ভারতকী প্রধানমন্ত্রী

য়োর এক্সিলেন্সী, রাস্ত্রপতিজী,
লৈবাক অনিমক্কী মীহুৎশিং,
মীদিয়াগী মরুপশিং,

খুরুমজরি!

ভারত্তা স্বিৎজর্লেন্দগী রাস্ত্রপতিবু তরাম্না ওকপদা ঐহাক য়াম্না নুংঙাইবা ফাওই।

অহানবদা, ঐহাক্না ভারত-স্বিৎজর্লন্দগী মরীশিংদা মহাক্কী অচেৎপা থাজবা অদু থাগৎপা ফোংদোকচরি। হৌখিবা চহিগী ওক্তোবরদা, মহাক্না হকথেংননা মতেং পাংবগা লোয়ননা, ঐখোয়না ভারত অমসুং য়ুরোপিয়ন ফ্রী ত্রেদ এসোসিয়েসন (ই.এফ.তি.এ.) লৈবাকশিংগী মরক্তা পুৱারী ওইরবা ত্রেদ অমসুং ইকোনোমিক পার্তনরশিপ এগ্রীমেন্ত অমা ইমপ্লিমেন্ত তৌখি। মসি য়ুরোপকী ইকোনোমিক ব্লোক অমা হেক্তগা লোয়ননা ভারতকী অহানবা এফ.তি.এ.নি।

মসি ইনভেস্তমেন্ত, ইন্নোবেসন, থবক পীবা অমসুং শেয়র তৌরবা চাউখৎপগীদমক পান্দমগীদমক ব্লুপ্রিন্ত অমসুনি। মসিগী খুত্থাংদা, ঐখোয়না মথংগী চহি ১৫দা ভারত্তা বিলিয়ন ১০০গী ইনভেস্তমেন্ত তৌনবা অমসুং হকথেংননা থবক মিলিয়ন অমা ফংহন্নবা পান্দম থম্লি।
 

মরুপশিং,

ভারত অমসুং স্বিৎজর্লেন্দগী মরক্তা লৈনরিবা মরুপ-মপাং ওইবগী মরী অসি চহি চা কয়াদগী লৈরক্লি। ১৯শুবা চহি চাদা, স্বামী বিবেকানন্দনা স্বিস অলপ্সতা হিমালয়াগী উবা ফংখি। মহাত্মা গান্ধীসু স্বিৎজর্লেন্দদা মতম কুইনা লৈরম্মি অমসুং মফম অদুগী মীয়ামগা ৱারী শানরম্মি। পুৱারী ওইরবা খোংচৎশিং অসিগী নীংশিং মমিশিংনা ঐখোয়গী মরুপ ওইবগী মরীদা ঙসি ফাওবা মরী তারি।

ঙসিদি, ইন্নোবেসন, ইনফ্রাস্ত্রকচর অমসুং এদভান্স তেক্নোলোজী অসি ঐখোয়গী পার্তনরশিপকী মপাঙ্গল কনবা য়ুম্বীনি। ঙসিগী মীফম অসিগী খুত্থাংদা, ঐখোয়না ঐখোয়গী পার্তনরশিপ অসিদা অনৌবা ইনোৎ অমা পীরগনি অমসুং অনৌবা অৱাংবা থাক্তা পুখৎকনি।

মরুপশিং,

ঐখোয়না ভারতকী এক্সপোর্তশিংবু স্বিৎজর্লেন্দদা মার্কেৎ এক্সেস হেনগৎহন্নবা অমসুং লৈবাক অনিগী মরক্তা ইনভেস্তমেন্ত হেন্না লায়থোকহন্নবা মরুওইবা ৱারেপ কয়া লৌখ্রে।

মসিনা ভারতকী লৌউ-শিংউগী পোত্থোকশিং, ফার্মাস্যুতিকেল্স, তেক্সতাইল অমসুং ইঞ্জিনীয়রিংগী পোৎলমশিং স্বিৎজর্লেন্দদা থাদোকপদা মতেং পাংগনি। মসিগা লোয়ননা ঐখোয়না ভারতকী মরুওইবা সেক্তরশিং হায়বদি বাইওতেক্নোলোজী, লাইফ সাইন্স, বেঙ্কিং, ইন্সুরেন্স, ফুদ প্রোসেসিং অমসুং সস্তেনেবিলিতীদা অনৌবা স্বিস ইনভেস্তমেন্তশিংসু পুক্নিং চিংশিল্লগনি। খোঙথাংশিং অসিগী খুত্থাংদা ঐখোয়না থাজবা য়াবা সপ্লাই চেনশিং অমসুং মালেমগীদমক থাজবা য়াবা সোলুসনশিং শেমগৎনবা পুন্না থবক তৌমিন্নগনি।

মরুপশিং,

ঙসি ঐখোয়না মিলিতরী একচেঞ্জ অমসুং দিফেন্স প্রদক্সনদা পুন্না থবক তৌমিন্নবগী অনৌবা খুদোংচাবশিং মশক খঙদোক্লে। ঐখোয়না ন্যুক্লিয়র ইনর্জীদা মখা তানা মতেং পীননবা য়ানখি।

বরাাসীগী রোপৱে, নোইদাগী জেৱার এয়রপোর্ত, অমসুং চীংগী লমশিংদা রেলৱে অমসুং তনেলগী প্রোজেক্তশিং অসি ঐখোয়গী ইনফ্রাস্ত্রকচর কোওপরেসনগী মশক থোকপা খুদমশিংনি। অসিগুম্বা তেংবাং পীনবা অসিবু হেন্না মপাঙ্গল কনখৎহন্নবা, ঙসি ঐখোয়না ত্রান্সপোর্ত, মোবিলিতী অমসুং ইনফ্রাস্ত্রকচরগী মতাংদা এগ্রীমেন্ত অমা খুৎয়েক পীনখ্রে।

ঐখোয়না স্বিৎজর্লেন্দগী ইনফ্রাস্ত্রকচর কম্পনীশিংদা ভারত্তা পাক-শন্না শেন থাদনবা অমসুং কেপাসিতী বিল্দিং, দিজাইন অমসুং মেন্যুফেকচরিংদা শরুক য়ানবা হায়রি।

মরুপশিং,

সাইন্স অমসুং তেক্নোলোজীগী লমদা তেংবাং পীনবা অসিসু ঐখোয়গী পার্তনরশিপকী মপাঙ্গল লৈবা য়ুম্বী অমনি। হকশেল, ক্লিন ইনর্জী অমসুং স্পেসকুম্বা মরুওইবা লমশিংদা ঐখোয়না অথুবা মতমদা অনৌবা জোইন্ত রিসর্চ প্রোজেক্তশিং হৌদোক্কনি হায়বসিদা ঐহাক য়াম্না নুংঙাইবা ফাওই। ভারতকী সাইন্স স্তার্ত-অপশিংগী কেপাসিতী শেমগৎনবা জুরিচ য়ুনিভর্সিতীগা লোয়ননা য়ানখিবা অদুসু ঐখোয়না তরাম্না ওক্লি।

স্বিৎজর্লেন্দদা য়োগ অমসুং আয়ুর্বেদ মীয়াম্না পাম্নবা হেনগৎলক্লিবা অসি য়েংলগা, লমশিং অসিদা মতেং পীনবা হেনগৎহন্নবগী মতাংদা ঙসি ঐখোয়না কান্নরবা খন্ন-নৈনবগী থৌরম অমা পাংথোকখি।

মরুপশিং,

মীগা মীগা লৈনরিবা মরী অসি ঐখোয়গী পার্তনরশিপকী খ্বাইদগী চাউবা মপাঙ্গলনি। ঙসি খুৎয়েক পীনখিবা মাইগ্রেসন অমসুং মোবিলিতী পার্তনরশিপ এগ্রীমেন্ত অমসুং য়ং প্রোফেস্নেল এগ্রীমেন্তনা ভারতকী মহৈরোইশিং, রিসর্চরশিং, প্রোফেস্নেলশিং অমসুং নহাশিংদা স্বিৎজর্লেন্দদা অনৌবা খুদোংচাব কয়া অমা ফংহল্লগনি।

মরুপশিং,

ভারত অমসুং স্বিৎজর্লেন্দ অনিমক্না দিমোক্রেসীগী মগুনশিং, আইনগী কাংলোনশিং, দাইলোগ অমসুং দিপ্লোমেসীদা থাজবা থম্লি। মালেমগী শান্তি অমসুং তংদু লৈতাবা পুরক্নবা ঐখোয়না পুন্না থবক তৌমিন্নগনি।

য়ুক্রেন ওইগেরা নৎত্রগা নোংচুপ এসিয়া ওইগেরা, ভারতনা শান্তিগী মায়কৈদা চঙশিল্লিবা খোঙথাং খুদিংমক্তা মতম পুম্নমক্তা মতেং পাংদুনা লাক্লি।

মালেমগী থাক্তা হেনগৎলক্লিবা শিংনবশিং অসি থেংননবা মালেমগী থাক্তা লৈরিবা ইন্সতিত্যুসনশিংদা রিফোর্মশিং পাংথোকপা অসি তঙাইফদে হায়নসু ঐখোয়না য়ানরে।

মরুপশিং,

অচৌবা বিজিনেস দেলিগেসনগা লোয়ননা ভারত্তা লাকপগীদমক ঐহাক্না স্বিৎজর্লেন্দগী রাস্ত্রপতিদা থাগৎপা ফোংদোকচরি। ওক্তোবর ৭তা, মহাক্না শরুক য়াদুনা, ঐখোয়না ইন্দিয়া-ই.এফ.তি.এ.গী বিজিনেস লিদরশিংগা লোয়ননা “প্রোস্পেরিতী সম্মিৎ” পাংথোক্কনি। মীফম অসিনা ঐখোয়গী ত্রেদ অমসুং ইনভেস্তমেন্ত পার্তনরশিপকী অচেৎপা মহৈশিংদা ওন্থোক্নবা মরু ওইবা প্লেৎফোর্ম অমা ওইগনি। সম্মিৎ অসিদা শরুক য়ারিবা বিজিনেস লিদর পুম্নমক্তা ঐহাক্না য়াইফ-পাউজেল পীজরি।

য়োর এক্সলেন্সী,

চহি অসিগী ফেব্রুৱারীদা, ভারতনা মালেমগী খ্বাইদগী চাউবা এ.আই. সম্মিৎ য়ুম্বু ওইদুনা পাংথোকখি। মথং চহিদা, স্বিৎজর্লেন্দনা জিনেভা এ.আই. সম্মিৎকী খুত্থাংদা খোঙচৎ অসিবু মাংলোমদা পুখৎকনি। জিনেভা এ.আই. সম্মিৎ অসি মাই পাক্না পাংথোক্নবা ঐহাক্না স্বিৎজর্লেন্দদা য়াইফ-পাউজেল পীজরি। ঐহাক্না থাজবা থম্লি মদুদি ঐখোয় পুন্না থবক তৌমিন্নদুনা, এ.আই.বু থৌদাং লৈবা, ইনক্লুসিব ওইবা, অমসুং হ্যুমেন-সেন্ত্রিক ওইহন্নবগী মায়কৈদা মখা তানা থবক তৌমিন্নগনি।

অদোমগী ভারত খোঙচৎকীদমক অমসুং ভারত-স্বিৎজর্লেন্দগী মরীগী অচৌবা সপোর্তর অমা ওইবগীদমক অমুক্কা হন্না অদোমবু থাগৎচরি।

খঙহঞ্জবা: মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***