ভারতকী প্রধানমন্ত্রী

ময়াম পুম্নমকপু প্রবাসী ভারতীয় নুমীৎকী থৌরম অসিদা য়াইফ-পাউজেল পীজরি। প্রবাসী নুমীৎকী অসিগুম্লবা চৎনদুনা লাক্লবা অসিদা, ঙসি অহানবা প্রবাসী পর্লিয়ামেন্তরিয়ান কনফরেন্সকী অনৌবা পন্দুপ অমা হাপচিল্লে। ঐহাক্না নোর্থ অমেরিকা, সাউথ অমেরিকা, অফ্রিকা, য়ুরোপ, এসিয়া, পেসিফিক রিজন অমসুং মালেমগী মফম কয়াদগী মফম অসিদা লেংবীরক্লিবা প্রবাসী মরূপশিংবু থমোয় শেংনা তরাম্না ওকচরি।

ভারত্তা তরাম্না ওকচরি! য়ুমদা তরাম্না ওকচরি!

নখোয়গী ইপা ইপুশিং, কুইরবা মতমগী মেমোরীশিং অদু ভারতকী তোঙান তোঙানবা মফমশিংগা শম্নরি। নখোয়গী ইপা ইপুশিংগী মরক্তা খরা অমনা ললোন ইতিক তৌনবা খরা অমনা মহৈ মশিংগীদমক চৎখিবনি। খরা অমনা নম হাদুনা মফম অসিদগী পুখি, খরা অমনা মোইথেম তৌদুনা পুখি। মখোয়গী হকচাং অদু মফম অসিদগী চৎখ্রবসু মখোয়গী থৱায়, মখোয়গী ৱাখলগী শরুক খরদি মফম অসিদা থম্বীরম্মি। মরম অদুনা নখোয়না ভারতকী এয়ারপোর্ত অমা হেক্তদা খোংদাবা মতমদা মফম অসিগী লৈবাক লৈহাওবু উরগা নখোয়গী থমোয়দা করিগুম্বা খরা ফাওবা হৌরকই।

মতম অদুদা খৌনাওদা করিগুম্বা খরা ফুনবগুম তৌই। মীৎলুদগী পীরাং শিন্থগে তৌই। অদোম্না মদু থিংনবা ফনা হোৎনৈ, অদুবু থিংবা ঙমদে। অদোমগী মীৎলু অদু চোৎ চোৎ লাওরকই অদুবু মদুদা ভারত্তা লাকচবগী মকা লাম্বা অদুসু ফাওই। নখোয়দা ফাওরিবা অদু ঐহাক খঙবা ঙম্মি। ঙসি মফম অসিদা নখোয়বু উরগা নখোয়গী অহল লমনশিং অদুনা কয়াদা নুঙাইজরমগদগে হায়বদু ঐখোয় খঙবা ঙম্মি। মখোয়না লৈরিবা মফম অদুদগী নখোয়বু উবা মতমদা হায়ফম তৌফম খঙদনা নুঙাইরমগনি।

মরূপশিং,

চহি চা কয়াগী মতমদগী ভারত্তগী চৎখিবা মখোয়শিং অদু ভারতনা কৈদৌনুংদা পুক্নিংদগী লাপথোক্না থমখিদ্রি। মালেমগী লৈবাক অমদা লৈখ্রবসু মখোয়না ভারতকী সিভিলাইজেসন অমসুং মগুণশিং অদু ঙাক্তুনা থম্লি। মসি ঙক্নীংঙাই ওইদে মদুদি ভারত্তগী হৌখিবা মীওইশিংনা মফম অমদা চৎখিবা মতমদা, মফমদুদা অমত্তা ওইনা লৈমিন্নদুনা, মফম অদুদা য়ুম কৈ শাদুনা লৈখি।

মখোয়না নাকল অমরোমদা ভারতকী শক্তম অদু ঙাক্তুনা থম্লি, অমসুং নাকল অমরোমদনা মফমদুগী লোন, মফমদুগী চাকচা-ইথক, মফমদুগী ফিজেৎ লৈতেংদা মপুং ফানা তোৎন তিন্নখি। ভারত্তগী হৌখিবা মীওইশিংনা শান্ন-খোৎনবা, আর্তস, সিনেমাগী লমদা মালেমগী থাক্তা মশক তাক্লি। রাজনিতীগী ৱাফম পল্লগদি, ভারত্তগী হৌখিবশিংগী মিনি ৱার্ল্দ পার্লিয়ামেন্ত অমা ঐহাক্কী মীৎমাংদা উবা ফংলি। ঙসি ভারত্তগী হৌখিবা মীওইনা মোরীশস, প্রোতুগল অমসুং আয়র্লেন্দগী প্রধানমন্ত্রী ওইরি। ভারত্তগী হৌখিবা মীওইশিংনা তোঙান তোঙানবা লৈবাকশিংদা ওফিসশিংগী মকোক থোংবা অমসুং রজ্যশিংগী মকোকথোংবশিং ওইরি। মসি ঐখোয়গী চাউথোকচনীংঙাইনি মদুদি গুয়ানাগী হান্নগী রাষ্ট্রপতি শ্রী ভারত জগদেব ঙসি মফম অসিদা ঐখোয়গী ইরক্তা তিনবীররি। তিনবীরিবা শক্নাইরবা পুম্নমকসু অদোম অদোমগী লৈবাকশিংগী রাজনিতীদা মরুওইবা থৌদাং লৌবীরি।

মরূপশিং,

নখোয়গী অহন লমনশিংগী পোক্নফম ভারতনা নখোয়গীদমক চাউথোকচরি। নখোয়না ফংলিবা মায় পাকপা অদু ঐখোয়গীদমক চাউথোকচনবা হিরম অমনি। মতৌ করম্না রিজন পুম্নমক্কী জিও পোলিতিক্সতা নখোয়না এফেক্ত তৌরিবা, মতৌ করম্না নখোয়না নখোয়গী লৈবাকশিংগী পোলিসীশিং শেম শাবগে হায়বগী ৱারীশিং অদু ভারতকী প্রজাশিংনা থৱায় য়াওনা পারি।

ইচল-ইচে অমসুং ইচিল-ইনাওশিং,

ময়াম পুম্নমক্না শাংলবা মতম কয়াদগী তোঙান তোঙানবা মফমশিংদা লৈরি। ভারত্তা মীৎয়েং থম্বা হেঙ্গৎলক্লি; মালেম অসিনা ঐখোয়দা য়েংলিবা মীৎয়েংদা অহোংবা লাক্লি, মদুগী মরু ওইবা মরমদি ভারত অসি মশা মথন্তা অহোংবা পুরক্লি, ত্রান্সফোর্ম ওইরক্লি। সিস্তেম খুদিংদা মপুং ফানা অহোংবা পুরকপা অদু নখোয়না উবা ফংগনি; সেক্তর খুদিংদা হোংবা য়ারোইদবা অওনবা অমগী মমি নখোয়না উবা ফংগনি।

• মসিনা মরম ওইদুনা ২০১৬-১৭তা দোলর বিলিয়ন ৬০গী মমাংদা অমুক্তা ওইখিদ্রিবা এফ দি আই ভারতনা ফংখি।
• হৌখিবা চহি ৩দা ইজ ওফ দুইং বিজিনেস রেঙ্কিংদা থাক ৪২ ৱাংখৎলে।
• হৌখিবা চহি অনিদা ৱার্ল্দ ইকোনোমিক ফোরমগী গ্লোবেল কম্পেতিতিবনেস ইন্দেক্সতা মফম ১২ ৱাংখৎলে।
• হৌখিবা চহি অনিদা ঐখোয়গী গ্লোবেল ইনোবেসন ইন্দেক্সতা থাক ২১ কাখৎলে।
• লোজিস্তিক্স পর্ফোমেন্স ইন্দেক্স পোইন্ত ১৯ ফগৎলে।
• ঙসি, ৱার্ল্দ বেঙ্ক, আই এম এফ অমদি মুদীজগুম্বা ইনস্তিত্যুসনশিংনা ভারত্তা পোজিতিব ওইবা মীৎয়েং অমদা য়েংলি।
• হৌখিবা চহি অহুমদা কনস্ত্রকসন, এয়ার ত্রান্সপোর্ত, মাইনিং, কমপ্যুতর-সোফতৱেয়র অমসুং হার্দৱেয়ার, ইলেক্ত্রিকেল ইক্বিপমেন্তশিংগুম্বা সেক্তরশিংদা অপুনবা ইনবেস্তমেন্তকী তঙ্খাই হেন্না ইনবেস্ত তৌরে।

মরূপশিং,

গুদ্স এন্দ সর্বিসেস তেক্সকী থোংদা ঐখোয়না লৈবাক অসিগী তেক্সকী লাং কয়াবু ককথৎলে। মাইনিং, ফর্তিলাইজর, তেক্সতাইল্স, এভিয়েসন, হেল্থ, দিফেন্স, কনস্ত্রক্সন, রিএল ইস্তেত, অমসুং ফুদ প্রোসেসিং, অসিগুম্বা ঐখোয়না রিফোর্ম তৌদবা সেক্তর অমত্তা লৈত্রে।

মরূপশিং,

ঙসিদি ভারত অসি মালেমদা নহা য়াম্না লৈবা লৈবাক অমা ওইরে। নহাশিংগী মশিং থিঙমদ্রবা মঙলান কয়া লৈরি। মখোয়গী ইনর্জী অদু অচুম্বা লমদা শিজিন্নদুনা মখোয় মশাগী করবার তৌবা ঙমজনবা সরকার অসিনা লেপ্পা লৈতনা খোংথাং কয়া পায়খৎলি। মসিগীদমক্তা স্কিল ইন্দিয়া মিসন, স্তার্ত অপ স্কিম, স্তেন্দ অপ স্কিম অমসুং মুদ্রা স্কিমগুম্বা স্কিমশিং হৌদোক্লি। মশানা মশাবু থবক পীজনবগীদমক মুদ্রা স্কিমগী মখাদা লোন কোতি ১০ হেন্না সেঙ্কসন তৌখ্রে। মখল অমত্তগী বেঙ্ক গরেন্তী য়াওদনা প্রজাদা লুপা কোতি লাখ ৪ হেন্না য়েনথোকখ্রে। স্কিম অসি খক্তনা লৈবাক অসিদা অনৌবা ইন্ত্রপ্রিনর কোতি ৩ পুথোক্লে। ২১সুবা চহিচা অসিবু ৱাখলদা থমদুনা সরকার অসিনা ইনফ্রাস্ত্রকচর অমসুং ত্রান্সপোর্ত সেক্তরদা ইনবেস্তমেন্ত হেঙ্গৎহল্লে। হাইৱেশিং, রেলৱেশিং, এয়ারৱেশিং, ৱাতরৱেশিং অমসুং পোর্তশিংবু মখোয় মশেল অমনা অমবু মতেং পাংবা ঙম্নবা দিবেলপ তৌরে।

মরূপশিং,

ঙসিদি ভারতকী অনৌবা রেলৱে ত্রেকশিং শরুক অনি হেন্না য়াংনা তিংলে। ত্রেক অনি ওইহনবনা থবক খোংজেল য়াংনা চত্থরি। নেস্নেল হাইৱেশিং শেম্বগী থবক শরুক অনি হেঙ্গৎনা চত্থরে। গ্রিদতা অনৌবা রিন্যুএবল ইনর্জী কেপাসিতী শরুক অনি হেন্না শম্নহল্লে। 

স্মোল স্কেল ইন্দস্ত্রীশিংনা লোকেলগী থাক্তা অনৌবা থবকশিং ফংলে। খুদম ওইনা করিগুম্বা ঐখোয়না উজ্জ্বলা স্কিমগী মতাংদা হায়বা তারগদি মসিনা লায়রবা নুপীশিংদা লেম্না গ্যাস ফংহনবা অদু খক্তা নত্তে। স্কিম অসিনা নুপী কোতি অহুম হেনববু চাকখুমগী মৈখুদগী অৱাবা কোকহল্লে। মসিনা রাজ্যশিংবু কেরোসিন ফ্রি ওইহনবতা নত্তনা কান্নবা কয়া অমসু ফংহল্লে। উজ্জ্বলা স্কিম হৌদোক্লবা মতুং  অনৌবা কুকিং গ্যাস দিলরশিং এপোইন্ত তৌরে অমসুং গ্যাস দেলিবরী মেন কয়া মশিং হেঙ্গৎলে। মদুনা তাকপদি খুন্নাই অসিদা সোসিয়েল রিফোর্মশিংগী মথক্তা ইকোনোমিক এমপৱারমেন্তসু চত্থরি।

মরূশিং,

ক্লাইমেত চেঞ্জদা পাংথোকখিবা পেরিস এগ্রীমেন্তকী মতমদা ফ্রান্সকী রাষ্ট্রপতিগা লোয়ননা ঐহাক্না ইন্তর্নেস্নেল সোলর এলাইন্স অমা শেম্নবা ৱাফম থমখি। হৌজিক্তি মদু থবক ওইনা পাংথোক্লে। ঐখোয়না সোলর তেক্নোলোজীগীদমক গ্লোবেল প্লেতফোর্ম অমা শেম্লে অমদি সোলর রিছ কন্ত্রীশিংগী মতেংগা লোয়ননা শেল থাদরে।  

ইচল-ইচে অমশুং ইচিল-ইনাওশিং,

নেপালদা য়ুহা হাদুনা চৈথেং পীখিবা মতমদা নত্রগা শ্রী লঙ্কাদা ইচাউ মায়োক্নখিবা মতমদা নত্রগা মালদিবসতা ইশিং ফংদবগী অৱাবা মায়োক্নখিবা মতমদা ভারতনা অহানবা রেস্পোন্দেন্ত ওইনা মফম অদুদা থুংখি।

য়েমেন্দা চরাংনবা থোক্লকপা মতমদা ঐখোয়গী মীওই ৪,৫০০বু অশোই অঙাম য়াওদনা পুথোরকখি, অদুম ওইনমক অতোপ্পা লৈবাক্কী মীওই ২,০০০সু পুথোরকখি।

মরূপশিং,

২০১৮ অসি মালেমগী অহানবা লানজাউগী চহি ১০০ ফারকপা চহিনি। মালেমগী অহানবা অমসুং অনিসুবা লানজাউদা ভারত লান্মী লাখ ১.৫না মখোয়গী মপুন্সি কত্থোকখি। লানফম অনি অদুদা ভারতনা অতোপ্পা লৈবাক্কী লম ইঞ্চি অমা ফাওবা পামখিবা লৈতে। ভারতনা চাউনা কত্থোকখিবা অদু মালেম অসিনা খঙগদবনি। য়ু এন পিছ কীপিং ফোর্সেসতা খ্বাইদগী য়াম্না শরুক য়ারিবশিংগী মরক্তা ভারতসু অমা ওইরি।  

মরূপশিং,

ঐহাক্না লৈবাক অমা হেক্তদা চৎপা মতমদা লৈবাক অদুদা লৈরিবা ভারত্তগী হৌখিবা মীওইশিংগা উননবা ঐহাক্না মতম পুম্নমক্তা হোৎনৈ। অদুগুম্লবা খোংচৎ অদুদা নখোয় খরগা উন্নবা ফংখিবা অদু ঐহাক্কী লাইবক ফবনি।

মমাংদদি মপাল লমদা লৈখ্রবা ভারত মচাশিংগী তোঙানবা মিনিস্ত্রী অমা লৈরম্মি অদুবু এন আর আইশিংগী ৱারোল তারবা মতুং ময়ামগী খুদোং চাদবা অদু কোক্নবা এক্সতর্নেল এফিয়র্স মন্ত্রালয়দা পুন্সিনখ্রে। হান্নদি পি আই ও অমসুং ও সি আই হায়বা স্কিম অনি লৈরম্মি অদুবু মীওই অয়াম্বনা অনি অদুগী মথৌ অদু মমুৎ তানা খঙদবনা অমত্তা ওইনা পুন্সিন্দুনা স্কিম অমা শেম্লে।

ইচল–ইচে অমসুং ইচিল–ইনাওশিং,

হিন্দুস্থান অসি অমুক্তং তৌগে খনখিবদা তৌদনা তোকখিবা লৈবাক নত্তে। ইজ ওফ লিভিংগীদমক অসিগুম্বা মখলগী স্কিমশিংনা ভারতকী মীওই কোতী ১২৫গী পুন্সি মহিং লাইথোকহল্লি। ঙসিদি লৈবাক অসিদা লম্বী শেম্বগী খোংজেল, রেল লম্বী শেম্বগী খোংজেল, রেল লাইন্দা মৈ ফংহনবগী খোংজেল, অনৌবা এয়ারপোর্ত শেম্বগী খোংজেল, লাইরবশিংগীদমক সরকারনা য়ুম শাবগী খোংজেল, বেঙ্ক একাউন্ত হাংবগী খোংজেল, গ্যাস কনেক্সন পীবগী খোংজেল থবক পুম্নমক হান্নগা য়েংনরুবদা শরুক অনি, অহুম হেন্না য়াংনা পায়খৎলি।

মরূপশিং,

ভারতনা মালেম পুম্বদা নুংঙাই য়াইফবা, শান্তি, চাউখৎপা, দেমোক্রেতিক ভেল্যুজ, ইনক্লুসিবনেস, কোওপরেসন অমসুং মচিল মনাও ওইবগী মওং মতৌদা পুক্নিং থৌগৎলি। মালেম অসিদা শান্তি, প্রোগ্রেস অমসুং চাউখৎপা পুরক্নবগীদমক ভারতনা লেপ্পা লৈতনা হোৎনখিগনি।

মরূপশিং,

মীফম অসি শরুক য়ানবা ঐখোয়গী বার্তন লৌবিবগীদমক, অদোমগী চিল্লবা মতম কায়থোকপীবগীদমক ঐহাক্না থমোয় শেংনা থাগৎপা ফোংদোকচরি। অদোম্না ইচং থৌনা শরুক য়াবীরিবা অদুনা মীফম অসি মহৈ য়াল্লগনি হায়বা ঐহাক্না থাজবা থম্লি। মথং চহিগী প্রভাসী ভার্তিয় দিবসতা ময়াম পুম্নমক্কা অমুক হন্না উন্নবগী তঞ্জা ফংখিগনি হায়না ঐহাক্না থাজবা থম্লি।

ময়ামবু হায়নীংঙাই লৈতনা থাগৎচরি!!!

জয় হিন্দ!!!