ପିଏମଇଣ୍ଡିଆ

ଅଂଶଗ୍ରହଣ କରିବେ 17-ବର୍ଷରୁ କମ ବୟସର ଯୁବ ପ୍ରତିଭା;

 199 ସ୍ୱର୍ଣ୍ଣ, 199 ରୌପ୍ୟ, 275 ବ୍ରୋଞ୍ଜ ପଦକ ପାଇଁ ହେବ ପ୍ରତିଯୋଗୀତା

ପ୍ରଥମ ଖେଲୋ ଇଣ୍ଡିଆ ବିଦ୍ୟାଳୟ କ୍ରୀଡା ପ୍ରତିଯୋଗୀତା ଆସନ୍ତାକାଲି (ବୁଧବାର) ନୂଆଦିଲ୍ଲୀର ଇନ୍ଦିରା ଗାନ୍ଧୀ ଇଣ୍ଡୋର ଷ୍ଟାଡିୟମଠାରେ ଆରମ୍ଭ ହେଉଛି । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଚଳିତ ବର୍ଷର ଏହି ପ୍ରଥମ ଜାତୀୟ ସ୍କୁଲ କ୍ରୀଡାକୁ ଆନୁଷ୍ଠାନିକ ଭାବେ ଉଦ୍ଘାଟନ କରିବେ ।

ଖେଲୋ ଇଣ୍ଡିଆ ବିଦ୍ୟାଳୟ ପ୍ରତିଯୋଗୀତା 31 ଜାନୁୟାରୀରୁ 8 ଫେବୃୟାରୀ 2018 ପର୍ଯ୍ୟନ୍ତ ନୂଆଦିଲ୍ଲୀରେ ଅନୁଷ୍ଠିତ ହେବ । 17-ବର୍ଷରୁ କମ ବୟସର ଯୁବ ଛାତ୍ର ପ୍ରତିଭାମାନେ 16ଟି କ୍ରୀଡା ବିଭାଗରେ ଅଂଶଗ୍ରହଣ କରିବେ । କ୍ରୀଡା ବିଭାଗଗୁଡିକ ହେଲା – ତୀରଚାଳନା, ଦୌଡକୁଦ, ବ୍ୟାଡମିଣ୍ଟନ, ବାସ୍କେଟବଲ, ବକ୍ସିଂ, ଫୁଟବଲ, ଜିମ୍ନାଷ୍ଟିକ୍ସ, ହକି, ଜୁଡୋ, କବାଡି, ଖୋଖୋ, ବନ୍ଧୁକଚାଳନା, ସନ୍ତରଣ, ଭଲିବଲ, ଭାରୋତ୍ତଳନ ଏବଂ କୁସ୍ତିଯୁଦ୍ଧ । ଏହି ପ୍ରତିଯୋଗୀତାରେ ଭାରତର ଯୁବ ପ୍ରତିଭାମାନଙ୍କର କ୍ରୀଡା ନୈପୁଣ୍ୟ ପ୍ରଦର୍ଶୀତ ହେବ ।

ଖେଲୋ ଇଣ୍ଡିଆ ବିଦ୍ୟାଳୟ କ୍ରୀଡାରେ ବିଭିନ୍ନ ବିଭାଗ ପାଇଁ 199ଟି ସ୍ୱର୍ଣ୍ଣ, 199ଟି ରୌପ୍ୟ ଏବଂ 275ଟି ବ୍ରୋଞ୍ଜ ପଦକ ଲାଗି ପ୍ରତିଯୋଗୀତା ହେବ ।

ଦେଶରେ ତୃଣମୂଳ ସ୍ତରରୁ କ୍ରୀଡା ସଂସ୍କୃତିକୁ ଉଜ୍ଜିବିତ କରିବା ଲାଗି ଖେଲୋ ଇଣ୍ଡିଆ କାର୍ଯ୍ୟକ୍ରମ ଆରମ୍ଭ କରାଯାଇଛି । ଭାରତ ଭଳି ଏକ ଦେଶକୁ କ୍ରୀଡା ପ୍ରତିଭାର ଏକ ବିଶାଳ ଓ ମହାନ କେନ୍ଦ୍ର ଭାବେ ଗଢ଼ିବା ଏବଂ ଏଥିଲାଗି ସବୁ ପ୍ରକାର କ୍ରୀଡାର ଆବଶ୍ୟକ ଭିତ୍ତିଭୂମି ଢ଼ାଂଚା ପ୍ରସ୍ତୁତ କରିବା ହେଉଛି ଏହି କାର୍ଯ୍ୟକ୍ରମର ଅନ୍ୟତମ ଉଦ୍ଦେଶ୍ୟ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ସ୍ୱପ୍ନକୁ ସାକାର କରିବା ଲାଗି ଖେଲୋ ଇଣ୍ଡିଆ ଅଭିଯାନ ମାଧ୍ୟମରେ ବିଦ୍ୟାଳୟ ସ୍ତରରୁ ବାଳ ପ୍ରତିଭାମାନଙ୍କୁ ଚିହ୍ନଟ କରାଯାଇ ସେମାନଙ୍କୁ ଭବିଷ୍ୟତର ଚାମ୍ପିୟନ ରୂପେ ବିକଶିତ କରାଯିବ ।

ଏକ ଉଚ୍ଚସ୍ତରୀୟ କମିଟି ଦ୍ୱାରା ପ୍ରମୁଖ କ୍ରୀଡା କ୍ଷେତ୍ର ପାଇଁ ଚିହ୍ନଟ / ମନୋନୀତ ହୋଇଥିବା ଛାତ୍ରଛାତ୍ରୀ ଓ ଯୁବ ପ୍ରତିଭାମାନଙ୍କୁ ବାର୍ଷିକ 5 ଲକ୍ଷ ଟଙ୍କା କରି 8 ବର୍ଷ ଯାଏଁ କ୍ରୀଡା ବୃତ୍ତି ପ୍ରଦାନ କରାଯିବ ।

**********