ভারতকী প্রধানমন্ত্রী

মহাক্কী উজবেকিস্তান খোঙচৎকী শরুক অমা ওইনা, ঙসি প্রধান মন্ত্রী শ্রী নরেন্দ্র মোদীনা উজবেকিস্তানগী রাষ্ট্রপতি সাভকাত মিরজিয়োয়েফকা ওফিসিএল ওইনা ৱারি শানখ্রে। কুকসারোই প্রসিদেন্সিএল পেলেসতা থুংলবদা, রাষ্ট্রপতি সাভকাত মিরজিয়োয়েফনা প্রধান মন্ত্রী তরাম্না ওকখি অমসুং চৎনবীগী মতুংইন্না ওকপগী থৌরম অমা পাংথোকখি। মখোয়গী ৩৫শুবা নিংতম্বা নুমিৎ থৌরমদা মহাক্না উজবেকিস্তান্দা য়াইফ পাউজেল পীখি।

ললোন-ইতিক, শেন থাদবা, ইন্নোবেসন অমসুং ষ্টার্দঅপ, দিজিতেল পব্লিক ইনফ্রাষ্ট্রকচর অমসুং য়ু.পি.আই, ঙাক-শেন অমসুং সেকুরিতি, অনা-লাইয়েং অমসুং হিদাক-লাংথকশিং, মরুওইবা মিনরেলশিং, লৌউ-শিংউ, লাইরিক-লাইশু, তুরিজম, স্পেস অমসুং মীগা মীগা চৎথোক-চৎশিন তৌনবা য়াওনা তোঙান তোঙানবা হিরমশিংদা মীহুৎ কাংবুগী থাক্ত লুচিংবা অনিনা পাক-শন্না অমসুং কুপ্না খন্ন-নৈনখি। উজবেকিস্তান্দগী ভারত্ত মতম শাংনা য়ুরানিয়ম পীনবা থৌরাং খুমাঙচাউশিনবদা প্রধান মন্ত্রীনা থাগৎপা ফোঙদোকখি অমসুং ক্রিতিকেল মিনরেলশিংদা মতেং পাংনবা হেনগৎহনবগী মরুওইবা অমুক হন্না খন্নখি। ইন্দিয়া-উজবেকিস্তান ষ্ট্রাতেজিক পার্তনরশিপ অসি কমপ্রেহেন্সিপ ষ্ট্রাতেজিক পার্তনরশিপ অমদা পুখৎপদা মখোয়না য়ানরে। ২০৩০ ফাওবগী মনুংদা লৈবাক অনিগী ললোন-ইতিক য়ু.এস.দি বিল্লিয়ন ৫ য়ৌহন্নবা পান্দম অমা থম্বদা মখোয়না য়ানাআরে অমসুং হিরম অসিগী মতাংদা শেন-থুম অমসুং শেন থাদবগী মরীশিং ফগৎনবা ব্যুজিনেস সস্মিৎ অমা পাংথোক্নবা খন্নখি। কমপ্রেহেন্সিপ ষ্ট্রাতেজিক পার্তনরশিপ কান্নবা মওং অমদা পুখৎনবা, ফোরেন মিনিষ্টরশিং থাক্কী থবক অমা পায়খৎনবা অমসুং মিনিষ্ট্রি থাক্ত ইন্তর-গভর্নমেন্ত কম্মিসন অমা শেমগৎনবা লুচিংবশিংনা য়ানরে।

অরিবা সভেত্যগী মরীশিং লুচিংবশিংনা খন্নখি অমসুং মরী অসি হেন্না ফগৎনবা হৌজিক লৈরিবা মীগা মীগা লৈনবা মরীশিং মখা চৎথনবা খন্নখি। হিরম অসিগী মতাংদা, উজবেকিস্তান্দা য়োগ পাম্নবদা প্রধান মন্ত্রীনা থাগৎপা ফোঙদোকখি। ঙসি, মহাক্না উজবেকিস্তানগী য়োগ ফেদেরেসন্না শীনবা য়োগ শান্নবা থৌরম অমা য়েংখি। হান্নগী প্রধান মন্ত্রী লাল বহাদুর সাস্ত্রি লৈখিদবগী চহি ৬০শুবা কুমওন পাংথোক্নবা, উজবেক মহৈরোয়শিংগীদমক হিন্দী লোলগী লাল বহাদুর সাস্ত্রি স্কোলারশিপ প্রধান মন্ত্রী মোদীনা লাউথোকখ্রে। উজবেকিস্তানগী “য়াসিল মেকোন” গী থবক অমসুং ভারতকী “এক পের মা কে নাম” থবক অনিগী মরক্ত লৈরিবা মান্নবা পল্লদুনা, অরাল সি লমদমদা হৌজিক চৎথরিবা উ থাবগী থৌরম অসিদা য়ু.এস.দি মিল্লিয়ন অমগী গ্রান্ত পীদুনা ভারতনা উজবেকিস্তানগা পুন্না থবক তৌমিন্নগনি হায়না প্রধান মন্ত্রীনা লাউথোকখ্রে। লুচিংবা অনিনা পেলেস গার্দেন্দা উ পাম্বী অমা পুন্না থামিন্নখি।

ৱারি শানরবা মতুংদা, নাৎ, অৱাংবা থাক্কী লাইরিক-লাইশু অমসুং থিজিনবা, কেপাসিতি বিল্দিং, অর্কাইবস, শেন-থুমগী থবক পুন্নবা পায়খৎমিন্নবা, মহৌশাগী অকোয়বগী ফিবম, তুরিজম, মাইনিং, অয়ুর্বেদ অমসুং রাজ্যশিংগা মরী লৈনবগী হিরমশিং য়াওনা তোঙান তোঙানবা হিরমশিংদা এম.ও.য়ুশিং অমসুং এগ্রিমেন্তশিং নাকল অনিনা খুৎশীনবদা লুচিংবশিং শরুক য়াখি। উজবেকিস্তানগী তেরমেজদা লৈবা ফায়াজ তেপা অমসুং করা তেপাগী অরিবা বুদ্ধগী মফমশিং ঙাক-শেন্নবা অমসুং শেমজিন্নবা ভারতকী মপান থৌরম মন্ত্রলয় অমসুং উজবেকিস্তানগী কলচরেল হেরিতেচ এজেন্সিগী মরক্ত লেত্তর ওফ ইন্তেন্ত অমা লৈনরে। তাস্কেন্ত ষ্টেৎ য়ুনিভর্সিতি ওফ ওরিয়েন্তেল ষ্টদিজদা আই.সি.সি.আর সংস্কৃত চিয়ার লিংখৎপদা য়ানরে। এম.ও.য়ুশিং অমসুং এগ্রিমেন্তশিংগী মপুংফবা লিষ্ট মফম অসিদা উবা ফংগনি।

প্রধান মন্ত্রী ইকায়খুম্নবা উৎপা ওইনা রাষ্ট্রপতি সাভকাত মিরজিয়োয়েফনা চাক্লেন অমা শীনখি। মহাক্না তরাম্না ওকপগীদমক প্রধান মন্ত্রীনা রাষ্ট্রপতি সাভকাত মিরজিয়োয়েফ থাগৎপা ফোঙদোকখি অমসুং মহাক ভারত্ত লাক্নবা চেপাউ পীখি।

***