ভারতকী প্রধানমন্ত্রী

শেন্থুম–মন্ত্রী অরুন জেতলীজী, কম্মর্স অমসুং ইন্দস্ত্রিগী মন্ত্রী সুরেস প্রভজী, ৱার্ল্দ বেঙ্কগী ভাইস–প্রসিদেন্দ কাফর, অনন্দ মহিন্দ্রজী, রামেস সাহজী, সৌমিত্রা বত্তচার্য়জী, বি কে গোয়েনকজী, রামেস ভারতী মিত্তলজী, ললোন–ইতিক্কী মীহুৎশিং অমসুং মফম অসিদা তিল্লিবা অতোপ্পা শক্নাইরবশিং। লোক কলয়ান মার্গতা ঐনা ময়াম তরাম্না ওকচরি। ঙসি মফম অসিদা নখোয় ময়ামদা ঐনা য়াইফ পাউজেল পীরিবা অসি দিৱালি খক্তগী নত্তে অমসুং লৈবাক অসিগী খুদোংথিবা অমসুং অৱাবা তারবা মতমদা নখোয়না চিংখৎপগীদমক ঐনা থাগৎপনি। ললোন–ইতিক তৌবদা লাইহনবগী থবক্তা নখোয়না লৈবাক অসি অৱাংবা থাক অমদা থাংগৎলে। ঙসি মফম অসিদা লাক্তবশিং য়াওনা মীপুম খুদিংমক ঐনা থাগৎপা পাম্মি।

মসিগী থবক অসিদা মশিং থিবা ঙমদ্রবা সরকারগী ওফিসিয়েলশিং, মিউনিসিপাল কোরপোরেসনশিংগী তোঙান–তোঙানবা ফমশিংগী ওফিসিয়েলশিং, হিংথাংফমশিং অমসুং এয়রপোর্তশিংদা ক্লিয়ারেন্স পীরিবশিং অমসুং ললোন–ইতিক্কী তাইবং অসিগী মীওইশিংনা অচৌবা থৌদাং লৌরি। ঙসিগী চহী মরি মখাইগী মমাংদা ঐনা লাক্কদৌরিবা চহিশিংদা ঐখোয়না অহানবা ওইনা মকোক ৫০গী মনুং চনগনি হায়খিবা অদুদা মীওই কয়ানা থাজখিদে অমসুং নোক্নখি।২০১৪গী মমাংদা লৈরবা থৌশিল শোইবা অমসুং লৈতাদবা অদুনা মরম ওইদুনা  ভারত অসি মকোক ১০০গী মনুংদা লৈবা ঙমগনি হায়বা কনা অমত্তনা থাজখিদে। মরম অদুনা, মসি মীয়ামগী মরাল নত্তে হায়না ঐনা থাজৈ। মীয়াম্না শেন্জা–থুমজা, ৱাথোকশিং, শেন–থুমগী ফিবম লৈতাদবা, ফিসিকেল দিফিসিদ লৈতাদবগী পাউ ময়াম অমা মীয়াম্না পাবা অমসুং তাবদগী মীয়াম্না থাজদবা অসি মশানা তাবনি। অদুবু শুপ্নগী চহি ৪গী মনুংদা  লৈবাক অসিউ দিগ্রি ১৮০ হোংবা নহাক্না উবা ফংলগনি।

ইজ ওফ দুইং ব্যুজিনেসকী ৱাফমদা, ঐখোয় রেঙ্ক ১৪২দা লৈরম্বদগী রেঙ্ক ৭৭দা হাইগৎলে। ঐখোয়না মসি তঙ্খাই  অমা লানবা ঙম্লে।

মরূপশিং,

মসি চহি মরিদা পোইন্ত ৬৫ হাইগৎলকপনি। মসি লৈবাক অমনা মমাংদা অমুক্তা থোকখিদ্রিবনি। ঙসিদি, খা-নোংপোক এসিয়াদা ভারত অসি ইজ ওফ দুইং ব্যুজিনেসতা মকোক্তা লৈরে, মসি চহি মরিগী মমাংদা ঐখোয় রেঙ্ক ৬সুবদা লৈরম্বনি। চহি অনি থংন-থংননা ভারত অসি অসিগুম্বা ফিবম ফগৎলকপদা লৈবাক মকোক ১০গী মনুংদা লৈখি।হৌখিবা চহি ৭-৮ অসিদা চহি অনিগী মনুংদা লৈবাক অমত্তনা রেঙ্ক ৫৩ হাইগৎলকপা থেংনদ্রি।

মরূপশিং,

মালেমগী মীওই অমত্তগী ৱাখলদা লৈত্রিবা করিগুম্বা খর ঐখোয়না ফংবা ঙম্লে। ঐখোয় মকোক ৫০গী মনুং চনগদবা খোঙকাপ খর খক্তা ঙাইরে। ৱার্ল্দ বেঙ্কগী রিপপোর্ত মতুংইন্না, ভারতনা ফগৎলক্লিবা অসি পেরামীতর ১০গী মনুংদা ৮দনি। পেরামীতর ২গী মনুংদা, ঐখোয়না রেঙ্ক ১০০দগী হেন্না হাইগৎলক্লগনি।

লৈবাক অসিদা অহোংবা পুরক্তুনা, রেঙ্ক হাইগৎলক্নবা ঐখোয়না রাজ্য সরকারশিংগা লেপ্তনা থবক তৌমিন্নরি। কোওপরেতিপ ফেদেরেলিজম কনখৎহন্নবা ঐখোয়গী রাজ্যশিংনা য়াম্না থৱায় য়াওনা মতেং পাংলি। হৌজিক ঐখোয়না জিলাগী থাক্তা ইজ ওফ দুইং ব্যুজিনেসগী অওনবশিং পুরক্নবা থবক পায়খৎপা হৌরে। মসিগী লম্বী অমা শেম্নবা ঐখোয়না মরি লৈনবশিং অমসুং রাজ্য সরকারশিংগা লেপ্তনা পাউ ফাউনরি। রাজ্যশিংগী জিলাগী থাক্তা রেঙ্কিং সিস্তেম অমা থম্নবা থবক পায়খৎলি। মমাংলোমদা চংশিন্নবা জিলাশিংগী মরক্তা চাংদম্ননবা রেঙ্কিং পীনবা ঐখোয়না থবক পায়খৎলি।

মরূপশিং,

ঐখোয়গী লৈবাক্কী ইনফ্রাস্ত্রকচর শেমগৎপা, থবক পীবা হেনগৎহনবা, পর কেপিতা ইনকম হেনগৎহনবদা ললোন-ইতিক অমসুং ইন্ত্রপ্রিনরশিপ অসি য়াম্না দরকার ওই। মসিনা শেন থাদরবা অমসুং ললোন-ইতিক্কী থবক অসি ফজনা পাংথোক্লবা অমসুং মদুগী কান্নবা অদু মীয়াম্না ফংলবা মতমদা ওইথোক্কনি। মরম অদুনা ঐখোয়না থৌশিলনা লমজিংদুনা লৈবাক ঙাকপা অমসুং মাংজৌননা উবা ঙম্বা অরোনবা লৈতবা থৌশিলশিংদা মীৎয়েং চংবা দরকার ওই। ঐখোয়না খুদোংচাদবা থোকহনবশিং হন্থহন্নবা হোৎনরি। ৱার্ল্দ বেঙ্কনা পীরিবা রেঙ্কিং অসিদা ঐখোয়না থবক তৌরিবা পেরামীতর কয়া য়াওদ্রি হায়বা নখোয় অয়াম্বনা খঙলে।রেঙ্কিং অসি পেরামীতর খর খক্তা য়ুমফম ওইবনি অমসুং ঐখোয়না রিফোর্ম, পরফোর্ম অমসুং ত্রান্সফোর্মদা অখন্ননা থবক পায়খৎলি। তশেংনা হাবরবদি, ঐখোয়দি পান্দমদি ৱার্ল্দ বেঙ্কনা পীরিবা রেঙ্কিং অসিগী ৱাংমদা থবক তৌবা অদুনি। মীচম মীয়াম, অপীকপা ললোনবশিংগী পুন্সি মহিং ফগৎহন্নবা ঐখোয়না থবক পায়খৎলি। হৌজিক লৈবাক অসিদা ললোন-ইতিক্কী থবক লাইহনবদগী অপীকপা ললোনবশিং মখোয়গী ললোন-ইতিক্কী থবকশিং ফজনা পায়খৎলে, মখোয়গী পোৎলমশিং সহরশিংদা নুংঙাইনা পুবা ঙম্লে, মীয়াম্না লাইনা মৈ থানবা ফংলে অমসুং সরকারগী অয়াবশিং অমসুং মরুওইবা পরমিতশিং য়াম্না থুনা ফংবা ঙম্লে। মখোয় ময়াম অসি ভারতকী মীয়ামগী অনিংবা থুংনবা অমসুং দরকার ওইবশিং ফংহন্নবা খন্দুনা পায়খৎপনি।

মরূপশিং,

লৈবাক অসিগী ললোন-ইতিক্কী থবকশিংদা অরোনবা লৈতনবা মরুওইবা ৱারেপ কয়া লৌরে। ঐখোয়গী সরকার অসিনা ৱাখল্লোনদা অওনবা পুরকপদা নত্তনা থবক তৌবদসু অওনবা পুরক্লে। মসিগী খুদমদি জি এস তি, দিমনিতাইজেসন, বেনামী প্রোপর্তী লো, ইন্সোলভেন্সি কোদ নত্ত্রগা ফিউজিতিপ ইকনোমিক ক্রিমিনেলশিংগী লো অসিনি। সরকারনা পায়খৎলিবা থবকশিং অসিনা মরম ওইদুনা হৌজিক লৈবাক অসিদা শেন্জ-থুমজা তৌবশিং কিরে অমসুং পুকচেল শেংবশিং কান্নবা ফংবা হৌরে। হৌজিক মীওই কয়া তেক্স পীবা হেনগৎলক্লে। মখোয়না তেক্স ওইনা পীখিবা শেনফম অদু অচুম্বা লম্বীদা শিজিন্নবা হৌরে হায়বসি মখোয়না থাজবা হৌরে।

মরূপশিং,

মসিগী ৱারেপশিং অমসুং অওনবশিং অসি অরাইবা নত্তে হায়বসি নখোয়সু খঙলিবদুনি। তেক্নিকশিং শেমদোক্লে, লোশিং অমসুং সোফৱায়রশিং হোংদোক্লে। করিগুম্বা মতমদা সোফৱায়র হোংদোকপা অসিদি লাই অদুবু হৈনবী হোংদোকপা অসিনা হেন্না লুবা মতাং য়াওরকই। মসিগী অহোংবশিং অসিগী শেম-শাবা অসি অরাইবা থবক নত্তে। অদুবু হায়রিবা থবকশিং ঐখোয়না অতেনবা মতম খরগী মনুংদা মাইপাক্না পাংথোকখি। হৌজিক ঐখোয়না ললোন-ইতিক অমসুং মীয়াম য়াইফনবা মাইকৈদা থবক কন্না পায়খৎলি। হৌখিবা চহী ৪ অসিদা লৈবাক অসিদা অরিবা আইন ১৪০০০ হেন্না চৎনহন্দ্রে।মমাংদা, ললোন-ইতিক্কী য়ানদবা অমা লাকপদা লোইশিন্নবা হোৎনবদা নুমিৎ ১৫০০ নি হায়বদি চহি ৪ চংলম্মি। য়াম্না কন্না হোৎনবদগী, মতম অদু হৌজিক নুমিৎ ৪০০দা হন্থরে। মসি খর হেন্না হন্থহন্নবা ঐখোয়না হোৎনরি।২০১৪গী মমাংদা মপান্দগী পুশিল্লকপা পোৎশিং অয়াবা পীনবা হোৎনবদা পুং ২৮০ চংলম্বা অদু হৌজিক পুং ১৪৪দা হন্থরে। মসিগী মতম অসিসু ঐখোয়না তেনশিনহলগনি। মমাংদা ইনভাইরোনমেন্ত ক্লিয়ারেন্স অসি চহী কয়া চংলম্বা অদু হৌজিক চয়োল খর খক চংলে। য়ুম শাগৎপা অমসুং খুৎনা শুবা থবকশিংগী ইনভাইরোনমেন্ত ক্লিয়ারেন্স পীনবগী থবক অসি দিসেন্ত্রেলাইজ তৌরে আমসুং লোকেল বোদিশিংদা শীন্নরে। জি এস তিনা লৈবাক অসিগী পোৎ-পুথোক পুশিনগী থবকশিং ফগৎহল্লে। মমাংগী সরকারগা চাংদম্নবদা অচংবা মতম অসি হৌজি চাদা ১৫ হন্থরে। মসিগী কম্পেনশিংগী মতম অমসুং শেল হন্থরে। মমাংদা লেবর লোশিং ঙাক্নবা ললোনবশিংনা ফোর্ম ৫০-৬০ মেনশিনবা দরকার ওইরম্মি। ঐখোয়গী সরকারনা মসিগী মশিং অদু মঙাদা হন্থহল্লে। মমাংদা পাসপোর্ত লৌবদা চয়োল ৩-৪ চংলম্বা অদু হৌজিক মীয়াম্না চয়োল অমগী মখাদা পোসপোর্ত ফংবা ঙম্লে। মমাংদা মীয়াম্না মখোয়গী ইনকম তেক্স রিতর্ন ফংনবা থা ৮-১০ ঙাইরম্মি অদুবু মসি হৌজিক চয়োল খর খক চংলে। চহি ৪-৫গী মমাংদা মী য়াম্না চিনবদগী রেলৱে রিজাবেসনগী ৱেবসাইদ য়াদবগী পাউ অদু নখোয় নিংশিংলমগনি। ঐখোয়না ৱেবসাইদ অদু মী চিনবা ফনবা শেমগৎপদগী হৌজিক রেলৱেগী পেসেন্জর ক্রোর কয়াদা কান্নবা ফংহল্লে। লু-নানবগী খোঙজং অসিনা লম্বীদগী হৌরগা রেলৱে প্লেতফোর্মশিং ফাওবদা চৎথবদগী মীচম মীয়ামগী পুন্সি মহিং ফগৎলে। নু্পীশিংনা নুমিদাংগী মতমদা থবক শুবদা খূদোংথিবা থোক্তনবা সরকারনা লো কয়া শেমদোক্লে। অপীকপা দুকান ফম্বশিং অমসু ললোনবশিং নুমিদাং অথেংবা ফাওবা হাংবা য়ানবা  আইনশিং শেমদোক্লে।

মরূপশিং,

হন্দক ঐখোয়না এম এস এম ই সেক্তরগী অচৌবা থবক কয়া পায়খৎলে। হৌজিক জি এস তিগা লোয়ননা থবক তৌরিবা ললোনবশিংনা মিনিত ৫৯গী মনুংদা লুপা ক্রোর ১গী লোন লৌবা য়ারগনি।লাইন্সেসিং অমসুং ইনভেসতিকেসনগী থবকশিং তোকহন্দুনা পোৎথোক পুথোকপা হেনগৎহন্নবা অমসুং কৈথেল পাকথোক-চাউথোকহন্নবা থবক পায়খৎপা হৌরে। অনৌবা থবক পীবগী খুদোংচাবা হেন্না লৈবা ইন্সতিত্যুসনশিং নত্ত্রগা কম্পেনশিংদা প্রধান মন্ত্রী রোজগার প্রোতসাহন য়োজনাগী মখাদা শেন্থং পীরে। সরকারনা এপ্রেন্তিসসিপ এক্ত হোংদোক্লে অমসুং অনৌবা এপ্রেন্তিসসিপ ইন্সেন্তিপ স্কিম চৎনবা হৌরে।স্কিম অসিগী মখাদা ইমপ্লোয়র অমনা এপ্রেন্তিস থম্বা মতমদা, মখোয়গী স্তাইপেন্দগী শরুক মরি থোকপগী অমা সরকারনা পুথোক্কনি। মসিগী থবক অসিদা কম্পেনি কয়া শরুক য়াবা হৌরে।

মরূপশিং, ঐহাক অসি অপীকপা সরকার অমসুং অচৌবা লৈঙাক্তা থাজবা মীওই অমনি। মখা তারকপা ওইনা, লৈবাক অসি চাওখৎপগী মাইকৈদা চংশিল্লকপদগী হৌজিক ভারতকী মিংচৎ অসি ফগৎলক্লে। ভারতকী ফিবম অসি ফগৎলকপগা লোয়ননা আই এম এফ, মুদি, ৱার্ল্দ ইকনোমিক ফোরম নত্ত্রগা য়ু এন সি তি এ দিগী রেঙ্কিংশিংদা হাইগৎলক্লে। য়াম্না মরুওইরিবদি, হায়রিবা ইন্সতিত্যুসনশিং অসিনা ভারতকী তুংগী ফিবমদা মপুং ফানা থাজরে।

মরূপশিং,

হায়রিবা থবকশিং অসিনা ভারত অসি অথুবা মতমদা দোল্লর ত্রিলিয়ন ৫গী ক্লবতা চনবা ঙম্লগনি। মসিগী পান্দম অসি ফংবা ঙম্নবা ইকনোমিগী সেক্তর খুদিংমক ফগৎহনবা দরকার ওই। সেক্তর খুদিংমক্কী ৱাহন্থোক হোংলে হায়বসি ঐখোয়না খঙজিনগদবনি। হৌজিক মেনুফেকচরি অমসুং সর্বিস সেক্তর অসিনা অমনা অমগী মতেং লৌনরে। মেনুফেকচরি সেক্তর অসি সর্বিস সেক্তরদগী ভেল এদিসন তৌরে অমসুং মেনুফেকচরি সেক্তর খরনা সর্বিস সেক্তর অসি ফগৎহল্লে। হৌজিক আর্তিফিসিয়েল ইন্তিলিজেন্স, ইনফোর্মেসন তেক্নোলোজী অসি মেনুফেকচরিগী মরুওইবা শরুক অমা ওইরে। মসিগী অহোংবা অসি ঐখোয়না খঙজিনগদবনি।

মরূপশিং,

উদ্যোক্কী অনৌবা লম্বীশিং খঙনবা অমসুং উদ্যোক্কী অনৌবা মশক শন্দোক্না তাক্নবা সরকারনা উদ্যোক্কী থৌশিল অসি ফজনা চৎননবা থবক পায়খৎলি। হায়রিবা উদ্যোক্কী থৌশিলশিং অসি অনৌবা ভারতকী ইন্ত্রপ্রিনরশিংগী অনৌবা মীৎয়েংগা চুননবা হোৎনগনি। মসিগী উদ্যোক্কী থৌশিল অসিদা ললোন–ইতিক তৌবদা লাইহনবা হায়বদু লেংদনা লৈহনগনি।

মরূপশিং,

ইজ ওফ দুইং ব্যুজিনেসগী মকোক ৫০গী মনুং চন্নবা হৌজিক ঐখোয়না লেপ্তনা হোৎনরি। মসিগী মতাংদা ঐনা তোঙান–তোঙানবা বিভাগশিংগা মীফম পাংথোক্লগনি। চহিগী দিসেম্বরদা লৌগদৌরিবা ৱারেপ অদুনা মথং চহিগী রেঙ্কিংদা অহোংবা লাক্কনি। সেক্তর খুদিংদা হায়বদি ক্লিন ইনর্জি, দিজিতেল ৱার্ল্দ, হকশেল, চৎথোক–চৎশিনগী লমদা নখোয়না পায়খৎলিবা থবকশিং অদুনা লৈবাক অসি মশা–মরোমদোম লেপচবা ঙমহনগনি। ঙসিগী সিস্তেম অসিদা মীওইবগী খুৎ চংবা অসি হন্থহনবা য়াম্না দরকার ওই। মসি থবক ওইনা পাংথোক্নবা, পুন্সিগী শরুকশিং ফাওবদা অনৌবা মতমগী দিজিতেল তেক্নোলোজী হেন্না শীজিন্নবা মথৌ তাই। মীয়াম্না ফোর্ম পীশিন্নবা, চে–চাং পীশিন্নবা অমসুং ফি থিনবা সরকারগী ওফিসশিংদা চৎপা দরকার ওইদবা থবক তৌবগী চৎনবী অমা ঐখোয়না পুথোক্কদবনি। নখোয়গী পাউতাকশিং অদুনা লাইন ললোন–ইতিক তৌবদা কান্নবা পীগদবনি অমসুং লৈবাক অসিগী মীয়াম হিংবদা লাইহনগদবনি।

মরূপশিং,

হৌজিক নখোয়দা য়াওরিবা ইশা ইথন্তা থাজবা অসি ঐগী খ্বাইগী চাউবা থৌনা অমনি। নখোয়না পীরকপা পাউতাকশিং ঐনা তরাম্না ওক্লি। মহেন্দ্রিনা হায়বা অমা লৈ মদুদি মোদীনা থম্লিবা পান্দমশিং অসি কোরপোরেতশিংনা ফাওবা থমদে। গুজরাতকী মীয়াম্না মখোয়গী অঙাং ওইরিঙৈ মতমদা তাকপীবা অমা লৈ মদুদি– ‘নিসান চুক মাফ,নহি মাফ নিচু নিসান’। মসিগী ৱাহন্থোকতি কনাগুম্বা অমনা মহাক্না থম্লিব পান্দম অদুদগী তাদ্রবদি পান্দম অদু ফংবা ঙমদ্রবদু কনাগুম্বা অমা ঙাকপী য়াই। মসিদা ঐগী লাইৱাদি পান্দম অদু ঐখোয়না ফংবা ঙম্বা থাক অমদা লৈগদবনি। করিগুম্বা ঐখোয়না চোংখৎলবদি মদু ফংবা ঙম্বা ওইগদবনি। মসিগী ৱাখল্লোন অসিগা লোয়ননা ঐনা পান্দমশিং থমবগী হৈনবী অমা লৈরি।মসিগী ৱাখল্লোন অসি ঐখোয়গী লৈবাক অসিদা লৈরগনি অমসুং মহৈ চাবা হৌরগনি হায়না ঐনা থাজবা থম্লি।

অমুক হন্না নখোয় ময়াম থাগৎতুনা ঐগী ৱারোল লোইশিনজরে।

ময়াম থাগৎচরি।