ভারতকী প্রধানমন্ত্রী

ইকায়খুম্নরবা প্রধান মন্ত্রী দোক্তর নবিনচন্দ্র রামগুলাম জি,

লৈবাক অনিমক্কী মীহুৎ কাংবু,

মেদিয়াগী মরুপশিং,

খুরুমজরি, বোঞ্জোর!

ভারতমচা করোর ১৪০ গী মহুৎশীন্দুনা, মাউরিসস নেসনেল দে থৌরমদা ঐনা মাউরিসসগী মীয়ামদা ঐগী য়াইফ পাউজেল পীজরি। নেসনেল দেদা ঐ মাউরিসসতা অমুক হন্না লাকপদা য়াম্না হরাওই। খুদোংচাবা অসিগীদমক ঐনা প্রধান মন্ত্রী নবিনচন্দ্র রামগুলাম জি অমসুং মাউরিসস সরকার থাগৎপা ফোঙদোকচরি।

মরুপশিং,

ভারত অমসুং মাউরিসসকী মরক্ত লৈনরিবা মরীশিং অসি ভারত মহাসাগর খক্তনা পুনশিনবা নত্তে, ঐখোয়গী মান্নবা চৎনবী, নাৎ অমসুং গুনশিংনসু পুনশিল্লিবনি। ঐখোয় শেন-থুম অমসুং খুন্নাই চাউখৎপগী খোঙচৎকী খোঙলোয়শিংনি। মহৌশাগী ওইবা অমাং-অতা ওইগেরা নত্ত্রগা কোবিদ লাইচৎ ওইগেরা, ঐখোয়না মতম পুম্নমক্ত অমনা অমবু শৌগৎনরি। সেকুরিতি, ইজুকেসন, হকশেল অমসুং স্পেসকী লমদা ঐখোয় য়াম্না নক্না চৎমিন্নরি। হৌখিবা চহি ১০ দা ঐখোয়গী মরীশিংদা ঐখোয়না অনৌবা মখল কয়া হাপচিল্লে। চাউখৎ-থৌরাংগী মতেং পাংনবা অমসুং কেপাসিতি বিল্দিংগী লমদা ঐখোয়না অনৌবা রেকোর্দ কয়া থম্লে।

মেত্রো এক্সপ্রেসনা মাউরিসসগী খোঙজেল য়াংখৎহল্লগনি,

অচুম্বা ৱায়েনগীদমক সুপ্রিম কোর্ত বিল্দিং,

নুংঙাইনা হিংনবা সোসিএল হাওসিং,

হকচাং ফনবা ই.এন.তি হোস্পিতাল,

ললোন-ইতিক অমসুং তুরিজম চাউখৎনবা য়ু.পি.আই অমসুং রুপে কার্দ,

মমল হোংবা অমসুং অফবা হিদাকশিংগীদমক জন ঔসাধি কেন্দ্রশিং,

অসিগুম্বা মীয়ামগী য়াইফনবা থবক কয়া ঐখোয়না অকক্নবা মতম অমগী মনুংদা লোইশিল্লে। অগালেগাদা চৎথোক-চৎশিনগী খুদোংচাবা ফগৎলকপদগী নোংলৈ-নুংশিৎ চিদোনা শোকহল্লবা মীওইশিংদা য়াংনা মতেং পাংবা ঙম্লে। মসিনা মরম ওইদুনা পুন্সি কয়া কনবা ঙম্লে। কম্মুনিতি দিবলপমেন্ত প্রোজেক ২০ গা লোয়ননা ঐখোয়না কেপ মালহেরিউজ এরিয়া হেল্থ সেন্তর শঙ্গাখ্রে। প্রধান মন্ত্রীগা লোয়ননা ঐনা “অতল বিহারি বাজপায় ইন্সতিতুৎ ওফ পব্লিক সর্বিস এন্দ ইন্নোবেসন” শঙ্গারগনি অমসুং মসি মাউরিসসকী মীয়ামদা শীন্নরগনি।

মরুপশিং,

ঙসি, ইন্দিয়া-মাউরিসসগী মরী ‘ইনহান্স ষ্ট্রাতেজিক পার্তনরশিপ’ অমদা পুখৎনবা প্রধান মন্ত্রী নবিনচন্দ্র রামগুলাম অমসুং ঐনা ৱারেপ লৌরে। মাউরিসসতা অনৌবা সংসদকী বিল্দিং শাবদা ভারতনা মতেং পাংনবা ঐখোয় ৱারেপ লৌরে। মসি গনতন্ত্রগী মমাদগী মাউরিসসতা পীবা খুদোল অমা ওইরগনি। মাউরিসসতা কিমি ১০০ শাংবা ঈশিংগী পাইপলাইন অমা মতমগা চুনবা মওংদা শেমগৎনবা থবকশিং পায়খৎলগনি।

কম্মুনিতি দিবলপমেন্ত প্রোজেকশিংগী অনিশুবা তাঙ্কক্ত, মাউরিসসকী লুপা মিল্লিয়ন ৫০০ গী অনৌবা প্রোজেকশিং পায়খৎলগনি। মথং চহি ৫ হেনবদা, মাউরিসসকী সিবিল সর্ভেন্ত ৫০০ হেন্না ভারত্ত ত্রেনিং পীরগনি। মসিগী মথক্ত, লোকেল করেন্সিদা ললোন-ইতিক পাংথোক্নবা ঐখোয়না য়ানবা অমা পুরক্লে।

মরুপশিং,

দিফেন্স কোওপরেসন অমসুং মেরিতাইম সেকুরিতি অসি ঐখোয়গী ষ্ট্রাতেজিক পার্তনরশিপকী মরুওইবা য়ুম্বীশিংনি হায়বা প্রধান মন্ত্রী অমসুং ঐনা য়ারে। অথিংবা লৈতবা, মনিংতম্বা, অশোই-অঙাম লৈতবা ভারত মহাসাগর অমা ওইহনবা হায়বসি ঐখোয়গী মরুওইবনি। মাউরিসসকী এক্সক্লুসিপ ইকোনোমিক জোনগী সেকুরিতি মপুংফানা পীনবা ঐখোয় থবক পায়খৎলে। হিরম অসিগী মতাংদা, কোষ্ট গার্দকী দরকার ওইবশিং পীনবা ঐখোয়না পাংবা য়াবা মতেং পাংগনি।

মাউরিসসতা পুলিস একাদেমি অমসুং নেসনেল মেরিতাইম ইনফোর্মেসন সিয়ারিং সেন্তর লিংখৎপদা ভারতনসু মতেং পাংগনি। ৱাইদ সিপ্পিং, ব্লু ইকোনোমি অমসুং হায়দ্রোগ্রাফিদা মতেং পাংনবা মখা তানা ফগৎহনগনি।

চাগোসগা মরী লৈননা ঐখোয়না মাউরিসসকী মনিং-মখা তম্বদা মপুংফানা ইকায়খুম্নবা উৎলি। কলম্বো সেকুরিতি কনক্লেপ, ইন্দিয়ান ওসিন রিম এসোসিএসন অমসুং ইন্দিয়ান ওসিন কনফরেন্সগুম্বা ফোরমশিংগী খুৎথাংদা ঐখোয় মখা তানা মতেং পাংনগনি।

মরুপশিং,

মীগা-মীগা লৈনবা মরীশিং অসি ঐখোয়গী মরীগী অকনবা য়ু্ম্ফম অমনি। দিজিতেল হেল্থ, অয়ুস সেন্তর, স্কুল ইজুকেসন, স্কিল হেনগৎহনবা অমসুং মোবিলিতিগুম্বা হিরমশিংদা মতেং পাংনবা হেনগৎহনগনি। মীওইবা খুন্নাইগী য়াইফনবা এ.আই অমসুং দি.পি.আই শীজিন্ননবা ঐখোয় পুন্না থবক তৌমিন্নগনি।

মাউরিসসকী মীয়ামগীদমক, ভারত্ত চার ধাম যাত্রা অমসুং রামায়ন ত্রেলগী খুদোংচাবা পীগনি। গিরমিতিয়া হেরিতেচ ঙাক-শেন্নবা অমসুং য়োকখৎনবা মীৎয়েং চঙগনি।

মরুপশিং,

গ্লোবেল সাউথ, ইন্দিয়ান ওসিন নত্ত্রগা অফ্রিকান কন্তিনেন্ত ওইবা য়াই, মাউরিসস ঐখোয়গী মরুওইবা মরুপনি। চহি ১০ গী মমাঙদা, মাউরিসসতা বিজন সাগরগী য়ুম্ফম থোনখি। লমদম অসি তুংদু-লৈতাবা অমসুং নুংঙাই য়াইফবা পুরক্নবা সাগর বিজনগা লোয়ননা ঐখোয় মাঙলোমচা চঙশিল্লি।

ঙসি, মসিদা য়ুম্ফম ওইদুনা, গ্লোবেল সাউথকী ঐখোয়গী পান্দম অসি সাগরগী ৱাংমদা, মহাসাগর ওইরগনি হায়না ঐনা হায়নিংই। মসিদা ললোন-ইতিক চাউখৎহনবা, তুংকোইনা চৎনবা য়াবা চাউখৎ-থৌরাংগী কেপাসিতি বিল্দিং অমসু তুংগী সেকুরিতি য়াওরি। মসিগী মখাদা, তেক্নোলোজি পীনদুনা, লোন অমসুং গ্রান্তশিং পীদুনা ঐখোয় মতেং পাংনগনি।

ইকায়খুম্নরবা,

ঐ মফম অসিদা তরাম্না ওকপগীদমক ঐনা অমুক হন্না অদোম অমসুং মাউরিসসকী মীয়ামদা তৌবীমল খঙবা উৎচরি। অদোম ভারত্ত লাক্নবা ঐনা চেপাউ পীজরি। ঐখোয়না অদোম খৌরাংনা ভারত্ত ঙাইরমগে।

অদোম থাগৎপা ফোঙদোকচরি।

দিসক্লেমর: মসি প্রধান মন্ত্রীগী ৱারোলদগী চাউরাক্না হন্দোকপনি। অশেংবা ৱারোল হিন্দীদা পীখি।

***