ভারতকী প্রধানমন্ত্রী

ফম্বাক অসিদা লেংশিনবীরিবা, ঐগী মন্ত্রীমন্দলগী মরূপশিং, দোক্তর হারস বর্ধনজী অমসুং অশ্বিনী কুমার চৌবেজী, তোঙান-তোঙানবা রাজ্যশিং অমসুং ইন্সতিত্যুসনশিংগী মীহুৎশিং, অয়ুশ্মান ভারতকা মরি লৈনবা মরূপশিং অমসুং ঙসি মফম অসিদা তিল্লিবা স্কিম অসিগী কান্নবা ফংলবা মীওইশিং!

ইনাওশিং অমসুং ইচলশিং

ঙসি অসি নবরাত্রীগী হুমনিচনবনি। ঙসি চন্দ্রগান্তাগী মওংদা লৈবা ইমা ইরাৎলি। থাগী অমেংবা অমসুং অইংবগা লোয়ন্না মখুৎ ১০ পানবী চন্দ্রগান্তা লাইরেম্বীনা মালেম পুম্নমক্কী অৱাবশিং মাংহল্লি হায়না থাজনবা অমা লৈরি।ভারতকী লায়রবা মীওই ক্রোর ৫০গী অৱাবশিং কোকহল্লিবা অয়ুশ্মান ভারত চহি অমা মপুংফারকপগী খন্নবা অসিগা কয়াতা মপা চানরবা।
মরূপশিং, অয়ুশ্মান ভারতকী অহানবা চহি অসি ৱারেপ অমা লৌবা, কৎথোকপা অমসুং তম্বগী মতমনি। মসি ভারতকী থৌননা মরম ওইদুনা ভারত্ত মালেমদা খ্বাইদগী চাউবা অনা-লায়েংগী থবক মাইপাক্না পায়খৎপনি। মসিগী কৎথোকপা অসি রাজ্য অমসুং য়ুনিয়ন তেরিতোরি খুদিমক্কীনি ; মসিগী কৎথোকপা অসি লৈবাক অসিদা লৈরিবা সরকার অমসুং লনাই হোস্পিতাল লিশিং কয়াগীনি; মসিগী কৎথোকপা অসি থবক তৌরিবা মীওই খুদিংমক, মেদিকেলগী মীওইশিং, অয়ুশ্মান মীত্র, অসা ৱারকারশিং, মীয়ামগী লুপশিং, সরকারগী মীহুৎশিংগীনি।

মরূপশিং, মসিগী কৎথোকপা অসিনা মরম ওইদুনা, লৈবাক অসিনা থাজবা অমসুং চাউথোকপগা লোয়ন্না হায়রি-‘সাল এক, অয়ুশ্মান অনেক’।

লৈবাক অসিগী লায়রবা ইমুং লাখ ৪৬ লায়নাশিংনা মরম ওইদুনা থাজবা মাংদুনা লৈরম্লবশিং হকচাং ফবা পুন্সি অমগী থাজবা অমা ফংহনবা অসি তশেংনা অচৌবা মাইপাকপা অমনি। মসিগী অহানবা চহি অসিদা, লায়না অমা লায়েংনবা কনাগুম্বা অমগী লম, য়ুম, সনা নৎত্রগা পোৎ অমা হেক্ত য়োনবা নৎত্রগা বন্ধান থম্বদগী কনবা ঙম্লবদি ,মসিগী অয়ুশ্মান অসি ভারতকী অচৌবা মাইপাকপা অমনি হায়না লৌগনি।

মরূপশিং, ঙাইহাক্কী মমাংদা, ঐনা বেনিফিসরি খরগা ৱারি শানবগী খুদোংচাবা অমা ফংখি। হৌখিবা চহিদা , মীখল মনুং ফাওবদা , ঐনা লৈবাক শীনবা থুংনা অসিগুম্বা মরূপশিং অসিগা ৱারি শান্নবা লেপ্তনা হোৎনখি। মখোয়গা ৱারি শানরবা মতুংদগী অয়ুশ্মান ভারত-পি এম জে এ ৱাইনা লায়রবশিংগী পুন্সিদা অহোংবা পুরকপা অদু খঙলে। অমরোমদা, পি এম জে এ ৱাই অসি হৌজিক লায়রবগী জয় নৎত্রগা মাইপাকপা অমা ওইরে। লায়রবগী মচা হকচাং ফবা মতমদা, ইমুংগী পুকচাক পুরিবা মীওই অদু মশা-মউ ফনা থবক শুবা ঙম্মি , অদুদগী কনাগুম্বা অমনা হকচাং ফবগী কান্নবা অদু খঙলে। মরম অদুনা অয়ুশ্মান ভারত পি এম জে এ ৱাই মাইপাক্না কৎথোক্লিবা মীওইশিং অমসুং ইন্সতিতুৎশিং লৈবাক অসিগী লায়রবা ক্রোর কয়াগী বর ফংলে। মসিগী অচৌবা থবক অসি পাংথোক্লিবা খুদিংমক ঐনা থাগৎলি।

মরূপশিং,

মসিগী অহানবা চহি অসিদা, খাংবা কনবা অমসুং কৎথোকপগা লোয়ন্না ঐখোয়না কয়া অমা খঙবা ঙম্লে। মফম অসিদা লাক্ত্রিঙৈ মমাংদা একজিবসনগী খুৎথাংদা চহি অমদা পায়খৎখিবা থবকশিং ঐনা উরে। মতমগী মতুংইন্না লাকপা শিংনবশিং ঐখোয়না থেংনখি, লেপ্তনা তেক্নিকেলশিং অহোংবা পুরকখি, শরুক য়ারিবা খুদিংমক্কা লেপ্তনা পাউ ফাওনখি অমসুং চিংবা খুদিংমক লৌথোকখি। তম্বা, ৱারি শানবা অমসুং ফগৎহনবগী থবক লেপ্তনা চৎথগনি।

মরূপশিং, হৌখিবা নুমিৎ নিনি অসিদা কমদৌনা স্কিম অসি হেন্না ফগৎনবা মোনিতর তৌগনি; কমদৌনা লাইনা বেনিফিসরিশিংদা লাইনা য়ৌহনগনি; কমদৌনা হোস্পিতালশিংগী খুদোংচাদবশিং কোকহনগনি হায়রিবা ময়াম অসি খন্নখি। মগুন হেনগৎহনবদগী হৌরগা ত্রেনিং পীবা ফাওবগী মতাংদা ৱাফম কয়া পুথোরকখি। রাজ্য খরনা স্কিম অসি কমদৌনা ইমুং খুদিংমক কোনশিনবা য়াগদগে হায়বগী মতাংদা মখোয়না থেংনবশিং পুখৎলকখি অমসুং মসি ময়াম অসি থওইনা খন্নগদবনি। খুদোংথিবা তারবা মতমদা মখোয়না হেন্না ফবা অনা-লায়েংগী খুদোংচাবা ফংহন্নবা হোস্পিতালশিংগী থোঙশিং লায়রবা মী খুদিংমক্কী হাংদোক্নবা হোৎনবা অসি ঐখোয় খুদিংমক্কী থৌদাংনি।
মরূপশিং,

অয়ুশ্মান ভারত অসি অনৌবা ভারতকী অওনবা খোঙথাংশিংগী মনুংদা অমনি। মসিনা লৈবাক্কী মীচম অমসুং লায়রবশিংগী পুন্সি কয়া কনবা অচৌবা থৌদাং লৌবতা নত্তনা মসিনা ভারতকী মীওই ক্রোর ১৩০গী অকনবা ৱারেপ অমসুং থৌনা মহুৎশীল্লি। মরম অদুনা লৈবাক অসিগী লায়রবশিংদা অহোংবা মমলদা অফবা মখলগী লায়েং ফংহল্লি হায়না ঐনা মমাংদা হায়খিবনি। মখোয়না ঙমজবা থাক্ত রাজ্য অমসুং য়ুনিতেরিতোরি খুদিংমক থবক পাংথোক্লি। রাজ্যশিংনা ফজনা পাংথোক্নিংলবসু, লায়রবশিং কান্নবা ফংদে , মেদিকেলগী মচাক-মথুমশিং ফগৎলক্তে। অদুবু অয়ুস ভারত চৎনবা হৌরকপদগী মসিগী কান্নবশিং লায়রবশিংদা য়ৌহনবা ঙম্লে। মমাংদা য়ৌবা ঙম্লমদবা লৈবাক অসিগী মফম খুদিংমক্কী অনাবশিং অয়ুশ্মান ভারতকী কান্নবা ফংলে। মসিনা মরম ওইদুনা মমাং চহী খক্তদা মীওই লিশিং ৫০ হেন্না স্কিম অসিগী মখাদা অতোপ্পা রাজ্যশিংদা লায়েংখি, হায়বদি মখোয়গী রাজ্যশিংগী ৱাংমদা লৈবা অফবা হোস্পিতালশিংদা লায়েংখি।

মরূপশিং,

ফনা য়াম্না দরকার ওইরবসু, লৈবাক অসিগী কনাগুম্বা মীওই অমতা মহাক্কী ময়ুম,জীলা নৎত্রগা রাজ্যগী ৱাংমদা লায়েংবা চৎপা পামদে। রাজ্য খুদিংমক্না লৈবাক অসিগী মীওই খুদিংমক ময়ুম ময়াদা খ্বাইদগী হকশেলগী খুদোংচাবশিং পীনবা হোৎনরি। অফবা লায়েংগী খুদোংচাবা লৈবা লৈবাক্কী মফমশিংদা মীওই কয়া লাকপদগী খুদোংচাদবা থেংনরি, অদুবু লৈবাক অসিগী মীওই অমতা মতমগা চুনবা অনা-লায়েংগী খুদোংচাবা ফংহন্দবা য়ারোই। মসিগী ৱারোল অসি অয়ুশ্মান ভারতনা শৌগৎলি।

মরূপশিং,

অয়ুশ্মান ভারত অসি মশা ফবা ভারত অমগী অমসুং ভারত পুম্নমক্কী অফবা অচুম্বা পাম্বৈ অমনি। ভারতনা মায়োক্নরিবা খুদোংচাদবশিং নাইতোম ওইনা শিংনবগী মহুৎতা অপুনবগী ওইনা থেংন্নবা সরকারগী ৱাখল্লোন অমগী মখাদা ঐখোয়না থবক পায়খৎলি। নুমিৎ খরনিগী মমাংদা য়ুনাইতেদ নেসন্সতা পাংথোকপা মালেমগী মীপুম খুদিংমক হকশেলগী খুদোংচাবা ফংহন্নবা থৌরম অমদা ভারতকী মরমদা ৱাং ঙাংনবগী খুদোংচাবা অমা ঐ ফংখি। ভারত্ত অনা-লায়েংগী লমদা পায়খৎলিবা থবকশিং অমসুং মসিগী পাকচাউবা উবদা মালেম অসি অঙকপা পোকখি।

মরূপশিং,

মপাঙ্গল কনবা য়ুম্বী মরিদা ঐখোয়না মশা ফবা ভারত অমা শেমগৎলিবা অদু মালেমগী মীহুৎশিংদা ঐনা খঙহনখি। অহানবা : নাদবা চেকশিন-থৌরাং লৌখৎপা; অনিশুবা : মমল হোংবা অনা-লায়েং; অহুমসুবা : সপ্লাইদা অওনবা পুরকপা অমসুং মরিশুবদা নেসনেল নিউত্রিসন কেম্পেনগুম মিসন মোদতা থবকশিং পায়খৎপা।

করিগুম্বা ঐখোয়না অহানবা য়ুম্বীগী মতাংদা হায়বা তারবদি লু-নানবা, য়োগা, অয়ুস, তিকা থাবা অমসুং শাজেল ময়াম অসিনা লায়না কয়া ঙাকথোক্নবা হোৎনবনি। অদুবু শা-ষনশিংনা শন্দোরকপা লায়নাশিংনা মীওইবদা খুদোংচাদবা থোকহল্লি। হন্দক লৈবাক অসিনা মিসন মোদ ওইনা শা-ষনশিং ফুদ-এন্দ-মাউথ লায়নাদগী ঙাকথোক্নবা থবক পায়খৎলে। ঐখোয়না শা-ষনশিংগীসু খল্লি; ঐখোয়না মখোয় কাউথোকপা য়াদে।

অনিশুবা য়ুম্বী অসিনা লৈবাক অসিগী মীচম মীয়াম খ্বাইদগী মমল হোংবা লায়েং ফংহন্নবা লেপ্তনা থবক পায়খৎলি।

মরূপশিং,

হায়রিবা য়ুম্বীশিং অসিদা অয়ুশ্মান ভারতনা পুক্নিং থৌগৎলি। লৈবাক শীনবা থুংনা হেল্থ এন্দ ৱেলনেস সেন্তর লাখ ১.৫ শাবা নৎত্রগা চহি অমদা লুপা লাখ ৫ ফাওবগী লেম্না লায়েংবগী খুদোংচাবা লেম্না ফংহনবা অসিদা অয়ুশ্মান ভারতনা মরুওইবা থৌদাং লৌরি।

মরূপশিং,

অয়ুশ্মান ভারতকী অহুমসুবা য়ুম্বী, সপ্লাই অসি মপাঙ্গল কনখৎহল্লে। অয়ুশ্মান ভারতনা মরম ওইদুনা লৈবাক অসি অনা-লায়েংগী থবক হেনগৎলক্লে। কৈদৌঙৈদা লায়েংবগী ৱাখল খল্লমদবা লায়রবা অনাবশিং হৌজিক হোস্পিতালশিংদা লাক্লে। মখোয়না লনাই হোস্পিতালদা লায়েংগনি হায়বগী থাজবা লৈখিদে। ঙসিদি পি এম জে এ ৱাইগী থবক তৌরিবা হোস্পিতাল ১৮,০০০গী মনুংদা ১০,০০০দি লনাই হোস্পিতালশিংনি। তুংদা লনাই হোস্পিতালশিং শরুক য়াবা হেনগৎলক্কনি।

মরূপশিং,

দরকার ওইবা হেনগৎলকপা ইরোন্না, লৈবাক্কী অপীকপা সহরশিংদা অনৌবা মেদিকেলগী মচাক-মথুমশিং ফংবা হেনগৎলক্লি। নৌনা থবক ফংবগী খুদোংচাবা হেনগৎলক্লে। অয়ুশ্মান ভারতনা মরম ওইদুনা লাক্লিবা চহি ৫দগী ৭ফাওবগী মনুংদা অনৌবা থবক লাখ ১১ পীবা ঙমগনি হায়না পানরি। মসিগী মশিং অসি য়েংলগা রেলৱেজ খক্তনা মসিগী হেনবা থবক পীবা ঙমগনি।

মরূপশিং,

হায়রিবা থবকশিং অসিগীদমক ঐখোয়গী নহাশিং ত্রেনিং পীবা য়াম্না মরুওই। মসিনা মরম ওইদুনা মেদিকেল ইজুকেসনগী মচাক-মথুমশিং হেনগৎহল্লে। লৈবাক অসিদা মেদিকেল ইজুকেসনগী সিত মশিং হেনগৎহল্লে লোয়না মিং চনবদা অরোন-অথুপ লৈতনবা কাংলোন কয়া শেম্লে। অনৌবা মেদিকেল কোলেজ ৭৫ লিংখৎনবা ৱারেপ লৌবা নৎত্রগা লৈবাক অসিদা অনৌবা নেসনেল মেদিকেল কম্মিসন লিংখৎনবা ৱারেপ লৌরিবা অসিনা মেদিকেল সেক্তরদা শোইদনা কান্নবা ফংগনি।
নেসনেল মেদিকেল কম্মিসন্না লৈবাক অসিদা মেদিকেল ইজুকেসন চাউখৎহনগনি, মসিগী মগুন হেনগৎহনগনি অমসুং শেঞ্জা-থুমজা লৌথোক্কনি।

মরূপশিং,

অয়ুশ্মান ভারত অসি য়াম্না লাইবা অমসুং নমথাক তৌবা য়াদবা অমা ওইনবা লেপ্তনা থবক পায়খৎলি। মসিগী মরি লৈনবা আই তি সিস্তেম অসি পি এম জে এ ৱাই ২.০দা ফগৎহল্লে অমসুং লেপ্তনা ফগৎহল্লি। ঙসি হৌদোক্লিবা এপ্প অসিনা বেনিফিসরিশিংদা কান্নবা য়াম্না পীগনি। মসিগী স্কিম অসি হেন্না মতিক চানবা অমসুং পুম্নমক কোনশিন্নবা ঐখোয়না তেক্নিকেলগী ওইবা পাম্বৈশিং মথৌ তারি।

অয়ুশ্মান ভারত্ত তোঙান তোঙানবা কয়াৎ কয়া লৈরি অমসুং হায়রিবা কয়াৎশিং অসি শম্ননবা অফবা সিস্তেম অমা দরকার ওইরি। দাইগনোসিস, রিফরেল অমসুং ফোল্লো অপকী তেক্নোলোজিদা য়ুমফম ওইবা থৌরাং কয়া ঐখোয়না পায়খৎকনি। খুঙ্গং অমগী হেল্থ এন্দ ৱেলনেস সেন্তর অমদা লৈরিবা মিং চল্লবা অনাবা অমগী দেতা অদু মীওই অদুগী অনাবগী লাইওং খঙদোকপদা শীজিন্ননবা থবক পায়খৎলি। অচৌবা হোস্পিতালশিংদা রিফর তৌবদা মসিগী দেতা অসি তুংদা লায়েংবদা কান্নগনি। মসিগী খল্লগা ঐখোয়গী অনৌবা মীরোলশিংগীদমক অনৌবা কয়া পায়খৎপা দরকার ওই।

মরূপশিং,

ঙসি হৌদোক্লিবা পি এম জে এ ৱাই স্তার্দঅপ গ্রান্দ চেলেঞ্জ অসিনা মরুওইবা থৌদাং লৌগনি। লৈবাক অসিগী নহারোলশিং মরুওইনা আই তিগী শীনফমদা লৈরিবশিংনা মসিগী চাংদম্নবা অসি তুংগী য়াইফনবা খল্লগা শরুক য়াগদবনি। মসিগী খুৎথাংদা ,লৈবাক শীনবা থুংনা হকশেলগী লমদা পায়খৎলিবা স্তার্দ-অপশিংগা অয়ুমান ভারতকা মরি লৈনগনি। মসিগী খুদোংচাবা অসি লৌনবা লৈবাক অসিগী নহা ওইরিবা ওন্ত্রেপ্রেনিউয়রশিং অমসুং ইন্নোবেতরশিংদা ঐনা অমুক হন্না তকশিল্লি।

মরূপশিং ,

অনৌবা ভারতকী অনা-লায়েংগী থবক অসি তশেংনা মালেম পুম্নমক্কী খুদম অমা ওইরগনি। মসিদা অয়ুশ্মান ভারতনা অচৌবা মতেং পাংবা অমা ওইগনি। ঐখোয়না পীরবা থাজবশিং অসিনা ঐখোয়গী লৈবাক্কী মীওই ক্রোর কয়া মশা ফহনগনি অমসুং ঐখোয়গী থবকশিং মাইপাকহনগনি। মসিগী অনিংবা অসিগা লোয়ন্না ঐনা অদোমবু থম্মোয়দগী থাগৎচরি অমসুং ময়াম পুম্নমক য়াইফ-পাউজেল পীজরি।