ভারতকী প্রধানমন্ত্রী

হিজ এক্সিলেন্সী বেঞ্জামিন নেতন্যাহু, ইজরেলগী প্রধানমন্ত্রী

ভারত অমসুং ইজরেলগী ললোন-ইতিক্কী লুচিংবশিং,

ইচল ইচে অমসুং ইচিল ইনাওশিং,

প্রধানমন্ত্রী  বেঞ্জামিন  নেতন্যাহু  অমসুং  ইজরেলগী  মীহুৎ  কাংবুবু লৈবাক মীয়ামগী মহুৎ শিন্দুনা ঐহাক্না তরাম্না ওকচরি । লৈবাক অনিমক্কী সিইওশিংনা শরুক য়াবা অসিনা হেন্না নুঙাইবা অমা ওইহল্লি । প্রধানমন্ত্রী  নেতন্যাহু  অমসুং ঐহাক্না  নাকল অনিগী সিইওশিংগী ফোরমগী খুথাংদা ভারত অমসুং ইজরেলগী ললোন-ইতিক্কী লুচিংবশিংগা লোয়ননা মহৈ য়ান্না খন্ন-নৈনখ্রে । খন্ন-নৈনখিবা অসিদগী অমসুং মমাং চহিদগী হৌখিবা সিইওশিংগী পার্তনরশিপ অদুদগী ঐহাক্না আশা য়াম্না থম্লি ।

মরূপশিং,

ইজরেল অমসুং মসিগী প্রজাশিংবু ঐহাক্না মতম পুম্নমক্তা ইকায় খুম্নজৈ । ইং ২০০৬তা গুজরাতকী মুখ্যমন্ত্রী ওইনা ঐহাক ইজরেল চৎখি । ভারতকী মায়কৈদগী অসিগুম্বা মখলগী অহানবা খোংচৎ ওইনা হৌখিবা চহিগী জুলাই থাদা অমুক হন্না ঐহাক ইজরেল চৎখি ।

মদু য়াম্না অখন্নবা খোংচৎ অমা ওইখি । হৌখিবা চহি খরা অসিদা ঐখোয়গী লৈনরিবা মরি অসি হেন্না পাকথোক চাওথোক্লে । ভারত-ইজরেলগী ওইবা অনৌবা পন্দুপ অমদা ঐখোয় হৌজিক লেপলি । ঐখোয়গী মরি অসি শেমগৎ শাগৎপদা ললোন-ইতিক অমসুং ইন্দস্ত্রীগী থৌদাং অসি য়াম্না পাক চাওখ্রে ।  

মরূপশিং,

ঙসি ইন্দিয়া-ইজরেল ইন্দস্ত্রীএল আরএন্দদি এন্দ তেক্নোলোজিকেল ইনোভেসন ফন্দ (আই৪এফ)কী মখাদা অপুনবা আরএন্দদি প্রোজেক্তশিংগীদমক অহানবা খোংচৎ হৌদোকপা অসিদা ঐহাক অপেনবা ফাওই, মদু মমাং চহিগী জুলাই থাগী ঐহাক্কী ইজরেল খোংচৎ মনুংদা লাওথোকখিবনি । ফন্দ অসিনা চহি মঙা হেন্না কান্নহল্লগনি । লৈবাক অনিমক্কী ইন্তরপ্রাইজশিংবু প্লেতফোর্ম অসিগী কান্নবা লৌনবা ঐহাক্না অকনবা মওংদা পুক্নিং থৌগৎলি । “দাতা এনালাইতিক্স” অমসুং “সাইবর স্পেস সেক্যুরিতী” অসিনচিংবা লমশিংদা অপুনবা আরএন্দদি প্রোজেক্তশিংগী খুথাংদা সাইন্স অমসুং তেক্নোলোজী একচেঞ্জ তৌননবা চপ মান্ননা খৌরাংনা ঙাইনরি ।

ইন্দিয়া-ইজরেল ইনোভেসন এন্দ তেক্নোলোজী মীফম ইং ২০১৮গী জুলাই থাদা ভারত্তা পাংথোক্লগনি তাবদা ঐহাক নুঙাইবা ফাওই । মীফম অসিনা অনৌবা তেক্নোলোজীশিংগী কো-দিবেলপমেন্ত হেঙ্গৎহল্লগনি । মসিগী গ্রাউন্দ-ৱার্ক অসি হংচিৎতগী হৌগদৌরিবা আইক্রিয়েত অদুদগী হৌরগনি । কেম্পস অসি হৌদোক্নবা ঐখোয় অনিমক গুজরাত চৎকনি, মদুনা মকোকথোংবা ইনোভেসন হব অমগুম পাকথোক চাওথোকহল্লগনি । 

মরূপশিং,

গুজরাতকী খুঙ্গং লমদমশিংদা ঐহাক্না প্রধানমন্ত্রী নেতন্যাহুবু পুদুনা চৎকদবগী মরমদি তেক্নোলোজী অমসুং ইনোভেসনগী অশেংবা শক্তী অদু মফম অসিদা মীচম প্রজাগী কান্ননবা শিজিন্নরি । মালেম পুম্বনা ইজরেলবু ইনোভেসন অমসুং ইনকুবেসনগী য়ুনিক ওইবা ইকো-সিস্তেম অমগা লোয়ননা স্তার্ত-অপ নেসন অমগুম খংনৈ ।

মসিগী ক্রিদিত অসি ইজরেলগী ইন্তরপ্রিনরশিংনা ফংলি । নখোয়না ইজরেলবু অচেৎপা, তংদু লৈতাবা অমসুং ইনোভেতিব ওইবা ইকোনোমী অমা ওইহল্লি । মীওই মিলিয়ন ৮ খক্তা লৈবা লৈবাক অমবু নখোয়না তেক্নোলোজীগী গ্লোবেল পৱার-হাউস অমগুম মশেক মঙাল থোকহল্লি ।

ইশিংগী তেক্নোলোজীবু ওইগেরা নত্রগা লৌউ-শিংউবগী তেক্নোলোজী ওইগেরা, চিঞ্জাক পুথোকপবু ওইরবশু, মদুবু শেম-শাবা নত্রগা লীদুনা থম্ববু ওইরবশু ইজরেলনা লংলবা খুদম অমা ওইরি । ফিজিকেল নত্রগা ভর্চুএল সেক্যুরিতীবু ওইরবশু, মদুনা কংফালদা, ইশিংদা নত্রগা স্পেসতবু ওইরবশু, নখোয়গী তেক্নোলোজী অসি ময়াম্না পাম্নরি ।    

মরূপশিং,

ভারত্তা, ঐখোয়না অহোংবা অমা পুরক্নবা মেক্রো অমসুং মাইক্রোগী থাক অনিমক্তা হৌখিবা চহি অহুমগী মমাদগী ফীভম চেৎপা খোংথাংশিং লৌখৎলি । ঐখোয়গী ফিদম্নিঙাই ওইবা অতেনবা ৱাফমদি: রিফোর্ম, পর্ফোর্ম অমসুং ত্রান্সফোর্ম অসিনি ।

খোংলৈ থুনা চাওখৎলক্লিবা অচৌবা ইকোনোমীশিংগী মরক্তা ঐখোয়শু অমা ওইরি । এফদিআই ইনফ্লো অসি চাদা ৪০ হেঙ্গৎতুনা খ্বাইদগী ৱাংবা ওইরি । নহারোলশিংবু হৈ-শিংহন্নবা অমসুং থবক পিনবা অকিবগী মশক ওইরবা থবক কয়া অমা পায়খৎলি । ঐখোয়গী মীশীংগী চাদা ৬৫দি চহি ৩৫ মখাগী মীওইশিংনি অমসুং তেক্নোলোজীগী ইখৌ লাংবা অদু হেঙ্গৎলক্লি ।

মসি ঐখোয়গী খ্বাইদগী মতাং চাবা তঞ্জা অদুনি, লোয়ন লোয়ননা শীংনবা অমসুনি । মসিগীদমক্তা ঐখোয়না স্তার্ত-অপ ইন্দিয়া কেম্পেন হৌদোক্লে । লম অসিদা ইন্দিয়া-ইজরেল পার্তনরশিপকীদমক পাক চাওরবা পোতেন্সিয়েল লৈরি । নাকল অনিমক্কী স্তার্ত-অপশিংগী মরক্তা ইন্দিয়া-ইজরেল ইনোভেসনগী থোং অসিনা শম্নহল্লগনি । তুংদুনা লৈরিবা পাক চাওরবা ৱাখল্লোন অদু ফংনবা ভারতকী ইন্দস্ত্রীশিং, স্তার্ত-অপশিং অমসুং মহৈ-মশিংগী লোইশংশিংনা ইজরেলগী মপাংশিংগা লোয়ননা পুন্না চৎমিন্ননবা ঐহাক্না হাইখ্রে ।

মরূপশিং!

ঙসিদি ঐখোয় মেনুফেকচর য়াম্না তৌবা লৈবাকশিংগী মরক্তা অমা ওইরে । অদুবু হৌজিক ফাওবা ঐখোয়না মদু মপুং ফানা পাংথোক্ত্রি । ঐখোয়গী নহারোলশিংগী ইনর্জী অদু হেঙ্গৎহন্দুনা ভারতপু গ্লোবেল মেনুফেকচরিং হব অমা ওইহন্নবা ঐখোয়না হোৎনরি । মসি ফংবদা মতেং ওইনবা ‘মেক ইন ইন্দিয়া’গী অনৌবা খোংথাং অসি পায়খৎলি । মসিগী খুথাংদা ঐখোয়না অনৌবা ভারত অমা শেমগৎনবা হোৎনরি ।

ললোন-ইতিক তৌরিবশিং অমসুং কম্পেনিশিংনা মায়োক্নরিবা রেগুলেতরি অমসুং পোলিসী ইশু কয়া ঐখোয়না লৌথোকখ্রে । ভারত্তা ‘ইজ ওফ দুইং বিজিনেস’ তৌবদা ঐখোয়না পুকচেল শেংনা থবক তৌরি ।

ওইরক্লিবশিং অদু মখাদা লৈরে:

• হৌখিবা চহি অহুমদা, ৱার্ল্দ বেঙ্ককী ইজ ওফ দুইং বিজিনেসকী ইন্দেক্সতা ভারতনা মফম ৪২ হাইগৎলে;
• চহি অনিগী মনুংদা ৱিপোগী গ্লোবেল ইনোভেসন ইন্দেক্সতা ঐখোয়না মফম ২১ হায়গৎপা ঙম্লে ।
• ৱার্ল্দ ইকোনোমিক ফোরমগী গ্লোবেল কম্পিতিতিবনেস ইন্দেক্সতা হৌখিবা চহি অনি অসিদা ঐখোয়না মফম ৩২ হায়গৎপা ঙম্লে- লৈবাক অমা হেক্তগী খ্বাইদগী ৱাংবা ওইরি;
• ঐখোয়না ৱার্ল্দ বেঙ্ককী ইং ২০১৬কী লোজিস্তিক্স পর্ফোরমেন্স ইন্দেক্সতা মফম ১৯ হায়গৎলে;
• য়ুএনসিতিএদিনা খন্দোক্লবা মকোকথোংবা এফদিআই দেস্তিনেসন ১০গী মনুংদা ঐখোয় য়াওরি ।

ঐখোয়না মশিং য়াম্না ফজবা মওংদা তৌবা পাম্লি ।

কেপিতেল অমসুং তেক্নোলোজী চংশিল্লকপা ঙম্নবা, ঙাকশেল য়াওনা অয়াম্বা সেক্তরশিংদা এফদিআইগীদমক ঐখোয়না হাংদোক্তুনা থম্লে ।

হৌজিক ঐখোয় ওপন ইকোনোমী য়াম্না ওইবশিংগী মনুং চল্লে । নুমীৎ খরগী মমাংদা, সিঙ্গল ব্রান্দ রিতেল অমসুং কন্সত্রক্সন দিবেলপমেন্তদা ঐখোয়না এফদিআই চাদা ১০০ য়াহনখ্রে । ঐখোয়না ঐখোয়গী নেস্নেল কেরিয়র এয়র ইন্দিয়াবুশু মীরমগী শেল থাদরিবশিংগীদমক হাংদোক্তুনা থম্লে । ভারত্তা ললোন-ইতিক তৌবদা ঐখোয়না নুমীৎ খুদিংগী লায়থোকহন্নবা হোৎনরি । খাজনা লৌবগী থৌওংদা অহোংবা কয়া অমা পুরক্লে । জিএসতি মায় পাক্না অমসুং অপনবা য়াওদনা চৎনরে ।

মরূপশিং,

ভারত্তা শেম-শানবগীদমক তোঙান তোঙানবা ইজরেলগী কম্পেনিশিংনা ভারতকী কম্পেনিশিংগা লোয়ননা খুৎশম্নদুনা চৎমিন্নরি । এদভান্স ৱাতর তেক্নোলোজীশিং অমসুং এগ্রি তেক্নিকশিং, দিফেন্স অমসুং সেক্যুরিতী সিস্তেমশিং ভারত্তা লিংখৎলে । মদুগা মান্ননা আইতি, ইরিগেসন অমসুং ফার্মাগুম্বা তোঙান তোঙানবা সেক্তরশিংদা ভারতকী কম্পেনিশিং ইজরেলদা লিংখৎলে ।

ভারতকী দিবেলপমেন্ত এজেন্দা অসি য়াম্না পাক চাওই । মসিদা ইজরেলগী কম্পেনিশিংগীদমক পাক চাওরবা ইকোনোমিগী তঞ্জা অমা য়াওরি । ঐহাক্না মশিং য়াম্লবা ইজরেলগী প্রজাশিং, ললোন-ইতিক তৌরিবশিং অমসুং কম্পেনিশিংবু ভারত্তা লাক্তুনা থবক তৌবিরনবা বার্তন তৌজরি ।

ভারতকী সরকার অমসুং প্রজাশিংগা লোয়ননা ললোন ইতিক তৌরিবা কাংলুপ্নশু খুৎশম্ননা চৎমিন্ননবা থৌরাং তৌদুনা লৈরি । নখোয়গী কম্পেনি পুম্নমক মায় পাকপা ওইরশনু হায়না ঐহাক্না য়াইফ পাওজেল পিজরি । ফাস্ত-ত্রেক্কিং ইন্দিয়া-ইজরেল ত্রেদ এন্দ ইকোনোমিক কোলাবোরেসনদা মহাক্না লেপ্পা লৈতনা পুক্নিং থৌগৎপগীদমক ঐহাক্না প্রধানমন্ত্রী নেতন্যাহুবু থাগৎচরি । ঐখোয়গী পার্তনরশিপ অসিনা তুংদা মায় পাকপা  কয়া অমা  পুরক্কনি হায়বা ঐহাক্না থাজবা খম্লি ।

থাগৎচরি!