ভারতকী প্রধানমন্ত্রী

প্রধান মন্ত্রী নরেন্দ্র মোদীনা লুচিংবা কেন্দ্রগী মন্ত্রী মন্দলনা হকশেল অমসুং মেদিকেল সাইন্সকী লমদা ভারত অমসুং উজবেকিস্থানগী মরক্তা মতেং পীনবগী য়ানচে য়ারে।।

মখাগী হিরমশিং অসিদা মতেং পীনবদা য়ানচে অদুনা কোনশিল্লি:

1. 1. মেদিকেলগী খুৎলাইশিং য়াউনা মেদিকেল এজুকেসনগী ইন্সতিত্যুসনশিংগী রিসর্স লেবোরেতোরীশিংগী অমসুং তিচিংগী খুৎলাইশিং অমসুং ফর্মাস্যুতিকেলগী পোৎথোকশিং ললোন–ইতিক তৌনবগী থবকশিং পাকথোক–চাউথোকহনবা;
   2. মপুং ওইবা হকশেলগী থবকশিং কনখৎহনবা অমসুং হকশেলগী খুদোংচাবশিং লিংখৎপা;
   3. মেদিকেল অমসুং হকশেলগী রিসর্স ফগৎহনবা অমসুং হায়রিবা হিরমশিং অসিদা লৌশিং পীথোক–পীশিন তৌনবা;
   4. তেলিমেদিসিন অমসুং ইলেকত্রোনিক–হেল্থ ইনফোর্মেসন সিস্তেমগী লমদা লৌশিং অমসুং তেক্নোলোজীশিং পীথোক–পীশিন তৌনবা;
   5. নুপী অমসুং অঙাংগী হকশেল ঙাকশেনবা;
   6. লাইনাশিংগী মরমদা য়েংশিন্নবা অমসুং লৌনগনবা অমসুং লৌনগনদবা লাইনাশিং লাকশিন্নবা তেক্নোলোজীশিং অমসুং লাল্লোংশিং ফগৎহনবা;
   7. হিদাক–লাংথক অমসুং ফর্মাস্যুতিকেলগী পোৎথোকশিংগী চৎন–কাংলোন শেম্বা;
   8. নাকল অনিনা পাম্নবা হিরম অমদা হেক্তা মতেং পীনবা।

য়ানচে অসি থবক ওইনা পায়খৎনবা য়েংশিন্নবা অমসুং মতেং পীনবগী মখা তাবা অকুপ্পা থবকশিংগীদমক ৱার্কিং গ্রুপ অমা লিংখৎকনি।