ভারতকী প্রধানমন্ত্রী

মহারাস্ত্রাগী রাজ্যপাল শ্রী জিষ্ণু দেব বর্মাজী, মুখ্য মন্ত্রী শ্রী দেবেন্দ্র ফদনবিসজী, কেন্দ্রগী মন্ত্রীমন্দলদা ঐহাক্কী মরুপ শ্রী মনোহর লালজী, মহারাস্ত্রাগী উপ-মুখ্য মন্ত্রী শ্রী একনাথ শিন্দেজী, শ্রীমতি সুনেত্রা অজিৎ পৱারজী, মন্ত্রী পুম্নমক, পার্লিয়ামেন্তকী মীহুৎশিং অমসুং লেজিস্লেতিব এসেমব্লীগী মীহুৎশিং, অতোপ্পা মীয়ামগী মীহুৎশিং, অমসুং পুনেগী ঐহাক্কী নুংশিরবা ইচিল-ইনাওশিং!

দিৱালী নকশিল্লক্লে। অহানবদা ঐহাক্না দিৱালীগীদমক ময়ামগী মফমদা থম্মোয়দগী য়াইফ-পাউজেল পীজরি!

মরুপশিং,

মীয়ামগী পুন্সিদা অনৌবা খুদোংচাবা অমা হাপচিল্লকপা মতমদা কুহ্মৈশিংগী নুংঙাইবা অসি হেন্না চাউই। ঙসি অসি পুনেগী মীয়ামগীদমক্তা য়াম্না নুংঙাইবা নুমিৎ অমনি। পুনে মেত্রোগী অতোপ্পা লাইন অমা ঙসি শঙ্গারিবা অসিদা ঐহাক নুংঙাইবা ফাওই। চহি ১০গী মমাংদা, ঐহাক্না পুনেদা প্রোজেক্ত অসিগী অহানবা ফেজকী উরেপ উয়ুং তম্বগী খুদোংচাবা ফংখি। হিঞ্জাৱারী অমসুং শিবাজীনগরগী মরক্তা হৌজিক হৌরিবা মেত্রোগী খুত্থাংদা পুনেগী মরুওইবা আই.তি. হবশিংগী মনুংদা অমনা অচৌবা কন্নেক্তিবিতী ফগৎহল্লগনি। ঙসি থবক হৌখিবা অনৌবা লাইন অসিনা পুনেগী অরিবা অমসুং অনৌবা শরুকশিংগী মরক্তা কন্নেক্তিবিতী হেন্না মপাঙ্গল কনখৎহল্লগনি। পুনে অমসুং মহারাস্ত্রাগী মীয়াম পুম্নমকপু ঐহাক্না থম্মোয় শেংনা নুংঙাইবা ফোংদোকচরি।

মরুপশিং,

পুনে অসি মতম পুম্নমক্তা লৈবাক অমসুং খুন্নাইদা অনৌবা মায়কৈ অমা পীখিবা ৱাখল্লোনশিংগী মফম অমা ওইদুনা লাক্লি। ঙসিদি পুনেনা বিক্সিত ভারতকী অনৌবা ইনর্জীগী লমজিং-লমতাকসু পীরি। আই.তি., ওতোমোবাইল, ফার্মাস্যুতিকেল্স, স্তার্ত-অপশিং, ইন্নোবেসন অমসুং মেন্যুফেকচরিংদগী হৌরগা পুনে অসি লৈবাক অসিগী নহারোলশিংগীদমক্তা মঙলান অমসুং অপাম্বশিংগী মফম অমনি। অসিগুম্বা ফীভম অসিদা, মফম অসিদা মেত্রো কন্নেক্তিবিতী মপাঙ্গল কনখৎহনবনা পুনে শহর চাউখৎপদা অনৌবা থৌনা অমা পীরগনি।

মরুপশিং,

পুনে মেত্রোগী উরেপ উয়ুং তম্বগী অমসুং পাকথোক চাউথোকহনবগী থৌরম অসিনা ঐখোয়না বিক্সিত ভারতকীদমক্তা শহর কয়া অমা করম্না শেমগৎলিবগে হায়বদু উৎলি। মমাংদা, শহর অমগী আইদেন্তিতী অসি মসিগী ইন্দস্ত্রীশিং, নৎত্রগা মসিগী মমিং লৈরবা চিঞ্জাক, উহৈ-ৱাহৈ, নৎত্রগা মহৈ-মরোংশিংনা তাক্লম্মি। অদুবু ঙসিদি, শহরশিংগী আইদেন্তিতীদা অহেনবা বেঞ্চমার্ক অনি হাপচিল্লে। অহানবদা, শহর অমা করম্না কম্পিতিতিব ওইবগে হায়বসিনি। অনিশুবদা, মসিনা পীরিবা ইজ ওফ লিভিংগী থাক্নি। মেত্রো প্রোজেক্তশিংনা শহর অমা হেক্তগী পেরামিতর অনিমক ফগৎহনবদা মতেং পাংই। পুনে মেত্রো পাকথোক চাউথোক্লকপগা লোয়ননা মসিনা পুনেগী মীয়ামদা মতম কনবা অমসুং হেন্না নুংঙাইবা ফংহল্লি। অমসুং ঐখোয়না পুম্নমক্না খঙই মদুদি শহর অমগী মতম কনবা মতমদা, মসিগী প্রদক্তিবিতী হেনগৎলকই। শহর অমগী প্রদক্তিবিতী হেনগৎলকপা মতমদা, লৈবাক অমগী শেন্মিৎলোনসু খুমাং চাউশিল্লকই। শেন্মিৎলোন চাউখৎলকপা মতমদা, লায়রবশিং অমসুং মিদল ক্লাস অনিমক কান্নবা ফংগনি।

মরুপশিং,

ঙসিগী থৌরম অসিসু প্রো-পিপল, প্রো-এক্তিব ওইবা অফবা লৈঙাক্কী খুদম অমনি। ঐখোয়গী লৈবাক অসিদা অহানবা মেত্রো অসি ১৯৮৪দা মথৌ তৌবা হৌখি। মখা তারকপা চহী কুনথ্রা অসিগী মনুংদা, মেত্রো লাইন কিলোমিতর ২৪৮ খক্তমক শেমখি। কিলোমিতর ২৪৮। ২০১৪ ফাওবদা, লৈবাক অসিগী শহর মঙা খক্তদা মেত্রো সর্বিস লৈরম্মি। হান্নগী ৱাখল্লোন অদুমক মখা চত্থরম্লবদি, হান্নগী সরকার অদুমক লৈরম্লবদি, হান্নগী থবক তৌবগী চৎনবী অদুমক মখা চত্থরম্লবদি, পুনেদা মেত্রো য়ৌনবা চহী তরাগী খুজিং কয়া অমা চঙলমগনি। অদুবু মীয়াম্না এন.দি.এ.দা ২০১৪দা থবক তৌবগী খুদোংচাবা পীবা মতমদা, ঐখোয়না ৱারেপ অমা লৌদুনা মাংলোমদা চংশিনখি। ৱারেপ অদুদি ঐখোয়গী শহরশিংদা লৈরিবা মিদল ক্লাসকীদমক ইজ ওফ লিভিং অমসুং ইজ ওফ ত্রান্সপোর্তেসন হেনগৎহনবনি। ঙসিদি, ঐখোয়না মসিগী মহৈ অদু উবা ফংলি। হৌখিবা চহী ১২ অসিদা লৈবাক অসিদা মেত্রো ত্রান্সপোর্তেসন অসি মপুং ফানা অহোংবা পুরক্লে। ২০১৪দা মেত্রো রুত কি.মি. ২৪৮ লৈরম্বা অদুদগী হৌজিক্তি নেৎৱার্ক অসি চাউরাক্না কি.মি. ১,২০০ ওইরে। ২০১৪দা শহর মঙা খক্তদা মেত্রো সর্বিস লৈরম্বা অদুদগী হৌজিক্তি শহর ২৬তা মেত্রো সর্বিসশিং মথৌ তৌরি। হৌজিক্তি নোংমদা মীওই করোর অমা হেন্না মেত্রোদা চৎলি। ঙসিদি, ভারতকী মেত্রো নেৎৱার্ক অসি মালেমগী খ্বাইদগী ফবা মেত্রো নেৎৱার্ক অহুমগী মনুং চনবা ঙম্লে।

মরুপশিং,

মহারাস্ত্রাগী ফিভম অসি লৈবাক অসিগী অতৈ মফমশিংগা মান্নরমখি। ২০১৪দা এন.দি.এ.গী দবল-ইঞ্জিন সরকার অহানবা ওইনা শেমখিবা মতমদা, মহারাস্ত্রাদা কিলোমিতর ১০.১১ রোমগী মেত্রো লাইনশিং মথৌ তৌখি। ঙসিদি, মহারাস্ত্রাদা কিলোমিতর ১৭৫ রোম শাংবা মেত্রো লাইনশিং মথৌ তৌরি। কিলোমিতর ৬৮০ হেন্না শাংবা মেত্রো কোরিদোরশিংদা থবক পায়খৎলি। ঙসিদি, মহারাস্ত্রাগী মেত্রো ইনফ্রাস্ত্রকচর খক্তদা লুপা করোর লাখ ২.৫ হেনবগী ইনভেস্তমেন্ত তৌরি। শেনফম অসি শিন্মীশিংগী পোকেৎশিংদা চংলি। শেনফম অসিনা ইঞ্জিনীয়রশিংদা থবক পীরি। শেল অসিনা দুকান অমসুং ফেক্তরীশিংদা থবক পীরি।

মরুপশিং,

মসিগী মেত্রো প্রোজেক্ত অসি অতোপ্পা মরম অমদগীসু অখন্নবা ওই। হায়রিবা মেত্রো লাইন অসি পি.পি.পি. মোদেল অমদা শাগৎলি। হায়বদি, মসি সরকার অমসুং প্রাইবেৎ সেক্তরগী পুন্না হোৎনদুনা শেমগৎপনি। মসি চাউখৎ-থৌরাংগী মোদেল অমনি, মসিগী মাইপাকপা অসিনা লৈবাক অসিগী খুমাং চাউশিল্লকপা হেনগৎহনগনি।

মরুপশিং,

ঙসি ভারতকী নাগরিক খুদিংমক, ভারতকী নহা ওইরিবা মচানুপা অমসুং মচানুপী খুদিংমক্না বিক্সিত ভারত অমা শেমগৎনবা মপুং ফানা হোৎনরি। ঙসিদি মীপুম খুদিংমক্না থাজবগা লোয়ননা হায়রি: ঐখোয়না মসি পাংথোক্কনি। ঐখোয়না মসি পাংথোক্কনি। অসিগুম্বা ৱাখল্লোন অসি লৈবাক শিনবা থুংনা লৈরি। হৌখিবা চহি ১২ অসিদা, লৈবাক অসিগী ইনর্জী অসি খুঙ্গংগী লম্বীশিং, হাইৱেশিং, এক্সপ্রেসৱেশিং, অনৌবা রেলৱে লাইনশিংগী ইলেক্ত্রিফিকেসন, অশাংবা তনেলশিং অমসুং অৱাংবা থোংশিংদা উৎখ্রে। লৈবাক শিনবা থুংনা প্রোজেক্ত অমসুং স্কিম কয়া অমা শেমগৎলি। লাক্কদৌরিবা চহিশিংদা, মসিগা লোইননা লৈবাক অসিনা মসিগী শহরশিং অসি মালেমগী খ্বাইদগী ফবা শহরশিংগী মরক্তা লৈহন্নবা হোৎনগনি।

মরুপশিং,

ঐখোয়গী শহরশিং অসি হিংনবগী মফম খক্তা নত্তে। মখোয় অসি ইকোনোমিক এক্তিবিতীগী মরু ওইবা মফমশিংসু ওইরি। ঐখোয়না লৈবাক শীনবা থুংনা লৈরিবা অপীকপা শহর চা কয়াবু চাউখৎপগী হবশিংদা ওন্থোক্কদবনি। হায়রিবা মীৎয়েং অসিগা লোয়ননা অর্বান চেলেঞ্জ ফন্দ অসি চহী অসিগী ফেব্রুৱারীদা অয়াবা পীখি। কেন্দ্র সরকারনা ফন্দ অসিগীদমক লুপা করোর লাখ ১গী তেংবাং পীরি। লাক্কদৌরিবা চহিশিংদা লৈবাক অসিগী শহরশিংদা লুপা করোর লাখ কয়াগী ইনভেস্তমেন্ত লাকহন্নবা পান্দম থম্লি। ঐহাক্না লোকেল বোদীশিং, প্রাইবেৎ সেক্তরদা লৈরিবা ঐখোয়গী মরুপশিং অমসুং অতোপ্প পুম্নমকপু মাংলোমদা চংশিন্নবা হায়জরি। ঐখোয় পুম্নমক্না মিসন মোদতা থবক তৌগদবনি। মসিগী হোৎনবদা মহারাস্ত্রানা মসিগী থৌদাং অসি মখা তানা পাকথোক চাউথোকহল্লগনি হায়না ঐনা থাজবা থম্লি।

মরুপশিং,

ঙসি মালেম পুম্বদা ভারতকী মরমদা খন্ন-নৈনরিবা অসিগী অতোপ্পা মরম অনি অমসু লৈরি। অহানবদা, মালেমগী অরুবা ফীভমশিং লৈরবসু ভারতনা মালেমদা খ্বাইদগী য়াঙনা চাউখৎপগী চাং ঙাক্না চৎলি। অনিশুবদা, চহী ১০দগী ১২ ফাওবগী মনুংদা, ভারতকী মীওই করোর ৫০না কা হেন্না লায়রবদগী থোরকপা ঙমখ্রে। ৱাফম অসি ৱার্ল্দ বেঙ্ককী খ্বাইদগী নৌবা রিপোর্ত্তা ফোংদোকখ্রে। লৈবাক অসিদা লৈবা মীরোল কয়া অমা লায়রবা মুত্থৎনবা হায়বগী অচেৎপা ৱাশকশিং অমসুং লাউথোকপশিংগা লোয়ননা চাউখৎখি। মমাংদা, লায়রবা লান্থেংনবা অসি স্লোগান খক্তদা লৈরম্মি। ঙসিদি, ভারতনা লায়রবা অসি মাইথিবা পীখ্রে।

মরুপশিং,

ঙসিদি, ভারত অসি খ্বাইদগী থুনা চাউখৎলক্লিবা ইকোনোমী অমসুং খ্বাইদগী থুনা লায়রবা হন্থরক্লিবা লৈবাক অমা ওইরে। মসিগী মাইপাকপা অনি অসি অমগা অমগা মরী লৈনৈ। ভারতকী শেন্মিৎলোন য়াম্না থুনা চাউখৎলি। ভারতকী বজেৎ অসি হেনগৎলক্লি। মীয়ামদা শেল থাদবা হেনগৎলক্লি। হান্ননা স্কেম, ফেভরিতিজম, অমসুং লিকেজকী খুত্থাংদা মাংখিবা শেল অদু হৌজিক বেনিফিসরীশিংদা হকথেংননা য়ৌরে। লৈবাক্কী রিসোর্সশিং অসি লম্বী, রেলৱেজ, এয়রপোর্ত, অমসুং মেত্রো সিস্তেমশিংদা শেল থাদরকপা মতমদা, সরকারনা ইলেক্ত্রিসিতী, ঈশিং অমসুং গ্যাস পাইপলাইনশিংদা শেল থাদরকপা হেনগৎলকপা মতমদা, মীয়ামগী পুন্সি ফগৎলকই অমসুং থবক্কী খুদোংচাবসু হেনগৎলকই।

মরুপশিং,

লায়রবশিংগীদমক য়ুম, তোইলেৎ, য়ুমথোং খুদিংগী থক্নবা ঈশিং অমসুং গ্যাস কন্নেক্সনগুম্বা খুদোংচাবশিং অসিনা মীয়ামগী থাজবা হেনগৎহল্লি অমসুং মখোয়গী মতম কনবা ঙমহল্লি। অমসুং মসিগী কনবা ঙম্লবা মতম অসি মখোয়গী ইমুং মনুংগী অহেনবা শেন্থোক ফংনবগীদমক্তা শীজিন্নরি।

মরুপশিং,

মমাং থাদা, অদোমগী য়াইফ-মঙ্গোলগা লোয়ননা, ঐহাক্না সরকারগী মকোক ওইরকপা চহী ২৫ মপুং ফারকখি। ঐখোয়গী সরকারগী মোতো অসি মতম পুম্নমক্তা ওইদুনা লাক্লি মদুদি করিগুম্বা নহাক্না লায়রবশিংবু শক্তি পীরবদি, লায়রবশিংনা লায়রবদগী লাপথোক্নবগী থৌনা ফংগনি। ঐহাক্না নীংশিংলি মদুদি ঐহাক গুজরাতকী মুখ্য মন্ত্রী ওইরিঙৈদা, ঐহাক্না গরীব কল্যান মেলাগী চৎনবী অসি ৱাখল্লোন অসিগা লোয়ননা হৌদোকখি। থৌরমশিং অসিনা লায়রবশিংদা হকথেংননা য়াইফ-থৌরাংগী স্কিমশিং ফংহনবদা মীৎয়েং থমখি। লায়রবশিংবু স্তেজতা কৌখৎখি। মখোয়না লায়রবগী মায়োক্তা চংশিনবা অমসুং অনৌবা থাজবগা লোয়ননা য়ুমদা হল্লক্নবা অচেৎপা ৱাফম থমখি।

মরুপশিং,

চহী ২৫গী মমাংদা ঐহাক্না হৌদোকখিবা থবক অসি ঙসি ফাওবা লেপ্পা লৈতনা চৎথরি। মসিবু ঐহাক্না পাৱর তু এম্পাৱর কৌই। পাৱর তু এম্পৱর হায়বসিদি অশেংবা অফবা লৈঙাকপা অমনি। মসিগী অহোংবা অসি নোংমা খক্তদা থোকখিদে। মমাংগী লৈঙাকশিংনা স্লোগানশিং লৌবা খক্তদা চোকথখি। ঐখোয়না লিঙ্ক খুদিংমক শম্নহল্লে। ঐখোয়না পুন্না পুন্না পুন্সি লাখ কয়াগী মঙলানশিং শাগৎখি। মসি চহী কয়াগী মতুং ইন্না খন্ন-নৈনরবা অমসুং নীংথিনা থৌরাং তৌরবা হোৎনবগী মহৈনি। অমসুং মসিনা মরম ওইদুনা ভারত মচা করোর ৫০না লায়রবা কোকহনবা ঙমখি।

মরুপশিং,

লায়রবা মশিং হন্থরকপা মতমদা, কান্নবা অসি লায়রবা মশিং হন্থরকপা ইমুংশিং খক্তদা য়ুম্ফম ওইদে। মসিনা লৈবাক অসিগী শেন্মিৎলোনদা অনৌবা ইনর্জী পীরি। মসিনা অনৌবা মিদ্দল ক্লাস অমা শেম্মি। নিও-মিদ্দল ক্লাস অসিনা অনৌবা মঙলানশিং পুরক্লি। মসিগী পোৎ-চৈ লৈবগী পাঙ্গলনা কৈথেলশিংবু লমজিংলি। দুকানশিংদগীনা ফেক্তরীশিং ফাওবদা অনৌবা খুদোংচাবশিং থোরকখি। অতোপ্পা ৱাহৈ অমদা হায়রবদা, ভারত্তা লায়রবা হন্থরকপনা ভারতকী শেন্মিৎলোনবু অনৌবা থাক্তা পুখৎলি।

মরুপশিং,

বিক্সিত ভারতকী মায়কৈদা চংশিল্লিবা খোঙচৎ অসিদা, ঐখোয়গী লৌমীগী ইচিল-ইনাওশিংসু অচৌবা থৌদাং অমা লৌরি। মরম অদুনা, ঐখোয়গী সরকারনা লৌমীশিংবু লেপ্পা লৈতনা মপাঙ্গল কনখৎহল্লি। অদুম ওইনমক, মহারাস্ত্রাদা ফীভম ফত্তবনা মরম ওইদুনা, লৌমীশিংগী ইমুং কয়া অমা হৌজিক অৱাবা কয়া মায়োক্নরি। হৌখিবা চহী খরা অসিদা, দেবেন্দ্র ফদনাভিসজীগী লুচিং মখাদা ঈশিং কঞ্জার্বেসনগী মতাংদা থবক কয়া পায়খৎলে। অদুবু হায়রিবা মহৌশাগী অৱাবা অসিনা অচৌবা শীংনবশিং থোকহল্লি। ঐহাক্না মহারাস্ত্রাগী লৌমী মচা-মশু খুদিংমক্তা থাজবা পীবা পাম্মি মদুদি অরুবা মতম অসিদা এন.দি.এ. সরকারনা মপুংফাবা সেন্সিতিবিতী অমসুং কম্মিৎমেন্ত অমগা লোয়ননা মখোয়গা লোয়ননা লেপ্পা লৈতনা লৈরি। মহারাস্ত্রাগী ঈকংগী ফীভম অসি ঐহাক্না খঙই। রাজ্য সরকারনা মাংজৌননা মতেংসু পীখ্রে। ঐহাক্না পি.এম.-কিসান ফন্দশিং ত্রান্সফর তৌখ্রে। চানবীদুনা ৱাখল ৱাবা তৌবীগনু। ঐখোয়না লৌমী খুদিংমক্কীদমক লেপ্লি।

মরুপশিং,

লৈবাক অসিগী মীয়ামদা ঐহাক্না হায়জনীংবদি মসি হরাও কুহ্মৈগী মতমনি। ঐখোয়না ঐখোয়গী লৌমী ইচিল-ইনাওশিংবু নীংশিংগদবনি। ঐখোয়না দিৱালীগী নুংঙাইবা অসি মখোয়গী ময়ুমদসু লৈহন্নবা হোৎনগদবনি। মসি ঐখোয়গী সোসিএল রেস্পোন্সিবিলিতী অমসুনি। ঐখোয়না ঐখোয়গী ঈকংনা শোকহল্লবা নাগরিকশিং, ঐখোয়গী লৌমীশিং, অমসুং খুঙ্গংশিংদা লৈবা অতোপ্পশিংনা থেংনরিবা অৱাবাশিং অসিসু কাওরোইদবনি। ঐখোয় পুন্না হোৎনমিন্নরগা, ঐখোয়না মসিগী শীংনবসি মায়োক্নগনি।

মরুপশিং,

পুন্না হোৎনমিন্নবা, অমত্তা ওইনা হোৎনমিন্নবা অসিনা বিক্সিত ভারতকী থৱায়নি। মসিগী ৱাখল্লোন অসিগা লোয়ননা, ঐখোয়না লৈবাক অসিবু চাউখৎহন্নবা লেপ্পা লৈতনা হোৎনগদবনি। অমুক্কা হন্না, মেত্রো প্রোজেক্তশিং অসিগীদমক্তা ময়াম পুম্নমকপু য়াইফ-পাউজেল পীজরি। লাক্কদৌরিবা কুহ্মৈশিং অসিগীদমক্তা ঐহাক্কী থম্মোয়দগী য়াইফ-পাউজেল পীজরি। অদোমবু হন্না-হন্না থাগৎচরি। পুনেগী মীয়াম, ঐগী তুং ইন্দুনা পাঙ্গল ফুদোক্তুনা হায়বীয়ু, খুৎ অনিমক থাংগৎতুনা হায়বীয়ু:

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

খঙহঞ্জবা: মসি প্রধান মন্ত্রীগী ৱারোলগী চাউরাকপা মনিপুরী ৱাহন্থোক্নি। তশেংবা ৱারোলদি হিন্দীদা পীখি, শরুক খরনা মারাথীদা ওইখি, মসিবু মাগী ৱাহন্থোক অদু পীনবগীদমক হন্দোকখি।

*****