ভারতকী প্রধানমন্ত্রী

ঐখোয়গী হান্নগী রাস্ত্রপতি শ্রী রাম নাথ কোবিন্দজী, লোক সভাগী ইকাই খুম্নরবা স্পিকর শ্রী ওম বির্লাজী, শ্রীমতী সভিতা কোবিন্দ জী, অমসুং হোল অসিদা লৈরিবা মকোক থোংবা মীওই পুম্নমক… ঐহাক্না মীপুম খুদিংমক্কী মমিং পনবা ঙমদবা য়াই, অদুবু মসি ইমুংগী মীফমগুম্না ফাওহনবা অসিদা ঐহাক য়াম্না নুংঙাইবা ফাওই।

ইচিল-ইনাওশিং,

ঙসি, ঐখোয়না শ্রী রামনাথ কোবিন্দ জীগী মশানা ইজবা পুন্সি ৱারী ফোঙবগী খুদোংচাবা ফংলে। থৌরম অসিদা শরুক য়াবগী খুদোংচাবা ফংজবা অসিদা ঐহাক নুংঙাইবা ফাওই। ঐহাক্না কোবিন্দজীবু মতম কুইনদগী খঙজৈ অমসুং মহাকপু নক্না খঙনবগী খুদোংচাবা ফংজখি; রাস্ত্রপতি ওইরিঙৈদা মহাক্না ঐঙোন্দা পীখিবা অখন্নবা মীনুংশি অমসুং থৌজাল অদুগা লোয়ননা মহাক্না ঐঙোন্দা পীখিবা লমজিং-লমতাক অসি ঐঙোন্দা য়াম্না চাউনা কান্নবা ওইখি। মহাক্কী পুন্সিগী মরমদা ঐহাক্না খঙবা অমসুং মহাক্কী তৌবা ঙম্বগী মরমদা ঐহাক্না খঙজবা অদুগী মতুং ইন্না, ঐহাক্না থাজবা থম্মি মদুদি শ্রী রামনাথ কোবিন্দ জীগী মশানা ইজবা পুন্সি ৱারী অসি ভারতকী দিমোক্রেসী অমসুং ভারতকী খুন্নাইগীদমক মমল য়াম্লবা লিগেসী অমা ওইগনি। কোবিন্দ জীগী পুন্সিগী খোঙচৎ অমসুং খুন্নাই অমসুং লৈবাক অসিদা মহাক্না শরুক তমখিবশিংগী মতাংদা ঐনা শাংনা ঙাংনদুনা লৈবা য়াবা ৱাফম কয়া অমা লৈরি। অদুবু লাইরিক ফোঙবগী থৌরম অসিদা “কর্তেন রাইজর” অমা খক্তমক মথৌ তাই। ময়াম পুম্নমক্না লাইরিক অসি ইশা-ইশানা মপুং ফানা পাদুনা মসিদগী কান্নবা লৌবা অসিনা খ্বাইদগী ফবনি।

মরুপশিং,

কোবিন্দজীগী পুন্সিগী খোঙচৎপু মহাক্কী মশাগী ৱাহৈদা খঙবীয়ু; লৈবাক অসিগী অনৌবা মীরোনশিংনা মহাক্কী ৱারোলশিং অমসুং এক্সপরিয়েন্সশিং অদু তমজবা ফংজবা ওইরসনু – মসিদগী মীপুম খুদিংমক্না চাউনা কান্নবা ফংগনি। ঐহাক্না রাম নাথ কোবিন্দজীবু মহাক মশানা ইজবা মহাক্কী পুন্সি ৱারী অসিগীদমক্তা থম্মোয় শেংনা নুংঙাইবা ফোংদোকচরি।

মরুপশিং,

শ্রী কোবিন্দনা লাইরিক অসিবু য়াম্না চুনবা তাইতল অমা পীরি: “ত্রাইম্ফ ওফ দি ইন্দিয়ন রিপব্লিক: মাই লাইফ, মাই স্ত্রগল্স।” মসিগী নুংগী পাউজেল অসিদি মহাক্কী পুন্সি অমসুং মদুদা থেংনখিবা লান্থেংশিং অসি পর্সনেল ওইজরবসু, লান্থেংশিং অদুগী মহৈ ওইনা ফংবা মায় পাকপা অসি ভারতকী রিপব্লিক্কা, ভারতকী দেমোক্রেসীগা মরী লৈনৈ।

মরুপশিং,

মীওইবা খুন্নাইগী ওইবা মগুন অমা ঐখোয়না তোইনা উবা ফংই; মীশিংনা মখোয়গী মায়পাকপশিংগীদমক ক্রেদিৎ লৌই অদুবু পুন্সিগী অৱাবা অমসুং খুদোংচাদবশিংগীদমক খুন্নাইবু তাইনৈ। অদুম ওইনমক, করিগুম্বা মীওই অমনা থম্মোয় শেংনা অমসুং ভারতকী মগুনশিংদা য়ুম্ফম ওইরগা লৈরবদি, মহাক্না খুন্নাইগী অশোয়বশিং থিবদা মতম মাংহনদে। মসিগী মহুত্তা, মহাক্না খুন্নাইগী অফবা মায়কৈশিংদা মীৎয়েং থম্মী অমসুং খুন্নাই অসি মহাক্কী মায়পাকপদা চপ মান্নবা শরুক অমা ওইনা লৌই। কোবিন্দজীগী মশানা ইজবা পুন্সি ৱারী অমসুং মসিগী মমিং অসি মসিগী খুদম্নি। মহাক্কী পুন্সিগী মতাংদা য়েংসি: মহাক্না কানপুর দেহাৎতা য়াম্না লায়রবা ইমুং অমদা পোকখি। কোবিন্দ জীনা হায়খ্রে অমসুং মহাক্কী লাইরিক অসিদা ইখ্রে মদুদি, কালেনগী নুমিৎ অমদা, মখোয়গী য়ুম মৈনা চাকখি; মহাক্কী মমানা মহাক্কী মশাগী সেফতীগী খনবা তৌদনা, য়ুমগী পোৎলমশিং কনবা হোৎনখি। তশেংনমক, অচম্বা ইমুং অমদা, পোৎ খুদিংমক অসি অঙাংশিংবু য়োকপদা মতেং পাংনবা পাম্বৈ অমনি। লাইবক থিবদি, মহাক্না মদু তৌরিঙৈ মতমদা, মহাক্কী মমানা মৈ অদুদগী নান্থোকপা ঙমখিদে অমসুং মহাক্কী পুন্সি মাংখি। অসিগুম্বা থৌদোক অসি থেংনবদা য়াম্না নুংঙাইতবা ফাওগনি হায়বদু অদোম্না খল্লমগনি। চহি নৌরিঙৈ মতমদা মমানা অসিগুম্বা মওংদা লৈখিদবগী থৌদোক অসি থেংনখি। ঐহাক য়াম্না লাইবক ফৈ হায়না খল্লি মরমদি ঐহাক্কী ইমা চহি চাম্মা হেন্না হিংলম্মি অমসুং ঐহাকপু লেপ্তনা য়াইফ-মঙ্গোল পীখি। অদুম ওইনমক, ঙসি ফাওবদা ঐহাক্না মহাক্কী লৈখিদবগী অৱাবা অদু ফাওরি।

মরুপশিং,

মহাক্না মহাক্কী পুন্সিদা অৱাবা কয়া মায়োক্নখি – কনাগুম্বা অমবু নীংবা কাইহনবা য়াবা অদু মায়োক্নখি – অদুবু অৱাবা কয়া অসিনা কোবিন্দজীবু হেন্না মপাঙ্গল কনখৎহনখি। মহাক্কী য়ুম্লোন্নব অমনা মহাকপু চাউনা য়োকপদা মতেং পাংখি, মসিনা খুন্নাইগী অপুনবা অমসুং অপুনবগী মপাঙ্গলগী মরমদা তাকপীখি। মসিগী থৌদোক অসিগী মতুংদা মহাক্কী পুন্সিদা মহাক্কী মপাগী থৌদাং অসি হেন্না মরু ওইরকখি; কোবিন্দজীনা মহাক্কী মপাবু মহাক্কী হিরোনি হায়না লৌই মরমদি মহাক্না ইমুংবু অমত্তা ওইনা পুনশিনখি অমসুং অঙাংশিংদা মগুনশিং অদু পোকহনখি।

মরুপশিং,

অসিগুম্বা অঙাং ওইরিঙৈগী লান্থেংশিংগী মরক্তা, কোবিন্দজীনা মহৈ তম্ববু মহাক্কী তৌবা ঙম্বশিং হেনগৎহন্নবগী লম্বী অমা ওইহনখি। মহাক্না কন্না হোৎনখি অমসুং শেল-থুমগী অৱাবা অসি মহাক্কী অশোনবা ওইহল্লমদে। অরোইবদা, মহাক্না মতমদুগী মীওইশিংনা ৱাখলনা লাম্বা ফংদবা থাক অমদা য়ৌখি। মহাক্না ভারতগুম্বা অচৌবা লৈবাক অমগী রাস্ত্রপতি ওইখি।

মরুপশিং,

অসিগুম্বা অৱাংবা ওফিস অমা ফংলবা মতুংদসু, কোবিন্দজীগী নোলুকপা অমসুং অচম্বা মওং-মতৌ অসি হোংদে। ঐহাক্না প্রধান মন্ত্রী ওইরিঙৈদা মহাকপু রাস্ত্রপতি ভবনদা উবা ফংখিবা অদু ঐহাক্না নীংশিংলি। মহাক্না অয়াম্বা মতমদা স্তেন্দর্দ প্রোতোকোলগী ৱাংমদা চৎলিবা থৌওংশিং পাংথোকই – প্রধান মন্ত্রী থিন্দোকপা কারগী মখোং ফাওবা লাকপা। অহানবদা, ঐহাক্না মহাকপু মসি তৌদনবা তকশিনখি, অদুম ওইনমক মহাক্না মহাক্কী পুন্সি চুপ্পদা নোলুকপা মতৌ অদু থাদোকখিদে। মহাক্না রাস্ত্রপতি ওইরবা মতুংদা মহাক্কী খুঙ্গং পেরুনখদা চৎপা মতমদা, মহাক্না মহাক্কী ওজাশিংদা মখোয়গী খোঙ শোক্তুনা ইকায় খুম্নবা উৎখি। মহাক্না খুঙ্গংগী লৈমায়দা মকোক নোনখি অমসুং খুঙ্গংগী মীচম প্রজাশিংদা মহাক্কী তৌবিমল খঙবা ফোংদোকখি। লৈবাক শীনবা থুংনা পুক্নিং নুংশিরবা থৌদোক অদু উখি। মহাক্কী লমচৎনা মালেমদা ভারতকী নাৎকী মগুনশিংগী মশক অমা উৎখি – মসিনস ভারত মচা খুদিংমকপু চাউথোকচবা পোকহল্লি।

মরুপশিং,

চহি চা কয়া মীখা পোন্দুনা লৈরিঙৈ মতমদা, ঐখোয়গী লৈবাক অসিনা শেন্মিৎলোন অমসুং খুন্নাইদা চাউনা শোত্থখি। ঐখোয়গী ‌ইমা-ইপাশিংনা চহি কয়া লান্থেংনখি। মহাত্মা গান্ধী, বাবাসাহেব অম্বেদকর, জ্যোতিবা ফুলে অমসুং সাবিত্রিবাই ফুলেগুম্বা শক্নাইরবা মীওইশিংনা ভারতপু অমুক হন্না শেমগৎনবা ৱাখল্লোন থমখি – খ্বাইদগী লায়রবা অমসুং খ্বাইদগী শোত্থরবশিংনা মায়পাকপগী খ্বাইদগী ৱাংবা পনখৈ য়ৌবা ঙম্বগী খুদোংচাবা লৈবা ভারত অমা। কোবিন্দজীগুম্বা মীওইশিংনা মখোয়গী কন্না হোৎনবা অমসুং মেরিৎ লৈদুনা মখোয়গী পুন্সিদা অহোংবা পুরকপতা নত্তনা মতম কুইনদগী শাগৎতুনা লাক্লবা মঙলান অমসুং মীৎয়েং অদু মঙফাওনহনবদা মরুওইবা থৌদাং লৌরি। মসিগী মাইকৈ অসিদা ঐখোয়গী অপুনবা খোঙথাংশিং অসি মখা তানা চত্থখিগনি। তুংলমচৎতা, কোবিন্দজীগুম্বা নহাশিং – অৱাবা মায়োক্নবদা চংজদবা নত্ত্রগা শীংনবশিংগী মায়োক্তা পুক্নিং শোন্থদবা, অদুবু কন্না হোৎনদুনা মায় পাকপগী লম্বী য়াৎনবা ৱারেপ লৌবা মীওই কয়া ঐখোয়না মথৌ তাই। অসিগুম্বা ত্রান্সফোর্মেসন অসিদগী শক্তি লৈরবা ভারত অমা শেমগৎনবা ৱারেপ অসি মপুং ফাহনগনি। মসি মশা-মরোমদোম লেপচবা অমসুং চাউখৎলবা ভারত অমা ওইহন্নবগী লম্বীনি।

মরুপশিং,

কোবিন্দজীগী মশানা ইজবা পুন্সি ৱারী অসি অসিগুম্বা নহারোলগী ফোর্স অমা শেমগৎপদা মথৌ তাবা ইথিলগী মরুওইবা সোর্স অমা ওইনা মথৌ তৌবা য়াই।

মরুপশিং,

কোবিন্দজীনা মহাক্কী পুন্সি ৱারীদা মোরাজী ভাই দেসাইগা লোয়ননা মহাক্কী এক্সপরিয়েন্সশিং – মহাক্কী নুংদা লৈরিবা লৈবাক্কী সেবা তৌবগী ৱাখল্লোন, মোরাজী ভাইগা লোয়ননা থবক তৌরিঙৈদা মহাক্না তমশিনখিবা পারাশিং অমসুং লম্বীগী মতাংদা শন্দোক্না তাক্লি। কোবিন্দজীনা রাজনিতী অমসুং খুন্নাইগী থবকশিংবু খনখি। মহাক্না মহাক্কী মথৌদা পুক্নিং চংখি, অমসুং সেবা অসি মহাকপু লমজিংলিবা মিসন ওইহনখি। পার্লিয়ামেন্ততা মহাক্কী তেনরগী মতম অসি মসিগী খুদম অমনি, অমসুং মহাক্না গবর্নর ওইরিঙৈ মতমদা মহাক্না ফিদম্নফম ওইরবা স্তেন্দর্দ অমা শেমখি। থামহাক্কী প্রসিদেন্সী মনুংদা ঐখোয়না হনবা লৈতবা থৌদাং লৈবগী ৱাখল্লোন অদু উবা ফংখি। রাস্ত্রপতিগী খ্বাইদগী ৱাংবা ওফিসতগী রিজাইন তৌখ্রবা মতুংদসু মহাক্না লেপখিদে; মহাক্না “ৱান নেসন, ৱান ইলেক্সন”গুম্বা মরুওইবা ইসুশিংদা থবক তৌরি। মহাক্না লৈবাক শীনবা থুংনা এৱেরনেস হেনগৎহনখি। হায়রিবা ৱাফম অসিগী ৱারোইশিন অমা পুরকপা অসিনা লৈবাক অসিগী দেমোক্রেঈগী অনৌবা চেপ্তর অমা হৌদোকপা ঙমগনি। ঐহাক্না থাজৈ মদুদি লৈবাক অসিগী মীয়াম্না কোবিন্দজীগী থৌদাং অমসুং সেবাগী ৱাখল্লোনদগী তমশিনবা য়াবা কয়া অমা লৈ।

মরুপশিং,

পব্লিক লাইফতা এক্তিব ওইনা লৈরগা ওতোবাইওগ্রাফী ইবদা মতম ফংবা হায়বসি য়াম্না অরুবা অমনি। কোবিন্দজীনা ঐখোয় পুম্নমক্কীদমক থবক অসি পাংথোকখ্রে, মরমদি মহাক্কী পুন্সিদা লায়রবশিং অমসুং শোত্থরবা কাংলুপকী মীওই কয়ানা মখোয়গী পুন্সিগী মমি অমা উবা ফংলি। মসিনা তাক্লি মদুদি অৱাবা কয়া থেংনরবসু মতৌ করম্না অচম্বা ইমুং অমনা ইকায় খুম্নবা অমসুং পুকশেল শেংবা মতৌদা কম্প্রোমাইজ তৌবা য়াদে; মতৌ করম্না ৱাখল্লোনশিং অসি ঐখোয়গী পুন্সিগী য়ুম্ফম ওইরকই; মতৌ করম্না অৱাবা মতমদা ঙাক্তুনা থম্বা ভেল্যুশিংনা ঐখোয়গী পুন্সিগী লম্বীদা মঙাল পীরি; অমসুং মতৌ করম্না মসিগী অশেংবা গুন অসিনা লৈবাক্কী সেবা তৌবদা ঐখোয়দা শক্তি পীরি। তোঙান তোঙানবা ওফিসশিংগী থৌদাংশিং লৌদুনা কোবিন্দজীনা মতম পুম্নমক্তা খুন্নাই অসিদা ইথিল পীদুনা লাক্লি।

মরুপশিং,

কোবিন্দজীগী মশানা ইজবা পুন্সি ৱারী অসিনা মহাক্কী পুন্সিগী মরুওইবা থৌদোকশিং খক্তা নত্তনা ঐখোয়গী দেমোক্রেসীগী পুৱারীগী মরুওইবা তাঙ্ককশিংসু ঙাকশেন্দুনা থমগনি হায়না ঐনা থাজবা থম্লি। ঐহাক্না অমুক্কা হন্না মহাক্কী মশানা ইজবা পুন্সি ৱারী অসিগীদমক য়াইফ-পাউজেল পীজরি। ঐহাক্না অখন্ননা নহা ওইরিবা মীরোলশিংবু – ঐখোয়না ‘রিল’ অমসুং সোসিএল মীদিয়াগী মতম অসিদা হিংলি, মফম অসিদা ইনফ্লুয়েন্সরশিংনা অদোমবু তোঙান তোঙানবা মাইকৈশিংদা হুমদুনা পুরি – করিগুম্বা অমা নীংশিংনবা হায়জরি। রেলৱে স্তেসনশিংদা, ফুতব্রিজ শীজিন্নবগী মহুত্তা রেলদা হৈনবী ওইনা চোংদুনা চৎপা মীওইশিং তোইনা উবা ফংখি: “শোর্তকৎ অমনা অদোমবু তেনশিনহনগনি”। করিগুম্বা কনাগুম্বা অমনা অসিগুম্বা শোর্তকৎকী ৱাংমদা মশাগী মীৎয়েং পাকথোক চাউথোকহন্নবা পাম্লবদি, ঐহাক্না নহা ওইরিবা মীওইশিংদা মখোয়দা মশানা ইজবা পুন্সি ৱারী অসিবু পান্নবা হায়জরি। মশানা ইজবা পুন্সি ৱারীনা অখন্নবা মতম অমগী পুৱারীগী থৌদোকশিংগী তোপ তোপ্পা মীৎয়েং অমা পীরি, মসিনা পারিবা মীবু পুৱারীগী মতম অদুগা য়াম্না নকশিন্নহল্লি। মরম অদুনা, কোবিন্দজীনা থবক অসিদা হোৎনরিবা অসিনা তুংগী মীরোলশিং, অমসুং মরুওইনা নহারোলশিংদা কান্নবা ফংলগনি হায়না ঐহাক্না থাজবা থম্লি। ঐহাক্কী য়াইফ-পাউজেল পীজরি অমসুং থাগৎপা ফোংদোকচরি।

*****