ভারতকী প্রধানমন্ত্রী

হরিয়ানাগী চীফ মিনিস্তর সাত্যদেব নারায়ন অরয়া জি, হরিয়ানাগী চীফ মিনিস্তর মনোহরলাল জি খাত্তর, ঐগী মন্ত্রীমন্দলগী মরুপ চৌধুরি বিরেন্দ্র সিংহ জি অমসুং রাও ইন্দ্রজিৎ সিংহ জি; রাজ্য সরকারগী মন্ত্রীশিং, মফম অসিদা মশিং য়াম্না তিল্লিবা ঐগী নুংশিরবা হরিয়ানাগী ইচিন-ইনাও অমসুং ইচল-ইচেশিং ।

হরিয়ানাগী চীফ মিনিস্তরনা হৌজিক হায়খি মদুদি ঐহাক্না নখোয় ময়ামগী মরক্তা কয়ারক লাকপগী খুদোংচাবা ফংলে; অমসুং হৌজিক অমুক ঐ অতেনবগী মতমগী মনুংদা অমুক হন্না নখোয়গা উনরে । মমাংদা ঐনা মফম অসিদা লাক্লম্বা অদুদা ঐনা চৌধুরি ছোতু রামগী অচৌবা মীতম অমা হাংদোকপগী খুদোংচাবা ফংখি। মসিগী মীতম অদু হরিয়ানাগী চাওথোকচনবগী খুদম অমনি । ঙসিদি হরিয়ানা অসি হিরম খুদিংদা চাওখৎনবগী অচৌবা খোঙথাং অমা পায়খৎলে ।

মরুপশিং,

লৌশিংগী মঙাল খক নত্তনা থৌনা ফবগী ৱারি কয়া হরিয়ানাদা লৈরি । ঙরাং ফুত ১৮০০০ ৱাংবা মফমদা শোক্নখিবা লাদাক্কী রেজাঙলা পাস ৱারগী ৫৬সুবা থৌরম পাংথোকখ্রে । লানফম অদুদা পারম বির চক্র মনা ফংলবা হরিয়ানাগী মেজর সাইতান সিংহনা থৌনা ফনা লান থেংনখি । থৱায় কৎখ্রবা অথৌবা কয়া হরিয়ানাদগী য়াওরি । হরিয়ানা অসি থৌনা ফবা, খাংবা কনবা অমসুং লৌশিংগী মফম অমনি হায়বসি মখোয়না উৎলি । রেজাং লা পোস্তা লৈখিদ্রবা থৌনা ফরবা লৈবাক অসিগী লান্মীশিংদা ঐনা ইকায়খুম্নবা উৎচরি ।

মরুপশিং,

ঙসি অসি হরিয়ানাগী ওইনা য়াম্না মরুওইবা নুমিৎ অমনি । ঐনা লৈবাক্কী মীয়ামদা কুন্দলি-মনেশ্বর-পালৱাল এক্সপ্রেসৱে কৎথোকপগী খুদোংচাবা ফংলে । অহানবা ফেজ চহি অনিগী মমাংদা লোইশিনখ্রে । কিলোমিতর ৮৩ শাংবা অনিসুবা ফেজগী কুন্দলিদগী মনেশ্বরগী লম্বী অসি ঙসি হৌদোক্লে । মসিগী লোয়ননা কিলোমিতর ১৩৫ শাংবা এক্সপ্রেসৱে অসি হৌজিক শীজিন্নবা য়ারে । মসিগা লোয়ননা, লুপা ক্রোর ৫০০ চংনা শেমগৎপা বাল্লাবগর-মুজেসার মেত্রো লিঙ্ক থবক হৌরে । মসিগী প্রোজেক অনি অসিনা লমদম অসিদা চৎথোক-চৎশিনগী লমদা অওনবা অমা পুরক্লগনি  অমসুং লমদম অসিগী নহারোলশিং শ্রী ভিশ্বকর্মা কাউশাল য়ুনিভর্সিতিগী কান্নবা ফংলগনি ।

মরুপশিং,

ঙসিগী থৌদোক অসিনা থৌদোক অনি চাংদম্নহল্লি । থৌদোক অমদি হৌজিক্কী মতম অসিদা ঐখোয়না ৱারেপ অমগা লোয়ননা করিগুম্বা খর পাংথোক্নবা হায়খিবা অমসুং মদু পাংথোকপা ঙম্বা অদুনি । মসিগী থৌদোক অসি ভারতিয়া জনতা পার্তিগী সরকারশিংনা থবক তৌবগী চৎনবগী অমসুং মওং অসিনি । অনিসুবা থৌদোক অসিনা মমাংগী সরকারশিংগী থবক তৌবগী চৎনবগী অমসুং মওং অসিনি অমসুং মসিনা ঐখোয় নিংশিংদুনা লৈহল্লি । চহি ৮-৯গী মমাংদা নখোয়না এক্সপ্রেসৱে শীজিন্নবা ফংলম্লগদবনি । অদুবু, মদু ওইখিদে । মমাংগী সরকারগী থবক তৌবগী চৎনবগী অদুনা মরম  ওইদুনা এক্সপ্রেসৱেগী থবকশিং চহি ১২ হেন্না চংখি ।

মরুপশিং,

হায়রিবা এক্সপ্রেসৱেশিং অদু কম্মনৱেল্থ গেমস মনুংদা লোইশিনগদবনি । অদুবু কম্মনৱেল্থ গেমস পাংথোকখ্রবসু এক্সপ্রেসৱে অসিগী মরাইবক হান্নগী ফিবমদা লৈখি । প্রগাতিগী মীফমশিংদা ঐনা প্রোজেকশিং অমুক হন্না য়েংশিনবা হৌরকপা মতম অদু ঐ নিংশিংলি  অমসুং অশোইবা কয়া উবা ফংখি । কেন্দ্র সরকারনা লেপ্তনা য়েংশিনবা অমসুং হরিয়ানাদা বি জে পি সরকার  লাকপদগী থবক য়াংশিনবদগী ঙসিগী মহৈ অসি ফংলিবনি । চহি কয়া ঙাইরকপা অদু লোইরে ।

মরুপশিং,

খন্দুনা য়েংউ, থবক লেপ্পা অসিনা হরিয়ানা অমসুং দিল্লি এন সি আরগী মীয়ামদা খুদোংচাদবা কয়া য়াম্না থোকহনবগে হায়বদু । মমাংগী সরকারশিংনা তৌরম্লিবা থবকশিং অসি মতৌ করম্না মীয়ামগী শেন মাংহনবগে অমসুং মীয়ামদা কয়া য়াম্না নমথাক তৌবগে হায়বদু নৈনবা য়াগনি । মসিগী প্রোজেক অসি হৌরকপা মতমদা  চংগদবা শেনফম অসি লুপা ক্রোর ১২০০নি । চহি কয়া অসিগী মতুংদা চংগদবা শেনফম অসি শরুক অহুমদা হেনগৎলে । করিগুমবা মসিগী পেরিফিরেল এক্সপ্রেসৱে অসি মতম চানা লোইশিল্লম্লবদি ,দিল্লিগী ত্রফিক্কী ফিবম অসি হোংলম্লগনি । মসিগী এক্সপ্রেসৱে অসি লোইশিনবদগী অতোপ্পা রাজ্যশিংগী লাকপা অচৌবা গারিশিং দিল্লি ফাউরগা চৎলরোই । দিল্লিগী ত্রাফিক শোকহন্দনা দিল্লি চংদনা মপানদা কোইরগা চৎলগনি । মসিগী এক্সপ্রেসৱে অসি লাকপদগী দিল্লিদা গারি চংলকপা হন্থরগনি ।

 মরুপশিং,

মসিগী এক্সপ্রেসৱে অসিনা দিল্লি অমসুং মসিগী অকোয়বদা পোলুসন হন্থহনবদা মরুওইবা থৌদাং লৌগনি । মসিগী এক্সপ্রেসৱে অসিনা ইকনোমি অমসুং ইনভাইরোনমেন্ত ফগৎহনবতা নত্তনা হিংবদা লাইহনগনি অমসুং চৎথোক-চৎশিন নুংঙাইহনগনি । মসিগী এক্সপ্রেসৱে অসিগীদমক  ঐনা হরিয়ানা অমসুং দিল্লি এন সি আরগী মীয়াম থাগৎলি । দিল্লিগী অকোয়বদা কিলোমিতর ২৭০ শাংবা এক্সপ্রেসৱেগী নেতৱার্ক অমা শেমগৎলে ।

মরুপশিং,

ঙসি মুজেসার অসি মেত্রো রেলনা বাল্লাবগরগা শম্নহল্লে । হৌজিক বল্লাবগর অসি মেত্রো মেপতা য়াওরে । মসিনা মীয়াম দিল্লদা চৎপদা মতেং পাংবা খক নত্তনা মখোয়গী শেন অমসুং মতম মাংহল্লরোই ।

মরুপশিং,

লম্বী-থোং অসি দরকার ওইবা খক নত্তনা মসি লৈবাক অসিগী চাউখৎপা, সেকুরিতি অমসুং শক্তিগী মেদিয়ম অমনি হায়না ঐখোয়না সরকারনা খল্লি । ২১সুবা চহিচাগী দরকার ওইবশিং ফংবা ঙম্নবা লম্বী, রেলৱেজ, ঈশিং লম্বী, হায়ৱেজ অমসুং আই-ৱেজ  শেমগৎনবা ঐখোয়না কন্না হোৎনরি । হৌজিক লৈবাক অসিগী মফম কয়াদা মমাংদা অমুক্তা ওইখিদ্রিবা চাংদা রেলৱে কোরিদোরশি অমসুং হায়ৱেজ কোরিদোরশিং শেমগৎলি । লৈবাক অসিগী সহর কয়াদা ইন্তেগ্রেতেদ ত্রাফিক মেনেজমেন্ত সিস্তেম য়াম্না য়াংনা পায়খৎলি । মীয়ামদা চৎপগী মতম হন্থনবা, লম্বী চিনবা হন্থনবা অমসুং উদোকশিংনা অহোংবা মমলদা পোৎ পুথোক পুশিনগী খুদোংচাবা ফংনবা ঐখোয়না থবক পায়খৎলি । মসিগা লোয়ননা অকোয়বগী ফিবম ঙাক্নবা থবক পায়খৎলি । মসিগীদমক পোলুসন হন্থগদবা অনৌবা মতমগী ত্রান্সপোর্ত শেমগৎনবা থবক পায়খৎলি । মসিগীদমক ইলেকত্রিক রেল পাকথোক-চাউথোকহনবা অমসুং ইলেকত্রিক কার শীজিন্নবা হেনগৎহন্নবা থবক পায়খৎলি ।

মরুপশিং, লৈবাক অসিদা অনৌবা ইনফ্রাস্ত্রকচর শেমগৎনবা ঐখোয়না মীৎয়েং থম্লি । হৌখিবা চহি মরি অসিদা সরকার অসিনা লুপা ক্রোর লাখ ৩ চংনা কিলোমিতর ৩৩০০০ শাংবা হায়ৱেজশিং শেমগৎলে । মমাংগী সরকারগী চহি ৭.৫গী মতমদা শেমগৎলম্বা হায়ৱেজগা চাংদম্নবদা ঐখোয়গী চহি ৪গী মতম অসিদা শেমগৎপা হায়ৱেজশিংনা শাংবা হেল্লে ।

মরুপশিং,

মীয়াম, শিন্মীশিং, ওফিসশিং অমসুং ফাইলশিংদি চপ মান্নৈ অদুবু ঐখোয়না চপ য়ুংনা লেপ্লবদি পান্দম খুদিংমক ফংবা ঙমগনি । মসিগী মরম অসিননি ২০১৪গী মমাংদা নোংমদা কিলোমিতর ১২গী চাংদা হায়ৱেশিং শেমগৎলম্লিবা । ঙসিদা নোংমদা কিলোমিতর ২৭গী চাংদা শেমগৎলে । মসিগী খোঙজেল অসিদা ভারতমালা প্রোজেক্কী মখাদা কিলোমিতর ৩৫০০০গী হায়ৱেশিং শেমগৎপগী থবক চৎথরি । হায়ৱে শেমগৎপগী থবক য়াংনা পায়খৎপতা নত্তনা রেলৱেজ শেমগৎপগী থবকসু য়াম্না কন্না চৎথরি । মমাংদা রেল লম্বী লৈরমদবা মফমশিংদা রেল লম্বী শেমগৎপগী থবক পায়খৎলি ; দরকার লৈবা মফম খুদিংমক্তা রেল লম্বী শেমগৎনবা থবক পায়খৎলি ।

মরুপশিং,

ঐখোয়গী সরকার অসিনা মতম চুপ্পদা লৈবাক্কী  দরকার ওইবশিং অমসুং মীয়ামগী অনিংবা অমসুং অপাম্বশিং থুংহন্নবা খন্নরি । মসিগীদমক ত্রেনশিংগী খোঙজেল হেনগৎহল্লে অমসুং স্তেসনশিং মতমগা চুনবা মওংদা শেমগৎলে । হৌজিক্কী ত্রেকশিংদা অনৌবা ইনজিন য়াওদবা ত্রেনশিং চেনবা উবা ফংলগনি । মসিগী ত্রেন অসিনা মেক ইন ইন্দিয়াগী থবকশিং ফগৎহল্লে ।

মরুপশিং,

লৈবাক অসিগী হুমেন রিছোস অমসুং  ঈশিংগী লনশিং য়ারিবমখৈ শীজিন্ননবা সরকারনা থবক পায়খৎলি । লৈবাক অসিদা ঈশিং লম্বী ১০০ হেন্না শেমগৎলে । নুমিৎ খরনিগী মমাংদা , লৈবাক অসিগী অহানবা কার্গো তুরেলগী লম্বী ফাউদুনা বনরাসি য়ৌরকখ্রে । হৌজিক বনরস-হালদিয়া ঈশিং লম্বী ফাউদুনা জহাসশিংনা পোৎ পুবা হৌরে । য়ু পি অসি হৌজিক ইমা গঙ্গাগী খুৎথাদা অৱাং-নোংপোক্কী রাজ্যশিং শম্নবা হৌরে । লৈবাক অসিদা অহোংবা মমলদা নোংথক্কী লম্বীদা চৎপা ঙম্নবা উরান স্কিম পায়খৎলি । মফম অসিগী হিসারদা উরান স্কিমগী মখাদা এয়রপোর্ত অমা শেমগৎলে । মরুপশিং, সরকারগী থৌশিলশিং অসিনা মরম ওইদুনা , হৌজিক মীচম মীয়াম্না ফ্লাইত তোংদুনা চৎপা ফংলে ।

মরুপশিং,

দিজিতেল ইন্দিয়া মিসনগী মখাদা পন্জয়াতশিংগা ব্রোদবেন্দ শম্নবগী থবক য়াংনা পায়খৎলি । মমাংগী সরকারনা পন্জয়াত ৫৯ খক ব্রোদবেন্দ শম্বগী থবক পায়খৎলমখি । অদুবু চহি মরি অসিদা ঐখোয়গী সরকারনা পন্জায়ত লাখ ১ হেন্না ও এফ সি নেতৱার্ক্ক শম্নহল্লে । অতোপ্পা খুৎতা শুপ্নগী ৫৯ খক লৈরে অদুদা অমদনা লাখ ১ হেন্না লৈরি ।

মরুপশিং,

লম্বী-থোং ফগৎলকপা অসিনা অনৌবা থবক ফংবগী খুদোংচাবা কয়া পীরে । মসিনা হায়ৱে শেমগৎপা, মেত্রো , রেল, ঈশিং লম্বী, মেনুফেকচরিং অমসুং ত্রান্সপোর্তকী থবকশিং ফগৎহল্লে । হরিয়ানা সরকারনা নহারোলশিংদা অনৌবা থবক ফংবগী খুদোংচাবা পীবতা নত্তনা থবক ফংনবা মখোয় শেম-শাবগী থবকশিংদসু মীৎয়েং থম্লি । শ্রী বিশ্বকর্মা কাউসাল য়ুনিভর্সিতি শানবা উরেপ-উয়ুং তম্লিবা অসি মসিগী শরুক অমনি ।য়ুনিভর্সিতি অসিনা  হরিয়ানাগী নহারোলশিংনা মখোয় মশাগী ললোন-ইতিক্কী থবক হৌবা ঙম্নবা স্কিল ত্রেনিং পীগনি । ভাগবান বিশ্বকর্মাগী থৌজালদগী মসিগী য়ুনিভর্সিতি অসিনা মহৈরোইশিংগী তুংগী পুন্সিদা অফবা পুরক্কনি হায়না ঐনা থাজবা থম্লি ।

মরুপশিং,

ঙসিদি হরিয়ানা অসি মপান্দা পোৎ থাদোকপদা মাংজিল রাজ্য অমা ওইরে । মসিদা অপীকপা উদোক ২২০০০ অমসুং এম এস এম ইশিংনা অচৌবা থৌদাং লৌরি । মসিগী কৌসাল য়ুনিভর্সিতি অসিনা লমদম অসিদা এম এস এম ই মপাঙ্গল কনখৎহনগনি । মসিগী য়ুনিভর্সিতি অসিদগী থোকখিবা মহৈরোইশিংনা জিরো দিফেক জিরো ইফেকগী ৱাখল্লোন্দা পোৎশিং পুথোক্কনি অমসুং মেক ইন ইন্দিয়াগী পান্দম মপুং ফাহনগনি।

মরুপশিং,

এম এস এম ই সেক্তর চাউখৎনবা হন্দক মরুওইবা ৱারেপ ১২ লৌখিবা অদু নখোয় খঙলমগনি । হৌজিক হরিয়ানাগী ঐগী অপীকপা ললোনবশিংনা জি এস তিগী লোয়ননা শুপ্নগী মিনিত ৫৯গী মনুংদা লুপা ক্রোর ১গী লোন লৌবা য়ারগনি । পোৎথোক পুথোকপা হেনগৎহন্নবা ৱারেপ লৌবতা নত্তনা য়োনফম হেনগৎহন্নবা থবক কয়া পায়খৎলে ।

মরুপশিং,

লৈবাক অসিগী ওন্ত্রেপ্রেনিউয়রশিং য়োকখৎপা অমসুং মখোয়দা থৌনা হাপ্পা সরকার অসিনা পাম্মি । মখোয়না পুথোকপা ৱাখল্লোনশিং অদু শেল্লেপ লৈতবদগী অরেম্বদা মাংহন্দনবা চেকশিন্না শেন্নরি । মসিগী ৱাখল্লোন অসি মাংদা থম্লগা স্তেদন্দ –অপ ইন্দিয়া অমসুং স্তার্দ-অপ ইন্দিয়া অসি থবক ওইনা পায়খৎলে । মসিনা মরম ওইদুনা, মুদ্রা য়োজনাগী মখাদা লৈবাক অসিগী নহারোলশিংদা বেঙ্ক গরেন্তি য়াওদনা লুপা ক্রোর লাখ ৬.৭গী শেনফম লোন ওইনা পীখ্রে । য়াম্না মরুওইবা অমনা, মুদ্রা য়োজনাগী মখাদা লোন পীরিবা অসিগী চাদা ৭০ নুপীশিংনি । মসিগী স্কিম অসি নুপীশিং মশানা মশাবু থবক পীজনবগী অচৌবা মেদিয়ম অমা ওইরে অমসুং মসিনা হরিয়ানাগী ঐগী ইচানুপীশিং অমসুং ইচলশিং কান্নবা ফংহল্লে ।

মরুপশিং,

নুপীশিংগী পুন্সি হিংবদা লাইহন্নবা  ঐখোয়গী সরকারনা চোকথবা নাইদনা হোৎনরি । শ্বাছ ভারত মিসনগী মখাদা তোইলেত ক্রোর ৯ হেন্না শারে, উজৱালা য়োজনাগী মখাদা গ্যাস কন্নেক্সন ক্রোর ৬ হেন্না পীরে , থবক অনি অসিনা নুপীশিং হিংবদা নুংঙাইহল্লে । মসিগী পান্দম অসি ফংনবা হরিয়ানা সরকারনা কেন্দ্র সরকারগা মপুং ফানা থবক তৌমিন্নরি । বেতি বচাউ বেতি বরাও কেম্পেন অমসুং খেল্লো ইন্দিয়া মাইপাকপা অসি মসিগী খুদম্নি । হরিয়ানাগী নুপীমচাশিং অমসুং নুপামচাশিংনা মেদল মশিং য়াম্না ফংলি । কম্মনৱেল্থ গেমস নৎত্রগা এসিয়াদ গেমস ওইগেরা হরিয়ানাগী শানরোইশিংনা মাইপাকপা পুরকপা অদু মালেম শীনবা থুংনা খঙলি ।

মরুপশিং,

কেন্দ্র অমসুং রাজ্যশিংগী বি জে পী সরকারশিংনা; হরিয়ানা নৎত্রগা রাজাস্থান, এম পি নৎত্রগা ছতিসগর, উত্তর প্রদেস নৎত্রগা অৱাং-নোংপোক ওইরগেরা সবকা সাথ সবকা বিকাস হায়বা লাইৱা অসিদা থবক তৌরি । মসিগী ফল ঙসিদি ফজনা উবা ফংলে । পায়খৎলিবা থবকশিং অসিদা হরিয়ানাগী মীয়াম্না মতেং পাংবা অসিদা ঐ হরাওই । ঐনা ময়াম পুম্নমক অমুক্কা হন্না থাগৎচরি ।