ভারতকী প্রধানমন্ত্রী

য়োর এক্সিলেন্সী, ঐহাক্কী ইচলনুপী প্রধান মন্ত্রী তাকাইচী,

লৈবাক অনিমক্কী বিজিনেসকী লুচিংবশিং,

খুরুমজরি!

কোনিচি ৱা

ইন্দিয়া-জাপান জোইন্ত ইকোনোমিক ফোরমদা ময়াম পুম্নমক্কী মরক্তা শরুক য়াবা অসিদা ঐহাক য়াম্না নুংঙাইবা ফাওই।

মফম অসিদা লৈরিবা কম্পনী কয়া অসি ভারতকা চহি কয়াদগী মরী লৈন্দুনা লাক্লি। খরনা চহি চা অমদগী হেন্না ভারতকী খোঙচৎকী শরুক অমা ওইদুনা লাক্লি।

ফোরম অসিদা য়াওরিবা ঐখোয়গী অনৌবা পার্তনরশিংদা, ভারত-জাপানগী মায় পাকপগী ৱারী অসিগী শরুক অমা ওইরকপদা ঐহাক্না থম্মোয় শেংনা নুংঙাইবা ফোংদোকচরি।

মরুপশিং,

ভারত-জাপানগী মরী অসি তশেংনা অখন্নবা অমনি।

ঐখোয়গী ইকোনোমিক পার্তনরশিপকী মায় পাকপগী মশক থোকপা খুদম কয়া অমা লৈরি।

মতম খরগী মমাংদা ঐখোয়না হরিয়ানাগী খারখোদাদা মারুতি সুজুকীগী অনৌবা মেনুফেকচরিং প্লান্ত অমা শঙ্গাখি। ঙসিদি, মালেমগী ওইনা সুজুকীগী কারশিংগী শরুক অহুম থোকপগী অনিরোম ভারত্তা শাখ্রে অমসুং লৈবাক ১০০ হেনবদা থাদোকখ্রে।

প্রধান মন্ত্রী তাকাইচী, ঐহাক্না খঙলে মদুদি অদোম্না মোতোরসাইকল য়াম্না পাম্মি। ভারত্তা কাৱাসাকি, য়ামাহা অমসুং হোন্দানা পুথোকপা মোতোরসাইকলশিং ঙসি মালেমগী কৈথেলশিংদা থাদোকপা ঙম্লিবা অসিদা ঐখোয়না নুংঙাইবা ফাওই।

মসিগা মান্ননা, এয়র কন্দিসনরশিং, পৱার গ্রিদ ইক্বিপমেন্ত, প্রেসিজন মেন্যুফেকচরিং, নৎত্রগা মেদিকেল তেক্নোলোজী ওইগেরা, জাপানগী এক্সপর্তীস অমসুং ইনভেস্তমেন্তনা ভারতকী স্পীদ অমসুং স্কেলগা পুনশিনবা মতমদা, মালেম পুম্বনা কান্নবা ফংগনি।

মরুপশিং,

ঙসিদি, মালেমগী শেন্মিৎলোন অসি সপ্লাই চেনগী অপনবা, ললোন-ইতিক্কী মতাংদা তংদু লৈতাদবা অমসুং মালেমগী দিমান্দ হন্থরকপগী মায়োক্তা লান্থেংনরি।

অদুম ওইনমক হায়নবা অমা লৈ:

“পুন্সিনা অৱাবা পীরকপা মতমদা মপাঙ্গল কনবা মীনা হেন্না কন্না হোৎনৈ।”

ভারত অসি মালেমগী খ্বাইদগী য়াংনা চাউখৎলক্লিবা মরুওইবা ইকোনোমী অমনি।

হৌখিবা শেনবা চহিদা, ভারতনা জি.দি.পি.গী গ্রোথ রেৎ চাদা ৭.৭ ওইবগী রেকোর্দ তৌখি।

মসি খক্তা নত্তে, হৌখিবা চহি ১২ অসিদা ঐখোয়না কাইজেনগী ৱাংঙুলোল – লেপ্পা লৈতনা ফগৎলকপগী ৱাখল্লোন অসি তুং ইন্দুনা ভারতকী শেন্মিৎলোনগী দি.এন.এ. অসিবু অহোংবা পুরকখি।

থা খরগী মমাংদা ঐখোয়না তেক্সেসন, গভর্নান্স অমসুং ইজ ওফ দুইং বিজিনেসতা অনৌবা জেনরেসনগী রিফোর্মশিং হৌদোকখি।

ঐখোয়না শেন্মিৎলোনগী সেক্তর খুদিংমক প্রাইবেৎ সেক্তরনা হেন্না শরুক য়ানবগীদমক হাংদোক্লি।

মসিগা লোয়ননা ঐখোয়না মরুওইবা সেক্তর কয়াদা ইন্সেন্তিবশিং পীরি মসিনা ময়াম পুম্নমক্তা কান্নবা ফংগদবা খুদোংচাবশিং ফংহল্লি।

মসিনা মরম ওইদুনা, মথং-মনাও নাইনা মরিশুবা চহিগী ওইনা, জাপান বেঙ্ক ফোর ইন্তর্নেস্নেল কোওপরেসন (জে.বি.আই.সি.) না পাংথোকপা সর্ভেদা ভারত অসি জাপানগী বিজিনেসশিংগীদমক খ্বাইদগী পাম্নবা মফম অমা ওইনা লৈরি।

ঙসি, ঐহাক্না নখোয় পুম্নমক্কী মরক্তা অনৌবা খোঙথাং অমা শিয়র তৌজনীংই। প্রধান মন্ত্রীগী লোইশঙ (পি.এম.ও.) না অখন্নবা জাপান বিজিনেস ৱিক অমা শীনগনি। খোঙথাং অসিগী মনুংদা পি.এম.ও.গী মকোক থোংবা ওফিসিএলশিংনা নহাক্কা হকথেংননা ৱারী শানগনি, নহাক্কী ৱাফমশিং তাগনি অমসুং ভারত্তা জাপানিজ ইনভেস্তমেন্ত অমসুং পার্তনরশিপ হেনগৎহন্নবগী পান্দমগা লোয়ননা ইজ ওফ দুইং বিজিনেস হেন্না ফগৎহন্নবগী মতাংদা কুপ্না খন্ন-নৈনগনি।

মরুপশিং,

ঙসি, প্রধান মন্ত্রী তাকাইচী অমসুং ঐহাক্না ঐখোয়গী পার্তনরশিপ অসি হেন্না মপাঙ্গল কনখৎহন্নবা ৱারেপ লৌখি। ঐখোয়না ইকোনোমিক সেক্যুরিতী, আর্তিফিসিএল ইন্তেলিজেন্স, দিফেন্স অমসুং হেল্থকেয়র য়াওনা হিরম কয়াদা য়ান-ৱারোলশিং খুৎয়েক পীনখ্রে। মসিনা পার্তনরশিপ অসিবু তুংলমচৎতা য়ুম্ফম ওইবা অমসুং তশেংনমক্কী ঙমখৈ লৈতবা ওইহল্লগনি।

ঐখোয়গী সরকার অনিগী মরক্তা স্ত্রেতেজিক সিনর্জী, অমগা অমগা থাজনবা অমসুং খ্বাইদগী মরুওইনা, ক্লিয়রিতী লৈ।

মান্নবা ভিজন অসিবু মশক থোকপা মহৈদা ওন্থোকপা অসি হৌজিক অদোমগী থৌদাংনি।

মরুপশিং,

লাক্কদৌরিবা দিকেদ অসিদা ভারত্তা জাপানিজ ইনভেস্তমেন্তনা য়েন ত্রিল্লিয়ন ১০গী পান্দম ফংহনবতা নত্তনা হেনগৎহনবদসু নখোয়না পুন্না হোৎনমিন্নবা তাই।

মসিগা লোয়ননা ঐখোয়না মথংগী চহি ১০দা ভারত্তা থবক তৌরিবা জাপানিজ কম্পনীশিংগী মশিং শরুক অনি হেনগৎহন্নবা হোৎনগদবনি।

মরুপশিং,

ঐহাক্না ময়ামদা ভিজন অমা শিয়র তৌবা পাম্মি।

ঐহাক্না জাপানগী তেক্নোলোজী অমসুং ভারতকী কৈথেলগী পোতেন্সিএলনা মালেমদা সেমিকন্দক্তরশিং, ফার্মাস্যুতিকেল অমসুং ক্রিতিকেল মিনরেলশিংদা রেসিলিয়েন্ত সপ্লাই চেনশিং ফংহন্নবা পুন্না চৎমিন্নবা মালেম অমা শেম্বা পাম্মি।

জপানগী কেপিতেল অমসুং ভারতকী পান্দম অসিনা পুন্না শিপ বিল্দিং, মোবিলিতী অমসুং ক্লিন ইনর্জীদা অনৌবা গ্লোবেল লিদরশিপ অমা শেম্বা ঙম্বা।

ভারত অমসুং জাপানগী স্তার্ত-অপ ইকোসিস্তেমশিংনা আর্তিফিসিএল ইন্তেলিজেন্স, ক্বান্তম তেক্নোলোজী অমসুং বাইওতেক্নোলোজীদা মালেমগী নেক্স জেনরেসনগী সোলুসনশিং পুথোকপা ঙম্বা।

অমসুং এয়রস্পেস অমসুং দিফেন্সকী লমদা মমাংদা অমুক্তা ওইখিদ্রিবা কোওপরেসন অসিনা ঐখোয়বু মালেমগী সেক্যুরিতীদা হেন্না মপাঙ্গল কনখৎহনবদা মতেং পাংবা ঙম্বা ওইহনবা।

মরুপশিং,

থাজবা অমসুং ওপ্তিমিজমদা য়ুম্ফম ওইবা পার্তনরশিপ অসিগী খুত্থাংদা, ঐখোয় নাকল অনিমক্কী চাউখৎনবা অমসুং মালেমগী য়াইফনবা লম্বী য়াৎলসি।

তোয়োতানাসু হায়রি “লেৎস গো প্লেসেস”!

হন্না-হন্না থাগৎচরি।

খঙহঞ্জবা: মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***