ভারতকী প্রধানমন্ত্রী
প্রধান মন্ত্রী নরেন্দ্র মোদীনা লুচিংবা কেন্দ্রগী মন্ত্রী মন্দলনা ইনভাইরোনমেন্তগী মতেং পীননবা ব্রিক্স লৈবাকশিংগী মরক্তা এম ও য়ু খুৎয়েক পীনখিবা অদু য়ারে । এম ও য়ু অদু ২০১৮গী জুলাইদা খা–অফ্রিকাগী জোহান্নেসবার্গতা পাংথোকখিবা ১০সুবা ব্রিক্স মীফমদা খুৎয়েক পীনখিবনি ।
মখাগী হিরমশিং অসিদা মতেং পীনবা হায়না এম ও য়ু অদুদা য়ানখি :
এম ও য়ু অসিনা ব্রিক্স লৈবাকশিংগী মনুংদা অকোয়বগী ফিবম ঙাক-শেনবা অমসুং মহৌশাগী লনশিং শীজিন্নবগী মতাংদা মতম শাংনা মতেং পীনবা হেনগৎহনগনি অমসুং লৈবাক অমমমগী মশাগী আইনশিংগী মখাদা মরম চানা থবক তৌনদুনা নাকল খুদিংমক কান্নবা ফংহনগনি ।
লৈবাক অমা খক্তদা থেংনবা নত্তবা অকোয়বগী ফিবমগী ৱাথোকশিং অদুনা মালেম পুম্বগী ওইনা অচৌবা শিংনবা অমা ওইহল্লি । মালেমগী অপুনবা মীশিংগী চাদা ৪০ হেন্না খুন্দারিবা মালেমগী অচৌবা ইকনোমি মঙা ওইরিবা ব্রাজিল, রুসিয়া, ভারত , চাইনা অমসুং খা-অফ্রিকা লৈবাকশিংগী অপুনবা ব্রিক্সনা অকোয়বগী ফিবম ঙাক-শেন্নবা অমসুং তুংকোইনা চৎনগদবা অকোয়বগী ফিবম শেমগৎনবগী থৌদাং লৌবা হায়না এম ও য়ু অদুনা য়ানখি ।
এম ও য়ু অদুনা খ্বাইগী নৌবা তেক্নোলোজিশিং শীজিন্নদুনা অকোয়বগী ফিবম ঙাক-শেন্নবা, অইং –অশাগী খল কাইরকপা শেন্নবা অমসুং লম্লক্কী শা-উচেক ঙাক-শেনবগী থবক পায়খৎপগী ৱাফম য়াউরি । এম ও য়ু অসিগী মখাদা ব্রিক্স লৈবাকশিংগী মরক্তা সরকার অমসুং লনাই সেক্তরশিংগী মরক্তা অকোয়বগী ফিবম ঙাক-শেন্নবগী মতাংদা লৌশিং, খ্বাইগী ফবা থবকশিং অমসুং তেক্নিকেলগী পামবৈশিং পীথোক-পীশিনা তৌনবগী ৱাফম য়াউরি অমসুং মসিনা তুংকোইনা চৎনগদবা চাউখৎ-থৌরাংগী থবকশিং অমসুং অকোয়বগী ফিবম কাইহনদনবা থবকশিং পায়খৎপদা মতেং ওইগনি । এম ও য়ু অদুনা লৈবাকশিংনা পাম্নবা প্রোজেকশিং পায়খৎপগী অয়াবশিং পীরি ।
