Search

অনৌবা পাউশিং

মচাকশিং অসি পি আই বিদগী মশা মথন্তা লৌথোকচবনি

দিল্লীদা পাঙথোকখিবা FICCI গী চহিগী জেনরেল মীতিং অমসুং চহিগী কনভেন্সন্দা প্রধান মন্ত্রীনা পীখিবা ৱারোল মৈতৈলোন্দা হন্দোকপা

দিল্লীদা পাঙথোকখিবা FICCI গী চহিগী জেনরেল মীতিং অমসুং চহিগী কনভেন্সন্দা প্রধান মন্ত্রীনা পীখিবা ৱারোল মৈতৈলোন্দা হন্দোকপা


পুম্নমকপু ইকাইখুম্নবা উৎচরি।

FICCI প্রেজিদেন্ত ইচিল ইনাও ওইরিবা অনন্ত গোয়েঙ্কাজি, FICCI মেম্বরশিং, ইন্দস্ত্রিগী লুচিংবশিং, ইন্নোভেতরশিং অমসুং মরুপ মপাংশিং।

ঐহাক্না মমাংদা FICCI গী থৌরমশিংদা শরুক য়াবা অমসুং য়াওবগী খুদোংচাবা কয়ামরুম ফংখ্রে। অদুবু ঙসিগী থৌরম অসিদি তোপ-তোপ্পা ওই। FICCI লিংখৎপদগী চহি ১০০ মপুং ফারে। অসিগুম্বা লুপ অমা চহি চামা চুপ্না অশোই অঙাম য়াওহন্দনা অমসুং থবক তৌদুনা লাকপা, মতমগী অহোংবশিংগা লোয়ননা মাংদা চংশিনবা, অমসুং লৈবাক্কী শেন্মীৎলোনগী খোঙচৎতা মরু ওইবা থৌদাং অমা লৌদুনা চৎপা হায়বসি চাউরবা মাইপাকপা অমনি। থৌরম অসিদা, ঐহাক্না লুপ অসিগী শরুক ওইরক্লবা হান্নগী অমসুং হৌজিক্কী মরূপ পুম্নমকপু থম্মোই শেংনা ইকাই খুম্নবা উৎচরি, অমসুং ময়াম পুম্নমকপু ঐহাক্কী ইফমদগী য়াইফ-পাউজেল পীজরি।

মরূপশিং,

হৌখিবা চহি ১০০ রোমসিদা, ভারতকী শেন্মীৎলোনগী তাঙ্কক কয়া উবা ফংখ্রে। ঐখোয়না লাইসেন্স-কোতা রাজ উখ্রে, ঐখোয়না নেসনেলাইজেসনগী ফেল ওইরবা চাংয়েংসু উখ্রে, অমসুং মদুগী মতুংদা ২১শুবা চহিচাদা ভারতকী শেন্মীৎলোন অসিনা “ফ্রেজাইল ফাইব” কী মনুংদা চল্লবা মতম অমদা লাকখি।

অদুবু হৌখিবা চহি ১২ অসিদা, ঐখোয়গী লৈবাক মীয়াম পুম্নমক্না অকনবা থবক কয়া পায়খৎখি। ঐখোয়গী নহাশিং, ঐখোয়গী লৌমীশিং, ঐখোয়গী থবক শিন্মী ওইরিবা ইচিল-ইনাওশিং, অমসুং ইন্দস্ত্রিগী তাইবংদা লৈরিবা ময়াম পুম্নমক্না ফীভম অসিদা অহোংবা পুরকখি। ঙসিদি, ভারত্তা চাউখৎপগী খোঙজেল অসি খ্বাইদগী য়াংলবা ফিভমদা লৈরে, অমসুং মসিগা লোয়ননা মীয়াম্বু লাইরবদগী কোকহনবগী খোঙজেলসু  হান্নগা মান্নদবা চাংদা চংশিল্লি।

মরূপশিং,

ৱার্ল্দ বেঙ্কতগী হন্দক ফংবা অনৌবা রিপোর্ত অসিনা ঐখোয় পুম্নমকপু চাউথোকচবা পোকহল্লি। মসিদা হায়রি মদুদি চহি ১২–১৩ খক্তগী মনুংদা, ভারতমচা করোর ৫০ (মিলিয়ন ৫০০) লাইরববু মায়থীবা পীদুনা মসিদগী থোরকখ্রে।

মরূপশিং,

১৯৭০গী মতমদা, লৈবাক অসিদা “গরিবি হতাও” (লাইরবা মুত্থৎলু) গী খোলাও লাওবা হৌরকপদা ভারতকী মীশিং অসি করোর ৫০গী ময়াদা লৈরম্মি। মতম অদুদসু লাইরবা মুত্থৎপা য়ারম্বনি। অদুবু মতম অদুদা পোলিসিগী অৱাৎপা লৈরম্মি হায়বসি FICCI না খুদম ওইরি অমসুং তশেংনা কোকহন্নিংবগী অনীংবসু লৈরমদে। মদুগী মতাংদদি ঐহাক কা হেন্না চঙশিল্লরোই।

অদুবু মরূপশিং,

অচুম্বা পোলিসিশিংগা লোয়ননা থবক তৌরকপদা, অমসুং সরকারনা চুম্বা ৱাখলগা লোয়ননা মাংদা চংশিল্লকপদা, চহি ১২–১৩ খক্তগী মনুংদা লাইরবা মীওই করোর ৫০ লাইরবদগী কোকহনখ্রে হায়বসি FICCI না খুদম ওইরি। অমসুং মসিনা উৎলি মদুদি ঙসি ভারতনা লৈরিবা থাক অমসুং চৎলিবা লম্বী অসি মরীক চুম্না চম্মি অমসুং মসিদা লৈবাক অসিগী মাইপাকপগী গরেন্তী লৈরি।

মরূপশিং,

ঙসি ভারতনা মালেমদা খ্বাইদগী য়াংনা চাউখৎলিবা অচৌবা শেন্মীৎলোন অমা ওইরি। মরু ওইবা ইন্সতিত্যুসনশিংনা ভারতনা চাদা ৭কী চাংদা চাউখৎপগী খোঙজেলদা মাংদা চংশিনগনি হায়না পান্দম থম্লি। ওক্তোবর থা খক্তদা, অতোপ্পা ফিগর অমনা মীপুম খুদিংগী পুক্নীং চিংশিনখি: ওক্তোবর থাদা, ভারতকী পোত্থোক থাদোকপা অসি দোলর বিলিয়ন ৫০গী চাংদা য়ৌখি। অমসুং মদুনা ভারতকী খ্বাইদগী ৱাংবা থা অমগী পোত্থোক থাদোকপা ওইরি। ঐহাক্না ময়াম্বু থাগৎলিবা অসি য়েংউ! ভারতকী মসিগুম্বা থবক থৌরমশিং অসিগী মরম্না মখল খুদিংগী এজেন্সিশিং—মুদীজ রেতিংস এস এন্দ পি গ্লোবেল রেতিংস ফিত্চ রেতিংস ৱার্ল্দ বেঙ্ক, এসিয়ন দেভেলপমেন্ত বেঙ্কনা ঐখোয়গী চাউখৎপগী চাং অসি মাংজিল থানা পারি।

মরূপশিং,

চহি লিশিং কয়াগী মমাংদা, ঐখোয়গী শাস্ত্রশিংনা ঐখোয়দা য়াম্না মরু ওইবা পাউজেল অমা পীরম্মি: উদ্ধরেত আত্মনা আত্মানম না আত্মানম অবসদয়েত—হায়বদি, ঐখোয় ইশাগী হোৎনজমন্না ঐখোয় ইশাবু চাউখৎহনগদবনি, ঐখোয়গী শক্তি খঙদোক্কদবনি, ঐখোয়গী অৱাৎপশিংদগী তমশিনগদবনি, অমসুং হেন্না ফবা ওইনবা লেপ্পা লৈতনা হোৎনগদবনি। মথংগী খোঙথাং অসি অচুম্বা মশানা মশাবু য়েংজবদগী হৌই। মাংদা চংশিন্নবা, ঐখোয়না মতম মতমগী ওইনা মশা-মশাবু য়েংজবা হায়বসি য়াম্না মরু ওই। অমসুং মসি মীওই অমখক্তদা নত্তনা, ইন্দস্ত্রি অমসুং লৈবাক্কসু চপ মান্ননা চৎনৈ। মদুগী চহি ১০০গী মনুংদা, FICCIনা ভারতকী ইন্দস্ত্রিনা মাইপাকপা কয়া অমা উখ্রে। হৌজিক মথংগী চহি ২০দা ভারতকী ইন্দস্ত্রিনা করম্বা মাইপাকপা পুরক্কদগে হায়বা ৱারেপ লৌবা মতম ওইরে। বিকসিত ভারত (চাউখৎলবা ভারত) অমসুং আত্মনির্ভর ভারত (ইশা ইরোমদোম লেপচবা ভারত) কী খোঙচৎতা, ময়াম্না ময়ামগী থৌদাং অসি করম্না হেন্না চাউথোকহনবা য়াবগে? মসি হৌজিক চলাইরিবা ললোন-ইতিকশিং অসি, হৌজিক লৈরিবা সেক্তরশিং অসি চলাইবদা য়াম্না লাইবা ওইবা য়াই অমসুং শোর্ত-তর্মগী কান্নবসু পীবা য়াই। অদুবু ইন্দস্ত্রি অসিনা লৈবাক অমসুং মালেমগী থাক্তা তুংদা থোক্লক্কদবা দিমান্দশিংগীদমক শেম শাদুনা লৈগদবনি। অমসুং রিসোর্সশিং ৱেপনাইজ তৌবগী মতম অসিদা, লৈবাক্কী তুংগী ঙাক-শেনবগীদমক ঐখোয় পুম্নমক্কী থৌদাং অমা  ঐখোয়না শেমগদবনি। অমসুং মরম অসিনা ঐহাক্না তৌজনিংবা অপিল অসি মসিনি: মথংগী চহি ২০গীদমক লৌগদবা লোং-তর্ম ইনভেস্তমেন্তগী ৱারেপ খুদিংমক্তা, ভারতনা অহানবদা হায়বসি ময়ামগী য়ুম্ফম ওইহল্লু। মসিনা লৈবাক অসিবু মশা মরোমদোম লেপচবা ঙমহনগনি, অমসুং ময়ামগী ললোন-ইতিক চাউখৎনবা অনৌবা খুদোংচাবশিংসু হাংদোক্কনি।

মরূপশিং,

মখোয়না ময়ামগী মফমদা হন্দক উৎখিবা দোকুমেন্তরী অসিগী মতাংদা, মসিনা ঐখোয়বু চাউথোকহনবা নত্ত্রগা ঐখোয়না কোক নোন্না লৈসিরা হায়বদু ইশানা লেপচসি। ঐহাক খঙই ময়ামনা হৌজিক খুবাক খুরোই। ৱাখল তাবীয়ু: চহি চামা হেল্লক্লে, অদুবু ১৯৩০দা মহাত্মা গান্ধীনা মফম অসিদা লাকতুনা ময়ামদা চপ মান্নবা পাউজেল থমখিবনি অমসুং হৌজিক চহি কয়াগী মতুংদসু ঙসি ঐহাক্না ময়ামদা চপ মান্নবা ৱাফম অদু হায়রি—মসি ময়ামগী মাই পাকপরা নত্ত্রগা ময়ামগী মাইথিবরা? ঐহাক্কী ৱাহৈ লৌবীদ্রবসু, গান্ধীনা হায়খিবদু নিংশিংশি! মহাকসু স্বদেশীগী মতাংদা ঙাংদুনা চৎখি, মহাকসু ইশা ইরোমদোম লেপচবা ভারতকী ৱাফম ঙাংদুনা চৎখি, অমসুং মদু চহি ১০০ শুরে, অমসুং ৱারী অসি মদুনা হেক হৌখিবা মীকুপ অদুমক লৈরি, মরূপশিং! মরম অদুনা ঐহাক হায়জরি: ময়ামগী দোকুমেন্তরী অদু য়েংবীয়ু, ঐহাক্কী ৱাহৈ পরেং অনি অসিতং হাপচিনবীয়ু অমসুং য়ুমথোং খুদিংদা চাইথোকসি।

মরূপশিং,

ঐহাক্না ময়ামদা ফার্মা ইন্দস্ত্রিগী খুদম অমা পীজগে। মফম অসিদা লৈরিবা মীপুম খুদিংমক মসি খঙই। ভারতপু “মালেমগী ফার্মসি” হায়না কৌই। অদুবু মদু ওইদুনসু, চহি খুদিংগী ভারতনা দোলর বিলিয়ন কয়াগী এ পি আই, বল্ক দ্রগশিং, অমসুং দ্রগ ইন্তরমিদিএতশিং ইমপোর্ত তৌরি। ঐখোয়না হৌজিক ফাওবা ইমপোর্ততা মীপাল তাংলিবা কেতেগোরি চামরোম লৈরি। ঐখোয়গী ফার্মা ইন্দস্ত্রিনা করম্বা ইনগ্রিদিয়েন্তশিং ভারততা পুথোকপা য়াবগে হায়বা খঙদোকপা মথৌ তাই। অতোপ্পা লৈবাকশিংগা চাংদম্নবা ঙম্নবা করম্বা হীরমশিংদা ঐখোয়না অনৌবা তেক্নোলোজি অমসুং চাউরবা প্রদক্সন প্লান্তশিংদা ইনভেস্ত তৌবা য়াবগে? শাবা লোইরবা হিদাক-লাংথকশিং অসি ঐখোয়গী শক্তি অমনি। হৌজিক ঐখোয়না ইনগ্রিদিয়েন্তশিংদসু ঐখোয়গী শক্তি শেমগদবনি।

মরূপশিং,

আইরন অমসুং স্তীলদসু চপ মান্নবা শিংনবশিং লৈরি। ভারতনা লুপা করোর লিশিং কয়াগী আইরন ওর এক্সপোর্ত তৌরি। অদুবু ঐখোয়না লোইশিল্লবা স্তীলসু ইমপোর্ত তৌরি। ঐখোয়না করম্বা গ্রেদশিং ইমপোর্ত তৌরিবগে হায়বা ঐখোয়গী ইন্দস্ত্রীনা খঙদোকপা মথৌ তাই, মদুনা ঐখোয়না মখোয়বু পুথোক্নবা তেক্নোলোজি শেমগৎপা ঙমগনি। এলুমিনিয়মদসু চপ মান্নবা পোতেন্সিএল লৈরি। ভারততা তন লিশিং কয়াগী বোক্সাইতকী রিজার্ভ য়াম্না চাউনা লৈ। অদু ওইদুনসু ঐখোয়না স্পেসিলাইজদ এলুমিনিয়ম এলোয়শিং অমসুং অতোপ্পা পোত্থোকশিং ইমপোর্ত তৌরি। ঐখোয়না পোত্থোকশিং অসিগীদমক লৈবাক মনুংদসু মেনুফেক্সরিং কেপাসিতি শেমগৎকদবনি। ভারত্তা ভেল্যু এদিসন হেন্না লৈহন্নবা ঐখোয়না মিনরেলশিংগী ভেল্যু চেন পুম্বদা এক্সপার্তাইজ শেমগদবনি। গেহু এক্সপোর্ত তৌরগা ব্রেদ ইমপোর্ত তৌরিবা অসি করম্বা লৈবাক্নো? মসি ইশানা হংজসি।

মরূপশিং,

ঐহাক্না ময়ামদা অতোপ্পা ফিগর অমা পীজগে। ভারত অসি য়াম্না চাউবা লৈবাক অমনি, অদুবু মালেমগী এগ্রিকলচর এক্সপোর্ততা ঐখোয়গী শরুক অসি চাদা ২দগী ২.৫ ফাওবা খক্তনি। ঐখোয়গী কোর্পোরেতকী তাইবংনা লৌউশিংউদা শেল থাদবদা কিরি—মদুদগী চেল্লি।

মরূপশিং,

ঐখোয়না পুন্না ফীভম অসি হোংদোক্কদবনি। ভেল্যু এদিসন অমসুং ফুদ প্রোসেসিং ইন্দস্ত্রিগী খুত্থাংদা ঐখোয়না মসিবু চাউরবা খুদোংচাবা অমা ওইনা য়েংগদবনি। চহি ১২গী মনুংদা, এগ্রি-ফুদ এক্সপোর্ততা প্রোসেস তৌরবা চাক্কী শরুক অসি চাদা ১৩দগী চাদা ২০ হেন্না ৱাংখৎলে। ঙসি ইন্দস্ত্রি অসি পুন্না লাক্তুনা মাংদা চংশিনবগী স্ত্রাতেজি অমা—ঐখোয়না করম্বা পোত্থোক পুথোক্লিবগে অমসুং মালেমনা করম্বা পাম্বগে হায়বগী মপুং ফাবা রোদমেপ অমা শেম্বা হায়বসি য়াম্না মরু ওই। ঐহাক্না ময়ামদা অপিল তৌরি: ঐখোয়গী ইন্দস্ত্রিশিংনা ভারতকী এগ্রিকলচর সেক্তরদা মখোয়গী ইনভেস্তমেন্ত হেনগৎহনসি। অখন্নবা মপান লৈবাক্কী কৈথেলশিং য়েংলগা, থাজবা য়াবা প্রোক্যুরমেন্তগী সিস্তেমশিং শেমসি, অমসুং মফম অদুদা দিমান্দ লৈরিবা পোত্থোকশিং শেমসি—মদুনা ভারতকী পোত্থোকশিং অসি মালেম শিনবা থুংনা ঐখোয়গী মশক ওইহনবা ঙমগনি।

মরূপশিং,

মসিগুম্বা পোসিবিলিতিশিং অসিগী মতুং ইন্না, নোংমগী ইঞ্জিনিয়রিং পোত্থোকশিংদসু ভারতকীদমক চাউরবা খুদোংচাবশিং লৈরি। হেন্দ তুলশিং অমসুং পাৱর তুলশিংগী মালেমগী এক্সপোর্ততা ভারতকী শরুক অসি হৌজিক ফাওবা য়াম্না পীক্লি। মালেমগী কৈথেলদা ঐখোয়গী য়ুম্ফম চাউথোকহন্নবা ঐখোয়না সেক্তর অসিদা থবক তৌবা য়াই। ঐখোয়গী চাউরবা কম্পনীশিংনা অপীকপা কম্পনীশিংদসু ক্বালিতি অমসুং স্কেলদা মেনুফেক্সরিং কেপাসিতি শেম্বদা মতেং পাংবা য়াই। চপ মান্ননা, মেসিনরি মেনুফেক্সরিং অসি ঐখোয়গীদমক ঙাইদুনা লৈরিবা অতোপ্পা সেক্তর অমনি, মফম অসিদা য়াম্না তৌবা য়াই। পুন্না, ঐখোয়না চাউখৎলক্লিবা লৈবাকশিং, অমসুং মরু ওইনা গ্লোবেল সাউথনা মথৌ তাবা মেসিনশিং শাবা য়াই। ঐখোয়গী ইন্দস্ত্রীনা পেকেজিং ইকুইপমেন্তশিং, ইরিগেসন সিস্তেমশিং, অমসুং ফেক্তরিগা মরী লৈনবা মেসিনরিশিংগী কৈথেলশিং থীবা য়াই, অমসুং হীরমশিং অসিদা করম্বা থবক তৌবা য়াবগে হায়বা য়েংবা য়াই।

মরূপশিং,

লৌমীশিং, অপীকপা ওন্ত্রপ্রেনরশিং, ইন্দস্ত্রিশিং, লন-থুম শেম্লিবা মীওইশিং, অমসুং তেক্স থীরিবা মীওইশিংবু ইকাই খুম্নবা য়াওদনা লৈবাক অমত্তা মাংদা চংশিনবা ঙমদে। অয়ুক-নুংথিল খাক্তনা মখোয়গী মাইয়োক্তা ৱা ঙাংলগা লৈবাক চাউখৎপা নত্তে। ময়ামনা খংলম্বা য়াই পঙ্কজ ভাই অমসুং অতোপ্পশিংনসু খঙলম্বা য়াই। গুজরাত্তা ইনকম তেক্স দিপার্তমেন্তকী চাউরবা মীফম অমা পাঙথোকখিবদা  মতম অদুদা ঐহাক চিফ মিনিস্তর ওইবা কুইদ্রিবা মতম্নি। মদু চহি ২৫ গী মমাংদা ২০০১–০২গী ময়াদাওইরমগনি। ইনকম তেক্সকী মকোক থোংবা ওফিসার পুম্নমক মফম অদুদা ফম্মি। ঐহাক্না মখোয়দা হংখি, “মীপুম খুদিংমকপু হুরানবা অমগুম্না য়েংবা অসি ময়াম্না করম্বা মতমদা লোইশিনগদগে? মসি করম্বা ৱাখল-লৌশিংনো? ময়ামসু লৈবাক্কীদমক থবক তৌরি। লৈবাক চলাইবগী কন্ত্রেক্ত লৌরকপা অসি ঐখোয় খক্তনা ওইরিব্রা?” মীপুম খুদিংমক্না তৌই, মীয়াম খুদিংমক্না তৌই। মীপুম খুদিংমক ইকাই খুম্নবা ফংবা মথৌ তাই। ইন্দস্ত্রিগী ৱাফম ঙাংলকপদা, হৌখিবা চহি খরা অসিদা সরকারনা ইজ ওফ দুয়িং বিজনেসতা অকনবা পুক্নীং চংলি।  ২০১৪দা, বেসিক কোর্পোরেত তেক্স রেত অসি চাদা ৩০ ওইরম্মি। ঐখোয়না মদুবু চাদা ২২দা হন্থহনখি। ঙসি ভারততা, লুপা লাখ ১২ ফাওবগী শেন্থোক্তা তেক্স লৈত্রে। ময়ামনা খুবাক খুরোই হায়বা ঐহাক্না খঙই ঐহাক্না ময়াম্বু ফজনা খঙই, মরমদি ময়ামদা অপেনবা পোকপা ৱাৎলি। ঐহাক্না মাংদা চংশিন্দুনা লুপা লাখ ১২ ফাওবগী ইনকম তেক্স কোকখি। ময়ামগী থবক মফমশিংদা থবক তৌরিবা এমপ্লোয়ীশিংগী তলব হেনগৎহল্লব্রা? ময়ামনা এমপ্লোয়ীশিংগী মশিং হেনগৎহল্লব্রা? হেনগৎতে! “মোদীজি অদোম্না তৌরকউ, ঐখোয়না য়েংগে।”

অদুম ওইনমক মরূপশিং,

ইনকম তেক্সতা অসিগুম্বা চাউরবা রিলিফ অমা পীবা হায়বা য়াম্না থৌনা ফবা খোঙথাং অমা লৌখি। মসিনা ঐখোয়গী মীয়ামগী পর্চেজিং পাৱর অসি য়াম্না চাউনা হেনগৎহল্লে। তেক্স থীরিবা মীওইশিংগী শেনফম সিস্তেমদা মথৌ তাদনা লৈহন্দনবা ঐখোয়না ফাইলিং অমসুং রিফন্দ সিস্তেমশিং লাইহল্লে। হান্নদি রিফন্দ অমদা থা নিপান চংলম্মি। ঙসিদি রিফন্দশিং চয়োল অমগী মনুংদা লাক্লে। লাকতব্রনে?  অদুদি অমুক্তদি খুবাক খুবীয়ুদনা! মরমদি ঐখোয়না তৌরিবা থবকশিং অসি ময়ামগীদমক চুম্না কান্নবা ওইরিব্রা নত্ত্রগা ঐখোয়না ঙসি ঙাইহাক্না তৌরিব্রা হায়বা খঙদোক্নবা হোৎনরি! জি এস তি (GST) রিফোর্মশিংগী মরম্না, লৈবাক শিনবা থুংনা পোত্থোক কয়াদা তেক্স হন্থরে। মসিনসু দিমান্দ হেনগৎহল্লে, অমসুং মদুগী হকথেংনবা কান্নবা অসি ঐখোয়গী ইন্দস্ত্রি অমসুং বিজিনেস হাউসশিংদা চৎলি।

মরূপশিং,

হৌখিবা চহি খরা অসিদা, ভারতনা মালেমগী লৈবাক কয়ামরুমগা ত্রেদ এগ্রীমেন্তশিং সাইন তৌরে। মালেমগী চাউরবা শেন্মীৎলোনশিংগা ফ্রী ত্রেদ এগ্রীমেন্ত অমা থোক্লকপদা, মদুগী ৱাহন্থোক্তা ময়ামগীদমক থোং হাংদোক্লে হায়বা FICCI দা লৈরিবা মীওইশিংনা কৈদৌনুংদা ফমথদুনা খল্লব্রা? ময়াম্না খুদোংচাবা অদু লৌনবা প্লান অমত্তা শেম্লব্রা, নত্ত্রগা মদুগীদমক ঐহাক্না শন্দোক্না তাকখিগদ্রা?

ঐহাক্না ময়ামদা থম্মোই শেংনা হায়রি, মরূপশিং,

মসিদগী হেন্না চাউবা খুদোংচাবা অমা লৈরোই। অমসুং ঐহাক্কী মসিগী হোৎনজমন অসিগী কান্নবা ময়াম্না লৌদ্রবদি, কনানা লৌগনি? ঐহাক্না ময়ামগীদমক তৌরি, অমসুং ময়ামগী খুত্থাংদা লৈবাক্কীদমক থোক্লি। ময়াম অসি য়াম্না শাফু লৈবা মিদিয়ম অমনি। ইশাগী শক্তি খঙদোকউ। ঐখোয়দা করোর ১৪০ গী কৈথেল লৈ, অমসুং মসিনা নখোয়গী সমস্যা অমা ওইরব্রা হায়না খল্লি।  মরমদি ময়াম্না খঙই মদুদি ময়াম্না পোত্থোক অমত্তা শাবদা, মদু কনাগুম্বা অমনা অদুমক লৈগনি। চাউরবা শহরদা লৈবা মীওই অমনা লৈদ্রবসু অপীকপা শহরদা লৈবা মীওই অমনা লৈগনি; মসিদসু লৈদ্রবদি অচৌবা খুঙ্গংদগী অমনা লৈগনি; নত্ত্রবদি খুঙ্গংদা লৈবা মীওই অমনা। ঐহাক্কী পোত্থোকশিং অসি করিগুম্বা মওংদা য়োনগদবনি। মসিগী ৱাখল্লোন অসি হৌজিক চৎনদ্রে।  মতম অসি য়াম্না হোংলে।  লৈবাকমচা করোর ১৪০বু “এস্যুরদ মার্কেত” অমগুম্না য়েংগনু। অমসুং করিগুম্বা মতমদা ঐহাকপুসু ঙাকপীয়ু, ঐহাক ইকাইজবা ফাওই। মীওই মখল অনি লৈ। মখল অমা মফম অসিদা লৈব্রা লৈতব্রা ঐহাক খঙদে। বীল্দরশিং, প্রোপর্তী দেভেলপরশিং লৈ। মখোয়না ৱাংবা তাৱর অমা শাগনি অদুগা য়ুনিত অমা নৎত্তগা অনি থমজিনগনি। মখোয়না অরৈবশিংদা হায়গনি “ঐহাক্না মসি ইশাগীদমক শাবনি, মসি ঐহাক্কী মচানুপাগীদমকনি, অদুবু অদোম্না পাম্লবদি…” মসিনা লৈরিবা মীওই অদুদা খলহল্লি, “য়াই, ক্বালিতি অসি ফবা ওইগনি।” অমসুং অতোপ্পা মখল অমা, মখোয়গী মনুংদগী হেন্না মফম অসিদা লৈবা য়াই, কস্তমর অমদা হায়, “মসি এক্সপোর্ত ক্বালিতিনি!” ময়াম্না লৈবাক অসিগী মীয়াম্বু করম্বা মীওই ওইনা লৌরিবগে? মখোয়না অফবা ক্বালিতি ফংবা ওইথোক্লরোইদ্রা? ঙসি ফাওবদা মখোয়দা মসি এক্সপোর্ত ক্বালিতিনি হায়না হায়রি! মখোয়সু খল্লি, “ওহ, মসি মপানগী মীওইশিং অদুগীদমক শাবা ওইরবদি, মদু ফবা ওইগনি।” ৱাখল-লৌশিং অসি হোংদোক্কদবনি। ঐহাক্কী লৈবাকমচাশিংনা ক্বালিতি অফবা ফংফম থোকই। গোপাল, মসি মীপুম খুদিংমক্তা অমুক হন্না ফজনা শন্দোক্না হায়বীয়ু। অদুবু হৌজিক্তি খুদোংচাবশিং অসি অতোপ্পা লৈবাকশিংদসু ফং হনবা মথৌ তারে। লৈবাক অসিনা মাংজিল থানা চংশিল্লিঙৈ মনুংদা লৈঙাক অসিনা ময়ামগা লোইননা চৎনবগী শেম শাদুনা লৈরি।

অমসুং মরূপশিং,

ঐহাক্না ঙসি ফোংনা হায়জরি। ঐহাক মফম অসিদা ফোর্মেলিতী খক্তগীদমক লাকপা নত্তে; ঐহাক ময়ামগা থম্মোইদগী উননবা লাকপনি। অমসুং ঐহাক্না ময়াম্বু ইকাই খুম্ননবা লাকপনি। অদুবু হান্নগী সরকারশিংগা ময়ামগা থেংনখিবদুনা নুংঙাইতবা ঙাক্তা ওইখিবনা মদুগী মহৈ অদু ঐহাক্না লোক্লি। মসি হান্নগী সরকারশিং অসিগুম্বা সরকার নত্তে। মসি ময়ামগীদমক লৈবা সরকার অমনি। মসিনা করম্না মরুপ শানগনি হায়বা খঙই।  অমসুং হৌজিক ময়ামনা মরুপ ওইরবনিনা  ময়াম্না করিগুম্বা অমখক তৌহন্নিংই। তৌগদ্রা? ময়াম্না তৌবীগদ্রা? অকিবা লৈতনা ঐহাক্কী ইফমদা ইবীরকউ, করি তৌবা য়াবগে হায়বদু খঙহনবীয়ু  ঐহাক্না লেপ্তনা থারক্নবা হায়গনি। ময়ামগী সজেসনশিং ওপন ওইনা ইথোক্লগা থাবীয়ু। ১০০গী মনুংদা অমা অনি পাঙথোকপা ঙমদ্রবসু মদু ঐহাক্কী অৱাৎপা ওইগনি। ময়ামগী মাইকৈদগী অৱাৎপা অমত্তা থমহনগনু। সরকারগী থোং অমসুং সরকারগী ৱাখল অনিমক মপুং ফানা হাংলি। ঐহাক অমুক হন্না হায়রি: ঐখোয়গী দোমেস্তিক মার্কেত অসি ঐখোয়গী কম্ফোর্ত জোন ওইরোইদবনি। “মীওই য়াম্না লৈ, মীওই করোর ১৪০ হেন্না লৈবনিনা ঐহাক্কী পোত্থোক অসি শোইদনা শিৎকনি হায়বসি থাদোকসি। মদুনা মালেমগী কৈথেলশিংদা চাংদম্নবা থৌনা পীগদবনি। ঐখোয়না ৱাখল-লৌশিং অদু ঐখোয়গী মকোক মনুংদা চঙহনগদবনি। অমসুং মরম অদুনা, মালেমগী তোঙান তোঙানবা লমশিংদা লৈরিবা কস্তমরশিংগী মথৌ তাবশিং খঙদোকপদা ইনভেস্ত তৌসি—তীমশিং থাসি, কনানা করম্বা পাম্বগে, ঐখোয়না করম্না শিপ তৌগদগে, মখোয়গীদমক ঐখোয়না করম্না য়ুজর-ফ্রেন্দলী ওইবা পোত্থোকশিং শাগদগে, ঐখোয়না করম্না মখোয়গী পাম্বশিংগা মান্নহনগদগে অমসুং মখোয়না পাম্বা মচুশিং শাগদগে। নত্ত্রবদি মালেম শিনবা থুংনা কৈথেলশিং করম্না লৌরিবগে হায়বা ঐখোয় খঙই। ঙসিদি ঐখোয়না য়ুমদা লৈরগা পূজা তৌরিবা গণেশ মূর্ত্তিশিং অসি ঐখোয়না শাবরা নত্ত্রগা অতোপ্পা মীওই অমনা শাবরা হায়বগী গরেন্তি লৈত্রে!

মরূপশিং,

মালেমগী স্তেন্দর্দশিংগা মান্নহনবা অমসুং মপান লৈবাক্কী কৈথেলশিংগীদমক স্ত্রিব্যুসন নেৎৱর্কশিং শেম্বদা ইনভেস্ত তৌবা হায়বসি ঐখোয়গীদমক য়াম্না মরু ওই। ঐখোয়গী পোত্থোকশিং অসি মালেমগী কৈথেলশিংদা কস্তমরশিংগী থাজবা ফংবা অমসুং মখোয়বু ভারতকা শম্নহনবা ওইহনসি। অপিল অসিগা লোয়ননা, মরূপশিং, ঐহাক্না য়াম্না ফোংনা ৱা ঙাংলে। ঐহাক্কী থম্মোই পেঞ্জবা মওংদা, ঐহাক্না ঙসি ময়ামগী মমাংদা ঐহাক্কী ৱাখল ফোংদোক্লে। অদু ওইরবসু, ময়ামগী চহি ১০০গী খোঙচৎ অসিনা ময়ামদা য়াম্না কয়া অমা পীরে হায়না ঐহাক থাজৈ। অতোপ্পা চহি ১০০ ঙাইগনু। চহি ১০দা ময়াম্না লৈবাক অসিদা করি তৌবা য়াবগে হায়বা খল্লু। ১৯২৭তা হৌদোকখিবা অমসুং চহি ২০দা লৈবাক অসিনা নিংতম্বা ফংবা উবা ঙম্লবদি, ময়াম্না ২০২৭তা চহি ১০০ মপুং ফারকপদা, ঐখোয়না মদুবু চহি ২০দা চাউখৎলবা লৈবাক অমসুং ওইহনগদবনি—ঐখোয়না ৱারেপ অদুগা লোয়ননা মাংদা চংশিনগদবনি।

অমসুং মরূপশিং,

নিংতম্বা হায়বসি স্লোগান অমা নত্তে; নিংতম্বা হায়বসি ফিরেপ অমনি। বিকসিত ভারত হায়বসি স্লোগান অমা নত্তে; মসি ফিরেপ অমনি। ঐখোয়—লৈবাকমচা করোর ১৪০—না ফিরেপ অসিদা হিংগদবনি। অমসুং ঐখোয়না মসিদা হিংলবদি, ঐখোয়না মাই পাক্কনি। ৱাখল অসিগা লোয়ননা, ঐহাক্না ময়াম পুম্নমকপু অমুক হন্না ঐহাক্কী য়াইফ-পাউজেল পীজরি।

থাগৎচরি।

খঙহঞ্জবাঃ মসি প্রধান মন্ত্রীগী ৱারোলগী চাউরাকপা হন্দোকপনি। অশেংবা ৱারোলদি হিন্দিদা পীখি।

 

***