ভারতকী প্রধানমন্ত্রী

মরূপশা,

অদোম্না শিংনবতনা থল্লবা সমস্যাশিংগী পাম্বৈ পুথোক্নবা হৌখিবা পুং ৩৬তগী লেপ্পা লৈতনা হোৎনরক্লি।

অদোমগী থৌনা অদুবু খুরুমজরি। ঐনা চোকথবা উদে, শুপ্নগী থৌনা অদুতমক উবা ফংলি।

ঐনা থবক অসি মপুং ফানা লোইশিনবগী অপেনবা অদু উবা ফংলি। ঐগী ৱাখলদা অপেনবা অসিগী ৱাখল অসি চেন্নৈগী অখন্নবা মথেল ইদলী, দোসা, বরা-সম্বরদগী লাকপনি খল্লি। চেন্নৈ শহরগী মীথুংলেন ওকপীবগী মওং অসি থোইদোকপনি। ঐনা থাজৈ মদুদি মফম অসিদা তিনবীরিবা মীপুম খুদিংমক মরু ওইনা সিঙ্গাপুরদগী লাকপীরিবশিং শোইদনা চেন্নৈ শহরগী মীওক-মীচান অসিগী নুংঙাইবা লৌবীরমগনি।

মরূপশা, ঐনা হেকাথোনগী মাই পাক্লবশিংদা নুংঙাইবা ফোংদোকচরি। ঐনা মফম অসিদা পুল্লরিবা নহা ওইরিবা মরূপশিং, মরু ওইনা ঐখোয়গী মহৈরোই মরূপশিংদা নুংঙাইবা ফোংদোকচরি। তোঙান তোঙানবা শিংনবশিংগা মায়োক্নবা অমসুং মদুগী চপ চাবা পাম্বৈ পুথোক্নবগী অদোমগী অপাম্বা, অদোমগী থৌনা অমসুং অদোমগী পাঙ্গল অদু শুপ্নগী অথোই অহেন তান্নবা অমা থোইবা অদুদগী হেন্না মমল য়ামই।

ঐগী নহা ওইরিবা মরূপশিং, ঙসি মফম অসিদা ঐখোয়না সমস্যা কয়ামরুম লোইশিল্লে। ঐনা থোইদোক হেন্দোক্না কেমেরাগা মরি লৈনবা পাম্বৈশিং অদুনা হেন্না পামজৈ, মদুনা কনানা করি খল্লিবা/তৌরিবা অদু খঙবা ঙমহনগনি। হৌজিক করি ওইগনি, অদোম্না খঙই, ঐনা পর্লিয়ামেন্তা ঐগী স্পীকরদা মসিগী ৱারী তৌগনি অমসুং মসি মেম্বরশিংগীদমক্তা য়াম্না কান্নবা ওইগনি হায়না ঐনা খল্লি।

ঐগীদমক্তদি অদোম লোইনমক মাই পাক্লবা ঙাক্তনি। অদোম মসিগীদমক্তা মাই পাক্লবনি মদুদি, অদোম খুদোংথিবা মায়োক্নবদা পাখৎপা তৌদে। অদোম্না ফলগী খল্লুবা তৌদনা অদোম্না হোৎনরিবশিং অদুদা পুক্নীং লুপ্পি।

ঐনা ভারত-সিঙ্গাপুর হেকাথোন অসিবু থোইদোক্না মাই পাক্নবগীদমক্তা মথৌ তাবা মতেং পাংবীবগীদমক থৌরম অসিদা মরু ওইনা সিঙ্গাপুর সরকারগী মহৈ-মশিংগী মন্ত্রী শ্রী ওঙ্গ য়ে কুঙ্গ লোইননা নানয়াঙ্গ তেক্নিকেল য়ুনিভর্সিতী (এন.তি.য়ু.)বু থাগৎপা ফোংদোকচরি।

ভারতকী মাইকৈদগী হ্যুমেন রিসর্স দিবেলপমেন্ত মন্ত্রালয়গী ইনোবেসন সেল, আই.আই.তি মদ্রাস অমসুং ওল ইন্দিয়া কাউন্সিল ফোর তেক্নিকেল এজুকেসন্না ভারত-সিঙ্গাপুর হেকাথোন অসিবু তশেংনা মাই পাকহন্নবা শিংথানীংঙাই ওইরবা থৌদাং য়াখি।

মরূপশা,

করিগুম্বা থবক অমা হেক হৌরকপদগী পুক্নীংদা থুক লাওহনবা অমদি মাই পাকপা ওইবসু য়াওই।

ঐনা সিঙ্গাপুরগী হৌখিবা খোংচৎ মনুংদা অপুনবা হেকাথোন পাংথোক্নবগী ৱাখল্লোন অসি হৌদোকখি। হৌখিবা চহিদা মসি সিঙ্গাপুরদা লৈবা নানয়াঙ্গ তেক্নিকেল য়ুনিভর্সিতীদা পাংথোকখি। হন্দক্কী চহি অসিদা মসি আই.আই.তি. মদ্রাসগী পুৱারী ওইরবা অদুবু অনৌবা কেম্পস অসিদা পাংথোক্লি।

মরূপশা,

ঐঙোন্দা মসিসু হায়বীখি মদুদি হৌখিবা চহিদা হেকাথোন অসিগী ফোকস অসি অথোই অহেন তান্নবদা থমখি। চহি অসিদা তীম খুদিংমক্তা লৈবাক অনিমক্কী মহৈরোইশিং য়াওরি, মখোয়না সমস্যাশিং লোইশিন্নগীদমক মখোয় মশেল পুন্সিন্দুনা থবক তৌখি। মরম অদুনা মসি হায়বা য়াই মদুদি ঐখোয় অথোই অহেন তান্নবদগী মতেং পাংনবগী মাইকৈরোমদা ওনশিল্লে।

মসি লৈবাক অনিনা মায়োক্নরিবা অদুগুম্বা সমস্যাশিং অদুবু পুন্না লোইশিনমিন্নবগী মথৌ তাবা পাঙ্গল অদুনি।

মরূপশা,

অসিগুম্বা মখলগী হেকাথোন অসি নহারোলশিংগীদমক্তা তশেংনা কান্নবা মখল অমনি। মালেমগী ওইবা সমস্যাশিংগী পাম্বৈ পুথোক্নবগীদমক্তা শরুক য়ারিবশিংনা তশেংনা নৌবা তেক্নোলোজী ফাওবা শিজিন্নরি। মখোয়না থবক অসি অকক্নবা মতমগী মনুংদা তৌবা তাই।

শরুক য়ারিবশিংনা মখোয়গী ৱাখল্লোনশিং অমসুং মখোয়না খঙ-হৈবশিং অদু চাংয়েং তৌবা য়াই। ঐনা তশেংনা থাজৈ মদুদি ঙসগী হেকাথোন অসিদা পুথোকখিবা পাম্বৈশিং অসি লাক্কদৌরিবা হয়েংগীদমক স্তার্ত-অপকী আইদিয়ানি।

ভারত্তা ঐখোয় হৌখিবা চহি খরদগী স্মার্ত ইন্দিয়া হেকাথোন পাংথোক্তুনা লাক্লি।

মসিগী অনৌবা খোংথাং অসিনা সরকারগী বিভাগশিং, ইন্দস্ত্রীগা মরি লৈনবা মীয়াম অমসুং মকোক থোংবা ইন্সতিত্যুৎ পুম্নমক অমত্তা ওইনা পুনশিল্লি।

ঐখোয়না স্মার্ত ইন্দিয়া হেকাথোন অসিদগী অনৌবা ৱাখল্লোন্দা থবক পাইখৎনবা, ফন্দ তাশিন্নবা অমসুং লেমজিংনীংঙাই ওইবা পাম্বৈ পুথোক্নবা তাঞ্জা ফংলি অমসুং মদু ঐখোয়না স্তার্ত-অপতা হোংদোক্নবা হোৎনরি।

মসিদা থাজবা থম্লি মদুদি এন.তি.য়ু., এ.আই.সি.তি.ই. অমসুং এম.ঐচ.আর.দি.না অসিগুম্বা অপুনবা হেকাথোন অসিগী মনুংদা ফংলকপা তোঙান তোঙানবা আইদিয়াশিং অসিবু থবক্তা ওন্থোক্নবা ওইথোকপা য়াবশিং অদু পুন্না থিদোকমিন্নগনি।         

মরূপশা,

ঙসি ভারত অসি দোল্লর ত্রিলিয়ন মঙাগী ইকোনোমী ওইননবগীদমক মাংদা চংশিল্লি।

মসিদা ইনোবেসন অমসুং স্তার্ত-অপনা অচৌবা থৌদাং লৌগনি।

ভারত অসি হান্ননা মকোক থোংবা স্তার্ত-অপ ইকোসিস্তেম অহুমগী মনুংদা অমা ওইরবনি। হৌখিবা চহি মঙা অসিদা ঐখোয়না ইনোবেসন অমসুং ইনক্যুবেসন্দা ইনোৎ হাপ্ননবা অহেনবা শাফু পীরি।

অতল ইনোবেসন মিসন, পি.এম. রিসর্স ফেলোশিপ, স্তার্ত-অপ ইন্দিয়া অভিয়ানগুম্বা থৌরমশিং অসি ২১শুবা চহি চাগী ভারতকী য়ুম্বীনি, ইনোবেসনগী মনাৎতা ইনোৎ পীবা ভারত অমগী।

ঐখোয় হৌজিক চহি নৌরিঙৈ তরুকশুবা ক্লাস তমলিঙৈদগী মহৈরোইশিংদা মেচিন লর্নিং, আর্তিফিসিএল ইন্তেলিজেন্স অমসুং ব্লোকচেনগুম্বা য়াম্না নৌবা তেক্নোলোজীগী মতাংদা খঙহন্নবা হোৎনরি।

স্কুল্দগী হৌরগা অৱাংবা থাক্কী মহৈ-মশিংদা রিসর্স ফাওবা ইনোবেসনগীদমক্তা মতিক চাবা পাম্বৈ অমা ওইহনগদবা অসিগুম্বা ইকোসিস্তেম অমা শেমগৎলি।

মরূপশা,

ঐখোয়না মরম অনিদগী ইনোবেসন অমদি ইনক্যুবেসন্দা ইনোৎ হাপ্লি। অহানবা মরমদি ঐখোয়না ভারতকী সমস্যাশিং অসি লোইশিন্নবগীদমক অরাইবা পাম্বৈ পুথোকপনি, মসিনা অরাইবা পুন্সি ফংহনবা ঙমগনি। অনিসুবা মরম্না ভারত্তা লৈদুনা মালেম পুম্নমক্কীদমক্তা পাম্বৈ পুথোকপা পাম্মি।

‘মালেম অপুনবগীদমক ভারতকী ওইবা পাম্বৈ’ – মসি ঐখোয়গী পান্দম অমদি কমিৎমেন্তনি। ঐখোয়না খ্বাইদগী লাইরবা লৈবাক অদুনা ফাওবা কান্নবা ফংগদবা অসিগুম্বা অহোংবা পাম্বৈ পুথোকপা পাম্মি। ভারতকী অমত্তা ঙাইরবা পাম্বৈ অদু, লৈবাক অমা হেক্তদা লৈজরবসু খ্বাইদগী লাইরবা অমসুং খ্বাইদগী শোৎথহৌরবশিংগীদমক্তসু ওইগদবনি।

মরূপশা, ঐ মসিদা তশেংনা থাজবা থম্মি মদুদি তেক্নোলোজী অসিনা লৈবাক পুম্নমক, কন্তিনেন্ত পুম্নমক অসিবু অমত্তা ওইনা পুন্সিন্নহল্লি। ঐনা মন্ত্রী শ্রী ওঙ্গগী সজেসন অদুবু তরাম্না ওকচরি।

ঐনা থৌরম অসিদা এন.তি.য়ু., সিঙ্গাপুর সরকার অমসুং ভারত সরকারগী মতেংদগী মসিদা শরুক য়াবা পাম্বীবা এসিয়াগী লৈবাকশিংদা অসিগুম্বা মখলগী হেকাথোনশিং পাংথোক্নবা ৱাফম ফোংদোকচরি।

এসিয়া লৈবাক্কী খ্বাইদগী কোক লৈরবা মীওইশিংনা ‘গ্লোবেল ৱার্মিং অমসুং ক্লাইমেৎ চেঞ্জ’গী শাফু অসি হন্থহন্নবা অনৌবা পাম্বৈশিং পুথোক্নবা মখোয় মশেল তান্নগদবনি।

ঐগী ৱারোল অসি লোইশিঞ্জবগা লোইননা খোংথাং অসিবু অদুক্কী মতিক মাই পাকহনবগীদমক শরুক য়ারিবশিং অমসুং শিনবী-লাংবীরিবশিংগী মফমদা অমুক্কা হন্না নুংঙাইবা ফোংদোকচরি।

অদোমদা চেন্নৈদা লৈরি, মফম অসিগী কলচর অমসুং হেরিতেজ অসি অদুক্কী মতিক পাক চাউই অমসুং চিঞ্জাক অসি থোইদোক হেন্দোকপা ওই। ঐনা শরুক য়ারিবা পুম্নমক, মরু ওইনা সিঙ্গাপুরদগী লাকপীরিবা ঐগী মরূপশিংদা হায়জরি মদুদি চেন্নৈদা লৈবগী নুংঙাইবা অদু লৌবীয়ু। লৈবগী নুংঙাইবা অসি লৌবীদুনা অদোম নুঙগী হক-খোৎপা অমসুং নুঙগী লাইশঙগীদমক্তা মমিং চৎলবা মহাবলীপুরমগুম্বা তোঙান তোঙানবা লম কোইফমশিংদা শোইদনা চৎপীয়ু। মখোয় য়ুনেস্কোগী মালেমগী হেরিতেজ সাইৎ ওইনা খনগৎলবা মফমশিংনি।

থাগৎচরি! হন্না হন্না থাগৎচরি!