ভারতকী প্রধানমন্ত্রী

জুলাই ১৫,২০২৫ দা, ভারতকী মপান নাইদ্রবা অনিংবশিং মহুৎ শীন্দুনা মহাক্কী সুন্দ্রংগী খোঙচত্তগী তেক্ত কাইদনা পৃথিবীদা গ্রুপ কেপ্তেন সুভান্সু সুক্লা হল্লক্লে। মসি লৈবাক শীনবা থুংবগী চাউথোকচবা, মাইপাকপা অমসুং হরাওবা মিকুপ অমনি।

ইন্তরনেসনেল স্পেস ষ্টেসন্দা মহাক্কী নুমিৎ ১৮ গী খোঙচৎ মাইপাক্না লোইশিল্লবা মতুংদা পৃথিবীদা গ্রুপ কেপ্তেন সুভান্সু সুক্লা হল্লকপদা লৈবাক অসিনা হরাওবদা মন্ত্রীমন্দলসু শরুক য়ারি।

গ্রুপ কেপ্তেন সুভান্সু সুক্লানা মিসন পাইলোত ওইনা জুন ২৫,২০২৫ দা থাগৎখিবা মিসন অসি মরুওইবা তাঞ্জা অমনি-মসি ভারতকী এষ্ট্রোনোত অমনা ইন্তরনেসনেল স্পেস ষ্টেসন্দা চৎপা অহানবনি। মসিনা ভারতকী স্পেস প্রোগ্রামগী অনৌবা পন্দুব অমা হাংদোক্লে অমসুং ঐখোয়গী তুংগী স্পেসগী থৌরমশিংদা ফজরবা শক্তম অমা পীরে।

মাইপাকপা অসি পুরক্নবগীদমক চোকথবা লৈতনা হোৎনখিবা ইন্দিয়ান স্পেস রিছার্স ওর্গনাইজেসন অমসুং ঐখোয়গী সাইন্তিস্তশিং অমসুং ইঞ্জিনিয়ারশিং মন্ত্রীমন্দলনা থাগৎপা ফোঙদোকচরি। মহাক্না ইন্তরনেসনেল স্পেস ষ্টেসন্দা লৈরিঙৈদা, গ্রুপ কেপ্তেন সুভান্সু সুক্লানা এজিওম-৪ ক্রিয়ু অমসুং এক্সপিদিসন ৭৩ গী মেম্বরশিংগা থবক তৌমিন্নখি, মালেমগী স্পেসকী মতেং পাংনবদা ভারতনা মাংজিল থাবা অদু উৎখি।

মহাক্না মসল রিজেনেরেসন, অলগাল অমসুং মাইক্রোবাইএল গ্রোথ, মহৈ-মরোং থাবা, মাইক্রোবাইএল হিংহনবা, সুন্দ্রংদা থবক শুবা অমসুং সাইনোবেক্তরিয়াগী লমচৎ-শাজৎগুম্বা হিরমশিংদা মাইক্রোগ্রেভিতিদা চাংয়েং কয়া পাংথোকখি। হায়রিবা থিজিনবশিং অসিনা মীওইবনা সুন্দ্রংদা চৎপা অমসুং মাইক্রোগ্রেভিতি সাইন্সকী মরমদা হেন্না খঙগনি অমসুং তুংদা ভারতকী সুন্দ্রংগী খোঙচৎশিংদা কান্নরবা লৌশিং কয়া পীগনি।

মাইপাক্লবা মিসন অসিনা মালেমগী ওইনা সুন্দ্রংগী মরমদা থিজিনবদা ভারতকী ফিবম মপুংফানা ফগৎহল্লে। মসি গগনয়ান অমসুং ভারতিয়া অন্তরিক্ষা ষ্টেসন য়াওনা ভারত মশাগী মীওইবা য়াওবা সুন্দ্রংগী খোঙচৎকী মাইকৈদা থাংজিনবা মরুওইবা খোঙথাং অমনি। মসিনা মীওইবনা সুন্দ্রং থিজিনবগী মাঙজিল থাবদা ভারতকী ফিরেপ অমুক্কা হেন্না চেৎশীনহল্লে।

সুন্দ্রংগী লমদা ভারতকী তৌবা ঙম্বদা অচেৎপা থাজবা থম্বা অমসুং সুন্দ্রংদা চৎলিবা লৈবাকশিংগী মরক্ত লুচিংবা অমা ওইনবা অমসুং অনৌবা মফমশিংদা চৎনবা লৈবাক অসিগী লমজিংলিবা প্রধান মন্ত্রী শ্রী নরেন্দ্র মোদীগী লুচিংবগী গুন অমসুং মীৎয়েং শানবা মন্ত্রীমন্দলনা থাগৎপা ফোঙদোকখি।

ভারতকী নেসনেল স্পেস দে হায়না পুৱারিদা ইদুনা থম্লবা, ওগস্ত ২৩,২০২৩ দা থাগী খা মেরু ময়াদা চন্দ্রয়ান-৩ তাখিবা য়াওনা হন্দক ভারতকী শিংথাবা য়ানা মাইপাকপশিং অদু মন্ত্রীমন্দলনা অমুক নিংশিংখি। ২০২৩ দা থাগৎখিবা ভারতকী অদিত্যা-এল ১ মিসন অসিনা মীওইবনা নুমিৎকী মরমদা খঙবা হেনগৎহল্লে। হায়রিবা মাইপাকপশিং অসিদা সাইন্সকী লমদা মাঙজিল থাবা অমসুং লৈবাক অসি মশা-মরোমদোম লেপচবা ঙম্বা অদু মমি তারে।

স্পেসকী লমদা অওনবা কয়া পুরক্তুনা, সরকারনা মমাঙদা অমুক্ত ওইখিদ্রিবা মওংদা ভারতকী স্পেস ইকোনোমি চাউখৎহল্লে। সেক্তর অসিদা অনৌবা স্তার্দ-অপ ৩০০ থোক্লকপা অসিনা থবক য়াম্না ফংহনবা খক নত্তনা, ইন্নোবেসন, ওন্ত্রেপ্রেন্যুরশিপ অমসুং তেক্নোলোজি চাউখৎনবা অফবা ফিবম অমা শেমগৎলে।

গ্রুপ কেপ্তেন সুভান্সু সুক্লাগী মিসন অসি লনাই মাইপাকপা অমা খক নত্তনা, মসি নহা ওইরিবা ভারতমচাশিংগী অনৌবা মীরোল অমদা ইথিল পীনবা মৈরা অমনি। মসিনা সাইন্তিফিক ওইনা ৱাখল খনবা হেনগৎহনগনি অমসুং মশিং থিঙমদ্রবা নহারোলশিং সাইন্সনা শীনফম অমা ওইনবা অমসুং অনৌবা থবক পাংথোক্নবা ইথিল পীগনি। প্রধান মন্ত্রীনা মঙ মঙলিবা ২০৪৭ দা ভারত চাউখৎলবা লৈবাক অমা-বিকসিত ভারত শেমগৎনবা লৈবাক অসিগী ৱাশক মিসন অসিনা থৌনা পীরগনি হায়না মন্ত্রীমন্দলনা অমুক হন্না থাজবা ফোঙদোকখি।

***