিবশিং খঙনবা, হিরম খুদিংমক্ত মখোয় ৱাখল তানা লৈহন্নবা অমসুং দ্রগশিংদগী লাপ্না লৈহন্নবা ঐখোয়না ৱাশক অসি লৌগদবনি। হৌজিক ‘জাতিগী দ্রগ শীজিন্নদবা নহারোল’ খোঙজং অসি ৱারেপ অসিদা অচৌবা থৌদাং অমা লৌরে।

মরুপশিং,

কাসিগী এম.পি ওইনা, হৌখিবা চহিদা শেংলবা লমদম কাসিদগী চাংয়েং ওইনা খোঙজং অসি হৌদোকখিবদা ঐ অপেনবা ফাওই। মরম অদুনা, সাইন্তিফিক ওইনা নাখৈ শেংবগা লোয়ননা, মসিদা অধ্যতিক্কী শক্তি য়াওরি, সাধুশিংগী বর ফংলে অমসুং অচৌবা নাৎকী হেরিতচ অমা লৈরে। খোঙজং অসিদা চহি চা কয়া নিশাদা লাইচুবা য়াদদুনা লাকপা নাৎকী ওইবা কৎথোকপা অদু য়াওরে। লৈবাক অসিগী মীওই মিল্লিয়ন কয়া কান্নবা ফংনবা ঙসি লৈবাক শীনবা থুংবগী অধ্যতিক্কী লুপ ১২৫ হেন্না ঐখোয়গা শরুক য়ারিবনি। মাইকৈ অসিদা থবক তৌনবা খুন্নাইগী লুপশিং অমসুং এন.জি.ওশিং ৱাশক লৌরে। অমতা ওইনা, “কাসি দিক্লারেসন” গী খুৎথাংদা মখোয়না রোদমেপ অমা শেম-শারে অমসুং কাসিদগী হৌখিবা মীয়ামগী য়াইফনবা অনৌবা ৱাখল ঙসি লৈবাক্কী প্রোজেক অমা ওইরকপা ঙসি ঐখোয়না উরে। ঙসিদগী, লৈবাক শীনবা থুংনা “দ্রগ শীজিন্নদবা নহারোল” খোঙজং হৌদোক্লে।

মরুপশিং, 

করিগুম্বদা কনাগুম্বনা থবক খর লনাই ওইনা হোৎনবা মতমদা, করিগুম্বা মতমদা কনাগুম্বনা নিংবা কাইবা য়াওরকই, চোকথরকই, লাপ্না চৎনবা ৱাখলনা থৌরাং তৌদে, অদুবু মসিনা অপুনবগী খোঙজং অমা ওইরকপা মতমদা, মীওই করোর কয়া নকশীন্ননা চৎমিন্নৈ, মতম অদুদা লনাই ওইনা পাংথোকপা ঙমদবা মীওইশিং, অনৌবা থৌনা অমা ফংলে। অপুনবগী শক্তি অমা লৈরি অমসুং ঙসি, শক্তি অসিগা লোয়ননা, খোঙজং অসিনা নহারোল খুদিংমক্কী থম্মোয়দা পাল্লগনি। ঙাইহাক্কী মমাংদা, নিশাদা লাইচুদনবা লৈবাক অসিগী নহারোল লাখ কয়া ৱাশক লৌখ্রে। অদোমগী পুন্সি নিশাদগী লাপথোক্নবা অদোম ৱাশক লৌরে। অদোমগী স্কুল, অদোমগী কোলেজ অমসুং অদোমগী লৈকায়দা নিশাদা লাইচুদনবা পাউজেল শন্দোক্নবা অদোম ৱাশক লৌরে।

মরুপশিং,

ঙসি লৌরিবা ৱাশক অসি মথংগী চয়োল ১০০ চৎথগনি। নোংমাইজিং খুদিংগী, কলা, নাৎ, শান্নবা, ধ্যান তৌবা, অধ্যতিক অমসুং মীয়ামগী থবক তৌবগা মরী লৈনবা থবকশিং পাংথোক্কনি। ময়াই কাবা চীঞ্জাক্তগী লাপথোক্নবা পাউজেল অনৌবা মীয়ামদা য়ৌগনি। মথংগী নোংমাইজিং ১০০ অসি দ্রগ শীজিন্নদবা ভারত অমা, অকনবা খোঙথাং ১০০ গী মাইকৈদা থাংজিনবা অকনবা খোঙথাং ১০০ ওইগনি।

মরুপশিং, 

ঙসি, স্কুল, কোলেজ অমসুং য়ুনিভর্সিতি লিশিং কয়াদগী মহৈরোয় করোর কয়া ওনলাইন্দা থৌরম অসি শরুক য়ারে। মাই ভারত ভোলুন্তিয়ার করোর কয়াসু শরুক য়ারে। ঙসি মাই এন.এস.এস নহারোলশিংসু শরুক য়ারে। ঙসি, তোঙান তোঙানবা মহৈলোয়শঙশিং অমসুং তোঙান তোঙানবা শীনফমশিংদগী, লৈবাক অসিগী তোঙান তোঙানবা মফমশিংদগী নহারোল মিল্লিয়ন ১০ হেন্না শরুক য়ারে। ময়াম পুম্নমক্ত ঐনা হায়জরি: অদোম অচৌবা খোঙজং অসিগী লুচিংবশিংনি। মখোয়গী থৌদাংশিং পাংথোক্নবা ভারতকী নহারোলশিংনা কমদৌনা মীৎশিং-নাশিংবগে, কমদৌনা লৌশিং লৈবগে অমসুং কমদৌনা লুম্না লৌবগে হায়বদা অদোম্না ঐগী থাজবা হেনগৎহল্লে। খোঙজং অসিগীদমক ঐনা অদোম ময়ামদা য়াইফ পাউজেল পীজরি।

ঐগী নহা ওইরিবা মরুপশিং,

অদোম ভারতকী লোম্বা নাইদ্রবা মীরোলশিংনি। মথং চহি ২০-২৫ হেনবদা অদোম্না অদোমগী পুন্সি শেমগনি। ২০৪৭ দা চাউখৎলবা লৈবাক অমা ওইনবা পান্দমদা অদোম্না লৈবাক অসি লমজিংগনি। মসিদা নুংঙাইবা ফংগদৌরিবা অদু অদোম খক্তনি। লৈবাক অসিনা অদোমগী পাঙ্গল, অদোমগী ৱাখলনা শাগৎপা অমসুং অদোমগী হৈথোই-শিংথোইবা দরকার ওইরি। মরম অদুনা, লৈবাক্কীদমক অমসুং অদোম ইশাগী পুন্সিগীদমক, ময়াই কাবা চীঞ্জাক শীজিন্নদবা অসি য়াম্না মরুওই। ময়াই কাবা চীঞ্জাকশিংনা অদোমগী ৱাখল চোইথোকহল্লি অমসুং নহারোলশিং তপ্না তপ্না মখোয়গী মঙলানশিংদগী লাপথোকহল্লি। ঙাইহাক্কী মমাঙদা নহারোলশিংনা উৎখিবা লিলা অদুদা, অৱাবা, ময়াই কাবা চীঞ্জাক্না থোকহনবা অৱাবা অমসুং অপুনবা থবক পায়খৎনবা লম্বী মপুংফানা উৎখ্রে। লিলা অসি য়াম্না তেনখি, অদুবু, মখোয়না হায়খি, “লাক্লো, ঐখোয় লিলা য়েংলসি”! মসি লিলা খক নত্তে, মসি ঐখোয়দা পীবা অকনবা পাউজেল অমনি। মসিনা ঐখোয় মিকপ থোকহল্লে, লান্থেংন্নবা ঐখোয়দা ইথিল পীরে।

মরুপশিং,

ঙসিদি, নহারোলশিংনা ষ্টার্দঅপশিং অমসুং এ.আইদা মাঙজিল থাবা, শান্নবদা মচু অহুমগী ফিরাল পাইবা, স্পেসতগী সাইন্স ফাওবদা অনৌবা রেকোর্দশিং শেম্বা ঐখোয়না উরে। অদুবু, নহা অমা ময়াই কাবা চীঞ্জাক্ত লাইচুবা মতমদা, নহা অমা মাঙজবা খক নত্তনা, মঙলান অমা মাঙজরে, ঙন্না মঙলান অমা শিরে, ইমুং অমা মাঙলে, অপুনবা ইমুং নিংবা কাইরে, কনাগুম্বা অমা খুন্নাইনা হন্থনা য়েংবগী চৈথেং ফংলে। ময়াই কাবা চীঞ্জাকশিংনা হকচাং মাঙহনবা খক নত্তনা, ময়াই কাবা চীঞ্জাকশিংনা মমা অমগী মোমোন মীনোক মাঙহল্লি। ময়াই কাবা চীঞ্জাকশিংনা মপা অমগী মঙলানশিং কাইহল্লি। মসিনা মচল অমগী রাখিগী থাজবা হন্থহল্লি। মসিনা মনাওনুপা অমগী অচুম্বা ফিদমশিং মুন্দুনা পুখি। মখোয়গী অঙাং তপ্না তপ্না মাঙশিল্লকপা মতমদা ইমুংগী অহলশিং নুমিৎ খুদিংগীঊ অৱাবগা লোয়ননা হিংলি,  মখোয়গী মীৎমাংশিংদা মহাক মাঙলকপা মখোয়না উখি অমসুং মসি ইমুং অমদা, খুন্নাই অমদা অমসুং মফম অমদা থোকপা মতমদা, লৈবাক্কী মপাঙ্গল শোন্থরকই অমসুং য়েক্নবা লৈবাকশিংনা ঐখোয়গী লৈবাক্কী নহারোলশিং লৌতুন্দুনা ময়াই কাবা চীঞ্জাক্ত লাইচুনবা পায়খৎপা য়াবা থবকশিং পায়খৎখি। ময়াই কাবা চীঞ্জাকশিং য়োন্দুনা শেন তানবা অমসুং ঐখোয় লৈবাকগুম্বা লৈবাক অমা মাঙহনবা, মসি মখোয়গী তেরোরিষ্টকী লৌতুনবা শরুক অমনি অমসুং মরম অদুনা ঐখোয়না নহারোল খুদিংমক ময়াই কাবা চীঞ্জাক্কী লাংদা থুদনবা হোৎনগদবনি।

মরুপশিং,

ময়াই কাবা চীঞ্জাক্তগী লাপ্না লৈদুনা অদোম্না অদোমগী তৌবা ঙম্বা ঙাক-শেনগদবনি। নিংশিংবীয়ু, ময়াই কাবা চীঞ্জাকশিংনা অদোমদা ঙাইহাক্কী নুংঙাইবা পীবনি, অদুবু মখোয়না অদোমগী শীনফম অমসুং অদোমগী পুন্সি মাঙহল্লি। মখল অমতদা ঐখোয় লাইচুরোইদবনি।

মরুপশিং,

ঐখোয়গী খুন্নাইনা মতম পুম্নমক্ত লাইচুবা অসি ফত্তবা অমা ওইনা উরি। ঐখোয়গী সাধুশিং অমসুং গুরুশিংনা মসিগী মায়োক্ত লৈনবা ঐখোয়দা চেকশিনৱা পীরে। শ্রী গুরু গ্রান্থ সাহিবনসু হায়রি, “জিতু পীতৈ মতি দূরি হোই বরলু পবৈ বিচি আই। আপনা পরাঈয়া ন পছানাই খসমহু ধক খাই”। মসিনা হায়রিবদি, নিশাদা লাইচুবনা মীওই অমগী লৌশিং মাঙহল্লি অমসুং মশামক অমসুং অতোপ্পশিংগী মরক্ত লৈবা খেন্নবা কাউথোকহল্লি, মসিনা লৈখা তাহল্লি।

মরুপশিং,

মাংজৌননা ঙাকথোক্নবা ঐখোয়গী চৎনবীনা চেকশিনৱাশিং পীরি অমসুং মসি হেক হৌরকপদা লাইচুবদগী ফনবা লম্বীশিংসু তাক্লি। লাইচুবা ফনবা খুন্নাইগী মতেং, য়োগ অমসুং ধ্যান তৌবগী শক্তি, ঐখোয়গী নুঙগী শক্তি হেনগৎহনবা দরকার ওই। ঙসি, নিশাদা লাইচুবা থাদোক্নবা রিহেবিলিতেসন সেন্তরশিংগুম্বা খুদোংচাবশিং ঐখোয়গী লৈরে। মরম অদুনা, করিগুম্বা নহা অমা শোইবদগী লাইচুখিবা মতমদা, কন্নবা পাম্বৈ খুদিংমক লৈত্রে হায়বা নত্তে। ঐখোয়না মতম পুম্নমক্ত ৱাখল তাগদবদি করিগুম্বা ইমুং অমদা অঙাং অমা লাইচুবা মতমদা, খুন্নাইদা মিংচৎ থিগনি হায়না কিবদগী মসি লোৎশিল্লোইদবনি। ফোঙনা ৱারি শাগদবনি অমসুং অখঙ-অহৈশিংগী মতেং লৌগদবনি। মেদিকেলগী মতেং লৌদুনা অদোমগী অঙাং লাইচুবদগী কন্নবা হোৎনগদবনি। ইমুংদা অঙাংশিংগা অথিংবা লৈতনা পাউ ফাওনবগী চৎনবী অমা ঐখোয়না য়োকখৎকদবনি, মরম অদুনা অসিগুম্বা অরুবা ফিবম অমদা তাদ্রিঙৈদা অদোম্না মখোয়গী মতেং পাংবা ঙমগনি। অদোম খর খঙগনি, খজিক্তং পুক্নিং চঙবীয়ু অমসুং অদোম খঙগনি, মহাক অহোংবা অমা লৈরে হায়বা, মহাক্না মহাক্কী মমাই লোৎকনি, কা মনুংদা মপান থোক্তনা লৈগনি, নুমিদাং মপান থোরক্কনি, মরম চাদনা শেন নিরক্কনি, করিগুম্বা অশোইবা খর লৈরে হায়বা অদোম ঈঙ্গিৎ অমা ফংলে।

মরুপশিং,

কোলেজশিং অমসুং য়ুনিভর্সিতিশিংগী ঐখোয়গী মরুপ প্রোফেসারশিংদা অপীল তৌবা ঐনা পাম্মী: অদোমগী কোর্সৱার্কশিংগা লোয়ননা, মহৈরোয়শিংগা লোয়ননা অদোম্না ময়াই কাবা চীঞ্জাকশিংগী অমাঙবশিংগী মতাংদা খন্নগদবনি। অদোমগী কেম্পসশিংদা ময়াই কাবা চীঞ্জাকশিংগী শীজিন্নবগী মায়োক্ত খোঙজং অমা হৌদোক্কদবনি। অদোমগী থবকশিংনা অফবা ফলশিং ফংগনি। অদোম্না অতোপ্পা থবক অমা নিংশিংগদবনি: ময়াই কাবা চীঞ্জাক লাইচুবদগী ফরবা নহারোলশিং অশোনবা নত্তে। লাইচুবদগী ফরক্লবা মীওইশিং অশেংবা লান্মীশিংনি। খুন্নাইনা মখোয় ইকায়খুম্নবা উৎকদবনি, মখোয় লৌশিনগদবনি অমসুং মখোয়দা অনিশুবা খুদোংচাবা অমা পীগদবনি। মখোয়না ময়াই কাবা চীঞ্জাকশিং শীজিন্নরিঙৈদা লৈখিবা অদু মখোয়গী শক্তম নত্তে, মখোয়গী থৌনা অদুনা মখোয়গী শক্তমনি।

মরুপশিং,

ঙসিদি, ময়াই কাবা চীঞ্জাকশিংগী মায়োক্ত চঙশিল্লিবা খোঙজং অসিদা নহারোলশিংগা লোয়ননা সরকারনা খোঙফম চেৎনা লেপ্লি। লৈবাক শীনবা থুংনা ময়াই কাবা চীঞ্জাকশিং ললোনবশিং অমসুং নারোন্দা পুথোক-পুশিন তৌবা মীওইশিং অকনবা থবক পায়খৎলে। ফাবা হান্নগী শরুক কয়া হেনগৎলে। লুপা করোর লিশিং কয়াগী ময়াই কাবা চীঞ্জাকশিং ফারে। কমদৌনা ঐখোয়গী সরকারনা ময়াই কাবা চীঞ্জাকশিংগী মায়োক্ত লৈবগে হায়বা মসিনা উৎলে। মসিগী মিসনগী মওং অসি কেন্দ্র সরকার, রাজ্য সরকারশিং অমসুং মীওই খুদিংমক্না থবক ওইনা পাংথোক্কনি হায়না ঐনা থাজৈ। ময়াই কাবা চীঞ্জাকশিংদগী লাপথোক্নবা ঐখোয়গী লৈবাক্কী নহারোলশিংনা মখোয়গী নহা ওইবগী থৌনা ঙাক-শেনবা খক নত্তনা বিকসিত ভারত অমগী ৱাশকসু ফগৎহনগনি হায়না ঐনা থাজৈ। ঙসি ঐগী মাঙদা উরিবা শক্নাইরবা সাধুশিং অরাপ্পদগী ঐনা ইকায়খুম্নবা উৎচরি। লৈবাক অসিগী মফম খুদিংমক্ত লৈরিবা খুন্নাইগী লুপশিং, অধ্যতিক্কী লুপশিং, অধ্যতিক্কী গুরুশিং ঐনা থাগৎচরি। লাক্লিবা নুমিৎ ১০০ দা, লুপ অমমমনা চয়োল অমগী থৌদাং লৌগনি। চয়োল অমা লৈবাক অসি লমজিংগনি অমসুং অতোপ্পশিংনা শরুক য়াগনি অমসুং নোংমাইজিংদা অচৌবা থৌরম অমা পাংথোক্কনি। মথংগী চয়োলদা, অতোপ্পা লুপনা, অতোপ্পা ফোর্সনা, চয়োল অমা চাংয়েং পাংথোক্কনি, থৌরমশিং শীনগনি অমসুং নোংমাইজিংদা অচৌবা থৌরম অমা পাংথোক্কনি। ঐখোয়গী লৈবাক শীনবা থুংবগী অসিগুম্বা অধ্যতিক, খুন্নাই অমসুং নহারোলগী লুপশিংনা চয়োল অমা লৌবা মতমদা, অতোপ্পা ফোর্সশিং শরুক য়াগনি অমসুং নোংমাইজিংদা পুন্না থবক তৌমিন্নগনি, লৈবাক শীনবা থুংবগী খোঙজংগী পাক-চাউবা অদু অদোম খন্দুনা য়েংউ। শেংলবা থবক অসিগীদমক ঐখোয়দা থৌজাল পীনবা অদোমগী মতম কাইথোকপগীদমক ঐনা অমুক হন্না সাধুশিং, অচার্য়াশিং অমসুং লুপশিংগী লুচিংবশিং তৌবীমল খঙবা উৎচরি। থৌরম অসি শরুক য়ারিবা নহারোল করোর অমা হেন্না ঐনা থাগৎপা ফোঙদোকচরি; অচৌবা থবক অমা অদোম্না পাংথোক্লে। মাই ভারতকী ভোলুন্তিয়ারশিং ঐনা থাগৎচরি। হন্দক ঐনা মাই ভারতকী ভোলুন্তিয়ারশিং উনবগী খুদোংচাবা অমা ফংখ্রে। মখোয়না ভারতকী ঙমখৈগী খুঙ্গংশিংদা চৎখি অমসুং মফম অদুদা চয়োল অমা লৈখি। মতম অমদা লৈবাক অসিগী অরোইবা খুঙ্গংনি হায়না লৌরম্বা মফমদা মখোয়না চৎখি অমসুং হৌজিক ঐখোয়না লৈবাক অসিগী অহানবা খুঙ্গং কৌরে। মখোয়না থেংনরকপশিং পুক্নিং য়াম্না থৌগৎখি অমসুং ঙসি, লৈবাক্কীদমক মখোয়না মখা তানা কৎথোকপগী খুদম অমা ওইনা মাই ভারত ভোলুন্তিয়ারশিংনা অসিগুম্বা অচৌবা থৌরম অমা পাংথোক্লে। ঐনা মখোয় থাগৎলি অমসুং মখোয় ইকায়খুম্নবা উৎলি। অদোমগী অপুনবা থবক্না খোঙজং অসিনা ইমুং খুদিং, নহারোল খুদিং য়ৌগনি অমসুং ময়াই কাবা চীঞ্জাকশিং য়োল্লিবশিংদা অচৌবা শিংনবা অমা ওইগনি হায়না ঐনা থাজৈ। লাক্লো, ঐখোয় পুন্না মাঙলোমদা চঙশিল্লসি। অদোম ময়ামগী মফমদা ঐগী য়াইফ পাউজেল পীজরি!

অদোম থাগৎপা ফোঙদোকচরি!

***