ପିଏମଇଣ୍ଡିଆ

ନୂଆ ସିଭିଲ ହସପିଟାଲ ଓ ନୂଆ କ୍ୟାନସର ହସପିଟାଲ ଉଦ୍ଘାଟିତ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଅହମ୍ମଦାବାଦ ଗସ୍ତ କରି ବିଭିନ୍ନ ବିକାଶ ପ୍ରକଳ୍ପର ଶୁଭାରମ୍ଭ କରିଛନ୍ତି ।

ଅହମ୍ମଦାବାଦର ଭସ୍ତ୍ରଲ ଗମ ମେଟ୍ରୋ ଷ୍ଟେସନ ଠାରେ ପ୍ରଧାନମନ୍ତ୍ରୀ ଅହମ୍ମଦାବାଦ ମେଟ୍ରୋ ସେବାର ପ୍ରଥମ ପର୍ଯ୍ୟାୟକୁ ଉଦଘାଟନ କରିଥିଲେ । ଅହମ୍ମଦାବାଦ ମେଟ୍ରୋର ଦ୍ୱିତୀୟ ପର୍ଯ୍ୟାୟ ଲାଗି ସେ ଆଧାରଶିଳା ରଖିଥିଲେ । ଏହି ଅବସରରେ ସେ ସ୍ୱଦେଶୀ ଜ୍ଞାନକୌଶଳରେ ବିକଶିତ ପଇଠ ପ୍ରଣାଳୀ ଏବଂ ସ୍ୱୟଂଚାଳିତ ଭଡ଼ା ସଂଗ୍ରହ ପ୍ରଣାଳୀକୁ ମଧ୍ୟ ଲୋକାର୍ପଣ କରିଥିଲେ । ଏହି ପ୍ରଣାଳୀ ‘ଏକ ରାଷ୍ଟ୍ର, ଏକ କାର୍ଡ’ ବ୍ୟବସ୍ଥା ଉପରେ ଆଧାରିତ । ଏହାପରେ ପ୍ରଧାନମନ୍ତ୍ରୀ ମେଟ୍ରୋ ଟ୍ରେନକୁ ସବୁଜ ପତାକା ଦେଖାଇଥିଲେ ଏବଂ ମେଟ୍ରୋ ଟ୍ରେନରେ ଯାତ୍ରା ମଧ୍ୟ କରିଥିଲେ ।

ପ୍ରଧାନମନ୍ତ୍ରୀ ଶ୍ରୀ ମୋଦୀ ଅହମ୍ମଦାବାଦରେ 1200 ଶଯ୍ୟା ବିଶିଷ୍ଟ ନୂଆ ସିଭିଲ ହସପିଟାଲ, ନୂଆ କ୍ୟାନସର ହସପିଟାଲ, ଦନ୍ତ ଏବଂ ନେତ୍ର ଚିକିତ୍ସାଳୟକୁ ମଧ୍ୟ ଉଦଘାଟନ କରିଥିଲେ । ସେ ଦହୋଦ ରେଳବାଇ ୱାର୍କସପ ଏବଂ ପାଟନ ବିନ୍ଦି ରେଳ ଲାଇନକୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଥିଲେ  । ଲୋଥଲ ମେରିଟାଇ ମ୍ୟୁଜିୟମ ପାଇଁ ମଧ୍ୟ ଶିଳାନ୍ୟାସ କରିଥିଲେ ।

ବିଜେ ମେଡ଼ିକାଲ କଲେଜ ଗ୍ରାଉଣ୍ଡରେ ଆୟୋଜିତ ଜନସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଏହା ଏକ ଐତିହାସିକ ଦିନ କାରଣ ଅହମ୍ମଦାବାଦ ମେଟ୍ରୋର ସ୍ୱପ୍ନ ପୂରଣ ହୋଇଛି । ସେ କହିଥିଲେ ଯେ ମେଟ୍ରୋ ଅହମ୍ମଦାବାଦର ଲୋକମାନଙ୍କୁ ଏକ ଆରାମଦାୟକ ଏବଂ ପରିବେଶ ଅନୁକୂଳ ଯାତାୟାତ ସୁବିଧା ପ୍ରଦାନ କରିବ । ଅହମ୍ମଦାବାଦର ଲୋକମାନଙ୍କୁ ଏକ ଆରାମଦାୟକ ଏବଂ ପରିବେଶ ଅନୁକୂଳ ଯାତାୟାତର ସୁବିଧା ମିଳିବ । 2014 ପୂର୍ବରୁ ଦେଶରେ 250 କିଲୋମିଟର ଲାଇନରେ ମେଟ୍ରୋ ଚଳାଚଳ ହେଉଥିଲା । ଆଜି ଏହା ବୃଦ୍ଧି ପାଇ 655 କିଲୋମିଟର ହୋଇଯାଇଛି ବୋଲି ପ୍ରଧାନମନ୍ତ୍ରୀ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଆଜି କମନ ମୋବିଲିଟି କାର୍ଡର ଉନ୍ମୋଚନ ହେବା ପରେ ସାରା ଦେଶରେ ଯାତ୍ରା ଲାଗି ବିଭିନ୍ନ ପ୍ରକାରର କାର୍ଡ ଉପଯୋଗ କରିବାର ଆବଶ୍ୟକତା ରହିବ ନାହିଁ । ଏହି କାର୍ଡ ଯାତ୍ରା ନିମନ୍ତେ ‘ଏକ ରାଷ୍ଟ୍ର, ଏକ କାର୍ଡ’ର ଉପଯୋଗିତାକୁ ସୁନିଶ୍ଚିତ କରିବ । ସେ କହିଥିଲେ ଯେ ଏହି କାର୍ଡ ସ୍ୱଦେଶୀ ଭାବେ ହିଁ ବିକଶିତ ହୋଇଛି । ପୂର୍ବରୁ ଏପରି କାର୍ଡ ନିର୍ମାଣ ଲାଗି ବିଦେଶ ଉପରେ କରିବାକୁ ପଡ଼ୁଥିବା ନିର୍ଭରଶୀଳତା ହ୍ରାସ ପାଇବ । ଭାରତ ବିଶ୍ୱର ହାତଗଣତି ଦେଶମଧ୍ୟରେ ସାମିଲ ହୋଇଯାଇଛି, ଯେଉଁଠି ଯାତ୍ରା ନିମନ୍ତେ “ଏକ ରାଷ୍ଟ୍ର ଏକ କାର୍ଡ” ସୁବିଧା ହୋଇଛି ।

ପ୍ରଧାନମନ୍ତ୍ରୀ କେନ୍ଦ୍ର ଏବଂ ରାଜ୍ୟ ସରକାରଙ୍କ ଦ୍ୱାରା ଗୁଜରାଟର ବିକାଶ ଲାଗି ନିଆଯାଇଥିବା ପଦକ୍ଷେପ ବିଷୟରେ ଆଲୋକପାତ କରିଥିଲେ । ଜଳ ଯୋଗାଣ ଯୋଜନା, ସମସ୍ତଙ୍କ ପାଇଁ ବିଦ୍ୟୁତ ସଂଯୋଗ, ଭିତ୍ତିଭୂମି ବିକାଶ, ସମସ୍ତଙ୍କ ପାଇଁ ବାସଗୃହ ଓ ଗରିବ ଓ ଆଦିବାସୀ ସମ୍ପ୍ରଦାୟଙ୍କ କଲ୍ୟାଣ ପାଇଁ ଲାଗିୁ ଯୋଜନା ବିଷୟରେ ସେ ଉଲ୍ଲେଖ କରିଥିଲେ ।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ କହିଥିଲେ ଯେ ଲୋଥମ ମେରିଟାଇମ ହେରିଟେଜ କମ୍ପ୍ଲେକ୍ସର ନିର୍ମାଣ ହେବା ପରେ ଏହି ସଂଗ୍ରହାଳୟ ଭାରତର ପ୍ରାଚୀନ ସାମୁଦ୍ରିକ ଶକ୍ତିକୁ ଦର୍ଶାଇବ । ସେ କହିଥିଲେ ଯେ ସଂଗ୍ରହାଳୟରେ ବିଶ୍ୱସ୍ତରର ସୁବିଧା ରହିବ ଏବଂ ଏଥିରେ ରାଜ୍ୟର ପର୍ଯ୍ୟଟନ କ୍ଷମତା ବୃଦ୍ଧି ପାଇବ ।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ କହିଥିଲେ ଯେ ସ୍ୱାସ୍ଥ୍ୟ, ସରକାରଙ୍କ ପ୍ରାଥମିକତା । ସରକାର ସାରା ଦେଶରେ ସ୍ୱାସ୍ଥ୍ୟ ଯତ୍ନ ଭିତ୍ତିଭୂମିର ନିର୍ମାଣ କରୁଛନ୍ତି । ଏହାର ଅନ୍ତର୍ଗତ ଆରୋଗ୍ୟ କେନ୍ଦ୍ର ଠାରୁ ଆରମ୍ଭ କରି ମେଡ଼ିକାଲ କଲେଜ ପର୍ଯ୍ୟନ୍ତ ନିର୍ମାଣ କରାଯାଉଛି । ସେ କହିଥିଲେ ଯେ ପ୍ରସ୍ତୁତ ହେବା ପରେ ମେଡ଼ିସିଟି 10 ହଜାର ରୋଗୀଙ୍କୁ ଚିକିତ୍ସା ସୁବିଧା ଦେବାରେ ସହାୟକ ହେବ ।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ କହିଥିଲେ ଯେ ସରକାର ଭ୍ରଷ୍ଟାଚାରଠାରୁ ଆରମ୍ଭ କରି ଆତଙ୍କବାଦ ଭଳି ବିପଦ ସହ ଲଢ଼ିବା ନିମନ୍ତେ ପ୍ରତିବଦ୍ଧ । ସେ ଲୋକମାନଙ୍କୁ ଆଶ୍ୱାସନା ଦେଇ କହିଥିଲେ ଯେ ରାଷ୍ଟ୍ରର ସ୍ୱାର୍ଥ ବିରୋଧରେ କାମ କରୁଥିବା ଲୋକମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଜାତୀୟ ସୁରକ୍ଷା ପ୍ରସଙ୍ଗରେ ଭୋଟ ବ୍ୟାଙ୍କ ରାଜନୀତି ନକରିବା ଲାଗି ସେ ବିରୋଧୀ ଦଳଗୁଡ଼ିକୁ ଆହ୍ୱାନ କରିଥିଲେ । ଏପରି କାର୍ଯ୍ୟ ଦ୍ୱାରା ସେନାବାହିନୀର ମନୋବଳ  ହ୍ରାସ ପାଇବ ଏବଂ ଆମର ଶତ୍ରୁମାନେ ଦୃଢ଼ ହେବେ ।