ভারতকী প্রধানমন্ত্রী

ঐগী নুংশিজরবা ইরৈবাক-চাশিং, খুরুমজরি। মতম খরগী মমাংদা ঐনা কর্নাতকাগী অঙাংশিংগা উন্নবগী তাঞ্জা অমা ফংজখি। তাইম্স গ্রুপকী পাউ চে ‘বিজয় কর্নাতকা’না অঙাংগী নুমিত্তা খোংথাং অমা হৌদোকখি , মদুদা অঙাংশিংবু লৈবাক অসিগী প্রধানমন্ত্রীদা চিথী ইননবা খঙহনখি। লোইননা মদুদা মখোয়না খনগৎলবা চিথিশিং পাউ চে অদুদা ফোংখি। চিথিশিং অদু পারুবদা ঐঙোন্দা নুংঙাইবা অমা ফাওখি। পীক্লিবা অঙাংশিংসু লৈবাক অসিগী ওইরিবা ফিভম অসি খঙই, মখোয়না মসিগী মরমদা নৈনদুনা ইরকই। অৱাং কন্নড়দগী কীর্তি হেগরেনা, দিজিতেল ইন্দিয়া অমসুং স্মার্ত সিতীগী স্কিমশিংবু থাগৎলদুনা মহাক্না ৱাখল্লোন পীরকই, মদুদা মহাক্না মহৈ-মশিংগী থৌওং অসি অহোংবা পুরকপা তঙাইফদবা ওই অমসুং হৌজিক্কী মীরোলগী অঙাংশিংনা ক্লাসরুম খক্তদা লাইরিক পাবা পামদে, মখোয়না মহৌষাগী মরমদা নৈনবা পাম্মি হায়না ফোংদোকখি। ঐখোয়গী অঙাংশিংবু মহৌষাগী মরমদা খঙহল্লবদি অকোইবগী ফিভম ঙাকপগী থবক্নচীংবদা য়াম্না কান্নগনি।

লক্ষ্মেশ্বরাদগী রীদা নদাফ কৌবা অঙাং অমনা মহাক্না লান্মীগী মচা ওইরুবা অসি য়াম্না পেঞ্জৈ হায়না ফোংদোকরকই। লান্মীশিংগীদমক্তদা চাওথোক্তবা হিন্দুস্তান্দা কনাবু লৈরমগনি! মদুগী মথক্তা নহাক লান্মীগী মচা অমসু ওইরে, অদুনা নহাক্না অমুক্কা হেন্না চাওথোকচবা হায়বসি মশানা তাবনি। কলবুর্গীদগী ইরফানা বেগম্না মহাক্কী স্কুল ময়ুমদগী কিমি মঙা লাপ্পি মরম অদুনা ঙন্না থোক্তবসু য়াদে, হল্লকপসু নুমিদাং থেংই। ইমান্নবীশিংগা শান্নবগী মতম ফংদ্রে। অদুনা অনকপদা স্কুল থম্বীনবা ইরকই। অদুবু ইরৈবাক মচাশিং, পাউ-চে অমনা অসুম্না থৱাই য়াওবীবদগী ঐনা মখোয়গী চিথীশিং অদু পাবা ফংলিবনি অমসুং ঐসু অফবা খঙবা য়াবা খঙহৌরে।

ঐগী নুংশিরবা ইরৈবাক মচাশিং ঙসি অসি ২৬/১১নি। নবেম্বরগী ২৬ অসি ঐখোয়গী সংবিধানগী নুমিৎনি। কুমজা লিশিং অমগা চামাপল নিফু মাপলদা ঙসিগী নুমিৎ অসিমক্তদা সংবিধান সভানা ভারতকী সংবিধানবু অয়াবা পীখি। ১৯৫০গী জনুৱারী ২৬ তা সংবিধান চৎনবা হৌখি। মরম অসিনা ঐখোয়না নুমিৎ অসিবু গনতন্ত্র দিবস হায়না পাংথোকই। ভারতকী সংবিধান অসি ঐখোয় মীয়ামগী থৱাইনি। ঙসিগী নুমিৎ অসিদা সংবিধান সভাগী মীহুৎসিংবু নীংশিংসি। মখোয়না ভারতকী সংবিধান শেম্নবা হোৎনবদা চাওরাক্না চহি অহুম্মুক কন্না হোৎনখি। মখোয়না ঙাংনখিবা ৱারোলশিং অদুবু পারুবদা, জাতিগীদমক কৎথোকখিবা পুন্সি অদু নীংশিংলুবদা চাওথোকচবা ফাওই। খেন্নবতনা থল্লবা লৈবাক অসিগী সংবিধান শেম্বদা মখোয়না ৱারমগদবশিংদু খল্লুবদা অৱাবা পোকই। ৱাখল খন্থবা, শান্না উবা মিৎয়েং অদুসু ভারতনা নীং খা তম্বা ফংবতা ঙাইরিঙৈদনি। অসিগুম্বা সংবিধান অসিগী মঙালদা সংবিধান শেম্বীরম্বা অথোইবা মীইশিংগী ৱাখল্লোন্দা অনৌবা ভারত অমা শেম্বা হায়বসি ঐখোয় পুম্নমক্কী থৌদাংনি। ঐখোয়গী সংবিধান অসি অসুক্কী মতিক পাউ চাওই, মসিনা শোক্তবা পুন্সিগী তাঙ্কক অমদি মহৌষাগী হিরম অমত্তা য়াওদে। পুম্নমকপু মান্নবা মিৎয়েংনা য়েংবা অমদি পুম্নমক্কী মফমদা নুংশি চান্নবগী ৱাখল্লোন অসি ঐখোয়গী সংবিধানগী শক্তম্নি। মসিনা লাইরবা, তোল্লবা, শোৎথরবা, কান্নবা ফংজদ্রবা য়েল্হৌমী, নুপী পুম্নমক্কী ফংফম থোকপা হকপু ঙাক শেল্লি অমসুং মখোয়গী ফংলিবা কান্নবশিং অদুবুসু ঙাক শেল্লি। সংবিধান্দা পল্লিবশিং অদুম্মক পাংথোকপা হায়বসি ঐখোয়গী ইথৌনি। মীচম্বু ওইরো নত্রগা লৈঙাক্লোইবু ওইরো সংবিধানগী ৱাখল্লোনগী মতুং ইন্না চৎকনি। কানাগুম্বা অমত্তদা করিগুম্বা মখল অমত্তগী অমাংবা ওইহন্দবা অসি সংবিধানগী পাউজেলনি। ঙসি সংবিধানগী নুমিৎ অসিদা দা. বাবা সাহেব অম্বেদকরবু নীংশিংবা হায়বা অসি মশানা তাবনি। সংবিধান সভাদা মরু ওইবা হিরম ১৭তা তোঙান তোঙানবা কমিতী শেমখি। মদুদা খ্বাইদগী মরু ওইবা কমিতীদি দ্রাফতিং কমিতীনি। দা. বাবা সাহেব অম্বেদকরনা দ্রাফতিং কমিতীগী চিয়র্মেন্নি। মহাক্না খ্বাইদগী মরু ওইবা থবক অদু পাংথোকখি। ঐখোয়না ঙসি ভারতকী সংবিধানগীদমক্তা চাওথোকচবা অসিদা মসিবু শেম্বদা বাবা সাহেব অম্বেদকরগী হৈ শিংলবা লিচীংগী মুৎনাইদ্রবা মমি অদু উরি। খুন্নাই অসিগী মীওই খুদিংমক্কী য়াইফবা হায়বা অসি মাগী লেংদ্রবা পান্দম্নি। মহাক্না নোঙ্গাখিবা নুমিৎ দিসেম্বর ৬ অসিদা ঐখোয়না মাবু নীংশিংজৈ অমদি খুরুমজৈ। লৈবাক অসিবু চাওখৎপা অমদি মপাঙ্গল কনবা অমা ওইহন্নবা হোৎনবদা মহাক্কী থৌদাং নীংশিংনীংঙাই ওই। দিসেম্বর ১৫ অসি সরদার বল্লভভাই পতেলগী লৈখিদবা নুমিৎনি। লৈবাক অসিবু অমত্তা ওইনা পুন্সিনবদা লৌমীগী মচা ওইনা হৌরক্লগা য়োৎকী মী ওইখিবা সরদার পতেলগী থৌদাং শিংথানীংঙাইনি। সরদার সাহেবসু সংবিধান সভাগী মীহুৎ ওইরম্মি। মহাক ফন্দামেন্তেল রাইৎস, মশিং য়ামজদবা অমসুং ত্রাইবেলশিংগীদমক্তা শেম্বা এদভাইজরী কমিতীগী চিয়র্মেন ওইরম্মি।

২৬/১১ অসি ঐখোয়গী সংবিধানগী নুমিৎনি অদুবু কাওঙমদ্রবা থৌদোক অমনা চহি মাপলগী মমাংদা ২৬/১১ অসিদা তেরোরিস্তশিংনা মুম্বাইদা লান্দাখি। থৌদোক অদুদা থৱাই থাখ্রবা থৌনা ফবা মীচমশিং, পুলিসকী মীওই, ঙাক-শেলগী মীওইশিংবু নীংশিংলি অমসুং মখোয়গী মফমদা কোক নোঞ্জরি। মখোয়গী কৎথোকপা অদুবু লৈবাক অসিনা কৈদৌঙৈদসু কাওবা ঙমলোই। তেরোরিজম হাবসি ঙসি মালেমগী মফম খুদিংদা নুমিৎ খুদিংগী থোকপা অকিবা থৌদোক ওইরি। হৌখিবা চহি ৪০ রোম অসিদগী ভারত্তা তেরোরিজম্না মরম ওইদুনা অৱাবা কয়া মায়োক্নরি। মরাল লৈজদ্রবা মীওই কয়াগী থৱাই মাংখ্রে। অদুবু চহি খরগী মমাংদা ভারতনা মালেমগী লৈবাকশিংগী মমাংদা হিরমসিদা নৈনরুবা অমদি মসিদগী ওইরকপা অকিবগী মশক ওইরবা খুদোংথিবশিং অদুবু হায়রুবদা মখোয়না থৱাই য়াওনীংখিদে। অদুবু ঙসিদি তেরোরিজম্না মখোয়দসু খুদোংথিবা কয়া মায়োক্নহল্লরে। মসিদগীদি মালেমগী সরকারশিং, মীওইবগী লোনচৎপু থাজবা, মীয়ামগী লৈঙাকপু থাজবশিংনা মসিবু অচৌবা শিংনবা ওইনা উরক্লি। তেরোরিজম্না মালেমগী মীওই লোনচৎতা শিংনরি। মখোয়না মীওইবগী পাঙ্গলবু মাংহন্ননবা হোৎনরক্লি। মরম অদুনা মালেমগী মীওইবগী হক ঙাক্লিবা পাংঙ্গলশিংনা অমত্তা ওইনা পুন্সিন্দুনা তেরোরিজম্বু মাইথিবা পীবা ঙম্নবা হোৎনরি। ভগবান বুদ্ধ, ভগবান মহাবীর, গুরু নানক, মহাত্মা গান্ধীনা মালেম অসিদা অহিংশা অমদি নুংশিবগী পাউজেল শন্দোকপীরম্মি। তেরোরিজম অমদি কাংলুপ নাইবা থৌওংনা খুন্নাইগী কয়াৎপু শোন্থহন্দুনা তোখাই তোখাই তাহন্নবা কন্না হোৎনরি। মরম অসিনা মীওইবগী হক কনবগী পাঙ্গল কনখৎহনবা হায়বা অসি চপ চারবা মতম্নি।

ঐগী নুংশিজরবা ইরৈবাক মচাশিং, দিসেম্বর মরিদা ঐখোয়না ঈশিং লান্মীগী নুমিৎ নেভী দে পাংথোক্কনি। ভারতকী ঈশিং লান্মীশিংনা ঐখোয়গী সমুদ্রা মপানগী ঙাক শেনবগী থৌ পুরি। ঈশিং লান্মীগী মীওইশিংগী মফমদা ঐনা নুংঙাইবা ফোংদোকচরি। ঐখোয়গী সভ্যতা চাওখৎপা হায়বা অসি তুরেলশিংগী তোর্বান্দগী হৌরকপনি হায়বসি পুম্নমক্না খঙনরবা ৱাফম্নি। ঐখোয়গী তুরেলশিং শিন্ধু, গঙ্গা, জমুনা, সরস্বতি অমদি সমুদ্রশিংনা ঐখোয়গী শেনমিৎলোনগী ফিভম অমসুং খুন্নাইগী ফিভম অনিমক্তা অচৌবা থৌদাং লৌরি। মসিনা ঐখোয়গী লৈবাক্না মালেমগী লৈবাকশিংগা ফাওনহল্লিবা থোংঙ্গালনি। ঐখোয়গী লৈবাক্না ঐখোয়গী লমদম অসিগা সমুদ্রশিং অসিগা তৎন-থানবা য়াদ্রবা মরি লৈনরি। পুৱারীবু হনগৎনা য়েংলুবদা চহি ৮০০-৯০০গী মমাংদা চোল-শাগৈগী মতমদগী হৌনা চোল-নেভীনা খ্বাইদগী মপাঙ্গল লৈবা ঈশিং লান্মীশিংগী মনুংদা অমনি। চোল-লৈঙাকপু পাক শন্না শন্দোকহনবদা মতম অদুগী খ্বাইদগী চাওবা পাঙ্গল ওইহনবদা ঈশিং লান্মীগী থৌদাং য়াম্না চাওনা য়াওখি হায়না থাজনৈ। চোল-নেভীগী হৈসিংলবা খোংচৎ কয়াগী খুদম সঙ্গম-সাহিত্যদা ফংলি। মালেমগী অয়াম্বা ঈশিং লান্মীশিংনা মখোয়গী লালগী জহাজশিংদা নুপীশিংবু য়াম্না থেংনা য়াওহনখি হায়বসি মীওই খরতনা খঙনরমগনি। অদুবু চোল-নেভীদদি চহি ৮০০-৯০০গী মমাংদা নুপীশিংনা অচৌবা থৌদাং য়াখি। নুপীশিংনা লাল ফাওবা শোক্নখি। চোল-লৈঙাক্লোইশিংনা জহাজ শাবগী থবক্তা য়াম্না হৈ-শিংই। ঈশিং লান্মীগী মরমদা ৱারি শারকপা মতমদা ছত্রপতি শিবাজী মহারাজ অমসুং ঈশিং লান্মীগা মাগা লৈনবা মরি অদুবু কনানা কাওথোকপা ঙমনি। কোংকনগী সমুদ্র খোংবান অসি শিবাজী মহারাজগী লৈঙাক্কী মনুং চল্লি। শিবাজী মহারাজগী লৈঙাক্কী মনুং চনবা লানবন কয়া মদুদি সিন্ধু দুর্গ, মুরুর জংজিরা, স্বর্ন দুর্গনচিংবা অসি সমুদ্রা খোংবান্দা নত্রগনা সমুদ্রনা ইকোই কোইশিনবা মফম্নি। লানবনশিং অসিগী ঙাক-শেনবগী থৌদাং অসি মরাথা ঈশিং লান্মীনা লৌই। মরাথা নেভীদা অচৌ অচৌবা জহাজ অমদি অপীকপা হিশিং য়াওই। মখোয়গী ঈশিং লান্মীশিং অসি য়েক্নবদা লান্দাবা অমদি য়েক্নবদগী ঙাকথোকপদা য়াম্না হৈ-শিংই। মরাথা ঈশিং লান্মীগী মরমদা নৈনরকপদা কানহোজী আংগ্রেবু করম্না কাওগনি। মহাক্না মরাথা ঈশিং লান্মীবু অৱাংবা থাক্তা পুখৎপীরম্মি। লোইননা মফম কয়াদা মরাথা ঈশিং লান্মীগী লানবন কয়া লিংখৎপীরম্মি। নীং খা তম্লবা মতুংদা ভারতকী ঈশিং লান্মীনা তোঙানবা থৌদোক কয়াদা গোৱাগী নীং-তম লালহৌবু ওইরো, নত্রগনা ১৯৭১গী ভারত-পাক্কী লানবু ওইরো, মদুদা মখোয়গী তৌ-ঙম্বা থৌনা উৎখি। ঈশিং লান্মীগী মরমদা নৈনরকপা অসিদা ঐখোয়না লানগী ৱা ঙাক্তা ওইনা খল্লে। অদুবু ভারতকী ঈশিং লান্মীনা মীওইবগী মতং কয়া থৌদোক কয়াদা পাংখি। চৎলিবা চহি অসিগী জুন্দা বাঙ্গলাদেশ অমদি ম্যানমারদা সাইক্লোন মোরা লাকপদগী খুদোংথিবা কয়া মায়োক্নখি। মদুদা ঐখোয়গী ঈশিং লান্মীগী জহাজ আইএনএস সুমিত্রানা খুদক্তা মী কনবগী মতেং পাংখি অমসুং ঙা ফাবা কয়াবু তেক্তা কাইদনা মরমদম বাঙ্গলাদেশতা শিন্নখি। চৎলিবা চহি অসিগী মে-জুন্দা শ্রীলঙ্কাদা অকিবগী মশক ওইরবা ঈশিং-ইচাও লাকপদা ঐখোয়গী ঈশিং লান্মীগী জহাজ অহুম্না খুদক্তা মফম অদুদা চৎতুনা লৈঙাক অমদি মীয়ামগী মতেং পাংখি। সেপ্তেম্বর থাদা বাঙ্গলাদেশতা থোকখিবা রোহিংয়াগী থৌদোক্তা ঐখোয়গী ঈশিং লান্মীগী জহাজ আইএনএস ধরিয়ালনা মীওইবগী পাংবা য়াবা মতেং পাংখি। জুন থাদা পপুৱা ন্যু গিনীগী লৈবাক্না ঐখোয়দা এসওএস পাউজেল থারকপদগী মখোয়গী ঙা ফাবা হিশিংগী ঙামীশিং কনবগী থবক ঐখোয়গী ঈশিং লান্মীশিংনা পাংথোকখি। নবেম্বর ২১দা নোংচুপ গল্ফতা ললোনবগী জহাজ অমদা দাকুশিংনা লান্দাবা মতমদা ঐখোয়গী ঈশিং লান্মীগী জহাজ আইএনএস ত্রিকান্দনা মতেং পাংখি। ফিজীদা অনা লায়েংগী হিদাক লাংথক পুবা, খুদক্কী মতেং পাংবা, য়ুমলোন্নবা লৈবাকশিংগী মতেং পাংবা পুম্নমক্তা ঐখোয়গী ঈশিং লান্মীনা চাওথোকচনীংঙাই ওইবা থৌদাং কয়া লৌখি। ঐখোয় ভারত মচাশিংনা ঐখোয়গী সেক্যুরিতী ফোর্সশিং হায়বদি লান্মী, ঈশিং লান্মী অমদি নোংথক লান্মী পুম্নমক্তা মখোয়গী মথৌনা, তৌবা ঙম্বগী শক্তি, মী কিদবা, কৎথোকপা অসিদা ইকোক নোঞ্জরি। ইরৈবাক মচা কোতি ১২৫না নুংঙাইনা পুন্সি লেন্নবগীদমক্তা মখোয়না লৈবাক্কীদমক থৱাই কৎথোক্লি। চহি খুদিংগী দিসেম্বর ৭ অসি আর্ম ফোর্সেস ফ্লেগ দে পাংথোকই। মসি লৈবাক অসিগী খুৎলাই পাইবা লান্মীশিংগী মফমদা ইকাই খুম্নবা উৎপগী নুমিৎনি। হন্দক্তি ঙাক-শেল মন্ত্রালয়না দিসেম্বর ১-৭ ফাওবা খোংজং অমা পাংথোক্নবা ৱারেপ লৌখ্রে। মসিদা আর্ম ফোসেসকী মরমদা মীয়াম্বু খঙহনবা, মিৎ-না শিংহনবনচিংবা য়াওরি। চয়োল অমা চুপ্না অঙাং-অহল খাইদনা ফিরাল থেৎপীগদবনি। লৈবাক্কী মীয়াম্না লান্মীগী মফমদা ইকাই খুম্নমবা উৎপগী ইহৌ অমা হৌহনসি। মসিগীদমক্তা ঐখোয়না আর্ম ফোর্সেস ফ্লেগ য়েন্থোক্কনি। অদোমগী মনাক নকপদা লৈবা আর্ম ফোর্সেসকা মরি লৈনবা মীওইশিংনা থেংনরকপা থৌদোক, মখোয়না থৌনা ফবা পাংথোক্লিবা থৌদোকশিং মদুগী ভিদিও অমদি ফোতোশিং লৈরবদি #armedforcesflagday (হেসতেগ আর্ম ফোর্সেস ফ্লেগ দে)দা থাবীরকপা য়াগনি। স্কুল, কোলেজশিংদা লান্মীগী মীওইশিং কৌরগা মখোয়গী মরমদা নৈনবা য়াই মসিনা ঐখোয়গী অনৌবা মীরোলনা লান্মীগী মরমদা খঙননবগী অচৌবা অফবা তাঞ্জা অমা ওইগনি। মতাং অসিদা ঐখোয়গী লান্মীশিংগী য়াইফ-থৌরাংগীদমক শেল তুংশিলহৌবগী অফবা তাঞ্জা অমা ওইরগনি। শেনফম অসি লান্মীগী য়াইফ-থৌরাং বোর্দ আর্মী ৱেলফিয়র বোর্দতা শিন্নরগা লানফমদা লৈখিদ্রবা অথৌবশিংগী ইমুং মনুং, শোক্লবা লান্মীশিংগী য়াইফ-থৌরাংদা মখোয়বু মতেং পাংবদা শিজিন্নগনি। শেলগী তেংবাংগীদমক অদোম্না ksb.gov.inদগী অকুপ্পা মরোল খঙবীবা য়াগনি। মসি অদোম্না কেশ-লেশকী খুৎথাংদা পীবীরবসু য়াই। মতাং অসিদা ঐখোয়না লান্মীশিংগী পুক্নীং-থৌনা কনখৎনবগীদমক থৌরাং খরা লৌখৎহৌবা য়াই। মখোয়গী য়াইফ-থৌরাংদা ঐখোয়সু শরুক য়ামিন্নসি।

ঐগী নুংশিরবা ইরৈবাকচাশিং, দিসেম্বর ৫ অসি ‘মালেমগী লৈহাও’গী নুমৎনি। ঐনা ঐগী লৌমী ইচি-ইনাওশিংগসু ৱারি খরা শান্ননীংই। মালেমগী য়াম্না মরু ওইবা শরুক অমদি লৈবাক্নি। ঐখোয়না চারিবা পুম্নমক লৈবাক্কা মরি লৈনবা ঙাক্তনি। অমরোমদা ফুদ-চেন অসি লৈহাওগা মরি লৈনৈ। অমুক্তা খন্দুনা য়েংবীয়ুনে, মালেম অসিদা করিগুম্বা লৈহাও চেনবা লৈবাক লৈরমদ্রবদি করি ওইরমগনি? খল্লুবদা অকিবা ফাওই। মীওবগী পুন্সি অসি ওইথোক্লমদবসু য়াই। ঐখোয়গী চৎন-লোনচৎ অসিদা মৈহৌরোন্দগী হৌনা লৈবাক-লৈহাওগী মরমদা খঙনা লাকই। ঐখোয়গী লৈবাক অসিগী লৌমীশিংগী পুন্সিদা ৱাফম অনি অসি য়াম্না মরু ওই। অমনা মহাক্কী লৈবাক-লৈহাওদা নীংজবা অদুগা লোইননা বিজ্ঞানগী ওইবা মওংদা লৈবাক-লৈহাও মাংহন্দনবা হোৎনবা। ঐখোয়গী লৈবাক অসিগী লৌমীশিং অসিনা পারি-পুরীগী চৎন-পথাপকা শাগোন্ননা চৎপগা লোইননা অনৌবা বিজ্ঞানগী ওইবা মাইকৈদগীসু চংশিন্নবা হোৎনরি। মসিগীদমক্তসু ঐখোয় পুম্নমক্না চাওথোকচফম থোকই। ঐহাক্না হিমাচল প্রদেশকী হমীরপুর জিলাগী তোহু খুঙ্গং, ভোরঞ্জ ব্লোক অমসুং মফম অদুগী লৌমীশিংগী মরমদা তাখি। মফম অদুগী লৌমীশিংনা অহানবদা পামদা পামদা রসায়নগী হার শিজিন্নখি। অদুনা মরম ওইরগা মফম অদুগী লৈবাক্কী ফিভম কাইরকখি। চাথোক হন্থরকখি। মরম অদুনা শেন্থোক হন্থখি। খুঙ্গং অদুগী থৱাই য়াওবা লৌমী খরনা ওইরক্লিবা ফিভম অদুদা নুংনাংবা পোক্লকপদগী মতম চানা লৈবাক-লৈহাও য়েংসিলহল্লগা তঙাইফদবা হার, মাইক্রো-ন্যুত্রেন্ত অমসুং ওর্গানিক্কী ওইবা হার হাপখি। সোইল হেল্থনা মরম ওইরগা মতম চানা মখোয়গী লৌবুকশিংবু য়েংসিলহৌবদগী ২০১৬-১৭তা নীংথম লৌরোক্কী গেহুগী চাথোক অসি একর অমদা লুপা লিশিং ৪দগী ৬ হেন্না লৈখি। মসিগা লোইননা লৈবাক-লৈহাওসু হেন্না ফগৎলকখি। হার হেন্না শিজিন্নবদগী শেল হেন্না চৎপসু তৌদ্রে। ঐহাক্না য়াম্না নুংঙাইজরিবদি ঐখোয়গী লৌমী ইচিল-ইনাওশিংনা সোইল-হেল্থ কার্দতা পীরিবা পাউতাকশিং অসি ইনবীদুনা অফবা চাথোক পুথোকপা ঙম্লকপা অসিনি। হৌজিক্তি ঐখোয়গী লৌমীশিংনসু খঙলে, চাথোক লৈহনগে হায়রবদি মালেম ইমাগীদমক হান্না খনবা তাই। ঐখোয়না মাগীদমক খল্লবদি মানসু ঐখোয়গীদমক খনবীগনি। লৌমী কোতি ১০ হেনবনা সোইল-হেল্থ কার্দ শাখ্রে। মসিনা মখোয়গী লৈবাক-লৈহাওশিংগী মরমদা খঙজবগা লোইননা মদুগী মতুং ইন্না মহৈ মরোং থাবা ঙম্লগনি। ঐখোয়না মালেম ইমাবু নীংজৈ, খুরুমজৈ অদুবু ঐখোয়না য়ুরিয়াগুম্বা খুৎশেমগী হার কয়া হাপচিন্দুনা মাগী হকশেলদা কয়াম্মুক কাইহনবগে হায়বা অদুদি খঙলব্রা? মথৌ তাবদগী হেন্না য়ুরিয়া চাইশিনবনা অকাইবা কয়া লাকই হায়বা অসি বিজ্ঞানগী ওইবা মওংদা থিজিনবদগী খঙবা ঙম্লে। লৌমীদি মালেম ইমাগী মচানি। মচানবু মমানা নাবদা মতৌ করম্না নুংঙাইগদৌরিবনো? মসিগী মমা মচাগী মরি অসিবু নৌহৌননা শেমদোকপগী মতম অদু হৌজিক ওইরে। মালেমগী মচা লৌমীশিং অসিনা লাক্কদৌরিবা চহি ২০২২, হায়বদি নীং খা তম্বা চহি ৭৫ শুরকপা মতম ফাওবদা ঙসি শিজিন্নরিবা য়ুরিয়াগী চাং তঙ্খাই অমা হন্থবা ঙমগনি হায়না ৱাশকপীবা ঙমগদ্রা? লৌমী ইচিল-ইনাওশিংনা ৱাশক অসি ঙাকপা ঙম্লবদি মালেম ইমা অসি মসা ফগৎপগা লোইন-লোইননা চাথোকসু হেনগৎলক্কনি। লৌমীগী পুন্সি অদুসু অহোংবা কয়া লাকপা উগনি।

ঐখোয় পুম্নমক্না গ্লোবেল ৱার্মিং, ক্লাইমেৎ চেঞ্জগী মরমদা খঙবা হৌরে। দীৱালীগী মাংওইননা নীংথমথা লাকপগী মতম অমসুং লৈরম্মি। দিসেম্বর হৌরক্লে নীংথমথাদি তপ্না তপ্না চংশিল্লক্লি। অদুবু নীংথমথা হেক হৌবগা ফৈজুপ মনুংদগী থোক্নীংদে হায়বা ঐখোয়না খঙই। অদুবু অসিগুম্বা তাঙ্কক অসিদসু লৈবাক্কীদমক অমসুং মীয়ামগীদমক খনবা কয়া অমদি মখোয়গী তৌফম থোকপা মথৌ পাংথোক্লি। অদুনা অমুক ঐখোয়দা থৌনা হাপ্লি। ময়ামসু তাবদা ঙক্কনি, মধ্য প্রদেশকী মীমান্নদ্রবা শুপ্নগী চহি ৮দা ঙাইরিবা তুশার কৌবা নুপা মচা অমনা মখোয়গী খুঙ্গং অদুদা লমহাংদা মাংশিনবগী চৎনবী অসি মুথৎকে হায়না চপ য়ুংনা লেপখি। অসুক চাওখ্রবা থবক অমা পীকখ্রবা অঙাং অমনা পাংথোকপা হায়বসি অরাইবা অমদি নত্তে। অদুবু নীংলবদি ঙমদবা লৈতে। চহি ৮গী অঙাং অসি ৱা ঙাংবা ঙমদে। অদুনা হুইশেল অমনা মাগী খুৎলাই ওইনা শিজিন্নরি। অয়ুক পুং ৫ হেক তাবদা হৌগৎলগা খুলগী য়ুমথোং খুদিংদা চৎতুনা হুইশেল খোংদুনা মীয়াম্বু হৌদোকই। খুৎনা ইঙ্গিৎ তৌরগা মপান্দা খোং হামদনবা পাউতাক পী। নুমিৎ খুদিংগী য়ুমথোং ৩০-৪০ চৎলগা লু হেনবগী পাউতাক পীনবা হোৎনৈ। মসিনা মরম ওইদুনা কুম্হারী খুঙ্গংদা কনানসু লমহাংদা মাংশিনবা তৌদ্রে। অঙাং ওইরিবা তুশারগী থবক অসিদগী ঐখোয়না খঙলে মদুদি লু নান্ননবা হোৎনবদা নুপী-নুপা, অঙাং পুমনমক্না থবক তৌবা য়াই। ঐখোয়গী মিমান্নদ্রবা ইচিল-ইনাওশিং অসি থৌনা য়াম্না ফৈ অমসুং ৱাশক চেৎলি। লম খুদিংমক্তা মখোয়না শিংথানীংঙাই ওইবা থবক তৌরি। শান্ন-খোৎনববু ওইরো, করিগুম্বা মখল অমগী চাংদম্ননববু ওইরো, খুন্নাইগী ওইবা থবক্তবু ওইরো, হিরম খুদিংমক্তা মীনা লাকচবা য়াদে। ময়াম পুম্নমক্না নীংশিংবীরমগনি, ঐখোয়গী মিমান্নদ্রবা শান্নরোইশিংনা রিও ওলেম্পিক্তা তকমান ৪ ফংখি। অমসুং মিৎ উদ্রবশিংগী ওইবা ব্লাইন্দ তি-২০ ক্রিকেৎ কপতসু য়েম্পিয়ন ওইখি। লৈবাক অসিদা মখল কয়াগী চাংদম্নবা পাংথোকই। হৌখিবা নুমিৎ খরনিগী মমাংদা উদয়পুরদা ১৭ শুবা নেস্নেল পেরা-স্বিমিংগী অথোই-অহেন তান্নবা পাংথোকখি। লৈবাক অসিগী তোঙান তোঙানবা মফমশিংদগী নহা মীমান্নদ্রবা ইচিল-ইনাওশিংনা মখোয় মখোয়গী হৈশিংবা উৎখি। মখোয়শিংগী মরক্তা গুজরাৎকী চহি ১৯ শুরবা জিগর থাকুর কৌবা মীশক অমা য়াওখি। মহাক্কী মশা অদুদা ৮০% মসল য়াওদ্রে। অদুবু মহাক্কী থৌনা অমসুং হোৎনবা অদু অঙকপনি । মহাক্না মেদল ১১ ফংখি। ৭০ শুবা নেস্নেল পেরা-স্বিমিংদসু সনাগী তকমান ফংখি। মহাক্কী হৈ-শিংবা অদুনা মরম ওইরগা স্পোর্ত ওথোরিতী ওফ ইন্দিয়ানা ২০-২০ পেরালিম্পিক্স শান্নরোই ৩২ খনবগী মরক্তা মহাকসু য়াওখি। মহাকপু গুজরাৎকী সেন্তর ফোর এক্সিলেন্সতা ত্রেনীং পীগনি। জিগর থাকুরগী থৌনা অসিবু থাগৎচবগা লোইননা য়াইফা মঙ্গল পীজরি।

নুমিৎ খরনিগী মতুংদা ‘ইদ-ইমিলাদ-উন-নবী’গী কুম্মৈ পাংথোক্লগনি। নুমিৎ অসি পৈগম্বর হজরত মোহম্মদ সাহেবকী মপোক নুমিৎনি। ঐহাক্না ইরৈবাক মচা খুদিংমক্তা য়াইফা পাউজেল পীজরি অমসুং লাক্লিবা ইদ কুম্মৈ অসিনা খুন্নাই অসিবু ইং-তপ্পা অমসুং চাওখৎপা পুরকপা কমহনবা ওইরসনু।

(ফোন কোল)

‘খুরুমজরি প্রধানমন্ত্রীজী, ঐহাক কানপুরদগী নীরজা সিংহনি। ঐহাক্না অদোমদা হায়জরি মদুদি অদোম্না চহি অসিদা ‘মন কী বাত’তা ফোংদোকখিবা ৱাফমশিং অদুগী মনুংদা খ্বাইদগী মরু ওইবা ৱাফম তরা খক অমুক হন্না শ্যার তৌবীরকউ। মদুনা ঐখোয়না ৱাফমশিং অদু অমুক হন্না নীংশিংজবগা লোইননা মদুদগী করিগুম্বা খরা তমজবা ফংগনি। থাগৎচরি।’

(ফোল–কোল লোইরবা)

অদোম্না তাকপীরিবা ৱাফম অসি অচুম্বনি, ২০১৭ লোইশিল্লক্লে, ২০১৮না থোংজিলদা লেপ্লরে। অদোম্না তাকপীরিবা অসি ওন্থোক্না চুমখ্রে। ৱাফম অসিদা করিগুম্বা খরা হাপচিল্লগা শেমদোক-শাদোক্নীংবগী অপাম্বসু পুক্নীংদা ফাওরকই। ঐখোয়গী খুঙ্গংগী অহল-লমনশিংনা মতম লৈবা খিবিক্তা ঐখোয়দা হায়বীবা অসি – অৱাবশিংবু কাওথোকউ অদুগা নুংঙাইখিবা পুংজাশিংবু কাওথোক্কনু। ঐহাক্না খঞ্জবদসু ৱাফম অসি ঐখোয়না শন্দোকপা চুমগনি। ঐখোয়সু অফবশিং অদু নীংশিংলগা চহি ২০১৮দা চংশিল্লসি। ঐখোয়গী লৈবাক অসিদতা নত্তনা মালেম পুম্বা অসিদা চহি লোইশিল্লকপদা, চহি অদুদা থোকখিবা পাংথোকখিবশিং অদু নৈনবগা লোইননা মথংগী চহিগী থৌরাংশিং শেমগৎলি। ঐখোয়গী লৈবাক অসিদদি হৌখিবা চহি অদুদা মরু ওইখিবশিং অদু অমুক হন্না মেদিয়াদা উৎপা অমসুং নৈননবা হোৎনৈ। মসি পোজিতিবসু ওই অদুগা নেগতিব ওইবসু য়াওখি। ঐখোয়না ২০১৮ অসি অফবা ৱাফম ঙাক্তা নীংশিংবগা লোইননা অফবা থবক খক্তা তৌগে হায়বগী ৱাখলগা লোইননা খোং থাংজিনবীনীংদবরা? ময়াম্না অদোমগী পুন্সিগী পোজিতিব ওইবা এক্সপেরিএন্স মঙাখক শ্যার তৌবীবা য়াবরা? মদু অদোম্না ফোতো. ৱারি মচা, নত্রগা ভিদিও ওইনা থাবীরকপা য়াগনি। ঐখোয়না ২০১৮ অসি অফবা, অশেংবা ৱাখল্লোনগা লোইননা তরাম্না ওকসি। পোজিতিব থিংকিং অমসুং পোজিতিব ওইবা ৱাফম ঙাক্তা নীংশিংলগা চহি অসি তরাম্না ওকসি।

ময়াম্না নরেন্দ্র মোদী এপ, মাই গোব নত্রগা শোসিএল মেদিয়াদা #PositiveIndia (হেশতেগ পেসিতিব ইন্দিয়া)গা লোইননা পেসিতিব ওইবা ৱাফমশিং শ্যার তৌবীরকউ। ময়ামদা অনৌবা থৌনা পীবা য়াবা ৱাফম নীংশিংসি। অফবা ৱাফম নীংশিংলবদি অফবা থবক তৌনীংগনি।

ঐখোয় পুন্না #PositiveIndiaগীদমক হোৎনমিন্নরসি। পোজিতিব বাইব অমা শেম্লগা অনৌবা চহিবু তরাম্না ওক্লসি। অপুনবগী পাঙ্গল অমসুং মদুগী মহৈ ঐখোয় পুন্না য়েংমিন্নরসি। ঐহাক্না মথংগী ‘মন কী বাত’তা অদোমগী #PositiveIndiaদা লাকপা ৱাফমশিং অদুবু ইরৈবাকচাশিংদা য়ৌহন্নবা শুংশোই শোইদনা হোৎনগনি।

নুংশিজরবা ইরৈবাক চাশিং, মথংগী থাদা, মথংগী ‘মন কী বাত’তা ময়ামগী মরক্তা অমুক লাকচগে। ৱাফম কয়া ফোংদোকচবগী তাঞ্জা লৌজগে। হন্না হন্না থাগৎচরি।