ভারতকী প্রধানমন্ত্রী

ৱাহং– ইকায় খুম্নজরিবা প্রধান মন্ত্রীবু, ঐহাক্কী ইমিং কে. দীপিকা, তেলঙ্গনাগী গবর্নমেন্ত দিগ্রী কোলেজ ফোর ৱুমেন বেগমপেৎ হাইদ্রবাদতা বি.এ. জর্নেলিজম ফাইনেল ইয়র তমজরি। সার, হৌখিবা চহী মঙা অসিদা এজুকেসনগীদমক ইনিসিয়েতিব কয়া অমা ঐখোয়না উজরে। এজুকেসন সেক্তরদা অদোম্না হোৎনবীরিবা অসিদা অদোম অপেনবা ফাওবিব্রা? তাঞ্জা অসি পীবীবগীদমক অদোম্বু থাগৎচরি।

এঙ্কর – ঐখোয়না হৌখিবা চহী মঙাদা এজুক্সনগী লমদা অনৌবা ইনিসিয়েতিব কয়া অমা উরে, এজুকেসন সেক্তরদা অদোম্না হোৎনবীরিবা অসিদা অদোম অপেনবা ফাওবিব্রা? ওনরেবলনা চানবীদুনা হায়বীয়ু।

প্রধান মন্ত্রী: ৱাহং অসিগীদমক ঐহাক্না অদোমগী লমন তোনশিঞ্জরে অমদি লৈবাক্কী মফম পুম্নমক্তা চাউরাক্না নহারোল কোতি অনি মখায়গা লোয়ননা ৱারী শান্ননবগী তাঞ্জা ফংজরে। তেক্নোলোজীবু থাগৎচরি। পোৎশক অমখক্তবু অনি থোক্না য়েংবা য়াই। হোৎনবা হায়বসিগী ৱাফমদা ঐখোয়না অচুম্বা মায়কৈদা চৎপা অসিদা অপেনবা ফাওই। মালেম অসিদা এজুকেসনগী চাংদা অমা শেম্লিবা অদুদা ঐখোয়না অক্নবা তাইম তেবলগা লোয়ননা মাংলোমদা চংশিল্লি। অদুগুম্লবা গ্লোবেল স্তেন্দর্দ অদু ঐখোয়না এচিব তৌবা পাম্লি। ঐখোয়না পাম্লিবদি ঐখোয়গী লৈবাক অসিগী নহারোল পুম্নমকপু মখোয় মখোয়না পাম্লিবা মহৈগী লম অদুদা চংবা ফংহনবা অদুনি। সরকারগী থবক অমনা অদুগুম্লবা সিস্তেম অদু দিবেলপ তৌবনি। অনৌবা ভারতকীদমক্তা মথৌ তাবা ইন্সতিত্যুশনশিংগী মওং মতৌ অদুদা ঐখোয়না ইনোৎ পীরি। আই.আই.তি. ওইগেরা আই.আই.এম. ওইগেরা মদু দিবেলপ তৌনবগীদমক খোংজেল য়াংনা থবক চত্থরি। মতৌ অদুম্না স্কিল দিবেলপমেন্ত অসি য়াম্না চাউবা এরিয়া অমনি মদুদা ঐখোয়না ইনোৎ পীরি। ঐখোয়না মসিসু হোৎনরি মদুদি ঐখোয়গী লৈবাক অসিগী নহা কয়া মহৈ তম্নবা মীরমদা চৎলি। ঐখোয়গী লুপা কোতি লিশিং লাখ কয়া মীরমদা চৎখি। ঐখোয়না অদুগুম্বা মখলগী এজুকেসন সিস্তেম শেমগৎপা পাম্লি মদুনা ঐখোয়গী লৈবাক্কী মীওইশিং মীরমদা চৎখিবগী মহুৎ মালেমগী মীয়াম ভারত্তা লাকপা অদুনি। মংলান অসিগা লোয়ননা ঐহাক্না থবক তৌরি। মায়কৈ অসোমদা হায়রুরগদি ঐহাক য়াম্না অপেনবা ফংলি। চহী মরি মখায়গী য়ামখিদ্রবা ওফিস পায়বগী মতম অসিদা পাংথোক্লিবা থবকশিং অসি ঐহাক্তা নত্তে মীপুম খুদিংমক অপেনবা ফাওগনি। থাগৎচরি……

এঙ্কর– থাগৎচরি ওনরেবল প্রধান মন্ত্রী জী, ওনরেবল হৌজিক ঐখোয় লৈবাক অসিগী নোংপোক লমদম অসমগা কনেক্ত তৌরি মসিদা কোত্তন য়ুনিবর্সিতীগী অনামিত্রা মহন্তনা অদোমগী মফমদা করিগুম্বা খরা হংনীংলি…..

ৱাহং – ইকায় খুম্নজরিবা প্রধান মন্ত্রীবু, ঐহাক অসমদগী অনামিত্রা মহন্তনি। সর, ঐখোয়না এজুকেসন য়াওনা নোংমগী হিংলিবা পুন্সিদা দিজিতেল ইন্দিয়া অসি মীওই কয়ানা শিজিন্নবা ঐখোয়না উরে। ঐখোয়গী লৈবাক অমসুং ঐখোয়গী মীয়ামদা মসিগী ইম্পেক্ত অসি অদোম্না করম্না উবীবগে? মসিদা ঐহাক্কী ৱাহং লোইশিনজরগে অদোম্বু থাগৎচরি।

এঙ্কর – সর ঐখোয়গী নোংমগী পুন্সিদা ঐখোয়না দিজিতেল ইন্দিয়াগী শিজিন্নফম কয়া অমা উবা ফংলি। মদুদা এজুকেসনসু য়াওরি। ঙসি ঐখোয়গী লৈবাক অমসুং মফম অসিগী মীয়ামদা মসিনা মরম ওইদুনা করম্বা অহোংবা অদোম্না উবা ফংবীবগে? ওনরেবলনা চানবীদুনা তাকপীগনি।

প্রধান মন্ত্রী – য়েংবীয়ু মীওইবা জাতিনা লেপ্পা লৈতনা দিবেলপ তৌরক্লি। তেক্নোলোজীনা য়াম্না চাউবা দ্রাইভিং ফোর্স অমা ওইরি। অনৌ–অনৌবা ইনোবেসনশিংনা মীওইবগী পুন্সিবু লেপ্পা লৈতনা অহোংবা পুরক্লি। অদুবু ঙসি চহী ৪০গী মমাংদা মালেম অসিনা হোংলক্লিবা খোংজেল অদু মসিনি। ইনোবেসন্স তেক্নোলোজী ইন্তর্বেন্সন্না মালেম অসিবু হৌখিবা চহী ২০০–৩০০দা অহোংবা পুরক্তুনা মফম অসিদা পুরক্তুনা থম্বীরে। হৌখিবা চহী ৪০–৫০দা তেক্নোলোজীনা চোংখিবা অসি ঐখোয়গী থাজবগী ৱাংমদনি। করিগুম্বা হৌখিবা চহী ২০০–৩০০গা য়েংনরুরবদি মসিগী চহী ৪০–৫০ অসি ক্বান্তম জম্প অমনি। অনৌবা দাইমেন্সন্নি। মদুনা স্পেস ওইগেরা, সমুদ্র ইরোলনুংগী ৱাফম ওইগেরা, লৈমায়থক্কী ৱাফম ওইগেরা, দিজিতেল ৱার্ল্দনা মসিদা য়াম্না চাউবা থৌদাং লৌরি। ঙসি হৌজিক ঐহাক্না অদোমগা অসুক য়াম্না নুংঙাইনা ৱারী শানবা ঙম্লি। ঐহাক শ্রীনগরদা ফম্লি অদুগা শ্রীনগরদগী ঐহাক্না হিন্দুস্তানগী কাচিন খুদিংদা নহারোল কোতি অনি মখায়গা এজুকেসনগা মরী লৈননা ৱারী শানরি। মসি খ্বাইদগী চাউবা ইম্পেক্তনি। হৌজিক অদোম্না বান্দিপুরাদা বি.পি.ও. অমা শঙ্গাখিবা অদু উরে অদুগা অহানবা বি.পি.ও. অসি হৌজিক দিজিতেল রিভোলুসনগী মহৈনি। দিজিতেল রিভোলুসনগী খ্বাইদগী চাউবা কানবা, হৌজিক অদোম্না য়েংবীয়ু ঐখোয়গী আধিকার অসি মখল অমরোমদা দিজিতেল রিভোলুসনমক্কী শরুক্নি। ঐখোয়গী ওইনা মীওই কোতি ১২০গী মরমদা শন্দোক্না ঐখোয়দা দেতা লৈ হায়না মালেম অসিদা হায়রুবা মতমদা জগৎকী মীয়াম্না চাউনা অঙকপা ফাওই। অসিগুম্লবা লন–থুম অদু ঐখোয়গী লৈরি, মসি দিজিতেল রিভোলুসনগী মহয়নি। ঐখোয়না জাম ত্রিনিতী হৌদোক্লে, ভারত সরকারনা জাম ত্রিনিতীগী থোংদা আধার, মোবাইল, জনধন, কনাগুম্বা মীচম প্রজা অমনা সরকারদা করিগুম্বা অমা থানীংলবা, খুঙ্গং অদু লাইরবা ওইরবদি ওনলাইন লাক্লগনি, থাবা ঙম্লগনি। এজুকেসনগী লমদা ঙসিদি এপ কয়া অমা ফংলে অমদি কয়া অমদি চাদিং য়াম্না তৌদে। মদুনা মরম ওইদুনা মহৈরোইশিংনা অনৌ অনৌবা এজুকেসন ফংনবা এপকী খুত্থাংদা খরনা হোম ৱার্ক তৌরে। ত্যুসন অমসুং কোচিং ক্লাস মালেম অসিদগী মুৎখিবা মতম অদুসু লাকপা য়ারি। অসুক য়াম্না কনবা শক্তি অসি দিজিতেল ইন্দিয়াদা লৈরি। দিজিতেল ৱার্ল্দনা গোবর্নান্সতা য়াম্না চাউবা থৌদাং লৌরি। ত্রান্সপরেন্সীগীদমক খ্বাইদগী চাউবা শক্তি অদু দিজিতেল ৱার্ল্দনি। অহানবদা দিজিতেল পৱার অসি ঐখোয়গী মাংদা লৈরিবা য়াম্না চাউবা রিভোলুসন অমনি। অনিশুবদা লোং দিস্তেন্স এজুকেসন্নি। ঐখোয়না লায়রবদগী লায়রবা মীওই অদু ফাওবা লাপ্না অথাপ্পা চিংশিংদা জঙ্গলশিংদা লোং দিস্তেন্স এজুকেসনগী থোংদা ক্বালিতী এজুকেসন পীবা ঙমই, দিজিতেল কনেক্তিবিতীনা মদুগীদমক য়াম্না চাউবা থৌদাং লৌবা ঙমই। অমদি ঐহাক্না উবা ফংলি মদুদি নহা কয়া অমা ভর্চুয়েল লেবকী মতেংনা ঙসি অঙাংশিংবু তাকপীবগী থবক তৌরি। থাগৎচরি…..

এঙ্কর – ওনরেবল, কুরুক্ষেত্র য়ুনিবর্সিতী, হরিয়ানাদগী গৌরবনা অদোমগা ৱারী শান্ননবা লাংতক্নরি গৌরব….

ৱাহং – ইকায় খুম্নজরিবা প্রধান মন্ত্রীবু, ঐহাক্কী ইমিং গৌরব কৌজৈ অদুগা ঐহাক কুরুক্ষেত্র য়ুনিবর্সিতী হরিয়ানাদগীনি। সর, ঐখোয়গী লৈবাক অসিদা লৈত–লায়রবা উবদা চৈনা ফাওই, ঐখোয়গী লৈবাক অসিদগী লৈত–লায়রবা মুথৎনবা অদোম্না হোৎনবীরিবা অদু ঐখোয়না উরে। তুংদা, লৈত–লায়রবা লৈতবা ভারত অমা ওইরক্কনি হায়না অদোম্না খনবীবরা?

এঙ্কর – ঐখোয়গী লৈবাক অসিদা লৈত–লায়রবা উবদা চৈনা ফাওই। লৈত–লায়রবা মুথৎনবা অদোম্না হোৎনরিবা অদু ঐখোয়না উরে। তুংদা ঐখোয়গী লৈবাক অসি লৈত–লায়রবা লৈতবা অমা ওইরক্কনি হায়না অদোম্না থাজবা থম্বীবরা? ওনরেবল, চানবীদুনা হায়বীয়ু।

প্রধান মন্ত্রী – ঐখোয় লাইরবদগী নান্থোক্কদবনি হায়না লৈবাক অসিনা ৱারেপ লৌবা মতমদা, মালেম অসিদা লৈরিবা শক্তি অমত্তনা ঐখোয়বু লাইরহন্দুনা থম্বা ঙমলোই। লৈবাক অসিগী মীওই কোতি চামগা কুনমঙাদা তৌবা ঙম্বশিং লৈরি, করিগুম্বা মদু ঐখোয়গী নেচরেল রিসোর্সশিং নত্ত্রগা হ্যুমেন রিসোর্সশিং মসি ঐখোয়না অচুম্বা মওংদা শিজিন্নদুনা মাংলোমদা চংশিল্লগদি লায়রবদগী নান্থোকপদা অরুবা নত্তে। ঐহাক্না চহী মরি মখায়গী এক্সপিরিয়েন্স অদুনা হায়রিবনি। হন্দক মরক অসি মালেম অসিদা ৱাফম অনিখক মাংদা চোংথোরক্লি। অমনা মালেম অসিদা খোংজেল য়াংনা মাংলোমদা চংশিল্লিবা ইকোনোমীদা ভারত অহানবা মফমদা লৈরি। মসিদা ভারত মচা খুদিংমক্না চাউথোকচগনি। অনিশুবদা য়ু.এন. য়াওনা ইন্তর্নেস্নেল এজেন্সীনা হায়রিবদি মালেম অসিদা খোংজেল য়াংনা লায়রবদগী নান্থোরকপদা ভারত অহানবা মশিংদা লৈরি। খোংজেল য়াম্না য়াংনা অনৌবা মিদল ক্লাসকী থৌনা হেঙ্গৎলক্লি। অমদি মসিদসু মখোয়না মসিমসু হায়রি মদুদি ভারতকী সেদুল কাস্তকী মীওইশিং অমসুং ভারতকী মুসলমান অনি অসি মসিনা খ্বাইদগী য়াম্না কানবা পীরি, মখোয়না খোংজেল য়াংনা লায়রবদগী থোরক্লি। কনাগুম্বা অমনা খনখিবা লৈব্রা, মহাত্মা গান্ধীনা হায়বীরম্মি মদুদি নীংতম্বা অমসুং লু–নানবা অনি অসিদগী ঐহাক্না অমা খনবা তারগদি অহানবদা ঐহাক লু–নানবা খনবা পামগনি। গান্ধীজীনা য়াম্না হোৎনখি। নীংতম্বগী খোংজংসু চংশিল্লম্মি, লু–নানবগী ৱাফমসু চত্থরম্মি। নীং তম্লবা মতুং ঐখোয়না থবক অদু লায়না মাংলোমদা পুখৎপা য়ারম্মি। অদুবু কনাগুম্বা অমনা পাংথোক্লগা পাংথোক্লে পাংথোক্ত্রগা পাংথোক্ত্রে। ঐহাক্না লাল কিলাদগী নৌহৌনা নীংশিংখি, লৈবাক অসিদা তকশিনখি অমদি লৈবাক অসিনা মশাগী হোৎনজমন্না লু–নানবগী হিরমদা ঙসি খোংজেল য়াংনা মাংলোমদা চংশিল্লি। জম্মু কাশ্মির, মফম অসিদা ফম্লিবা ওফিসার অসি হান্না অনন্তনাগতা লৈরম্মি, মহাক্না লু–নানবগী মনা অদু ঐগী ইখুৎমক্তগী লৌখিবগুম তৌই। য়াম্না চাউবা থবক তৌবিখি অমদি লৈবাক অসিগী মীয়াম্না য়াম্না চাউথোকচখি। ২০১৪দা ঐখোয়না সরকার পায়রকপা মতমদা লৈবাক অসিদা রুরেল সেনিতেসন চাদা ৩৮ ওইরম্মি, ঙসিদি মদু চাদা ৯৮ ওইরে। মসি পুম্নমক সরকারনা মরম ওইদুনা ওইথোক্লিবনি হায়না ঐহাক্না কৈদৌনুংদা হায়জখিদে। ঙসি হিন্দুস্তানদা ২০১৪দা মীওই চাদা ৪০গী বেঙ্ক একাউন্ত লৈরম্মি, ঙসি চাউরাক্না চাদা ১০০ বেঙ্ক একাউন্ত লৈরে। ঐখোয়গী লৈবাক্তা অপুনবা ইমুং কোতি ২৫–২৬ লৈরি। চাউরাক্না ইমুং কোতি ৪দা মৈ ফংলমদে। ইমুং খুদিংদা মৈ ফংগদবনি হায়না ঐখোয়না থবক পায়খৎলে অমদি ঐহাক্না নুংঙাইবা ফওই মদুদি ঙসি জম্মু–কাশ্মীরনা থবক অসি মপুং ফানা পাংথোক্লে। হৌজিক জম্মু–কাশ্মীরনা মংলান অমা মংলি মদুদি য়ুম খুদিংদা তোতি ঈশিং ফংহনবনি। মসি য়াম্না চাউবা মংলান্নি। মফম অসিগী ব্যুরোক্রেসীনা মসিবুসু শোয়দনা ফংবা ঙমগনি।

এঙ্কর –  থাগৎচরি ওনরেবল, ঙসি লৈবাক অসি হোংলকপা উবদা ঙসিগী নহাশিংনা য়াম্না লাংতক্নরি। ওনরেবল উৎকল য়ুনিবর্সিতী ওরিশাদগী অঙ্কিতানা অদোমগী মফমদা করিগুম্বা খরা হায়নীংলি।

ৱাহং– ইকায় খুম্নজরিবা প্রধান মন্ত্রী ঐহাক ওরিশাগী উৎকল য়ুনিবর্সিতীদগী অঙ্কিতানি। ঐখোয়গী মফম অসিদা য়ামখ্রবা হেরিতেজ সাইৎশিং অমসুং ফজখ্রবা সমুদ্র মপানশিং লৈরি, মফম অসিগী তুরিজম চাউখৎহন্নবা করিগুম্বা খরা তৌনীংবগী অপাম্বা ইফমদা কয়ারক ফাওখি, অদুবু করিগুম্বা অমত্তা তৌফম খঙখিদে। অদোমগী রাইদা ঐখোয়না মতৌ করম্না এজুকেসনবু তুরিজমগা লোয়ননা শম্নহনদুনা ওরিশাগীদমক করিগুম্বা খরা তৌবা ঙমগনি?

প্রধান মন্ত্রী – অহানবদা অদোম্বু থাগৎপা ফোংদোকচরি মদুদি এজুকেসনগী মমি অমা ঐহাক্না অদোমদা উবা ফংলি মদুদি অদোম্না ওরিশাগী শক্তি অদু খঙলি অমদি মদু করম্না শিজিন্নগনি হায়বা অদুদা ৱাখল খল্লি, ঐহাক্কী ইমাংদা ফেন থারিবা অদু ঐহাক্না উবা ফংলি। শ্রীনগরদা লৈবা মীয়াম্না অঙকপা ফাওরমগনি। ৱাফম অসি অচুম্বনি মদুদি ঐখোয়গী লৈবাক্তা তুরিজমগী চাউরবা পোতেন্সিয়েল লৈরি, অদুবু ঐখোয়না তুরিজমগা মরী লৈননা নীংবা কাইবা খরা লৈরি। তুরিজমগী অহানবা তৌফদবদি ঐখোয়না ঐখোয়গী পোৎলমশিংদা চাউথোকপা তমগদবনি। ঐখোয়গী হৈনবিদি ঐখোয়গী লৈরিবা পুম্নমক অরেম্বা ওইনা খল্লি করিসু লৈতনা খল্লি। করিগুম্বা ঐখোয়না ঐখোয়বু উজবা ঙমদ্রবা, মদুগীদমক চাউথোকচবা ফাওদ্রবদি মালেম অসিনা করিগীদমক লাক্কদৌরিবনো… তুরিজমদা খুমাং চাউশিল্লিবশিং ময়াম্না উবিরম্লগনি। অদুগা ঐখোয়না… হোয় শেমলমগনি… কানদবনি অরেম্বদা পৈশা মাংহল্লিবনি… তুরিজম্বু য়েংবীয়ু মালেমগী খ্বাইদগী খোংজেল য়াংনা মাংলোমদা চংশিল্লিবা ইকোনোমীগী সেক্তর অদুদি তুরিজম্নি। তুরিজমগী বিজিনেসতা দোল্লর বিলিয়ন কয়া হেঙ্গৎলক্লি অমদি হেঙ্গৎলকখিগনি। ঐহাক্না নীংশিংলি চহী কয়াগী মমাংদা অমেরিকা সরকারগী বার্তন ফংদুনা অমুকখক য়ু.এস.তা চৎখি। মদুদা মখোয়না ঐহাক্কী অপাম্বা হংলকখি। ঐহাক্না ইরগা থাখিবা অদু, ঐহাক্কুম্বা মীওই অসি মমাংদা থেংনরমখিরোই। ঐহাক্না মখোয়দা হায়খি মদুদি ঐহাক্না খুঙ্গংদা চৎতুনা নখোয়গী লমদম অসিগী লৌউ শিংউবগী মওং মতৌ অদু য়েংজগে। অনিশুবদা ঐহাক্না হায়খি মদুদি য়াম্না চাউখৎত্রিবা খুঙ্গংগী করিগুম্বা স্কুল লৈরগদি মদু য়েংজগে। অহুমশুবদা ঐহাক্না হায়খি মদুদি খুঙ্গংদা লৈরিবা হেল্থ সেক্তর অদু য়েংজগে। অমদি মরিশুবদা ঐহাক্না হায়খি মদুদি অমেরিকাগী খ্বাইদগী লিরবা পোৎশক মদুগীদমক্তা অমেরিকানা চাউথোকচরিবা অদু য়েংজগে। ঐখোয়গী লমদম অসিদদি করিগুম্বা গলী অমদা চৎলুবা মতমদা মসিদি চহী লিশিং অনি, চহী লিশিং অহুম শুরে হায়রক্কনি। থোইদোক হেন্দোকপা ত্রেদিসন অমা ঐখোয়গী লৈজরি। অদুবু ঐখোয়না তৌফম থোকপা অদু তৌদনা লৈরি। তুরিজম্না শেন্থোক য়াম্না লৈহল্লি হৌজিক অদোম্না য়েংবীয়ু ওরিশা কয়া য়াম্না ইনাক খুনবগে হায়বদু। মফম অদুগী সমুদ্র মপানশিং য়েংবীয়ু, আর্কিতেকচর য়েংবীয়ু, কোর্নকপু য়েংবীয়ু, তেক্নোলোজীগী মীৎয়েংদসু মদু অনৌবা অমনি। ময়াম্না খঙলে চহী ২০০০ শুরবা মশানা অঙকপা অমা ওইজরি। ঐখোয়না তুরিজম্বু পুক্নীং থৌগৎকদবনি। ৱাফম অসি অচুম্বনি মদুদি হৌখিবা মতম খরা অসিদগী ঐখোয়গী লৈবাক্তা তুরিজম য়াম্না চাউখৎলে। মমাংদদি চাউরাক্না তুরিস্ত লিশিং ৭০ লাকপনি, চহী অসিদা লমকোইবা কোতি অমা লাকখি, মমাংদদি মীরমদগী লাক্লিবা লমকোইবশিংদগী চাউরাক্না মিলিয়ন দোল্লর ১৮গী ফোরেন করেন্সী লাকপনি। মদু হৌজিক মিলিয়ন ২৭ য়ৌরে।

এঙ্কর– থাগৎচরি ইকায় খুম্নজরিবা প্রধান মন্ত্রীজী, ইকায় খুম্নজরিবা প্রধান মন্ত্রীজী অদোম গুজরাত্তগীনি অমদি হৌজিক ঐখোয় গুজরাত্তা চৎলসি। গুজরাতকী এম.এন. কোল্লেজদগী বিজয় কুমারনা অদোমগী মফমদা করিগুম্বা খরা হায়নীংলি।

ৱাহং– ইকায় খুম্নজরিবা প্রধান মন্ত্রী খুরুমজরি, হায়জরিবা ঐহাক এম.এন. কোল্লেজ, বিস নগর গুজরাত্তগী বিজয় কুমারনি। সর, বজেৎ পুথোকপা মতমদগী লৌমীশিংগী ওইবা স্কিমশিং হৌদোক্লিবা অসিদা ঙাংনবা কয়া তাজরে, তশেংনা লৌমীশিংগীদমক অসুক য়াম্না চাউবা স্কিম হৌদোক্কনি হায়বা কনানসু খল্লমলোই অমদি ঐহাক্না মসি অমসু তাজরে মদুদি অদোম্না নোংচুপ বেঙ্গলদা মসি ফোংদোকখি মদুদি মথংগী চহী তরাদা ঐহাক্কী সরকারনা লৌমীশিংগীদমক লুপা কোতি লাখ ৭ লিশিং ৫০ চাদিং তৌগনি। সর, ঐহাক্কী ৱাহংদি সরকারনা অসুক য়াম্বা শেনফম অসি কদায়দগী পুরক্কদৌরিবনো… থাগৎচরি।

প্রধান মন্ত্রী– অদোম্না ওপিজিসনগী মায়কৈগী পাও–চে পাদুনা লৈরে, ফরে অদোম ঐহাক্কী খুঙ্গংগা য়ুমলোন্নবদগীনি, ঐহাক্কী খুঙ্গংদি বদনগরনি, অদোম বিসনগরদগীনি, ঐখোয় অনিগী খুঙ্গং থংননা লৈরি মদুদগীনি অদোম্না হংবীরক্লিবা অসি। বিসনগরদগী ঐহাক্কী খুঙ্গংবু নৌহৌনা নীংশিংলকপদা ঐহাক নুংঙাইবা ফাওই। ৱাফম অসি অচুম্বনি মদুদি অদোম্না লৈরিবা লমদম অদুদা লৌমীশিংদা য়াম্না খুদোংচাদবা থোক্লি। চাউনা ঈশিংগী অৱাবা মায়োক্নরি, অমরোমদা অকংবা মফম্নি অমদি অদোম্না অদুগুম্লবা মফম অদুদগী ঙাংবীরক্লি মরমদি ঐহাকসু মফম অদুদা পোকপনি ঐহাক খঙই। য়াম্না খুদোং চাদবা মফম্নি। য়েংবীয়ু ঐখোয়গী লৈবাক অসিদা রিসোর্সশিংগী অৱাৎপা লৈতে। লাইবক থিরিবদি ভারতকী প্রধান মন্ত্রী অমনা হায়বীখি লুপা অমা চৎখিবা মতমদা পৈশা ১৫ য়ৌই। হৌজিক কানরিবা অসি লুপা অমা চৎখিবদা পৈশা ১০০ য়ৌরে। খ্বাইদগী চাউবা মরমদি মসিনি। অনিশুবদা শেনফম খুদিংমক অদোম্না চুম্না শিজিন্নরবা, অদু ওইরবদি তেক্স থিরিবশিংনসু পুকচেল শেংনা তেক্স থিনীংবা ফাওহল্লি। মরমদি মহাক্কী শেনফম অদু চুম্না শিজিন্নরি হায়বা মহাক্না উরে। ঐহাক্না লৈবাক মীয়ামদা হায়জখি মদুদি অদোম্না গ্যাসকী সবসিদী দরকার ওইদ্রবদি থাদোকপিরো, আইন অমত্তা শেমখিদে, শুপ্নতংগী হায়জখিবতনি অমদি ঐহাক্কী লৈবাক অসিগী ইমুং কোতি অমগা লাখ ১৫না গ্যাস সবসিদী থাদোকখি মদুগী মহয়না লাইরবা কোতি অমগা লাখ ১৫গী মফমদা গ্যাস য়ৌখ্রে। লৈবাক অসিদা সেনিয়র সিতিজন লাখ ৪২না রেলৱে তিকেৎতা মখোয়গী সবসিদী সরেন্দর তৌরে। রেলৱেদা শেনফম শুনা পীরে। মতৌ অসুম্না পৈশা লাকই। করিগুম্বদা অমুক্তং পুচেল শেংবগী ফিভম লাকপদা মীয়াম্না পৈশা পীনবগীদমক থৌরাং তৌরি, পৈশানা মরম ওইদুনা কৈদৌনুংদা অয়েৎ অপন লাক্তে। ঙসি লৈবাক অসিনা খোংজেল য়াংনা ৫ ত্রিলিয়ন দোলরগী ইকোনোমীগী মায়কৈদা চংশিল্লি। চহী তরাদা লৌমীশিংগী ফুরিৎখাওদা লুপা কোতি লাখ ৭ মখায় চংগনি, মখোয় ফিভম অমা হেক্তদা মায়োক্নবা ঙম্বা ওইরগনি অমদি ঐহাক্না থাজবা থম্লি মদুদি স্কিম অসিনা লৈবাক অসিগী লৌমীনা আত্মাবিশ্বাসকা লোয়ননা মাংলোমদা চংশিনগনি। থাগৎচরি….

এঙ্কর– প্রধান মন্ত্রীবু হন্না হন্না থাগৎচরি, হৌজিক হৌজিকমক মহৈরোই কয়া অমা প্রোগ্রাম অসিগা শম্নরি অমদি অদোম্বু তাবা অমদি স্ক্রিনদা উবা ফংলি। মহৈরোই পুম্নমকপু পুক্নীং থৌগৎপীবগীদমক, লৈবাক অসিদা অনৌবা মঙাল পীবীবগীদমক প্রধান মন্ত্রীবু হন্না হন্না থাগৎচরি, ইশানা ইশামকপু লৈবাক অসিগী মকোকথোংবা সেবারী ওইনা খনজরিবা ইকায় খুম্নজরিবা প্রধান মন্ত্রী লৈবাক্কী সেবাগীদমক থৱায় হকচাং কত্থোক্লি।

প্রধান মন্ত্রীগী ৱারোল

ঙসি ঐহাক্না ৱারী শান্ননবা তাঞ্জা ফংজখিবা নহারোলশিং, ময়াম পুম্নমক্কী আত্মাবিশ্বাস অমদি তুংগীদমক ঐঙোন্দা ফাওরিবা অদোমগী পোজিতিবিতী অদু ঐহাক্কীদমকসু পুক্নীং থৌগৎনীংঙাইনি, ঐহাক্কী ইনর্জী হেঙ্গৎহল্লগনি। ঐহাক্না অহানবমক্তদা থৌরম অসিদা লেংবীরক্লিবা লৈবাক পুম্বগী নহারোলশিংবু থাগৎপা ফোংদোকচরি। লৈবাক্কী মফম কয়াদগী শরুক য়ারিবা মরূপশিংগী মফমদা ঐহাক্না অমুক হন্না হায়জরি মদুদি মফম অসিদা শ্রীনগরদা তেম্পরেচর য়াম্না নেম্মি। নুমিদাং ওইরকপগা মাইনস ওইখিবা য়ারি। মদু ওইরবা ফাওবা মফম অসিদা তিনবীরিবা ঐহাক্কী নহা ওইরিবা মরূপশিং মশিং য়াম্লবা কাশ্মীরগী ইচল–ইচে অমসুং ইচিল–ইনাওশিং শরুক য়াবীরি। মসিনা কাশ্মিরগী স্পিরিৎ অদু উৎলি। কাশ্মিরিশিংগী স্পিরিৎ অদু উৎলি।

ফম্বাকথক্তা লেংশিনবীরিবা জম্মু–কাশ্মীরগী রাজ্যপাল শ্রীমান সতপাল মলিক জী, মন্ত্রীমন্দলদা ঐহাক্কী খোংলোই ওইবীরিবা দা. জিতেন্দ্র সিংহ, মফম অসিদা তিনবীরিবা ঐহাক্কী ইচল–ইচে অমসুং ইচিল–ইনাও পুম্নমক।

মরূপশিং, ঙসি ঐহাক্না শ্রীনগরদা লাকচবা অসিদা ঐহাক্না শহিদ অহমদ বানী য়াওনা শান্তিগীদমক লৈবাক অসিগী সেক্যুরিতীগীদমক থৱায় কত্থোকখিবা থৌনা ফবা কয়াগী মফমদা ইকোক নোন্দুনা ইকায় খুম্নবা উৎচরি। শহীদ নজীর অহমদ বানীবু মহাক্কী অসিগুম্লবা থোইদোক হেন্দোকপা মথৌনা অমসুং মরিংজেলগীদমক লৈবাক অসিনা অশোক চক্র পীদুনা ইকায় খুম্নখি। ঐহাক্না জম্মু–কাশ্মীরগী মীওই লাখ কয়াবু চহী কয়াগী মতুংদা পঞ্চায়ৎ অমসুং অর্বান বোদীশিংগী মীখল পাংথোকখিবা অমসুং মীহুৎ খনখীবগীদমক নুংঙাইবা ফোংদোকচরি।

লোকতন্ত্রগী মায়কৈদা অদোমগী খোংথাং অসিনা তুকৎচবনা থল্লবা মীয়ামগীদমক্তা য়াম্না চাউবা পাওজেল অমনি। মীওই খরনা নেগতিবিতী শন্দোক্নবা হোৎনরিবগী মরক্তা, কিহল্লকপা কয়াবু থৌশাদনা অদোম্না মশিং য়াম্না পোলিং বুথ ফাওবা য়ৌরক্লিবা অদুনা অদোমগী অঙাংশিংগী তুংগী পুম্সি অমসুং জম্মু অমসুং কাশ্মীরগী দিবেলপমেন্তকী স্পিরিৎ অদু হেন্না চেৎশিলহল্লে।

মরূপশিং, ঙসি ঐহাক্না চাউরাক্না লুপা কোতি লিশিং ৭কী প্রজেক্তশিং উরেপ উয়ুং তম্বা অমসুং শঙ্গাবগী তাঞ্জা ফংজখি। মশিং য়াম্লবা প্রোজেক্তশিং অসিনা শ্রীনগর অমসুং মনাক নকপা মফমশিংগী মীয়ামগী পুন্সিবু লাইথোকহনবদা মতেং ওইরগনি। এজুকেসন, হকশেল অমসুং ইনফ্রাস্ত্রকচরগা মরী লৈনবা প্রোজেক্তশিং অসিগীদমক ময়াম পুম্নমকপু হন্না হন্না নুংঙাইবা ফোংদোকচরি।

অদোম ময়ামগী মরক্তগী কয়া অমনা খঙবীরমগনি মদুদি চহী মরি মরিমখায়গী মমাংদা অচৌবা প্রোজেক্তশিং হৌদোকপা নত্ত্রগা কেন্দ্র সরকারনা স্কিম অমা হৌদোকপা মতমদা মদু দিল্লীগী বিজ্ঞান ভবনদা পাংথোক্লম্মি। অদুবু ঐখোয়না সরকারগী লিরবা সংস্কৃতি অদুমক হোংদোক্লে।

ঐখোয়গী সরকারনা ঝারখন্দা আয়ুশ্মান ভারত য়োজনা হৌদোকখি, উত্তর প্রদেশতগী উজ্জ্বলা য়োজনা হৌদোকখি, প্রধান মন্ত্রী সুরক্ষা বিমা য়োজনা, প্রধান মন্ত্রী জিবন জ্যোতি য়োজনা নোংচুপ বেঙ্গলদা চত্তুনা হৌদোকখি, হেন্দলুমগা মরী লৈনবা নেস্নেল কেম্পেন তামিল নাদুদগী হৌদোকখি, বেতী বচাউ–বেতী পরাও হরিয়ানাদা হৌদোকখি, পোশন অভিয়ান রাজস্থান্দা চত্তুনা হৌদোকখি।

ঙসি লৈবাক পুম্বগা মরী লৈনবা মরুওইবা প্রোগ্রাম অমগীদমক ঐখোয় পুম্নমক ঙসি শ্রীনগরদা লৈরি অমদি লৈবাক পুম্বগী প্রোজেক্কী লোঞ্চিং ঙসি শ্রীনগরগী লৈপাক লৈহাওদগী তৌজরি। ঙসি মফম অসিদা রাস্ত্রীয় উচ্চ স্তর শিক্ষা অভিয়ান হায়বদি রুসাগী অনিশুবা ফেজগা মরী লৈনবা প্রোজেক্তশিং হৌদোক্লি। মফম অসিদগী লৈবাক পুম্বদা অনৌবা মোদেল দিগ্রী কোলেজ ৭০, প্রোফেস্নেল কোলেজ ১১, ৱুমেন্স য়ুনিবর্সিতী অমা, ইন্ত্রপ্রিনর, ইনোবেসন অমসুং কেরিয়র হব ৬০ হেনবগী উরেপ উয়ুং তম্বা অমসুং শঙ্গাবগী থৌরম পাংথোকখ্রে। মসিগী মনুংদা সংস্থান কয়া অমদি জম্মু কাশ্মীরগীসুনি।

মরূপশিং, মসিনা উৎলরি মদুদি ন্যু ইন্দিয়া করম্বা মায়কৈদা চৎলিবগে। অনৌবা ভারত শেমগৎ শাগৎপগীদমক ঐখোয়গী লম্বী করিনো। রিসর্স, ইনোবেসন, ইনক্যুবেসন নত্ত্রগা স্তার্ত–অপকীদমক অনৌবা তেম্প্রামেন্ত লৈবাক অসিদা দিবেলপ তৌরি।

মরূপশিং, মসি স্তার্ত অপ ইন্দিয়া অভিয়ানমক্কী এফেক্তনি মদুদি ঙসি ভারত, চাইনা অমসুং অমেরিকাগী মতুংদা অহুমশুবা খ্বাইদগী চাউবা স্তার্ত অপ ওইরে। হৌখিবা চহী অহুম মরি অসিদা স্তার্ত–অপ লিশিং ১৫দগী হেন্না শক খঙখ্রে।   

মরূপশিং, স্তার্ত–অপকা লোয়ন–লোয়ননা লৈবাক অসিগী খুঙ্গংগী লমদমশিংদা তেক্নোলোজী হেঙ্গৎহনবসু ঐখোয়গী প্রায়োরিতীদা য়াওরি। ঙসি লৈবাক অসিদা কমন সর্বিস সেন্তর লাখ অহুম হেনবনা খুঙ্গংশিংদা দিজিতেল সর্বসশিং ফংহল্লি।

ইচল–ইচে অমসুং ইচিল ইনাওশিং, ঙসি উরেপ উয়ুং তমখিবা অমদি শঙ্গাখিবা প্রোজেক্ত পুম্নমক লৈবাক অসিগী দিবেলপমেন্তকী লমজেলদা মাং থানবা হোৎনরিবা অদুগুম্লবা জিলাশিংদা হৌদোক্লি। ঐহাক্না থাজবা থম্লি মদুদি জিলা পুম্নমক অসিগী নহাশিংনা মখোয়গী ময়ুমগী হেক মনাক্তা অফবা সংস্থান ফংলগদি মখোয় মশাগী তেলেন্ত অদু হেন্না মশক থোকহনবা, মখোয় মশাগী স্কিল উত্থোকপা ঙমহল্লগনি।

মরূপশিং, ঐখোয়গী সরকারনা লেপ্নখিবা মতমগী মনুংদা পান্দম অদু ফংনবা পুকচেল শেংনা হোৎনরি। ময়াম পুম্নমক্না নীংশিংবীরমগনি মদুদি নীংতম্বা ফংলবা মতুং চহী অসুক কুইবসি অমম্বা মরক্তা হিংলিবা অদুগুম্লবা খুঙ্গং লিশিং ১৮বু নুমীৎ লিশিং অমগী মনুংদা মৈ ফংহনগনি হায়না ঐহাক্না লাল কিলাদগী লাওথোকখি। পান্দম অদু লেপখিবা মতমগী মনুংদা মপুং ফানা পাংথোকখি। মদুগী মতুংদা সৌভাগ্য য়োজনাগী মখাদা লৈবাক অসিগী ইমুং কোতি কয়াদা লেম্না মৈগী কনেক্সন পীনবা কেম্পেন চত্থরি। চাউরাক্না কনেক্সন কোতি অনি মখায় পীখ্রে। অমদি য়াম্না অথুবা মতমদা লেমহৌরিবা য়ুমশিংদসু মঙাল ঙালহল্লগনি।

মরূপশিং, জম্মু–কাশ্মীরদা য়ুম খুদিংদা মৈ ফংহনবগা লোয়ন লোয়ননা লেম পানা মৈ ফংহন্নবসু হোৎনরি। লেহ, লদাখ, কারগিল ওইগেরা জম্মু ওইগেরা নত্ত্রগা শ্রীনগর ওইগেরা, মফম অহুম অসিদা ঙসি মৈ পুথোকপা অমসুং ত্রান্সমিসনগা মরী লৈনবা মশিং য়াম্লবা অচৌবা প্রোজেক্ত কয়া শঙ্গাবা অমদি উরেপ উয়ুং তম্বা নোংমা খক্তদা পাংথোক্নবা খুদোংচাবা অদু ঐহাক্না ফংজরে।                   

মরূপশিং, ঐখোয়না মোদর্ন হোস্পিতাল শাগৎপগা লোয়ননা মালেম অসিগী খ্বাইদগী চাউবা হেল্থ কেয়র স্কিম আয়ুশ্মান ভারত পি.এম.জে.সু পায়খৎলি। লৈবাক অসিগী পুৱারীদা অসুক য়াম্না চাউবা হেল্থ কেয়র স্কিম অসি লায়রবশিংগীদমক ‍মমাংদা অমুক্তা ওইখিদ্রি। স্কিম অসিগী মখাদা লাইরবশিংবু চহী খুদিংগী লুপা লাখ মঙা ফাওবা লেম্না লায়েংবা ঙমহল্লে। লৈবাক অসিগী লায়রবা ইচিল–ইনাও অমসুং ইচে–ইচল চাউরাক্না কোতি ৫০ মসিনা কোনশিল্লে।

মরূপশিং, হিংশাগী থৌদোকশিংগী মতমদা কাশ্মীরগী পন্দিৎ ইচিল–ইনাও অমসুং ইচে–ইচলশিংবু মফম অসিদগী মশাগী ময়ুম, মশাগী লৌ–ইংখোল, মখোয়গী মপা মপুগী মেমোরীশিং থাদোক্তুনা চৎপা তাখি। মখোয়বু মপুংফানা ইকায় খুম্নবা উৎতুনা মফম অসিদা খুন্দাহন্নবা প্রধান মন্ত্রী বিকাস পেকেজগী খুত্থাংদা ঐখোয়না মসিগীদমক হোৎনরি। স্তেত এদমিনিস্ত্রেসন্না বৈসু অমসুং সেফপুরাদা ত্রান্সিৎ ক্বাতরশিং শেমগৎপা হৌখ্রে।    

ঐখোয়না জম্মু–কাশ্মীরদা তেরোরিস্তশিংগী মখ্বাং থুদেক্কনি। জম্মু–কাশ্মীরগী দিবেলপমেন্ত অমসুং মফম অসিগী মীয়ামগী দিবেলপমেন্ত অসি ঐখোয়গী প্রায়োরিতীনি। অমদি মতম পুম্নমক্তা লৈগনি। ঐহাক্না অমুক হন্না ময়াম পুম্নমকপু এজুকেসনগা মরী লৈনবা স্কিমশিং হৌদোকপগীদমক, ইনফ্রাস্ত্রকচর প্রোজেক্তশিংগীদমক হন্না–হন্না য়াইফ পাওজেল পীজরি। হন্না–হন্না নুংঙাইবা ফোংদোকচরি।

ঐখোয়গী মফম অসিগী ইমুং, ঐখোয়গী মফম অসিগী অঙাং খুদিংমক, মখোয়গী লংলবা তুংলমচৎ, মদুমক ভারতকী লংলবা তুংলমচৎকা মরী লৈনরি। মরীশিং অসিবু চেকশিন্না থমদুনা ঐখোয়না ৱাফম অসিবু মাংলোমদা পুখৎনবা অঙম্বা থাক্তা হোৎনগনি, থাজবা অসিগা লোয়ননা ঐহাক্না ময়াম পুম্নমকপু থম্মোয় শেংনা হন্না হন্না য়াইফ পাওজেল পীজরি।

থাগৎচরি।