ভারতকী প্রধানমন্ত্রী

খুরুমজরি, অদোম কমদৌরি?

ঙাইহাক্কী মমাংদা ঐখোয়গী হায় কম্মিসন্নরনা হায়খি নখোয়গীদমক প্রধান মন্ত্রীনা মতম কাইথোক্লগনি। অশেংবদি নখোয় ময়াম্না ঐগীদমক মতম কাইথোকপনি। মতম অসি নখোয় ময়াম নুমিদাংগী চাক তোক্লবা মতুংদা তুম্ননবা শেম শানরবা মতমনি। অদুবু নখোয় ময়াম ঐগীদমক মিকপ থোক্তুনা অহিং অথেংবা অসিদা মফম অসিদা লাক্লি অমসুং য়ুমথংনবা লৈবাকশিংদগীসু নখোয় ময়াম মফম অসিদা লাক্লি। মরম অদুনা ঐ নখোয় ময়ামগী মীনুংশি অদুগীদমক য়াম্না হরাওজৈ।

ঐখোয়না স্তদিয়মদা ক্রিকেৎ য়েংবা মতমদা ঐখোয়না বোল অদু কদাইদা লৈবগে হায়বা মফম খঙদে। অথাপ্পদা শান্নবা ক্রিকেৎ মেচ তেলিবিজনদা ঐখোয়না য়ুমদা য়েংবা মতমদা ঐখোয়না বোল অদু কদাইদা লৈবগে হায়বা খঙই, বোলরগী ফিবম খঙই, বেৎসমেন কদাইদা লৈবগে হায়বা খঙই অমসুং পুম্নমক ঐখোয়না খঙই।

মরম অদুনা ভারতকী ৱাংমদা লৈবা মীওইনা ভারত্তা লৈরিবা মীওইশিংদগী হেন্না ভারত্তা থোক্লিবা থৌদোকশিংগী মরমদা খঙবা হেল্লি। মখোয়না অকুপ্পা ৱারোলশিং ফজনা খঙই। মালেমগী মফম কয়াদা লৈরিবা ভারত মচাশিংনা ভারতকী অনৌবা অফবা পাউ অমা তাবদা মখোয় হরাওবা হায়বসি মশানা তাবনি।

হৌখিবা চহি মরি অসি নখোয় করি খনবগে?  মসি চাউখৎপা ওইবা য়াই নৎত্রগা অমা ওইবা য়াই মসিগী মমাংদা করি ওইরম্বগে? ভারতকী পাসপোর্ত অসি হেন্না মগুন লৈরে হায়না নখোয়না খনবরা? নখোয়না মালেমগী লৈবাক অমগী এয়রপোর্ত্তা তারুবা মতমদা, নখোয়না ইমিগ্রেসন কাউন্তরদা চংলুবদা অমসুং নহাক ভারত মচানি হায়রুবদা মীওই অদুনা খুদক্তা য়েংলগা মহাক্না য়ানীংবা নৎত্রগা য়ানীংদবা উৎলক্কদরা? মমাংদদি নহাক্না মখোয়গা খুৎ শোক্নবা মতমদা মখোয় অদুম য়াখি, হৌজিক্তি নখোয়না খুৎ শোক্নবা মতমদা নহাক্কী খুৎ অদু থাদোক্লোই। মসি খুদোংচাবা অমা নত্তবরা? মসিগী অহোংবা অসি লৈবাক অসিদা অহোংবা পুরকপদগী লাকপনি অমসুং লৈবাক অসি হৌজিক য়াংনা চাউখৎলি।

মসি মোদীনা মরম ওইদুনা নত্তে। মসি ভারত মচা বিলিয়ন ১.২৫ অসিনা মরম ওইদুনা লাকপা অহোংবনি। মালেমগী মফম অমদা শান্নরোইশিংনা মেদল ফংবদা মোদীনা হুমাং তাদে। অদুবু মসি সরকার শেম্লবা মতুংদা ওইথোকপা ঙমখি, মোদীনা খনফম থোকপা মীওইশিং চুম্না খনখি অমসুং মখোয়না মেদল ফংবা ঙম্লকখি।

নিয়ম চুম্না পাংথোকপদা মখোয়গী ফংফম থোকপা ফংবদা মীয়াম অঙকপা পোকখি। মসিগী থবক অসি সরকারগী মথৌনি। ঐখোয়গী ফোরমুলাদি সব কা সাথ সব কা বিকাস হায়বসিনি। সব কা সাথ সব কা বিকাস হায়রিবা লাইৱা অসি শক্তি য়াম্না লৈ। মসিগী লাইৱা অসিগী মতুংইন্না, লৈবাক অসিগী নাগরিক খুদিংমক্না হৌজিক লৈবাক অসি চাউখৎপগী মতম য়ৌরক্লে হায়না খল্লি অমসুং লৈবাক অসি চাউখৎহনবা হায়বসি ঐখোয়গী থৌদাংনি।

মমাংদা লৈরম্বা মীওইশিংনা অমাংশঙ মথৌ তাই হায়বা খঙদবরা খঙদে? মসি মোদীনা সরকার পায়রক্লবা মতমদা দরকার ওইবরা? মখোয়গী ময়ুমদা অমাংশঙ অমা শানবা মীয়াম্না অকক্নবা মীওই অমখক প্রধান মন্ত্রী ওইরকপা ঙাইরমবরা? মসি ওইনীংবা ওইজনসু হায়দুনা কনা অমত্তনা থৌশাদনা লৈথোক্লমখি। অতেনবা মতম অসিগী মনুংদা অমাংশঙ ক্রোর নিপাল শারে অমসুং খুঙ্গং লাখ কয়া লমহাংদা খোঙ হামদ্রে।

মমাংদা ঐখোয়না থবক তৌনবা ৱারেপ অমা লৌবা মতমদা ঐখোয়গী থবক খুৎতৌ অসিদা তৌরম্লবদি ভারত্তা খুদোংচাদবা অমত্তা থেংনরোই। মতম শাংনা খুদোংচাদবা কয়া থেংনদুনা লাকখি। লৈবাক অসি নীংতম্বা ফংবা চহি ৭০ সুরবসু হৌজিক খুঙ্গং ১৮,০০০, ১৮সুবা চহিচাগী ফিবমদা হিংলি। হায়রিবা খুঙ্গংশিং অদুদা মৈ ফংদে। হৌজিক ফাওবা লৈবাক অসিগী য়ুমথোং ক্রোর ৪ মৈ ফংদ্রি। মসিগী মতাংদা ঐখোয়না ৱারেপ লৌরে, মতম অমা থারে অমসুং চহি অমগী মনুংদা মখোয়দা মৈ ফংহনখি। মরম অদুনা ঐখোয়না থবক তৌগনি অমসুং থবক অদু পাংথোক্ত্রি ফাওবা ঐখোয় ফমদুনা লৈথোক্লোই।

অৱাবশিং কোকহনবদগী থাজবা হেনগৎলকপনি ।মীপুম খুদিংমক্না মসি পাংথোকপা য়াই হায়না খল্লি, ঐখোয়না মসি পাংথোকপা য়াই হায়না খল্লি। ভারতনা অমুক্তদা সেতলাইত ১০০ থাগৎলে হায়বা মালেমগী মফম কয়াদা লৈরিবা ভারত মচাশিংনা খঙবদা মখোয় কয়া য়াম্না চাউথোকচরমগনি। মরুপশিং য়েংউ, অমুক্তদা সেতলাইত ১০০ থাগৎলে। ঙসিদি, ভারতনা অসিগুম্বা মখলগী থবক অসি পাংথোকপা ঙম্লে।

ভারতনা মসিগী থৌনা উৎথোক্লে। ঙসিদি ভারতনা লৈবাক অসিগী অপুনবা মীশিংদগী হেন্না মোবাইল ফোন শারে। ভারত মতমগা চুনবা মওংদা চাউখৎলক্লি। ঐখোয়না সরকার পায়রকপা মতমদা ঐখোয় অসি শেন-থুমগী লমদা মালেমগী ওইনা ৯সুবা নৎত্রগা ১০সুবদা লৈরমখি। হৌজিক ঐখোয় ৬সুবা পোজিসনদা লৈরে। ঐখোয়গী ফ্রান্সকী মকোক্ত লৈবা অসি হন্দক্কী অসিনা অহানবনি। য়াম্না থুনা ঐখোয় ৫সুবা, ৪সুবা অমসুং ৩সুবা মফমদা লৈরক্লগনি।

ঙসি, করিগুম্বা মালেমগী য়াংনা চাউখৎলক্লিবা ইকোনোমীশিংগী মরক্তা মিং পল্লকপদা ভারত য়াওগনি। মরম অদুনা লৈবাক অসি য়াংনা চাউখৎলক্লি, মসি অনৌবা অৱাংবা থাক অমদা পুখৎলক্লি।

নখোয় ভারত্তা লাক্লম্বা য়াই নৎত্রগা লাক্লমদ্রিবা য়াই? থা অনি খুদিংগী! ২০১৯দা ভারত্তা থৌরম কয়া পাংথোক্কনি। ২০১৯গী ৱারী শারকপা মতমদা নখোয়না খনবা য়াই। অদুবু ঐ মসিগী মতাংদা করিগুম্বা খরা হায়নীংই।

২০১৯গী জনুৱারী ২২-২৩দা কাশীদা ঐখোয়গী ইন্তর্নেস্নেল প্রভাসী ভারতীয় দিবস থৌরম পাংথোক্কনি। মালেমগী মফম কয়াদা লৈরিবা ভারত মচাশিং চহি অনি খুদিংগী ভারত্তা লাক্কনি। মসি হন্দক কাশিদা পাংথোক্কনি। ঐ কাশিদগী কারকপা অমা ওইনা নখোয় মফম অদুদা লাক্নবা চেবাউ পীরি।

মরম অদুনা অহানবদা মসিগী খুদোংচাবা নখোয়না লৌগদবনি। নখোয় মশিং য়াম্না প্রভাসী ভারতীয় দিবস থৌরম শরুক য়াগদবনি। ২০১৯গী জনুৱারী ১৪দা মকর সঙ্ক্রান্তি নুমিৎতা কুম্বা মেলা পাংথোক্কনি। মালেমগী মফম কয়াদগী মীওই কয়া কুম্বা মেলা য়েংবা লাকই। মরম অদুনা কাশীদা প্রভাসী ভারতীয় দিবস থৌরম য়াওরবা মতুংদা প্রয়াগ্র রাজদা প্রয়াগ য়েংগদবনি অমসুং জনুৱারী ২৬তা দিল্লীদা চৎলু। মসিগী মথক্তা থৌরম অমা লৈরি, জনুৱারী ২০-২১দা গুজরাতকী অহমদবাত্তা ভাইব্রেন্ত গুজরাত গ্লোবেল ইনভেস্তর সম্মিৎ পাংথোক্কনি। অহনবদা গুজরাত্তা ভাইব্রেন্ত সম্মিৎ, অদুদগী বনারসতা অদুদগী প্রয়াগ রাজ অমসুং প্রয়াগ রাজদগী দিল্লীদা। মসিদগী শাংথনা নহাক্না লৈবা পাম্লবদি মে থা ফাওবা লৈবা য়াই অমসুং ঐখোয়গী নহাক্না তৌগদবা থবক খরা লৈগনি।

নখোয় ময়াম থোরক্তুনা শরুক য়ারিবা অসি ঐঙোন্দা বর পীবনি, নখোয়গী য়াইফ-পাউজেল পীবনি। ঐনা নখোয় ময়াম্বু থাগৎলি।

মালেমগী মফম কয়া শীনবা থুংনা শন্দোক্তুনা লৈরিবা ভারত মচাশিংদা ঐনা হায়নীংবদি ভারতনা নখোয়গীদমক চাউথোকচবা পোকই। মালেমগী মফম কয়াদা ভারত মচাশিংনা চৎলুবদা মতমদা অফবা মিংচৎ পুরকই, মখোয়না ঐখোয়দা চাউথোকচবা পোকহল্লি। ঙসি ঐ প্রসিদেন্তকা ফম্মিন্নখি। ঐ এয়রপোর্তদগী হকথেংননা থৌরম মফম অদুদা চৎখি। প্রসিদেন্তনা নখোয় ময়াম য়াম্না থাগৎখি, হায়বদি মহাক্না মফম অসিদা লৈরিবা ভারত মচাশিং অসিগী চাউথোকচবা পোকই অমসুং ঐনা মসি তাবা মতমদা ভারত্তগী লাকপগী ঐগী চোকথবা অদু ফখি।

মহাক্না মরুওইবা ৱাফম অমা হায়খি। মহাক্না হায়খি, মফম অসিদা লৈরিবা ভারত মচাশিংনা মখোয়গী লৈবাক্কী চাউখৎপদা অচৌবা মতেং পাংখি; মখোয় হিংনবা শেন তানবনি অদুবু মখোয় অরানবা তৌবা মীওশিং নত্তে। ভারত মচাশিংগী মাইকৈদগী খুদোংচাদবা অমত্তা থোকহন্দে।

অনিসুবদা মহাক্না হায়খিবা অমনা, মফম অসিদা লৈরবা ভারত মচাশিংগী তোপ-তোপ্পা মশক অমনা মখোয়না মফম অসিগী খুন্নাইগী থবকশিংদা মতেং পাংই। মখোয়না করিগুম্বা অমদা নত্রগা হিরম অমদা লৈকায়গী মীওইশিংগী মতেং পাংই। য়েংউ, মসিগী গুনশিং অসিনা নখোয়না মখোয়গী থম্মোয় জয় তৌরি। মসি ঐখোয়না লাক্লিবা লৈবাক অসিগী য়াম্না মরুওইবা অমনি অমসুং ঐখোয়গী থবকশিং অসিনা লৈবাক অসিগী মীওইশিং অপেনবা পোকহল্লে।

মসিগী পাউ অসি মালেমগী মফম খুদিংমক্তগী লাক্লি মদুদি খুন্নাই অসি আইন ঙাক্না  চৎপা খুন্নাইশিংনা লমজিংবনি। ভারত মচাশিংগী অসিগুম্বা শাজৎ-লিচৎ অসিনা মালেমগী লৈবাক অমতা নীংবা কাইহন্দে। ভারত মচাশিং লোইনা পাম্নৈ। হীরম কয়াদা, মালেমগী মফম অমদা লৈরিবা ভারত মচাশিং অসি ওফিসিয়েল ওইবা এম্বেসেদরদগী হেনবা ঙাক্তনি, মহাক অসি লৈবাক অসিগী এম্বেসেদরনি।

ঙসিদি, ঐনা মফম অসিদা হেক থুংলবগা নখোয়গী অফবা পাউশিং তাবদা ঐগী চোকথবা পুম্নমক লোইন ফখ্রে। ঐ হরাওই। নখোয় ময়ামগা উনবদা ঐ নুংঙাইবা ফাওই। মফম অসিদা লাক্লিবা নখোয় পুম্নমক ঐনা থাগৎচরি।