ভারতকী প্রধানমন্ত্রী

মখোয় অসি মতম চানা অচুম্বা ৱারেপ লৌবা মীওইশিংনি অমসুং মখোয় মশামক পুন্সিগী শিংনরকপশিং থেংননবা শেম শাদুনা লৈরি। মখোয়না পুথোরক্লিবা ৱাফমশিং অসিনা লৈবাক অসিগী মীওই মিলিয়ন কয়াগী পুক্নীং থৌগৎকনি। ঐখোয় খুদিংমক্না পুন্সিদা শোইদনা খঙবা অমা লৈ মদুদি পুন্সি হায়বসি তম্বা ঙম্বা নত্তে হায়বসি খঙই। মথংগী হেক মিকুপ্তা করি থোক্কনি হায়বা কনা অমত্তানা হায়বা ঙমদে অমসুং ঐখোয়গী পুন্সিদা হয়েং করি থোক্কনি হায়বা ঙমদে। সোসিয়েল সেক্যুরিতী স্কিম অসিনা তম্বা ঙমদবা থৌদোকশিং থেংননবা ঐখোয়দা থৌনা পী। থৌনা অসি প্রধান মন্ত্রী জীবন বিমা য়োজনা নৎত্রগা প্রধান মন্ত্রী সুরক্ষা বিমা য়োজনা নৎত্রগা অতল পেন্সন স্কিম নৎত্রগা প্রধান মন্ত্রী ভয়া বনধন য়োজনা ওইগেরা অমা হেক্তনা মিলিয়ন কয়াদা কান্নবা পীরি।

সোসিয়েল সেক্যুরিতী স্কিমশিং অসিনা খুন্নাইগী শোৎথরবশিং মরুওইনা, মীচমশিংদা শক্তি পীরি, মসিনা মখোয়না অৱাবা তারকপা মতমদা মখোয়না পুন্সিগী লানফমদা মাইথিবা পীবা ঙমদে। ঐখোয়না সরকার পায়রকপা মতম অদুদা লায়রবশিংগী মখোয়গী বেঙ্ক একাউন্তশিং লৈরমদে, হৌজিক লৈরিবা অসিগুম্না শেল-থুমগী মতেং ফংনবগী লম্বী অমত্তা লৈরমদে।

দলিৎশিং, নমথবীরবশিং, নৈহৎপীরবশিং, লায়রবশিং, ত্রাইবেলশিং, নুপীশিংদা শক্তি পীনবা মখোয়দা বেঙ্কগী কান্নবশিং ফংহন্নবা ঐখোয়না হোৎনরি। অপীকপা উদ্যোগশিং অমসুং অপীকপা ললোন-ইতিক তৌবশিং অমসুং শেল-থুমগী ফিবম চাদবশিংদা ঐখোয়না শেন্থং পীরি। মসিগী ৱাহন্থোক্তি বেঙ্কগী কান্নবা ফংদ্রিবশিংদা ফংহনবা, ফন্দ ফংদ্রিবশিংদা ফংহনবা অমসুং ফিবম চাদ্রিবশিং চাহনবনি।

ৱার্ল্দ বেঙ্কগী ফিনতেক্স রিপোর্তগী মতুংইন্না প্রধান মন্ত্রী জন ধন য়োজনা অসি মী খুদিংমক কোনশিনবা শেল-থুমগী থৌরাং অমনি হায়না ফোংদোক্লিবা অসি তাবদা অদোম হরাওগনি। য়োজনা অসিগী মখাদা ২০১৪দগী ২০১৭ ফাওবগী মনুংদা অনৌবা বেঙ্ক একাউন্ত কোতি ২৮ হাংদোক্লে। মসি মালেম পুম্নমক্কী ওইনা চপ মান্নবা মতম অসিদা হাংদোকপা বেঙ্ক একাউন্তকী চাদা ৫৫নি হায়বদি, তঙ্খাই অমা হেল্লে হায়বনি। মতম অমা ঐখোয়গী লৈবাক অসিদা হায়নবা অমা লৈরম্মি মদুদি, এক বাজু রাম ওর এক বাজু গাউং – মসিগী অর্থদি খুৎ অমনা ভারত্তা অমসুং অতোপ্পা খুৎ অমনা মালেম পুম্বদা।
মসিগী মথক্তা, ২০১৪দা ঐখোয়গী সরকার শেমদ্রিঙৈদা ভারত্তা বেঙ্ক একাউন্ত হাংবা মীওই অসি চাদা ৫০-৫২ ওইরম্বদগী চহী অহুমগী মনুংদা চাদা ৮০ হেন্না য়ৌখি হায়না রিপোর্ত অসিনা হায়রি। মরুওইনা বেঙ্ক একাউন্ত হাংবা নু্পী মশিং ফজনা হেনগৎলে মালেমগী লৈবাকশিংদা সোসিয়েল সেক্যুরিতীগী ৱাফম অসি খন্নদুনা লাকপা কুইরে, মসি ভারত্তদি খন্নদ্রে।

ঐখোয়না সরকার শেম্বা মতম অদুদা ফিবম অসিদা লৈরমখি। লৈবাক অসিগী মীচমশিং সোসিয়েল সেক্যুরিতী ফংলমদে। ভারত অসি মহৌশানা অপুনবা ইমুংগী চৎনবী লৈ। চাদা ২০-২৫দগী চাদা ৩০ ফাওবা পুন্না ইমুং অমদা লৈমিন্নবা মতমদা মদু মশানা সোসিয়েল সেক্যুরিতী ওইজৈ। অদুবু, ইমুং অমগী মীশিং য়ামশিল্লক্তবদগী অহল ওইরবা মমা-মপাশিং অমসুং মচাশিং তোখাইনা লৈনরকই। খুন্নাইগী মওং অসি হোংলক্লে।

ফিবম অসিদা অহোংবা পুরক্নবা, অনৌবা ফিবম অসিদা সেক্যুরিতী পীনবা ঙসিদি লাইফ কথৌজাল, রুপে কার্দ অমসুং একসিদেন্ত কথৌজাল অসি প্রধান মন্ত্রী জন ধন য়োজনাগী মখাদা পীরি। মসিগী মথক্তা পেন্সন স্কিম অমা অমসুং ইন্সুরেন্স স্কিম অনি সোসিয়েল সেক্যুরিতী সিস্তেম অমা ওইনা পায়খৎলে।

মসিগী মহৈ ওইনা ২০১৪দা সরকারগী ইন্সুরেন্স স্কিমশিং য়াওবা মীশিং অসি কোতি ৪.৮ নৎত্রগা কোতি ৫ ওইরম্বা অদু শরুক ১০ হেনগৎতুনা কোতি ৫০গী ময়াদা লৈরে।

ফিবম কয়াদা পান্দম থম্লগা হায়রিবা সোসিয়েল সেক্যুরিতী স্কিমশিং অসি থবক হৌখিবনি। হায়রিবা স্কিমশিং অসিগী কান্নবা অসি লৈবাক অসিগী লমদম খুদিংমক্কী কাংলুপ খুদিংমক্কী মীওইশিং, চহি কাংলুপ খুদিংমক্কী মীওইশিংনা শরুক য়াবা ঙম্নবা য়াম্না পীকপা প্রেমিয়মদা পায়খৎলি।

ঙসি ঐনা অৱা – অনা নংলবা মীয়ামগা উনগনি অমসুং মতৌ করম্না স্কিমশিং অসিনা লৈবাক অসিগী লায়রবা মীয়াম, মীচমশিংদা মতেং পাংখিবগে, মখোয়গী মাইপাকপগী ৱারীশিং তাগনি। মখোয়গী অৱাবা তাবগী ৱারীশিং হনজিন হনজিন তাবা অসি নুংঙাইবা নত্তে অদুবু কনাগুম্বা অমনা অৱাবা তারবা মতমদা মখোয়বু ঙাক শেন্নবা করি পাম্বৈ শীজিন্নখিবগে হায়বগী ৱারীশিং অদুনা মখোয় ঙাকথোকপদা শীজিন্নগনি।

নুংশিরবা ইরৈচাশিং, অদোমনা খঙলে মদুদি, মখোয়গী অৱা-অনাগী ৱারীশিং অসি তারগা ঐখোয়দা নুংঙাইতবা ফাওই, মরমদি ইমুং অমগী মীওই অমা লৈতবদা কনাগুম্বা অমতনা মেনখৎপা ঙমদে, লাই ফাওবনা মেনখৎপা ঙমদে, অদুবু অৱাবা তারবা মতমদা ইমুং অদুনা শেল-থুমগী মতেং খরা ফংলবদি মখোয় মহৌশাগী পুন্সিদা হল্লকপদা মতেং ওইগনি। মসিগী পান্দমদা প্রধান মন্ত্রী জীবন জ্যোতি বিমা য়োজনা অসি হৌদোকখিবনি।

স্কিম অসিগী মখাদা, ঐগী ইরৈচাশিংনা শুপ্নগী লুপা ৩৩০ খক পীরগা লুপা লাখ ২গী লাইফ ইন্সুরেন্স ফংগনি হায়না ঐনা খল্লি। চহী অমদা লুপা ৩৩০ অসি নোংমদা লুপা ১ ফাওবা য়ৌদ্রে। ঙসিদি, অসুক য়ামদবা শেলফমদা কৈথেলদা পোৎ অমা ফাওবা লৈবা ফংলোই। স্কিম অসিগী কান্নবা মতৌ করম্না লৌগদগে হায়বা মীয়াম্না খঙগদবনি। মীওই কোতি ৫.৫ হেনবনা স্কিম অসিগী কান্নবা ফংলি। স্কিম অসিগী মখাদা লুপা কোতি কয়াগী শেলফম ক্লেম ওইনা পীখ্রে। ঐখোয়গা পুল্লিবা ময়াম মখোয়গী ৱারী তারসি-

খুদোংথিবা অমত্তা থোকত্রিঙৈদা মাংজৌননা তাক্লমদে হায়বা ঐখোয় পুম্নমক্না খঙলে। অদোম ইনাক খুল্লবসু অৱাবা তারোই হায়নীংঙাই লৈতে অমসুং অদোম লায়রজরবসু খুদোংথিবা থোক্লোই হায়নীংঙাই লৈতে। মফম অমদা খুদোংথিবা থোকপা য়াই। অদুবু হায়রিবা খুদোংথিবশিং অদু থেংননবা ঐখোয় শেম-শাগদবনি। ঐখোয়গী শেল-থুমগী অৱাবা নংদনবা ঐখোয়না থৌরাং তৌগদবনি।

মসিগী পান্দমদা প্রধান মন্ত্রী সুরক্ষা য়োজনা অসি হৌদোকখিবনি। স্কিম অসিগী মখাদা চহি অমদা লুপা ১২ থীরগা লুপা লাখ ২গী খুদোংথিবা থোকপগী ইন্সুরেন্স ফংগনি, হায়বদি প্রেমিয়ম অসি থা অমদা লুপা ১নি। হৌজিক ফাওবদা মীওই কোতি ১৩-১৪ স্কিম অসি য়াওরে। করিগুম্বা ঐখোয়না মেক্সিকো অমসুং জাপানগী অপুনবা মীশিং য়েংলবদি হায়রিবা লৈবাকশিং অসিগী অপুনবা মীশিংদগী হেন্না কবরেজ তৌরে। অতেনবা মতম অসিগী মনুংদা য়াম্লবা মীয়াম্না ইন্সুরেন্স মশিং অসুক য়াম্না য়াওবা অসিনা তাক্লে মদুদি মীয়াম্না ইন্সুরেন্স করিনো অমসুং মসিগী কান্নবশিং খঙলে হায়বনি।

করিগুম্বা নুপা অমদা খুদোংথিবা থোক্লবদি মহাক্কী ইমুং পুম্নমক অৱাবা মায়োকনৈ। মঙলান পুম্বা কাইখি। কনাগুম্বা অমনা মথং অসিদা ঐখোয়না থবক অসি পাংথোক্কনি, মথং চহি অহুমদা থবক অসি তৌগনি হায়না থৌরাং তৌরম্বশিং অরেম্বা তাদুনা তোকই। অসিগুম্বা কয়া থেংনরবসু অয়াম্বনা ইন্সুরেন্স অসি থওইনদে। কনাগুম্বা অমনা অসুম্না হায়, ঐখোয়না ইন্সুরেন্স লৈগনি। মসি ঐখোয়না লৈরে। ঐখোয় মতম য়াম্না লৈরি। ইন্সুরেন্সকী কান্নবা করিনো? ঙসিদি লৈবাক পুম্বা মসি য়েংনরে অমসুং মীয়াম্না ইন্সুরেন্সকী মরমদা খল্লিবা অসি অহোংবা লাক্লে হায়না ঐনা খল্লি। মীওই কয়া মথং মথং সোসিয়েল সেক্যুরিতী সিস্তেমদা শরুক য়ারকখিনি।

চহী খরগী মমাংদা নোংমগী শুরগা হিংলিবা মী অমনা ইন্সুরেন্সকী মরমদা খল্লমদে অমসুং মদু ইন্সুরেন্স প্রেমিয়ম থিনবা শেল মথৌ ওইবদগী খনদবনি। মহাক্কী শেল অদু হৌজিক হৌজিক্কী মথৌ ওইরিবশিংগী চাদিং তৌগদরা নৎত্রগা মহাক্কী তুংগী থমগদরা হায়বসি অচৌবা পোৎলুম অমা ওইরম্মি। য়েন্সাং-নাপী য়োনবশিং, ওতো রিক্সো থৌবশিং, নোংমগী শুরগা হিংলবশিং নৎত্রগা অফংবা থবক অমা শুরগা হিংলিবশিংনা ইন্সুরেন্সকী খনবা হায়বসি ওইথোক্তবনি।

ঙসিদি, ওইথোক্তবা থবকশিং ওইথোকহল্লে। ঐখোয়গী দলিৎশিং, ঐখোয়গী নৈহৎপীরবা মীয়াম, ঐখোয়গী লায়রবশিং অমসুং ঐখোয়গী ইচল-ইচেশিং অমসুং ইনাওশিংনা মসি পাংথোকপা ঙমলে। শুপ্নগী থা অমদা লুপা ১ খক প্রেমিয়ম থীরগা মীয়াম্না লাইফ ইন্সুরেন্সকী খুদোংচাবা ফংলে। ঈশ্থৌজালগী থৌজালদা হিংলিবা মীওই কাংলুপশিং ঙাক-শেন্নবা লাইফ ইন্সুরেন্স অমা লৈরে। ঐখোয় মীওই খরগা হেন্না ৱারী শানসি।

য়েংউ, অহল ওইরকপা অসি পুন্সিগী মরুওইবা তাঙ্কক অমনি। হিরম খুদিংমক অতোপ্পশিংগী মখা পোনবা মতম অমা লৈররি। চহী মতাং অসিদা শেল-থুমগী মীখা পোন্দনবা পেন্সনগী থবক অসি হৌদোকপনি। ঐখোয়গী অহলশিংগী থৌজাল ঐখোয়না মখা তানা ফংখিগনি অমসুং ঐখোয়না লৈবাক অসি চাউখৎনবা মখা তানা অহলশিংগী থৌজাল ফংবদগী থবক তৌখিগনি। সরকার অসিনা অহলশিংগী য়াইফনবা থবক পায়খৎলি অমসুং সরকার অসিনা অহলশিংগী হকচাংদগী হৌরগা শেল-থুমগী ফিবম ফাওবা ফগৎনবা থবক পায়খৎলি।

অহলশিংনা থেংনরিবা অৱাবশিং য়েংলগা হৌখিবা চহি ৪ অসিদা ঐখোয়গী সরকার অসিনা স্কিম কয়া শেম্লি। হৌখিবা চহীদা সরকার অসিনা প্রধান মন্ত্রী ভয়া বনধন স্কিম হৌদোক্লে। স্কিম অসিগী মখাদা চহি ৬০ হেল্লবা অহলশিংদা চহী ১০ চাদা ৮গী চাংদা রিতর্ন শোইদনা পীগনি। স্কিম অসিগী মখাদা রিতর্নশিং পীবদা শেন্দোয়গী অকা-অকুম অমত্তা লৈহল্লোই।
করিগুম্বা রিতর্ন অদু চাদা ৮দগী তারবদি অৱাৎপশিং অদু সরকারগী পুক্কৈদগী পুথোক্লগা পীগনি। স্কিম অসিগী মখাদা অহলশিংনা রিতর্ন অদু থা খুদিংগী, থা ৩ খুদিংগী, থা ৬ খুদিংগী অমসুং চহিগী খনবা য়াগনি। স্কিম অসিগী মখাদা অহলশিংনা লুপা লাখ ১৫ ফাওবা থমজিনবা য়াগনি। হৌজিক ফাওবদা মীওই লাখ ৩ হেনবনা স্কিম অসিগী কান্নবা ফংলি। মসিগী মথক্তা, অহলশিংদা তেক্সগী কান্নবশিংসু পীরি। অহলশিংগী তেক্স কোমথোকপা অসি চহী অমদা লুপা লাখ ২.৫দগী লুপা লাখ ৩দা হেনগৎলে। মসিগী মথক্তা শেন্দোয়দগী লাকপা ইনকম ককপগী শেলফমগী চাং অদু লুপা ১০,০০০দগী লুপা ৫০,০০০দা হেনগৎলে। হায়বদি মখোয়না থমজিনখিবা শেলফমশিংদগী ফংলকপা শেন্দোয় অদু লুপা ৫০,০০০ ফাওবা তেক্স লৌররোই।

অহলশিংগী য়াইফনবা পায়খৎপা অতোপ্পা করি থৌরাংশিং লৈরিবগে? ২০১৩-১৪দা ঐখোয়গী সরকার শেমদ্রিঙৈ মমাংদা চহী অমদা লুপা লাখ ৫গী ইনকম লাক্লম্বা অহল অমনা চাউরাক্না লুপা ১৩,০০০ নৎত্রগা ১৩,৫০০ তেক্স থিবা মথৌ ওইরম্মি। অদুবু ঐখোয়গী সরকার শেম্বদগী ঐখোয়না ফোরমুলা অদু শেমদোক্লে।

২০১৮-১৯দা তেক্স অদু শুপ্নগী লুপা ২,৬০০দা হন্থরে। হায়বদি মমাংদা লুপা ১৩,০০০ ওইরম্বা অদু হৌজিক শুপ্নগী লুপা ২,৬০০ খক থিরে। মসি অচৌবা অহোংবা অমনি। শেল-থুমগী ৱাফমশিং খক নত্তনা, সরকার অসিনা অহলশিংগা মরি লৈনবা থবকশিং অমসুং মখোয়গী য়াইফনবা থৌরাং কয়া পায়খৎলে।

চহী য়ামশিল্লকপগা লোয়ননা মীয়াম অনা-অয়েক য়াওবা হৌরকই হায়বসি ঐখোয় অয়াম্বনা খঙনরে। লায়েংবা অমসুং হিদাক-লাংথক্কী মমল হেনগৎলে। মসিগী খল্লগা মীয়ামদা অহোংবা মমলদা হিদাক-লাংথক ফংহন্নবা পান্দমদা জন ঔশধি স্কিম হৌদোক্লে। স্তেন্তশিংগী মমলসু হন্থরে। মমাংঙৈগা চাংদম্নবদা খুউ কাং শিনবগী ওপরেসনগী মমল হন্থরে।

মমাংঙৈদা অহলশিং মখোয় হিংলি হায়বা উৎনবা মশামক ওফিস্তা লাকপা মথৌ তারম্মি। হৌজিক জীবন প্রমানগী খুদোংচাবা অসি লাইথোকহল্লে। অহলশিংনা মফম অমদগী অমদা কোইচৎ চৎপা তৌদনবা অহলশিংদা পীগদবা খুদোংচাবশিং লাইনা ফংহন্নবা থবক পায়খৎলে অমসুং মসিনা মখোয় হকচাং ফনা অমসুং চিংলেম্না হিংবা ঙমহনগনি। মসি ওইথোক্নবা ঐখোয়না থবক পায়খৎলি।

অহলশিংনা চহী য়ামশিল্লক্লবা মতমদা কনাগুম্বা অমগী মখা পোল্লোইদবনি অমসুং মখোয়গী পুন্সি অদু চিংলেম্না হিংগদবনি। মখোয়না শেলফম খরা পেন্সন ওইনা ফংগদবনি, মসিগীদমক সরকারনা অতল পেন্সন স্কিম হৌদোক্লে। স্কিম অসিগী মখাদা অহল কোতি ১ হেন্না য়াওরি অমসুং মসিগী মনুংদা চাদা ৪০দি নুপীশিংনি। স্কিম অসিগী মখাদা লুপা ৪,০০০ থমজিনগনি।
হৌখিবা চহী ৩ অসি তশেংনা য়েংবদা চাউরাক্না মীওই কোতি ২০ রোম প্রধান মন্ত্রী সুরক্ষা বিমা য়োজনা, প্রধান মন্ত্রী জীবন জ্যোতি য়োজনা অমসুং অতল পেন্সন স্কিমনা ঙাকশেল্লি। কান্নবা ফংলবশিংগী মনুংদা চাদা ৫০দি খুঙ্গংদা লৈবশিংনি।
স্কিম খুদিংমক্কী তুংদা মরুওইবা য়ুম্বী অনি খক লৈ – মদুদি অহানবদা মী খুদিংমক ইন্সুরেন্সনা কোনশিনগদবনি অমসুং খ্বাইদগী লায়রবশিংনা য়াওবা ঙম্নবা মীওই অদুনা খ্বাইদগী পীকপা প্রেমিয়ম থীগদবনি। মসি লায়রবা মীয়ামগী য়াইফনবা থবক তৌবনি অমসুং মখোয়দা শক্তি পীবনি।

তোঙান-তোঙানবা স্কিমশিংগী কান্নবা ফংলবশিংনা মতৌ করম্না মখোয়না অমসুং মখোয়গী ইমুং-মনুংনা অৱাবা তারবা মতমদা শেন্থং ফংবগে হায়বদু ঐখোয়না খঙলে।

মখোয়গী ৱারীশিং অসিনা ঐখোয়দা লৌশিং পীরি হায়না ঐনা থাজৈ। ঐখোয়দা ইন্সুরেন্স য়াওবনা কয়া য়াম্না মরুওইবগে হায়বদু মসিনা উৎলে। অদোমনা হায়রিবা ইন্সুরেন্স স্কিমশিং অসিগী খুদোংচাবা লৌনবা ঐনা খঙহল্লি অমসুং অদোমগী লৈকাই, অদোমগী ওফিস্তা লৈবশিংদা হায়রিবা স্কিমশিং অসিগী মরমদা অদোম্না পাউ পীগদবনি অমসুং হায়রিবা স্কিমশিং অসিগী খুদোংচাবা লৌনবা তকশিনগদবনি।

মফম অসিদা লৈরিবা কান্নবা ফংলবা খুদিংমক হায়রিবা স্কিমশিং অসিগী কান্নবা লৌরিবশিংগী অহিংবা খুদম ঙাক্তনি অমসুং অদোমগী অকোইবদা লৈরিবশিংদা মসিগী কান্নবশিংগী মরমদা পুক্নীং থৌগৎনবা ঐনা খঙহল্লি। অদোম ইশামক বেঙ্ক নৎত্রগা পোস্ত ওফিস অমদা প্রধান মন্ত্রী সুরক্ষা বিমা য়োজনা অমসুং প্রধান মন্ত্রী জীবন জ্যোতি য়োজনা য়াওবা য়াগনি।

অদোম্না বেঙ্ক অমদা চৎতুনা অতল পেন্সন য়োজনা য়াওবা য়াগনি। লৈবাক অসিগী এল আই সি ওফিস অমদা চৎতুনা অদোম্না প্রধান মন্ত্রী ভয়া বনধন য়োজনা য়াওবা য়াগনি।

ঐনা অতোপ্পা অমগা অদোমদা হায়নীংলি। অহলশিংনা পুন্সি নুংঙাইনা হিংবা য়াবা করম্বা মখলগী স্কিমশিং লৈরিবগে। লৈবাক অসিগী অহলশিং অসি মশক নাইবা অহলশিং ঙাক্তনি। ঐহাক্না রেদ ফোর্ত্তগী করিগীদমক অদোম্না গ্যাস সবসিদী মথৌ ওইরিবনো হায়বা মতমদা অদোম্না মদু লৌখিদে। লৈবাক অসিগী মীওই কোতি ১.২৫ গ্যাসকী সবসিদী লৌদ্রে।
হৌজিক ঐখোয়গী অহলশিং রেলৱে তিক্কেৎ ককপদা খর শাফরে। অদুবু রেলৱেনা মসিগী ফোর্মদা অদোম সবসিদী লৌদবা পাম্বরা হায়না হংলি। তিকেৎকী মমল অদু অদোম্না লোইনা পীবা পাম্বরা?

ঐখোয়গী লৈবাক্কী অহল লাখ কয়া রেল তিকেৎকী সবসিদী লৌদ্রে, মখোয়গী খোঙচৎ অদুগী মমল মপুং ফানা পীরে। মসি এদভর্তাইজ অমা নত্তে, নৎত্রগা আপিল অমা নত্তে। ঐখোয়গী অহলশিংনা য়াম্না চাউনা কৎথোক্তুনা চিংলেম্বা পুন্সি অমদা হিংলি হায়বদু উৎপনি। মসি লৈবাক অসিগী অপীকপা পাউ অমা নত্তে।

ঐখোয়গী লৈবাক্কী মীওইশিংনা মসিগুম্না থবক ময়াম অমা তৌরি, ঐখোয়গী অহলশিংনা করিগুম্বা অফবা খরা তৌরকপা মতমদা মদু অদোমগীনি । ঐখোয়গী লৈবাক অসিগী লায়রবশিং, ইমাশিং অমসুং ইচলশিংগী য়াইফনবা থবক তৌনবা মাংদা থোকপীরকউ। মীয়াম্না ইকাইখুম্নবা উৎলিবা মীওই খুদিংমক চিংলেম্বা পুন্সি অমা ফংগনি। অমুক হন্না ঐনা অদোমবু থাগৎচরি।

থাগৎচরি।