ভারতকী প্রধানমন্ত্রী

জয় জৱান জয় কিসান

জয় জৱান জয় কিসান

জয় জৱান জয় কিসান

ফম্বাকথক্তা লেংশিনবীরিবা শক্নাইরবশিং, মফম অসিদা গোরখপুরদা মশিং য়াম্না লেংবীরক্লিবা ঐহাক্কী নুংশিজরবা লৌমী ইচিল–ইনাও অমসুং ইচল–ইচেশিং… তেক্নিকেলগী খুত্থাংদা লৈবাক্কী মফম কয়াদগী শরুক য়ারিবা লৌমী ইচিল–ইনাও অমসুং ইচল–ইচেশিং, ঐহাক্না ময়াম পুম্নমকপু থম্মোয় শেংনা নুংঙাইবা ফোংদোকচরি।

মরূপশিং, বাবা গোরখনাথকী লৈবাক লৈহাওদা ময়াম পুম্নমক্কী মরক্তা ঐহাকপু কয়ারক হন্না লাকচনবগী খুদোংচাবা তঞ্জা অদু ফংজখি অদুবু ঙসিগী নুমিৎ অসি পুৱারীদা ইদুনা লৈহৌরগনি। ঙসিগী থৌরম অসি অচম্বা থৌরম নত্তে। লাল বহাদুর শাস্ত্রীজীনা জয় জৱান জয় কিসান হায়বীরম্মি। মন্ত্র অদুমক মতম চহী অসুক কুইরবগী তুংদা লৌমীশিংগী লৌবুক ফাওবা, লৌমীশিংগী ময়ুম ফাওবা, লৌমীশিংগী ফুরিৎখাও ফাওবা য়ৌহন্নবা থবক অদু ঙসিগী অসিগুম্লবা শেংলবা নুমিৎ অসিদা পাংথোক্লি।

নীং তম্লবা মতুংদগী লৌমীশিংগা মরী লৈনবা খ্বাইদগী চাউবা স্কিম অসি ঙসি উত্তর প্রদেশকী শেংলবা লৈপাক লৈহাওদগী ঐহাক্কী লৈবাক অসিগী লৌমী ইচিল–ইনাও অমসুং ইচল–ইচে কোতি কয়াগী থৌজালদগী হৌদোক্লে। ঐহাক্না গোরখপুরগী মীয়াম্বু অমুক্কা হন্না নুংঙাইবা ফোংদোকচরি মরমদি মখোয়না প্রধান মন্ত্রী কিসান সম্মান নিধী হৌদোকপগী শাখি ওইরে।

ইচিল–ইনাও অমসুং ইচল–ইচেশিং, ঙসি ঙসিমক গোরখপুর অমসুং পুর্বাঞ্চলগী চাউখৎ থৌরাংগা মরী লৈনবা চাউরাক্না লুপা লিশিং কোতি ১০গী প্রোজেক্তশিং শঙ্গাখ্রে অমদি উরেপ উয়ুংসু তমখ্রে। লুপা লিশিং কোতি ১০… হকশেল, লম্বী–থোং, রেল, এম্প্লোইমেন্ত, গ্যাস অসিনচিংবা হিরমশিংগা মরী লৈনবা প্রোজেক্ত কয়া অমনা লমদম অসিগী পুন্সি মহিং লাইথোকহল্লগনি। মসিগীদমক গোরখপুর য়াওনা পুর্বাঞ্চলবু ঐহাক্না হন্না–হন্না নুংঙাইবা ফোংদোকচরি।

ইচিল–ইনাও অমসুং ইচল–ইচেশিং, প্রধান মন্ত্রী কিসান সম্মান নিধী হৌদোকপগী তঞ্জা অসিদা ঐহাক্না লৈবাক পুম্বগী লৌমী ইমুং কোতি কয়াবুসু হন্না–হন্না নুংঙাইবা ফোংদোকচরি। মসিদসু নত্তনা দাইরী ফার্ম তৌরিবশিং অমসুং ঙা য়োক্লিবশিং অমদি মসিগা মরী লৈনবা ইচিল–ইনাও অমসুং ইচল–ইচে পুম্নমকপুসু কিসান ক্রেদিৎ কার্দকী খুদোংচাবগা মরী লৈনহনবগীদমক হন্না–হন্না নুংঙাইবা ফোংদোকচরি।

মরূপশিং, মমাংগী সরকারনা লৌমীশিংগীদমক ৱাফম কয়া অমা হৌদোকখি, চেদা প্রোজেক্ত কয়া অমসু পায়খৎখি অদুবু মদুনা লৌমীশিংগী মপাঙ্গল হেঙ্গৎহনবদি লাইরদনা লৌমীশিংবু পোৎলম মচা–মচাশিং ফাওবগীসু লাংতক্নহনখি। মখোয়দা লৌমীশিংগী য়াইফনবা তৌনীংবা ফাওখিদে মরম অদুনা লৌমীশিংগীদমক কৈদৌনুংদা অচুম্বা ৱারেপ লৌখিদে।

ইচিল–ইনাও অমসুং ইচল–ইচেশিং, ফিভম অসি অহোংবা পুরক্নবগীদমক অদোম্না ২০১৪দা ভারতীয় জনতা পার্তীনা লুচিংদুনা এন.দি.এ. সরকার শেম্নবা তঞ্জা পীনবীখি। ঐখোয়না লৌমীশিংগী অপীক অপীকপা খুদোংচাদবদা পুক্নীং চংবগা লোয়ননা মখোয়না মায়োক্নরিবা অদু মপুং ফানা কোকহন্নবা থবকসু পায়খৎলি। ঐখোয়গী সরকারনা য়াম্না পুকচেল শেংনা লৈবাক অসিগী লৌমীশিংবু ২০২২ ফাওবদা মখোয়গী শেন্থোক শরুক অনি ওইহন্নবা কন্না হোৎনরি।

মরূপশিং হৌখিবা চহী মরি মখায়দা ঐখোয়না হোৎনখিবশিং অদু হেন্না চেৎশিনহন্নবা লৌমীশিংদা দাইরেক্ত ওইনা তেংবাং পীনবগীদমক প্রধান মন্ত্রী কিসান সম্মান নিধী ঙসি উত্তর প্রদেশকী শেংলবা লৈবাক লৈহাওদগী লৈবাক অসিগী লৌমী কোতি কয়াগী খোংয়া খাদা কৎচরি। ঙাইহাক্কী মমাংদা লৈবাক অসিগী লৌমী কোতি অমগা লাখ অমগী একাউন্তা স্কিম অসিগী অহানবা ইন্সতোল্তমেন্ত ত্রান্সফর তৌবগী খুদোংচাবা অদু ঐহাক্না ফংজখি।

মসিদা লৈবাক অসিগী রাজ্য ২১ অমসুং য়ুনিয়ন তেরিতোরীশিংগী লৌমীশিং য়াওরি হায়না ইফমদা খঙহনবীরে। লৌমীশিং অসিদা হৌজিক লুপা কোতি ২০২১গী শেনফম হৌজিক দাইরেক্ত ত্রান্সফর তৌখ্রে। লেমহৌরিবা লৌমীশিংগীসু মতৌ অসুম্না অহানবা ইন্সতোল্তমেন্তকী লুপা ২০০০ অদু মথংগী হপ্তা খরা অসিগী মনুংদা চংলক্লগনি অমদি লৈবাক অসিগী চাউরাক্না লৌমী কোতি ১২গী একাউন্তা লুপা লিশিং অনি–অনিগী অহানবা ইন্সতোল্তমেন্ত অদু দিপোজিৎ তৌরগনি।

ইচিল–ইনাও অমসুং ইচল–ইচেশিং, ঐহাক্না ময়ামদা হায়জরিবা অসিনি মসিদি হৌরকপদা ঙায়রি, স্কিম অসিগী মখাদা চহী খুদিংগী চাউরাক্না লুপা কোতি লিশিং ৭৫ লৌমীশিংগী একাউন্তা দাইরেক্ত য়ৌরগনি। লৈবাক অসিগী একর মঙাদগী তানা লৌ লৈরিবা অদুগুম্লবা লৌমী কোতি ১২না মসিগী কান্নবা ফংগনি। হৌজিক্তি লৌমীশিংনা মরু–মরাং লৈনবগীদমক, হার লৈনবগীদমক, হিদাক লৈনবগীদমক, মৈগী বিল থিনবগীদমক, লৌবুক্কা মরী লৈনবা অতোপ্পা দরকার ওইবশিংগীদমক অৱাবা লৈররোই।

ইচিল–ইনাও অমসুং ইচল–ইচেশিং, প্রধান মন্ত্রী কিসান সম্মান নিধীগী মখাদা লৌমীশিংদা পীগদৌরিবা শেনফমশিং অসি কেন্দ্রদা ফম্লিবা মোদী সরকারগী মায়কৈদগী পীগনি। রাজ্য সরকারনা শেনফম অমা ফাওবা পুথোক্লোই। শুপ্নতংগী পুকচেল শেংনা মখোয় মখোয়গী রাজ্যগী লৌমীশিংগী অচুম্বা লিস্ত অদু শেম্বা খক্তনি। অমদি লিস্ত অদু ঐখোয়গী ইফমদা খুদক্তা য়ৌহনবীরক্কদবনি। করিগুম্বা লিস্ত অদুনা থুনা য়ৌরক্লিবা মখৈ, অদুগা ঐহাক্না উত্তর প্রদেশ সরকারবু, বিহার সরকারবু, গুজরাতকী সরকারবু, মহারাস্ত্রগী সরকারবু, উত্তরাখন্দগী সরকারবু থম্মোয় শেংনা তৌবীমল খঙবা উৎচরি… মরমদি মখোয়না থবক অসিদা প্রায়োরিতী পীবীরি অদুবু হৌজিক ফাওবা তুমদুনা লৈরিবা রাজ্য সরকার খরা লৈরি… মখোয়না খল্লিবা অসি মসিদা মখোয় রাজনিতী তৌগে হায়বা অসিনি।

ঐহাক্কী লৌমী ইচিল–ইনাও অমসুং ইচল–ইচেশিং, কেন্দ্রদা লৌমীশিংগী য়াইফনবা খনবা, লৌমীশিংগী ৱাবীবা সরকার লৈরবা মতমদা অসিগুম্বা মখলগী স্কিমশিং ওইথোকপা ঙম্লকই। থবক ওইনা পাংথোরকই। ওইথোক্তবা ফাওবা ওইথোকহল্লকই।

ইচিল–ইনাও অমসুং ইচল–ইচেশিং, ময়াম্না খনবীয়ু ঐখোয়গী সরকারনা প্রধান মন্ত্রী কৃশি সিঞ্চাই য়োজনা মক্তদা চাউরাক্না লুপা কোতি লাখ অমা চাদিং তৌরি। মদুনা মরম ওইরগা লৈবাক অসিদা চহী কুনথ্রা–কুনথ্রা, নিফু–নিফুদগী পন্দুনা লৈরক্লবা ইথৈ–লৌখোংগী প্রোজেক্তশিং মপুং ফানা পাংথোক্নবা অসুক য়াম্বা শেনফম অসি ঐখোয়না থাদরি।

ঐখোয়না লৈবাক পুম্বদগী অসিগুম্বা মখলগী প্রোজেক্ত ৯৯ খনগৎখি মদুগী মনুংদা ৭০ হেনবদা শেমগৎ শাগৎপগী থবক লোইশিল্লকপগী ফিভম অদু য়ৌরক্লে। প্রোজেক্তশিং অসিনা মরম ওইদুনা লৌমীশিংবু লৌবুক হেক্তর লাখ কয়াদা ইথৈ–লৌখোংগী খুদোংচাবা ফংলে অমদি থবক অসিনা লৌমীশিংগী লাক্কদৌরিবা চারোল শুরোলশিং ফাওবা কান্নবা ফংহল্লগনি।

মরূপশিং, ইথৈ–লৌখোংগী প্রোজেক্তশিং অসি মপুং ফানা পায়খৎনবা করিগুম্বা মফম অমত্তদা খোংজং চংশিল্লকখিদে, প্রেসর অমত্তা পীরকখিদে। ইথৈ–লৌখোংগী প্রোজেক্তশিং অসি পায়খৎপা তৌদনা লোন কোকথোকপনা হেন্না লাইবা লম্বী ওইরম্মি। অদুবু অচুম্বা ৱাফমদি মসিনি মদুদি লোন কোকপীবনা শুপ্নতগী মথক্তা লৈবা লৌমী খরা খক্তমক কান্নবা ফংগনি, ঐহাক্কী লাইরবা লৌমীশিংদা কান্নবা ফংবা ঙম্লোয়। মদুসু বেঙ্কশিংদগী লোন লৌখিবা লৌমীশিং খক্তনা কান্নবা ফংগনি, অদুম তৌরবদি বেঙ্কতগী নত্তনা অতোপ্পা কনাদগী লোন লৌরিবা অদুগুম্লবা লৌমীশিং অদুগী মতাংদা কনানা খনবীগদৌরিবা, ঐখোয়গী লৈবাক অসিদা মখোয়শিং অসিগী মশিং অসি লাখতা নত্তে কোতিরোমদা লৈরি।

ঐহাক্কী লৌমী ইচিল–ইনাও অমসুং ইচল–ইচেশিং, মসি অনৌবা ভারতনি, মসিদা লাইরবশিংগীদমক্তা, লৌমীশিংগীদমক্তা কেন্দ্র সরকারনা থাদোকখিবা শেনফম অদু মপুং ফানা মখোয়গী একাউন্তা য়ৌরি। কেন্দ্র সরকারদগী লুপা অমা চৎখিবা মতমদা শুপ্নতংগী পৈশা ১৫ খক্তমক ফংবা মতম অদু চৎখ্রে…

লৌমী ইচিল–ইনাও অমসুং ইচল–ইচেশিংগী অধিকার অদু কনাগুম্বা অমত্তনা মুনখিবা ঙমদনবা প্রধান মন্ত্রী কিসান সম্মান নিধীবুসু ফুল প্রুফ ওইহল্লে। স্কিম অসিদা করিগুম্বা মখল অমত্তগী মিদলমেনগীদমক মফম অমত্তা পীদ্রে। করিগুম্বা অদোমগী নাক্তা আধার নম্বর লৈতবা তারগসু এপ্লাই তৌবা য়াগনি। মদুগী রেজিস্ত্রেসন নম্বর অদু অদোমগীদমক্তা মতিক চাবা ওইগনি। জনধন বেঙ্ক একাউন্তি অয়াম্বনা লৈনরে অদুবু কনা কনাগুম্বশিংগী লৈতবা য়াওরগদি মখোয়গী বেঙ্ক একাওন্ত হাংদোকহনবা তাবনি মরমদি শেনফম অসি দাইরেক্ত ওইনা বেঙ্ক একাউন্তশিংদা চংগনি। ঐহাক্না ময়াই চাবা অমত্তগী মখুৎতা নয়া পৈশা অমা ফাওবা য়ৌহল্লোই।

মরূপশিং, কান্নবা ফংলগদবশিংগী লিস্ত অদু… মসিমসু অদোম্না খুঙ্গংশিংদা খঙহনবীয়ু ইচিল–ইনাওশিং পুকচেল শেংবগী লম্বী অদু মসিমক্নি। মরূপশিং কান্নবা ফংলগদবশিংগী লিস্ত অদু অহানবদা গ্রাম পঞ্চায়ৎতা উত্থোক্কনি অমদি মদুগী মতুং মদু প্রধান মন্ত্রী কিসান পোর্তেলদা ওন লাইন্দা অপলোদ তৌগনি। মপুং ফাবা ত্রান্সপরেন্সী… করিগুম্বা অদোমগী মীং অদু লিস্ত অদুদা য়াওদ্রবা অমদি অদোম্না স্কিম অসিগী খুদোংচাবা ফংফম থোক্লগদি অদোমগী ব্লোক্তা, নত্ত্রগা জিলা প্রসাসন্দা কন্তেক্ত তৌবা য়াগনি।

ইচিল–ইনাও অমসুং ইচল–ইচেশিং ঐখোয়গী সরকারনা অনোবা এপ্রোচ অমগা লোয়ননা মরু–মরাংদগী বাজার ফাওবা, লৌবুক্তগী ফৌগৈ ফাওবা অনৌবা সিস্তেমশিং হৌদোক্লি। মমাংদা ওইথোকপা য়ারোই খল্লম্বা ৱাফমশিং অদু ওইথোকহনবগী থবক চত্থরে। হৌখিবা চহী মরি মখায়দা সরকার অসিনা থেংখাং অনিরক্তা সোইল হেল্থ কার্দ কোতি ১৭ হেন্না য়েন্থোকখ্রে। য়ুরিয়াবু চাদা চামা নীমকোতিংগী ৱারেপ লৌদুনা ঐখোয়না হারবু অরানবা লম্বীদা শিজিন্নবা… হার হুরানবদগী থিংবা ঙম্লে। অফবা মরু–মরাংগীদমক ঐখোয়না রিসর্স পাংথোকপদা পুক্নীং থৌগৎলি।

মরূপশিং, লৌউবদা চংলিবা চাদিং হন্থহন্নবা হোৎনবগা লোয়ননা লৌমীশিংবু পোত্থোকশিংগী মতিক চাবা মমল ফংহন্নবসু কয়া অমা হোৎনরি। এম.এস.পি.দা লৌমীশিংগী চহী কয়া কুইরবা দিমান্দ অদুবু ফংহনখিবসু ঐখোয়গী সরকার অসিননি। রবি অমসুং খরিফকী মহৈ মরোং ২২গী সপ্পোর্ত প্রাইজ মমলদগী শরুক অমা মখায়দগীসু হেন্না লেপ্লে।

ইচিল–ইনাও অমসুং ইচল–ইচেশিং, নোংজু–নুংশানা মাংহন তাকহনবদগী লৌমীশিংবু কন্ননবগীদমক্তা প্রধান মন্ত্রী ফসল বীমা য়োজনা শেম্লে। ইচিল–ইনাও অমসুং ইচল–ইচেশিং লৌমীশিংবু মখোয়গী পোত্থোক্কী মতিক চাবা মমল ফংহন্নবা অমদি লৌউবদা মখোয়গী শেল চৎপা হন্থহন্নবা খোংথাং কয়া অমা পায়খৎখ্রে। ই–নাম প্লেতফোর্ম্না লৈবাক্কী মফম কয়াদা লৈরিবা মশিং থিঙমদ্রবা কৈথেলশিং শম্নহনবগী থবকসু চত্থরি। মসিনা মরম ওইদুনা লৌমীশিংবু মখোয়গী পোত্থোক অদু লৈবাক্কী মফম অমা হেক্তদা লৈরিবা কৈথেলদা ওনলাইন য়োন্নবা খুদোংচাবসু ফংহল্লে। মসিনা মরম ওইদুনা মরক্তা লৈবা মীওইশিংনা মমলশিংদা এফেক্ত তৌবা ঙম্লরোই। মথংগী চহী অমা অনিদা মেদিয়ম অসি হেন্না পাকথোক চাউথোক্লগনি।

মরূপশিং, লৌমীশিংদা মখোয়গী শেন্থোক শরুক অনি ওইহনবা ঙমহন্নবা সরকারনা লৌউ শিংউবগী লিরবা চৎন পথাপ অদুগী মথক্তা অতোপ্পা থৌওংশিংদসু পুক্নীং থৌগৎলি। খুদম ওইনা হয়িংখোই য়োকপা, ওর্গানিক ফার্মিং, মুগা পুথোকপা, সোলা ফার্মিং অসিনচিংবা অনৌবা লম কয়া অমদা ঐখোয়না লৌমীশিংবু মাংলোমদা পুদুনা চৎলি। মসিগী মথক্তা শা–শন লোইবা অমসুং ঙা য়োকপদসু ঐখোয়না লেপ্পা লৈতনা হোৎনরি।

ইচিল–ইনাও অমসুং ইচল–ইচেশিং, লৌউ–শিংউবা ওইগেরা নত্ত্রগা অতোপ্পা সিস্তেম ওইগেরা পুম্নমক অসি পাকথোক চাউথোকহন্নবগীদমক বেঙ্কতগী লোনগী খুদোং চাবসু য়াম্না লাইথোকহল্লে। মসিগী মহৈ ওইনা মমাংগী চহীদা লুপা কোতি লাখ ১১ হেনবা শেনফমগী কৃশি লোন লৌমীশিংদা ফংহনখি।

মরূপশিং, লৌমী ইচিল–ইনাও অমসুং ইচল–ইচেশিংনা লোন লৌবদা লাইথোকহন্নবা ঐখোয়না য়াম্না চাউবা ৱারেপ অমসু লৌরে। মমাংদদি লৌমীশিংনা কিসান ক্রেদিৎ কার্দকী থোংদা শুপ্নতংগী লুপা লাখ ১ খক্তগী লোন গরেন্তী য়াওদনা লৌবা য়ারম্মি। হৌজিক্তি মদু হেঙ্গৎহন্দুনা লুপা লাখ ১গা লিশিং ৬০ ফাওবগী ক্রেদিৎ গরেন্তী য়াওদনা লৌবা য়াহল্লে।

ঙসিদগী কিসান ক্রেদিৎ কার্দকী খুদোংচাবা ঐখোয়গী দাইরী ফার্ম তৌরিবশিং অমসুং ঙা য়োক্লিবশিংদসু হৌদোক্লে। কিসান ক্রেদিৎ কার্দ লৈতবা মখোয়শিং অদু তোঙান্না শা–শন লোয়বা অমসুং ঙা য়োকপগীদমক্তা লুপা লাখ অনি ফাওবা লৌবা য়াবা কিসান ক্রেদিৎ কার্দ বেঙ্কশিংনা ফংহল্লগনি। ঙা য়োকপগা মরী লৈনবা হিরমশিংদা য়েংশিন্নবগীদমক হন্দক্কী বজেৎতা সরকারনা তোঙানবা দিপার্তমেন্ত অমা শানবসু লাওথোকখ্রে।

ময়াম্না খঙবীরমগনি লৈবাক অসি নীং তম্বা ফংলে অদুবু ত্রাইবেলশিংগীদমক তোঙানবা মন্ত্রালয় লৈরমদে। মদু অতল বিহারী ভাজপায়ীনি… মহাক্না… ত্রাইবেলশিংগীদমক তোঙানবা মন্ত্রালয় অমা শেমখি। লৈবাক অসি নীং তম্লবা মতুংদা ফাওবা অৱাং নোংপোক্কী চাউখৎ থৌরাংগীদমক মন্ত্রালয় অমত্তা লৈরমদে। মদুসু অতল বিহারী বাজপায়ীনি মহাক্না অৱাং নোংপোক্কী দিবেলপমেন্তকীদমক তোঙানবা মন্ত্রালয় অমা শেমলম্মি। অদুদগী অমুক হন্না ভাজপাগী সরকার লাকপা অসিদা লৈবাক অসিগী সমুদ্র মপান্দা, তুরেল তোর্বন্দা লৈরিবা ঐখোয়গী ঙামী ইচিল ইনাওশিংগী দিবেলপমেন্তকীদমক, মখোয়গী য়াইফনবগীদমক, ঙামীশিংগা মরী লানবা মীওইশিংগীদমক তোঙানবা মন্ত্রালয় অমা শেম্নবা ৱারেপ ঐখোয়না লৌরে।

ইচিল–ইনাও অমসুং ইচল–ইচেশিং, গোরখপুর অমসুং পুর্বাঞ্চলগী শা–শন লোয়রিবশিং, শঙ্গোম পুথোক্লিবশিংগীদমক্তদি ঙসি অসি অনিরক হন্না নুংঙাইবা ফোংদোকপা নুমিৎনি মরমদি ঙসিমক লুমীৎ খুদিংগী শঙ্গোম লিতর লাখ অমা প্রোসেস তৌবা ঙম্বা অনৌবা দেরী অমা শঙ্গাখ্রে। মসিনা চাউরাক্না শঙ্গোম পুথোক্লিবা মীওই লিশিং ৫০দা হকথেংননা কান্নবা ফংহল্লগনি লোয়ননা থবক ফংবগী খুদোংচাবা তঞ্জাসু ফংহল্লগনি।

ইচিল–ইনাও অমসুং ইচল–ইচেশিং, শা–শন লোইরিবশিংগীদমক নুঙাইরবা পাও অমসু লৈরি, মরূপশিং… ঐখোয়গী সরকারনা অহানবা ওইনা লমদম অসিগী শন অমসুং ইরোই লোইবদা পুক্নীং থৌগৎনবা মমাং চহীদা রাস্ত্রীয় গোকুল মিশন হৌদোকখি। চহী অসিদা মদুবু হেন্না পাকথোক চাউথোকহন্দুনা রাস্ত্রীয় কামধেনু আয়োগ শেম্নবা ৱারেপ লৌখ্রে। আয়োগ অসিনা লাইবস্তোক্কা মরী লৈনবা আইন, নিতী নিয়ম অদু য়েংশিনগনি অমদি মতৌ করম্না শঙ্গোম য়াম্না পুথোক্কদগে হায়বগী পাম্বৈ পুথোক্কনি।

মরূপশিং, মতৌ অসুম্না চাউরবা স্কিম অমা… স্কিম অসিসু ঐহাক্না লৌমী ইচিল ইনাওশিংদা, লৈবাক পুম্বদা লৈরিবা লৌমী ইচিল ইনাওশিং ঐহাক্না হায়গদৌরিবা অতোপ্পা স্কিম অসিনসু অদোমদা চাউনা কান্নবা থবক তৌরগনি। ঐখোয়না অনৌবা স্কিম অমা হৌদোক্লে। কিসান উর্জা সুরক্ষা এবম উত্থান অভিয়ান, মসি ঐখোয়না হন্দক্কী হপ্তাদা অয়াবা পীখ্রে। মসিগী মখাদা লৌমীশিংবু নুমিৎকী মৈশানা মথৌ তৌবা সোলর পম্প লাখ ১৭ হেন্না মতেং ফংলগনি। মদুনা ইথৈ লৌখোংগী থবক্তা চাদিং তৌরিবা মৈগী খজনা, দীজলগী চাদিংদগী কোকহনবা ঙম্লগনি।

মরূপশিং ঐখোয়গী সরকারনা ত্রাইবেল ইচিল ইনাওশিংগী শেন্থোক হেঙ্গৎহন্নবগীদমকসু কন্না হোৎনরি, ঐখোয়গী ত্রাইবেল লৌমীশিংগী য়াইফনবা, বনধন স্কিমগী থোংদা থবক পায়খৎলি। উমংশিংদগী ফংলক্লিবা পোত্থোকশিং অদুগী মতিকচাবা মমল লৌমীশিংনা ফংজবা ঙমজনবা বনধন কেন্দ্র লিংখৎলি। মসিদসু নত্তনা সরকার অসিনা এম.এস.পি.গী মনুং চনবা পোত্থোকশিংগী মশিংদসু হেঙ্গৎহল্লে। চহী মরি মখায়গী মমাংদা উমংদগী ফংবা পোত্থোক তরাদা এম.এস.পি. ফংলম্মি মদু হৌজিক্তি মশিং অদু হেঙ্গৎহন্দুনা ত্রাইবেল লৌমীশিংগীদমক মশিং হেঙ্গৎহন্দুনা চাউরাক্না ৫০ ওইহনলে।

ঐহক্কী নুংশিজরবা ইচিল ইনাওশিং সরকারনা অখন্ননা উমংশিংদা লৈরিবা মীওইশিংগীদমক ৱাগা মরী লৈনবা আইন্দসু চাউনা অহোংবা পুরক্লে। হৌজিক্তি অদোম্না অদোমগী লৌবুকশিংদসু ৱা থাবা য়ারে অমদি মদু য়োন্দুনা ইশাগী শেন্থোক হেঙ্গৎহনবা য়ারে। হান্নদি মসি ওইথোকলমদে। মরমদি ৱা অসি উগী কাংলুপতা চল্লম্মি। ৱা থাবদা নত্তনা মসিগী কৈথেলসু ফংনবা থবক পায়খৎলে।

মরূপশিং, পুর্বাঞ্চলগী হকশেলগী খুদোংচাবশিং হেঙ্গৎহন্নবা ঙসি প্রোজেক্ত কয়া অমা শঙ্গাবা অমদি উরেপ উয়ুং তম্বগী থৌরম পাংথোকখ্রে। বাবা রাঘব দাস মেদিকেল কোলেজদা ফমুং ২০০ লৈবা সুপর স্পেসিয়েলিতী হোস্পিতাল শঙ্গাবগী থৌরমসু ঙসি পাংথোকখ্রে। গোরখপুর এইম্সকী ও.পি.দি. বিল্দিংসু মথৌ তৌনবা কত্থোকখ্রে। ঙসিদগী মফম অসিদা অনাবশিং লায়েংবগী থবক থৌরম হৌরগনি।

মরূপশিং পুর্বাঞ্চল… নোংপোক ভারত্তা খুদোংচাবশিং, ইন্দস্ত্রী অমসুং থবক ফংবগী য়াম্না চাউবা সেন্তর ওইরক্লি। মসি য়েংদুনা মফম অসিগী কমেক্তিবিতীবু হেন্না মোদর্নাইজ তৌবগী থবক চত্থরি। গোরখপুর কেন্ত, কপ্তান গঞ্জ, বাল্মীকী নগর সেক্সনগী ইলেক্ত্রিফিকেসন লোইখ্রে। মসিনা সেক্সনশিং অসিদা ইলেক্ত্রিক ত্রেন চেলহল্লগনি।

মরূপশিং, ঐখোয়গী সরকারনা হোৎনরিবা অসি গোরখপুর য়াওনা পুর্বাঞ্চলদা অশেংবা ফ্যুএল অমসুং গ্যাসতা য়ুমফম ওইবা সিস্তেমশিং দিবেলপ তৌনবা হোৎনরি। প্রধান মন্ত্রী উর্জা গঙ্গা য়োজনা মফম অসিদা হান্ননা হারগী ইন্দস্ত্রীশিং অমসুং য়ুমশিংদা পাইপকী গ্যাস অসিগুম্বা প্রোজেক্তশিংগী কান্নবা ফংলি। ঙসি লুপা কোতি লিশিং ৯গী অতোপ্পা গ্যাস প্রোজেক্ত অমগী উরেপ উয়ুং তমখ্রে।

ইচিল ইনাওশিং, ঙসিগী স্কিম অমদি প্রোজেক্ত পুম্নমক অসি সবকা সাথ সবকা বিকাস মসিমক্কী অহিংবা খুদম অমনি। হৌখিবা চহী মরি মখায় অসিদা কেন্দ্র সরকারনা মসিগী মমল য়াম্লবা মন্ত্র অসিদা চৎতুনা লৈবাক অসিদা মীয়ামগী য়াইফনবা অমসুং চাউখৎ থৌরাংগী অনৌবা ইচেল অমা চেন্থহল্লে। মদুনা প্রধান মন্ত্রী আৱাস য়োজনা ওইগেরা, উজ্জ্বলা য়োজনা ওইগেরা, সৌভাগ্য য়োজনা ওইগেরা, আয়ুশ্মান য়োজনা ওইগেরা, অসিগুম্বা স্কিম কয়া অসিগী বেনিফিসরীশিং খন্দোকপগী থবক অসি য়াম্না সাইন্তিফিক ওইবা মওংদা তৌরি।

মরূপশিং, মসি পুম্নমক অসি করিগীদমক্তা ওইথোকপা ঙম্লিবনো…. মসি পুম্নমক অসি ওইথোকপা ঙম্লিবগী মরম করিনো… মসি করিগীদমক ওইরিবনো… করি মরমদগীনো… করি মরমদগীনো… করি মরমদগীনো… মসিগী মরম অসি মোদী নত্তে, মসিগী মরমদি অদোম ইচিল–ইনাও অমসুং ইচে–ইচলশিং অদুনি মখোয়না ২০১৪দা… ঐহাক্কী লৈবাক অসিগী প্রজাশিংনা, উত্তর প্রদেশকী ঐহাক্কী ইচিল–ইনাও অমসুং ইচে–ইচলশিংনা ২০১৪দা মরা চেৎপা সরকার অমা শেম্নবগীদমক থৌদাং শিন্নবীখি মদুনা মসি পুম্নমক ওইথোকপা ঙম্লিবনি। লাইরবশিংগী য়াইফনবগীদমক ঐখোয়গী সরকারনা চাউর চাউরবা মীওইশিং, চাউর চাউরবা শেঞ্জা–থুমজা তৌবশিংবু মায়োক্নবা ঙমহল্লিবা অসিগী মরমদি ময়াম্না মেজোরিতী পীনবীদুনা অসিগুম্বা ৱারেপশিং অসি লৌবদা ময়াম্না থৌনা পিনবীখি। থৌনা অসি লেংদনা লৈনবা, ময়ামগী থৌজাল অদু লেংদনা লৈগনি হায়বগী থাজবা অসিগা লোয়ননা ঐহাক্কী লৈবাক অসিগী লৌমী ইচিল ইনাও পুম্নমকপু ঙসিগী অসিগুম্লবা স্কিমগী থোংদা শঙ্গাবগী পুংফম অসিদা ইকোক নোন্না খুরুমজরি, ময়ামদা তৌবীমল খঙবা উৎচরি। অমদি কিসান সম্মান নিধীগী কান্নবা লৌমী কোতি ১২ মক্তা অথুবা মতমদা ফংনবা, চহী খুদিংগী ফংনবা….. অপাম্বা অসিগা লোয়ননা ঐহাক্না অমুক হন্না ময়াম পুম্নমকপু হন্না–হন্না থাগৎপা ফোংদোকচরি।         

অদোম অদোমগী খুৎ অনিমক খুৎতুম তাশিন্দুনা অহৌবা খোংজেলগা লোয়ননা ঐহাক্কা লাওমিন্নরসি

ভারত ইমানা য়াইফরে

ভারত ইমানা য়াইফরে

ভারত ইমানা য়াইফরে

হন্না–হন্না থাগৎচরি।