ভারতকী প্রধানমন্ত্রী

ভুতানগী প্রধানমন্ত্রী শেরিংগ তোবগে,

অসমগী রাজ্যপাল প্রোফেসর জগদীশ মুখী,

মুখ্যমন্ত্রী শ্রী সর্বানন্দ সোনোৱাল,

মলেমগী মফম কয়াদগী অমসুং অখন্ননা আসিয়ান লৈবাকশিংগী মীহুৎশিং,

লৈবাক্কী মফম কয়াদগী লেংবিরক্লিবা শক্নাইরবশিং অমসুং মফম অসিদা তিনবীরিবা পুম্নমকপু,

আজি এই হোন-মিলোনত উপোস্থিত আপোনা-লোক হোকোলোকে মোই আন্তোরিক হুভেসা গ্যাপোন কোরিসোন ।

লোগোতে ওখোমোর হোমুহো রাইজো-লোই মোর গোভীর শ্রোধা গ্যাপোন কোরিসো ।

গ্লোবেল ইনভেস্তর্স সমিৎতা ময়াম পুম্নমকপু ঐহাক্না তরাম্না ওকচরি ।

সমিৎ অসিদা ময়াম পুম্নমক্না শরুক য়ারিবা অসিনা মতৌ করম্না অসমনা খুমাং চাওশিন্না চৎলিবগে হায়বা অদু উৎলরে । মরু ওইনা অথোইবা মীথুংলেন প্রধানমন্ত্রী তোবগেনা শরুক য়ারিবা অসিনা ভারত অমসুং ভুতানগী তৎন-থানবা য়াদ্রবা মরুপ ওইবগী মরি অদু উৎলরে ।

মরূপশিং,

ঐখোয়না এক্ত ইস্ত পোলিসী শেম্লে অমসুং অৱাং নোংপোক্না মসিগী থৱাই ওইরি । এক্ত ইস্ত পোলিসীনা ভারতকী নোংপোক্তা লৈরিবা লমদশিং অখন্ননা আসিয়ান লৈবাকশিংগা লোয়ননা পীপল তু পীপল কন্তেক্ত, ললোন ইতিক্কী মরী, অমসুং অতোপ্পা মরীশিং হেঙ্গৎহনবা মথৌ তাই । “এদভান্তেজ অসম: ইন্দিয়াস এক্সপ্রেস ৱে তু আসিয়ান” অসি ৱাহৈ পরেং অমা নত্তে মসি পাক চাওরবা মীৎয়েং অমনি । ইকুই কুইদ্রিঙৈদা ঐখোয়না ঐখোয়গী পার্তনরশিপকী চহি ২৫ শুরকপগী আসিয়ান ইন্দিয়া সমিৎ পাংথোকখ্রে ।

আসিয়ান-ইন্দিয়া পার্তনরশিপ অসি চহি ২৫ শুরবা য়াই অদুবু লৈবাকশিং অসিগা ঐখোয়গা লৈনরিবা মরি অসি চহি লিশিং কয়াগী মমাংদগীনি । নই দিল্লিদা পাংথোকখিবা ঐখোয়গী রিপব্লিক নুমীৎ থৌরমদা আসিয়ান লৈবাক ১০গী লুচিংবশিংবু অখন্নবা মীথুংলেন ওইনা তরাম্না ওকপা ফংজখিবা অদু ভারতকী লাইবক ফবনি ।

হন্দক্তা বঙ্গলাদেশনা গুৱাহাতীদা কোন্সুলেত অমা হাংদোক্তুনা অসিগুম্বা মখলগী খোংথাং পায়খৎপা অহানবা লৈবাক ওইরে । ঙরাং রোয়েল গবর্নমেন্ত ওফ ভুতান্না গুৱাহাতীদা ভুতানগী কোন্সুলেত অমা হাংদোক্লে তাবদা ঐহাক নুঙাইবা ফাওই ।

ইচল ইচে অমসুং ইচিল ইনাওশিং,

অৱাং নোংপোক লমদমদা তংদু লৈতাবা অমসুং অথুবা মতমদা চাওখৎপা পুরকপনা ভারতকী চাওখৎপগী খোংঞ্জেল হেঙ্গৎহল্লগনি । ইম্ফালদগী গুৱাহাতী ফাওবা অমসুং কোলকাতাদগী পতনা ফাওবা নোংপোক ভারত অসিদা ভারতকী অনৌবা ইনর্জী সেন্তর অমা শেমগৎপা মথৌ তাই হায়না ঐহাক্না খল্লি । মসিমক ঐখোয়না য়েংলিবা মীৎয়েং অদুনি, মসিমক ঐখোয়না হোৎনরিবা অদুনি ।

মীৎয়েং অসিগী মখাদা হৌখিবা চহি অহুম মখায় অসিদা কেন্দ্র সরকারগী মায়কৈদগী, অমসুং হৌখিবা চহি অমা মখায়দগী অসম সরকারগী মায়কৈদগী হোৎনখিবশিং অদুগী মহৈ অদু হৌজিক অফবা মওংদা উবা হৌরক্লে ।

মরূপশিং,

ঙসি লৈবাক অসিদা লম্বীশিং শেমগৎ শাগৎপগী থবক খোংজেল য়াংনা চত্থরি, রেল লাইন শেম্বগী থবকশু খোংজেল য়াংনা চত্থরি, রেল লাইন্দা মৈ ফংহনবগী থবকশু খোংলৈ থুনা চত্থরি ।

ইচল ইচে অমসুং ইচিল ইনাওশিং,

ঐখোয়না স্কিম পুম্নমক লাইরবা, লৱার মিদল ক্লাস অমসুং মিদল ক্লাসকী পুন্সিদা মগুণ লৈনা অহোংবা পুরক্নবগী মায়কৈরোমদা শিজিন্নরি । ঐখোয়না স্কিমশিংবু মীয়ামগী চংদবা য়াদ্রবশিং অদুগা শম্নহল্লি । অদুগুম্লবা মখলগী স্কিমশিং মদুনা মখোয়গী পুন্সি মহিং লাইথোকহন্দুনা ইজ ওফ লিভিং হেঙ্গৎহল্লি । সরকারনা বজেত্তা আয়ুস্মান ভারত য়োজনা লাওথোকখিবা অদু ময়াম্না খংবিরম্লগনি । অসিগুম্বা মখলগী স্কিমদা মসিনা মালেমদা খ্বাইদগী চাওবা ওইরি ।

মরূপশিং,

অনংবা ইমুংদগী হৌরকপা মীওই, লৈত লাইরবগী চৈথেং ফংলবা মীওই অদুতনা মতম পুম্নমক্তা অনা লায়েংবগী চাওরবা চৈথেং অদু খংবা ঙম্মী । কনাগুম্বা মীওই অমা অরুবা লৈনা নারকপা মতমদা ইমুং অদুগী মীপুম খুদিংমক মতম শাংনা শেল থুমগী অৱাবদগী নানথোকপা ঙমদে ।

লাইরবশিংবু অৱাবা অসিদগী ঙাকথোক্নবা ঐখোয়না লৈবাক অসিগী ইমুং কোতী ১০ হেনববু আয়ুস্মান ভারতকা শম্নহল্লগনি । স্কিম অসিগী মখাদা লাইরবা ইমুং খুদিংমকপু অখন্নবা হোস্পিতালশিংদা চহিগী ওইনা লুপা লাখ ৫ ফাওবগী লেম্না লায়েংবগী খুদোংচাবা ফংহল্লগনি, স্কিম অসিনা চাওরাক্না লৈবাক অসিগী মীওই কোতী ৪৫দগী ৫০ ফাওবদা কান্নবা ফংহল্লগনি । স্কিম অসিনা মরম ওইরগা তিয়র-২ অমসুং তিয়র-৩ সিতিজদা হোস্পিতালগী চেন শেম্বগী ওইথোকপা হেঙ্গৎহল্লে । নহাশিংগীদমক মসিনা শোয়দবা শেন্থোক লম্বী ওইরগনি ।

মসিনা মরম ওইরগা ভারতকী মনুং হঞ্জিনবা মফমশিংদা শেল থাদনবগী অচৌবা তঞ্জা অমা পিরগনি । অনৌবা হোস্পিতালশিং শেমগৎ শাগৎনবা পোলিসীশিং শেম্নবা ঐহাক্না রাজ্য সরকারশিংদা হায়জরি । আয়ুস্মান ভারত্তা নত্তনা সরকার অসিনা মসিগী অতোপ্পা স্কিম অনি অমগী মখাদা হকশেলগা মরি লৈনবা পোৎলুমশিং য়াম্না হন্থহল্লে । সরকার অসিনা প্রধানমন্ত্রী সুরক্ষা বীমা য়োজনা অমসুং জীবন জ্যোতি য়োজনাগী মতেংনা লৈবাক অসিগী লাইরবা কোতী ১৮ হেনববু কোনশিল্লে । মখোয়বু অচৌবা পোৎলুমদগী ফ্রী ওইহল্লে ।

মসিদা নত্তনা, জন ঔষধি কেন্দ্র লিশিং ৩দা অহোংবা মমলদা হিদাক মখল ৮০০ হেন্না য়োলহনবা, স্তেতকী মমলদা চাদা ৮৫ তাথবা, খুউ ইমপ্লান্ত তৌবগী মমল লাকশিনবা, অসিনচিংবা তোঙান তোঙানবা থবকশিং সরকার অসিনা পাংথোক্লি, মদুনা মিদল ক্লাসশিংদশু চাওনা খুদোং চাবা ফংহল্লে ।

মরূপশিং,

আসিয়ান লৈবাকশিং ওইগেরা, বঙ্গলাদেশ-ভুতান-নেপাল ওইগেরা, ঐখোয় পুম্নমক লৌউ শিংউবা লমদমশিংনি । লৌমীশিংগী ফিভম ফগৎহনবনা লমদমশিং অসি চাওখৎপগী অনৌবা থাক অমদা য়ৌহনবা ঙমগনি । মরম অদুনা ঐখোয়গী সরকারনা লৈবাক অসিগী লৌমীশিংগী শেন্থোক শরুক অনি ওইহন্নবা পান্দমদা থবক তৌরি । পান্দম অসি ফংনবগীদমক লৌউবদা চংবা লৌমীশিংগী চাদিং হন্থহন্নবা অমসুং মখোয়গী পোৎথোকশিং অদুগী মতিক চাবা মমল ফংহন্নবা সরকারনা থবক পায়খৎলি, চহি অসিদা সরকারনা এগ্রীকলচর অমসুং খুঙ্গংগী সেক্তরদা লুপা কোতী লাখ ১৪ হেন্না চাদিং তৌগদৌরি । ঐহাক্না নুমীৎ নীনী মমাংদা লৌমীশিংবু মখোয়গী পোত্থোক অদুগী মতিক চাবা মমল ফংহন্নবা অতোপ্পা ৱারেপ অমসু লাওথোকখ্রে । মসিগী মনুং চন্না লৌমীশিংবু মখোয়গী মহৈ মরোংশিং অদুগী মমল য়ামদ্রবদা চাদা ৫০ হায়বদি শরুক অমা মখায় হেঙ্গৎলগনি । মসিগী মথক্তা সরকার অসিনা খুঙ্গংগী কৈথেল লিশিং ২২বু গ্রামীন এগ্রীকলচর মার্কেতকী থাক্তা পুখৎলগনি অমসুং মখোয়শিং অদু ই-নাম হায়বদি ইলেক্ত্রোনিক নেস্নেল এগ্রীকলচর মার্কেত প্লেতফোর্মগা শম্নহল্লগনি ।

ইচল ইচে অমসুং ইচিল ইনাওশিং,

হপ্তা খরগী মমাংদা ঐখোয়না মরুওইবা ৱারেপ খরা লৌখ্রে । ঙসি ঐহোক্না অৱাং নোংপোক লমদম অসিদা লৈরিঙৈ তঞ্জা অসিদা ৱারেপ অদুগী মতাংদা নৈনবা পাম্মী ।

মরূপশিং,

সাইন্তিফিক ওইনা ৱা অসি নাপীগী কাংলুপ্তা চল্লি । অদুবু চহি ৯০রোমগী মমাদা চৎন পথাপ শেমলম্বশিং অদুনা মসিবু উগী কাংলুপ্তা চিংহল্লমী । মদুনা মরম ওইরগা মফম অমা হেক্তদা হৌবা ৱা অদু য়ানবদা, মদু পুথোক পুশিন তৌবদা, পর্মিত মথৌ তারম্মী, অয়াবা লৌবা তারম্মী । আইন অসিনা খ্বাইদগী শোকহল্লিবা অসি অৱাং নোংপোক লমদম্নি হায়না ঐহাক্না খল্লি । নিং তম্বা ফংখিবা চহি কয়া হৌখ্রে, সরকার কয়া অমা লাকখ্রে, চৎখ্রে, অদুবু ৱাবু উগী কাংলুপ্তগী তোঙান তাহন্দুনা লৈবাক্কী লৌমীশিং, ত্রাইবেলশিংদা কান্নবা ফংহনবগী থবক অসি ঐখোয়গী সরকার অসিনা পাংথোক্লি ।

হৌজিক্তি ঐখোয়না চাওরাক্না লুপা কোতী ১৩০০ থাদদুনা নেস্নেল বেম্বু মিশন অমুক হন্না শেমগৎ শাগৎলে । অৱাং নোংপোক্কী মীওইশিং, অখন্ননা মফম অসিগী লৌমীশিংবু বজেতকী খুথাংদা কান্নবা অমগা ফংলগনি ।

ইচল ইচে অমসুং ইচিল ইনাওশিং,

ঐখোয়গী লমদমদা লৌ উনবগীদমক লোন লৌবা অরাইবা অমা ওইরি, অদুবু লৌউবগা মরি লৈনবা অতোপ্পা পাম্বৈশিং লৈরি খুদম ওইনা ঙা য়োকপা, হয়িংখোই লোইবা, শা শণ লোইবা অসিনবশিং অসিগীদমক লোন লৌবদা লৌমীশিংদা খুদোং চাদবা মায়োক্নরম্মী । হৌজিক্তি ঐখোয়না লুপা কোতী লিশিং তরা থাদদুনা অখন্ননা ফিশরীজ অমসুং এনীমেল হসবেন্দরিদা মীৎয়েং থম্দুনা ইনফ্রাস্ত্রকচর ফন্দ অনি কায়থোক্নবা ৱারেপ লৌরে । কিসান ক্রেদিত কার্দ শিজিন্নদুনা লোন লৌবগী লম্বীশু লাইথোকহল্লে । সরকার অসিনা এফোর্দেবল হাউজিংগী লমদশু অচুম্বা ৱারেপ লৌরে, শেমদোক্লে, মদুনা লৈবাক অসিগী লাইরবা পুম্নমক্তা য়ুম ফংহন্নবা সরকারগী পান্দম অদু মপুং ফাহনবদা মতেং ওইরগনি । প্রধানমন্ত্রী আৱাস য়োজনাগী মখাদা হৌখিবা চহি অহুম অসিদা চাওরাক্না য়ুম কোতী অমা শাখ্রে । হন্দক্তা ঐখোয়না বজেত্তা লাওথোকপা লৈখ্রে মদুদি চহি অসিগা লোয়ন লোয়ননা মথংগী চহিদশু অনৌবা য়ুম লাখ ৫১ শারগনি । লো মিদল ক্লাস অমসুং মিদল ক্লাসকী খুদোংচাদবশিং অদু খংলদুনা সরকারনা ক্লাস অসিগী মনুং চনবা কাংলুপ্তা শেন্দোয় য়াম্না হন্থহল্লে । এফোর্দেবল হাউজিংগী লমদা হৌখিবা নুমীৎশিংদা শেল য়াম্না থাদখি ।

ইচল ইচে অমসুং ইচিল ইনাওশিং,

সরকারগী স্কিম অমনা মতৌ করম্না ইনর্জীদা অওনবা পুরক্লিবগে, মতৌ করম্না মিদল ক্লাস কাংবুদা চাওনা কান্নবা ফংহল্লিবগে, মদুগী ময়েক লারবা খুদম্নি উজালা য়োজনা । মমাংগী সরকারগী মতমদা লুপা চহুম য়াঙ্খৈদা য়োনখিবা এলইদি বল্ব অদু হৌজিক লুপা ৪০দগী ৪৫ ফাওবদা ফংলে । এলইদি বল্ব ৫ থানবা ইমুং অমনা থা অমদা মৈগী বিল য়ামদ্রবদা লুপা ৪০০দগী ৫০০ ফাওবা কনবা ঙম্লে । হৌজিক ফাওবদা উজালা য়োজনাগী মখাদা লৈবাক অসিদা এলইদি বল্ব কোতী ২৮ য়েন্থোকখ্রে । মসিনা মরম ওইদুনা লৈবাক অসিগী অয়াম্বা মিদল ক্লাসকী মীয়ামদা চহি খুদিংগী মৈগী বিল চাওরাক্না কোতী লিশিং ১৫ কনবা ঙম্লে । আসিয়ান লৈবাকশিংদশু এলইদি বল্ব য়াম্না পাম্নরক্লি, মসি ভারতকী ত্রেদর্সকীদমক মতাং চাবা তঞ্জা অমনি ।

মরূপশিং,

পান্দম অমগী মখাদা থবক মপুং ফানা পাংথোকপা অসি সরকার অসিগী ৱার্ক কলচরনি । অসমগী মীয়াম্না ৱাফম অসি খংই মদুদি মতৌ করম্না ধোলা সাদিয়া থোং অদু ঐহাক্না শঙ্গাখিবগে হায়বা, করিগুম্বা মদু হান্নগী খোংচৎ অদুদা চৎলমলগদি ঙসি ফাওবা শাবা লোয়খিরোই । মতৌ অসুম্না লাইরবা নুপীশিংবু শীংগী মৈখুদগী কোকহন্নবা উজ্জৱলা য়োজনাশু পীখিবা মতমগী মমাংদা লোইশইহন্নবা চংশিল্লি । ঐখোয়গী পান্দমদি ২০১৯ ফাওবদা লাইরবা ইমুংগী নুপী কোতী মঙাদা লেম্না গ্যাস কনেক্সন ফংহনবনি । হৌজিক ফাওবদা স্কিম অসিগী খুত্থাংদা নুপী কোতী ৩ লাখ ৩০ হেন্বদা কান্নবা ফংহনখ্রে । হৌজিক বজেত অসিদা ঐখোয়না উজ্জৱলা য়োজনাগী মখাদা নুপী কোতী ৮দা লেম্না গ্যাস কনেক্সন ফংহল্লগনি ।

মরূপশিং,

ইং ২০১৪ মমাংগী চহি তরা অদুদা ঐখোয়গী নহাশিংগী এস্পিরেসনবু মতৌ করম্না উশিন্নখিদবগে হায়বা অদু কৈদৌনুংদা কাওবা য়াররোই । লৈবাক্কী নহাশিংনা পাম্লিবদি মখোয় মশানা করিগুম্বা খরা তৌবা অদুনি । অদুবু মখোয়না বেঙ্কতগী লোন লৌগে হায়রুবদা বেঙ্কনা গরেন্তী পুথোক্নবা হায়রম্মী । মুদ্রা য়োজনাগী খুত্থাংদা বেঙ্ক গরেন্তী পীবগী অৱাবা অদু কোকহল্লে । স্কিম অসিনা হৌখিবা চহি অহুম অসিদা অনৌবা এন্তরপ্রিনর কোতী অহুম পুথোক্লে । মখোয়না মশাগী থবক হৌদোক্লদুনা মশানা মশাবু থবক পীজরে । চহি অসিগী বজেত্তা সরকারনা মুদ্রা য়োজনাগী মতেংনা মশানা মশাবু থবক পিজনবা লুপা কোতী লাখ ৩গী লোন পিথনবা পান্দম থম্লি । মসিগী মথক্তা স্তেন্দ অপ ইন্দিয়া, স্তার্ত অপ ইন্দিয়া, স্কিল ইন্দিয়া মিশনগী খুত্থাংদগীশু নহাশিংবু মতিক চাহন্নবা থবক সরকার অসিনা পায়খৎলি ।

মরূপশিং!

এমএসএমই সেক্তর চাওখৎহনবা অসি ঐখোয়গী তৌদবা য়াদবা অমনি । মসি ঐখোয়গী ইন্দস্ত্রীশিংগী য়াংলেন শরুনি । চহি অসিগী বজেত্তা ঐখোয়না এমএসএমইদা য়াম্না চাওনা কোমথোক্লে । লুপা কোতী ২৫০ ফাওবগী তর্ন-ওভর রিপোর্ত তৌরকপা কম্পেনিশিংদা ইনকম তেক্সকী রেত চাদা ২৫ হন্থহল্লে । মসিনা কম্পেনি চাদা ৯৯দা কান্নবা ফংহল্লগনি ।

মরূপশিং!

হৌখিবা চহি অহুম অসিদা কেন্দ্র সরকারনা ইকোনোমীক রিফোর্মশিংগী থবক কয়া অমা পায়খৎলে, মদুনা প্রদুসরশিংবু ললোন ইতিক তৌবদা লাইথোকহল্লে । রিফোর্মশিং অদুগী মহৈ ওইনা ঙসিদি ৱার্ল্দ বেঙ্ককী দুইং বিজিনেস রিপোর্ত্তা লৈবাক ১৯০গী মনুংদা ১০০ শুবদা লৈরে, হন্নদগী মফম ৪২ হায়গৎলে । ৱার্ল্দ ইকোনোমীক ফোরমগী গ্লোবেল কম্পিতিতিব-নেস ইন্দেক্সগুম্বা অতোপ্পা রেত্তিংশিংদা ভারতকী থাক অসি য়াম্না হায়গৎলে । অৱাং নোংপোক রাজ্যশিংগী মরক্তা ইজ ওফ দুইং বিজিনেসতা অসমনা অহান্বা মফমদা লৈরি তাবদা ঐহাক নুঙাইবা ফাওই । ঙসি ঐখোয়না মীৎয়েং থম্লিবসি ইনফ্রাস্ত্রকচর ইনভেস্তমেন্তদনি অমসুং মথং চহিদা সেক্তর অসিদা ঐখোয়না চাওরাক্না কোতী লাখ ৬ ইনভেস্ত তৌগনি । চহি অসিদা ঐখোয়না কিলোমিতর ৯,০০০ হেনবা নেস্নেল হাইৱেশিং শেম্বা লোইশিন্নবা পান্দম থম্লি । ভারতমালা প্রোজেক্তকী মখাদা লুপা কোতী লাখ ৫.৩৫গী ইনভেস্তমেন্তকা লোয়ননা কিলোমিতর ৩৫,০০০গী লম্বী শেমগৎ শাগৎলগনি । ইং ২০১৮-১৯দা  রেলৱেজদা লুপা কোতী লাখ ১.৪৮ ইনভেস্ত তৌগনি । ঐখোয়গী পান্দম অসি লাক্কদৌরিবা চহি খরা অসিদা মরুওইবা রেলৱে স্তেসন ৬০০পু নৌনা শেমগৎ শাগৎপনি ।

মরূপশিং,

ঙসি ঐহাক অতোপ্পা হিরম অমগী মতাংদশু হায়জগে । লমদম অসিগী অথোইবা মপারী, ভুপেন হজারিকানা চহি ১৩ শুরকপদা মতমদা মহাক্না শৈরেং অমা ইরম্মী । মতম অদু অংগ্রেজশিংনা শাসন তৌরিবা মতম্নি, লমদম অসি, লৈবাক অপুম্বা মীনাই য়োৎহিং থাংলিবা মতম্নি । মতম অদুদা লৈখিদ্রবা ভুপেন হজারিকানা ইরম্মী-

ওগ্রীজুগৌ ফিরিনগৌতী মোই

নোতুন আখম গৌধীম

হরবৌহারার হর্বস্ব

পুনৌর ফিরাই আনীম

নোতুন আখম গৌধীম

হায়বদি- “মৈতালগুম্না চাক্লিবা য়ুগ অসিদা,

ঐহাক মৈরিক অমগুম্বনি ।

ঐহাক্না অনৌবা অসম অমা শেমগৎকনি ।

তাথি তাওইবিরবা, হন্না য়েংবিদ্রবশিং অদুনা মাংজরিবা অদু অমুক হন্না পুদুনা লাকখিগনি ।

ঐহাক্না অনৌবা অসম অমা শেমগৎকনি ।”

নি তম্বা ফংদ্রিঙৈ মমাংদা লৈবাক্কী তোঙন তোঙানবা মফমশিংদা থৌনা ফরবা লাখ কোতী কয়ানা মংবিরম্বা মঙলান অদু মপুং ফাহনবা অসি ঐখোয় পুম্নমক্কী তৌফম থোকপনি । তৌফম থোকপা অসি মপুং ফানা পাংথোক্নবা ঐখোয় পুম্নমক্না ২০২২ ফাওবদা অনৌবা ভারতকী মঙলান অদু মংফাওহন্নবা ৱারেপ লৌরে ।

সংকল্প সে সিদ্ধিগী খোংচৎতা অৱাং নোংপোক মীয়ামগী চংদবা য়াদবশিং অদু য়েংলদুনা, মখোয়গী মথৌ তারিবশিং অদু খংলদুনা, স্কিমশিং শেম শারি অমসুং মদুবু চৎনহল্লি । ঐহাক্না থাজবা থম্মী মদুদি অৱাং নোংপোক্কী রাজ্য ৮ অসি লৈবাক্কী দিব্লপমেন্তকীদমক গ্রাথ ইঞ্জিন্নি অমদি মসিগী খোংজেল য়াংখৎহনবা হায়বসি লৈবাক্কী দিব্লপমেন্তকী খোংজেল য়াংখৎহনবনি ।

মরম অদুনা ঐখোয়গী সরকারনা অৱাং নোংপোক্তা ত্রান্সফোর্মেশন বাই ত্রান্সপোর্তেশনগী থৌওং অদুদা থবক পাংথোক্লি । ইনফ্রাস্ত্রকচরদা শেল থাদরিবা অসিনা লমদমশিং অসিগী মওং মতৌ হোংহনবগী থবক তৌরি । হৌখিবা চহি অহুম অসিদা অৱাং নোংপোক্তা রেলৱে খক্তদা চাওরাক্না লুপা কোতী ৫,৩০০ চহি খুদিংগী ওইনা চদিং তৌখ্রে । চাওরাক্না লুপা কোতী লিশিং ৪৭ চংনা অৱাং নোংপোক্তা অনৌবা রেল লাইন ১৫দা থবক তৌরি ।

লাক্কদৌরিবা নুমীৎ খরা অসিদা অগরতলা-অখৌরা রেলগী থবক হেক লোইবগা ত্রিপুরা-বংগ্লাদেশকী মরক্তা রেল শম্নহল্লগনি, মদুগী কান্নবা অদু রিজন অপুম্বনা ফংলগনি ।

চাওরাক্না লুপা কোতী লিশিং ৩৩ চংনা অৱাং নোংপোক্তা নেস্নেল হাইৱে কিলোমীতর লিশিং ৪ শেমগৎনবা অয়াবা পীখ্রে । মসিগী মথক্তা লাক্কদৌরিবা চহি অনি অহুম অসিদা লুপা কোতী লিশিং ৯০ চংনা অৱাং নোংপোক্তা লম্বী অমসুং নেস্নেল হাইৱেশিং শেমগৎলগনি ।

ইচল ইচে অমসুং ইচিল ইনাওশিং,

প্রধানমন্ত্রী গ্রামীন সরক য়োজনা অসি অতলজীগী মতমদা হৌখিবনি । হান্নদি মসি ২০২২ ফাওবদা লোইশিন্নবা লেপ্নখিবনি, অদুবু ঐখোয়না মসিগী মতম তেনশিন্দুনা ২০১৯ ফাওবদা লোইশিন্নবা ৱারেপ লৌরে । মসি খক্তা নত্তে, প্রধানমন্ত্রী গ্রামীন সরক য়োজনাগী মখাদা খুঙ্গংশিং শম্নহনবতা নত্তনা খুঙ্গংগী অচৌবা মহৈলোইশংশিং, হোস্পিতাল, কৈথেল অচৌবশিং শম্নহন্নবা হন্দক্কী বজেত অসিদা লাওথোকখ্রে ।

মফম অসিদা পৱার সেক্তর হেন্না মপাঙ্গল কনখৎহন্নবগীদমক ইন্ত্রা স্তেত ত্রান্সমিশন অমসুং দিস্ত্রীব্যুসন সিস্তেম হেন্না মপাঙ্গল কনখৎহন্নবা লুপা কোতী লিশিং ১০ হেনবা শেনফমগী স্কিমশিং পাইখৎলে ।

অথুবা মতমদা গুৱাহাতীদা ৱার্ল্দ ক্লাস এয়ারপোর্ত তর্মিনেল বিলদিং শেমগৎপগী থবক হৌগদৌরে মদুনা আসিয়ান লৈবাকশিংগা লোয়ননা অৱাং নোংপোক অখন্ননা অসমগী কনেক্তীবিতী হেঙ্গৎহল্লগনি ।

‘উরান য়োজনা’গী মখাদশু সরকারনা অৱাং নোংপোক্তা অখন্নবা মীৎয়েং থম্লি । লমদম অসিগী এয়ারপোর্ত অমসুং হেলিপেদ ১৯ মদুগী মনুংদা ৫দু অসমদা লৈরি, মখোয়শিংবু লৈবাক্কী অতোপ্পা শহরশিংগা শম্নহন্নবা মায়কৈদা থবক চত্থরি ।

লৈবাক ১৬০ হেনবদগী লাকপা লমকোইবশিংবু ই-ভিজাগী খুদোংচাবা ফংহ্ন্নবা কেন্দ্র সরকারগী খোংথাং অসিনা লমদম অসোমদা তুরিজম চাওখৎহনবদা মরুওইবা থৌদাং লৌরগনি ।

মরূপশিং,

কেন্দ্র সরকারনা লুপা কোতী ১১০০ হেন্না চংনা গুৱাহাতীদা অনৌবা এম্স লিংখৎপদা অয়াবা পীখ্রে । সরকারনা অৱাং নোংপোকপুশু নেস্নেল গ্যাস গ্রিদকা লোয়ননা শম্নহন্নবা থবক তৌরি । লুপা কোতী লিশিং অহুম চংনা গুৱাহাতী ফাওবা জিএআইএল (গেল)গী খুথাংদা গ্যাস পাইপ তিংবগী থবক অয়াবা পীখ্রে ।

কেন্দ্র সরকারনা হন্দক্তা ‘নোর্থ-ইস্ত স্পিসিয়েল ইনফ্রাস্ত্রকচর দিব্লপমেন্ত স্কিম’ কৌবা অনৌবা স্কিম অমা অয়াবা পীখ্রে । মসিগী মখাদা কেন্দ্র সরকারনা চাদা ১০০ শেল থাদদুনা ইনফ্রাস্ত্রকচরগা মরী লৈনবা স্কিমশিং পায়খৎলগনি ।

অৱাং নোংপোক্তা শেল থাদরিবা অসিনা মফম অসিদা তুরিজম চাওখৎহনবদা মতেং ওইরগনি, মফম অসিগী নহাশিংগীদমক, মফম অসিগী নুপীশিংগীদমক, থবক ফংনবগী অনৌবা খুদোংচাবা অদু পুদুনা লাক্লগনি ।

মরূপশিং,

ঐহাক্না অসমগী মুখ্যমন্ত্রী শ্রী সর্বনন্দ সোনোৱালবু অতেনবা মতমগী মনুংদা অসমদা বিজিনেস ফ্রেন্দলী অমসুং দিব্লপমেন্ত ফ্রেন্দলী ওইবা ফিভম অমা ওইহন্নবা থবক তৌখীবা অদুগীদমক থাগৎপা ফোংদোকচরি । শেঞ্জা থুমজাগী মায়োক্তশু অসম সরকারনা অকনবা খোংথাং পায়খৎলে । অসম সরকারনা ইন্দস্ত্রী লিংখৎনবা, তুরিজম হেঙ্গৎহন্নবা, তেক্স ইন্সেন্তিবশিংশু পীরি ।

অনৌবা আইতি পোলিসী,

অনৌবা স্তার্ত অপ পোলিসী,

অনৌবা স্পোর্ত পোলিসী,

অনৌবা সুগর পোলিসী, 

অনৌবা সোলর ইনর্জী পোলিসী লিংখৎখ্রে ।

গুৱাহাতীবু আসিয়ান লৈবাকশিংগা লোয়ননা ললোন ইতিক্কীদমক বিজিনেস হব অমগুম্না শেমগৎ শাগৎলিবা অসিদা রাজ্য সরকারবু থাগৎপা ফোংদোক্লি । গুৱাহাতীবু স্মার্ত সিতীগী থাক্তা দিব্লপ তোরি ।

অসিগুম্লবা চাওরবা থৌরম অমা পাংথোকপগীদমক অসম অমসুং অৱাং-নোংপোক্কী প্রজাশিংবু ঐহাক্না অমুক হন্না থাগৎপা ফোংদোকচরি । আসিয়ান অমসুং বিবিআইএন লৈবাকশিংদগী গ্লোবেল ইনভেস্তর সমিত অসিদা শরুক য়াবিরিবা শক্নাইরবশিংগী মফমদশু ঐহাক্না থাগৎপা ফোংদোকচরি ।

ঐহাক্না অমুক হন্না অৱাং-নোংপোক্কী প্রজাশিং, অসমগী প্রজাশিংবু অসিগুম্লবা থোইদোক হেন্দোকপা থৌরম অসিগীদমক হায়নিঙাই লৈতনা থাগৎচরি ।

অপুনা-লোকোক বহুত বহুত ধন্যবাদ

ময়াম পুম্নমকপু হন্না হন্না থাগৎচরি!!!