ପିଏମଇଣ୍ଡିଆ

ମହାମହିମ ରାଷ୍ଟ୍ରପତି ଗୋଟାବାୟା ରାଜପକ୍ଷ, ଶ୍ରୀଲଙ୍କା ଏବଂ ଭାରତର ବରିଷ୍ଠ ଅଧିକାରୀଗଣ,

ବନ୍ଧୁଗଣ,

ଆୟୁବୋବନ ।

ୱଣକମ୍ମ ।

ନମସ୍କାର ।

ରାଷ୍ଟ୍ରପତି ଗୋଟାବାୟା ରାଜପକ୍ଷ ଏବଂ ତାଙ୍କର ପ୍ରତିନିଧିମଣ୍ଡଳଙ୍କୁ ଭାରତକୁ ସ୍ୱାଗତ କରି ମୁଁ ଖୁବ୍ ଆନନ୍ଦ ଅନୁଭବ କରୁଛି । ନିର୍ବାଚନରେ ନିର୍ଣ୍ଣାୟକ ବିଜୟ ପାଇଁ ମୁଁ ରାଷ୍ଟ୍ରପତି ମହୋଦୟଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଉଛି । ନିର୍ବାଚନ ପ୍ରକ୍ରିୟା ସୂଚାରୁ ରୂପେ ସମ୍ପାଦନ ହେଲା, ଏଥିପାଇଁ ମୁଁ ଶ୍ରୀଲଙ୍କାର ଜନତାଙ୍କୁ ଶୁଭେଚ୍ଛା ଜଣାଉଛି । ଶ୍ରୀଲଙ୍କାରେ ଗଣତନ୍ତ୍ରର ସୁଦୃଢ଼ ଏବଂ ପରିପକ୍ୱ ହେବା ହେଉଛି ବହୁତ ଗର୍ବ ଏବଂ ଖୁସିର ବିଷୟ । ଏହା ଆମ ପାଇଁ ଏକ ସମ୍ମାନର କଥା କି ରାଷ୍ଟ୍ରପତି ରାଜପକ୍ଷ ନିଜର ପ୍ରଥମ ବିଦେଶ ଯାତ୍ରା ପାଇଁ ଭାରତକୁ ବାଛିଲେ ଆଉ କାର୍ଯ୍ୟଭାର ଗ୍ରହଣ କରିବାର ଦୁଇ ସପ୍ତାହ ଭିତରେ ହିଁ ଭାରତରେ ତାଙ୍କୁ ସମ୍ମାନିତ କରିବାର ସୁଯୋଗ ଦେଲେ । ଏହା ହେଉଛି ଭାରତ ଏବଂ ଶ୍ରୀଲଙ୍କାର ବନ୍ଧୁତ୍ୱପୁର୍ଣ୍ଣ ସମ୍ବନ୍ଧକୁ ସୁଦୃଢ଼ ଏବଂ ଗତିଶୀଳତାର ପ୍ରତୀକ । ଏହା ମଧ୍ୟ ହେଉଛି ଏହି କଥାର ସଙ୍କେତ ଯେ ଦୁଇ ଦେଶ ଏହି ସଂପର୍କକୁ କେତେ ଗୁରୁତ୍ୱ ଦେଉଛନ୍ତି । ଦୁଇ ଦେଶର ପ୍ରଗତୀ ଏବଂ ଆମର ଏହି ସମ୍ପୂର୍ଣ୍ଣ କ୍ଷେତ୍ରରେ ଶାନ୍ତି, ସମୃଦ୍ଧି ଏବଂ ସୁରକ୍ଷା ପାଇଁ ଆମେ ରାଷ୍ଟ୍ରପତି ରାଜପକ୍ଷଙ୍କ ସହିତ ଘନିଷ୍ଠ ଭାବେ କାର୍ଯ୍ୟ କରିବା ପାଇଁ ତତ୍ପର ଅଛୁ ।

ମହାମହିମ,

ଆପଣଙ୍କୁ ମିଳିଥିବା ଜନାଦେଶ ଏକ ସଂଗଠିତ, ସୁଦୃଢ଼ ଏବଂ ସମୃଦ୍ଧ ଶ୍ରୀଲଙ୍କା ପାଇଁ ସେଠାକାର ଲୋକଙ୍କର ଆଶା, ଆକାଂକ୍ଷାକୁ ଅଭିବ୍ୟକ୍ତ କରୁଛି । ଏହି ସମ୍ବନ୍ଧରେ ଭାରତର ଶୁଭେଚ୍ଛା ଏବଂ ସହଯୋଗ ସଦାସର୍ବଦା ଶ୍ରୀଲଙ୍କା ସହିତ ରହିଛି । ଏକ ସ୍ଥିର, ସୁରକ୍ଷିତ ଏବଂ ସମୃଦ୍ଧ ଶ୍ରୀଲଙ୍କା ନା କେବଳ ଭାରତର ହିତ ପାଇଁ, ବରଂ ସମ୍ପୂର୍ଣ୍ଣ ଭାରତ ମହାସାଗର ଅଞ୍ଚଳର ମଧ୍ୟ ହିତ ସାଧନ କରିବା ପାଇଁ ଉଦ୍ଦିଷ୍ଟ ।

ବନ୍ଧୁଗଣ,

ଭାରତ ହେଉଛି ଶ୍ରୀଲଙ୍କାର ସବୁଠାରୁ ନିକଟତମ ସାମୁଦ୍ରିକ ପଡୋଶୀ ଏବଂ ବିଶ୍ୱସ୍ତ ବନ୍ଧୁ । ଦୁଇ ଦେଶର ଘନିଷ୍ଠ ସମ୍ବନ୍ଧର ସୁଦୃଢ଼ ଆଧାର ହେଉଛି ଆମର ଐତିହାସିକ, ଜାତିଗତ, ଭାଷାଗତ, ସାଂସ୍କୃତିକ ଏବଂ ସଭ୍ୟତାଗତ ସମ୍ପର୍କ ।

ମୋ ସରକାରଙ୍କ ନୀତି ‘ପ୍ରଥମେ ପଡୋଶୀ’ ଏବଂ ସାଗର ସିଦ୍ଧାନ୍ତ ଅନୁରୂପ ଆମେ ଶ୍ରୀଲଙ୍କା ସହିତ ନିଜର ସମ୍ବନ୍ଧଙ୍କୁ ପ୍ରାଥମିକତା ଦେଉଛୁ । ଆମ ଉଭୟ ଦେଶର ସୁରକ୍ଷା ଓ ବିକାଶ ହେଉଛି ଅବିଭାଜ୍ୟ । ଏଥିପାଇଁ ଏହା ସ୍ୱାଭାବିକ ଯେ ଆମେ ଜଣେ ଅନ୍ୟଜଣଙ୍କର ସୁରକ୍ଷା ଏବଂ ସମ୍ବେଦନଶୀଳତା ପ୍ରତି ସଚେତନ ରହିବା ।

ଆଜି ରାଷ୍ଟ୍ରପତି ମହୋଦୟ ଏବଂ ମୋ ମଧ୍ୟରେ ଦ୍ୱିପାକ୍ଷିକ ସମ୍ପର୍କ ତଥା ପରସ୍ପର ହିତରେ ଅନ୍ତରାଷ୍ଟ୍ରୀୟ ପ୍ରସଙ୍ଗ ଉପରେ ବହୁତ ଭଲ ଏବଂ ଲାଭପ୍ରଦ ଆଲୋଚନା ହୋଇଛି । ଆମେ ନିଷ୍ପତ୍ତି ନେଇଛୁ କି ଦୁଇ ଦେଶ ମଧ୍ୟରେ ବହୁପକ୍ଷିୟ ସମ୍ପର୍କ ଏବଂ ସହଯୋଗକୁ ଆମେ ମିଳିମିଶି ଆହୁରି ସୁଦୃଢ଼ କରିବୁ । ମୁଁ ରାଷ୍ଟ୍ରପତି ମହୋଦୟଙ୍କୁ ଶ୍ରୀଲଙ୍କାର ବିକାଶରେ ଭାରତର ସହଯୋଗିତା ଓ ପ୍ରତିବଦ୍ଧତାର ଆଶ୍ୱାସନା ଦେଇଛି । ସବୁ ସମୟ ଭଳି ଏହି ସହଯୋଗ ଶ୍ରୀଲଙ୍କାର ଲୋକଙ୍କ ପ୍ରାଥମିକତା ଅନୁସାରେ ହେବ । 400 ମିଲିୟନ ଡଲାରର ଏକ ନୂଆ ଋଣ ମାଧ୍ୟମରେ ଶ୍ରୀଲଙ୍କାରେ ଭିତ୍ତିଭୂମି ଏବଂ ବିକାଶକୁ ଶକ୍ତି ମିଳିବ । ମୋର ବିଶ୍ୱାସ ଯେ ଶ୍ରୀଲଙ୍କାର ଅର୍ଥବ୍ୟବସ୍ଥାକୁ ଲାଭ ପହଞ୍ଚାଇବା ସହିତ ଏହି ଋଣ ଦୁଇ ଦେଶ ମଧ୍ୟରେ ପାରସ୍ପରିକ ଲାଭଜନକ ପ୍ରକଳ୍ପ ସହଯୋଗକୁ ମଧ୍ୟ ଗତିଶୀଳ କରାଇବ । ଆମେ ଖୁସି ଯେ ଭାରତୀୟ ଆବାସ ପ୍ରକଳ୍ପ ଅଧୀନରେ ଶ୍ରୀଲଙ୍କାର ଉତ୍ତର ଏବଂ ପୂର୍ବ ପ୍ରାନ୍ତରେ ମଧ୍ୟବର୍ତ୍ତି କାଳୀନ ବିସ୍ଥାପିତଙ୍କ ପାଇଁ 46000 ଘର ନିର୍ମାଣ ହୋଇ ସାରିଛି । ଦେଶର ପାହାଡିଆ ଅଞ୍ଚଳରେ ଭାରତରେ ଜନ୍ମିତ ତାମିଲ ଲୋକଙ୍କ ପାଇଁ 14000 ଘରର ନିର୍ମାଣ କାର୍ଯ୍ୟରେ ମଧ୍ୟ ଭଲ ପ୍ରଗତୀ ହୋଇଛି । ମୁଁ ଏହି କଥା ପାଇଁ ଆନନ୍ଦିତ ଯେ ଆମେ ଶ୍ରୀଲଙ୍କାରେ ସୌର ପ୍ରକଳ୍ପ ପାଇଁ ପ୍ରଥମେ ଘୋଷଣା କରିଥିବା 100 ମିଲିୟନ ଋଣକୁ ଶୀଘ୍ର ଉପଯୋଗ କରିବା ପାଇଁ ସହମତ ହୋଇଛୁ । ଭାରତ ଦ୍ୱାରା ଶ୍ରୀଲଙ୍କାରେ ଶିକ୍ଷା ଏବଂ ଭିତ୍ତିଭୂମି କ୍ଷେତ୍ରରେ ଅନୁଦାନ ଆଧାରରେ ମଞ୍ଜୁର ହୋଇଥିବା 20ଟି ଗୋଷ୍ଠୀ ବିକାଶ ପ୍ରକଳ୍ପ ଏବଂ ଅନ୍ୟ ଜନ କଲ୍ୟାଣକାରୀ ପ୍ରକଳ୍ପ ସମ୍ପର୍କରେ ମଧ୍ୟ ରାଷ୍ଟ୍ରପତି ମହୋଦୟ ଏବଂ ମୋ ମଧ୍ୟରେ ଆଲୋଚନା ହୋଇଛି ।

ବନ୍ଧୁଗଣ,

ଭାରତ ସଦା ସର୍ବଦା ପ୍ରତ୍ୟେକ ରୂପରେ ଆତଙ୍କବାଦର ବିରୋଧ କରିଛି । ଆଉ ସୀମାରେ ଆତଙ୍କବାଦ ସହିତ ଅନ୍ୟ ପ୍ରକାରର ଆତଙ୍କବାଦ ବିରୁଦ୍ଧରେ ଅନ୍ତରାଷ୍ଟ୍ରୀୟ ସମୁଦାୟଙ୍କଠାରୁ କାର୍ଯ୍ୟାନୁଷ୍ଠାନର ଆଶା ମଧ୍ୟ କରିଛି । ଚଳିତ ବର୍ଷ ଇଷ୍ଟର ଅବସରରେ ଶ୍ରୀଲଙ୍କାରେ ଆତଙ୍କବାଦୀମାନେ ସମଗ୍ର ମାନବଜାତିର ବିବିଧତା ଏବଂ ସହଜୀବନର ମୂଲ୍ୟାୟନ ପରମ୍ପରା ଉପରେ ନୃଶଂସ ପ୍ରହାର କଲେ । ଆତଙ୍କୀ ଏବଂ ଚରମପନ୍ଥୀ ଶକ୍ତି ବିରୁଦ୍ଧରେ ଶ୍ରୀଲଙ୍କାର ଲଢ଼େଇରେ ଭାରତର ଅଟଳ ସମର୍ଥନକୁ ବ୍ୟକ୍ତ କରିବା ପାଇଁ ନିର୍ବାଚନର ତୁରନ୍ତ ପରେ ଶ୍ରୀଲଙ୍କା ଗସ୍ତ କରିଥିଲି । ପାରସ୍ପରିକ ସୁରକ୍ଷା ପାଇଁ ଏବଂ ଆତଙ୍କବାଦ ବିରୁଦ୍ଧରେ ପାରସ୍ପରିକ ସହଯୋଗକୁ ଆହୁରି ସୁଦୃଢ଼ କରିବା ନେଇ ମୁଁ ରାଷ୍ଟ୍ରପତି ରାଜପକ୍ଷଙ୍କ ସହିତ ବିସ୍ତୃତ ଭାବେ ଆଲୋଚନା କରିଛି । ପ୍ରମୁଖ ଭାରତୀୟ ସଂସ୍ଥାନରେ ଶ୍ରୀଲଙ୍କାର ପୁଲିସ ଅଧିକାରୀ ଆତଙ୍କବାଦର ମୁକାବିଲା ପ୍ରଶିକ୍ଷଣର ଲାଭ ପ୍ରଥମରୁ ହିଁ ପ୍ରାପ୍ତ କରୁଛନ୍ତି । ଆତଙ୍କବାଦର ମୁକାବିଲା ପାଇଁ ଶ୍ରୀଲଙ୍କାକୁ 50 ମିଲିୟନ ଡଲାରର ଏକ ସ୍ୱତନ୍ତ୍ର ଋଣ ଘୋଷଣା କରି ମୁଁ ବହୁତ ଖୁସି ହେଉଛି ।

ବନ୍ଧୁଗଣ,

ମତ୍ସ୍ୟଜୀବୀଙ୍କ ଜୀବନ ଜୀବିକାକୁ ପ୍ରଭାବିତ କରୁଥିବା ପ୍ରସଙ୍ଗ ଉପରେ ମଧ୍ୟ ଆଲୋଚନା କରିଛୁ । ଆମ ମଧ୍ୟରେ ସହମତି ରହିଛି କି ଆମେ ଏହି ପ୍ରସଙ୍ଗରେ ରଚନାତ୍ମକ ଏବଂ ମାନବୀୟ ଦୃଷ୍ଟିକୋଣ ଜାରି ରଖିବୁ ।

ବନ୍ଧୁଗଣ,

ଆମେ ଶ୍ରୀଲଙ୍କାରେ ପୁନର୍ଗଠନ ବିଷୟ ଉପରେ ମଧ୍ୟ ରଖିଥିବା ବିଚାରଧାରାଗୁଡ଼ିକ ଉପରେ ଖୋଲାଖୋଲି ଭାବେ ମତ ବିନିମୟ କରିଛୁ । ରାଷ୍ଟ୍ରପତି ରାଜପକ୍ଷ ଜାତିଗତ ସାମଞ୍ଜସ୍ୟ ଉପରେ ତାଙ୍କର ସମାବେଶୀ ରାଜନୈତିକ ଦୃଷ୍ଟିକୋଣ ବିଷୟରେ ମୋତେ ଜଣାଇଛନ୍ତି । ମୋର ବିଶ୍ୱାସ ରହିଛି କି ଶ୍ରୀଲଙ୍କା ସରକାର ତାମିଲମାନଙ୍କର ସମାନତା, ନ୍ୟାୟ, ଶାନ୍ତି ଏବଂ ସମ୍ମାନର ଆକାଂକ୍ଷାଗୁଡ଼ିକୁ ପୂରଣ କରିବା ଓ ପୁନର୍ଗଠନ କରିବା ପ୍ରକ୍ରିୟାକୁ ଆଗକୁ ବଢ଼ାଇବେ । ଏଥିରେ 13ତମ ସଂଶୋଧନକୁ ଲାଗୁ କରିବା ମଧ୍ୟ ସାମିଲ ଅଛି । ଉତ୍ତର ଏବଂ ପୂର୍ବ ସମେତ ସଂପୂର୍ଣ୍ଣ ଶ୍ରୀଲଙ୍କାରେ ବିକାଶ ପାଇଁ ଭାରତ ଏକ ବିଶ୍ୱସ୍ତନୀୟ ଭାଗୀଦାର ହେବ ।

ବନ୍ଧୁଗଣ,

ମୁଁ ପୁଣି ଥରେ ରାଷ୍ଟ୍ରପତି ରାଜପକ୍ଷଙ୍କୁ ଭାରତରେ ସ୍ୱାଗତ କରୁଛି । ତାଙ୍କର ଯାତ୍ରା ଦ୍ୱାରା ଆମର ପାରସ୍ପରିକ ସମ୍ପର୍କକୁ ଆହୁରି ଶକ୍ତି ମିଳିବ । ଆଉ ଆମର ସହଯୋଗ ଦୁଇ ଦେଶରେ ବିକାଶ ଏବଂ କ୍ଷେତ୍ରରେ ସମୃଦ୍ଧି, ଶାନ୍ତି ଏବଂ ସ୍ଥିରତାକୁ ପ୍ରୋତ୍ସାହନ ଦେବ ।

ବୋହୋମା-ସ୍ଥୁତି ।

ନନ୍ଦ୍ରୀ ।

ଧନ୍ୟବାଦ ।

**************