ভারতকী প্রধানমন্ত্রী

ঐগী মন্ত্রীমন্দলগী মরূপ, রাধামোহন সিংহজী, মমিং লৈরবা অমসুং মাইপাক্লবা উত্তর প্রদেশকী চীফ মিনিস্তর, য়োগী অদিত্যনাথজী; জাপান সরকারগী এসিস্তেন্ত উপ মন্ত্রী, তাকামী নাকাদাজী; ইজরেলগী এম্বেসেদর ময়া কাদোসজী; লৌউ-শিংউগী সাইন্তিস্তশিং, শক্নাইরবশিং অমসুং য়ু পিগী মফম কয়াদগী লাক্লিবা ঐগী নুংশিরবা লৌমী মরূপশিং অমসুং ইচে-ইচলশিং।

প্রায়াগরাজগী অর্ধ-কুম্ভ মেলা হৌগদবা থা খর খক ঙাইরে। অদুবু, ঙসিদগী য়ু পিদা অতোপ্পা কুম্ভ অমা হৌরে। য়ু পীগী তোঙান-তোঙানবা মফমশিংদগী লৌমী লিশিং ৫০ রোম অমসুং মালেমগী মফম কয়াদগী অমসুং লৈবাক মনুংদগী ইন্ত্রপ্রিনরশিং অমসুং সাইন্তিস্তশিং লখনৌগী এগ্রিকলচরেল কুম্ভ অসিগী শরুক অমা ওইরি। ঐনা ময়াম্বু তরাম্না ওকচরি। য়ু পিগী এম পি অমা ওইনা, নখোয়গা লোয়ননা চৎমিন্নবা অসিগী ঐগী থৌদাংনি অমসুং নখোয়গী চাউখৎপগী খোঙচৎতা শরুক য়ারি।

থা খরগী মমাংদা, কৃষি উন্নতি মেলাদা, ঐনা অচৌবা লৌমীশিংগী মেলা শীন্নবা খঙহনখি। কৃষি কুম্ভ মেলা অসি মদুগী শরুক অমনি। মসিগী অচৌবা থবক অসিগীদমক ঐনা য়োগিজী অমসুং মহাক্কী কাংবুবু থাগৎচরি। মসিগী থৌরম অসিদা শরুক য়াবীবগীদমক ঐনা জাপান সরকার অমসুং ইজরেল সরকারবু থাগৎচরি। মসিগী ইরোইননা, পার্তনর স্তেত অমা ওইরিবা হরিয়নাসু মসিদগী কান্নবা ফংলগনি।

মরূপশিং,

থৌরম অমদা কুম্ভ হায়বা ৱাহৈ অসি শীজিন্নবদা মসিগী মরুওইবা অদু হেনগৎলকই। কুম্ভ হায়বদি ৱাখল্লোনশিং পীথোক-পীশিন তৌনবা অমসুং মীওইবা খুন্নাইগী অনীংবশিং ফোঙদোকপনি। মসিগী চৎনবগী অসি কৃষি কুম্ভনা মপুং ফাহনগনি হায়না ঐনা থাজবা থম্লি অমসুং লাক্কদৌরিবা নুমিৎ হুম্নি অসিদা মতমগা চুনরবা অনৌবা তেক্নোলোজী অমসুং খুদোংচাবা ফংহল্লগনি।

মরূপশিং,

লৌমীশিংদা লৌউ-শিংউগা মরি লৈনবা অনৌবা তেক্নিকশিং অমসুং মেচিনশিংগী মরমদা উৎলিবা মসিগী মেলা অসিদা স্তোল ২০০ রোম হাংলি হায়বা ঐ খঙলে। লৌমী খুদিংমক্না মসিগী কান্নবা ফংগনি হায়না ঐনা থাজবা থম্লি অমসুং মসিগা লোয়ননা লৌমীশিংনা মগুন লৈবা পোৎথোক পুথোকপদা মতেং পাংগনি।

মরূপশিং,

লৈবাক শীনবা থুংনা কালেন লৌরোক্কী থবক পায়খৎপা হৌরে। মতম অসিদা লৌমীশিং থবক য়াম্না চিল্লে। হন্দক্কী চহি অসিদা মহৈ-মরোংগী পোৎথোক ফজনা পুথোক্কনি হায়বগী থাজবা থম্লি। য়ু পি অসি থবক কন্না শুবা লৌমীশিংনা লৈবাক অসিগী অপুনবা মহৈ-মরোংগী পোৎথোক্কী চাদা ২০ পুথোকপা মফম অমনি। মসিগীদমক ঐনা নখোয় ময়াম থাগৎচরি। লৈবাক শীনবা থুংনা লৈরিবা কৈথেলশিংদা ফৌ অমসুং হৱায় লৈরে। য়ু পিগী মফম কয়াদসু মসিগী থৌরাং তৌরে হায়বা খঙলে। হৌজিক লৌমীশিংনা মখোয়গী মহৈ-মরোং য়োনবদগী ফংলিবা অসি অনৌবা মিনিমম সপোর্ত প্রাইজগী মখাদা ফংবনি। মহৈ-মরোং ২১গী এম এস পি অঙকপা মওংদা হেনগৎখিবা অদু নখোয় খঙলম্লগনি। লৌমীশিংনা য়ামদ্রবদা লৌ উবদা চংখিবা শেনফমগী চাদা ৫০ শেন্দোং ফংনবা ৱারেপ অসি লৌখিবনি।

মরূপশিং,

য়ু পীগী লৌমীশিংনা রেকোর্দ ওইনা পোৎথোকপ পুথোকপা মতম অসিদা, য়োগীজিগী সরকার অসিনা মদু লৈবদা রিকোর্দ থুগাইরি। মরম অদুনা ঐনা য়োগীজিগী সরকার অসি থাগৎলি। মমাংগী সরকারনা গহু মেত্রিক তন লাখ ৭-৮ লৈবা অদুগী মথক্তা হৌজিক গেহু মেত্রিক তন ৫০-৫৫ লৈরি। মসিনা তাক্লি মদুদি লৌমীশিংনা চুনবা মমল ফংলে অমসুং বি জে পিগী য়োগী সরকার অসিনা লৈরিবা পোৎথোক অসি শরুক ৭-৮ হেল্লে। মরক্কী লৈতনবা ই-উপরজান তেক্লোলোজী শীজিন্নদুনা হায়রিবা পোৎথোকশিং অসি লৌমীশিংদগী হকথেংননা লৈবনি।

মরূপশিং,

মসিগী অওনবা অসি গেহু অমসুং ফৌ খক্তদা উবা নত্তনা চুদসু উবা ফংলে। চৎলিবা চহি অসিদা লৌমীশিংদা লুপা ক্রোর লিশিং ২৭ হেন্না ফংহল্লে। পীগদবা ৱাৎহৌরিবা শেনফমদগী লুপা ক্রোর লিশিং ১১ লৌমীশিংদা পীখ্রে। চুগী মিলশিংনা পীগদবা ৱাৎলিবা শেনফমশিং অদু য়োগিজী সরকারনা পীরগনি হায়বা ঐ খঙলে। অহানবা ওইনা উত্তর প্রদেশ সরকারনা আলু লৈরগনি হায়বা তাবদা ঐ হরাওই। মসিগী মখোয়গী আলুগী পোৎথোকশিংগী চুনবা মমল ফংদ্রিবা লৌমীশিংদা মতেং পাংলগনি।

মরূপশিং,

য়ু পিদা উরিবা থবকশিং অসি কেন্দ্র সরকারনা পীখিবা থাজবশিংগী শরুক অমনি অমসুং মসিগী মহৈ ওইনা খুঙ্গংশিং অমসুং লৌমীশিং অসি ঐখোয়গী শেন্মিৎলোনগী থৌশিলগী শরুক অমা ওইরে। ঐখোয়না থাজবগী মতুংইন্না, লৈবাক অসি মাংলোমদা পুখৎলিবা অসি লৌমীশিংনি। মরম অদুনা লৌউ-শিংউ অমসুং লৌমীশিংনা থেংনরিবা খুদোংচাদবশিং কোকহন্নবা সরকার অসিনা পুকচেল শেংনা হোৎনরি অমসুং মচেৎ-মকাইগী থবক তৌদ্রি। লৌমীশিংনা মায়োক্নরিবা খ্বাইদগী পীকপা খুদোংচাদবা ফাওবা কোকহনবা হায়বসি ঐখোয়গী পান্দমনি।

মরূপশিং,

ভারতনা নীংতম্বা চহি ৭৫শুবা থৌরমগী শরুক অমা ওইনা ২০২২ ফাওবগী মনুংদা লৌমীশিংগী ইনকম শরুক অনি হেনগৎহন্নবা সরকারনা থবক পায়খৎলি। শেন চংহন্দনা পোৎথোক হেন্না পুথোকপা হায়বা থৌশিল অদু ইন্দুনা লৌউ-শিংউগী থবক্তা তেক্নিক কয়া ফজনা হাপচিল্লে। লৈবাক অসিগী ‘মরুদগী কৈথেল ফাওবা’ হায়বা অকনবা থৌশিল অমা পায়খৎলে। লৈবাক-লৈহাওগী ফিবম ফগৎহনবদগী মন্দি ফগৎহনবা য়াওনা হিরম কয়াদা থবক কয়া পায়খৎলে। লৈবাক শীনবা থুংনা লৌমী ক্রোর ১৬ দা সোইল হেল্থ কার্দশিং য়েন্থোক্লে, মসিগী মনুংদা কার্দ ক্রোর ৩না য়ু পিগী লৌমীশিংদা পীরি। মসিনা লৌমীশিংনা লৈবাক-লৈহাওগা চুনবা মহৈ-মরোং খনবা অমসুং মহৈ-মরোং অদুগী চাইগদবা হারগী চাং খঙবা ঙমহল্লগনি।

মরূপশিং, লৈবাক-লৈহাওগী ফিবম কাইহন্দনা থম্নবা ওর্গানিক ফর্মিং হৌদোক্লে। লৈবাক অসিগী দরকার ওইরিবা পোৎথোক্কী চাং য়ৌনা পুথোক্নবা অরেম-অখাকশিংদগী শেম্বা হার ঙম্লিবমখৈ শীজিন্ননবা লৌমীশিংগী পুক্নীং থৌগৎলি। য়ুরিয়াগুম্বা হার মরাং কাইনা ফংহন্নবা থবক পায়খৎলে। মসিগী লোয়ননা ইথৈ-লৌথোংগী থবকশিং ফজনা পায়খৎলে। অচৌবা ইথৈ পীনবগী প্রোজেক্তশিংগী মথক্তা,  ইথৈ পীনবা অনৌবা তেক্নোলোজীশিং শীজিন্নবা পুক্নীং থৌগৎলে। দ্রোপ অমদা মহৈ-মরোং হেন্না থানবা থবকশিং পায়খৎনবা লৌমীশিংদা পুক্নীং থৌগৎলি। দ্রিপ ইরিগেসন অমসুং স্প্রিনক্লর ইরিগেসন অসি ঐখোয়গী ইথৈগী শরুক অমা ওইরে।

অনৌবা ইরিগেসনগী তেক্নিকশিংদা ইজরেল অসি মমিং চৎলি। মসিগা লোয়ননা, লৌউ-শিংউগী তেক্নোলোজীশিংদা জাপান আসি শিংথাবা য়াবা থবকশিং পায়খৎলি।মরম অদুনা এগ্রিকলচর কুম্ভগী শরুক য়ামিন্নবা অমা ওইনা, নখোয় ময়াম্না লৈবাক অনি অসিগী হৈশিংবশিং অসিগী খুদোংচাবশিং লৌগদবনি।

মরূপশিং,

মসিগী মথক্তা, ইলেক্ত্রিক অমসুং দিজলগী পম্পশিং সোলর পম্পশিংনা মহুৎ শীন্নবা থবক য়াংনা পায়খৎলি। হায়রিবা পম্পশিং অসি ইরিগেসনগী মরুওইবা শরুক অমনি অমসুং মসিগী হিরম অসিদা মরুওইবা থবক কয়া পায়খৎলি। হায়রিবা ইলেক্ত্রিক অমসুং দিজলগী পম্পশিং সোলর পম্পশিংদা ওন্থোক্নবা অচৌবা কেম্পেন অমা চৎথরি। মসিগী মখাদা, মথং চহি ৪দা লৈবাক শীনবা থুংনা লৌমী লাখ ২৮গী লৌবুক্তা সোলর পম্পশিং থম্লগনি। অহানবদা লৌমীশিংনা লেম্না মৈ ফংলগনি অমসুং অহেনবা মৈ অদুনা পৱার কম্পেনীশিংদা য়োনগনি।

মতম অমদা ‘অন্নদাতা’ নত্ত্রগা চানবা পুথোকপা মীওই ওইরম্বা অদু হৌজিক ‘উরজাদাতা’ নত্ত্রগা ইনর্জী পুথোকপা মীওই ওইবা ঙম্লগনি।

মরূপশিং, মসিনা লৌমীশিংগী পুন্সিদা অচৌবা অহোংবা পুরকপা ঙম্লগনি। নুমিৎ খরনিগী মমাংদা ঐ গুজরাত্তা চৎখি। খুঙ্গং অমদা লৌমী খরনা অপুনবগী ওইনা লৌবুক্তা সোলর পেনেলশিং অমসুং সোলর পম্পশিং খিনবা উখি। মখোয়না নুমিৎকী মঙালদগী মৈ পুথোকপা হৌরে। মৈ অদু মখোয়গী লৌবুক্কী সোলর পম্পশিংদা শীজিন্নখি। মসিনা মখোয়গী দরকার ওইবা মৈ অদু ফংহল্লে। মসিগী মথক্তা, মখোয়না অহেনবা মৈ য়োনবদা চহি অমদা লুপা লিশিং ৫০গী তানবা ঙম্লে।

মরূপশিং,

সাইন্সকী কান্নবশিং লৌমীশিংদা য়ৌহন্নবা সরকারনা থৱায় য়াওনা থবক কয়া পায়খৎলি। লৌমীশিংগা সাইন্তিস্তশিংগা হকথেংননা শম্নহন্নবা থবক রিসর্স সেন্তরশিংনা পায়খৎলে। মসিনা মরম অদুনা লৌউবা অমসুং মরুগা মরি লৈনবা রিসর্স অমসুং থিজিনবদগী ফংলকপশিং অতেনবা মতমগী মনুংদা লৌমীশিংদা য়ৌহনবা ঙম্লগনি। মরম অদুনা লৈবাক শীনবা থুংনা কৃষি বিগ্যান কেন্দ্র ৭০০ লিংখৎলে। লৌউ-শিংউগী রিসর্সকা মরি লৈনবা অনৌবা ইন্সতিত্যুৎশিং লিংখৎলে। বরানসীদা রাইস রিসর্স ইন্সতিত্যুৎ লিংখৎলে। লৌমীশিংগী পোৎথোকশিংগী মমল খ্বাইদগী য়াম্না য়োন্নবা অমসুং মগুন হেনগৎহন্নবা সরকারনা থবক পায়খৎলি। ফুদ প্রোসেসিং সেক্তর এফ দি আই চাদা ১০০ সরকারনা য়ারে। লিক্লিদা তেমেতো সোস য়োনবদগী খামেন অশিনবা ওইনা য়োনবা অসিনা শেন্দোং ৱাৎনা ফংই হায়বা ঐখোয়না খঙলে। হৈনৌ অশংবা ওইনা য়োনবা অসিনা হৈনৌ অচার ওইনা শেম্লগা য়োনবা অসিদগী শেন্দোং ৱাৎনা ফংই। মসিগী চপ মান্ননা মোরোক অতেকপা ওইনা য়োনবা অসি মাংজৈ অমসুং মোরোক অকুপ্পা ওইনা য়োনবা অসিনা শেন ফংবা হেল্লি। মসি পোৎকী মগুন হেনগৎহনবা কৌই। চহি অসিগী বজেৎতা খামেন অশিনবা, তিলহৌ অমসুং আলুগী তোপ স্কিম অমা লুপা ক্রোর ৫০০ চংনা পায়খৎলে। মসিনা য়ু পিগী আলু থাবা লৌমীশিংদা য়াম্না কান্নরগনি। মসিনা লৌউ-শিংউগী লমদা শেন থাদনবগী অনৌবা খুদোংচাবা কয়া লৈবদগী য়ু পিদা কান্নরগনি। য়ু পি ইনভেস্তর সমিৎতা ফুদ প্রোসেসিং সেক্তর লুপা ক্রোর লিশিং ১৬ রোম থাদনবগী ৱাফম লৈরে হায়বা ঐ খঙলে। মসিগী মনুংদা লুপা ক্রোর ৩৫০০গী প্রোজেক্ত ১৪ হন্না হৌদোকখ্রবনি।

মরূপশিং,

লৌ উবা অসি শেন্দোং লৈনবা থবক কয়া পায়খৎলি। মসিগী মথক্তা লৌমীশিংগী শেন্থোক লম্বী হেনগৎহন্নবা খোঙথাং কয়া পায়খৎলি। গ্রিন রিভোলুসন মাইপাক্লবা মতুংদা হ্বাইৎ রিভোলুসন, সুইৎ রিভোলুসন অমসুং ব্লু রিভোলুসনগী অনৌবা লম্বীশিংদা ঐখোয় চংশিনবা হৌরে। ঐখোয়না শঙ্গোম পুথোকপা, খোই-হি পুথোকপা, য়েরুম অমসুং ঙা পুথোকপগী রেকোর্দ থম্লে। ঙা য়োক্লিবা ঙামীশিংগী ইমুং-মনুংগা মরি লৈনবা অচৌবা ৱারেপ অমা নুমিৎ নিনিগী মমাংদা ভারত সরকারনা লৌরে। লুপা ক্রোর ৭৫০০গী অনৌবা ফন্দ অমা শেম্নবা সরকারনা অয়াবা পীরে।

মরূপশিং,

কৃষি কুম্ভ অসিদা শরুক য়ারিবা লৌমীশিং, অখঙ-অহৈশিং, সাইন্তিস্তশিং অসি ভারতকী শেনমিৎলোনগী মরুওইবা শরুক অমনি। নখোয়না হোৎনবগী মতুংইন্না  লাক্কদৌরিবা চহিশিংদা ঐখোয়গী শেনমিৎলোন য়াংনা চাউখৎপদা মরুওইবা থৌদাং অমা ওইগনি। লৌউ-শিংউবগা মরি লৈনবা তেক্নিকশিংগী মতাংদা পুন্না ফম্মিন্নরগা খন্ননবা ঐনা তকশিল্লি। মতৌ করম্না হার য়ামদনা শীজিন্নগদগে, মতৌ করম্না ঈশিং লিক্না শীজিন্নরগা পোৎথোক হেন্না পুথোক্কদগে, মহৈ-মরোং থম্নবা মতৌ করম্না কৈ ফজনা শাগদগে অমসুং লৌউ-শিংউগী থবক্তা মতৌ করম্না রোবোৎশিং অমসুং দ্রোনশিং শীজিন্নগদগে হায়বগী মতাংদা ৱা তান্নবা দরকার ওই।

মসিগী মথক্তা, মতৌ করম্না অনৌবা তেক্নোলোজী শীজিন্নদুনা চরু অসি শেন ওন্থোক্কদগে হায়বা খন্নগদবনি। লোক্ত্রিঙৈ অমসুং লোক্লবা মতুংদা লৌবুক্তা কান্নদবা ফত্তবা পোৎ অমত্তা লৈতে। লৌবুক্তা ফংলিবা খুদিংমক সনা ঙাক্তনি। লেমহৌখাকশিংদগী শেন ওন্থোকপা য়াই। মসিগী হিরম অসিদা মপুং ফানা থবক তৌবা দরকার ওইরি। চরু মৈ থাবা থিংনবা সরকারনা মহৈ-মরোংগী লেমহৌবশিংদা চাদা ৫০-৮০ সবসিদী পীরি। তেক্নোলোজীদা য়ুমফম ওইবা পাম্বৈশিং পুথোক্তুনা লৌমীশিংনা চরু মৈ থাবা থিংনবা হোৎনগদবনি। মসিনা অকোয়বগী ফিবম কাইহন্দনা থম্বা ঙমগনি।

মথং নুমিৎ হুম্নি অসিদা লৌউ-শিংউগী থবক অসি শেন্দোং লৈনবা অমসুং মগুন হেনগৎহন্নবা ৱা তানগনি হায়না ঐনা থাজবা থম্লি। খন্নবা অদুদা মরুওইনা য়ু পিগী জিলাশিংদা মখোয়গা চুনগদবা অনৌবা তেক্নোলোজীশিং মতৌ করম্না পায়খৎকদগে হায়বগী মতাংদা খন্নবদা মীয়েৎ থমগনি খল্লি।

য়ু পি অমসুং লৈবাক অসিগী লৌউ-শিংউগী থবকশিংদা কৃষি কুম্ভ অসিনা অনৌবা মাইওন অমা পীগনি হায়না ঐনা থাজৈ। মসিগা লোয়ননা ঐনা ময়াম পুম্নমক অমুক্কা হন্না য়াইফ-পাউজেল পীজরি।

অদোমবু থাগৎচরি।