ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଆମନ୍ତ୍ରଣ କ୍ରମେ ଜାପାନ ପ୍ରଧାନମନ୍ତ୍ରୀ ମିଷ୍ଟର ଶିଂଜୋ ଆବେ ଆସନ୍ତା ସେପ୍ଟେମ୍ବର 13 ଓ 14 ତାରିଖ ଦୁଇଦିନ ଧରି ସରକାରୀ ଗସ୍ତରେ ଭାରତ ଆସୁଛନ୍ତି ।

ପ୍ରଧାନମନ୍ତ୍ରୀ ମୋଦୀ ଏବଂ ପ୍ରଧାନମନ୍ତ୍ରୀ ଆବେ ସେପ୍ଟେମ୍ବର 14 ତାରିଖରେ ଗୁଜରାଟର ଗାନ୍ଧୀନଗରସ୍ଥିତ ମହାତ୍ମା ମନ୍ଦିରରେ ଦ୍ୱାଦଶ ଭାରତ-ଜାପାନ ବାର୍ଷିକ ଶିଖର ସମ୍ମିଳନୀରେ ପରସ୍ପରକୁ ଭେଟିବେ । ବୈଠକ ପରେ ଦୁଇ ରାଷ୍ଟ୍ରନେତା ଗଣମାଧ୍ୟମକୁ ସମ୍ବୋଧିତ କରିବେ ।

ଏହାପରେ ସେହିଦିନ ଭାରତ-ଜାପାନ ବ୍ୟାପାର ଅଧିବେଶନ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି ।

ପ୍ରଧାନମନ୍ତ୍ରୀ ମୋଦୀ ଏବଂ ପ୍ରଧାନମନ୍ତ୍ରୀ ଆବେଙ୍କ ମଧ୍ୟରେ ଏହା ଚତୁର୍ଥ ବାର୍ଷିକ ଶିଖର ବୈଠକ । ଦୁଇ ଦେଶ ମଧ୍ୟରେ ସ୍ୱତନ୍ତ୍ର ରଣନୀତିକ ଓ ବୈଶ୍ୱିକ ସହଭାଗୀତା ଫ୍ରେମୱାର୍କ ମଧ୍ୟରେ ଘଟୁଥିବା ବହୁମୁଖୀ ସହଯୋଗର ଅଗ୍ରଗତି ନେଇ ମିଳିତ ସମୀକ୍ଷା କରାଯିବ । ଏହି ଭାଗିଦାରୀତା କାର୍ଯ୍ୟକ୍ରମ ଅଧିନରେ ଆହୁରୀ ବନ୍ଧୁତ୍ୱପୂର୍ଣ୍ଣ ସଂପର୍କ ବଢାଇବା ଲାଗି କେତେ କଣ ସମ୍ଭାବନା ରହିଛି ତାର ଭବିଷ୍ୟତ ରୂପରେଖ ପ୍ରସ୍ତୁତ ହେବ ।

ସେପ୍ଟେମ୍ବର 14 ତାରିଖରେ ଅହମଦାବାଦ-ମୁମ୍ବାଇ ମଧ୍ୟରେ ଭାରତର ପ୍ରଥମ ଅତି ଦୃତଗାମୀ ରେଳ ପ୍ରକଳ୍ପର ଶିଳାନ୍ୟାସ କାର୍ଯ୍ୟକ୍ରମ ଅବସରରେ ଆୟୋଜିତ ହେବାକୁ ଥିବା ସମାରୋହରେ ମଧ୍ୟ ଦୁଇ ନେତା ଭାଗ ନେବେ । ପ୍ରସ୍ତାବିତ ରେଳ ପ୍ରକଳ୍ପ ଦୁଇ ସହର ମଧ୍ୟରେ ଯାତ୍ରା ସମୟକୁ ଅନେକାଂଶରେ ହ୍ରାସ କରିବ । ଅତି ଦୃତଗାମୀ ରେଳ ନେଟୱାର୍କ ପ୍ରତିଷ୍ଠା ଓ ପରିଚାଳନା କ୍ଷେତ୍ରରେ ଜାପାନ ବିଶ୍ୱର ଏକ ଅଗ୍ରଣୀ ରାଷ୍ଟ୍ର ଏବଂ ଏହାର ଶିଂକାନସେନ ବୁଲେଟ ଟ୍ରେନ ବିଶ୍ୱର ଦୃତଗାମୀ ଟ୍ରେନମାନଙ୍କ ମଧ୍ୟରେ ଅନ୍ୟତମ ।

ସେପ୍ଟେମ୍ବର 13 ତାରିଖ ଦିନ ଅହମଦାବାଦ ସହର ପକ୍ଷରୁ ପ୍ରଧାନମନ୍ତ୍ରୀ ଆବେଙ୍କୁ ଭବ୍ୟ ନାଗରୀକ ସମ୍ବର୍ଦ୍ଧନା ପ୍ରଦାନ କରାଯିବ, ଯେଉଁଥିରେ କି ଭାରତର ସାଂସ୍କୃତିକ ବିବିଧତାର ପ୍ରଦର୍ଶନ କରାଯିବ ।

ଗସ୍ତ କାଳରେ ଦୁଇ ପ୍ରଧାନମନ୍ତ୍ରୀ ସାବରମତୀ ନଦୀ କୂଳରେ ମହାତ୍ମା ଗାନ୍ଧୀଙ୍କ ଦ୍ୱାରା ପ୍ରତିଷ୍ଠିତ ସାବରମତୀ ଆଶ୍ରମ ପରିଦର୍ଶନରେ ଯିବେ । ତା’ପରେ ଦୁଇ ନେତା ଅହମଦାବାଦରେ ଥିବା ଷୋଡଶ ଶତାବ୍ଦୀର ପ୍ରସିଦ୍ଧ ମସଜିଦ୍ “ସିଦ୍ଦି ସହିଦ ନି ଜାଲି” ପରିଦର୍ଶନ କରିବେ । ଦୁଇ ନେତା ପରିଶେଷରେ ମହାତ୍ମା ମନ୍ଦିରରେ ବାପୁଜୀଙ୍କ ସ୍ମୃତି ଉଦ୍ଦେଶ୍ୟରେ ସମର୍ପିତ ସଂଗ୍ରହାଳୟ ଦାଣ୍ଡି କୁଟୀର ବୁଲି ଦେଖିବେ ।

**********