ভারতকী প্রধানমন্ত্রী

ঐহাক্কী নুংশিজরবা ইচিল-ইনাও অমসুং ইচল-ইচেশিং।
কোরৌগী মশেক মঙালনা য়ৈরকপা অসি ইনর্জী, থাজবা অমসুং এস্পিরেসনগী খুদম ওইরি। অরুনাচলগী মমিং অসিমক কোরৌগী মমিংনি। মফম অসি নুমীৎনা থোরক্লিবা লমদম্নি। মসিনা মরম ওইদুনা লমদম অসি লৈবাক পুম্বগী থাজবগী খুদমসু ওইরি। অরুনাচলনা ঐখোয়গী থজববু পুক্নীং থৌগৎলি, ঐখোয়গী ৱারেপ্পু হেন্না চেৎশিনবা ঙমহল্লি। হৌখিবা থা ৫৫দা কয়ারক হন্না অদোম ময়ামগী মরক্তা লাকচখ্রে। মদুগী মরম অমনা ময়াম পুম্নমক্কী থৌজালগী অপাম্বা অদুনি লোয়ননা লৈবাক অসিগীদমক লেপ্পা নাইদবা অনৌবা ইনর্জী অমসুং তগৎ তগৎ তেক্না থবক তৌনবা ইন্সপিরেসন ফংনবগীদমক অরুনাচল প্রদেশতা লাকচবা অসি ঐঙোন্দা য়াম্না নুংঙাইবা ফাওই। অমদি নাগরিক পুম্নমক থেংনবা মতমদা, জয় হিন্দ লাওদুনা পুক্নীং থৌগৎপীরি। মসিনা পুক্নীংদা নুংঙাইবা ফংই, অসুক য়াম্না ইনর্জী ফংই অমদি জয় হিন্দবু পুন্সীগী শরুক ওইহল্লিবা লমদম অসিবু ঙসি ঐহাক্না অমুক হন্না খুরুমজরি।

মরূপশিং, হৌখিবা থা ৫৫দগী কেন্দ্রগী এন.দি.এ. সরকার অমসুং মফম অসিদা ঐখোয়গী মরূপ খান্দুজীগী লুচীং মখাদা চত্থরিবা বি.জে.পি.গী সরকারনা অরুনাচলবু শক্তি লৈহন্নবা অদোম ময়াম পুম্নমক্কী পুন্সিবু লাইথোকহন্নবা পুকচেল শেংনা থৱাই য়াওনা হোৎনরি। ঙসিসু ঐহাক্না অরুনাচল প্রদেশপু মপাঙ্গল কনখৎহনগদবা লুপা কোতি লিশিং ৪ হেনবগী প্রোজেক্তশিং উরেপ উয়ুং তম্বা অমসুং শঙ্গাবগী খুদোংচাবা ফংজরে।

প্রোজেক্তশিং অসিদা নত্তনা অদোমগী লমদম অসিদা চাউরাক্না লুপা কোতি লিশিং ১৩গী থবকশিংদসু খোংজেল য়াংনা থবক চত্থরি। ঙসিগী প্রোজেক্তশিং অসিনা অরুনাচল প্রদেশকী কনেক্তিবিতীবু ফগৎহনবগা লোয়ননা পাৱর সেক্তরবুসু মপাঙ্গল কনখৎহল্লগনি। প্রোজেক্তশিং অসিনা মফম অসিদা, রাজ্য অমগী হেল্থ সর্বিসকী ফিভম ফগৎহল্লগনি, মায়কৈ অমরোমদা অরুনাচলগী সংস্কৃতিবুসু পুক্নীং থৌগৎলগনি। প্রোজেক্তশিং অসিগীদমক ময়াম পুম্নমকপু হন্না হন্না থাগৎচরি।

ইচল-ইচে অমসুং ইচিল-ইনাওশিং, ঙসি নীং তম্বা ফংলবা মতুং পার্তী অমা খক্তগী চহী ৫৫বু নাকল অমদা থম্বিরো অমদি অতোপ্পা নাকল অমদা কেন্দ্রদা ঐখোয়গী হৌখিবা থা ৫৫বু থম্দুনা চাংয়েং তৌবিয়ু। অরুনাচল অমসুং অৱাং নোংপোক অপুনবগীদমক করি থবক পায়খৎখি, মদুগী শক্তম অদু অদোমগী মাংদা ময়েক শেংলগনি।

অরুনাচলগী নাক্তা চাউরবা ঈশিংগী হৌরকফম লৈরি। মফম অসিদা অঙকপা ফংনা মৈ পুথোক্নবা পাঙ্গল লৈ, অদুবু দিবেলপমেন্ত অসি মদু য়ৌনা পায়খৎপা ঙমদ্রি। মসি লৈবাক অসিগী সেক্যুরিতীগা মরী লৈনবা মরুওইবা মফম অমা ওইদুনা লাক্লি। স্ত্রাতেজিক ওইবা মওংদা মরুওইবা লমদম অমা ওইরি। অদুম ওইনমক মফম অসিদা দরকার ওইবা খুদোংচাবশিং শেমগৎত্রি। মফম অসিগী নহাশিংগী খন্থদবা অমদি ঙমখৈ ঙাক্লিবা জৱানশিংগী খন্থদবা ফিভম অদু ওইরমখি।

মরূপশিং, মমাংগী সরকারশিংনা লমদম অসি মীরাইবীরম্বনা মফম অসিগী মীয়াম্না কয়া য়াম্না অৱাবা অমসুং নুংঙাইতবা ফাওরমগনি হায়বদু খন্থখিদে। চহী তরাগী খুজিং কয়াদগী অরুনাচল য়াওনা মফম অসিগী লমদম কয়াদা মোদর্ন ইনফ্রাস্ত্রকচর দরকার ওই হায়দুনা তক্নদুনা লাক্লি, অদুবু মমাংদা পাল্লম্বশিংনা মসিসু থৌশাখিদে। মরূপশিং, সরকার অসিনা ফিভম অসি হোংদোক্নবা লেপ্পা লৈতনা হোৎনরি। ঐহাক্না হঞ্জিন হঞ্জিন হায়দুনা লাক্লি মদুদি অৱাং ভারত অৱাং নোংপোক্না খোংজেল য়াংনা চাউখৎলক্লবা মতম অদুদা অনৌবা ভারতনা শক্তি পুম্নমক্কা লোয়ননা চাউখৎপা ঙমগনি।

ইচিল-ইনাও অমসুং ইচল-ইচেশিং, সবকা সাথ সবকা বিকাস মন্ত্র অসিদা চত্তুনা হৌখিবা থা ৫৫ অসিদা অরুনাচল অমসুং অৱাং নোংপোক্কী দিবেলপমেন্তকীদমক ফন্দা অৱাৎপা লৈহনখিদে অমসুং পাংথোক্নীংবদা অৱাৎপা লৈখিদে। হৌখিবা চহীশিংদা রাজ্যশিংদা লুপা কোতি লিশিং ৪৪গী ফন্দ পীথখি, মদু মমাংগী সরকারগা য়েংনবদা শরুক অনি ওইখি। মসিগী মথক্তা কেন্দ্র সরকারনা মফম অসিদা কোতি লিশিং কয়াগী অতোপ্পা প্রোজেক্ততসু থবক তৌরি। দিবেলপমেন্তকী পরিং অসিদা ঙসি অরুনাচলদা অমুক্তদা এয়রপোর্ত অনি শঙ্গাবা অমসুং উরেপ উয়ুং তম্বগী থৌরম পাংথোক্লি। ভারতকী রাজ্য অমতদা এয়রপোর্ত অমদা থবক লোইবা অমদি অতোপ্পা অমদা থবক হৌবা অসি মসিনা অহানবনি। অরুনাচল প্রদেশকীদমক্তি মসি হেন্না মরুওইবা তঞ্জানি মরমদি নীং তম্লবা মতুং চহী অসুক য়াম্বসি মওং তানা অচৌবা এরোপ্লেন তাবা য়াবা এয়রপোর্ত অমা ফাওবা লৈরমদে। গুৱাহাতী ফাওবা এয়রপোর্তকী কনেক্তিবিতী লৈরম্মি অমদি মফম অদুদগী মখাগী লম্বীদা লাকপা তারম্মি নত্ত্রগা অথু অকাইদা হেলিকোপতরগী মতেং লৌবা তারম্মি।

মরূপশিং, ঙসিদগী তেজু এয়রপোর্ত মীচম প্রজাগা মরী লৈনবা চত্থোক চৎশিন তৌবা য়ানবা থৌরাং তৌরে। তেজু এয়রপোর্ত অসি চাউরাক্না চহী ৫০গী মমাংদা শেমগৎখিবনি অমদি মদুগী মতুং মসি লমদম অসিগী মীয়াম্বু লৈবাক অসিগা শম্নহন্নবা শিজিন্নবসু য়াগনি হায়বা কনা অমত্তনা খনখিদে। ঐখোয়গী সরকারনা মসিগী অপীকপা এয়রপোর্ত অসি চাউরাক্না লুপা কোতি চামগা কুনমঙা চাদিং তৌদুনা পাকথোক চাউথোকহল্লে। মফম অসিগী মোদর্ন ফেসিলীতিশিং মোবিলাইজ তৌরে। হৌজিক্তি মসিগী মতুংদা অরুনাচল প্রদেশকী এয়র কনেক্তিবিতী গুৱাহাতী, জোরহাত অমদি ৱালোংগা শম্নহল্লগনি।

হৌজিক্তি এয়রপোর্ত অসি শারবনিনা ঐখোয়না পুং খরগী মনুংদা মফম অসিগী হৈ-লৈ হিন্দুস্তানগী অচৌবা কৈথেলশিংদা পুবা ঙম্লগনি, ঐহাক্কী লৌমীশিং শেল তানবা য়ারগনি।

মরূপশিং, থা খরগী মমাংদা অরুনাচলগীদমক কমর্সিয়েল ফ্লাইৎ হৌদোকখি। হৌজিক্তি এয়রপোর্ত অসি চাউথোকহনবনা অদোম্না কানবা অনি ফংলগনি। সরকারনা হোৎনরিবা অসিদি উরান য়োজনাগী মখাদা য়াম্না হোংবা এয়র ত্রাভেলগী হেন্না কানবা অদু অরুনাচল প্রদেশকী মীয়ামদা ফংবা ঙমহনবনি। মরূপশিং, চাউরাক্না লুপা কোতি লিশিং অমা চংগদবা হোল্লোঙ্গি গ্রীন ফিল্দ এয়রপোর্তকী উরেপ উয়ুংসু ঙসি তমখ্রে। থা খরগী মমাংদসু লৈবাক অসিগী ১০০শুবা অমসুং অৱাং নোংপোক্কী অহানবা গ্রীন ফিল্দ পাকয়োং এয়রপোর্ত শঙ্গাবগী খুদোংচাবা অদু ঐহাক্না ফংজখি। ঐহাক্না ময়ামদা থাজবা পীজরি মদুদী অৱাং নোংপোক্কী অসিগুম্লবা অনিশুবা গ্রীনফিল্দ এয়রপোর্তকী শঙ্গাবসু মতম চানা পাংথোক্নবা হোৎনগনি। ঐহাক্না উরেপ উয়ুং তমখিবা অদুগী শঙ্গাবসু ঐহাক্না পাংথোকই হায়বা ময়াম্না খঙবীরিবা অদুনি।

মরূপশিং, এয়রৱেগা লোয়ন লোয়ননা রোদৱে অমসুং রেলৱেনসু অরুনাচলবু ভারতকা কনেক্তিবিতী হেঙ্গৎহল্লি। চাউরাক্না লুপা কোতি তরেৎ চংনা শেমগৎলিবা তনেলসু অথুবা মতমদা থৌরাং তৌনবা হোৎনরগনি। তনেল অসি শেম্লবা মতুংদদি বালীপরাদগী তৱাং ফাওবা য়ৌবা লায়হল্লগনি। চহী চুপ্পা অমা নোংজু নুংশা খুদিংদা অদোম্না চত্থোক চৎশিন তৌবগী খুদোং চাদবা অদু কোকহল্লগনি। হন্দক্তা ব্রহ্মপুত্র, প্রদেশকী খ্বাইদগী চাউবা রেল রোদ ব্রীজ বোগিবিল থোংসু শঙ্গাখ্রে। মসিনসু অরুনাচল প্রদেশকী তোঙান তোঙানবা মফমশিংদসু য়াম্না কানহল্লে।

ইচল-ইচে অমসুং ইচিল-ইনাওশিং, অরুনাচল প্রদেশতা কনেক্তিবিতী মদুনা খুঙ্গংগী ওইগেরা, শহরগী ওইগেরা নত্ত্রগা লৈবাক অসিগী অতোপ্পা মফমশিংগী ওইগেরা, কেন্দ্র সরকারনা লুপা লিশিং কোতি কয়াগী প্রোজেক্তা ঙসি থবক পায়খৎলি। মসিদা চাউরাক্না লুপা কোতি লিশিং ৫০ চাদিং তৌদুনা অনৌবা নেস্নেল হাইৱে শেমগৎলি, হৌখিবা চহী অনিদা চাউরাক্না খুঙ্গং লিশিং অমবুসু খোং লম্বীনা শম্নহল্লে। চাউরাক্না লুপা কোতি লিশিং ৪ চংনা পায়খৎলিবা ত্রান্স অরুনাচল হাইৱেদসু খুমাং চাউশিন্না থবক পায়খৎলি।

মরূপশিং, লম্বী থোংনা শম্নহনবতা নত্তনা রেলৱেদসু অরুনাচল প্রদেশতা মমাংদা ওইখিদ্রিবা মওংদা থবক পায়খৎলি। অৱাং নোংপোক্কী রাজ্য খুদিংমক্কী রাজ্যগী কোনুংশিংবু রেলৱেনা শম্নহন্নবা খোংথাংগী মখাদা ইতানগরসু রেলৱেগা শম্নহল্লে। নাহরলাগুন অমসুং দিল্লীগী মরক্তা চেল্লিবা অরুনাচল এ.সি. এক্সপ্রেস হৌজিক হপ্তা অমদা অনিরক চেল্লি। মসিগী মথক্তা অরুনাচল পুম্বদা রেলৱে নেৎৱার্ক হেঙ্গৎহন্নবা মফম তরেৎতা সর্ভেগী থবক চত্থরি। মসিগী মনুংদা মফম অহুমদা সর্ভেগী থবক মপুং ফানা লোইশিল্লে। তৱাংবুসু রেল নেৎৱার্ক্কা শম্নহন্নবা অচৌবা প্রোজেক্তা খোংজেল য়াংনা থবক চত্থরি।
ইচল-ইচে অমসুং ইচিল-ইনাওশিং, হাইৱে, রেলৱে, এয়রৱেগা লোয়ন লোয়ননা ইলেক্ত্রিসিতীগী কনেক্তিবিতীসু মরু ওই। ঙসি ঐহাক্না অরুনাচল প্রদেশপু সৌভাগ্য য়োজনাগী মখাদা চাউরাক্না ইমুং খুদিংদা মৈ ফংবা রাজ্য ওইবদা হন্না হন্না নুংঙাইবা ফোংদোকচরি, মুখ্য মন্ত্রীবু নুংঙাইবা ফোংদোকচরি, মহাক্কী অপুনবা তীম্বু নুংঙাইবা ফোংদোকচরি। ঙসি অরুনাচলনা ফংলিবা অসি অথুবা মতমগী মনুংদা লৈবাক পুম্বনা ফংলগনি। সৌভাগ্য য়োজনাগী মখাদা হৌখিবা চহী অমা অমমখায় খক্তদা লৈবাক অসিদা চাউরাক্না য়ুম কোতি অনি মখায়গী ইমুং মনুংগী অমম্বা অদু কোকহল্লে। লেম্না মৈগী কনেক্সন ফংহল্লে।

মরূপশিং, ইমুং খুদিংদা মৈ ফংহন্নবা লোয়ননা মতিকচাবা মৈ য়ৌহন্নবা ঐখোয়গী সরকারনা পাৱর জেনরেসন্দসু পুক্নীং থৌগৎলি। ঙসি ১১০ মেগা ৱাৎ পারে হাইদ্রোইলেক্ত্রিক প্লান্ত অমা শঙ্গাখ্রে। মসিদগী অরুনাচলনা মৈ ফংলগনি লোয়ননা অৱাং নোংপোক্কী অতোপ্পা রাজ্যশিংদসু কানবা ফংহল্লগনি। মফম অসিদা ত্রান্সমিসন সিস্তেমগী ফিভম ফগৎহন্নবা চাউরাক্না লুপা কোতি লিশিং অহুমগী থবকসু ঙসিদগী হৌরে। মসিনা রাজ্য অসিগী অথাপ অথাপ্পা মফমশিংদা মৈ ফংহল্লগনি। অমদি মফম অসিগী ইলেক্ত্রিসিতী সিস্তেম গ্রীদকা শম্নহল্লগনি।

ঙরাং ঐহাক্না অৱাং নোংপোক্কী ফজবগী মতাংদা ত্বিতরদা থাগৎখি, অমদি ঐহাক্না মীয়ামদা হায়জখি মদুদি করিগুম্বা অদোম অদোম্না অৱাং নোংপোক্তা চৎলুবা লৈরগদি মফম অদুগী এক্সপরিয়েন্সকী ফোতো অমা শেয়র তৌবীয়ু। ঐহাক অঙকপনা থনখি সেকেন্দ খরগী মনুংদা মীওই লিশিং কয়ানা ত্বিতরদা মখোয়গী অৱাং নোংপোক্কী এক্সপরিয়েন্স অমসুং ফোতোশিং শেয়র তৌরকখি। মপান লৈবাক্কী মীওইশিংনসু ত্বিৎ তৌরকখি।

ইচল-ইচে অমসুং ইচিল-ইনাওশিং, কেন্দ্র সরকারনা লৈবাক্কী মফম খুদিংমক্কী সংস্কৃতি, লোন চাকচা-ইথক, য়ুমলৈ-কৈরৈ, ঙাক্তুনা থম্নবা, মখোয়বু হেন্না চাউখৎহন্নবা ৱাশক্লি। অসিগুম্লবা দাইবর্সিতী অসি ভারতকী মমল নাইদ্রবা লনগৈনি, মসি ঐখোয়গী চাউথোকচনীংঙাইনি। মরম অসিমক্ননি ঐখোয়গী সরকারনা অরুনাচলগী সংস্কৃতিবু পুক্নীং থৌগৎনবা লমদম অসিগী মশাগী ওইবা পুং ২৪গী তি.ভি. চেনেল অরুন প্রভা হৌদোকখ্রে। অদোমগী চেনেল অসিগীদমক মফম অসিদা অনৌবা মখলগী খুদোংচাবা পুম্নমক ফংহল্লে। চেনেল অসিগী খুত্থাংদা হৌজিক্তি রাজ্যগী মনুং হুনজিনবা মফমশিংগী ই-পাওশিংসু অদোম অদোমগী মফমদা য়াম্না থুনা য়ৌরক্লগনি। মতৌ অসুম্না জোতেদা শেমগৎকদৌরিবা ফিল্ম অমসুং তেলেবিজন ইন্সতিত্যুৎনা লমদম অসিগী নহাশিংবু অনৌবা খুদোংচাবা ফংহন্দুনা মফম অসিগী সংস্কৃতিবু হেন্না ফজবা শক্তম অমা ফংলগনি।

ইচল-ইচে অমসুং ইচিল-ইনাওশিং, ঐখোয়গী সরকারনা চাউখৎ থৌরাংগী ইচেল মঙা হায়বদি অঙাংশিংগী মহৈ মশিং, নহাশিংগী শেন্থোক লম্বী, অহল ওইরবশিংগী হিদাক লাংথক, লৌমীশিংগী ইথৈ লৌখোং অমসুং মীপুম খুদিংমক্কী হিয়রিং শোয়দনা ফংহন্নবা থবক তৌরি। আয়ুশ্মান ভারত য়োজনাগী মখাদা হেল্থ অমসুং ৱেলনেস সেন্তরশিং শেমগৎলি অমসুং অরুবা অনাবশিংগীদমক অচৌবা হোস্পিতালশিংদা লায়রবশিংবু লেম্না লায়েংবা ফংহল্লে।

মরূপশিং, ঙসি মফম অসিদা হেল্থ অমসুং ৱেলনেস সেন্তর ৫০ শঙ্গাখ্রে, মদুনা মনুং হুঞ্জিনবা মফমশিংদা অফবা হেল্থকেয়র ফংহনবগা লোয়ননা অরুবা অনাবগী লায়ওং হৌরকপা মতমদা খঙবা ঙমহল্লগনি। অখন্ননা মীরোনবী নুপীশিং অমসুং অথু অকায়গী ফিভমদা মসিগী হেল্থ অমসুং ৱেলনেস সেন্তরশিং অসিনা য়াম্না কানহল্লগনি।
মরূপশিং, অরুনাচল প্রদেশকী লায়রবা ইমুংশিংসু লৈবাক্কী অতোপ্পা মফমশিংগুম্না আয়ুশ্মান ভারত পি.এম.জে.এ.ৱাই. হায়বদি মোদীকেয়রগী কানবসু ফংবা ঙম্লি। স্কিম অসিগী মখাদা অরুবা অনাবগী ফিভমদা লাইরবা ইমুংশিংনা লুপা লাখ মঙা ফাওবগী লেম্না লায়েংবা ফংহল্লি। হৌজিক স্কিম অসি নুমীৎ চামগা য়াঙ্খৈ ফাওবা ফাদ্রি। চাউরাক্না মীওই লাখ ১১না লৈবাক পুম্বদা লায়েংবগী কানবা ফংবা ঙমখ্রে। পেমা খান্দুগী সরকারনা হোৎনরিবশিং অসি হেন্না পাকথোক চাউথোকহন্নবা হোৎনরি হায়বা ইফমদা খঙহনবীরক্লি।

ইচল-ইচে অমসুং ইচিল-ইনাওশিং, অরুনাচল প্রদেশ লৈবাক অসিগী চাউথোকচনীংঙাইনি, মসি ভারতকী দিবেলপমেন্তকী, ভারতকী সেক্যুরিতীগী গেৎ ৱেসু ওইরিবনি। অসিগুম্লবা গেৎ ৱে অসিবু শক্তি পীনবা থবক বি.জে.পি.গী সরকারনা মখা তানা তৌখিগনি। অদোম ময়াম পুম্নমক্কী থৌজালদগী অদোমগী মকোকথোংবা পাওখোল্লোয় অসিনা অরুনাচল য়াওনা লমদম পুম্বা অসি চাউখৎপা পুরক্নবা হোৎনরি। অমুক হন্না ঙসি হৌদোক্লিবা প্রোজেক্তশিংগীদমক ঐহাক্না অরুনাচল পুম্বদা লৈরিবা ঐহাক্কী নুংশিজরবা ইচল-ইচে অমসুং ইচিল-ইনাওশিংবু হন্না হন্না নুংঙাইবা ফোংদোকচরি। জয় হিন্দগী স্লোগান মতম পুম্নমক্তা লৈরিবা ঐহাক্কী অরুনাচলগী মীয়াম্না ঐহাক্কা লোয়ননা হায়মিন্নরসি-

জয় হিন্দ…. জয় হিন্দ….
জয় হিন্দ…. জয় হিন্দ….
জয় হিন্দ… জয় হিন্দ….
হন্না হন্না থাগৎচরি।