ভারতকী প্রধানমন্ত্রী

চাঞ্ছেল্লর দা. মর্কেল

জর্মন দেলিগেসনগী ইকাই খুম্নজরবা মিহুৎশিং

মন্ত্রীমন্দলদা ঐগী খোংলোই ওইরিবশিং,

মরূপশিং,

খুরুমজরি

গুতেন তেগ

চাঞ্ছেল্লর দা.মার্কেল অমসুং মাগী দেলিগেসনবু ভারত্তা তরাম্না ওকচবা অসিদা ঐহাক য়াম্না নুংঙাইবা ফাওজৈ। চাঞ্ছেল্লর মার্কেল অসি জর্মনী অমসুং য়ুরোপ খক্তা নত্তনা, মালেমগী মতম কুইনা সেবা তৌরক্লবা অথোইবা লুচীংবশিংগী মরক্তা শিংথানরি। ঐঙোন্দা চাউথোকচবা অমদি নুংঙাইবা পোকচৈ মদুদি মহাক অসি ভারতকী মাইকৈদগী ঐগী মরূপ ওইরি। চাউরাক্না হৌখিবা চহি তরাগী খুজিং তঙ্খাইদগী চাঞ্ছেল্লর অমা ওইনা মহাক্না ভারত-জর্মনীগী মরী অসিবু চেৎশিলহনবদা মরু ওইবা থৌদাং য়াবীরি। মসিগীদমক্তা ঐনা মহাক্কী মফমদা থাগৎপা ফোংদোকচরি। ঙসি ঐখোয়গী ইরক্তা ইন্তর গভর্মেন্তেল কন্সলতেশনগী ৫শুবা মীফম পাংথোকখি। চহি অনি খুদিংগী পাংথোকপা অসিগুম্বা মীফম অহুমদা চাঞ্ছেল্লর মার্কেলগা লোইননা শরুক য়ামিন্নবগী লাইবক ফবা ঐনা ফংজরে। মসিগী অমত্তা ঙাইরবা মেকানিজম অসিদগী লম খুদিংমক্তা ঐখোয়গী তেংবাংনবা অসি অমুক্কা হেন্না চেৎশিলহল্লে। ঙসি অসিগুম্বা য়ানৱারোলনচিংবদা খুয়েক পীনখিবা অদু ৱাফম অসিগী খুদম অমনি। ভারত অমসুং জর্মনীগী মরক্তা লম খুদিংমক্তা, মরু ওইনা ন্যু এন্দ এদভান্স তেক্নোলোজীদা তুং কোইগদবা অমদি স্ত্রাতেজিক কোওপরেসন মখা চৎথবা অসিদা ঐ য়াম্না নুংঙাইবা ফাওজৈ।

মরূপশা,

কুমজা ২০২২দা নীং খা তম্বা ভারত চহি ৭৫ শুরগনি। মতম অদু ফাওবগী মনুংদা ঐখোয়না ন্যু ইন্দিয়া শেমগৎনবগী পান্দম থম্লি। অসিগুম্বা মখল য়াম্বা হোৎনবা অসিগীদমক্তা ভারতকী মরু ওইবা অমসুং মথৌ তাবগীদমক্তা জর্মনীগুম্বা তেক্নোলোজিকেল অমসুং ইকোনোমিকেল পাৱর হাউসকী মতিক-মঙম অদু কান্নরক্কনি। মরম অসিনা, ঐখোয়না ন্যু এন্দ এদভান্স তেক্নোলোজী, আর্তিফিসিএল ইন্তিলিজেন্স স্কিল্স, মহৈ-মশিং, সাইবর সেক্যুরিতীগুম্বা লমশিংদা তেংবাং পীনবদা হেন্না শাফু পীরি।   
 ই-মোবিলিতী, ফুএল সেল তেক্নোলোজী, স্মার্ত সিতী, ইনলেন্দ ৱাতর ৱেজ, কোস্তেল মেনেজমেন্ত, তুরেলশিং শেংদোকপা অমসুং অকোইবগী ফিভম ঙাক-শেনবদা তেংবাং পীনবগী অনৌবা ওইথোকপশিং পুথোক্নবা ঐখোয়না ৱারেপ লৌরে। লমশিং অসিদা ঐখোনা তেংবাং পীনবা অসিনা ক্লাইমেৎ চেঞ্জগী মায়োক্তা শরুক য়ামিন্নরিবা থবকশিং অসিদসু মতেং ওইনগনি। ললোন-ইতিক অমসুং ইনবেস্তা হেনগৎলক্লিবা ঐখোয়গী পার্তনরশিপ অসিদা হেন্না খোংজেল য়াংশিলহন্নবা ঐখোয়না প্রাইবেৎ সেক্তরদা শৌগৎলি। চাঞ্ছেল্লর মার্কেল অমসুং ঐনা লৈবাক অনিগী মরু ওইবা বিজিনেস অমসুং ইন্দস্ত্রী লীদর খরগা উনগনি। ঐখোয়না জর্মনীদা হায়জরি মদুদি ঙাকশেলগী পোৎথোক্কী লমদা উত্তর প্রদেশ অমসুং তমিলনাদুদা দিফেন্স কোর্রিদোরশিংদা খুদোংচাবশিং লৌবীয়ু।

মরূপশা,

ভারত অমসুং জর্মনীগী থাজবা অমসুং মরূপ-মপাং ওইবগী মরী অসি, দেমোক্রেসী, রুল ওফ লোগুম্বা শরুক য়ামিন্নরিবা মগুনশিং অসিদা য়ুম্ফম ওইরি। মরম অসিনা, মালেমগী অরুবা শিংনবশিংগী মাইকৈদা ঐখোয়গী মিৎয়েং অসি মান্নৈ। তেরোরিজিম অমদি এক্সত্রিমিজমগুম্বা খুদোংথিবশিং অসিদগী নান্থোক্নবা ঐখোয়না বাইলেতরেল অমসুং মল্তিলেতরেল ওইবা তেংবাং অসি অমুক্কা হেন্না কনশিলহনগনি। এক্সপোর্ত কনত্রোল রেজিম্স অমসুং তোঙান তোঙানবা মালেমগী ওইবা ফম্বাকশিংদা ভারতনা মীহুৎ ওইবদা জর্মনীনা শৌগৎপীবগীদমক্তা ঐখোয়না লমন তোংশিল্লবনি। লৈবাক অনিমক্না সেক্যুরিতী কাউন্সিল, য়ুনাইতেদ নেসন অমসুং মালেমগী ওইবা থৌরাংদা অতৈ মরু ওইবা শেমদোকপশিং থুজিলহন্নবা তেংবাং পীনবা অমদি হোৎনবা মখা চৎথখিগনি।

এক্সিলেন্সী,

ভারত-জর্মনীগী মরী অসিগী তুংলমচৎ অসি ময়েক শেংই। মসিগীদমক ঐনা অমুক্কা হন্না অদোমগী হৈ-শিংলবা লুচীং অমসুং ঐখোয়গী তেংবাংলোই পুম্নমক্কী মমল য়াম্লবা মতেং অদুগীদমক থাগৎপা ফোংদোকচরি।

দাংকে চোএন

হন্না হন্না থাগৎচরি।