ভারতকী প্রধানমন্ত্রী

অদোমগী থৌরাং, অদোমগী ভিজন তারগা, অদোম পুম্নক্কী ইথিল উরগা ঐগী থৌনাসু হেন্না হেনগৎহল্লে‍।

মরূপশিং,

ঙসি লৈবাকসিগী অথোইবা মপারী অনি, ভারত রত্ন জয় প্রকাস নারায়ন জী অমসুং ভারত রত্ন নানাজী দেশমুখকী মপোক কুমওনসু তাই‍। নীংতম্লবা মতুংদা ভারতপু লমজিংবিরমবদা অচৌবা মীওই অনিসিগী চাউরবা থৌদাং য়াওরি‍। পুম্নমক্কা চৎমিন্নদুনা, পুম্নমক্কী হোৎনজমলনা লৈবাকসিদা কমদৌনা চাউর-চাউরবা অওনবা পুরক্লিবগে হায়বদু মীৎমাঙদা উরিবসিনা ঙসিসু ঐখোয়বু পুক্নিং থৌগৎলি‍। ঐনা জয় প্রকাস নারায়ন জী অমসুং নানাজী দেশমুখ জীবু ইকোক নোঞ্জরি, শ্রদ্ধাঞ্জলি কৎচরি‍।

মরূপশিং,

২১শুবা চহিচাসিদা ভারতনা লম্বীসিদা মাঙদা চঙশিল্লিবা, অওনবা পুরক্লিবা অসি ভারতকী মতিংদা চপ চানা থাজবদুননি‍। ভারতকী মতিং মালেমগী লৈবাক পুম্নমক্তগী খজিক্তসু তাদে‍। মতিং অসিদা খুরৌ থাংলক্কদবা পুম্নমক লৌথোকপা হায়বসি ঐখোয়গী লৈঙাক্কী থৌদাংনি অমদি মসিগীদমক লৈঙাকসিনা করিগুম্বা অমত্তা চিত্থদনা তৌফম থোকপশিং তৌরি‍। ঙসি ভারত লৈঙাক্তা লৈরিবা ফিরেপ অসি মমাঙদা অমুক্তা লৈখিদ্রি‍। স্পেস সেক্তর অমসুং স্পেস তেক্কী মতাঙদা ঙসি ভারতনা চাউনা অওনবা পুরক্লিবসি মসিগী মহৈননি‍। ঐনা ইন্দিয়ন স্পেস এসোসিএসন – ইস্পা লিংখৎপসিদা ময়াম পুম্নমক্কী মফমদা অমুক্কা হন্না নুংঙাইবা ফোঙদোকচরি, য়াইফ পাউজেল পীজরি‍।

মরূপশিং,

ঐখোয়গী স্পেস রিফোর্ম্সকী ৱাফমসিদা ঐখোয়না চঙশিল্লিবসি য়ুম্বী মরিদা য়ুম্ফম ওইবনি‍। অহানবদা প্রাইভেত সেক্তরবু ইনোভেসনগী নীংতম্বা পীবনি‍। অনিসুবদা, লৈঙাক্না ইনেব্লরগী শক্লোন লৌবনি‍। অহুমসুবদা তুংগীদমক নহাশিংবু শে-শাবা অমদি মরিশুবদা, স্পেস সেক্তরবু মীচম মীয়ামগী চাউখৎ খোঙজলেগী পাম্বৈ অমা ওইনা য়েংবনি‍। হায়রিবা য়ুম্বী মরিসিগী মতিংনা মশা মথন্তা পুম্নমক্তগী তোঙানবা ওইথোকপা য়াবগী থোঙশিং হাংদোরক্লি‍।

মরূপশিং,

অদোম্না ৱাফম অমসু য়াবিগনি মদুদি মমাঙদদি স্পেস সেক্তর হায়রগদি লৈঙাক্কী ওইরম্মি‍। অদুবু ঐখোয়না অহানবদা হায়রিবা ৱাখল্লোন অসিবু শেমদোকখি, অদুগা স্পেস সেক্তরদা ইনোভেসনগীদমক লৈঙাক, স্তার্তঅপ অমনা অমগী মতেং অমসুং মফম পীননবা ৱাফম পুথোকখি‍। অনৌবা ৱাখল্লোন, অনৌবা ৱাফম অসি মথৌ তারিবগী মরমদি হৌজিক ভারতকীদমক্তা লীনিয়র ইনোভেসনগী মতম ওইদ্রে‍। হৌজিক অসি এক্সপোনেন্সিএল ইনোভেসনগী মতম্নি‍। অদুগা হায়রিবা অসি লৈঙাক্না হেন্দলরগী মহুত্তা ইনেব্লরগী থৌদাং লৌরবা মতমদা ওইথোক্কদৌরিবনি‍। মরম অসিনা, ঙসি দিফেন্সতগী হৌরগা স্পেস সেক্তর ফাওবদা, লৈঙাক্না মাগী হৈশিংববু ময়ামদা য়েন্থোক্তুনা প্রাইভেত সেক্তরগীদমক লোঞ্চ পেদ শেমগৎলি‍। ঙসিদি ইস্রোগী ফেসিলিতীশিংবু প্রাইভেত সেক্তরগীদমক হাংদোক্তুনা থম্লি‍। হৌজিক্তি হীরম অসিদা মপুং ফারবা তেক্নোলোজীশিং প্রাইভেত সেক্তরদা ত্রান্সফর তৌনবা থবক লৌখৎলগনি‍। ঐখোয়গী নহা ওইরিবা ইনোভেতরশিংনা খুৎশু খুৎলায় লৈনবগীদমক মতম অমসুং পাঙ্গল মাঙহনবগী মথৌ তাদনবা লৈঙাক্না স্পেস এসেত অমসুং সর্ভিসশিংগী এগ্রিগেতরগী থৌদাং লৌগনি‍।

মরূপশিং,

প্রাইভেত সেক্তরনা শরুক য়ারকপা ঙমহন্নবগীদমক্তা লৈবাকসিনা ইন-স্পেসসু লিংখৎলে‍। ইন-স্পেস, স্পেস সেক্তরগা মরী লৈনবা সিঙ্গল ৱিন্দো, ইন্দিপেন্দেন্ত এজেন্সীগী মওংদা থবক তৌগনি‍। মসিনা প্রাইভেত সেক্তর প্লেয়রশিংবু অমদি প্রোজেক্তশিংবু খোঙজেল হেন্না হাপকনি‍।

মরূপশিং,

ঐখোয়গী স্পেস সেক্তর, লৈবাক মীয়াম করোর ১৩০গী চাউখৎ লমজেলগী পাম্বৈনি‍। ঐখোয়গীদমক্তদি স্পেস সেক্তর হায়বসি, মীচম মীয়ামগী পুন্সি মহিং ফগৎহন্নবা মেপিং, ইমেজিং অমসুং কন্নেক্তিবিতীগী খুদোংচাবনি‍! ঐখোয়গীদমক্তদি স্পেস সেক্তর হায়বসি ওন্ত্রপ্রিন্যুরশিংগী সিপমেন্ততগী হৌরগা দেলিভরী ফাওবদা হেন্না খোঙজেল য়াঙ্খৎহনবনি‍। স্পেস সেক্তর হায়বদি লৌমীশিংগী অমদি ঙামীশিংগীদমক্তা হেন্না ফাবা ফোরকাস্ত, হেন্না ফবা ঙাকশেল অমদি শেন্থোক হায়বনি! ঐখোয়গীদমক্তদি স্পেস সেক্তরগী ৱাহন্থোক্তি, ইকোলোজীবু, মহৌশাগী অকোয়বগী ফীভমবু য়েংশিন্দুনা, মহৌশাগী খুদোংথিবশিংবু মতম চানা চুম্না মাঙজৌননা খঙহন্দুনা মীওই লীশিং-লাখ কয়াগী পুন্সি কন্নবনি‍। লৈবাক্কী পান্দম অসি হৌজিক্তি ইন্দিয়ন স্পেস এসোসিএসনগীসু মান্নবা পান্দম ওইরবনি‍।

মরূপশিং,

ঙসি লৈবাকসিদা পুম্নমক শুপচিল্লবা অওনবা কয়া পুন্না উরক্লিবসিগী মরমদি ঙসিদি লৈবাকসিগী ভিজন চপ চানা লৈজবগীনি‍। ভিজন অসি আত্মনিরভর ভারতকী মঙলান্নি‍। আত্মনিরভর ভারত অভিয়ান শুপ্নতগী মঙলান অমা নত্তে, নীংথিনা খল্লবা, নীংথিনা থৌরাং তৌরবা, পুম্নমক পুনশিল্লবা শেন্মিৎলোনগী লাল্লোং অমনি‍। ভারতকী ইন্দস্ত্রীশিংগী, ভারতকী নহাশিংগী স্কিলগী মতিং হেনগৎহন্দুনা ভারতপু মালেমগী মেনুফেকচরিং পৱার হাউস ওইহন্নবা লাল্লোং অমনি‍। ভারতকী তেক্নোলোজিগী হৈশিংবদা য়ুম্ফম ওইদুনা ভারতপু ইনোভেসনগী মালেমগী মকোন ওইহন্নবা লাল্লোং অমনি‍। মালেমগী চাউখৎ লমজেলদা অচৌবা থৌদাং লৌগদবা, ভারতকী হ্যুমেন রিসোর্সশিং অমসুং হৈশিংবগী মতিংবু মালেমগী থাক্তা পুখৎনবা লাল্লোং অমনি‍। অদুগা মসিগীদমক ভারতনা ঙসি রিগুলেতরী এনভাইরনমেন্ত অমা শেমগৎলিবসিদা লৈবাক্কী য়াইফনবা অমদি স্তেকহোল্দরশিংগী য়াইফনবা হায়বা অনিসিদা মান্নবা মীৎয়েঙ থম্নবা হোৎনরি‍। আত্মনিরভর ভারত অভিয়ানগী মখাদা ভারতনা দিফেন্স, কোইলা অমদি মাইনিংনচিংবা সেক্তরশিং অহানবদা হাংদোক্লে‍। পব্লিক সেক্তর এন্তরপ্রাইজেজকী মতাঙদা লৈঙাক্না মপুং ফাবা চৎন-পথাপ অমগা লোয়ননা মাঙদা চঙশিল্লি অমদি লৈঙাক্কী মথৌ তাদবা অয়াম্বা হীরমশিংদা প্রাইভেত এন্তরপ্রাইজেজশিংগীদমক্তা হাংদোক্তুনা থম্লি‍। হন্দক্তা এয়র ইন্দিয়াগা মরী লৈননা লৌখিবা ফিরেপ্না ঐখোয়গী অচেৎপা ফিরেপ অমসুং লুম্না লৌবা মতৌ উৎলি‍।

মরূপশিং,

হৌখিবা চহিশিংদা ঐখোয়গী মীৎয়েঙ অনৌবা তেক্নোলোজীগা মরী লৈনবা রিসর্চ অমসুং দেভেলপমেন্তকা লোয়ননা মসিবু মীচম মীয়ামগী পুন্সিদা য়ৌহন্নবগী লমদসু থমদুনা লাক্লি‍। হৌখিবা চহি ৭সিদদি স্পেস তেক্নোলোজীবু ঐখোয়না লাস্ত মাইল দেলিভরী, লিকেজ ফ্রী অমসুং ত্রান্সপেরেন্ত ওইবা লৈঙাক্কী মরুওইবা খুৎলায় ওইদুনা লাক্লি‍। লায়রবশিংগী য়ুম লম্বী অমসুং অতৈ ইনফ্রাস্ত্রকচর প্রোজেক্তশিং জিও-তেগ্গিং তৌবদা শীজিন্নবা ওইরবসু, সেতলাইত ইমেজরীবু চাউখৎ থৌরাংশিং য়েংশিনবদা ওইরবসু, ফসল বিমা য়োজনাগী মখাদা থুনা য়াঙনা ক্লেন সেত্তল তৌবা ওইরবসু, নাভিক সিস্তেম্না ঙামী করোর কয়াদা তেংবাঙ পীবা ওইরবসু, দিজাস্তর মেনেজমেন্তকা মরি লৈনবা প্লানিং ওইরবসু, থাক খুদিংদা স্পেস তেক্নোলোজীনা লৈঙাক্লোনবু ইচঙ থৌহনবদা অমদি তরু তরুবা ওইহনবদা মতেং পাংদুনা লাক্লি‍।

মরূপশিং,

তেক্নোলোজী মীওই পুম্নমক্কী খুৎনা লাম্বা ফংবা মফমদা লৈরবা মতমদা কমদৌনা অওনবা পুরকপগে হায়বগী খুদম অমা হায়রগদি দিজিতেল তেক্নোলোজীনি‍। ঙসি ভারতনা দিজিতেল ইকনমীগী মকোক্তা লৈরিবসিগী মরমদি ঐখোয়না দেতাগী পাঙ্গলবু খ্বাইদগী হেন্না লায়রবশিংদসু কান্নবা পীবদা শীজিন্নরিবসিনি‍। মরম অসিনা ঙসি ঐখোয়না কতিং ইজ তেক্নোলোজীগীদমক্তা স্পেস এক্সপ্লোর তৌরিবসিদা খ্বাইদগী মনীং থংবদা লৈরিবা মীওইদুবু নীংশিংগদবনি‍। তুংদা লাক্কদবা তেক্নোলোজীনা লাপ্পদগী লাপ্লবা খুঙ্গঙশিংদা লৈরিবা খ্বাইদগী লায়রবা মীওইশিংদুদা অফবা রিমোত হেল্থকেয়র, হেন্না ফবা ভর্চুএল এজুকেসন, নেচরেল দিজাস্তরদগী হেন্না ফবা অমদি মতিং লৈবা ঙাকশেল থৌরাং অসিনচিংবা পাম্বৈ কয়া লৈবাকসিগী কাঙলুপ খুদিংদা, কাচিন কোয়া শিনবা থুংনা য়ৌহনগদবনি হায়বসি ঐখোয়না নীংশিংগদবনি‍। মসিদা স্পেস তেক্নোলোজীগী থৌদাং য়াম্না চাউনা লৈগনি হায়বা ঐখোয় পুম্নমক্না খঙই‍।

মরূপশিং,

ভারত অসি মশাগী স্পেসকী লমদা এন্দ তু এন্দ কেপেবিলিতী লৈজবা খুৎ থেক্তুনা পাবা য়াবা লৈবাক খরগী মনুংদা অমনি‍। ঐখোয়না স্পেস তেক্নোলোজীগী হীরম খুদিংদা খুদম ওইনা সেতলাইত, লোঞ্চ ভেহিকল্স, এপ্লিকেসন্সনচিংবদগী হৌরগা ইন্তর প্লানেতরী মিসনশিংদা মায় পাকপা ফংলে‍। ঐখোয়না ইফিসিএন্সীবু ঐখোয়গী ব্রান্দ ভেল্যুগী মরুওইবা শরুক ওইহল্লি‍। ঙসিগী ইনফোর্মেসনগী মতমসিদা ঐখোয়না স্পেস এজকী মায়কৈদা চঙশিল্লিবা মতমসিদা ইফিসিএন্সীগী ব্রান্দ ভেল্যুবু ঐখোয়না হেন্না মপাঙ্গল কনখৎহনবা মথৌ তাই‍। স্পেস এক্সপ্লোরেসনগী থৌওং ওইরবসু নৎত্রগা স্পেস তেক্নোলোজীগী এপ্লিকেসনদা ওইরবসু, ইফিসিএন্সী অমদি এফোর্দেবিলিতীবু ঐখোয়না লেপ্পা লৈতনা য়োকখৎকদবনি‍। ইশাগী পাঙ্গলনা ঐখোয়না মাঙদা চঙশিল্লবদি স্পেস সেক্তরদা ঐখোয়গী মফম চাউনা কনবা হায়বসি শোয়দ্রবনি‍। হৌজিক ঐখোয় স্পেস কম্পোনেন্তকী সপ্লাইয়রদগী মাঙদা চঙশিন্দুনা এন্দ তু এন্দ স্পেস সিস্তেম সপ্লাই চেনগী শরুক ওইনবা ঙমলগনি‍। মসি ময়াম পুম্নমক্না, স্তেকহোল্দর পুম্নমক্না খোঙবু ওইনা চৎমিন্নবসিনা ওইথোকপা ঙমহল্লিবনি‍। খোঙবু অমগী শক্লোন্দা লৈঙাক্না তাঙ্কক খুদিংদা ইন্দস্ত্রীবু, নহা ওইরিবা ইনোভেতরশিংবু, স্তার্তঅপশিংবু ঙাক্লৌ পীরি অমদি তুংদসু পীখিগনি‍।

মরূপশিং,

স্তার্তঅপগী মপাঙ্গল কল্লবা ইকোসিস্তেম অমা পুরক্নবগীদমক প্লেতফোর্ম এপ্রোচ য়াম্না মরুওই‍। লৈঙাক্না ওপন এক্সেস পব্লিক কন্ত্রোল্দ প্লেতফোরম অমা শেম্লগা মদুবু ইন্দস্ত্রী অমদি এন্তরপ্রাইজশিংগী মফমদা ফংহনগদবা প্লেতফোর্ম অমা মথৌ তাই‍। হায়রিবা বেসিক প্লেতফোর্ম অদুদা ওন্ত্রপ্রিন্যুরশিংনা অনৌবা পাম্বৈশিং শেম-শাগদৌরিবনি‍। দিজিতেল পেমেন্তকীদমক লৈঙাক্না ইহান হানবদা য়ু.পি.আই. প্লেতফোর্ম শেমখি‍। ঙসিদি হায়রিবা প্লেতফোর্মসিদা ফিনতেক স্তার্তঅপকী নেতৱর্ক মপাঙ্গল কনহল্লি‍। স্পেস সেক্তরদসু অসিগুম্বা প্লেতফোর্মশিং শেমগৎনবা থবক চঙশিল্লি‍। ইস্রোগী ফেসিলিতীশিংদা এক্সেস পীবা ওইরবসু, ইনস্পেস ওইরবসু, নিউ ইন্দিয়া স্পেস লিমিতেদ ওইরবসু, অসিগুম্বা প্লেতফোর্ম খুদিংদা স্তার্তঅপ অমসুং প্রাইভেত সেক্তরশিংনা অচৌবা ঙাক্লৌ ফংলি‍। স্তার্তঅপ অমসুং প্রাইভেত এন্তরপ্রাইজশিংনা অনৌবা ওইথোকপা য়াবশিং থি-হুমবা তৌজনবগীদমক জিও-স্পেসিএল মেপিং সেক্তরগী চৎন-কাঙলোনশিংসু লায়থোকহল্লে‍। তোঙান তোঙানবা সেক্তরদা দ্রোন তেক্নোলোজী শীজিন্নবা য়ানবগীদমক দ্রোনগী মতাঙদসু অসিগুম্বা প্লেতফোর্ম শেমগৎলি‍।

মরূপশিং,

ঙসি ওক্তোবর ১১ অসি ইন্তরনেসনেল দে ওফ গর্ল চাইল্দ নুমিৎসু তাই‍। ভারতকী নুপী সাইন্তিস্তশিংনা মিসন ভারতকী মার্স মিসন মায় পাকপগী হরাওবা ফোঙদোকখিবগী ফোতোশিং ঐখোয় কনানা কাউবা ঙমগনি‍। স্পেস সেক্তরদা পুরক্লিবা অওনবা অসিনা সেক্তর অসিদা নুপীনা শরুক য়াবগী চাং হেন্না হেনগৎহল্লগনি হায়না ঐনা চপ চানা থাজৈ‍।

মরূপশিং,

ঙসি মফমসিদা মরূপ ময়াম পুম্নমক্না তোঙান তোঙানবা হীরমশিংদা অদোমগী ৱাখল্লোনশিং থম্বিরি‍। অদোমগী ইনপুত অমদি সজেসনশিং স্পেসকোম পোলিসী অমদি রিমোত সেন্সিং পোলিসী ফাইনেলাইজ তৌনবগী অরোইবা তানফম য়ৌরক্লবা মতমদা লাকপনি‍। স্তেকহোল্দর পুম্নমক্কী এক্তিব এঙ্গেজমেন্ততগী লৈবাকসিনা হেন্না ফবা পোলিসী অমা থুনা ফংবা ঙম্লগনি হায়না ঐনা থাজৈ‍।

মরূপশিং,

ঙসি ঐখোয়না লৌগদৌরিবা ফিরেপ, পোলিসীদা শেমদোক্কদৌরিবসিগী মহৈ তুংদা লাক্কদৌরিবা মীরোলশিংনা ফংগদৌরিবনি, লাক্কদৌরিবা চহি ২৫সিদা ফংগদৌরিবনি‍। ২০শুবা চহিচাদা স্পেস অমসুং স্পেসকী মপু ওইননবাগী লমজেলদা লৈবাক কয়াবু মতৌ করম্না খাইদোক্নবগে হায়বা ঐখোয়না উরে‍। হৌজিক ২১শুবা চহিচাসিদা স্পেস, মালেমবু পুনশিনহনবদা, মরুওইবা থৌদাং লৌননবা ভারতনা মাঙজিল থানা হোৎনবা মথৌ তাই‍। ভারতনা মাগী নীং তম্বগী ১০০শুবা চহিগী থৌরম পাঙথোকপা মতমদা ভারতনা মতমদুদা লৈগদৌরিবা থাক অদুদা ময়াম পুম্নমক্কী, ঐখোয় পুম্নমক্কী থৌদাং য়াম্না মরু ওইগদৌরিবনি‍। হায়রিবা থৌদাংগী ৱাখল্লোন অসিগা লোয়ননা ঐখোয় মাঙদা চঙশিনগদবনি‍। পুম্নমক্কী হোৎনজমলনা মীয়ামগী য়াইফনবা অমদি লৈবাক্কী য়াইফনবগীদমক কতিং ইজ তেক্নোলোজীগীদমক তরং মালংগী ওইথোকপা য়াবশিংবু ঐখোয়না অনৌবা পন্দোল অমা তম্না পুদুনা চৎকনি হায়না থাজবা থমজবগা লোয়ননা ময়া পুম্নমক্কী মফমদা য়াইফ পাউজেল পীজরি!

থাগৎচরি!

***