ভারতকী প্রধানমন্ত্রী

ইন্দিয়া তুদে গ্রুপকী চেয়রমেন অমদি এদিতর-ইন-চীফ অরুন পুরী,

অদোমগী গ্রুপকী জর্নেলিস্ত মরূপ পুম্নমক,

ন্যুজ রুমদা হৌজিক থবক তৌরিবা জর্নেলিস্ত পুম্নমক,

মফম অসিদা তিনবীরিবা অতোপ্পা শক্নাইরবশিং অমদি ঐহাক্কী মরূপশিং,

ইন্দিয়া তুদে কনক্লেবকা মরী লৈনরিবা পুম্নমকপু ঐহাক্না হন্না-হন্না য়াইফ-পাওজেল পীজরি।

অদোমগী গ্রুপ্না স্বচ্ছ ভারত মিশন্দা লৌখিবা থৌদাং, মীয়াম্বু মীকপ থোকহনখিবা অদু থাগৎনীংঙাইনি।

মরূপশিং,

ঙসিগী ভারত অনৌবা ভারতনি। অহোংবা পুরক্লবা ভারতনি।

ঐখোয়গীদমক্তা থৌনা ফরবা জৱান অমমমগী ঈগী মমল নাইদে।

মমাংদদি কমদৌরম্মি, মীওই কয়া অমা শিরবসু, জৱান কয়া অমা মরৈবাক্কীদমক থৱাই থাখ্রবসু,
অচৌবা খোংথাং অমত্তা লৌখৎখিদে।

অদুবু হৌজিক্তি কনাগুম্বা অমত্তনা ভারত্তা মীৎনা ফাওবা কন্না য়েংনবা মথৌনা লৈত্রে।

ঐখোয়গী সরকারনা লৈবাক্কী য়াইফনবা ৱারেপ খুদিংমক লৌনবা থৌরাং তৌরি।

ঙসিদি ভারত অনৌবা লৈবাক ঙাকলোন অমসুং থৌওংদা চৎলি অমদি ঙসি মালেম পুম্বনসু মদু খঙবা হৌরে।
মরূপশিং, ঙসিগী অনৌবা ভারত অসি কীবা খঙদবা, থৌনা ফবা, শাথীবা ওইরে। মরমদি ঙসি সরকার অসি ভারত মচা কোতি চামগা কুনথ্রাগী থবকশিং অমসুং থাজবা অদুগা লোয়ননা মাংলোমদা চংশিল্লি।

ভারত মচাশিংগী অমত্তা ওইনা পুনখিবা অসিনা লৈবাক্কী মনুং অমসুং মপান্দা লৈবাক্কী মায়োক্তা লৈবা মীওই খরদা অকীবা অমা পোকহল্লে।

ঙসিগী ওইরিবা ফিভম অসিদা, ঐহাক্তি কীরিবা অসি অফবনি হায়জনীংই।

য়েক্নবদা ভারতকী পাঙ্গল থৌনাগী অকীবা লৈরিবা অসি অফবা অমনি।

তেরোরিস্তশিংগী লুচিংবশিংদা লান্মীশিংগী থৌনাগী অকীবা অমা লৈরিবা অসি ফৈ।

মীচেনশিংদসু আইন অমদি মখোয়গী মরন-মথুম ফাজিনবগী লৈরিবা অকীবা অসি অফবা অকীবা অমনি।

শেঞ্জা-থুমজা তৌরিবা লুচিংবশিংসু জেল চংবগী লৈরিবা অকীবা অসি অফবা অকীবা অমনি।

শেঞ্জা-থুমজা তৌরিবশিংদা লৈরিবা আইনগী অকীবা অসি অফবা অকীবা অমনি।

মরূপশিং,

নীংতম্লবা মতুং চহী তরাগী খুজিং কয়া অসিদা লৈবাক অসিনা খাংবা য়াবা খাংলক্লে।

হৌজিক্তি অনৌবা ভারত অসিনা মশাগী পাঙ্গল-শক্তি, মশাগী লৈজরিবা খুৎাইশিংদা থাজবা থমদুনা মাংলোমদা চংশিল্লি।
অদুবু মরূপশিং, মাংলোমদা চংশিল্লিবা ভারতকী মাংদা শিংনবা অমা লৈরি।

শিংনরিবা অদুদি মশামক্কী মরমদম্বু য়ানীংদবা উৎপা অমদি মশামক্কী মরমদম্বু নোক্নরগা মশাগী অপেনবা ফংবরোমদা চৎলিবা অসিনি।

ঙসি লৈবাক পুম্বনা ঐখোয়গী লান্মীগা লোয়ননা লেংমান্ননা অমত্তা ওইনা লেপ্লিবা মতম অসিদা মীওই খরনা লান্মীদা চিংনবা পোক্লিবা অসিদা ঐহাক্না অঙকপা ফাওই।

নাকল অমরোমদা ঙসি মালেম পুম্বনা তেরোরিজমগী মায়োক্তা লান্থেংনবদা ভারতকী মায়কৈদা লেপ্লিবা মতম অসিদা পার্তী খরনা ঐখোয়না তেরোরিজমগী মায়োক্তা লান্থেংনরিবা অসিদা চিংনবা পোক্লি।

মখোয়না ফোংদোকখিবশিং অদু, মখোয়গী আর্তিকলশিং অদু পাকিস্তানগী পার্লিয়ামেন্ত, রেদিও অমসুং তেলীভিজন চেনেলশিংনা ভারতকী মায়োক্তা শিজিন্নরি।

মখোয়শিং অসি মোদীগী মায়োক্তা লৈরম্বদগী লৈবাক্কী মায়োক্তা লৈরদুনা লৈবাক অসিবু অমাং অতা থোকহনবা হৌরক্লে।
ঙসি ঐহাক্না মফম অসিদগী অসিগুম্লবা মীওইশিং অসিদা হংজনীংবদি অদোম্না ঐখোয়গী লান্মীগী পাঙ্গলদা থাজবা থম্বীব্রা নত্ত্রগা চিংনবা পোকপীব্রা?

ঐহাক্না মখোয়দগী খঙনীংলিবদি অদোম্না ঐখোয়গী লান্মীনা হায়খিবা ৱাফমদা থাজবা থম্বীব্রা নত্ত্রগা ঐখোয়গী লৈবাক অসিদা তেরোরিজম্বু থৌগৎলিবা মীওইশিং অদুদা থাজবা থম্বীব্রা হায়বসিনি।

ইচিল-ইনাও অমসুং ইচল-ইচেশিং,

ঐহাক্না অসিগুম্লবা মীওইশিং অমদি পার্তীশিং অদুদা হায়জনীংবদি মোদীদি লাক্লম্লগা চৎখিগনি অদুবু ভারত্তি মতম পুম্নমক্তা লৈহৌগনি। মরম অদুনা ঐহাক্না মখোয়দা হায়জনীংবদি চানবীদুনা রাজনীতিগী কান্ননবগীদমক লৈবাক্কী সেক্যুরিতীগা লোয়ননা শান্নবা থাদোকপীরো, ভারতকী মপাঙ্গল হন্থহনবা তোকপীরো।

মরূপশিং,

রাফেলগী অৱাৎপা লৈরিবা অসি ঙসিদি লৈবাক অসিনা ফাওরি।

ঐখোয়গী নাক্তা রাফেল লৈরম্লগদি কমদৌরমগনি হায়না ঙসিদি হিন্দুস্তান অপুনবনা খোন্থোক অমত্তদা হংলি।

রফেলগী মতাংদা অহানবদা মসাগী ওইজবা থিদুনা অদুগা হৌজিক্না রাজনীতিনা মরম ওইদুনা লৈবাক অসিগী য়াম্না মাংজখ্রে।
ঐহাক্না অসিগুম্লবা মীওইশিং অসিদা ময়েক শেংনা খঙহনজনীংবদি মোদীগী মায়োক্তা লেপকে হায়রবসু লেপ্পীয়ু, ঐখোয়গী স্কিমশিংদা অৱাৎপা-অশোয়বা পুথোকপীয়ু, মদুনা কান্নবা ফংলি নত্ত্রগা ফংদ্রি হায়বদুদা সরকার অসিবু চৈবীয়ু থাংবিয়ু, অদোম্বু মতম পুম্নমক্তা তরাম্না ওকচরি, অদুবু লৈবাক্কী সেক্যুরিতীগী কান্নবশিং, লৈবাক্কী কান্নবগী মায়োক্তা লৈবীগনু।
অদোমনা খঙজিনবীগদবদি মোদীগী মায়োক্তা লৈতবা য়াদে হায়বগী থৌওং অদুনা মসুদ অজহর অমদি হাফিজ শয়েদগুম্বা তেরোরিস্তশিংবু হেন্না মপাঙ্গল কনখৎহনখিনবা থৌওং ওইখিবা য়াই।

মরূপশিং,

লৈবাক অসিবু চহী কয়া লৈঙাকলম্বা মখোয়শিং অদুনা পোৎশক অনিদা থৱাই য়াওরম্মি- কোকপীবা অমদি য়ানবা পুরকপা।
কোকপীবা অমদি য়ানবা পুরকপগী কলচরনা ঐখোয়গী লৈবাক্কী চাউখৎ-থৌরাংগী খোংচৎতা চাউনা অমাংবা পীরি।
মসিনা চাউনা শোকহনখিবা অসি ঐখোয়গী লৌমীশিং অমসুং জৱানশিংদনি।

অহানবদা ঐহাক দিফেন্স সেক্তরগী মতাংদা হায়জগে।

মরূপশিং,

ঐখোয়গী আর্ম ফোর্সশংনা মহৌশানা বুলেৎ প্রুফ জেকেৎশিং দরকার ওই হায়বসি ময়াম্না খঙনরবা ৱাফম্নি।

২০০৯দা ঐখোয়গী ফোর্সশংনা বুলেৎ প্রুফ জেকেৎ লাখ অমগা লিশিং মরিফু তরুক্কীদমক হায়জখি।

নখোয়না খঙলুবদা ইকাইবা ফাওগনি মদুদি ২০০৯দগী ২০১৪ ফাওবদা বুলেৎ প্রুফ জেকেৎ অমা ফাওবা ফংখিদে।

ঐখোয়গী সরকারগী মতমদা ঐখোয়না বুলেৎ প্রুফ জেকেৎ লাখ অনি লিশিং কুন্থরা পুরকখ্রে।

কোকপীবগী অচেৎপা পোলিসী লৈতবনা মরম ওইদুনা এগ্রীকলচরদা চৈনা ফংখি।

কোকপীবা অসিনা লাইরবশিংবু মখা তানা লাইরদুনা লৈহনলি অমদি পোলিতিকেল ক্লাসকী থৌজাল মখাদা লৈহল্লি।
মসিগী খ্বাইদগী চানবা খুদমদি ফার্ম লোন কোকপীবনি।

চহী তরা খুদিংগী, য়ু.পি.এ.না ফার্ম লোন কোকপীবগী ৱাখল্লোনগা অমগা লোয়ননা লাক্লি।

মসিনা লৌমী চাদা ২০ খক্তদা কান্নবা ফংহল্লি।

মখোয়না ফার্ম লোন কোকপীবগী মীংদা মীখল থেংনবা পাম্মি।

ঐখোয়না তোপ তোপ্পা অমা পায়খৎলি।

প্রধান মন্ত্রী কিশান সম্মান নিধী, লৌমীশিংগী য়াইফনবগীদমক কমপ্রেহেন্সিব স্কিম অমা।

কোকপীবা নত্তবা নত্ত্রগা য়ানবা পুরকপা নত্তবা- শুপ্নতগী অফবা শীংথানীংঙাই ওইবা থৌদৌ।

ভারতকী লৌমী কোতী তরানিথোইদা তাঙ্কক অহুমলক্তা লুপা লিশিং তরুক।

স্কিম অসি ফেব্রুৱারী অমদা লাওথোকখি অমদি ফেব্রুৱারী ২৪দা হৌদোকখি। ঐখোয়না লেপ্পা লৈতনা পুং ২৪ থবক তৌদুনা নুমীৎ ২৪দা মসি হৌদোকখি।

মমাংদদি, য়াম্না মরুওইবা ৱাহং অমগী ৱারেপ লৌবদা অসুক য়াম্বা মতম অসি লৌরম্মি- মদুগী মতুং ইমুংগী মীওই অমগী মমীংদা স্কিম অদু চত্থগনি।

কোকপীবা অদু নত্তবদা, প্রধান মন্ত্রী কিসান সম্মান নিধী অসি অশাংবা মতম অমগী অদুগা মতম কুইনা চৎকদবা মতেংনি।

মরূপশিং, ঐখোয়গী থা য়াঙ্খৈমঙা, অমদি অতোপ্পগী চহী য়াঙ্খৈমঙা গোবর্নান্সতা মান্নদবা খোংথাং অনি থেংনরি।
মখোয়গীনা ‘তোকন এপ্রোচ’ অমা লৈখি, ঐখোয়গীনা ‘তোতেল এপ্রোচ’ অমা লৈরি।

ৱান রেঙ্ক ৱান পেন্সনগী ৱাফম লৌরশি।

চহী নিফু শুরবা দাবী অদু মতম কুইনা ফাজিন্দুনা থমখি অদুবু ২০১৪গী মখোয়গী অরোইবা বজেত্তা লুপা কোতী চামঙাগী শেনফম অমা হাপচিনখি। শেনফম অসি দরকার ওইরিবা অদুগা য়াম্না খেৎনরি হায়বা মখোয়না খঙখি। অদুবু খুদমগী ওইনা অদুমক হাপখি।

অমদি মীখল মায়োক্নখি।

২০১৪গী মমাংদা মখোয়গী ভোৎ ফংনবা নমথাক্তা- গ্যাস সিলিন্দর ৯দগী ১২দা হেঙ্গৎহনখি।

খন্দুনা য়েংবীয়ু, অসুক চাউখ্রবা জাতিগী থাক্কী পার্তী, চহী কয়া সরকার পায়রক্লবা মখোয়না সিলিন্দর ৯দগী ১২দা মীখল থেংনখি।

খুদমশিং পীবগী অসিগুম্লবা মওং মতৌ অসি ঐখোয়না য়াদে।

করিগুম্বা থবক তৌবা তারগদি, তোতেলিতীদা তৌগদবনি, তোকনিজমদা নত্তে।

মদুনা মরম ওইরগা, ঐখোয়গী অনৌবা খোংথাং পুম্নমক চাদা চামা পাংথোক্নবা পান্দম থম্লি।

জন ধন – ফাইনান্সিয়েল ইনক্লুজন অমদি বেঙ্কিং ফোর ওল।

হাউজিং ফোর ওল – ২০২২ ফাওবদা ভারতমচা খুদিংমক্তা য়ুম অমমম।

মায়কৈ অসিদা য়ু.পি.এ.না য়ুম লাখ কুনমঙা শাখিবা অদুগা চাংদম্নবদা য়ুম কোতী অমা মখায় হান্ননা শাখ্রে।

হেল্থকেয়র ফোর ওল- আয়ুশ্মান ভারত – স্কিম অসিনা ভারত মচা কোতী ৫০দা কান্নবা ফংহল্লগনি।

ৱান রেঙ্ক ৱান পেন্সন – মখোয়গী লুপা কোতী ৫০০গা চাংদম্নবদা ৱান রেঙ্ক ৱান পেন্সনগী শরুক অমা ওইনা এন.দি.এ. সরকারনা লুপা কোতী লিশিং কুনথ্রামঙা পীখ্রে।

উজ্জ্বলা য়োজনা- মখোয়না সিলিন্দর ৯দগী ১২ ফাওবগী মরক্তা চিল্লিঙৈ মতমদা ঐখোয়না ইমুং কোতী কয়াদা মৈখু চেন্দবা চাকশং পীনবা থবক তৌরি।

পাৱর ফোর ওল – খুঙ্গং খুদিংমক অমদি য়ুমথোং খুদিংমক মৈ ফংবা ওইগদবনি।

শাংলবা চহী হুমফুতরাদগী মমদুনা লৈরক্লবা খুঙ্গং ১৮,০০০দা মৈ ফংহনখ্রে অদুগা হৌজিক য়ুমথোং খুদিং মৈ ফংহনবদা মীৎয়েং থম্লি।

অদুনা, ঐখোয়না স্পীদ অমদি স্কেল অনিমক্কা লোয়ননা থবক তৌরিবা অদু ময়াম্না উবা ফংলে।

মরূপশিং,

ঙসি ফাওবা অফবা ৱাহংশিং হংবগীদমক খঙনরি।

অদুবু ঙসি ঐহাকসু হৌজিক ফাওবগী ৱাহং খরা হংজগে।

ঙসি ফাওবা করিগীদমক্তা মীওই কোতি কয়া লমহাং-তুমহাংদা খোংহাম-খুৎহাম তোইরম্লিবনো?

ঙসি ফাওবা মীমান্নদ্রবশিংগীদমক্তা সরকারনা পুক্নীং চংলমদবা করিগীনো?

ঙসি ফাওবা গঙ্গাগী ঈশিং অসুক য়াম্না মোৎশিল্লম্বা করিগীনো?

ঙসি ফাওবা করিগীদমক্তা অৱাং-নোংপোকপু মীরাইবীরম্লিবনো?

ঙসি ফাওবা ঐখোয়গী লান্মীগী থৌনা ফরবশিংগীদমক নেস্নেল ৱার মেমোরিয়েল লৈরমদ্রিবা করিগীনো?

ঙসি ফাওবা ঐখোয়গী থৌনা ফরবা পুলিস পর্সোনেলশিংগীদমক নেস্নেল পুলিস মেমোরিয়েল লৈরমদ্রিবা করিগীনো?

ঙসি ফাওবা করিগীদমক্তা আজাদ হিন্দ ফৌজগী সরকারবু নীংশিংদুনা লাল কিলাদা ফিরাল পাইহনখিদবগে?

করিগুম্বা ঐহাক্না ৱাহংশিংগী পরিং অসি চত্থদুনা লৈরগদি পুং কয়া অমগী অখন্নবা বুলেতিন ওইবা য়াই।

অদুম ওইনমক ঐহাক মফম অসিদা ৱাহং হংবা খক্তগী লাকপা নত্তে, অদোম্না ৱাহং হংদ্রবসু পাওখুম খরদি পীনীংই, মদুদি ঐখোয়না করি ফংবা ঙমখ্রে অমদি করি ফংবা ঙম্লি।

ঙসি ঐখোয়না খোংজেল য়াম্না য়াঙনা ভারত্তা লাইরবা কোকহনলি।

ঙসি ঐখোয়না খোংজেল য়াম্না য়াঙনা মাংলোমদা চংশিল্লিবা ইকোনোমী ওইরে।

১৯৯১দগী য়েংলগদি হৌখিবা চহী মঙাগী মতমগী মনুংদা ঐখোয়না জি.দি.পি. গ্রোথ খ্বাইদগী য়াংবা থাক্তা হেঙ্গৎহল্লে।

১৯৯১দগী য়েংলগদি হৌখিবা চহী মঙাগী মতমগী মনুংদা ঐখোয়না খ্বাইদগী য়াংবা থাক্তা ইনফ্লেসনগী চাং হন্থহল্লে।

ঙসি লৈবাক অসিদা খোংজেল য়াম্না য়াঙনা লম্বী-থোংশিং শেমগৎলি।

ঙসি খোংজেল খ্বাইদগী য়াম্না য়াঙনা রেলৱেগী দিবেলপমেন্ত থবকশিং পায়খৎলি।

ঙসি ঐখোয়না খোংজেল খ্বাইদগী য়াম্না য়াঙনা লাইরবশিংগীদমক য়ুম শাবগী থবক চত্থরি।

ঙসি লৈবাক অসিদা খোংজেল খ্বাইদগী য়াম্না য়াঙনা মোবাইল মুন্যুফেকচরিং য়ুনিৎ লিংখৎপগী থবক পায়খৎলি।

ঙসি লৈবাক অসিদা খোংজেল খ্বাইদগী য়াম্না য়াঙনা ওপ্তিকেল ফাইবর তিংবগী থবক চত্থরি।

ঙসি লৈবাক অসিদা খোংজেল খ্বাইদগী য়াম্না য়াঙনা খ্বাইদগী য়াম্বা এফ.দি.আই. লাক্লি।

ঙসি লৈবাক অসিদা খোংজেল খ্বাইদগী য়াম্না য়াঙনা লু-নানবা হেঙ্গৎলক্লি।

অদুনা খ্বাইদগী য়াঙবা অসি অদোমগী তেগলাইন ওইবগী মতৌগুম খ্বাইদগী য়াঙবা অসি ঐখোয়গী লাইফলাইন ওইরি।

মরূপশিং কুনমাথোই শুবা চহীচা অসি ভারতকী ওইগনি হায়না ঐখোয়না লাইরিকশিংদা কয়া অমা পাখ্রে।

হৌখিবা চহী মঙাদা কন্না হোৎনখিবা অদুনা ঐখোয়না লৈবাক অসিগী য়ুমফম্বু চেৎশিনহন্নবা থবক তৌরি।

য়ুমফম অসিদা অনৌবা ভারতকী চীংলেম্লবা বিলদিং শাগৎলগনি।

ঙসি ঐহাক্না মপুং ফানা থাজবগা লোয়ননা হায়জরি মদুদি কুনমাথোই শুবা চহীচা অসি ভারতকী ওইগনি।

থাজবা অসিগা লোয়ননা ঐহাক্না ঐহাক্কী ৱাফম লোইশিঞ্জরি।

অদোম্না ঐহাকপু ইন্দিয়া তুদে কনক্লেবতা কৌবিদুনা ঐহাক্কী ওইবা ৱাফম খরা থমজনবা তঞ্জা পীনবীরি,

মসিগীদমক ময়াম পুম্নমকপু হন্না-হন্না থাগৎচরি।