ভারতকী প্রধানমন্ত্রী

আই সি তিদা য়ুম্ফম ওইবা মল্তি-মোদেল প্লেতফোর্ম প্রো-একতিব গভর্নান্স এন্দ তাইম্লী ইমপ্লিমেন্তেসন-প্রগতিগী ২৯শুবা মীফম প্রধান মন্ত্রী নরেন্দ্র মোদীনা চেয়র লৌদুনা ঙসি পাংথোকখ্রে।

তেল্লিকম্যুনিকেসন সেক্তরগী খুদোংচাদবশিং কোকহন্নবা পায়খৎলিবা থবকশিং প্রধান মন্ত্রীনা অমুক হন্না য়েংশিনখি। হন্দক নৌনা পায়খৎখিবা অনৌবা তেক্নোলোজীগী থবকশিং য়াওনা মসিগী মতাংদা খুমাং চাউশিল্লিবা থবকশিংগী মতাংদা প্রধান মন্ত্রীদা পাউদমখি। প্রধান মন্ত্রীনা হায়খি, তেলিকোম সেক্তরগা মরি লৈনবা ৱাথোকশিং অসি খ্বাইদগী নৌবা তেক্নোলোজীশিংনা কোকহনগদবনি। সর্বিস পীরিবশিংনা মীয়াম্না পেন্নবা থবক ফজনা পাংথোক্কদবনি।

২৮শুবা প্রগতিগী মীফমদা লুপা লাখ ক্রোর ১১.৭৫ রোমগী প্রোজেক্তশিংগী থবকশিং অমুক হন্না য়েংশিনখি। সেক্তর কয়াদা মীয়াম্না থেংনরিবা খুদোংচাদবশিং কোকহন্নবা থবকশিং য়েংশিনখি।

ঙসি, ২৯শুবা মীফম অসিদা, রেলৱে, অরবান দিবলপমেন্ত, লম্বী, মৈ অমসুং কোয়লা সেক্তরশিং য়াউনা মরুওইবা প্রোজেক্ত ৮ প্রধান মন্ত্রীনা অমুক হন্না য়েংশিনখি। হায়রিবা প্রোজেক্তশিং অসি উত্তর প্রদেশ, জম্মু অমসুং কশ্মীর, হরিয়না, গুজরাত, মহারাস্ত্রা, কর্নাতক, ঝারখন্দ, ওরিশা অমসুং নোংচুপ বেঙ্গলদা পায়খৎপা প্রোজেক্তশিংনি।

দিস্ত্রিক মিনরেল ফাউন্দেসনশিংনা থবক তৌরিবা প্রধান মন্ত্রী খানজী কল্যান য়োজনাগী থবকশিং মখাদা পায়খৎলিবা থবকশিং প্রধান মন্ত্রীনা অমুক হন্না য়েংশিনখি। মিনরেল মরাং কাইনা ফংবা জিলাশিংদা লৈরিবা লন-থুমশিংগী মরুওইবশিং পল্লদুনা মহাক্না কেন্দ্র অমসুং রাজ্য সরকারশিংগী ওফিসিয়েলশিংদা হায়রিবা জিলাশিং অসিদা লৈরিবা মীয়ামগী পুন্সি মহিং ফগৎনবা অমসুং হিংবদা লাইহন্নবা ফন্দশিং শীজিন্ননবা তকশিনখি। মহাক্না মখা তানা হায়খি, মতম কুইনা চাউখৎতনা লাক্লবা জিলাশিং অসিগী মরক্তগী অফবা জিলাশিংগী মরক্তা য়াউরকপা অসি লাইবক য়াম্না ফবনি ।