ভারতকী প্রধানমন্ত্রী

মন্ত্রীমন্দলদা ঐহাক্কী মরূপলোই শ্রী রাজনাথ সিংহজী, শ্রী গজেন্দ্র শেখাৱৎজী, অতোপ্পা শক্নাইরবশিং অমসুং মফম অসিদা তিনবীরিবা পুকচেল চাউরবা অমসুং পুকচেল চাউরবীশিং!

লৈবাক পুম্বগী তোঙান তোঙানবা কমন সর্বিস সন্তরশিংদগী লাকপীরিবা মীওই লিশিং কয়া, অখন্না খুঙ্গংশিংগী পঞ্চ–সরপঞ্চশিংসু মতম অসিদা ঐখোয়গা শম্নরি।

মসিদা নত্তনা হিমাচল প্রদেশকী মনালীদা মফম অদুগী মুখ্য মন্ত্রী শ্রী জয়রাম থাকুরজী, ফোরেস্ত মিনিস্তর শ্রী গোবিন্দ সিংহ থাকুরজী, পার্লিয়ামেন্তরিয়ান রাম স্বরুপ শর্মজীসু তেক্নোলোজীগী খুত্থাংদা থৌরম অসিদা ঐখোয়গা লোয়নরি।

মখোয়গা লোয়ননা অতলজীগী নুংশিরবা খুঙ্গংদগীসু মীওই খরা শম্নরি।

ঐহাক্না ময়াম পুম্নমকপুসু তরাম্না ওকচরি, তৌবিমল খঙবা উৎচরি।

ঙসি ফম্বাকথক অসিদগী অহানবা মক্তদা ঐহাক্না লৈবাক মীয়াম্বু, মালেম পুম্ববু, খৃস্তমাসকী য়াইফ পাউজেল পীজরি।

মেরী খৃস্তমাস!!!

ঙসি ভারতকী রত্ন অনি, ঐখোয় পুম্নমক্কী নুংশিজরবা অতলজী অমসুং অথোইবা মদন মোহন মালবীয়জীগী মপোক নুমীৎসুনি।

ঐহাক্না মখোয়গী মফমদা খুরুমজরি, লৈবাক মীয়ামগী মায়কৈদগী ইকায় খুম্নবা উৎচরি।

প্রীনিদা ঙসি অতলজীবু নিংশিংলদুনা হৱন তৌরি, অতোপ্পা থৌরমশিংসু পাংথোক্লি হায়না ইফমদা খঙনবিরে।

মরূপশিং,

ঙসি লৈবাক অসিগীদমক য়াম্না মরুওইবা অচৌবা প্রোজেক্ত অমা অতলজীগী মিংদা কত্থোক্লি।

হিমাচল প্রদেশপু লদাখ অমসুং জম্মু কাশ্মিরগা শম্নহল্লিবা, মনালীবু লেহগা শম্নহল্লিবা, রোহতাং তনেল, হৌজিক্তি অতল তনেলগী মিংদা খঙনরগনি।

হিমাচলগী মীয়াম্বু, প্রীনিগী মীয়াম্বু মসি সরকারগী মায়কৈদগী অতলজীগী মপোক নুমীৎতা তমজবা অপিকপা খুদোল অমনি।

তনেল অসিগী মরুওইবা অদু খঙবিখিবা অমসুং মসি শেম্নবা লম্বী য়াৎপীখিবা অদু অতলজী মশামক্নি।

অতলজীগী মিংদা তনেল অসিগী মমিং থোনলিবা, হিমাচলগীদমক মহাক্না পুক্নিং চংবিরম্বা অমসুং অতলজীবু অদোম ময়াম্না ইকায় খুম্নবিরিবা অমসুং নুংশিবিরিবা অদুগীসু খুদম্নি।

মরূপশিং,

ঈশিংগী হিরম অসি অতলজীগীদমক য়াম্না মরুওইখি, মহাক্কী থম্মোয়গা য়াম্না নক্নখি।

ঈশিংদা মহাক্না য়েংখিবা মীৎয়েং অদু ঙসিসু ঐখোয়বু পুক্নিং থৌগৎপীরি।

অতল জল য়োজনা ওইগেরা নত্রগা জলজীবন মিসনগা মরী লৈনবা গাইদলাইন ওইগেরা, মসিনা ২০২৪ ফাওবদা লৈবাক্কী য়ুমথোং পুম্নমক্তা ঈশিং য়ৌহন্নবা হোৎনরিবা অদু মপুং ফাহনবদা অচৌবা খোংথাং অমনি।

মরূপশিং,

য়ুম, লৌবুক অমসুং ইন্দস্ত্রী, পুম্নমক অসিবু এফেক্ত তৌরিবা অসি ঈশিং অসিনি।

অদুগা ঐখোয়গী লমদম অসিদা ৱাতর রিসোর্সকী করি ফিভম লৈবগে হায়বদু পুম্নমক্না খঙনবা ৱাফম্নি।

ঈশিংগী অৱাবা অসি ইমুং অমা ওইনা, নাগরিক অমা ওইনা ঐখোয়গীদমক চিন্তাগী ৱাফম ওইবগা লোয়ননা লৈবাক অমগী দিবেলপমেন্তদসু এফেক্ত তৌই।

ন্যু ইন্দিয়াদা ঐখোয়না ঈশিংগী অৱাবা ফিভম খুদিংমক্তগী থেংননবা থৌরাং তৌবনি।

মসিগীদমক ঐখোয়না থাক মঙাদা অমত্তা ওইনা থবক তৌরি।

অহানবা– ঈশিংগা মরী লৈনবা বিভাগশিংদা ঐখোয়না মখোয়গী সিলোশিং থুগায়রে।

অনিশুবা– ভারতকুম্বা দাইভর্স ওইবা লৈবাক্তা ঐখোয়না লমদম খুদিংমক্কী গ্রাউন্দগী ফিভম য়েংলগা প্রোজেক্তশিং লেপথোকপদা পুক্নিং চংলে।

অহুমশুবা– ফংলিবা ঈশিং অদু মতিক চানা য়োক্তুনা থম্বা অমসুং য়েন্থোকপদা পুক্নিং চংলে।

মরিশুবা– ঈশিংগী ইরিক অমমম শিজিন্ননবা, ঈশিংগী রিসাইকল তৌনবা, স্কিমশিংদা প্রায়োরিতী পীরে, অমসুং

মঙাশুবদা– খ্বাইদগী মরু ওইবা– এৱার্নেস অমসুং মীয়াম্না শরুক য়াবনি।

মরূপশিং,

মীখলগী মমাংদা ঐখোয়না ঈশিংগীদমক কত্থোক্লবা জলশক্তি মন্ত্রালয় অমগী ৱাফম থমখিবা মতমদা, করম্বা মখলগী ৱাশক্নো হায়না মীওই খরনা খন্নখি।

অদুবু মীওই খরখক্না ৱাফম অসিদা পুক্নিং চংখি মদুদি মসি করিগীদমক দরকার ওইরিবনো।

মরূপশিং,

চহী কয়াদগী ঐখোয়গী লমদম অসিদা ঈশিংগা মরী লৈনবা হিরম, রিসোর্সশিং ওইগেরা, কঞ্জার্বেসন ওইগেরা, মেনেজমেন্ত ওইগেরা, তোঙান–তোঙানবা ওপরেসন অমসুং থবকশিং অদু তোঙান–তোঙানবা বিভাগশিং অমসুং মন্ত্রালয়শিংদা লৈরম্মি।

মসিনা মরম ওইরগা রাজ্য অমসুং কেন্দ্র সরকারগী মরক্তা, কেন্দ্র লরকারগী তোঙান তোঙানবা মন্ত্রালয়শিংগী মরক্তা, তোঙান তোঙানবা বিভাগশিং অমসুং মন্ত্রালয়শিংগী মরক্তা য়াম্না তোয়না চিন্দাননা খৎনরম্মি, অৱাবা খরা নত্রগা খরিদি মায়োক্নরম্মি।

মসিনা মাংজরিবসি করিনো হায়বদা ঈশিংগুম্লবা য়াম্না মরুওইবা অসিগীদমক হোলিস্তিক এপ্রোচ লৈফম থোকপা অদু মমাংগী সরকারশিংগী মতমদা লৈবা ঙমখিদে।

জল শক্তি মন্ত্রালয়না অসিগুম্লবা কম্পার্তমেন্তেলাইজ এপ্রোচতগী ঈশিংবু মপান্দা পুথোক্লে অমসুং কমপ্রেহেন্সিব এপ্রোচতা ইনোৎ পীরে।

হন্দক্কী মুনসুন অসিদা ঐখোয়না উবা ফংলে মদুদি সমাজকী মায়কৈদগী, জল শক্তিগী মায়কৈদগী ঈশিং য়োক্তুনা থম্নবগীদমক কয়া য়াম্না কন্না হোৎনখি।

মরূপশিং,

স্কিম অসিনা মহারাস্ত্র, হরিয়ানা, কর্নাতকা, রাজস্থান, উত্তর প্রদেশ, মধ্য প্রদেশ অমসুং গুজরাত, রাজ্য তরেৎ অসিগী গ্রাউন্দ ৱাতরবু মথক্তা পুখৎলকপদা মতেং য়াম্না ফংলগনি।

রাজ্য তরেৎ অসিগী জিলা ৭৮দা, গ্রাম পঞ্চায়ৎ ৮,৩০০ হেনবদা গ্রাউন্দ ৱাতরগী থাক অৱাবা ফিভমদা লৈরি।

চৈথেং অদু মফম অদুগী মীওইশিংনা করম্না খঙলিবা হায়বদু, হৌজিক ঐখোয়গা লোয়ননা লাইব কনেক্ত তৌরিবা মরূপশিংনা ফজনা খঙলবা ৱাফম্নি।

লমদমশিং অসিগী লৌমীশিংগী, শা–শন লোইরিবশিংগী, অপিক অপিকপা ইন্তরপ্রিনরশিংগী, মফমশিং অদুগী নুপীশিংগী অৱাবা অদু পুম্নমক্না খঙনরবা ঙাক্তনি।

মরূপশিং,

মীয়াম্না অৱাবা অসিদগী কোক্ননবা, ঈশিংগী থাক ফগৎলক্নবা, মসিগীদমক ঐখোয়না এৱার্নেস কেম্পেন পাংথোকপা তাই, আর্তিফিসিয়েল ইন্তেলিজেন্স, ইন্তরনেত ওফ থিংস অমসুং দরকার ওইবা দাতাবু শম্নহনবা তাই।

অদুগা খ্বাইদগী মরুওইবা ৱাফম্না, ঐখোয়না ৱাতর কঞ্জার্বেসন অমসুং প্রমোসন্দা ইথিল পীদুনা ঈশিংগী ইরিক অমমমবু মতিক চানা শিজিন্নহনবা তাই।

মতৌ করম্না মসি ওইথোক্কনি?

তীম অসিবু কনানা লুচিংগনি?

ওফিসর, এম্প্লোই, ব্যুরোক্রেত?

নত্তে।

মসিগীদমক ঐখোয়না ঈশিং শিজিন্নরিবা, ঈশিংগী অৱাবা মায়োক্নরিবা মীওইশিং অদু ফাওবা য়ৌনা চৎপা তাই, মীওইশিং অদুবু শম্নহনবা তাই।

মসিগীদমক ঐখোয়না য়ুমশিংগী য়ুম্বুরেম্বী ওইরিবা অদুগুম্লবা ইমাশিং–ইচে–ইচেশিংগী মনাক্তা চৎপা তাই। য়ুমশিংদা দরকারগী মতুং ইন্না ঈশিং শিজিন্নবা, ওইথোকপা য়াবা মখৈ রিসাইকলগী থবক তৌবা, দিসিপ্লিন অসি ইমুংগী মনুংদা পুরকপা তাই।

মসিগীদমক ঐখোয়না লৌমীশিংগী মফমদসু চৎপা তাই।

ঐখোয়গী লৌবুকশিং গ্রাউন্দ ৱাতরগী ইরিগেসনগী মপাল য়াম্না তাংলি।

অদুবু মসিমসু অচুম্বনি মদুদি ঐখোয়গী লীরবা ইরিগেসনগী মওং–মতৌশিংনা ঈশিং য়াম্না মাংহল তাকহল্লি।

মসিগী মখক্তা চু ওইগেরা, ফৌ ওইগেরা, ইশিং য়াম্না দরকার ওইবা পোত্থোকশিংসু লৈরি।

অসিগুম্বা মখলগী পোত্থোকশিং পুথোকপা মফমশিংদা গ্রাউন্দ ৱাতরগী থাক খোংজেল য়াংনা হন্থরকপা ঐখোয়না থেংনরি।

ফিভম অসি অহোংবা পুরক্নবগীদমক ঐখোয়না লৌমীশিংবু নোংগী ঈশিং য়োকশিন্দুনা থম্নবগীদমক, অতোপ্পা মহৈ–মরোংশিংগী মরমদা খঙনবা তাই, য়ারিবা মখৈ মাইক্রো ইরিগেসনগী মায়কৈদা চংশিনবা তাই, ঐখোয়না পর দ্রোপ মোর ক্রোপপু পুক্নিং থৌগৎপা তাই।

মরূপশিং,

ঐখোয়না ইমুং মনুংগীদমক চাদিং তৌবা মতমদা ইশাগী শেন্থোক অমসুং বেঙ্ক বেলেন্সসু য়েংই, ইশাগী ওইবা বজেৎ শেমই। মতৌ অসুম্না ঈশিং য়াম্না লৈতবা মফমদা, মফম অদুগী খুঙ্গংগী মীওইশিংবু ৱাতর বজেৎ শেম্নবগীদমক, মদুগী মতুং ইন্না মহৈ মরোং থানবগীদমক ঐখোয়না ইথিল পীবা তাই।

অদোম্না অফবা থবক তৌরিবা মখৈ, খুঙ্গংশিং য়াইফগনি, গ্রাম পঞ্চায়ৎশিংসু অফবা ওইগনি।

অতল জল য়োজনাদা মসিগীদমকসু প্রোভিজন য়াওরি মদুদি ঈশিংগীদমক হেন্না ফবা থবক তৌবা গ্রাম পঞ্চায়ৎশিংদা হেন্না ফবা থবক তৌবা ঙম্নবগীদমক অহেনবা শেফম পীগনি।

ঐহাক্কী সর্পঞ্চ ইচিল–ইনাও অমসুং ইচে–ইচলশিং,

অদোমগী হোৎনজমন, অদোমগী থৌদাং অদু লৈবাক অসিগী য়ুমথোং খুদিংদা ঈশিং য়ৌহন্নবগীদমক মরু ওই।

ঐহাক্না অতল জল য়োজনাগা মরী লৈনরিবা সর্পঞ্চ ৮,৩০০ মক্তা হায়জনিংলিবদি অদোমগী মায় পাকপা অদুনা অতল জল য়োজনা খক্তা মায় পাকহনবা নত্তনা জলজীবন মিশনবুসু হেন্না ফগৎহল্লগনি।

মতৌ করম্না?

মসি অদোম্না খঙজিনবসু য়াম্না দরকার ওই।

মসি লৈবাক অসিগী নাগরিক খুদিংমক্নসু খঙজিনবা দরকার ওই।

মরূপশিং,

খুঙ্গংগী য়ুমথোং কোতি ১৮গী মনুংদা শুপ্নতগী য়ুমথোং কোতি ৩ খক্তদা।

চহী ৭০ অসিদা মসি খক্তমক ওইথোকপা ঙমখি।

হৌজিক ঐখোয়না মথংগী চহী মঙাদা য়ুমথোং কোতি ১৫দা থক্নবা অফবা ঈশিং পাইপনা য়ৌহনগনি।

মসিগীদমক মথংগী চহী মঙাদা কেন্দ্র অমসুং রাজ্য সরকারশিংনা পুল্লগা লুপা কোতি লাখ অহুম মখায় হেন্না চাদিং তৌগদৌরি।

মরূপশিং,

ঐখোয়গী সরকারনা হোৎনিবা অসি জলজীবন মিশনদা খুঙ্গং অয়াম্বগী মীওইশিংবু অধিকার ফংহনবা, মখোয়বু সেল্ফ–সফিসিয়েন্ত ওইহনবনি।

মিশন অসিগীদমর খুঙ্গং খুদিংদা অখন্নবা কমিতী শেমগনি, খুঙ্গংগী থাক্তা এক্সন প্লান শেমগনি। ঐহাক্না ময়ামদা হায়জনিংবদি কমিতী অসিদা য়ামদ্রবদা চাদা ৫০দি খুঙ্গংগী ইচে–ইচলশিং ওইগেরা ইচানুপীশিং ওইগেরা শরুক য়াবা অদুনি।

মসিদা নত্তনা, অরুবা ঈশিং লাকপ্রা নত্রগা লাকতব্রা, মসি য়েংশিন্নবগীদমক খুঙ্গংগী মীওইশিং, মফম অদুগী ইচা নুপা–নুপীশিংবু ত্রেনিং ফংহনগনি।

মতৌ অসুম্না, কৌশল বিকাস য়োজনাগী খুত্থাংদা য়াম্না পাক চাউনা খুঙ্গংগী নহাশিংবু ফিতর, প্লম্বর, ইলেক্ত্রিসিয়ান, মিস্ত্রী, অসিগুম্বা তোঙান তোঙানবা থবকশিংগী ত্রেনিং পীগনি।

মরূপশিং,

জলজীবন মিশনগী মনুংদা অনৌবা থবকশিং পায়খৎলি। প্রোজেক্ত অসি মোনিতর তৌনবগীদমক স্পেসতেক্নোলোজী অমসুং আর্তিফিসিএল ইন্তেলিজেন্স অনিমক শিজিন্নরি।

খুঙ্গং খুদিংমক্তা ঈশিং কয়া য়াম্না স্তোর তৌরিগে, চাদিং কয়া য়াম্না তৌরিবগে, ঈশিগী ফিভমগী মতাংদা ইনফোর্মেশন পুম্নমক লেপ্পা লৈতনা মোনিতর তৌগনি।

মরূপশিং,

ঙসি ঐহাক্না তঞ্জা অসিদা মালেম পুম্বদা খুন্দারিবা ভারত মচাশিংদা হায়জরি মদুদি অদোমসু অসিগুম্লবা শেংলবা কেম্পেন অসিদা শরুক য়াবিয়ু।

ঙসি ঐহাক্না ফম্বাকথক অসিদগী, খুঙ্গংদা লৈরিবা ঐখোয়গী ইচিল–ইনাও অমসুং ইচে–ইচলশিংগী মফমদসু হায়জরি মদুদি, মখোয়সু ঈশিংবু য়োক্তুনা থম্নবগীদমক, ঈশিং য়েন্থোকপগী থৌওংদা শরুক য়ানবগীদমক, ঈশিংগী রিসাইক্লিংগীদমক মাংলোমদা থোকপীরক্লো।

অদোম্না অদোমগী মতম পীবিয়ু, অদোমগী লেবর পীবিয়ু। অদোম্না খোংথাং অমা থাংবা মতমদা সরকারনা খোংথাং ৯ থাংগনি।

লাকপীরো, অমত্তা ওইনা, লেংমান্ননা চৎমিন্নদুনা, লৈবাক অসিগী মীচম প্রজাবু অফবা ঈশিংগী অধিকারগা শম্নহনবদা ইশাগী থৌদাং লৌবিরো।

অদোম্না হোৎনরিবা, অদোমগী মায় পাকপা, লৈবাক অসিগী ৱাতর সেক্যুরিতীগীদমক য়াম্না মরু ওইরি।

অতল জল য়োজনাগীদমক, জলজীবন মিশনগীদমক অমুক হন্না লৈবাক মীয়াম পুম্নমকপু য়াইফ পাউজেল পীজরি।

হন্না–হন্না থাগৎচরি!!!