ভারতকী প্রধানমন্ত্রী

গঙ্গা তুরেল শেংদোক্নবা, ভাব তাহন্নবা খোঙচৎ অমদা শরুক য়াগদবা চীং কাবদা হৈথোই-শিংথোইরবা মীওই ৪০গী কাংবু অমগা ঙসি প্রধান মন্ত্রী নরেন্দ্র মোদীগা উনখ্রে। কাংবু অদুদা মাউন্ত এভরেস্ত মাইপাক্না কারুরবা মীওই ৮ য়াওরি অমসুং কাংবু অদু মাউন্ত এভরেস্ত অহানবা ওইনা কাখিবী ভারতকী অহানবা নুপী বাচেন্দ্রী পালনা লুচিংখি।

কেন্দ্র সরকারগী নমামী গঙ্গে কেম্পেন্না ইথিল পীখিবা এক্সপিদিশন অদু মিশন গঙ্গে হায়না কৌখি। থা অমা চুপ্না চৎথগদবা রাফতিং এক্সপিদিশন অদুদা কাংবু অদুনা তুরেল অসিদা হরিদ্বারদগী পাতনা ফাউবা চৎকনি, মখোয়না বিজনোর, নারোরা, ফারুখাবাদ, কানপুর, ইল্লাহবাদ, বনারসী অমসুং বুজারদা লেপকনি। হায়রিবা শহরশিং মপান অসিদা কাংবু অসিনা গঙ্গা লু-নান্না থম্নবা ভাব তাহনগনি অমসুং লম শেংবগী থবক পায়খৎকনি।

কাংবু অদুগা উনবদা, অসিগুম্বা থবক অসি পায়খৎপগীদমক কাংবু অদুগী মেম্বরশিং প্রধান মন্ত্রীনা থাগৎখি। অনানবা অমসুং ফজবা গঙ্গা তুরেল অমা শেমগৎপগী মরুওইবা অদু মহাক্না পনখি। মখোয়না ফাউদুনা চৎকদৌরিবা শহরশিং অদুদা ভাব তাহন্নবা পায়খৎকদৌরিবা থবকশিং অদুদা স্কুলগী অঙাংশিং য়াউহন্নবা মহাক্না তকশিনখি।