ভারতকী প্রধানমন্ত্রী

য়ুনাইতেদ নেসন্সকী জনেরেল সেক্রেতরী, এন্তোনিও গুতেরেস, ইন্দিয়া ওসিন রিম এসোসিএসন লৈবাকশিংগী মিনিস্তরশিং অমসুং ইন্তর্নেস্নেল সোলর এলাইন্স মীফমদা শরুক য়ারিবশিং,মফম অসিদা লৈরিবা ঐগী মন্ত্রীমন্দলগী মরূপশিং, ইন্দস্ত্রিগী মরূপশিং,শক্নাইরবশিং অমসুং মরুওইনা মহৈরোই মরূপশিং, ইবুংঙো অমসুং ইবেম্মশিং।

ঙসি অয়ুক এন্তোনিও গুতেরেসগা লোয়ননা লু-নানবগা মরি লৈনবা য়াম্না মরুওইবা থৌরম অমা ঐনা শরুক য়াবগী খুদোংচাবা ফংখি । লৈবাক অসিদা মহাত্মা গান্ধীগী চহি ১৫ও সুবা মপোক নুমিৎ থৌরম হৌদোকখি অমসুং থৌরম অসি ঙসি মালেমগী মফম কয়াদসু হৌদোকখি । হেন্না নানবা তুংগী ফিবম অমা শেমগৎনবা ঙসি হায়বা নুমিৎ অসিদগী হেন্না চুনবা নুমিৎ অমা লৈত্রে ।

ইন্তর্নেস্নেল সোলর এলাইন্স (আই এস এ) অমসুং ঐনা মসিগী আই এস এ হায়রিবা ৱাহৈ অসি মমিং চৎপা পাম্মি । মসি মালেমগী রিন্যএবল ইনর্জী ইনভেসমেন্ত অমসুং এক্সপো ওইগেরা নৎত্রগা রি-ইনভেস্ত ওইগেরা নৎত্রগা মসি ইন্দিয়া ওসিন রিম এসোসিয়েসন ইনর্জী মিত ওইগেরা,হায়রিবা অহুম অসিগী পান্দমদি চপ মান্নৈ – মশা নানবা তুং অমগীদমক মৈখু চেন্দবা ইনর্জী শীজিন্নবনি ।

মরূপশিং,

হৌখিবা চহি ১৫০-২০০ অসিদা মীওইবা খুন্নাইনা মসিগী দরকার ওইবা ইনর্জী ফোসিল ফুয়েলগী মখা পোনদুনা লাক্লি । ঐখোয়না খঙলে মদুদি মসিগী থবক অসি মহৌশানা য়াদদুনা লাক্লি অমসুং মসি হৌজিক ফাওবা য়াদ্রি । ইনর্জীশিং কংফাল মথক্ত লৈরি হায়না মহৌশা লাইরেম্বীনা মসিগী পাউজেল অসি লেপ্তনা ঐখোয়দা পীদুনা লৈরি, মদু সোলর পাৱর, ৱিন্দ পাৱর, হায়দ্রো পাৱর ওইবা য়াই অমসুং মসিনা তুংগী হেন্না অফবা ওইগনি ।

মহৌশানা ঐখোয়দা পীরিবা পাউজেল অসি খন্ননবা ঙসি ঐখোয় ময়াম মফম অসিদা পুনবা অসিদা ঐ হরাওবা পোকই ।
মরূপশিং,

চহি অহুমগী মমাংদা অহানবা রি-ইনভেস্ত মীফমদা ঐখোয়গী ইরৈচাশিংগী মমাংদা ঐনা রিন্যএবল ইনর্জীগী লমদা ভারতনা মেগাৱাত্তগী গিগাৱাত্তা লাক্লগনি হায়না ৱারেপ লৌখিবা অদু ঐ হৌজিক ফাওবা নিংশিংলি । মতম অদুদা ঐখোয়না সোলর অমসুং গ্রিন ইনর্জগী খক্তদগী মতেং লৌরি মরমদি মখোয় অদু লাইনা অমসুং হোংনা ফংই । নুমিৎকী মঙাল মরাং কাইনা ফংবা লৈবাকশিংগী অপুনবা মফম অমা শেম্নবা ঐনা ৱাফম অমা পুখৎখি । অতেনবা মতমগী মনুংদা হায়রিবা স্কিমশিং অদু থবক ওইনা পায়খৎলকপগীদমক ঐ হরাওবা পোকই ।

মরূপশিং,

ঙসিদি ইন্তর্নেস্নেল সোলর এলাইন্স অসি মালেমগী অচৌবা থাজবা অমা ওইরে । চহি অহুমগী মনুংদা লুপ অসি সরকারশিংগী লুপ অমা ওইরে । আই এস এগী হেদক্বাতর অসি ভারত্ত ওইবদা ভারতমচা মিলিয়ন ১.২৫ হরাওরি ।
২১সুবা চহিচাদা মীওইবা খুন্নাই য়াইফনবা লিংখৎপা মকোক থোংবা লুপশিংগী মরক্ত আই এস এগী মমিং য়াওরে । অইং-অশাগী খল কাইহন্দনবা হোৎনবদা আই এস এ অচৌবা থৌদাং লৌনবা ফিদা অমা শেম্লে ।

মরূপশিং,

ঙসি মালেমগী দরকার ওইবা ইনর্জী ফংহনবদা ওপেক্না লৌরিবা থৌদাং অসিগুম্বা আই এস এনা লৌরক্কনি হায়না ঐনা থাজবা থম্লি । ঙসি থাউনা মরুওইবা থৌদাং লৌরিবা অসিগুম্না নুমিৎকী মঙালনা মরুওইবা থৌদাং লৌরক্কনি । ঙসিগী আই এস এগী ওইরিবা ফিবম অসি লাক্নবা হোৎনবদা মতেং পাংবগীদমক য়ু এন থাগৎলি । পেরিসতা আই এস এ লিংখৎপদা য়ু এনগী সেক্রেতরী জনেরেল বান কি-মুন শরুক য়াখিবা অমসুং ঙসিগী থৌরম অসিদা এন্তোনিও গুতেরস শরুক য়াবা অসিনা মসিগী ফোরম অসিদা য়ু এনদা কয়া য়াম্না মরুওইবগে হায়বা উৎলে । মখোয়গী মতেং অদুগীদমক ঐনা ফ্রান্সকী প্রসিদেন্দ অমসুং ফ্রেঞ্চ সরকার থাগৎলি ।

মরূপশিং,

আই এস এগী অহানবা মীফম অসিদা লৈবাক ৪০গী মীহুৎশিং শরুক য়ারি । কেপ্রিক্রোনগী অকোয়বদা লৈবা লৈবাক ১০০ নৎত্রগা ১২৫ খক নত্তনা মালেম শীনবা থুংনা মসিগী কান্নবা ফংহন্নবা ঐখোয়না মাংলোমদা চংশিনবা দরকার ওইরি ।
সোলর ইনর্জীগী লমদা মালেমগী ওইনা মতেং পীন্নবা, ভারতনা য়ু এনগী মেম্বর খুদিংমক আই এস এগী এশেমব্লিদা শরুক য়ানবা তকশিল্লি ।

মরূপশিং,

মসিগী লুপ অসিগী মরুওইবা মেম্বর অমা ওইনা ভারতনা ইন্দিয়ান ওসিন রিম এসোসিয়েসন্দা মরুওইনা লৌরি । ইনর্জীগী লমদা ঐখোয়গী মান্নবা খুদোংচাদবশিং লৈরি । মসিনা মরম ওইদুনা, ঐখোয়গী দরকার ওইবা ইনর্জী ফংনবা ঐখোয় পুম্নমক্না রিন্যএবল ইনর্জীদা মীৎয়েং থম্বা দরকার ওইরি ।

হৌজিক ভারত্ত রিন্যএবল ইনর্জী শীজিন্নবা হেনগৎলকপা ময়েক লানা উবা ফংলে । পেরিস ক্লাইমেত এগ্রিমেন্তগী মখাদা পান্দম থমখিবা রিন্যএবল ইনর্জী অদু ফংবা ঙম্নবা ঐখোয়না থবক তৌবা হৌরে । ২০৩০ ফাওবগী মনুংদা ঐখোয়গী দরকার ওইবা ইনর্জীগী চাদা ৪০ নন-ফোসিল ফুয়েলদগী পুথোক্নবা পান্দম থমলি । মসিগী পান্দম অসিগী মখাদা, হৌখিবা চহি মরি অসিদা ঐখোয়না ঐখোয়গী রিন্যএবল ইনর্জী পুথোকপা ঙম্বা অসি গিগাৱাত ৭২ য়ৌরে । মসিগী মতাংদা সোলর ইনর্জী পুথোকপা অসি শরুক মপান হেনগৎলে । ঙসি ঐখোয়গী পুথোক্লিবা অপুনবা মৈগী চাদা ২০দি নন-হায়দ্রো রিন্যএবল ইনর্জীদগী পুথোক্লি । মসিগী খক নত্তনা ঐখোয়না য়াম্না থুংনা গিগাৱাত ৫০ হাপচিল্লগনি । ২০২২ ফাওবগী মনুংদা গিগাৱাত ১৭৫ পুথোক্নবগী পান্দম অদু ফংনবা লম্বী নকশিল্লক্লে ।

মরূপশিং,

ঙসিদি ভারত অসি লায়রবদগী পাৱরদা লাকপগী অনৌবা থাজবা লৈরে । চহি লিশিং কয়াগী ঐখোয়গী থৌনা পীদুনা লাক্লিবা অদুনা ঙসি ঐখোয়গী অনৌবা থাজবা অসিগী হৌরকফম অমা ওইরি । মসিগী হৌরকফম অসি নুমিৎনি, নুমিৎ কৌবা ঈশ্বর অসি ভারতকী মীয়াম্না লাৎনদুনা লাক্লি ।

মরূপশিং,

নুমিৎ অসি ঐখোয়দা মঙাল অমসুং মৈশা পীবা ঈশ্বরনি । তাইবংপাল পুম্নমক অসি নুমিৎন ওইহনবনি হায়না ঐখোয়না থাজৈ । নোংমগী ইহান হানবদা ঈশিং খর কৎলগা নুমিৎ খুরুম্বা অসি মহৌশাদগী চৎনরকলবা ঐখোয়গী খুন্নাইগী চৎনবীনি ।

বেদগী য়োগ ফাওবা, নুমিৎ অসি ঐখোয়গী ৱাখলগী হৌরকফম, ঐখোয়গী লাইনিং অমসুং ঐখোয়গী নুংগী শক্তি ওইরি। মসিগী ইনর্জী আসি ঐখোয়না সাইন্সকা লোয়ননা ঐখোয়গী মপানগী দরকার ওইবা ইনর্জী ওন্থোক্নবা ঐখোয়না থবক পায়খৎলি ।

মরূপশিং,

সোলর পাৱরগী লমদা ভারত খোঙজেল য়াংনা থবক পায়খৎলি । হৌখিবা চহি মরি অসিদা, সোলর পাৱর অসি মমল হোংদোরকপদগী মসিনা লায়রবশিং য়ুম খুদিং মৈ ফংহন্নবা ঐখোয়না থম্লিবা পান্দম অদু ফংবা ঙমহল্লে ।

য়ুম খুদিং মৈ ফংহন্নবা ঐখোয়না পান্দম থম্লিবা অসিদা পেনেল তু পাৱর অমসুং মেক ইন ইন্দিয়া অসিনা মরুওইবা থৌদাং লৌরি ।হৌখিবা চহি মরি অসিদা ভারত অসি রিন্যএবল ইনর্জীগী লমদা খ্বাইনা পাম্নবা মফম অমা ওইরে । হায়রিবা মতম অসিগী মনুংদা চাওরাক্না লুপা বিলিয়ন ৪২ থাদখ্রে ।

মরূপশিং,

সোলর পাৱরগী লমদা অহোংবা লাক্লিবশিং অসিনা মপানগী শেন থাদরকপশিংদা খুদোংচাবা পীবতা নত্তনা ঐখোয়গী ওন্ত্রেপ্রেনিউয়রশিংদসু কান্নবা ফংহল্লি । লৈবাক অসি সোলর পেনেল শানবগী অচৌবা থবক পায়খৎনবা হোৎনরি ।
হৌজিক অসি রিন্যএবল ইনর্জী সেক্তরদা শেন থাবগী চপ চারবা মতম্নি । মথং চহি ৪দা সেক্তর অসিদা য়ু এস দোল্লর বিলিয়ন ৭০দগী ৮০ ফাওবগী ললোন-ইতিক্কী থবক তৌগনি হায়না ঐনা থাজবা থম্লি ।

মরূপশিং,

মৈ পুথোকপগা লোয়ননা মৈ তুংশিন্দুনা থম্বা অসিসু য়াম্না মরুওই । নেসনেল ইনর্জী স্তোরেজ মিসনগী মখাদা মসিগী দরকার ওইবা মচাকশিং শেমগৎপগী থবক পায়খৎলি ।

খুঙ্গংশিংগী লৌবুকশিংদা সোলর পেনেলশিং থমলগা মদুনা কুসাম-কিষান উরজা সুরকসা ইভম উথম মহা অভিয়ানগী খুৎথাংদা নেসনেল গ্রিদতা শম্নবা থৌরাং তৌরি । মথং চহি মরিদা লৈবাক শীনবা থুংনা সোলর পম্পস লাখ ২৮ রোম পানখৎনবা থৌরাং তৌরি। মখোয়গী মখাদা মৈ গিগাৱাত ১০ পুথোক্নবা পান্দম থম্লি ।

মরুশিং,

সোলর পাৱর অমসুং ৱিন্দ পাৱরগী মথক্ত, ঐখোয়না বি-৩ হায়বদি বাইওমাস, বাইও-ফুয়েল অমসুং বাইও-ইনর্জীগী লমদা থবক পায়খৎলি । ভারত্ত চৎথোক-চৎশিন্দা মৈখু চেন্দবা ফুয়েল শীজিন্ননবা থবক পায়খৎলি । শন্থিদগী শেন ওন্থোক্নবা গোবরধন কৌবা অচৌবা স্কিম অমা পায়খৎলে । মসিগী ফত্তবা অসি ইনর্জী ওন্থোক্নবা সহরশিং অমসুং খুঙ্গংশিংদা অনৌবা চাংয়েং কয়া পাংথোক্লে ।

মরূপশিং,

অকোয়বগী ফিবম ঙাকশেন্নবা রিন্যএবল ইনর্জীগী লমদা থবক পায়খৎলে অমসুং মৈ লিক্না শীজিন্নবা অসি ঐখোয়না মরুওইনা লৌরিবশিংগী মরক্ত অমনি ।

ঙসি উজৱালা স্কিমগী মখাদা লৈবাক অসিগী য়ুমশিং, লৈরকশিং অমসুং লম্বীশিং এল ই দি ব্লবশিংনা মৈ থান্নবগী অচৌবা ইহৌ অমা লৈরে । হায়রিবা স্কিম অসিগী মখাদা এল ই দি ব্লব ক্রোর ৩১ রোম য়েন্থোকখ্রে । হায়রিবা এল ই দি ব্লব ক্রোর ৩১ অসিনা চহি অমদা চাওরাক্না মৈ কিলোৱাত মিলিয়ন ৪০,০০০ কনবা ঙমগনি । মসিগী চাং অসি কনাগুম্বা অমনা ৱাখলনা লামশিনবা ঙমগদরা ? মসিনা লৈবাক অসিগী মীয়াম্না চহি অমদা লুপা ক্রোর ১৬,০০০গী মৈগী বিল কনবা ঙমগনি ।

ময়াম্না পীরকপা পাউতাকশিং অমসুং অনৌবা ৱাখলশিং অদু ঐখোয়দা য়াম্না কান্নগনি । ঐখোয়না মঙলান অমা হৌরে : মালেম অমা, নুমিৎ অমা, গ্রিদ অমা । করিগুম্বা ঐখোয়না মসিগী মিসন অসি থবক ওইনা পাংথোক্তুনা গ্রিদশিং থবক হৌরক্লবদি নুমিৎ থোকপদগী নুমিৎ তাবা ফাওবা মৈ পুথোকপা ঙমগনি । ঙসি ঐখোয়না ঐখোয়গী লৈবাক খক্তদা নুমিৎকী মঙাল ফংবগী ৱাখল তৌনরি, করিগুম্বা মালেম অমা, নুমিৎ অমা, গ্রিদ অমা থবক ওইনা পায়খৎলবদি মালেমগী মফম অমদা নুমিৎ তাখ্রবসু মফম অমদা নুমিৎ থোক্কদবা মরম্না লেপ্তনা মৈ পুথোকপা ঙমগনি ।

মসিগী অনৌবা থবক অসিগী ৱাখল খনবা দরকার ওইরি । মসিগী আই এস এগী মরুওইবা থৌরম অসিদা অনৌবা থাজবা অমগা লোয়ননা অনৌবা মালেম অমা শেমগৎনবা মসিনা মরুওইবা থৌদাং অমা লৌগনি হায়না ঐনা থাজৈ ।
ভারত্তা লাক্তুনা মসিগী মরুওইবা থৌরম অসি শরুক য়াবগীদমক ঐনা ময়াম অমুক হন্না থম্মোয় শেংনা থাগৎচরি ।
ময়াম পুম্নমক থাগৎচরি ।

***