ভারতকী প্রধানমন্ত্রী

শ্রী চন্দ্র শেখর

নভেম্বর ১০, ১৯৯০ – জুন ২১, ১৯৯১ | জনতা দল (এস)

শ্রী চন্দ্র শেখর

শ্রী চন্দ্র শেখর ১৯২৭ কী এপ্রিল ১৭ উত্তর প্রদেশকী বলিয়া জিলাদা লৈবা ইব্রাহিমপত্তী খুঙ্গংগী লৌমী ইমুং অমদা পোকখি। মহাক ১৯৭৭ দগী ১৯৮৮ ফাওবা জনতা পার্তীগী প্রসিদেন্ত ওইখি।

শ্রী চন্দ্র শেখর মহাক্কী মহৈরোই ওইরিঙৈ মতমদগী রাজনীতিদা পুক্নীং চংলকখি অমসুং য়াওল্লোইগী অচেৎপা ৱাখল্লোন অদুগীদমক শিংথানখি। ইলাহাবাদ য়ুনিবর্সিতী (১৯৫০ – ৫১) দগী পোলিতিকেল সাইন্সতা মাস্তর দিগ্রী ফংলবা মতুংদা মহাক্না সোসিএলিস্ত মুবমেন্তা শরুক য়াখি। মহাক আচার্য নরেন্দ্র দেবগা য়াম্না নকশিন্ননা লৈমিন্নবগী খুদোংচাবা ফংখি। মহাক বলিয়াগী দিস্ত্রিক্ত প্রজা সোসিএলিস্ত পার্তীগী সেত্রেতরী খনখি। চহি অমগী মনুংদা মহাক উত্তর প্রদেশকী স্তেৎ প্রজা সোসিএলিস্ত পার্তীগী জোইন্ত সেক্রেতরী খনখি। ১৯৫৫ – ৫৬তা মহাক উত্তর প্রদেশকী স্তেৎ প্রজা সোসিএলিস্ত পার্তীগী জেনরেল সেক্রেতরী ওইনা থৌ পুখি।

১৯৬২দা মহাক উত্তর প্রদেশতগী রাজ্য সভাগীদমক খনখি। মহাক ১৯৬৫গী জনুৱারীদা ইন্দিয়ন নেস্নেল কোংগ্রেসতা য়াওখি। ১৯৬৭তা মহাকপু কোংগ্রেস পার্লিয়ামেন্তরী পার্তীগী জেনরেল সেক্রেতরী খনখি। এম পি অমা ওইনা মহাক্না দলিতশিংগীদমক্তা থবক তৌবা হৌখি অমসুং খুন্নাইদা খোংজেল য়াংনা অহোংবা পুরক্নবগীদমক পোলিসীশিং শেম্বদা হেন্না পুক্নীং চংখি। মসিগী মতাংদা মহাক্না খুন্নাইগী য়াইতোং-খোমদোংবশিংগী অরানবা থৌওংশিংনা হেনগৎলক্লিবা মোনোপোলীগী মায়োক্তা লাওরুবগীদমক সরকার পাইরিবশিংগগী মরক্তা মহাক্কা মুক্নবা ওইখি।

মহাক ৱাশক চেৎপা, মথৌনা লৈবা অমসুং পুকশেল শেংবগা লোইননা মশাগী ওইজবা থিবগী মায়োক্তা লান্থেংনখিবা ‘য়ং তর্ক’ লুচিংবা অমা ওইনা চোংথোরকখি। মহাক্না ১৯৬৯দা চয়োলগী চেফোং ‘য়ং ইন্দিয়ন’ গী ফাউন্দর অমসুং এদিতর ওইদুনা দিল্লীদগী ফোংখি। মসিগী এদিতোরিয়েল অসি মতমদুগী খ্বাইদগী ফজবা অমসুং মগুন লৈবশিংগী মনুংদা অমা ওইখি। ইমার্জেন্সী (১৯৭৭ – ১৯৭৫)গী মতমদা ‘য়ং ইন্দিয়ন’ ফোংবা লেপখি। ফেব্রুৱারী ১৯৮৯দগী মসি অমুক হন্না চাং নাইনা ফোংবা হৌখি। মহাক্না মসিগী এদিতোরিয়েল এদভাইজরী বোর্দকী চিয়রমেন ওইখি।

শ্রী চন্দ্র শেখরনা মতম পুম্নমক্তা পার্সোনোলিতিজ পোলিতিক্সকী মায়োক্তা লৈখি অমসুং আইদোলোজী অমসুং অহোংবা খুন্নাইগী পোলিতিক্সতা শৌগৎখি। ৱাখল্লোন অসিনা মহাকপু ১৯৭৩ – ৭৫গী তংদু লৈতাদবা মতমদা শ্রী জয় প্রকাস নরায়ণ অমসুং মহাক্কী আইদিএলিস্তকী ৱাখল্লোন চেনবা পুন্সিগী মাইকৈদা হেন্না পুশিল্লকখি। মসিনা মরম ওইদুনা মহাক য়াম্না থুনা কোংগ্রেস পার্তীগী মরক্তা পেন্নদবগী মরম অমা ওইরকখি।

১৯৭৫গী জুন ২৫দা ইমার্জেন্সী লাওথোকখিবা মতমদা মেন্তিনেন্স ওফ ইন্তর্নেল সেক্যুরিতী এক্তকী মখাদা মহাকপু ফাখি মতমদুদা মহাক ইন্দিয়ন নেস্নেল কোংগ্রেসকী মকোক থোংবা লুপ, সেন্ত্রেল ইলেক্সন কমিতীগী মেম্বর ওইখি।

শ্রী চন্দ্র শেখর অসি ইমার্জেন্সীগী মতমদা সরকার পাইবা পার্তীগী মরক্তগী জেল চংখিবা মীওই খরগী মনুংদা অমনি।

মহাক্না মতম পুম্নমক্তা পৱারগী পোলিতিক্সকী মায়োক্তা লৈরম্মি অমসুং দেমোক্রেতিক্কী ভেল্যুশিং লোইননা অহোংবা খুন্নাইগী মফমদা থম্বা কমিৎমেন্তকী পোলিতিক্সতা হেন্না পুক্নীং চংলম্মি।

ইমার্জেন্সী মনুংদা জেলদা লৈখিবা মতমদুদা মহাক্না হিন্দীদা দাইরী অমা ইখি মদু কোন্না ‘ঐগী জেল দাইরী’ হায়না মমিং থোন্দুনা ফোংখি। ‘দাইনামিক্স ওফ সোসিএল চেঞ্জ’ মহাক্কী খুৎইগী মমিং চৎলবা খোমজিনবনি।

শ্রী চন্দ্র শেখরনা ১৯৮৩গী জনুৱারী ৬তগী ১৯৮৩গী জুন ২৫ ফাওবা খাগী কন্যাকুমারীদগী নই দিল্লীদা লৈবা রাজঘাৎ (মহাত্মা গান্ধীগী মংফম) ফাওবা চাওরাক্না কিলোমিতর ৪২৬০গী মারাথোন ৱাল্ক (খোংনা চৎপা) অমা পাংথোকখি। মহাক্কী খোংচৎ অসিগী অমত্তা ঙাইরবা পান্দমদি – মীয়ামগী উন্নবা অমসুং মখোয়গী মরুওইবা সমস্যাশিংবু খঙদোকপনি।

মহীক্না সোসিএল অমসুং পোলিতিকেল ৱার্করশিং ত্রেনীং পীননবগী পান্দমদা কেরলা, তমিলনাদু, কর্নাতক, মহারাষ্ট্রা, মধ্য প্রদেশ, গুজরাৎ, উত্তর প্রদেশ অমসুং হরিয়াণা য়াওনা তোঙান তোঙানবা মফমশিংদা লৈবাক অসিগী শোত্থহৌরবা মফমশিংগী মীয়াম্বু মহৈ মশিং তাকপী তম্বীনবা অমসুং গ্রাসরুত্তা থবক তৌবা ঙম্ননবা চাওরাক্না ভারত য়াত্রা সেন্তর ১৫ হাংদোকখি।

১৯৮৮দগী ৮৯ ফাওবগী চাওরাকপা মতম অসি য়াওদনা ১৯৬২দগী মহাক এম পি ওইরকখি। ১৯৮৯দা মহাক্না মাগী মরমদম বলিয়া অমসুং বিহারগী মহারাজগঞ্জ কোন্সতিতুএন্সিদগী মীখল থেংনখি অমসুং মীখল অনিমক মাই পাকখি। কোন্না মহাক্না মহারাজগঞ্জ সিৎ থাদোকখি।

শ্রী চন্দ্র শেখরনা শ্রীমতী দূজা দেবীগা লুহোংখি অমসুং মখোয়গী মচা নুপা অনী পোকখি – পঙ্কজ অমসুং নীরজ।